This document is an excerpt from the EUR-Lex website
Document 32015R1829
Commission Delegated Regulation (EU) 2015/1829 of 23 April 2015 supplementing Regulation (EU) No 1144/2014 of the European Parliament and of the Council on information provision and promotion measures concerning agricultural products implemented in the internal market and in third countries
Regolament ta' Delega tal-Kummissjoni (UE) 2015/1829 tat-23 ta' April 2015 li jissupplimenta r-Regolament (UE) Nru 1144/2014 tal-Parlament Ewropew u tal-Kunsill dwar azzjonijiet ta' informazzjoni u ta' promozzjoni rigward prodotti agrikoli implimentati fis-suq intern u f'pajjiżi terzi
Regolament ta' Delega tal-Kummissjoni (UE) 2015/1829 tat-23 ta' April 2015 li jissupplimenta r-Regolament (UE) Nru 1144/2014 tal-Parlament Ewropew u tal-Kunsill dwar azzjonijiet ta' informazzjoni u ta' promozzjoni rigward prodotti agrikoli implimentati fis-suq intern u f'pajjiżi terzi
ĠU L 266, 13.10.2015, p. 3–8
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
13.10.2015 |
MT |
Il-Ġurnal Uffiċjali tal-Unjoni Ewropea |
L 266/3 |
REGOLAMENT TA' DELEGA TAL-KUMMISSJONI (UE) 2015/1829
tat-23 ta' April 2015
li jissupplimenta r-Regolament (UE) Nru 1144/2014 tal-Parlament Ewropew u tal-Kunsill dwar azzjonijiet ta' informazzjoni u ta' promozzjoni rigward prodotti agrikoli implimentati fis-suq intern u f'pajjiżi terzi
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) Nru 1144/2014 tal-Parlament Ewropew u tal-Kunsill tat-22 ta' Ottubru 2014 dwar azzjonijiet ta' informazzjoni u ta' promozzjoni rigward prodotti agrikoli implimentati fis-suq intern u f'pajjiżi terzi u li jħassar ir-Regolament tal-Kunsill (KE) Nru 3/2008 (1), u b'mod partikolari l-Artikolu 7(2), l-Artikolu 11(1), it-tieni subparagrafu tal-Artikolu 13(1) u l-Artikolu 15(8) tiegħu,
Wara li kkunsidrat ir-Regolament (UE) Nru 1306/2013 tal-Parlament Ewropew u tal-Kunsill tas-17 ta' Diċembru 2013 dwar il-finanzjament, il-ġestjoni u l-monitoraġġ tal-politika agrikola komuni u li jħassar ir-Regolamenti tal-Kunsill (KEE) Nru 352/78, (KE) Nru 165/94, (KE) Nru 2799/98, (KE) Nru 814/2000, (KE) Nru 1290/2005 u (KE) Nru 485/2008 (2), u b'mod partikolari l-Artikolu 64(6)(a) u l-Artikolu (66)(3)(d) tiegħu,
Billi:
(1) |
Ir-Regolament (UE) Nru 1144/2014 ħassar ir-Regolament tal-Kunsill (KE) Nru 3/2008 (3) u jistabbilixxi regoli ġodda li skonthom l-azzjonijiet ta' informazzjoni u ta' promozzjoni rigward prodotti agrikoli u ċerti prodotti tal-ikel ibbażati fuq prodotti agrikoli implimentati fis-suq intern jew f'pajjiżi terzi, jistgħu jkunu kompletament jew parzjalment iffinanzjati mill-baġit tal-Unjoni. |
(2) |
Ir-regoli stipulati f'dan ir-Regolament jikkonċernaw b'mod predominanti l-programmi sempliċi, ġestiti mill-Istati Membri. Għall-programmi multipli, ġestiti direttament mill-Kummissjoni, għandu japplika r-Regolament (UE, Euratom) Nru 966/2012 tal-Parlament Ewropew u tal-Kunsill (4). Madankollu, il-kundizzjonijiet li skonthom organizzazzjoni proponenti tista' tissottometti programm, u li huma stabbiliti fl-Artikolu 1 ta' dan ir-Regolament, għandhom japplikaw kemm għal programmi sempliċi kif ukoll dawk multipli. |
(3) |
L-Artikolu 7 tar-Regolament (UE) Nru 1144/2014 jistabbilixxi l-lista ta' organizzazzjonijiet proponenti. Jeħtieġ li jiġi speċifikat skont liema kundizzjonijiet kull kategorija ta' organizzazzjoni proponenti tista' tissottometti proposta għal programm ta' informazzjoni u ta' promozzjoni li se jiġi kofinanzjat mill-Unjoni. Sabiex jiġi żgurat illi l-organizzazzjonijiet proponenti huma rappreżentattivi għas-settur konċernat, jeħtieġ li jiġi speċifikat il-livell meħtieġ ta' rappreżentanza. Fejn possibbli, għandha tkun applikata r-regola sempliċi tal-Istat li jirrappreżenta l-maġġoranza tas-settur. |
(4) |
L-azzjonijiet ta' informazzjoni u ta' promozzjoni kkofinanzjati mill-Unjoni għandhom jimmiraw għall-ftuħ ta' swieq ġodda f'pajjiżi terzi u għandhom isiru minn firxa wiesgħa ta' organizzazzjonijiet. Sabiex tingħata spinta lill-kompetizzjoni u sabiex ikun żgurat l-aċċess l-aktar wiesa' possibbli għall-iskema ta' promozzjoni tal-Unjoni, għandhom jiġu stabbiliti regoli li jiżguraw li l-organizzazzjoni ma tirċievix appoġġ għall-istess programm ta' promozzjoni aktar minn darbtejn konsekuttivi. |
(5) |
Bil-ħsieb li jintagħżlu korpi inkarigati mill-implimentazzjoni tal-programmi sempliċi, l-organizzazzjonijiet proponenti għandhom jiżguraw l-aħjar valur għall-flus. Meta jagħmlu hekk, huma għandhom jevitaw kull konflitt ta' interess. Fejn l-organizzazzjoni proponenti hija korp irregolat mil-liġi pubblika fit-tifsira tal-Artikolu 2(1)(4) tad-Direttiva 2014/24/UE tal-Parlament Ewropew u tal-Kunsill (5), għandhom japplikaw ir-regoli stipulati f'dik id-Direttiva u trasposti fil-liġi nazzjonali. |
(6) |
L-iskema ta' promozzjoni tal-Unjoni għandha tikkomplementa u tirrinforza skemi mmexxija mill-Istati Membri u għandha tiffoka fuq messaġġ tal-Unjoni. F'dan ir-rigward, l-azzjonijiet ta' informazzjoni u ta' promozzjoni kofinanzjati mill-Unjoni għandhom juru dimensjoni speċifika tal-Unjoni li għaliha għandhom jiġu stabbiliti l-kriterji neċessarji. |
(7) |
Sal-lum, bi kważi żewġ terzi tal-programmi mwettqa fis-suq intern, l-Istat Membru ta' oriġini biss ġie mmirat mill-organizzazzjonijiet proponenti. Barra minn hekk, issal-oriġini ta' prodotti tista' tkun viżibbli fuq informazzjoni u materjal ta' promozzjoni b'ċerti kundizzjonijiet. Sabiex jiġi żgurat li jkun hemm valur miżjud ċar tal-Unjoni, is-swieq fil-mira tal-programmi kofinanzjati mill-Unjoni mwettqa fis-suq intern għandhom jitkabbru u m'għandhomx ikunu limitati għall-Istat Membru ta' oriġini tal-organizzazzjoni proponenti, diment li l-programmi jwasslu messaġġ dwar l-iskemi Ewropej ta' kwalità jew prattiki dijetetiċi xierqa skont il-White Paper tal-Kummissjoni Ewropea dwar strateġija għall-Ewropa dwar kwistjonijiet ta' saħħa marbuta man-nutriment, il-piż żejjed u l-obeżità (6). |
(8) |
Sabiex jiġi evitat kwalunkwe rkib fuq miżuri ta' promozzjoni ffinanzjati skont ir-Regolament (UE) Nru 1305/2013 tal-Parlament Ewropew u tal-Kunsill (7), jeħtieġ li jiġu esklużi mill-finanzjament skont dan ir-Regolament, il-programmi li għandhom biss impatt lokali u jiġu ppreferuti l-programmi li se joperaw fuq skala sinifikanti, b'mod partikolari fis-suq intern, f'termini ta' kopertura transfruntiera. |
(9) |
L-azzjonijiet ta' informazzjoni u ta' promozzjoni kkofinanzjati mill-Unjoni ma għandhomx ikunu orjentati skont marki kummerċjali jew skont l-oriġini iżda għandhom iwasslu messaġġ tal-Unjoni. F'dan ir-rigward, l-azzjonijiet ta' informazzjoni u ta' promozzjoni fis-suq intern li jkopru skema kif imsemmi fl-Artikolu 5(4) tar-Regolament (UE) Nru 1144/2014, għandhom jibgħatu messaġġ dwar il-karatteristiċi jew garanziji offruti minn dawn l-iskemi li jimmiraw, b'mod partikolari, li jżidu s-sensibilizzazzjoni u r-rikonoxximent ta' skemi ta' kwalità tal-Unjoni. |
(10) |
Sabiex il-konsumaturi jiġu infurmati, għandu jiġi speċifikat li għal kull informazzjoni dwar l-impatt ta' prodott fuq is-saħħa jeħtieġ li jkun hemm bażi xjentifika rikonoxxuta u jeħtieġ li tikkonforma mal-Anness tar-Regolament (KE) Nru 1924/2006 tal-Parlament Ewropew u tal-Kunsill (8) jew tiġi aċċettata mill-awtoritajiet nazzjonali kompetenti responsabbli għas-saħħa pubblika fil-pajjiż fejn l-operazzjonijiet jitwettqu. |
(11) |
Fid-dawl tan-natura speċifika tal-azzjonijiet ta' promozzjoni, għandhom jiġu stabbiliti regoli dwar l-eliġibbiltà tal-ispejjeż imġarrba mill-benefiċjarju għall-implimentazzjoni ta' programm. |
(12) |
Programmi sempliċi għandhom jiġu ffinanzjati fuq il-bażi tar-Regolament (UE) Nru 1306/2013. L-Artikolu 19(4) tar-Regolament ta' Delega tal-Kummissjoni (UE) Nru 907/2014 (9) jistipula li l-imposti marbuta mat-titoli għandhom jitħallsu mill-parti li tagħti l-garanzija. Skont il-punt (a) tat-tieni subparagrafu tal- Artikolu 126(3) tar-Regolament (UE, Euratom) Nru 966/2012, li għandhom japplikaw għal programmi multipli, l-ispejjeż marbuta mal-garanzija ta' prefinanzjament ippreżentata mill-benefiċjarju tal-għotja għandhom jitqiesu bħala eliġibbli għal finanzjament tal-Unjoni. Sabiex jiġi żgurat it-trattament ugwali ta' programmi sempliċi u multipli li jistgħu jiġu sottomessi t-tnejn mill-istess organizzazzjonijiet proponenti, għandu jkun hemm deroga mill-Artikolu 19(4) tar-Regolament (UE) Nru 907/2014 biex jippermetti li l-ispejjeż ta' titoli jkunu eliġibbli għall-finanzjament tal-Unjoni. |
(13) |
Sabiex jitħarsu b'mod effettiv l-interessi finanzjarji tal-Unjoni, għandhom jiġu adottati miżuri xierqa bil-għan li jiġu miġġielda l-frodi u n-negliġenzi serji. Għal dan il-fini, għandhom jiġu stabbiliti penali amministrattivi wara li jiġu kkunsidrati l-prinċipji tal-effikaċja, tad-dissważività u tal-proporzjonalità. Il-penali amministrattivi skont dan ir-Regolament għandhom jitqiesu dissważivi biżżejjed biex jiskoraġġixxu n-nuqqas intenzjonali ta' konformità. |
(14) |
Għal raġunijiet ta' ċarezza u ta' ċertezza legali, ir-Regolament tal-Kummissjoni (KE) Nru 501/2008 (10) dwar termini u kundizzjonijiet ta' applikazzjoni tar-Regolament tal-Kunsill (KE) Nru 3/2008 għandu jiġi mħassar. Madankollu, dan għandu jkompli japplika fir-rigward ta' programmi li ġew magħżula skont id-dispożizzjonijiet tiegħu, |
ADOTTAT DAN IR-REGOLAMENT:
Artikolu 1
Kundizzjonijiet li skonthom organizzazzjoni proponenti tista' tippreżenta programm sempliċi jew multipli
1. L-organizzazzjonijiet proponenti kif imsemmi fl-Artikolu 7(1) tar-Regolament (UE) Nru 1144/2014 jistgħu jissottomettu proposta għal programm ta' informazzjoni u ta' promozzjoni sakemm dawn ikunu rappreżentattivi tas-settur jew tal-prodott ikkonċernat kif ġej:
(a) |
organizzazzjoni professjonali jew interprofessjonali, stabbilita fi Stat Membru jew fil-livell tal-Unjoni, kif imsemmi fl-Artikolu 7(1)(a) u (b) tar-Regolament (UE) Nru 1144/2014 rispettivament, għandhom jitqiesu li huma rappreżentattivi tas-settur ikkonċernat mill-programm:
|
(b) |
grupp kif definit fil-punt 2 tal-Artikolu 3 tar-Regolament (UE) Nru 1151/2012 tal-Parlament Ewropew u tal-Kunsill (13) u li hemm referenza għalihom fl-Artikolu 7(1)(a) tar-Regolament (UE) Nru 1144/2014, għandu jitqies li huwa rappreżentattiv ta' isem protett skont ir-Regolament (UE) Nru 1151/2012 u kopert mill-programm, meta dan jammonta għal mill-inqas 50 % tal-volum jew tal-valur minimu tal-produzzjoni li tista' titqiegħed fis-suq tal-prodott(i) li ismu jkun protett; |
(c) |
organizzazzjoni ta' produtturi jew assoċjazzjoni ta' organizzazzjonijiet ta' produtturi kif imsemmija fl-Artikolu 7(1)(c) tar-Regolament (UE) Nru 1144/2014 għandha titqies li tkun rappreżentattiva tal-prodott(i) jew tas-settur ikkonċernat mill-programm, fejn hija rikonoxxuta mill-Istat Membru skont l-Artikoli 154 jew 156 tar-Regolament (UE) Nru 1308/2013 jew skont l-Artikolu 14 tar-Regolament (UE) Nru 1379/2013; |
(d) |
bl-eċċezzjoni ta' programmi mwettqa wara telf ta' fiduċja tal-konsumaturi, korp tas-settur agroalimentari kif imsemmi fl-Artikolu 7(1)(d) tar-Regolament (UE) Nru 1144/2014 għandu jkun rappreżentattiv tas-settur(i) ikkonċernat(i) mill-programm billi jkun hemm rappreżentanti ta' dak/dawk il-prodott(i) jew is-settur fost is-sħubiji tiegħu. |
2. B'deroga mill-punti (a) (i) u (b) tal-paragrafu 1, jistgħu jiġu aċċettati limiti aktar baxxi, jekk l-organizzazzjoni proponenti turi fil-proposta mressqa li jeżistu ċirkostanzi speċifiċi, inkluż l-evidenza dwar l-istruttura tas-suq, li jiġġustifikaw it-trattament tal-organizzazzjoni proponenti bħala rappreżentattiva tal-prodott(i) jew tas-settur ikkonċernat.
3. L-organizzazzjoni proponenti għandu jkollha biżżejjed riżorsi tekniċi, finanzjarji u professjonali biex twettaq il-programm b'mod effettiv.
4. Organizzazzjoni proponenti ma għandhiex tirċievi appoġġ għall-programmi ta' informazzjoni u ta' promozzjoni dwar l-istess prodott jew skema, li tkun saret fl-istess suq ġeografiku f'aktar minn żewġ okkażjonijiet konsekuttivi.
Artikolu 2
Għażla ta' korpi inkarigati mill-implimentazzjoni tal-programmi sempliċi
1. L-organizzazzjonijiet proponenti għandhom jagħżlu korpi korpi inkarigati mill-implimentazzjoni tal-programmi sempliċi li jiżguraw l-aħjar valur għall-flus. Huma u jagħmlu dan, iridu jieħdu l-miżuri kollha biex jevitaw kull sitwazzjoni fejn l-implimentazzjoni imparzjali u oġġettiva tal-azzjoni hija kompromessa għal raġunijiet li jinvolvu interess ekonomiku, affinità politika jew nazzjonali, rabtiet tal-familja jew emozzjonali jew kwalunkwe interess ieħor komuni (“kunflitt ta' interessi”).
2. Meta l-organizzazzjoni proponenti hija korp regolat mil-liġi pubblika fit-tifsira tal-Artikolu 2(1)(4) tad-Direttiva 2014/24/UE, hija għandha tagħżel korpi inkarigati mill-implimentazzjoni tal-programmi sempliċi skont il-leġiżlazzjoni nazzjonali li tittrasponi din id-Direttiva.
Artikolu 3
Eliġibbiltà ta' programmi sempliċi
1. Biex ikunu eliġibbli, il-programmi sempliċi għandhom:
(a) |
iħarsu r-regoli tal-Unjoni marbuta mal-prodotti kkonċernati u t-tqegħid fis-suq tagħhom; |
(b) |
ikunu ta' skala sinifikanti, b'mod partikolari f'termini tal-impatt transfruntier previst tagħhom li jista' jitkejjel. Fis-suq intern, dan ifisser li programm għandu jiġi implimentat f'mill-inqas żewġ Stati Membri b'sehem koerenti tal-baġit allokat b'mod partikolari billi jitqies id-daqs rispettiv tas-suq f'kull wieħed mill-Istati Membri kkonċernati, jew għandu jiġi implimentat fi Stat Membru wieħed jekk dak l-Istat Membru jkun differenti mill-Istat Membru ta' oriġini tal-organizzazzjoni/jiet proponenti. Dan ir-rekwiżit ma għandux japplika għal programmi li jgħaddu messaġġ li jikkonċerna l-iskemi ta' kwalità tal-Unjoni msemmija fl-Artikolu 5(4)(a), (b) u (c) tar-Regolament (UE) Nru 1144/2014 u għal programmi li jgħaddu messaġġ li jikkonċerna l-prattiki dijetetiċi xierqa; |
(c) |
ikollhom dimensjoni tal-Unjoni, kemm f'termini tal-kontenut tal-messaġġ u tal-impatt, b'mod partikolari billi jipprovdu informazzjoni dwar l-istandards Ewropej tal-produzzjoni, il-kwalità u s-sikurezza ta' prodotti alimentari Ewropej u l-prattiki u l-kultura Ewropej dwar id-dieta, jippromwovu r-reputazzjoni tal-prodotti Ewropej fis-suq intern u s-swieq internazzjonali, iqajmu sensibilizzazzjoni dwar prodotti u logos Ewropej fost il-pubbliku ġenerali u f'impriżi kummerċjali. Dan ifisser b'mod partikolari li programm fis-suq intern li jkopri skema waħda jew aktar kif imsemmi fl-Artikolu 5(4) tar-Regolament (UE) Nru 1144/2014, jiffoka fuq tali skema(i) fil-messaġġ ewlieni tiegħu tal-Unjoni. Meta f'dan il-programm, prodott wieħed jew diversi prodotti juru tali skema(i), huwa/huma għandhom jidhru bħala messaġġ sekondarju fir-rigward tal-messaġġ ewlieni tal-Unjoni; |
2. Barra minn hekk, jekk il-messaġġ imwassal minn programm jikkonċerna informazzjoni dwar l-impatt fuq is-saħħa, dan il-messaġġ:
(a) |
fis-suq intern, għandu jikkonforma, mal-Anness tar-Regolament (KE) Nru 1924/2006, jew jiġi aċċettat mill-awtorità nazzjonali responsabbli għas-saħħa pubblika fl-Istat Membru fejn jitwettqu l-operazzjonijiet; |
(b) |
f'pajjiżi terzi, għandu jiġi aċċettat mill-awtorità nazzjonali responsabbli għas-saħħa pubblika fil-pajjiż fejn jitwettqu l-operazzjonijiet. |
Artikolu 4
Spejjeż ta' programmi sempliċi eliġibbli għall-finanzjament tal-Unjoni
1. L-ispejjeż eliġibbli għall-finanzjament tal-Unjoni għandhom ikunu l-ispejjeż li jissodisfaw il-kriterji kollha li ġejjin:
(a) |
ikunu effettivament iġġarrbu mill-organizzazzjoni proponenti waqt l-implimentazzjoni tal-programm, bl-eċċezzjoni ta' spejjeż relatati ma' rapporti finali u evalwazzjoni; |
(b) |
huma indikati fil-baġit globali stmat tal-programm; |
(c) |
huma meħtieġa għall-implimentazzjoni tal-programm li jkun is-suġġett tal-kofinanzjament; |
(d) |
huma identifikabbli u verifikabbli, u b'mod partikolari jkunu rreġistrati fir-rekords tal-kontabbilià tal-organizzazzjoni proponenti u determinati skont l-istandards tal-kontabbiltà applikabbli tal-Istat Membru fejn l-organizzazzjoni proponenti tkun stabbilita; |
(e) |
iħarsu r-rekwiżiti tat-taxxa u l-leġiżlazzjoni soċjali applikabbli; |
(f) |
ikunu raġonevoli, ġustifikati, u jikkonformaw mal-prinċipju ta' ġestjoni finanzjarja tajba, b'mod partikolari rigward ekonomija u effiċjenza. |
2. Is-sejħa għal proposti msemmija fl-Artikolu 8(2) tar-Regolament (UE) Nru 1144/2014 għandha tispeċifika l-kategoriji tal-ispejjeż meqjusa bħala eliġibbli għall-finanzjament tal-Unjoni.
Madankollu, il-kategoriji ta' spejjeż li ġejjin għandhom ikunu eliġibbli:
(a) |
B'deroga mill-Artikolu 19(4) tar-Regolament (UE) Nru 907/2014, l-ispejjeż relatati ma' garanzija bil-quddiem ipprovduta minn bank jew istituzzjoni finanzjarja u ppreżentata mill-organizzazzjoni proponenti meta dik il-garanzija tkun meħtieġa skont l-Artikolu 15(6) tar-Regolament (UE) Nru 1144/2014; |
(b) |
l-ispejjeż marbuta mal-awditjar estern meta tali awditjar huwa meħtieġ bħala appoġġ għat-talbiet għal ħlas; |
(c) |
l-ispejjeż tal-persunal limitati għal salarji, l-ispejjeż tas-sigurtà soċjali u spejjeż oħrajn inklużi fir-remunerazzjoni ta' persunal assenjat għall-implimentazzjoni tal-programm, li jirriżultaw mil-liġi nazzjonali applikabbli jew mill-kuntratt tal-impjieg, l-ispejjeż għall-persuni fiżiċi li jaħdmu b'kuntratt dirett mal-organizzazzjoni proponenti għajr kuntratt ta' impjieg jew issekondat minn parti terza kontra pagament; |
(d) |
l-ammonti tal-VAT meta dawn ma jistgħux jiġu rkuprati skont il-leġiżlazzjoni nazzjonali tal-VAT u meta jitħallsu minn benefiċjarju ieħor minbarra persuna mhux taxxabbli kif definit fl-ewwel subparagrafu tal-Artikolu 13(1) tad-Direttiva 2006/112/KE (14); |
(e) |
l-ispejjeż ta' studji sabiex jiġu evalwati r-riżultati tal-azzjonijiet ta' informazzjoni u ta' promozzjoni, kif imsemmi fl- Artikolu 15(4) tar- Regolament (UE) Nru 1144/2014, imwettaq minn korp estern indipendenti u kkwalifikat. |
3. Spejjeż indiretti eliġibbli għandhom jiġu determinati bl-applikazzjoni ta' rata fissa ta' 4 % tat-total tal-ispejjeż diretti eliġibbli tal-persunal tal-organizzazzjoni proponenti.
Artikolu 5
Penali amministrattivi fir-rigward ta' programmi sempliċi
1. Fil-każ ta' irregolaritajiet, għandha tiġi imposta penali amministrattiva fuq l-organizzazzjoni proponenti li għandha tikkonsisti fi ħlas ta' darbtejn id-differenza bejn l-ammont imħallas inizjalment jew mitlub u l-ammont li jkun attwalment dovut.
2. F'każ ta' mġiba ħażina serja, b'mod partikolari r-ripetizzjoni tal-irregolaritajiet imsemmija fil-paragrafu 1 jew meta jinstab li l-organizzazzjoni proponenti wettqet ksur serju tal-obbligi tagħha fil-proċedura tal-għażla tal-programmi jew tal-operat tagħhom, l-organizzazzjoni proponenti għandha tiġi eskluża mid-dritt għall-parteċipazzjoni f'azzjonijiet ta' informazzjoni u ta' promozzjoni għal perjodu ta' tliet snin mid-data li fiha jkun ġie stabbilit il-ksur.
Artikolu 6
Tħassir
Ir-Regolament (KE) Nru 501/2008 huwa mħassar. Madankollu, dan jibqa' applikabbli għal programmi approvati skont id-dispożizzjonijiet tiegħu qabel l-1 ta' Diċembru 2015.
Artikolu 7
Dan ir-Regolament għandu jidħol fis-seħħ fis-seba' jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.
Huwa għandu japplika mill-1 ta' Diċembru 2015 għal proposti ta' programmi mressqa mill-1 ta' Diċembru 2015 'il quddiem.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, it-23 ta' April 2015.
Għall-Kummissjoni
Il-President
Jean-Claude JUNCKER
(1) ĠU L 317, 4.11.2014, p. 56.
(2) ĠU L 347, 20.12.2013, p. 549.
(3) Ir-Regolament tal-Kunsill (KE) Nru 3/2008 tas-17 ta' Diċembru 2007 dwar azzjonijiet ta' informazzjoni u promozzjoni għall-prodotti agrikoli fis-suq intern u fil-pajjiżi terzi (ĠU L 3, 5.1.2008, p. 1).
(4) Ir-Regolament (UE, Euratom) Nru 966/2012 tal-Parlament Ewropew u tal-Kunsill tal-25 ta' Ottubru 2012 dwar ir-regoli finanzjarji applikabbli għall-baġit ġenerali tal-Unjoni Ewropea u li jħassar ir-Regolament tal-Kunsill (KE, Euratom) Nru 1605/2002 (ĠU L 298, 26.10.2012, p. 1).
(5) Id-Direttiva 2014/24/UE tal-Parlament Ewropew u tal-Kunsill tas-26 ta' Frar 2014 dwar l-akkwist pubbliku u li tħassar id-Direttiva 2004/18/KE (ĠU L 94, 28.3.2014, p. 65). Id-Direttiva 2004/18/KE tħassret b'seħħ mit-18 ta' April 2016.
(6) COM(2007)279 finali, 30.5.2007.
(7) Ir-Regolament (UE) Nru 1305/2013 tal-Parlament Ewropew u tal-Kunsill tas-17 ta' Diċembru 2013 dwar l-appoġġ għall-iżvilupp rurali mill-Fond Agrikolu Ewropew għall-Iżvilupp Rurali (FAEŻR) u li jħassar ir-Regolament tal-Kunsill (KE) Nru 1698/2005 (ĠU L 347, 20.12.2013, p. 487).
(8) Ir-Regolament (KE) Nru 1924/2006 tal-Parlament Ewropew u tal-Kunsill tal-20 ta' Diċembru 2006 dwar indikazzjonijiet dwar in-nutrizzjoni u s-saħħa mogħtija fuq l-ikel (ĠU L 404, 30.12.2006, p. 9).
(9) Ir-Regolament ta' Delega tal-Kummissjoni (UE) Nru 907/2014 tal-11 ta' Marzu 2014 li jissupplimenta r-Regolament (UE) Nru 1306/2013 tal-Parlament Ewropew u tal-Kunsill rigward l-aġenziji tal-pagamenti u korpi oħra, il-ġestjoni finanzjarja, l-approvazzjoni tal-kontijiet, il-garanziji u l-użu tal-euro (ĠU L 255, 28.8.2014, p. 18).
(10) Ir-Regolament tal-Kummissjoni (KE) Nru 501/2008 tal-5 ta' Ġunju 2008 dwar termini u kundizzjonijiet ta' applikazzjoni tar-Regolament tal-Kunsill (KE) Nru 3/2008 rigward azzjonijiet ta' informazzjoni u promozzjoni għall-prodotti agrikoli fis-suq intern u fil-pajjiżi terzi (ĠU L 147, 6.6.2008, p. 3).
(11) Ir-Regolament (UE) Nru 1308/2013 tal-Parlament Ewropew u tal-Kunsill tas-17 ta' Diċembru 2013 li jistabbilixxi organizzazzjoni komuni tas-swieq fi prodotti agrikoli u li jħassar ir-Regolamenti tal-Kunsill (KEE) Nru 922/72, (KEE) Nru 234/79, (KE) Nru 1037/2001 u (KE) Nru 1234/2007 (ĠU L 347, 20.12.2013, p. 671).
(12) Ir-Regolament (UE) Nru 1379/2013 tal-Parlament Ewropew u tal-Kunsill tal-11 ta' Diċembru 2013 dwar l-organizzazzjoni komuni tas-swieq fil-prodotti tas-sajd u tal-akkwakultura, li jemenda r-Regolamenti tal-Kunsill (KE) Nru 1184/2006 u (KE) Nru 1224/2009 u li jħassar ir-Regolament tal-Kunsill (KE) Nru 104/2000 (ĠU L 354, 28.12.2013, p. 1).
(13) Ir-Regolament (UE) Nru 1151/2012 tal-Parlament Ewropew u tal-Kunsill tal-21 ta' Novembru 2012 dwar skemi tal-kwalità għal prodotti agrikoli u oġġetti tal-ikel (ĠU L 343, 14.12.2012, p. 1).
(14) Id-Direttiva tal-Kunsill 2006/112/KE tat-28 ta' Novembru 2006 dwar is-sistema komuni ta' taxxa fuq il-valur miżjud (ĠU L 347, 11.12.2006, p. 1)