23.12.2015   

MT

Il-Ġurnal Uffiċjali tal-Unjoni Ewropea

L 338/938

(1)

Ir-reġjun bijoġeografiku tal-Baħar l-Iswed imsemmi fl-Artikolu 1(c)(iii) tad-Direttiva 92/43/KEE huwa magħmul minn partijiet mit-territorju tal-Unjoni tal-Bulgarija u r-Rumanija, kif speċifikat fil-mappa bijoġeografika approvata fl-20 ta' April 2005 mill-kumitat stabbilit bl-Artikolu 20 ta' dik id-Direttiva, (il-“Kumitat dwar il-Ħabitats”).

(2)

Il-lista inizjali tas-siti ta' importanza Komunitarja għar-reġjun bijoġeografiku tal-Baħar l-Iswed, skont it-tifsira tad-Direttiva 92/43/KEE, ġiet adottata bid-Deċiżjoni tal-Kummissjoni 2009/92/KE (2). Dik il-lista ġiet aġġornata l-aħħar bid-Deċiżjoni ta' Implimentazzjoni tal-Kummissjoni 2013/737/UE (3).

(3)

Is-siti inklużi fil-lista tas-siti ta' importanza Komunitarja għar-reġjun bijoġeografiku tal-Baħar l-Iswed jiffurmaw parti min-netwerk Natura 2000, li huwa element essenzjali tal-ħarsien tal-bijodiversità fl-Unjoni. Biex in-netwerk Natura 2000 ikompli jiġi stabbilit dejjem iktar u fil-kuntest tal-adattament dinamiku ta' dan in-netwerk, il-listi tas-siti ta' importanza Komunitarja jiġu riveduti regolarment.

(4)

Sa minn Ottubru 2012, l-Istati Membri pproponew siti addizzjonali ta' importanza Komunitarja għar-reġjun bijoġeografiku tal-Baħar l-Iswed fit-tifsira tal-Artikolu 1 tad-Direttiva 92/43/KEE. L-Istati Membri ressqu wkoll bidliet fl-informazzjoni li għandha x'taqsam mas-siti li jkunu jinsabu fil-lista tas-siti ta' importanza Komunitarja għar-reġjun bijoġeografiku tal-Baħar l-Iswed.

(5)

Abbażi tal-abbozz tal-lista mfassla mill-Kummissjoni bi qbil ma' kull wieħed mill-Istati Membri kkonċernati, li tidentifika wkoll is-siti li għandhom tipi ta' ħabitats naturali ta' prijorità jew speċijiet ta' prijorità, għandha tiġi adottata lista aġġornata tas-siti magħżulin bħala siti ta' importanza Komunitarja għar-reġjun bijoġeografiku tal-Baħar l-Iswed. L-Artikoli 4(4) u 6(1) tad-Direttiva 92/43/KEE japplikaw għal siti inklużi reċentement.

(6)

L-għarfien dwar l-eżistenza u t-tqassim tat-tipi ta' ħabitats naturali u tal-ispeċijiet qiegħed jevolvi kontinwament minħabba s-sorveljanza mwettqa skont l-Artikolu 11 tad-Direttiva 92/43/KEE. Għalhekk, l-evalwazzjoni u l-għażla tas-siti fil-livell tal-Unjoni saru bl-użu tal-aqwa informazzjoni disponibbli bħalissa.

(7)

Fir-rigward tar-reġjun bijoġeografiku tal-Baħar l-Iswed, mhux l-Istati Membri kollha pproponew biżżejjed siti biex jiġu ssodisfati r-rekwiżiti tad-Direttiva 92/43/KEE għal ċerti tipi ta' ħabitats u speċijiet. Barra minn hekk, l-għarfien dwar l-eżistenza u t-tqassim ta' xi wħud mit-tipi ta' ħabitats naturali fl-Anness I u ta' xi wħud mill-ispeċijiet fl-Anness II tad-Direttiva 92/43/KEE baqa' mhux komplut. Għal dawk it-tipi ta' ħabitats u speċijiet, ma jistax jiġi konkluż li n-netwerk Natura 2000 huwa komplut.

(8)

Fl-interess taċ-ċarezza u tat-trasparenza, id-Deċiżjoni ta' Implimentazzjoni 2013/737/UE għandha titħassar.

(9)

Il-miżuri previsti f'din id-Deċiżjoni huma skont l-opinjoni tal-Kumitat dwar il-Ħabitats,