(1)

L-Artikolu IX tal-Ftehim ta' Marrakesh li jistabbilixxi l-Organizzazzjoni Dinjija tal-Kummerċ (WTO) jistabbilixxi, fost oħrajn, il-proċeduri għall-eżenzjonijiet mill-obbligi imposti fuq il-Membri tad-WTO minn dak il-Ftehim jew mill-Ftehimiet Multilaterali dwar il-Kummerċ fl-Annessi 1 A jew 1B jew 1C għal dak il-Ftehim u l-annessi tagħhom.

(2)

Fl-2011, intalbet eżenzjoni li biha l-Membri tad-WTO jkunu jistgħu jagħtu trattament preferenzjali lil servizzi u fornituri ta' servizzi ta' pajjiżi Membri l-inqas żviluppati mingħajr ma jestendu l-istess trattament għal servizzi u fornituri ta' servizzi simili tal-Membri l-oħra kollha tad-WTO billi b'mod eċċezzjonali jidderogaw mill-obbligu skont il-paragrafu 1 tal-Artikolu II tal-Ftehim Ġenerali dwar il-Kummerċ fis-Servizzi (“GATS”). Il-pożizzjoni tal-Unjoni favur dik l-eżenzjoni ġiet adottata permezz tad-Deċiżjoni tal-Kunsill 2012/8/UE (1).

(3)

Fis-17 ta' Diċembru 2011, il-Konferenza Ministerjali tad-WTO adottat deċiżjoni li tawtorizza lill-Membri tad-WTO biex jagħtu tali trattament preferenzjali lil servizzi u fornituri ta' servizzi ta' pajjiżi Membri l-inqas żviluppati għal perijodu ta' 15-il sena. Bis-saħħa ta' dik id-deċiżjoni, il-Membri tad-WTO li jestendu trattament preferenzjali għandhom jissottomettu notifika lill-Kunsill dwar il-Kummerċ fis-Servizzi (“CTS”) u t-trattament preferenzjali fir-rigward tal-applikazzjoni ta' miżuri għajr dawk deskritti fl-Artikolu XVI tal-GATS għandu jkun approvat mis-CTS f'konformità mal-proċeduri tiegħu.

(4)

Fid-deċiżjoni tagħha tas-7 ta' Diċembru 2013, il-Konferenza Ministerjali tad-WTO stabbiliet mill-ġdid ir-rekwiżit tal-approvazzjoni tas-CTS fir-rigward tal-applikazzjoni ta' miżuri għajr dawk deskritti fl-Artikolu XVI tal-GATS.

(5)

Il-pożizzjoni tal-Unjoni li tapprova t-trattament preferenzjali notifikat minn Membri tad-WTO, għajr l-Unjoni u l-Istati Membri tagħha, fir-rigward ta' servizzi u fornituri tas-servizzi ta' pajjiżi Membri l-inqas żviluppati, dwar l-applikazzjoni ta' miżuri għajr dawk deskritti fl-Artikolu XVI tal-GATS ġiet adottata permezz tad-Deċiżjoni tal-Kunsill (UE) 2015/1570 (2).

(6)

F'konformità mad-deċiżjonijiet tas-17 ta' Diċembru 2011 u tas-7 ta' Diċembru 2013 tal-Konferenza Ministerjali tad-WTO, fit-30 ta' Lulju 2015 l-Unjoni indikat lis-CTS l-intenzjoni tagħha li tinnotifika, soġġetta għall-proċeduri interni meħtieġa tagħha, it-trattament preferenzjali li l-Unjoni biħsiebha tagħmel disponibbli lis-servizzi u l-fornituri ta' servizzi ta' pajjiżi Membri l-inqas żviluppati.

(7)

Huwa fl-interess tal-objettivi tal-Unjoni għall-iżvilupp u jwassal għall-konklużjoni ta' parti min-negozjati dwar is-servizzi relatati mal-Aġenda ta' Doha għall-Iżvilupp għall-Unjoni li tfittex l-approvazzjoni għat-trattament preferenzjali lil hinn mill-aċċess għas-suq li biħsiebha tagħti lis-servizzi u l-fornituri ta' servizzi ta' pajjiżi Membri l-inqas żviluppati, b'kunsiderazzjoni speċjali għall-preferenzi mogħtija fir-rigward ta' soġġorn temporanju ta' persuni fiżiċi għall-forniment ta' servizzi sabiex jinħolqu inċentivi biex jissodisfaw l-obbligi ta' riammissjoni skont id-dritt internazzjonali, jimplimentaw ftehimiet ta' riammissjoni eżistenti u jikkonkludu dawk ġodda, dment li l-pajjiżi Membri l-inqas żviluppati jikkooperaw mal-Unjoni dwar il-ġestjoni tal-migrazzjoni.

(8)

Huwa xieraq li tiġi stabbilita l-pożizzjoni li għandha tittieħed f'isem l-Unjoni fis-CTS sabiex jiġi nnotifikat it-trattament preferenzjali li l-Unjoni biħsiebha tagħti lis-servizzi u l-fornituri ta' servizzi ta' pajjiżi Membri l-inqas żviluppati u tfittex l-approvazzjoni għat-trattament preferenzjali lil hinn mill-aċċess għas-suq,