This document is an excerpt from the EUR-Lex website
Document 32015D1947
Council Decision (EU) 2015/1947 of 1 October 2015 on the conclusion, on behalf of the European Union, of the Protocol Amending the Marrakesh Agreement establishing the World Trade Organisation
Deċiżjoni tal-Kunsill (UE) 2015/1947 tal-1 ta' Ottubru 2015 dwar il-konklużjoni, f'isem l-Unjoni Ewropea, tal-Protokoll li jemenda l-Ftehim ta' Marrakexx li Jistabbilixxi l-Organizzazzjoni Dinjija tal-Kummerċ
Deċiżjoni tal-Kunsill (UE) 2015/1947 tal-1 ta' Ottubru 2015 dwar il-konklużjoni, f'isem l-Unjoni Ewropea, tal-Protokoll li jemenda l-Ftehim ta' Marrakexx li Jistabbilixxi l-Organizzazzjoni Dinjija tal-Kummerċ
ĠU L 284, 30.10.2015, p. 1–2
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
ELI: http://data.europa.eu/eli/dec/2015/1947/oj
|
30.10.2015 |
MT |
Il-Ġurnal Uffiċjali tal-Unjoni Ewropea |
L 284/1 |
DEĊIŻJONI TAL-KUNSILL (UE) 2015/1947
tal-1 ta' Ottubru 2015
dwar il-konklużjoni, f'isem l-Unjoni Ewropea, tal-Protokoll li jemenda l-Ftehim ta' Marrakexx li Jistabbilixxi l-Organizzazzjoni Dinjija tal-Kummerċ
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-ewwel subparagrafu tal-Artikolu 207(4) flimkien mal-punt (v) tal-Artikolu 218(6)(a) tiegħu,
Wara li kkunsidra l-proposta mill-Kummissjoni Ewropea,
Wara li kkunsidra l-opinjoni tal-Parlament Ewropew,
Billi:
|
(1) |
F'Novembru 2001, l-Organizzazzjoni Dinjija tal-Kummerċ (“WTO”) nediet iċ-Ċiklu ta' Doha ta' negozjati kummerċjali, magħruf bħala l-Aġenda tal-Iżvilupp ta' Doha. In-negozjati dwar il-faċilitazzjoni tal-kummerċ ġew imnedija f'Lulju 2004, abbażi ta' impenn biex jiġu ċċarati u mtejba bosta artikoli tal-Ftehim Ġenerali dwar it-Tariffi u l-Kummerċ 1994 (“GATT 1994”): L-Artikolu V (Libertà ta' Tranżitu), l-Artikolu VIII (Drittijiet ta' Ħlas u Formalitajiet marbuta mal-Importazzjoni u l-Esportazzjoni), u l-Artikolu X (Pubblikazzjoni u Amministrazzjoni tar-Regolamenti Kummerċjali), bil-ħsieb li jitħaffef aktar il-moviment, ir-rilaxx u l-ikklerjar ta' merkanzija, inklużi merkanzija fi tranżitu. Barra minn hekk, il-mandat irreferi għal dispożizzjonijiet għal kooperazzjoni effettiva bejn l-awtoritajiet doganali jew oħra xierqa marbuta mal-faċilitazzjoni tal-kummerċ u kwistjonijiet ta' konformità doganali. |
|
(2) |
In-negozjati tmexxew mill-Kummissjoni b'konsultazzjoni mal-Kumitat Speċjali stabbilit taħt l-Artikolu 207(3) tat-Trattat. |
|
(3) |
Fid-disa' Konferenza Ministerjali tad-WTO li saret f'Bali mit-3 sas-6 ta' Diċembru 2013 ġiet adottata d-Deċiżjoni Ministerjali dwar il-Faċilitazzjoni tal-Kummerċ, fejn ġew konklużi n-negozjati dwar il-Ftehim dwar il-Faċilitazzjoni tal-Kummerċ soġġett għar-rieżami legali tat-test. Id-Deċiżjoni Ministerjali waqqfetukoll il-Kumitat Preparatorju dwar il-Faċilitazzjoni tal-Kummerċ u tat struzzjonijiet lill-Kunsill Ġenerali tad-WTO biex jadotta Protokoll li jinkludi l-Ftehim bħala Anness 1A għall-Ftehim ta' Marrakexx li jistabbilixxi d-WTO u li biex jinfetaħ għall-aċċettazzjoni minn kull Membru tad-WTO skont il-proċeduri interni tagħha. |
|
(4) |
Fil-laqgħa tiegħu tas-27 ta' Novembru 2014, il-Kunsill Ġenerali tad-WTO adotta l-Protokoll li jemenda l-Ftehim ta' Marrakexx li jistabbilixxi l-Organizzazzjoni Dinjija tal-Kummerċ (“il-Protokoll”) u fetħu għall-aċċettazzjoni mill-Membri tad-WTO. |
|
(5) |
Il-Protokoll jinkludi il-Ftehim dwar il-Faċilitazzjoni tal-Kummerċ u l-impenji ta' pajjiżi li qed jiżviluppaw li huma inkorporati bħala Anness għal dak il-Ftehim. Numru sinifikanti ta' pajjiżi li qed jiżviluppaw diġà nnotifikaw l-impenji tagħhom tal-Kategorija A skont l-Artikolu 15(1) tal-Ftehim dwar il-Faċilitazzjoni tal-Kummerċ. Il-Kumitat dwar il-Faċilitazzjoni tal-Kummerċ se jirċievi n-notifiki tal-impenji skont il-Kategorija A għall-pajjiżi l-anqas żviluppati skont l-Artikolu 15(2) tal-Ftehim dwar il-Faċilitazzjoni tal-Kummerċ u n-notifiki tal-impenji skont il-Kategoriji B u C kemm għall-pajjiżi li qed jiżviluppaw kif ukoll għall-pajjiżi l-anqas żviluppati skont l-Artikolu 16(5) tal-Ftehim dwar il-Faċilitazzjoni tal-Kummerċ. L-impenji se jsiru parti integrali tal-Ftehim dwar il-Faċilitazzjoni tal-Kummerċ. |
|
(6) |
Il-Protokoll għandu jiġi approvat f'isem l-Unjoni, |
ADOTTA DIN ID-DEĊIŻJONI:
Artikolu 1
Il-Protokoll li Jemenda l-Ftehim ta' Marrakexx li Jistabbilixxi l-Organizzazzjoni Dinjija tal-Kummerċ huwa b'dan approvat f'isem l-Unjoni Ewropea.
It-test tal-Protokoll huwa mehmuż ma' din id-Deċiżjoni.
Artikolu 2
Il-President tal-Kunsill għandu jaħtar lill-persuna/i bis-setgħa li tiddepożita, f'isem l-Unjoni, l-istrument ta' aċċettazzjoni, kif speċifikat fil-paragrafu 4 tal-Protokoll (1).
Artikolu 3
Dan il-Protokoll ma għandux jiġi interpretat bħala li jagħti xi drittijiet jew jimponi xi obbligi li jistgħu jiġu invokati quddiem il-qrati u t-tribunali tal-Unjoni jew tal-Istati Membri.
Artikolu 4
Din id-Deċiżjoni għandha tidħol fis-seħħ fid-data tal-adozzjoni tagħha.
Magħmul fil-Lussemburgu, l-1 ta' Ottubru 2015.
Għall-Kunsill
Il-President
É. SCHNEIDER
(1) Id-data tad-dħul fis-seħħ tal-Protokoll se tiġi ppubblikata f'Il-Ġurnal Uffiċjali tal-Unjoni Ewropea mis-Segretarjat Ġenerali tal-Kunsill.