(1)

L-Artikolu 300 tat-Trattat dwar il-Funzjonament tal-Unjoni Ewropea (TFUE) jistabbilixxi r-regoli għall-kompożizzjoni tal-Kumitat Ekonomiku u Soċjali Ewropew.

(2)

L-Artikolu 301 TFUE jipprevedi li huwa l-Kunsill li għandu jiddetermina l-kompożizzjoni tal-Kumitat Ekonomiku u Soċjali Ewropew. L-għadd ta' membri ma għandux jaqbeż it-350.

(3)

Il-bilanċ attwali fil-kompożizzjoni tal-Kumitat Ekonomiku u Soċjali Ewropew għandu sa fejn hu possibbli jinżamm peress li huwa r-riżultat ta' Konferenzi Intergovernattivi suċċessivi.

(4)

Din id-Deċiżjoni hija ta' natura transizzjonali għaliex hija adottata biex tindirizza kwistjoni legali speċifika, jiġifieri d-diskrepanza li teżisti bejn l-għadd totali ta' membri tal-Kumitat Ekonomiku u Soċjali Ewropew li jirriżulta minn Konferenzi Intergovernattivi suċċessivi u l-għadd massimu ta' membri stabbilit mill-Artikolu 301 TFUE.

(5)

Din id-Deċiżjoni hija adottata fil-kuntest ta' ċirkostanzi speċifiċi relatati mal-Kumitat Ekonomiku u Soċjali Ewropew u ma tikkostitwixxix preċedent għall-kompożizzjoni ta' kwalunkwe istituzzjoni.

(6)

Din id-Deċiżjoni għandha tiġi riveduta mill-Kunsill, abbażi ta' rakkomandazzjoni tal-Kummissjoni, fi żmien adegwat għall-mandat tal-Kumitat li jibda fl-2020 jew, fi kwalunkwe każ, fid-dawl tat-tkabbir li jmiss.

(7)

Ir-reviżjoni għandha tkun ibbażata fuq l-eżitu tad-Deċiżjoni attwali, jiġifieri bl-osservanza tal-għadd tas-siġġijiet stabbilit permezz tagħha għall-Istati Membri li huma interessati mill-bidla preżenti. Bħala riżultat ta' din ir-reviżjoni, it-tnaqqis ulterjuri ma jkunx applikabbli għal Stati Membri milqutin mid-Deċiżjoni attwali.

(8)

Sabiex ikun possibbli li l-Kumitat Ekonomiku u Soċjali Ewropew ikun magħmul skont l-Artikolu 23 tal-Att tal-Adeżjoni tal-Kroazja sa tmiem il-mandat tal-membri attwali, id-dħul fis-seħħ ta' din id-Deċiżjoni għandu jiġi differit sa dik id-data,