4.7.2015   

MT

Il-Ġurnal Uffiċjali tal-Unjoni Ewropea

L 175/45

(1)

Il-Ftehim milħuq bejn il-Komunità Ewropea u New Zealand dwar miżuri sanitarji applikabbli għall-kummerċ f'annimali ħajjin u ta' prodotti tal-annimali (“il-Ftehim”) jistipula l-possibbiltà li tiġi rikonoxxuta l-ekwivalenza tal-miżuri sanitarji wara li l-Parti li tesporta tkun uriet b'mod oġġettiv li l-miżuri li tkun applikat ikunu wasslu għal-livell xieraq ta' ħarsien (“il-Partijiet”).

(2)

Il-Ftehim ġie approvat kif xieraq bid-Deċiżjoni 97/132/KE li tistipula wkoll li l-emendi għall-Annessi tiegħu u li jirriżultaw mir-rakkomandazzjonijiet tal-Kumitat Konġunt tal-Ġestjoni, u għandhom jiġu adottati skont il-proċedura msemmija fid-Direttiva tal-Kunsill 72/462/KEE (2). (Id-Direttiva 72/462/KEE ġiet revokata mid-Direttiva tal-Kunsill 2004/68/KE (3). Il-premessa 10 tad-Direttiva 2004/68/KE tistqarr li r-regoli dwar is-saħħa pubblika u l-kontrolli uffiċjali li japplikaw għal-laħam u l-prodotti tal-laħam fid-dawl tad-Direttiva 72/462/KEE ġew sostitwiti b'dawk tar-Regolament (KE) Nru 854/2004 tal-Parlament Ewropew u tal-Kunsill (4). Dik il-premessa tiddikjara wkoll li r-regoli l-oħra tad-Direttiva 72/462/KEE ġew sostitwiti bid-Direttiva tal-Kunsill2002/99/KE (5) u bid-Direttiva 2004/68/KE.

(3)

New Zealand irristrutturat l-awtoritajiet kompetenti tagħha fl-2010 u l-awtorità kompetenti l-ġdida issa hi l-Ministeru għall-Industriji Primarji. L-Unjoni pproponiet emenda żgħira fid-definizzjoni tar-rwoli tal-Istati Membri u l-Kummissjoni. Il-Partijiet irrakkomandaw li jiġi aġġornat l-Anness II tal-Ftehim biex jirrifletti dawn il-bidliet.

(4)

Il-Partijiet irrakkomandaw li jsiru bidliet fid-definizzjonijiet tal-istatus ta' ekwivalenza differenti, b'mod partikulari fuq l-istatus “Iva-1” fil-Glossarju tal-Anness V tal-Ftehim, fejn maċ-ċertifikazzjoni ddaħħlet link għall-attestazzjoni mudell fit-Taqsima 1(a) tal-Anness VII tiegħu. Il-Partijiet xtaqu wkoll jistipulaw bażi legali għall-Unjoni biex tintuża s-sistema elettronika integrata tal-Unjoni prevista fid-Deċiżjoni tal-Kummissjoni 2003/24/KE (6) (“TRACES”) li tistabbilixxi ċ-ċertifikati tal-importazzjoni għal prodotti “Iva-1” minn New Zealand. L-użu tas-sistema jippermetti li ċ-ċertifikazzjoni tiġi aġġornata aktar malajr u anki li ċ-ċertifikazzjoni elettronika tintuża dejjem aktar. Il-Partijiet irrakkomandaw ukoll li jiġu inklużi d-definizzjonijiet ta' TRACES u tas-sistema elettronika ta' New Zealand (E-cert) u li jiġu aġġornati l-ismijiet ta' ċerti mardiet tal-annimali elenkati fil-Glossarju għall-Anness V tal-Ftehim.

(5)

New Zealand wettqet valutazzjoni tar-riskju ġdida għall-importazzjoni ta' semen u embrijuni bovini. Minħabba f'dan, il-marda emorraġika epiżootika ma għadhiex titqies bħala marda ta' sinifikanza għas-semen tal-bovini, u New Zealand neħħiet il-kundizzjonijiet tagħha fuq l-importazzjoni. Barra minn hekk, New Zealand irrevediet il-kundizzjonijiet dwar il-Q-fever u d-dijarea virali tal-bovini (tip II). Il-Partijiet għalhekk irrakkomandaw li jiġi emendat il-Kapitolu 1 dwar is-“Semen” u l-Kapitolu 2 dwar l-“Embrijuni” tat-Taqsima 1 u l-Kapitolu 28 dwar “Dispożizzjonijiet Mixxellanji ta' Ċertifikazzjoni” tat-Taqsima 5 tal-Anness V tal-Ftehim. Barra minn hekk, il-Partijiet irrakkomandaw li fil-Kapitolu 1 dwar is-“Semen” tat-Taqsima 1 jitħassru l-“azzjonijiet” preċedenti għall-esportazzjonijiet minn New Zealand lejn l-Unjoni u li tiġi introdotta “azzjoni” ġdida li titlob lill-Unjoni tikkunsidra li tanalizza l-ittestjar tas-semen għar-rhinotracheitis bovina infettiva (IBR) permezz tal-metodoloġija tal-ittestjar ta' reazzjoni katina tal-polimerażi (PCR) approvata mill-Organizzazzjoni Dinjija għas-Saħħa tal-Annimali (OIE), li tipprovdi assigurazzjoni ekwivalenti għall-ħelsien mill-mard tal-IBR. Għalhekk huwa xieraq li jkunu emendati l-kundizzjonijiet speċjali fil-Kapitoli 1 u 2 tat-Taqsima 1 u d-dispożizzjonijiet ta' ċertifikazzjoni rilevanti fil-Kapitolu 28 tat-Taqsima 5 tal-Anness V tal-Ftehim.

(6)

F'dak li għandu x'jaqsam ma' naħal ħaj, l-Unjoni adottat leġiżlazzjoni ġdida dwar l-elenkar ta' Stati Membri jew reġjuni ħielsa mill-varroażi fin-naħal u li fil-każ tagħhom japplikaw xi restrizzjonijiet kummerċjali. Dawn japplikaw ukoll għall-importazzjonijiet minn New Zealand, minħabba li din mhix ħielsa minn din il-marda. Il-Partijiet irrakkomandaw li fil-Kapitolu 3 dwar l-“Annimali ħajjin” tat-Taqsima 1 tal-Anness V tal-Ftehim, fil-każ tan-naħal ħaj u n-naħal bagħli, inkluża l-“ġermoplażma tan-naħal/tan-naħal bagħli” spjegata mal-kundizzjonijiet speċjali, tiżdied restrizzjoni fuq l-esportazzjoni lejn l-Istati Membri jew reġjuni tagħhom elenkati fl-Anness tad-Deċiżjoni ta' Implimentazzjoni tal-Kummissjoni 2013/503/UE (7). L-Unjoni emendat ukoll il-kundizzjonijiet tal-importazzjoni tal-larva Amerikana fid-Deċiżjoni tal-Kummissjoni 2010/270/UE (8). Il-Partijiet għalhekk irrakkomandaw ukoll li jiġi emendat il-Kapitolu 28 dwar “Dispożizzjonijiet Mixxellanji ta' Ċertifikazzjoni” tat-Taqsima 5 tal-Anness V tal-Ftehim.

(7)

Għal raġunijiet ta' konsistenza mal-Kapitolu 4.B dwar il-“Laħam tat-Tjur Frisk” tat-Taqsima 2 tal-Anness V tal-Ftehim, il-Partijiet qablu li jiġi emendat it-Titolu tat-Taqsima 2 fl-Anness V tagħha, billi tiġi inkluża l-kelma “frisk” wara “laħam tat-tjur”.

(8)

New Zealand wettqet valutazzjoni tar-riskju dwar is-sindromu riproduttiv u respiratorju tal-ħnieżer (PRRS) u emendat il-kundizzjonijiet tagħha fuq l-importazzjoni tal-majjal. Il-Partijiet għalhekk irrakkomandaw li l-PRRS jiżdied mal-kundizzjonijiet speċjali tal-Kapitolu 4.A. dwar il-“Laħam Frisk” tat-Taqsima 2 tal-Anness V tal-Ftehim, dwar is-saħħa tal-annimali, il-ħnieżer għall-esportazzjoni mill-Unjoni għal New Zealand u li jistabbilixxi l-attestazzjonijiet rilevanti fil-Kapitolu 28 tat-Taqsima 5 tal-Anness V tiegħu.

(9)

New Zealand irrevediet ir-regoli tagħha dwar l-użu tal-kartun fl-immaniġġjar tal-laħam fl-2010. L-Unjoni evalwat dawk ir-regoli ġodda u stabbiliet li huma ekwivalenti għar-regoli tal-Unjoni. Għaldaqstant il-Partijiet qablu li jżommu dik l-ekwivalenza, u li ma hemm bżonn ta' ebda bidla fl-Anness V tal-Ftehim.

(10)

New Zealand irrevediet is-sistema tagħha ta' spezzjoni tal-laħam tal-bovini, l-ovini u l-kaprini fl-2012. Il-bidliet ewlenin jikkonċernaw it-trasferiment tal-kompiti ta' spezzjoni tal-laħam marbuta mal-kwalità lill-operatur tan-negozju tal-ikel, filwaqt li s-superviżjoni globali tibqa' għand l-awtorità kompetenti. L-Unjoni evalwat dawk ir-regoli ġodda u stabbiliet li huma ekwivalenti għar-regoli tal-Unjoni. Għaldaqstant il-Partijiet qablu li jżommu dik l-ekwivalenza, u li ma hemm bżonn ta' ebda bidla fl-Anness V tal-Ftehim.

(11)

New Zealand wettqet valutazzjoni tar-riskju bbażata fuq ix-xjenza dwar prodotti tal-ħalib mhux ipproċessat u stabbiliet ir-rekwiżiti tal-importazzjoni u l-mekkaniżmi legali biex tirrikonoxxi l-ekwivalenza għal prodotti tal-ħalib mhux pasturizzat (minbarra l-ħalib mhux ipproċessat). L-Unjoni studjat din l-evalwazzjoni u ż-żewġ Partijiet ikkonkludew u rrakkomandaw li tiġi rikonoxxuta l-ekwivalenza reċiproka fuq dawn il-prodotti fl-2010. Għall-konsistenza u s-simplifikazzjoni, il-Partijiet irrakkomandaw li fil-Kapitolu 8 dwar il-“Ħalib u l-prodotti tal-ħalib għall-konsum mill-bniedem” tat-Taqsima 3 tal-Anness V tal-Ftehim, is-subtipi “Ġobnijiet rotob minn ħalib mhux ipproċessat” u “Ġobnijiet iebsa minn ħalib mhux ipproċessat (il-Parmiġġan)” jiġu sostitwiti bis-subtip ġdid “Prodotti tal-ħalib mhux pasturizzat (minbarra l-ħalib mhux ipproċessat)” issettjat fl-istatus “Iva-1” mingħajr xi kundizzjonijiet speċjali.

(12)

L-Unjoni rrieżaminat ir-regoli tagħha dwar il-metodi tal-ittestjar biex jinstabu bijotossini marini fil-molluski bivalvi ħajjin fir-Regolament tal-Kummissjoni (UE) Nru 15/2011 (9). New Zealand ressqet lill-Unjoni d-dossiers ta' ekwivalenza dwar il-metodi tal-ittestjar għall-bijotossini kif ukoll il-kriterji ta' approvazzjoni fis-snin 2003, 2006 u 2010. Wara li saret evalwazzjoni, il-Partijiet stabbilew li s-sistemi ta' xulxin huma ekwivalenti, u li ma hemm bżonn ta' ebda bidla fl-Anness V tal-Ftehim.

(13)

L-Unjoni wettqet rieżami importanti tal-leġiżlazzjoni tagħha dwar il-prodotti sekondarji tal-annimali (“ABP”). Ir-Regolament (KE) Nru 1774/2002 tal-Parlament Ewropew u tal-Kunsill (10) ġie rrevokat u sostitwit bir-Regolament (KE) Nru 1069/2009 tal-Parlament Ewropew u tal-Kunsill (11) u r-Regolament tal-Kummissjoni (UE) Nru 142/2011 (12). Abbażi ta' valutazzjoni dwar iż-żamma tal-ekwivalenza, il-Partijiet ikkonkludew li l-istatus ta' ekwivalenza għall-ABP fil-każ tal-esportazzjoni ta' New Zealand lejn l-Unjoni, kif ukoll fil-każ tal-esportazzjoni tal-Unjoni lejn New Zealand fil-qafas tal-Ftehim, ma jintlaqatx mil-leġiżlazzjoni l-ġdida tal-Unjoni u li ma hemm bżonn ta' ebda bidla fl-Anness V tal-Ftehim.

(14)

Fejn tidħol l-emenda tar-Regolament (KE) Nru 1774/2002 bir-Regolament tal-Kummissjoni (KE) Nru 668/2004 (13) li żżid l-interjuri għat-taħwir u derivattivi mix-xaħam bħala prodott bażiku separat, il-Partijiet irrakkomandaw li l-interjuri għat-taħwir jiżdiedu bħala prodott bażiku elenkat fil-Kapitolu 21 dwar l-“Ikel tal-annimali domestiċi (inkluż dak ipproċessat) li fih materjal tal-Kategorija 3 biss” tat-Taqsima 4 fl-Anness V tal-Ftehim. Il-Partijiet irrakkomandaw li għas-saħħa tal-annimali u dik pubblika jiġi stabbilit l-istatus “Iva-3” għall-esportazzjoni ta' New Zealand lejn l-Unjoni u l-istatus “NE” għall-esportazzjoni tal-Unjoni lejn New Zealand.

(15)

Il-partijiet irrakkomandaw li jiġi emendat it-titolu tal-Kapitolu 27 tat-Taqsima 5 tal-Anness V tal-Ftehim minn “Definizzjonijiet” għal “Kwistjonijiet orizzontali”, filwaqt li jitħassru s-subkapitoli kollha ta' dan il-Kapitolu.

(16)

Fis-Subkapitolu “Sistemi ta' Ċertifikazzjoni” tal-Kapitolu 27 tat-Taqsima 5 tal-Anness V tal-Ftehim tiċċara t-tip ta' prodotti li għalihom tapplika l-ekwivalenza tas-sistemi ta' ċertifikazzjoni. Il-Partijiet jirrakkomandaw li jmexxu din il-kjarifika dwar it-tip ta' prodotti bażiċi mill-kolonna “Kundizzjonijiet Speċjali” għall-kolonna “Ekwivalenza” ta' dak is-Sottokapitolu, mingħajr tibdil.

(17)

Il-Partijiet jirrakkomandaw li fil-Kapitolu 27 tat-Taqsima 5 tal-Anness V tal-Ftehim jidħol is-subkapitolu dwar id-dispożizzjonijiet għar-riesportazzjoni tal-prodotti importati meta l-prodott joriġina minn pajjiż terz u minn stabbiliment(i) awtorizzati għall-esportazzjoni tal-prodott lejn l-Unjoni u New Zealand. Din id-dispożizzjoni fil-preżent hi prevista fl-Anness VII tad-Deċiżjoni tal-Kummissjoni 2003/56/KE (14).

(18)

Abbażi ta' valutazzjoni, il-Partijiet ikkonkludew li fil-każ ta' prodotti fejn tkun stabbilita l-ekwivalenza “Iva-1”, is-sistemi taż-żewġ Partijiet tal-monitoraġġ u l-ittestjar mikrobijoloġiku għall-prodotti tas-sajd u dawk tal-ħalib kienu ekwivalenti, għalkemm irrikonoxxew li l-kriterji mikrobijoloġiċi jistgħu jkunu differenti. Ir-responsabbiltà biex jiġu ssodisfati l-kriterji speċifiċi tal-Partijiet li jimpurtaw u li huma marbuta mas-sikurezza tal-ikel hija f'idejn l-operaturi li qed jesportaw. Il-Partijiet irrakkomandaw li fil-Kapitolu 27 tat-Taqsima 5 tal-Anness V tal-Ftehim, jiġi inkluż Subkapitolu għad-dispożizzjonijiet dwar is-sistema tal-monitoraġġ u l-ittestjar mikrobijoloġiku. Dawn id-dispożizzjonijiet japplikaw ukoll għas-settur tal-laħam, abbażi tal-istatus ta' ekwivalenza miftiehem preċedentement mill-Partijiet.

(19)

Abbażi ta' valutazzjoni, il-Partijiet ikkonkludew li s-sistemi tagħhom li jelenkaw l-istabbilimenti huma ekwivalenti. Il-Partijiet għalhekk irrakkomandaw li fil-Kapitolu 27 tat-Taqsima 5 tal-Anness V tal-Ftehim jiġi stipulat Subkapitolu dwar id-dispożizzjonijiet għal proċedura simplifikata li telenka l-istabbilimenti ta' New Zealand li jipproduċu prodotti mill-annimali għall-esportazzjoni lejn l-Unjoni. Dan japplika għall-prodotti fejn hija stabbilita l-ekwivalenza fuq is-saħħa pubblika.

(20)

L-Unjoni emendat il-kundizzjonijiet tal-importazzjoni fuq l-enċefalopatija sponġiformi bovina (BSE) fir-Regolament (KE) Nru 999/2001 tal-Parlament Ewropew u tal-Kunsill (15). Biex jirriflettu dawn l-emendi, il-Partijiet irrakkomandaw l-aġġornament tal-Kapitolu 28 dwar “Dispożizzjonijiet Mixxellanji ta' Ċertifikazzjoni” tat-Taqsima 5 tal-Anness V tal-Ftehim.

(21)

Minflok jelenka l-Istati Membri u r-reġjuni tagħhom li huma ħielsa mill-IBR u li għandhom programmi ta' kontroll approvati u stabbiliti fil-Kapitolu 28 tat-Taqsima 5 tal-Anness V tal-Ftehim, il-Partijiet irrakkomandaw li l-Kapitolu 28 jirreferi għad-Deċiżjoni tal-Kummissjoni 2004/558/KE (16), li tirrikonoxxi u telenka dawk l-Istati Membri u r-reġjuni tagħhom.

(22)

Minflok jelenka l-Istati Membri u r-reġjuni tagħhom li huma ħielsa mill-marda ta' Aujeszky u li għandhom programmi ta' kontroll approvati u stabbiliti fil-Kapitolu 28 tat-Taqsima 5 tal-Anness V tal-Ftehim, il-Partijiet irrakkomandaw li l-Kapitolu 28 jirreferi għad-Deċiżjoni tal-Kummissjoni 2008/185/KE (17) li tirrikonoxxi u telenka dawk l-Istati Membri u r-reġjuni tagħhom.

(23)

Il-Partijiet irrakkomandaw li tiżdied l-attestazzjoni taċ-ċertifikat fil-Kapitolu 28 tat-Taqsima 5 tal-Anness V tal-Ftehim għad-deni klassiku tal-ħnieżer (CSF) għall-prodotti minn ħnieżer selvaġġi esportati mill-Unjoni għal New Zealand.

(24)

Fl-interess tal-konsistenza mal-Kapitolu 28 tat-Taqsima 5 tal-Anness V tal-Ftehim, il-Partijiet irrakkomandaw li f'dak l-Anness jintuża t-terminu “attestazzjoni” fit-tabella kollha tal-Kapitolu 29 dwar il-“Miżuri ta' kontroll tal-mard miftiehma reċiprokament”.

(25)

Il-Partijiet irrakkomandaw li l-Kapitolu 29 tat-Taqsima 5 tal-Anness V tal-Ftehim jinqasam f'żewġ Subkapitoli, “29.A. Status tal-mard għal mard speċifiku miftiehem reċiprokament”, li jinkorpora l-Kapitolu 29 eżistenti, u Subkapitolu ġdid “29.B. Miżuri ta' kontroll tal-mard miftiehma reċiprokament fl-eventwalità li tokkorri marda speċifika”.

(26)

Fir-rigward tal-Artikolu 6 tal-Ftehim, jiġifieri “Adattament għall-Kundizzjonijiet Reġjonali”, il-Partijiet irrakkomandaw li fis-Subkapitolu 29.B tat-Taqsima 5 tal-Anness V tagħha jiġu inklużi l-kundizzjonijiet kummerċjali komuni għal ċerti prodotti tal-annimali fil-każ li tokkorri xi marda speċifika f'xi territorji minn tagħhom.

(27)

Biex jissimplifikaw iċ-ċertifikazzjoni fl-Anness VII tal-Ftehim u biex jiffaċilitaw it-tranżizzjoni għal ċertifikazzjoni elettronika, il-Partijiet irrakkomandaw li tiġi emendata t-Taqsima 1 ta' dak l-Anness biex tiġi prevista l-possibbiltà li jitnaqqas in-numru ta' ċertifikati mudell billi jiġi minimizzat in-numru ta' attestazzjonijiet meħtieġa. Barra minn hekk, il-partijiet irrakkomandaw li l-ħtieġa li jiġu inklużi r-referenzi leġiżlattivi tal-Parti li tesporta, kif previst fl-Anness V tal-Ftehim, għandha tkun fid-diskrezzjoni tal-Parti li timporta.

(28)

Il-Partijiet iċċaraw li l-attestazzjoni sanitarja mudell, kif stabbilit fit-Taqsima 1 tal-Anness VII tal-Ftehim, tista' tintuża meta annimal ħaj jew prodott ikollhom l-ekwivalenza “Iva (1)” fuq is-saħħa pubblika jew is-saħħa tal-annimali biss, mingħajr il-ħtieġa ta' ċertifikazzjoni ta' ekwivalenza. Konsegwentement, il-Partijiet irrakkomandaw emendi f'Taqsima 1 ta' dak l-Anness, inkluż għall-għoti ta' ċertifikat mudell biex jintuża fuq ċertifikati maħruġa wara d-data tat-tluq, b'tali mod li l-użu tagħha jkun limitat għal annimali ħajjin u l-prodotti li għalihom ġiet iddeterminata l-ekwivalenza tas-sistemi ta' ċertifikazzjoni f'Kapitolu 27 tat-Taqsima 5 tal-Anness V tiegħu.

(29)

Il-partijiet irrakkomandaw li jistabbilixxu, f'Taqsima 1 tal-Anness VII, il-bażi legali għal ċerti dispożizzjonijiet addizzjonali mhux obbligatorji stabbiliti fl-Anness V tal-Ftehim, li għandhom jiġu inklużi fiċ-ċertifikat. Din l-emenda hija relatata ma' attestazzjonijiet addizzjonali deskritti fil-Kapitolu 28 tat-Taqsima 5 ta' dak l-Anness u, għall-esportazzjonijiet tal-Unjoni lejn New Zealand, l-attestazzjoni addizzjonali “il-prodott tal-annimali huwa eliġibbli għall-kummerċ intra-Unjoni mingħajr restrizzjoni”.

(30)

Sabiex jissimplifikaw iċ-ċertifikazzjoni fit-Taqsima 2 tal-Anness VII tal-Ftehim, u jiffaċilitaw il-bidla taċ-ċertifikazzjoni elettronika, il-Partijiet jirrakkomandaw li titneħħa l-ħtieġa li ċ-ċertifikati jkunu jinkludu n-noti ta' spjegazzjoni li jipprovdu gwida għat-tlestija, kif ukoll il-ħtieġa li jiġu inklużi l-attestazzjonijiet li huma irrilevanti għall-konsenja. Barra minn hekk, il-Partijiet irrakkomandaw li jkun possibbli li jsiru emendi żgħar fil-format taċ-ċertifikat mudell.

(31)

Iż-żewġ Partijiet żviluppaw sistemi elettroniċi ta' ċertifikazzjoni, kif ukoll link li tippermetti trasferiment ta' dejta bejn l-E-cert ta' New Zealand u s-sistemi TRACES tal-Unjoni, biex b'hekk jippermettu ċertifikazzjoni pprovduta b'mod elettroniku għal prodotti minn New Zealand esportati lejn l-Unjoni. Minħabba li ċ-ċertifikazzjoni elettronika tipprovdi garanziji ekwivalenti għaċ-ċertifikazzjoni fuq il-karta, il-Partijiet jirrakkomandaw li jemendaw l-Anness VII tal-Ftehim li jipprovdi mekkaniżmu legali, meħtieġ biex jippermetti l-użu esklussiv ta' ċertifikazzjoni elettronika.

(32)

Il-Partijiet irrivalutaw il-verifiki fuq il-fruntiera ta' annimali ħajjin u prodotti mill-annimali stabbiliti fit-Taqsima A tal-Anness VIII tal-Ftehim. Il-Partijiet irrakkomandaw li jistabbilixxu l-livell ta' 100 % fejn jidħlu l-verifiki tal-identità, u li din ir-rata tiġi applikata skont id-diskrezzjoni mill-Partijiet. Il-Partijiet irrakkomandaw ukoll li tiġi stabbilita bażi legali fejn jidħol l-iddelegar tal-attivitajiet ta' verifiki fuq il-fruntiera lil persuna responsabbli jew aġenzija. Ibbażata fuq livell għoli ta' prestazzjoni u ta' affidabilità fil-kummerċ bilaterali, il-Partijiet jirrakkomandaw tnaqqis fir-rata ta' frekwenza ta' verifiki fiżiċi ta' prodotti tal-annimali għall-konsum mill-bniedem minn 2 % għal 1 %. Il-partijiet komplew jikkjarifikaw li l-annimali ħajjin għall-konsum mill-bniedem huma fl-istess kategorija ta' prodotti mill-annimali għall-konsum mill-bniedem fejn jidħol l-ittestjar tal-frekwenza għall-verifiki fiżiċi u għaldaqstant irrakkomandaw li jżidu “Annimali ħajjin” qabel “prodotti tal-annimali għall-konsum mill-bniedem” fil-Kapitolu 2 dwar il-“Verifiki fiżiċi”, li issa ġie emendat għal “Kontrolli fiżiċi (inklużi dawk aleatorji jew immirati)” tat-Taqsima A ta' dak l-Anness.

(33)

Wara evalwazzjoni mill-ġdid tat-tariffi tal-ispezzjoni għall-kontrolli tal-fruntieri, il-Partijiet irrakkomandaw li dawn it-tariffi jiġu aġġornati fit-Taqsima B tal-Anness VIII tal-Ftehim. Għall-esportazzjoni ta' New Zealand lejn l-Unjoni, il-Partijiet irrakkomandaw li t-tariffi tal-ispezzjoni jiġu applikati skont l-Anness V tar-Regolament (KE) Nru 882/2004 tal-Parlament Ewropew u tal-Kunsill (18), bi tnaqqis ta' 22,5 %. Din ir-rata tat-tnaqqis tiġi kkalkolata filwaqt li wieħed jassumi li r-rata ta' kontrolli fiżiċi fuq l-importazzjoni ta' New Zealand tkun biss ta' 10 % tar-rata normali ta' kontrolli fiżiċi applikati għal pajjiżi terzi oħra u li l-ispejjeż għall-kontrolli fiżiċi jammontaw għal 25 % tat-tariffi totali tal-ispejjeż. Għall-esportazzjoni tal-Unjoni lejn New Zealand teżisti differenza bejn il-konsenji fejn jitwettqu verifiki tad-dokumenti u tal-identità u dawk fejn barra minn hekk jitwettqu verifiki fiżiċi wkoll. Hemm stipulat ukoll aġġustament għall-inflazzjoni fit-tariffi tal-ispezzjonijiet ta' New Zealand.

(34)

Minħabba tibdil fil-liġijiet taż-żewġ Partijiet, ir-referenzi leġiżlattivi fi ħdan l-Annessi tal-Ftehim mhumiex aġġornati. Iż-żewġ Partijiet għalhekk irrakkomandaw li f'dawk l-Annessi jiġu aġġornati r-referenzi fil-leġiżlazzjoni għall-Unjoni u għal New Zealand.

(35)

Meta għamel referenza għal dawk l-emendi proposti għall-Annessi II, V, VII u VIII għall-Ftehim, fil-laqgħat u t-telefonati konferenzjali tiegħu fit-30-31 ta' Marzu 2009, l-24 ta' Ġunju 2010, l-24 ta' Marzu 2011, id-29-30 ta' Mejju 2012 u t-12 ta' Diċembru 2013, il-Kumitat Konġunt ta' Ġestjoni irrakkomanda li dawn isiru.

(36)

Minħabba dawn ir-rakkomandazzjonijiet, huwa xieraq li jiġu emendati d-dispożizzjonijiet rilevanti fl-Annessi II, V, VII u VIII tal-Ftehim.

(37)

Skont l-Artikolu 16 tal-Ftehim, l-emendi għall-Annessi għandhom jiġu mifthiema b'mod konġunt, u dan jista' jsir permezz ta' Skambju ta' Ittri bejn il-Partijiet.

(38)

Għaldaqstant, l-emendi irrakkomandati għall-Annessi II, V, VII u VIII tal-Ftehim għandhom jiġu approvati f'isem l-Unjoni.

(39)

Skont l-Artikolu 18(3) tal-Ftehim, l-emendi tal-Annessi li ntlaħaq qbil dwarhom għal dan il-Ftehim għandhom jidħlu fis-seħħ fl-ewwel jum tax-xahar wara d-data li fiha l-Partijiet ikunu nnotifikaw lil xulxin bil-miktub li l-proċeduri interni rispettivi tagħhom għall-approvazzjoni tal-emendi huma lesti.

(40)

Il-miżuri previsti f'din id-Deċiżjoni huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,