This document is an excerpt from the EUR-Lex website
Document 32014D0287
2014/287/EU: Commission Implementing Decision of 10 March 2014 setting out criteria for establishing and evaluating European Reference Networks and their Members and for facilitating the exchange of information and expertise on establishing and evaluating such Networks Text with EEA relevance
2014/287/UE: Deċiżjoni ta' Implimentazzjoni tal-Kummissjoni tal- 10 ta' Marzu 2014 li tistipula kriterji għall-istabbiliment u l-evalwazzjoni tan-Netwerks Ewropej ta' Referenza u l-Membri tagħhom u biex jiġi faċilitat l-iskambju ta' informazzjoni u ta' għarfien espert dwar l-istabbiliment u l-evalwazzjoni ta' netwerks bħal dawn Test b'rilevanza għaż-ŻEE
2014/287/UE: Deċiżjoni ta' Implimentazzjoni tal-Kummissjoni tal- 10 ta' Marzu 2014 li tistipula kriterji għall-istabbiliment u l-evalwazzjoni tan-Netwerks Ewropej ta' Referenza u l-Membri tagħhom u biex jiġi faċilitat l-iskambju ta' informazzjoni u ta' għarfien espert dwar l-istabbiliment u l-evalwazzjoni ta' netwerks bħal dawn Test b'rilevanza għaż-ŻEE
ĠU L 147, 17.5.2014, p. 79–87
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force: This act has been changed. Current consolidated version: 18/08/2019
17.5.2014 |
MT |
Il-Ġurnal Uffiċjali tal-Unjoni Ewropea |
L 147/79 |
DEĊIŻJONI TA' IMPLIMENTAZZJONI TAL-KUMMISSJONI
tal-10 ta' Marzu 2014
li tistipula kriterji għall-istabbiliment u l-evalwazzjoni tan-Netwerks Ewropej ta' Referenza u l-Membri tagħhom u biex jiġi faċilitat l-iskambju ta' informazzjoni u ta' għarfien espert dwar l-istabbiliment u l-evalwazzjoni ta' netwerks bħal dawn
(Test b'rilevanza għaż-ŻEE)
(2014/287/UE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat id-Direttiva 2011/24/UE tal-Parlament Ewropew u tal-Kunsill tad-9 ta' Marzu 2011 dwar l-applikazzjoni tad-drittijiet tal-pazjenti fil-qasam tal-kura tas-saħħa transkonfinali (1), u b'mod partikolari l-Artikolu 12(4)(b) u (c) tagħha,
Billi:
(1) |
Id-Deċiżjoni Delegata tal-Kummissjoni 2014/286/UE (2) tistipula l-kriterji u l-kundizzjonijiet li għandhom jissodisfaw in-Netwerks Ewropej ta' Referenza (in-“Netwerks”) u l-fornituri tal-kura tas-saħħa li jixtiequ jingħaqdu ma' Netwerks bħal dawn. |
(2) |
Skont l-Artikolu 12(4)(b) u (c) tad-Direttiva 2011/24/UE, il-Kummissjoni għandha tiddeċiedi dwar il-kriterji għall-istabbiliment u l-evalwazzjoni tan-Netwerks u l-miżuri li jiffaċilitaw l-iskambju ta' informazzjoni u ta' għarfien espert dwar l-istabbiliment u l-evalwazzjoni tan-Netwerks. |
(3) |
In-Netwerks għandhom jiġu stabbiliti, u l-fornituri tal-kura tas-saħħa għandhom jiġu approvati, bħala Membri tan-Netwerks abbażi ta' proċedura miftuħa u trasparenti. Il-proċedura għandha tinkludi (1) sejħa ta' interess; (2) approvazzjoni mill-Istati Membri tal-applikazzjonijiet tal-fornituri tagħhom tal-kura tas-saħħa; (3) il-preżentazzjoni tal-applikazzjonijiet lill-Kummissjoni; (4) il-verifika tat-tlestija tal-applikazzjonijiet; (5) il-valutazzjoni teknika, minn korp indipendenti, tal-applikazzjonijiet biex jitwaqqfu n-Netwerks u tal-applikazzjonijiet minn fornituri individwali tal-kura tas-saħħa li jixtiequ jkunu Membri ta' Netwerk, sabiex jiġi deċiż jekk l-applikanti jissodisfawx il-kriterji jew le; (6) il-komunikazzjoni tar-riżultati tal-valutazzjoni; (7) l-approvazzjoni tan-Netwerks u s-sħubija tagħhom mill-Istati Membri, u (8) il-pubblikazzjoni tal-lista tan-Netwerks stabbiliti u tal-Membri tagħhom. |
(4) |
Sabiex tiżdied il-kopertura tan-Netwerks, il-fornituri individwali tal-kura tas-saħħa li jixtiequ jingħaqdu ma' Netwerk għandhom jitħallew jagħmlu dan f'kull żmien. L-applikazzjonijiet tagħhom għandhom jiġu vvalutati skont l-istess proċedura bħal dik użata biex tivvaluta l-applikazzjonijiet għan-Netwerk inizjali, inkluża l-approvazzjoni ta' applikazzjonijiet mill-Istati Membri inkwistjoni. |
(5) |
Sabiex ikun garantit li n-Netwerk għandu valur miżjud ġenwin tal-Unjoni Ewropea, u li huwa kbir biżżejjed biex jippermetti l-qsim ta' għarfien espert u jitjieb l-aċċess għall-kura ta' pazjenti madwar l-Unjoni, għandhom jiġu approvati biss l-applikazzjonijiet min-numru minimu meħtieġ ta' fornituri tal-kura tas-saħħa u tal-Istati Membri, li jkunu tressqu skont is-sejħa ta' interess. Jekk in-numru ta' applikazzjonijiet ta' fornituri tal-kura tas-saħħa ma jkunx biżżejjed jew jekk l-applikazzjonijiet ma jkoprux numru suffiċjenti ta' Stati Membri, il-Kummissjoni għandha titlob lill-Istati Membri biex iħeġġu lill-fornituri tal-kura tas-saħħa biex jingħaqdu man-Network propost. |
(6) |
Jaf jkun diffiċli li jintlaħaq in-numru minimu meħtieġ ta' fornituri tal-kura tas-saħħa jew ta' Stati Membri għal xi mard jew kundizzjonijiet rari minħabba nuqqas ta' għarfien espert. Għaldaqstant tkun idea tajba li fornituri tal-kura tas-saħħa li jiffokaw fuq mard jew kundizzjonijiet rari relatati jinġabru f'Netwerk tematiku. In-netwerks jistgħu jinkludu wkoll fornituri ta' servizzi ta' teknoloġija għolja li normalment jeħtieġu investiment b'kapital għoli ħafna, bħal laboratorji, servizzi tar-radjoloġija jew servizzi tal-mediċina nukleari. |
(7) |
L-Istati Membri li l-ebda wieħed mill-fornituri tagħhom tal-kura tas-saħħa ma jkun membru ta' Netwerk, għandhom jaħtru ċentri nazzjonali kollaborattivi u assoċjati biex iħeġġuhom jikkooperaw man-Netwerks relevanti. |
(8) |
Ladarba tkun ġiet stabbilita li tlestiet, kull applikazzjoni għal Network u għal fornitur tal-kura tas-saħħa, għandha tiġi vvalutata teknikament skont il-kriterji stipulati fid-Deċiżjoni Delegata 2014/286/UE. Abbażi ta' valutazzjoni komuni manwali, il-valutazzjoni għandha tinkludi reviżjoni tad-dokumentazzjoni profonda u verifiki fuq il-post ta' numru magħżul ta' applikanti. Dan kollu għandu jitwettaq minn korp ta' valutazzjoni indipendenti maħtur mill-Kummissjoni. |
(9) |
L-Istati Membri huma mistiedna jwaqqfu Bord tal-Istati Membri li għandu jiddeċiedi dwar l-approvazzjoni ta' Netwerks proposti u dwar is-sħubija tagħhom. Il-parteċipazzjoni tal-Istati Membri għandha tkun volontarja. B'mod ġenerali l-Istati Membri jagħżlu li japprovaw l-istabbiliment ta' Netwerk u jagħtu s-sħubija fin-Netwerk f'każ ta' valutazzjoni pożittiva biss li tkun maħruġa minn korp tal-valutazzjoni. |
(10) |
Il-Membri tan-Netwerks għandhom ikunu lliċenzjati biex jużaw il-logo tan-“Netwerk Ewropej ta' Referenza”. Il-logo, li huwa proprjetà tal-Unjoni Ewropea, għandu jikkostitwixxi l-identità viżiva tan-Netwerks u l-Membri tagħhom. |
(11) |
Korp ta' evalwazzjoni indipendenti maħtur mill-Kummissjoni għandu jevalwa perjodikament in-Netwerks u l-Membri tagħhom, permezz tal-użu ta' manwal ta' evalwazzjoni komuni. L-evalwazzjoni għandha tikkonkludi b'rapport ta' evalwazzjoni teknika li jagħti dettalji dwar kemm l-għanijiet stabbiliti fl-Artikolu 12(2) tad-Direttiva 2011/24/UE jkunu ntlaħqu kif ukoll jekk il-kriterji u l-kundizzjonijiet stabbiliti fid-Deċiżjoni Delegata 2014/286/UE jkunux ġew issodisfati. Ir-rapport għandu jiddeskrivi wkoll ir-riżultati u l-prestazzjoni tan-Netwerk u l-kontribut tal-Membri tiegħu. Rapport ta' evalwazzjoni negattiv għandu ġeneralment iħajjar lill-Istati Membri japprovaw it-terminazzjoni ta' Netwerk. Sabiex il-valur miżjud tal-Unjoni Ewropea tan-Netwerk ikun jista' jinżamm, il-konformità mar-rekwiżit ta' numru minimu ta' fornituri tal-kura tas-saħħa u ta' Stati Membri għandha tiġi mmonitorjata wara l-evalwazzjoni. |
(12) |
Il-Manwali ta' valutazzjoni u ta' evalwazzjoni għandhom ikunu ibbażati fuq prattiki rikonoxxuti internazzjonalment u għandhom jinkludu l-prinċipji u l-metodoloġiji ewlenin għat-twettiq ta' valutazzjonijiet u evalwazzjonijiet. |
(13) |
Il-Kummissjoni għandha tiffaċilita l-iskambju ta' informazzjoni u ta' għarfien espert dwar l-istabbiliment u l-evalwazzjoni tan-Netwerks. Hija għandha tpoġġi għad-disponibbiltà tal-pubbliku l-informazzjoni ġenerali dwar in-Netwerks u l-Membri tagħhom u d-dokumentazzjoni u l-manwali tekniċi dwar l-istabbiliment u l-evalwazzjoni tan-Netwerks u l-Membri tagħhom. Din tista' toffri l-użu ta' mezzi ta' komunikazzjoni speċifiċi u għodod lin-Netwerks u lill-Membri tagħhom. Għandhom jiġu organizzati konferenzi u laqgħat tal-esperti sabiex ikun hemm forum għal dibattitu tekniku u xjentifiku fost in-Netwerks. |
(14) |
Id-dejta personali marbuta mal-istabbiliment u l-evalwazzjoni tan-Netwerks għandha tiġi pproċessata f'konformità mar-Regolament (KE) Nru 45/2001 tal-Parlament Ewropew u tal-Kunsill (3)kif xieraq. |
(15) |
Il-miżuri stipulati f'din id-Deċiżjoni huma skont l-opinjoni tal-Kumitat li twaqqaf bl-Artikolu 16 tad-Direttiva 2011/24/UE, |
ADOTTAT DIN ID-DEĊIŻJONI:
KAPITOLU I
DISPOŻIZZJONIJIET ĠENERALI
Artikolu 1
Suġġett
Din id-Deċiżjoni tistipula:
(a) |
il-kriterji għall-istabbiliment u l-evalwazzjoni tan-Netwerks li hemm referenza għalihom fl-Artikolu 12 tad-Direttiva 2011/24/UE; u |
(b) |
l-miżuri li jiffaċilitaw l-iskambju ta' informazzjoni u ta' għarfien espert dwar l-istabbiliment u l-evalwazzjoni tan-Netwerks li hemm referenza għalihom fl-Artikolu 12 tad-Direttiva 2011/24/UE. |
KAPITOLU II
L-ISTABBILIMENT TA' NETWERKS EWROPEJ TA' REFERENZA
Artikolu 2
Sejħa ta' interess għall-istabbiliment ta' Netwerk Ewropew ta' Referenza
1. Il-Kummissjoni għandha tippubblika sejħa ta' interess għall-istabbiliment ta' Netwerks fi żmien sentejn wara d-dħul fis-seħħ ta' din id-Deċiżjoni.
2. Kull grupp ta' mill-anqas għaxar fornituri tal-kura tas-saħħa stabbilit f'tal-anqas tmien Stati Membri jista' jwieġeb kollettivament sal-iskadenza indikata fis-sejħa ta' interess b'applikazzjoni li tkun tinkludi proposta għall-istabbiliment ta' Netwerk f'qasam partikolari ta' għarfien espert.
3. Il-kontenut tal-applikazzjoni għandu jkun kif stipulat fl-Anness I.
4. Meta tirċievi applikazzjoni, il-Kummissjoni għandha tivverifika jekk il-kundizzjonijiet dwar in-numru minimu ta' fornituri tal-kura tas-saħħa u l-Istati Membri kif stipulat fil-paragrafu 2 humiex issodisfati.
5. Jekk xi waħda minn dawk il-kundizzjonijiet ma tkunx issodisfata, l-applikazzjoni ma għandhiex tkun intitolata għal valutazzjoni u l-Kummissjoni għandha titlob lill-Istati Membri biex jinkoraġġixxu lill-fornituri tal-kura tas-saħħa biex jingħaqdu man-Network proposta sabiex jgħinu biex jintlaħqu n-numru/i meħtieġ(a).
6. Wara li tikkonsulta mal-Istati Membri, il-Kummissjoni għandha tiddeċiedi dwar iż-żmien xieraq għall-pubblikazzjoni ta' sejħiet sussegwenti ta' interess.
Artikolu 3
L-applikazzjonijiet tas-sħubija
1. L-applikazzjoni li jkun fiha proposta għall-istabbiliment ta' Netwerk għandha tkun akkumpanjata minn applikazzjoni għas-sħubija għal kull fornitur kkonċernat tal-kura tas-saħħa.
2. Il-kontenut tal-applikazzjoni għandu jkun kif stipulat fl-Anness II.
3. L-applikazzjoni għas-sħubija għandha tkun akkumpanjata minn dikjarazzjoni bil-miktub mingħand il-fornitur tal-kura tas-saħħa tal-Istat Membru tal-istabbiliment u tkun tiċċertifika li l-parteċipazzjoni tiegħu fil-proposta għall-istabbiliment ta' Netwerk hija skont il-leġiżlazzjoni nazzjonali tal-Istat Membru.
Artikolu 4
Valutazzjoni teknika tal-applikazzjonijiet
1. Jekk il-Kummissjoni tikkonkludi li r-rekwiżiti stipulati fl-Artikolu 2(2) u fl-Artikolu 3(2) u (3) huma ssodisfati, hija għandha taħtar korp tal-valutazzjoni biex jivvaluta l-applikazzjonijiet.
2. Il-korp tal-valutazzjoni għandu jivverifika jekk:
(a) |
il-kontenut tal-applikazzjoni li jinkludi proposta għall-istabbiliment ta' Netwerk jissodisfax ir-rekwiżiti stipulati fl-Anness I ta' din id-Deċiżjoni; |
(b) |
il-kontenut tal-applikazzjonijiet għas-sħubija jissodisfax ir-rekwiżiti tal-Anness II ta' din id-Deċiżjoni; |
(c) |
in-Network propost jissodisfax ir-rekwiżit li għandu jipprovdi kura tas-saħħa speċjalizzata ħafna kif hemm fil-punt 1(a) tal-Anness I tad-Deċiżjoni Delegata 2014/286/UE; |
(d) |
in-Network propost jissodisfax il-kriterji u l-kundizzjonijiet l-oħra stipulati fl-Anness I tad-Deċiżjoni Delegata 2014/286/UE; |
(e) |
il-fornituri tal-kura tas-saħħa li qed japplikaw jissodisfawx il-kriterji u l-kundizzjonijiet stipulati fl-Anness II tad-Deċiżjoni Delegata 2014/286/UE. |
3. Il-valutazzjoni skont il-punti (d) u (e) tal-paragrafu 2 għandha sseħħ biss jekk il-korp tal-valutazzjoni jikkonkludi li l-proposta tissodisfa r-rekwiżiti li hemm referenza għalihom fil-punti (a), (b) u (c) tal-paragrafu 2.
4. Il-korp tal-valutazzjoni għandu jfassal rapport ta' valutazzjoni dwar l-applikazzjoni, li jkun fih proposta għall-istabbiliment ta' Netwerk u l-applikazzjonijiet għas-sħubija u jibgħat ir-rapporti kollha lill-Kummissjoni.
5. Il-korp tal-valutazzjoni għandu jibgħat ir-rapport ta' valutazzjoni dwar in-Network propost u dwar l-applikazzjoni tas-sħubija tiegħu lil kull fornitur tal-kura tas-saħħa li qed japplika. Il-fornitur tal-kura tas-saħħa jista' jibgħat il-kummenti tiegħu lill-korp tal-valutazzjoni fi żmien xahrejn minn meta jirċievi r-rapporti. Meta jirċievi l-kummenti, il-korp tal-valutazzjoni għandu jemenda r-rapporti ta' valutazzjoni tiegħu u jispjega jekk il-kummenti jiġġustifikawx xi bidla fil-valutazzjoni tiegħu.
Artikolu 5
L-approvazzjoni tan-Netwerks u l-Membri
1. Meta jirċievu rapport ta' valutazzjoni dwar proposta għal Netwerk u l-lista proposta ta' Membri, imfassla skont l-Artikolu 4, u wara li jkun ivverifikat in-numru minimu ta' fornituri tal-kura tas-saħħa u ta' Stati Membri kif stabbilit fl-Artikolu 2(2), l-Istati Membri għandhom, fi ħdan Bord ta' Stati Membri kif stipulat fl-Artikolu 6, jiddeċiedu dwar l-approvazzjoni tan-Network propost u l-Membri tiegħu.
2. Bis-saħħa tal-approvazzjoni li hemm referenza għaliha fil-paragrafu 1, in-Netwerks proposti għandhom ikunu stabbiliti bħala Netwerks Ewropej ta' Referenza.
3. Jekk in-numru minimu ta' fornituri tal-kura tas-saħħa jew ta' Stati Membri stipulat fl-Artikolu 2(2) ma jintlaħaqx, in-Netwerk ma għandux jiġi stabbilit u l-Kummissjoni għandha titlob lill-Istati Membri biex iħeġġu lill-fornituri tal-kura tas-saħħa biex jingħaqdu man-Netwerks proposti.
4. Jekk fornitur tal-kura tas-saħħa jingħata valutazzjoni negattiva, ikun f'idejn il-fornitur tal-kura tas-saħħa biex jiddeċiedi jekk iridx jissottometti l-applikazzjoni tas-sħubija tiegħu, mar-rapport ta' valutazzjoni dwar l-applikazzjoni, lill-Bord tal-Istati Membri għal reviżjoni.
Artikolu 6
Il-bord tal-Istati Membri
1. L-Istati Membri huma mistiedna jwaqqfu Bord tal-Istati Membri li għandu jiddeċiedi jekk japprovax jew le proposti għal Netwerks, is-sħubija tagħhom u t-terminazzjoni ta' Netwerk. Jekk id-deċiżjoni tagħhom ma taqbilx mal-valutazzjoni tal-korp tal-valutazzjoni, l-Istati Membri għandhom jagħtu r-raġunijiet għal dan.
2. L-Istati Membri li jixtiequ jkunu fuq il-Bord tal-Istati Membri għandhom jinnotifikaw lill-Kummissjoni dwar l-awtorità nazzjonali li se tirrappreżentahom.
3. Il-Bord tal-Istati Membri għandu jadotta r-regoli ta' proċedura tiegħu stess dwar il-proposta tas-servizzi tal-Kummissjoni, b'maġġoranza sempliċi tal-membri tiegħu.
4. Ir-regoli ta' proċedura għandhom ikopru l-funzjonament u l-proċess tat-teħid tad-deċiżjonijiet tal-Bord tal-Istati Membri u jispeċifika liema mill-membri tiegħu huma intitolati li jivvutaw dwar l-approvazzjoni ta' Netwerk speċifiku, liema maġġoranza se tiddetermina r-riżultat tal-vot, u liema proċedura għandha tkun segwita jekk d-deċiżjoni tal-Bord ma tkunx taqbel mar-rapport ta' valutazzjoni dwar proposta ta' Netwerk proposta jew applikazzjoni ta' sħubija.
5. Il-Kummissjoni għandha tipprovdi s-segretarjat tal-Bord tal-Istati Membri.
6. Id-dejta personali tar-rappreżentanti tal-Istati Membri fuq il-Bord tal-Istati Membri għandha tinġabar, tiġi pproċessata u ppubblikata skont ir-Regolament (KE) Nru 45/2001.
Artikolu 7
Il-logo
Meta netwerk ikun approvat, il-Kummissjoni għandha tilliċenzja l-użu ta' identifikatur grafiku uniku (“il-logo”), li dak in-Netwerk u l-Membri tagħha għandhom jużaw għall-attivitajiet organizzati min-Netwerk.
Artikolu 8
Applikazzjonijiet għas-sħubija ta' Netwerks eżistenti
1. Fornitur tal-kura tas-saħħa li jixtieq jingħaqad ma' Netwerk eżistenti għandu jressaq applikazzjoni lill-Kummissjoni.
2. Il-kontenut tal-applikazzjoni tas-sħubija għandu jkun kif stipulat fl-Anness II.
3. L-applikazzjoni tas-sħubija għandha tkun akkumpanjata minn dikjarazzjoni bil-miktub mingħand il-fornitur tal-kura tas-saħħa tal-Istat Membru tal-istabbiliment u tkun tiċċertifika li l-parteċipazzjoni tiegħu fin-Netwerk hija skont il-leġiżlazzjoni nazzjonali tal-Istat Membru.
Artikolu 9
Il-valutazzjoni teknika tal-applikazzjonijiet għas-sħubija ta' Netwerks eżistenti
1. Jekk il-Kummissjoni tikkonkludi li r-rekwiżiti stabbiliti fl-Artikolu 8(2) u (3) huma ssodisfati, hija għandha taħtar korp biex jivvaluta l-applikazzjoni ta' sħubija.
2. Il-korp tal-valutazzjoni għandu jivverifika jekk:
(a) |
il-kontenut tal-applikazzjoni tas-sħubija jissodisfax ir-rekwiżiti stipulati fl-Anness II ta' din id-Deċiżjoni; u |
(b) |
il-fornitur tal-kura tas-saħħa kkonċernat jissodisfax il-kriterji u l-kundizzjonijiet stabbiliti fl-Anness II tad-Deċiżjoni Delegata 2014/286/UE. |
3. Il-valutazzjoni, skont il-punt (b) tal-paragrafu 2, għandha sseħħ biss jekk il-korp tal-valutazzjoni jikkonkludi li l-applikazzjoni ta' sħubija tissodisfa r-rekwiżiti li hemm referenza għalihom fil-punt (a) tal-paragrafu 2.
4. Il-korp tal-valutazzjoni għandu jfassal rapport ta' valutazzjoni u jibagħtu lill-Kummissjoni u lill-fornitur tal-kura tas-saħħa li qed japplika. Il-fornitur tal-kura tas-saħħa jista jibgħat il-kummenti tiegħu lill-korp tal-valutazzjoni fi żmien xahrejn minn meta jirċievi r-rapport. Meta jirċievi dawn il-kummenti, il-korp tal-valutazzjoni għandu jemenda rapport ta' valutazzjoni tiegħu fejn jispjega jekk il-kummenti jiġġustifikawx xi bidla fil-valutazzjoni tiegħu.
Artikolu 10
L-approvazzjoni ta' Membri ġodda
1. Meta jirċievi rapport ta' valutazzjoni pożittiv imfassal skont l-Artikolu 9, il-Bord tal-Istati Membri għandu jiddeċiedi jekk japprovax jew le il-Membru l-ġdid.
2. Jekk fornitur tal-kura tas-saħħa jingħata valutazzjoni negattiva, ikun f'idejn il-fornitur tal-kura tas-saħħa biex jiddeċiedi jekk iridx jissottometti l-applikazzjoni ta' sħubija tiegħu, mar-rapport ta' valutazzjoni dwar l-applikazzjoni, lill-Bord tal-Istati Membri għal reviżjoni.
Artikolu 11
It-terminazzjoni tan-Netwerk
1. Netwerk għandha tiġi terminata f'dawn il-każijiet:
(a) |
wieħed min-numri minimi stipulati fl-Artikolu 2(2) ma jintlaħaqx; |
(b) |
jitfassal rapport ta' evalwazzjoni negattiv dwar in-Netwerk skont l-Artikolu 14; |
(c) |
b'deċiżjoni tal-Bord tan-Netwerk skont ir-regoli u l-proċeduri tagħha; |
(d) |
jekk il-Koordinatur ma jitlobx evalwazzjoni tan-Netwerk fi żmien ħames snin wara t-twaqqif tiegħu jew mill-aħħar evalwazzjoni tiegħu. |
2. It-terminazzjoni ta' netwerk, għar-raġunijiet imniżżla fil-paragrafu 1 (a) u (b), għandhom ikunu approvati mill-Bord tal-Istati Membri li hemm referenza għalih fl-Artikolu 6.
Artikolu 12
It-telf ta' sħubija
1. Membru ta' netwerk jista' jitlef is-sħubija għal kwalunkwe waħda mir-raġunijiet li ġejjin:
(a) |
l-irtirar volontarju, skont ir-regoli u l-proċeduri miftehma mill-Bord tan-netwerk; |
(b) |
b'deċiżjoni tal-Bord tan-Netwerk, skont ir-regoli u l-proċeduri miftehma mill-Bord; |
(c) |
jekk Stat Membru ta' stabbiliment jinnotifika lill-Membru tan-Netwerk li l-parteċipazzjoni tiegħu fin-Netwerk ma għadhiex konformi mal-leġislazzjoni nazzjonali; |
(d) |
jekk il-Membru jirrifjuta li jiġi evalwat skont l-Artikolu 14; |
(e) |
jekk jitfassal rapport ta' evalwazzjoni negattiv dwar Membru skont l-Artikolu 14; |
(f) |
jekk in-Netwerk fejn jipparteċipa l-Membru jiġi terminat. |
2. L-Istat Membru relevanti għandu jinforma lill-Kummissjoni bir-raġunijiet għan-notifika kif hemm referenza fil-paragrafu 1(c).
3. Il-Bord tan-netwerk għandu jinfurma lill-Kummissjoni fil-każijiet li hemm referenza għalihom fil-paragrafu 1(a), (b) u (d).
4. It-telf ta' sħubija għar-raġunijiet imniżżla fil-paragrafu 1(e) għandhom jiġu approvati mill-Bord tal-Istati Membri li hemm referenza għalih fl-Artikolu 6.
5. Fi kwalunkwe każ ta' telf ta' sħubija, il-Kummissjoni għandha tivverifika jekk in-numri minimi ta' fornituri tal-kura tas-saħħa u ta' Stati Membri stipulati fl-Artikolu 2(2) jintlaħaqx xorta. Jekk le, din għandha titlob lin-Netwerk biex isib Membri ġodda fi żmien is-sentejn ta' wara jew itemm in-Netwerk, jinforma lill-Bord tal-Istati Membri bis-sitwazzjoni u titlob lill-Istati Membri biex iħeġġu lill-fornituri tal-kura tas-saħħa biex jingħaqdu man-Netwerk.
6. It-telf ta' sħubija għandu jwassal għal telf awtomatiku ta' kwalunkwe drittijiet u responsabbiltajiet assoċjati mal-parteċipazzjoni fin-Netwerk, inkluż id-dritt li jintuża l-logo.
Artikolu 13
Il-manwal ta' valutazzjoni
1. B'konsultazzjoni mal-Istati Membri u l-partijiet interessati, il-Kummissjoni għandha tfassal manwal dettaljat dwar il-kontenut, id-dokumentazzjoni u l-proċedura tal-valutazzjoni li hemm referenza għaliha fl-Artikoli 4 u 9.
2. Il-proċedura ta' valutazzjoni għandha tinkludi l-verifika tad-dokumentazzjoni mressqa mill-applikanti u l-verifiki fuq il-post.
3. Il-korp maħtur mill-Kummissjoni skont l-Artikoli 4(1) u 9(1) biex jeżamina proposta għal Netwerk u l-applikazzjonijiet għas-sħubija tan-Netwerk għandu juża l-manwal ta' valutazzjoni.
KAPITOLU III
L-EVALWAZZJONI TAN-NETWERKS EWROPEJ TA' REFERENZA
Artikolu 14
L-evalwazzjoni
1. In-Netwerks kollha u l-Membri tagħhom għandhom jiġu evalwati perjodikament, tal-anqas kull ħames snin wara l-approvazzjoni tagħhom jew mill-aħħar evalwazzjoni.
2. Malli tirċievi talba għal evalwazzjoni mingħand il-Koordinatur ta' Netwerk, il-Kummissjoni għandha taħtar korp biex jevalwa n-Netwerk u l-Membri tiegħu.
3. Il-korp ta' evalwazzjoni għandu jivverifika u jivvaluta:
(a) |
li l-kriterji u l-kundizzjonijiet stipulati fid-Deċiżjoni Delegata 2014/286/UE jiġu ssodisfati; |
(b) |
li l-għanijiet stipulati fl- Artikolu 12(2) tad-Direttiva 2011/24/UE jintlaħqu; u |
(c) |
ir-riżultati u l-prestazzjoni tan-Netwerk u l-kontribut ta' kull Membru. |
4. Il-korp ta' evalwazzjoni għandu jħejji rapport ta' evalwazzjoni dwar in-Netwerk u jibagħtu lill-Kummissjoni, lill-Bord tan-Netwerk u lill-Membri tan-Netwerk.
5. Il-korp tal-evalwazzjoni għandu jfassal rapport ta' evalwazzjoni dwar kull Membru tan-Netwerk u jibagħtu lill-Kummissjoni u lill-Membru inkwistjoni.
6. Il-Koordinatur u l-Membri tan-Netwerk jistgħu jibagħtu l-kummenti tagħhom lill-korp tal-evalwazzjoni fi żmien xahrejn minn meta jirċievu r-rapport. Meta jirċievi l-kummenti, il-korp tal-evalwazzjoni għandu jemenda r-rapport ta' evalwazzjoni fejn jispjega jekk il-kummenti jiġġustifikawx xi bidla fl-evalwazzjoni tiegħu.
7. Kull terminazzjoni ta' Network jew telf ta' sħubija minħabba evalwazzjoni negattiva għandha tkun approvata mill-Bord tal-Istati Membri li hemm referenza għalih fl-Artikolu 6. Il-Bord tal-Istati Membri jista' joffri lin-Netwerk jew lill-Membru inkwistjoni sena sabiex jirrimedja n-nuqqasijiet identifikati qabel ma jwettaq evalwazzjoni ġdida. Dak il-perjodu ta' żmien għandu jkun offrut biss lil Netwerk speċifiku jew lil Membru ta' Netwerk jekk il-Bord tan-Netwerk jippreżenta pjan ta' titjib.
Artikolu 15
Il-manwal ta' evalwazzjoni
1. B'konsultazzjoni mal-Istati Membri u mal-partijiet interessati, il-Kummissjoni għandha tfassal manwal dwar il-kontenut u d-dokumentazzjoni u l-proċedura għall-evalwazzjoni tan-Netwerks u l-Membri tagħhom li hemm referenza għalihom fl-Artikolu 14.
2. Il-proċedura ta' evalwazzjoni għandha tinkludi l-evalwazzjoni tad-dokumentazzjoni mressqa, inklużi r-rapporti ta' awtoevalwazzjoni, u l-verifiki fuq il-post.
3. Il-korp maħtur mill-Kummissjoni skont l-Artikolu 14(2) biex jevalwa Netwerk u l-Membri tiegħu għandu juża l-manwal ta' evalwazzjoni.
KAPITOLU IV
SKAMBJU TA' INFORMAZZJONI U TA' GĦARFIEN ESPERT
Artikolu 16
L-iskambju ta' informazzjoni dwar l-istabbiliment u l-evalwazzjoni tan-Netwerks
1. Il-Kummissjoni għandha tiffaċilita l-iskambju ta' informazzjoni u ta' għarfien espert dwar l-istabbiliment u l-evalwazzjoni tan-Netwerks billi:
(a) |
tpoġġi għad-disponibbiltà tal-pubbliku informazzjoni ġenerali dwar l-istabbiliment u l-evalwazzjoni tan-Netwerks, inkluża informazzjoni dwar il-manwali ta' valutazzjoni u ta' evalwazzjoni li hemm referenza għalihom fl-Artikoli 13 u 15; |
(b) |
tippubblika regolarment lista aġġornata tan-Netwerks u l-Membri tagħhom, flimkien mar-rapporti pożittivi ta' valutazzjoni u ta' evalwazzjoni tan-Networks u d-deċiżjonijiet tal-Bord tal-Istati Membri, skont ir-regoli ta' proċedura tagħha; |
(c) |
torganizza konferenzi u laqgħat tal-esperti għal dibattitu tekniku u xjentifiku fost il-Membri tan-Netwerks, jekk xieraq; |
(d) |
tipprovdi mezzi elettroniċi u għodod ta' komunikazzjoni lin-Netwerks, jekk xieraq. |
2. Għall-iskop tal-pubblikazzjoni tal-lista li hemm referenza għaliha fil-paragrafu 1(b), kull tibdil rigward il-Membru li jagħmilha ta' Koordinatur ta' Netwerk jew il-persuna nnominata bħala Koordinatur ta' Netwerk għandu jkun ikkomunikat lill-Kummissjoni mill-Bord tan-Netwerk.
KAPITOLU V
DISPOŻIZZJONIJIET FINALI
Artikolu 17
Reviżjoni
Il-Kummissjoni għandha tevalwa l-funzjonament ta' din id-Deċiżjoni ta' Implimentazzjoni ħames snin wara d-dħul fis-seħħ tagħha.
Artikolu 18
Id-dħul fis-seħħ
Din id-Deċiżjoni għandha tidħol fis-seħħ fl-għaxar jum wara l-pubblikazzjoni tagħha f'Il-Ġurnal Uffiċjali tal-Unjoni Ewropea.
Magħmul fi Brussell, l-10 ta' Marzu 2014.
Għall-Kummissjoni
Il-President
José Manuel BARROSO
(2) Ara l-paġna 71 ta' dan il-Ġurnal Uffiċjali.
ANNESS I
IL-KONTENUT TAL-APPLIKAZZJONI GĦALL-ISTABBILIMENT TA' NETWERK
L-applikazzjoni għall-istabbiliment ta' Netwerk għandha titressaq skont is-sejħa ta' interess ippubblikata mill-Kummissjoni u għandha tinkludi:
(a) |
isem in-Network propost; |
(b) |
il-formola tal-applikazzjoni mimlija, bil-kwestjonarju tal-awtovalutazzjoni u d-dokumentazzjoni addizzjonali meħtieġa fil-manwal ta' valutazzjoni; |
(c) |
evidenza li l-fornituri tal-kura tas-saħħa li qed japplikaw kollha għandhom għarfien espert fl-istess qasam u jiffokaw fuq l-istess kundizzjoni jew kundizzjonijiet tas-saħħa; |
(d) |
isem il-fornitur tal-kura tas-saħħa li se jaġixxi bħala Koordinatur tan-Netwerk u l-isem u d-dettalji ta' kuntatt tal-persuna li se tirrappreżenta l-Koordinatur propost; |
(e) |
l-ismijiet tal-fornituri tal-kura tas-saħħa kollha li qed japplikaw. |
ANNESS II
IL-KONTENUT TAL-APPLIKAZZJONI TA' SĦUBIJA
L-applikazzjoni tal-fornituri tal-kura tas-saħħa għandha tinkludi:
(a) |
it-titolu tan-Netwerk propost relevanti jew tan-netwerk eżistenti; |
(b) |
il-formola tal-applikazzjoni mimlija, bil-kwestjonarju tal-awtovalutazzjoni u d-dokumentazzjoni addizzjonali meħtieġa fil-manwal ta' valutazzjoni; |
(c) |
isem u d-dettalji ta' kuntatt tar-rappreżentant tal-fornitur tal-kura tas-saħħa. |