(1)

Ir-Regolament (KE) Nru 998/2003 tal-Parlament Ewropew u tal-Kunsill tas-26 ta’ Mejju 2003 dwar il-ħtiġiet rigward is-saħħa tal-annimali li japplikaw għall-moviment mhux kummerċjali tal-pets u li jemenda d-Direttiva tal-Kunsill 92/65/KEE (1) japplika, fost l-oħrajn, għall-movimenti fl-Istati Membri ta’ dawk l-annimali domestiċi elenkati fl-Anness I tiegħu li jkunu ġejjin minn pajjiżi terzi. Il-klieb u l-qtates huma elenkati fil-Parti A u l-inmsa huma elenkati fil-Parti B ta’ dak l-Anness.

(2)

It-Taqsima 2 tal-Parti B tal-Anness II tar-Regolament (KE) Nru 998/2003 telenka l-pajjiżi u t-territorji, inkluża l-Kroazja, li għall-movimenti mhux kummerċjali ta’ dawk l-annimali domestiċi japplikaw regoli li huma tal-anqas ekwivalenti għar-regoli previsti f’dak ir-Regolament.

(3)

Bħala riżultat ta’ dan, il-klieb, il-qtates u l-inmsa li jitmexxew minn dawk il-pajjiżi u territorji għall-Istati Membri, jista’ jkollhom passaport li jikkonforma mal-mudell stabbilit fl-Anness I tad-Deċiżjoni tal-Kummissjoni 2003/803/KE tas-26 ta’ Novembru 2003 li tistabbilixxi mudell ta’ passaport tal-movimenti fil-Komunità ta’ klieb, qtates u nemes (2) u mar-rekwiżiti addizzjonali stabbiliti fl-Anness II ta’ dik id-Deċiżjoni, b’ċerti adattamenti neċessarji fil-paġna ta’ quddiem tal-mudell ta’ passaport.

(4)

Mid-data tal-adeżjoni tal-Kroazja, il-klieb, il-qtates u l-inmsa ma jistgħux jittieħdu mill-Kroazja fi Stat Membru ieħor sakemm ma jkunux akkumpanjati minn passaport li jikkonforma mal-mudell stabbilit fl-Anness I tad-Deċiżjoni 2003/803/KE u mar-rekwiżiti addizzjonali stabbiliti fl-Anness II ta’ dik id-Deċiżjoni.

(5)

Madankollu, wara dik id-data jista’ jkun għad hemm passaporti vojta stampati mill-awtoritajiet kompetenti tal-Kroazja kif ukoll dawk li ngħataw lil veterinarji awtorizzati fil-Kroazja, iżda li għadhom ma nħarġux minnhom, qabel id-data tal-adeżjoni.

(6)

Fl-istess ħin, il-passaporti maħruġa qabel id-data tal-adeżjoni għandhom, f’ċerti kundizzjonijiet, jibqgħu jkunu aċċettati tul il-perjodu ta’ tranżizzjoni ta’ tliet snin sabiex ikun limitat il-piż amministrattiv u finanzjarju fuq is-sidien tal-annimali domestiċi.

(7)

Għalhekk, sabiex tiġi ffaċilitata t-tranżizzjoni mis-sistema eżistenti għal dik fis-seħħ mill-adeżjoni tal-Kroazja, huwa xieraq li jiġu stabbiliti miżuri ta’ tranżizzjoni għall-moviment tal-annimali domestiċi mill-Kroazja lejn l-Istati Membri l-oħrajn.

(8)

Il-miżuri stipulati f’dan ir-Regolament huma konformi mal-opinjoni tal-Kumitat Permanenti dwar il-Katina Alimentari u s-Saħħa tal-Annimali u la l-Parlament Ewropew u lanqas il-Kunsill ma opponewhom,

(a)

huwa imfassal skont il-mudell stabbilit fl-Anness I tad-Deċiżjoni 2003/803/KE u skont ir-rekwiżiti addizzjonali stabbiliti fil-punti A, B(2)(a), B(2)(c) u C tal-Anness II ta’ dik id-Deċiżjoni;

(b)

b’deroga mill-punti B(1) u B(2)(b) tal-Anness II tad-Deċiżjoni 2003/803/KE, ikollu l-emblema Kroata stampata fil-kwart ta’ fuq tal-paġna ta’ quddiem, ‘il fuq mill-kliem “Republika Hrvatska”, fuq sfond ta’ lewn blu (PANTONE REFLEX BLUE).