6.12.2013   

MT

Il-Ġurnal Uffiċjali tal-Unjoni Ewropea

L 326/45

(1)

Fit-19 ta’ Diċembru 2011 il-Kummissjoni adottat id-Deċiżjoni ta’ Implimentazzjoni 2011/861/UE (2) li tagħti deroga temporanja mir-regoli ta’ oriġini stipulati fl-Anness II tar-Regolament (KE) Nru 1528/2007 biex titqies is-sitwazzjoni speċjali tal-Kenja fir-rigward ta’ flettijiet tat-tonn. Permezz tad-Deċiżjoni ta’ Implimentazzjoni tal-Kummissjoni 2012/208/UE (3) ingħatat estensjoni ta’ dik id-deroga temporanja sal-31 ta’ Diċembru 2013.

(2)

Fit-22 ta’ Lulju 2013, b’konformità mal-Artikolu 36 tal-Anness II tar-Regolament (KE) Nru 1528/2007, il-Kenja talbet estensjoni oħra tal-imsemmija deroga mir-regoli tal-oriġini stipulati f’dak l-Anness għal 2 000 tunnellata ta’ flettijiet tat-tonn għall-perjodu mill-1 ta’ Jannar 2014 sal-31 ta’ Diċembru 2014. Fit-3 ta’ Ottubru 2013, il-Kenja ppreżentat informazzjoni addizzjonali flimkien ma’ talba riveduta għal 1 500 tunnellata ta’ flettijiet tat-tonn għall-perjodu mill-1 ta’ Jannar 2014 sat-30 ta’ Settembru 2014.

(3)

Skont l-informazzjoni pprovduta mill-Kenja, il-qabdiet tat-tonn baqgħu żgħar ħafna meta mqabbla ma’ varjazzjoni normali staġjonali u s-sidien tal-bastimenti ma jridux jidħlu għas-sogru biex ifornu tonn nej minħabba l-piraterija. Għalhekk, il-Kenja għadha mhix kapaċi li tħares ir-regoli ta’ oriġini stipulati fl-Anness II tar-Regolament (KE) Nru 1528/2007 wara l-iskadenza tad-deroga fil-31 ta’ Diċembru 2013.

(4)

Minħabba li s-sitwazzjoni tal-Kenja fir-rigward tal-flettijiet tat-tonn għadha ma tjibitx b’mod suffiċjenti, estensjoni tad-deroga hija ġġustifikata. L-estensjoni għandha tingħata sat-30 ta’ Settembru 2014.

(5)

Id-Deċiżjoni ta’ Implimentazzjoni 2011/861/UE għandha għalhekk tiġi emendata skont dan.

(6)

Il-miżuri previsti f’din id-Deċiżjoni jikkonformaw mal-opinjoni tal-Kumitat tal-Kodiċi Doganali,

(1)

L-Artikolu 2 jinbidel b’dan li ġej:

“Artikolu 2

Id-deroga prevista fl-Artikolu 1 għandha tapplika għall-prodotti u l-kwantitajiet stabbiliti fl-Anness li huma dikjarati għaċ-ċirkolazzjoni ħielsa fl-Unjoni mill-Kenja matul il-perjodu mill-1 ta’ Jannar 2011 sat-30 ta’ Settembru 2014 jew sad-data tal-applikazzjoni provviżorja tal-Ftehim ta’ Sħubija Ekonomika bejn il-Komunità tal-Afrika tal-Lvant bħala parti u l-Unjoni Ewropea u l-Istati Membri tagħha bħala l-parti l-oħra, jekk din id-data tkun l-ewwel.”;

(2)

L-Artikolu 6 jinbidel b’dan li ġej:

“Artikolu 6

Din id-Deċiżjoni għandha tapplika mill-1 ta’ Jannar 2011 sat-30 ta’ Settembru 2014.”

(3)

L-Anness jinbidel bit-test imniżżel fl-Anness ta’ din id-Deċiżjoni.