This document is an excerpt from the EUR-Lex website
Document 32013D0385
2013/385/EU: Council Decision of 15 July 2013 extending the period of application of the appropriate measures in Decision 2011/492/EU concerning Guinea-Bissau and amending that Decision
2013/385/UE: Deċiżjoni tal-Kunsill tal- 15 ta’ Lulju 2013 li testendi l-perijodu ta’ applikazzjoni tal-miżuri xierqa fid-Deċiżjoni 2011/492/UE dwar il-Ginea Bissaw u li temenda dik id-Deċiżjoni
2013/385/UE: Deċiżjoni tal-Kunsill tal- 15 ta’ Lulju 2013 li testendi l-perijodu ta’ applikazzjoni tal-miżuri xierqa fid-Deċiżjoni 2011/492/UE dwar il-Ginea Bissaw u li temenda dik id-Deċiżjoni
ĠU L 194, 17.7.2013, p. 6–7
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
No longer in force, Date of end of validity: 23/03/2015; Imħassar b' 32015D0541
|
17.7.2013 |
MT |
Il-Ġurnal Uffiċjali tal-Unjoni Ewropea |
L 194/6 |
DEĊIŻJONI TAL-KUNSILL
tal-15 ta’ Lulju 2013
li testendi l-perijodu ta’ applikazzjoni tal-miżuri xierqa fid-Deċiżjoni 2011/492/UE dwar il-Ginea Bissaw u li temenda dik id-Deċiżjoni
(2013/385/UE)
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea,
Wara li kkunsidra l-Ftehim ta’ Sħubija bejn il-membri tal-Grupp ta’ Stati Afrikani, tal-Karibew u tal-Paċifiku, min-naħa waħda, u l-Unjoni Ewropea u l-Istati Membri tagħha, min-naħa l-oħra, iffirmat f’Cotonou fit-23 ta’ Ġunju 2000 (1) (“il-Ftehim ta’ Sħubija AKP-UE”), kif emendat l-aħħar f’Ouagadougou, il-Burkina Faso, fit-22 ta’ Ġunju 2010 (2), u b’mod partikolari l-Artikolu 96 tiegħu,
Waqt li kkunsidra l-Ftehim Intern bejn ir-rappreżentanti tal-Gvernijiet tal-Istati Membri, imlaqqgħin fil-Kunsill, dwar il-miżuri li għandhom jittieħdu u l-proċeduri li għandhom ikunu segwiti għall-implimentazzjoni tal-Ftehim ta’ Sħubija tal-AKP-KE (3), u b’mod partikolari l-Artikolu 3 tiegħu,
Wara li kkunsidra l-proposta mill-Kummissjoni Ewropea,
Billi:
|
(1) |
Bid-Deċiżjoni tal-Kunsill 2011/492/UE (4), il-konsultazzjonijiet mar-Repubblika tal-Ginea Bissaw skont l-Artikolu 96 tal-Ftehim ta’ Sħubija AKP-UE ngħalqu u ttieħdu miżuri xierqa, kif speċifikat fl-Anness ma’ dik id-Deċiżjoni. |
|
(2) |
Bid-Deċiżjoni tal-Kunsill 2012/387/UE (5), id-Deċiżjoni 2011/492/UE ġiet estiża bi tnax-il xahar, sad-19 ta’ Lulju 2013. |
|
(3) |
L-elementi essenzjali ċitati fl-Artikolu 9 tal-Ftehim ta’ Sħubija AKP-UE għadhom qed jinkisru u l-kundizzjonijiet attwali fil-Ginea Bissaw ma jiżgurawx ir-rispett tad-drittijiet tal-bniedem, il-prinċipji demokratiċi u l-istat tad-dritt. |
|
(4) |
Għaldaqstant, id-Deċiżjoni 2011/492/UE għandha tiġi emendata biex testendi iktar il-perijodu tal-applikazzjoni tal-miżuri xierqa, |
ADOTTA DIN ID-DEĊIŻJONI:
Artikolu 1
L-Artikolu 3 tad-Deċiżjoni 2011/492/UE jinbidel b’dan li ġej:
“Artikolu 3
Din id-Deċiżjoni għandha tidħol fis-seħħ fid-data tal-adozzjoni tagħha.
Hija għandha tiskadi fid-19 ta’ Lulju 2014.
Hija ser terġa’ tkun eżaminata b’mod regolari, minn tal-anqas kull sitt xhur, preferibbilment fid-dawl ta’ missjonijiet ta’ sorveljanza mwettqa mis-Servizz Ewropew għall-Azzjoni Esterna u l-Kummissjoni.”
Artikolu 2
L-ittra fl-Anness għal din id-Deċiżjoni għandha tiġi mgħarrfa lill-awtoritajiet tal-Ginea Bissaw.
Artikolu 3
Din id-Deċiżjoni għandha tidħol fis-seħħ fid-data tal-adozzjoni tagħha.
Magħmul fi Brussell, il-15 ta’ Lulju 2013.
Għall-Kunsill
Il-President
V. JUKNA
(1) ĠU L 317, 15.12.2000, p. 3.
(2) ĠU L 287, 4.11.2010, p. 3.
(3) ĠU L 317, 15.12.2000, p. 376.
(4) Deċiżjoni tal-Kunsill 2011/492/UE tat-18 ta’ Lulju 2011 dwar il-konklużjoni tal-proċedura ta’ konsultazzjoni mar-Repubblika tal-Ginea Bissaw skont l-Artikolu 96 tal-Ftehim ta’ Sħubija bejn il-membri tal-Grupp ta’ Stati Afrikani, tal-Karibew u tal-Paċifiku, min-naħa waħda, u l-Komunità Ewropea u l-Istati Membri tagħha, min-naħa l-oħra (ĠU L 203, 6.8.2011, p. 2).
(5) ĠU L 387, 17.7.2012, p. 1.
ANNESS
Sinjuri,
Wara l-konsultazzjonijiet li saru fi Brussell fid-29 ta’ Marzu 2011 fil-qafas tal-Artikolu 96 tal-Ftehim ta’ Sħubija AKP-UE, l-Unjoni Ewropea fit-18 ta’ Lulju 2011 iddeċidiet, permezz tad-Deċiżjoni tal-Kunsill 2011/492/UE li tadotta miżuri xierqa, inkluża skema ta’ impenji reċiproċi biex gradwalment terġa’ tibda l-kooperazzjoni tal-UE.
Bid-Deċiżjoni tal-Kunsill 2012/387/UE tas-16 ta’ Lulju 2012, id-Deċiżjoni tal-Kunsill 2011/492/UE ġiet estiża b’sena, sad-19 ta’ Lulju 2013.
Tnax-il xahar wara dik l-estensjoni, l-Unjoni Ewropea tikkunsidra li ma sar l-ebda progress sinifikanti u għaldaqstant iddeċidiet li testendi l-perijodu tal-applikazzjoni tad-Deċiżjoni 2011/492/UE sad-19 ta’ Lulju 2014.
L-Unjoni Ewropea tixtieq għal darba oħra tenfasizza l-importanza li hi tagħti lill-koperazzjoni futura mal-Ginea Bissaw u tikkonferma r-rieda tagħha li tkompli bid-djalogu u li fil-futur qrib tagħmel progress lejn sitwazzjoni fejn terġa’ ssir possibbli kooperazzjoni sħiħa.
Għoddni dejjem tiegħek,
Għall-Kunsill
C. ASHTON
President
Għall-Kummissjoni
A. PIEBALGS
Kummissarju