This document is an excerpt from the EUR-Lex website
Document 32013D0096
2013/96/EU: Commission Implementing Decision of 19 February 2013 regarding restrictions of authorisations of biocidal products containing difenacoum notified by Germany in accordance with Directive 98/8/EC of the European Parliament and of the Council (notified under document C(2013) 780)
2013/96/UE: Deċiżjoni ta’ Implimentazzjoni tal-Kummissjoni tad- 19 ta’ Frar 2013 fir-rigward tar-restrizzjonijiet ta’ awtorizzazzjonijiet ta’ prodotti bijoċidali li fihom id-difenacoum innotifikati mill-Ġermanja skont id-Direttiva 98/8/KE tal-Parlament Ewropew u tal-Kunsill (notifikata bid-dokument numru C(2013) 780)
2013/96/UE: Deċiżjoni ta’ Implimentazzjoni tal-Kummissjoni tad- 19 ta’ Frar 2013 fir-rigward tar-restrizzjonijiet ta’ awtorizzazzjonijiet ta’ prodotti bijoċidali li fihom id-difenacoum innotifikati mill-Ġermanja skont id-Direttiva 98/8/KE tal-Parlament Ewropew u tal-Kunsill (notifikata bid-dokument numru C(2013) 780)
ĠU L 48, 21.2.2013, p. 17–20
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
In force
21.2.2013 |
MT |
Il-Ġurnal Uffiċjali tal-Unjoni Ewropea |
L 48/17 |
DEĊIŻJONI TA’ IMPLIMENTAZZJONI TAL-KUMMISSJONI
tad-19 ta’ Frar 2013
fir-rigward tar-restrizzjonijiet ta’ awtorizzazzjonijiet ta’ prodotti bijoċidali li fihom id-difenacoum innotifikati mill-Ġermanja skont id-Direttiva 98/8/KE tal-Parlament Ewropew u tal-Kunsill
(notifikata bid-dokument numru C(2013) 780)
(Il-test bil-Ġermaniż biss huwa awtentiku)
(2013/96/UE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat id-Direttiva 98/8/KE tal-Parlament Ewropew u tal-Kunsill tas-16 ta’ Frar 1998 dwar it-tqegħid fis-suq tal-prodotti bijoċidali (1), u b’mod partikolari l-Artikolu 4(4) tagħha,
Billi:
(1) |
L-Anness I tad-Direttiva 98/8/KE fih il-lista tas-sustanzi attivi approvati fil-livell tal-Unjoni għall-inklużjoni fi prodotti bijoċidali. Id-Direttiva tal-Kummissjoni 2008/81/KE tad-29 ta’ Lulju 2008 li temenda d-Direttiva 98/8/KE tal-Parlament Ewropew u tal-Kunsill biex tinkludi d-difenacoum bħala sustanza attiva fl-Anness I tagħha (2), żiedet is-sustanza attiva difenacoum mal-prodotti tat-tip 14, rodentiċidi, kif iddefinit fl-Anness V tad-Direttiva 98/8/KE. |
(2) |
Id-difenacoum huwa rodentiċida antikoagulanti magħruf li joħloq riskji ta’ inċidenti aċċidentali li jinvolvu t-tfal, kif ukoll riskji għall-annimali u għall-ambjent. Ġie identifikat bħala potenzjalment persistenti, b’tendenza ta’ bijoakkumulazzjoni u tossiku (“PBT”), jew persistenti ħafna u b’tendenza kbira ta’ bijoakkumulazzjoni (“vPvB”). |
(3) |
Għal raġunijiet ta’ saħħa pubblika u iġjene, madankollu nstab li l-inklużjoni tad-difenacoum u rodentiċidi antikoagulanti oħra fl-Anness I tad-Direttiva 98/8/KE kienet iġġustifikata, u b’hekk l-Istati Membri setgħu jawtorizzaw prodotti bbażati fuq id-difenacoum. Madankollu, id-Direttiva 2008/81/KE tobbliga lill-Istati Membri biex jiżguraw, meta jagħtu awtorizzazzjoni ta’ prodotti li jkun fihom id-difenacoum, li l-esponiment primarju kif ukoll dak sekondarju tal-bnedmin, tal-annimali li mhumiex fil-mira u tal-ambjent jiġi mminimizzat, billi jitqiesu u jiġu applikati l-miżuri kollha xierqa u disponibbli ta’ mitigazzjoni tar-riskji. Il-miżuri ta’ mitigazzjoni tar-riskji msemmija fid-Direttiva 2008/81/KE għalhekk, fost l-oħrajn, jinkludu restrizzjoni għal użu professjonali biss. |
(4) |
Il-kumpanija Kwizda France S.A.S. (“l-applikant”) issottomettiet, skont l-Artikolu 8 tad-Direttiva 98/8/KE, applikazzjoni lir-Renju Unit għall-awtorizzazzjoni għal sitt rodentiċidi li fihom id-difenacoum (“il-prodotti”). |
(5) |
Ir-Renju Unit awtorizza ħames prodotti fit-3 ta’ Novembru 2011 u ieħor fl-14 ta’ Novembru 2011. Il-prodotti ġew awtorizzati għal użu ġenerali kontra l-firien u l-ġrieden għall-protezzjoni ta’ prodotti maħżuna kif ukoll għall-protezzjoni tal-ikel, tas-saħħa u ta’ materjali. Ir-restrizzjonijiet biex jiġu żgurati l-kundizzjonijiet tal-Artikolu 5 tad-Direttiva 98/8/KE ġew issodisfati fir-Renju Unit inkluż rekwiżit biex fuq it-tikketta jiġi indikat “Żomm ‘il bogħod minn ikel, xorb u għalf tal-annimali”, iżda ma nkludewx restrizzjoni għal utenti mħarrġa jew professjonali. |
(6) |
Fil-31 ta’ Marzu 2010, l-applikant issottometta applikazzjoni kompluta lill-Ġermanja għal rikonoxximent reċiproku tal-ewwel awtorizzazzjonijiet fir-rigward tal-prodotti. |
(7) |
Fit-8 ta’ Ġunju 2012, il-Ġermanja nnotifikat lill-Kummissjoni, lill-Istati Membri l-oħra u lill-applikant dwar il-proposta tagħha li tirrestrinġi l-ewwel awtorizzazzjonijiet skont l-Artikolu 4(4) tad-Direttiva 98/8/KE. Il-Ġermanja pproponiet li timponi restrizzjoni fuq il-prodotti biex jintużaw minn professjonisti mħarrġa jew liċenzjati, kif ukoll billi teskludi l-protezzjoni tal-ikel mill-użi awtorizzati u maħsuba tal-prodotti kkontestati jekk l-ikel jikkonsisti minn pjanti jew prodotti tal-pjanti fi ħdan it-tifsira tal-Artikolu 3 punti 5 u 6 tar-Regolament (KE) Nru 1107/2009 tal-Parlament Ewropew u tal-Kunsill tal-21 ta’ Ottubru 2009 dwar it-tqegħid fis-suq ta’ prodotti għall-protezzjoni tal-pjanti u li jħassar id-Direttivi tal-Kunsill 79/117/KEE u 91/414/KEE (3). |
(8) |
Il-Kummissjoni stiednet lill-Istati Membri l-oħra u lill-applikant biex jissottomettu kummenti bil-miktub rigward in-notifika fi żmien 90 jum skont l-Artikolu 27(1) tad-Direttiva 98/8/KE. Ma ġie sottomess l-ebda kumment fi żmien dik l-iskadenza. In-notifika ġiet diskussa wkoll bejn il-Kummissjoni u l-Awtoritajiet Kompetenti tal-Istati Membri għall-prodotti bijoċidali waqt il-laqgħa tal-Grupp li Jiffaċilita l-Awtorizzazzjoni tal-Prodotti u r-Rikonoxximent Reċiproku, li saret bejn it-3 u l-4 ta’ Lulju 2012. |
(9) |
Fir-rigward tar-restrizzjoni fuq il-prodotti biex jintużaw minn professjonisti mħarrġa jew liċenzjati skont id-Direttiva 2008/81/KE, awtorizzazzjonijiet ta’ prodotti bijoċidali li fihom id-difenacoum għandhom ikunu soġġetti għall-miżuri kollha ta’ mitigazzjoni tar-riskji xierqa u disponibbli, inkluża r-restrizzjoni għal użu professjonali biss. L-evalwazzjoni xjentifika li wasslet għall-adozzjoni tad-Direttiva 2008/81/KE kkonkludiet li l-utenti professjonali biss setgħu jkunu mistennija li jsegwu l-istruzzjonijiet li jimminimizzaw ir-riskju ta’ avvelenament sekondarju ta’ annimali li mhumiex fil-mira, u li jużaw il-prodotti b’mod li jipprevjeni l-iżvilupp u t-tixrid tar-reżistenza. Restrizzjoni għal utenti professjonali għandha għalhekk fil-prinċipju titqies li hija miżura xierqa ta’ mitigazzjoni tar-riskji, b’mod partikolari fl-Istati Membri fejn tokkorri reżistenza għad-difenacoum. |
(10) |
Fin-nuqqas ta’ kwalunkwe indikazzjoni li tmur kontra dan, ir-restrizzjoni għal utenti professjonali hija għalhekk miżura ta’ mitigazzjoni tar-riskji xierqa u disponibbli għall-awtorizzazzjoni ta’ prodotti li fihom id-difenacoum fil-Ġermanja. Din il-konklużjoni hija rrinforzata minn argumenti mressqa mill-Ġermanja li nstabet reżistenza kontra d-difenacoum fil-firien u huwa maħsub li din qed tiżviluppa fil-pajjiż. Barra minn hekk, il-Ġermanja għandha infrastruttura ta’ operaturi mħarrġa ta’ kontroll ta’ annimali ta’ ħsara u ta’ professjonisti liċenzjati li tiffunzjona tajjeb, bħall-bdiewa, il-ġardinara u l-forestiera li rċevew taħriġ professjonali, li jfisser li r-restrizzjoni proposta ma tfixkilx il-prevenzjoni tal-infezzjoni. |
(11) |
Fir-rigward tal-esklużjoni tal-protezzjoni tal-ikel mill-użi awtorizzati u maħsuba, il-Ġermanja ressqet l-argument li prodotti użati għall-ikel ta’ oriġini mill-pjanti huma koperti, għal dan il-għan, bir-Regolament (KE) Nru 1107/2009, u għalhekk huma esklużi mill-kamp ta’ applikazzjoni tad-Direttiva 98/8/KE jekk l-ikel protett jikkonsisti minn pjanti jew prodotti tal-pjanti fi ħdan it-tifsira tal-Artikolu 3 punti 5 u 6 tar-Regolament (KE) Nru 1107/2009. |
(12) |
Il-Kummissjoni tinnota li mhemmx dubju li l-prodotti kkontestati huma koperti bid-definizzjoni ta’ prodott bijoċidali fl-Artikolu 2(1)(a) tad-Direttiva 98/8/KE. Għalhekk għandu biss jiġi eżaminat jekk il-prodotti humiex madankollu esklużi mill-kamp ta’ applikazzjoni tad-Direttiva 98/8/KE skont l-Artikolu 1(2)(r) ta’ dik id-Direttiva għall-fini ta’ ċerti użi, f’liema każ dawk l-użi partikolari jkunu jeħtieġu awtorizzazzjonijiet addizzjonali skont ir-Regolament (KE) Nru 1107/2009. |
(13) |
Għaldaqstant skont l-Artikolu 2(1)(a) tar-Regolament (KE) Nru 1107/2009 dak ir-Regolament ma japplikax għal prodotti li l-għan ewlieni tagħhom huwa meqjus li huwa l-iġjene iktar milli l-protezzjoni ta’ pjanti jew ta’ prodotti tal-pjanti. |
(14) |
Il-prodotti kkontestati huma, fost l-oħrajn, maħsuba għal użu bħala rodentiċidi kontra l-ġrieden u l-firien biex jipproteġu l-ikel, u l-ikel jista’ jikkostitwixxi pjanti u prodotti tal-pjanti kif iddefinit fl-Artikolu 3 punti 5 u 6 tar-Regolament (KE) Nru 1107/2009. |
(15) |
Madankollu, il-prodotti kkontestai huma maħsuba wkoll għal għadd ta’ skopijiet oħra għajr dak ta’ protezzjoni tal-ikel, u l-biċċa l-kbira tal-ikel ma jikkostitwixxix pjanti jew prodotti tal-pjanti. Barra minn hekk, ir-rekwiżiti tat-tikkettar fl-awtorizzazzjonijiet tal-prodotti kkontestati jiżguraw li l-prodotti ma jiġux applikati direttament fuq l-ikel (4). L-applikazzjoni tal-prodotti msemmija bħala “protezzjoni tal-ikel” fl-awtorizzazzjoni għandhom jtiqiesu bħala primarjament maħsuba biex jevitaw kontaminazzjoni minn rodituri u l-periklu konsegwenti għat-trażmissjoni ta’ mard żoonotiku, skont ir-rekwiżiti ġenerali tal-iġjene għal kull stadju ta’ produzzjoni, proċessar u distribuzzjoni skont l-Anness II tar-Regolament (KE) Nru 852/2004 tal-Parlament Ewropew u tal-Kunsill tad-29 ta’ April 2004 dwar l-iġjene tal-oġġetti tal-ikel (5). |
(16) |
Peress li l-iskop ewlieni tal-prodotti kkontestati huwa l-iġjene iktar milli l-protezzjoni ta’ pjanti jew ta’ prodotti tal-pjanti, il-prodotti mhumiex esklużi mill-kamp ta’ applikazzjoni tad-Direttiva 98/8/KE skont l-Artikolu 1(2)(r) ta’ dik id-Direttiva għall-iskop tal-użu tagħhom. Ir-restrizzjoni mitluba mill-Ġermanja f”dan ir-rigward ma tistax tiġi ġġustifikata għar-raġunijiet imressqa. |
(17) |
Il-miżuri previsti f’din id-Deċiżjoni huma skont l-opinjoni tal-Kumitat Permanenti dwar il-Prodotti Bijoċidali, |
ADOTTAT DIN ID-DEĊIŻJONI:
Artikolu 1
Il-Ġermanja tista’ tirrestrinġi l-awtorizzazzjonijiet mogħtija skont l-Artikolu 4 tad-Direttiva 98/8/KE għall-prodotti msemmija fl-Anness ta’ din id-Deċiżjoni biex jintużaw minn professjonisti mħarrġa jew liċenzjati, mingħajr ma teskludi l-protezzjoni tal-ikel mill-użi awtorizzati u maħsuba tal-prodotti.
Artikolu 2
Din id-Deċiżjoni hija indirizzata lir-Repubblika Federali tal-Ġermanja.
Magħmul fi Brussell, id-19 ta’ Frar 2013.
Għall-Kummissjoni
Janez POTOČNIK
Membru tal-Kummissjoni
(1) ĠU L 123, 24.4.1998, p. 1.
(2) ĠU L 201, 30.7.2008, p. 46.
(3) ĠU L 309, 24.11.2009, p. 1.
(4) Ara, f’dan ir-rigward, dokument ta’ gwida ppubblikat, li dwaru kien hemm qbil bejn is-Servizzi tal-Kummissjoni u l-awtoritajiet kompetenti tal-Istati Membri, għall-prodotti bijoċidali, id-Direttiva 98/8/KE u għall-prodotti għall-protezzjoni tal-pjanti, id-Direttiva 91/414/KEE, bl-isem Borderline between Directive 98/8/KE concerning the placing on the market of Biocidal product and Directive 91/414/KEE concerning the placing on the market of plant protection products, disponibbli fuq is-sit elettroniku http://ec.europa.eu/food/plant/protection/evaluation/borderline_en.htm.
(5) ĠU L 139, 30.4.2004, p. 1.
ANNESS
Il-prodotti li għalihom il-Ġermanja tista’ tirrestrinġi l-awtorizzazzjonijiet mogħtija skont l-Artikolu 4 tad-Direttiva 98/8/KE biex jintużaw minn professjonisti mħarrġa jew liċenzjati:
Isem il-prodott fir-Renju Unit |
Numru ta’ referenza tal-applikazzjoni tar-Renju Unit fir-Reġistru tal-Prodotti Bijoċidali |
Isem il-prodott fil-Ġermanja |
Numru ta’ referenza tal-applikazzjoni tal-Ġermanja fir-Reġistru tal-Prodotti Bijoċidali |
Murabloc LM |
2010/1329/5686/UK/AA/7269 |
Murablock |
2010/1329/5686/DE/MA/8105 |
Souribloc |
2010/1329/5706/UK/AA/7465 |
Souriblock |
2010/1329/5706/DE/MA/8109 |
Raticide VK |
2010/1329/5726/UK/AA/7468 |
MUSCIDAN Haferköder |
2010/1329/5726/DE/MA/8113 |
Le Souriquois |
2010/1329/5728/UK/AA/7470 |
MUSCIDAN Weizenköder |
2010/1329/5728/DE/MA/8120 |
Ratigum |
2010/1329/5707/UK/AA/7466 |
Ratigum |
2010/1329/5707/DE/MA/8110 |
Super Pellets |
2010/1329/5708/UK/AA/7467 |
Super Pellets |
2010/1329/5708/DE/MA/8112 |