(1)

Fil-25 ta' Novembru 2011, il-Kummissjoni Ewropea (“il-Kummissjoni”) ħabbret, b’avviż ippubblikat f’Il-Ġurnal Uffiċjali tal-Unjoni Ewropea (2), il-bidu ta’ proċediment kontra s-sussidju (“proċediment AS” jew “il-proċediment”) fir-rigward ta’ importazzjonijiet fl-Unjoni ta’ bijoetanol li joriġina mill-Istati Uniti tal-Amerika (“l-Istati Uniti tal-Amerika” jew “il-pajjiż ikkonċernat”).

(2)

Fl-istess jum, il-Kummissjoni ħabbret b’avviż ippubblikat f’Il-Ġurnal Uffiċjali tal-Unjoni Ewropea (3), il-bidu ta’ proċediment anti-dumping fir-rigward ta’ importazzjonijiet fl-Unjoni ta’ bijoetanol li joriġina mill-Istati Uniti tal-Amerika u bdiet investigazzjoni separata (“proċediment AD”).

(3)

Il-proċediment AS inbeda wara lment ippreżentat fit-12 ta' Ottubru 2011 mill-European Producers Union of Renewable Ethanol Association (ePURE) (“l-ilmentatur”) f’isem il-produtturi li jirrappreżentaw aktar minn 25 % tal-produzzjoni totali tal-Unjoni ta’ bijoetanol. L-ilment kien jinkludi evidenza prima facie ta’ sussidjar tal-imsemmi prodott u ta’ dannu materjali li jirriżulta minnu, li tqies li huwa suffiċjenti biex jiġġustifika l-bidu ta’ investigazzjoni.

(4)

Qabel il-bidu tal-proċedura AS u b’mod konformi mal-Artikolu 10(7) tar-Regolament bażiku, il-Kummissjoni nnotifikat lill-awtoritajiet tal-Istati Uniti tal-Amerika li hija kienet irċeviet ilment iddokumentat kif xieraq li kien jallega li importazzjonijiet sussidjati ta’ bijoetanol li joriġina mill-Istati Uniti tal-Amerika kienu qegħdin jikkawżaw dannu materjali lill-industrija tal-Unjoni. L-awtoritajiet tal-Istati Uniti tal-Amerika ġew mistiedna għal konsultazzjonijiet bil-għan li jiċċaraw is-sitwazzjoni fir-rigward tal-kontenut tal-ilment u sabiex jaslu għal soluzzjoni bi ftehim reċiproku. L-awtoritajiet tal-Istati Uniti tal-Amerika aċċettaw l-istedina u sussegwentement saru konsultazzjonijiet fis-17 ta' Novembru 2011. Matul il-konsultazzjonijiet ma nstabet ebda soluzzjoni bi qbil reċiproku.

(5)

Ġie żvelat dokument ta’ informazzjoni bil-fatti u l-konsiderazzjonijiet essenzjali li abbażi tagħhom ġie deċiż li ma jiġux imposti miżuri kumpensatorji proviżorji (dokument ta’ informazzjoni) lill-partijiet interessati f’Awwissu 2012. Bosta partijiet interessati għamlu sottomissjonijiet bil-miktub li permezz tagħhom ikkomunikaw l-opinjonijiet tagħhom dwar dawn is-sejbiet. Il-partijiet li talbu dan ingħataw l-opportunità li jinstemgħu. Il-Kummissjoni kompliet tfittex l-informazzjoni li dehrilha kienet meħtieġa għas-sejbiet definittivi tagħha. Is-sottomissjonijiet orali u bil-miktub ippreżentati mill-partijiet interessati ġew meqjusa u meħuda f’kunsiderazzjoni, fejn xieraq.

(6)

Il-partijiet kollha ġew infurmati dwar il-fatti u l-kunsiderazzjonijiet essenzjali li abbażi tagħhom kien hemm il-ħsieb li jiġi rrakkomandat it-tmiem kemm tal-investigazzjoni kontra s-sussidju dwar importazzjonijiet tal-bijoetanol li joriġinaw mill-Istati Uniti tal-Amerika u kif ukoll tar-reġistrazzjoni ta’ tali importazzjonijiet (4). Il-partijiet ingħataw ukoll perjodu biex jippreżentaw is-sottomissjonijiet tagħhom wara dan l-iżvelar finali.

(7)

Fid-dawl tan-numru potenzjalment kbir ħafna ta’ esportaturi/produtturi fl-Istati Uniti tal-Amerika, kien previst it-teħid ta’ kampjuni fin-notifika ta’ bidu b’mod konformi mal-Artikolu 27 tar-Regolament bażiku.

(8)

Sabiex il-Kummissjoni tkun tista’ tiddeċiedi jekk it-teħid ta’ kampjuni huwiex meħtieġ u jekk iva, biex tagħżel kampjun, l-esportaturi/produtturi fl-Istati Uniti tal-Amerika ntalbu jippreżentaw ruħhom lill-Kummissjoni fi żmien 15-il jum mid-data tal-bidu tal-investigazzjoni u biex jipprovdu, kif speċifikat fin-notifika ta’ bidu, informazzjoni bażika dwar l-attivitajiet tagħhom relatati mal-bijoetanol matul il-perjodu mill-1 ta' Ottubru 2010 sat-30 ta' Settembru 2011 (“il-perjodu tal-investigazzjoni” jew “l-IP”).

(9)

L-awtoritajiet rilevanti tal-Istati Uniti kienu kkonsultati wkoll għall-għażla ta’ kampjun rappreżentattiv.

(10)

Aktar minn 60 kumpanija ppreżentaw ruħhom u pprovdew l-informazzjoni mitluba mhux iktar tard minn 15-il jum.

(11)

B’konformità mal-Artikolu 27 tar-Regolament bażiku, il-Kummissjoni għażlet kampjun ibbażat fuq l-akbar kwantità rappreżentattiva ta’ esportazzjonijiet ta’ bijoetanol lill-Unjoni li setgħet tiġi raġonevolment investigata fiż-żmien disponibbli. Il-kampjun magħżul abbażi ta’ dak kien jikkonsisti minn ħames produtturi tal-bijoetanol u operatur tas-suq wieħed.

(12)

L-investigazzjoni wriet ukoll li għalkemm l-esportaturi semmew esportazzjonijiet lejn l-Unjoni fil-kwestjonarju li rċevew dwar it-teħid ta’ kampjuni, ebda wieħed mill-produtturi inklużi fil-kampjun ma esportaw bijoetanol direttament lis-suq tal-Unjoni iżda biegħuh lil blenders/operaturi tas-suq mhux relatati fl-Istati Uniti tal-Amerika li mbagħad ħalltuh bil-gażolina u biegħuh mill-ġdid. Sabiex jidentifikaw l-esportazzjonijiet tagħhom lejn l-Unjoni, il-produtturi bbażaw l-aktar fuq dejta li huma rċevew mill-klijenti blenders/operaturi tas-suq mhux relatati.

(13)

F’dan il-kuntest, għandu jiġi osservat li l-informazzjoni pprovduta mill-awtoritajiet tal-Istati Uniti wriet li l-bijoetanol kollu mibjugħ fl-Istati Uniti u esportat minn hemm kien jibbenefika mill-iskema prinċipali ta’ sussidju, b’mod partikolari meta kien imħallat mal-gażolina. Kienet l-attività ta’ taħlit u l-bejgħ tat-taħlita taxxabbli li kkawżat is-sussidjar tal-bijoetanol fl-Istati Uniti. F’dan il-każ instab li s-sussidju prinċipali identifikat fl-Istati Uniti kien mitlub minn u mogħti lill-blenders. Il-kumpaniji magħżula fil-kampjun kienu l-aktar produtturi ta’ bijoetanol u numru żgħir biss minnhom kienu qed iħalltu l-bijoetanol u dawn kienu l-aktar l-operaturi tas-suq/il-blenders li esportaw ukoll il-prodotti tagħhom lejn l-Unjoni li rċevew is-sussidju prinċipali bbażat fuq il-bijoetanol li jinsab fit-taħlitiet li kienu qegħdin jipproduċu. Konsegwentament, il-kampjun li huwa magħmul prinċipalment minn produtturi tal-bijoetanol li ma ġiex esportat direttament lejn l-Unjoni u li bażikament ma ħalltux il-bijoetanol fit-taħlitiet tal-fjuwil, ma kienux kredibbli biex jiġi stabbilit il-livell ta’ sussidjar f'dan il-każ.

(14)

Fid-dawl tan-numru potenzjalment kbir ta’ produtturi tal-Unjoni, it-teħid ta’ kampjuni kien previst fin-notifika ta’ bidu b’konformità mal-Artikolu 27 tar-Regolament bażiku.

(15)

Fin-notifika ta’ bidu, il-Kummissjoni ħabbret li kienet għażlet provviżorjament kampjun ta’ produtturi tal-Unjoni. Dan il-kampjun kien jikkonsisti minn ħames kumpaniji u gruppi, mid-19-il produttur tal-Unjoni li kienu magħrufa qabel il-bidu tal-investigazzjoni. Il-kampjun intgħażel abbażi tal-volum ta’ produzzjoni ta’ bijoetanol matul il-perjodu tal-investigazzjoni u l-post fejn jinsabu l-produtturi magħrufa. Dan il-kampjun kien jirrappreżenta 48 % tal-produzzjoni totali stmata tal-Unjoni matul l-IP.

(16)

Madankollu, l-investigazzjoni wriet li l-gruppi inklużi fil-kampjun kienu jikkonsistu f’numru kbir ta’ kumpaniji jew entitajiet individwali li jipproduċu l-prodott simili. F’dan il-każ dan kien ifisser li għandhom jiġu investigati 13-il kumpanija. B’hekk ma kienx possibbli li jiġu investigati kollha minħabba ż-żmien disponibbli għall-investigazzjoni. Ġie deċiż li tiġi eżaminata mill-ġdid id-dejta disponibbli għall-kampjun inizjali. Dan l-eżami wassal għall-konklużjoni li l-kampjun għandu jkun ibbażat fuq l-akbar entitajiet produtturi individwali u mhux fuq gruppi ta’ produtturi waqt li tqieset ukoll ċerta firxa ġeografika fost il-produtturi inklużi fil-kampjun.

(17)

B’hekk, finalment intgħażel kampjun definittiv ta’ sitt produtturi individwali abbażi tar-rappreżentattività f’termini tal-volum ta’ produzzjoni u bejgħ tal-bijoetanol matul l-IP u l-post ġeografiku tal-produttur. Dawn il-produtturi jirrappreżentaw 36 % tal-produzzjoni totali stmata tal-Unjoni u 44 % tal-produzzjoni totali rrapportata mill-kumpaniji li ppreżentaw dejta għall-għażla ta’ kampjun. Dan il-kampjun tqies li huwa rappreżentattiv għall-industrija tal-Unjoni.

(18)

Il-partijiet interessati ngħataw ukoll l-opportunità li jikkummentaw dwar l-adegwatezza tal-għażla tal-kampjun.

(19)

Xi partijiet iddikjaraw li l-kampjun kien inqas rappreżentattiv minn dak magħżul oriġinarjament li kien jinkludi gruppi ta’ kumpaniji. Fil-fehma tagħhom, analiżi oġġettiva tas-sitwazzjoni tal-industrija tal-Unjoni setgħet issir biss billi jiġu inklużi l-kumpaniji kollha li kienu parti mill-gruppi fil-kampjun. Huma allegaw b’mod partikolari li l-ispejjeż u d-dħul setgħu jiġu allokati lil ċerti kumpaniji ta’ grupp li ma saritilhomx żjara u b’hekk ma jistgħux jiġu inklużi fl-analiżi tad-dannu.

(20)

F’dan ir-rigward għandu jiġi osservat li l-Kummissjoni kkunsidrat u eżaminat b’mod xieraq id-dejta pprovduta mill-kumpaniji kollha mhux inklużi fil-kampjun u b’mod partikolari l-kumpaniji li jappartjenu għal gruppi, sabiex jiġi żgurat li l-ispejjeż u d-dħul kollha involuti fil-produzzjoni u l-bejgħ mill-kumpaniji magħżula kienu ġew riflessi bis-sħiħ u b’mod korrett fl-analiżi tad-dannu. Barra minn hekk, is-sitt kumpaniji produtturi finalment magħżula rrappreżentaw 36 % tal-produzzjoni totali stmata tal-Unjoni u dan ġie kkunsidrat li huwa rappreżentattiv għall-finijiet tal-Artikolu 27 tar-Regolament bażiku.

(21)

Xi partijiet ikkontestaw l-inklużjoni fil-kampjun ta’ produtturi tal-Unjoni li kienu fil-fażi tal-bidu. Huma allegaw ukoll li kumpanija waħda b’kapaċità sostanzjali mhux użata fl-2011, li tinsab fi Stat Membru li ma implimentax id-Direttiva dwar l-Enerġiji Rinnovabbli (Renewable Energies Directive (“RED”), ma kellhiex tkun inkluża fil-kampjun. Il-partijiet iddikjaraw li f’każ li dawn il-kumpaniji finalment jiġu inklużi fil-kampjun, il-Kummissjoni għandha taġġusta d-dejta tagħhom sabiex tieħu f’kunsiderazzjoni dawn iċ-ċirkustanzi eċċezzjonali.

(22)

Huwa kkunsidrat li l-fatt li l-kumpaniji riċentement bdew jew issuktaw operazzjonijiet ma jipprekludihomx milli jkunu parti mill-kampjun. L-inklużjoni ta’ dawn il-kumpaniji ma tmurx kontra l-kriterji għall-għażla ta’ kampjun kif stipulat fl-Artikolu 27 tar-Regolament bażiku. Fir-rigward tal-aġġustament tad-dejta tagħhom, il-partijiet ma pprovdew ebda kwistjoni speċifika jew evidenza ssostanzjata biex jappoġġaw l-allegazzjoni tagħhhom, jew bażi biex jagħmlu l-aġġustament allegat. Barra minn hekk, l-investigazzjoni ma żvelat ebda spiża, bħal pereżempju diprezzamenti aċċelerati, li għandha tiġi aġġustata biex tiġi kkoreġuta kwalunkwe distorsjoni minħabba l-bidu ta’ attività. B’hekk, din l-allegazzjoni hija miċħuda.

(23)

Xi partijiet ikkontestaw ukoll l-esklużjoni mill-kampjun ta’ kumpanija waħda li ntgħażlet proviżorjament u li tinsab fi Stat Membru b’konsum u produzzjoni għoljin ta’ bijoetanol. Huma ddikjaraw li din il-kumpanija kellha prestazzjoni partikolarment tajba u allegaw li din kienet ir-raġuni għall-esklużjoni tagħha mill-kampjun. Huma argumentaw ukoll li l-għażla kienet immanipulata lejn is-sejba ta’ dannu. Skont dawn il-partijiet il-Kummissjoni kien imissha bagħtet l-hekk imsejħa kwestjonarji qosra lill-produtturi kollha sabiex tinġabar id-dejta rilevanti biex jintgħażel kampjun. F’dan ir-rigward għandu jiġi osservat li l-kumpanija inkwistjoni infurmat lill-Kummissjoni li ma setgħetx tkompli tiġi inkluża fil-kampjun. Fir-rigward tal-bgħit tal-kwestjonarji qosra, għandu jiġi osservat li, qabel l-għażla tal-kampjun, il-Kummissjoni talbet informazzjoni mingħand il-produtturi kollha tal-Unjoni magħrufa li huma kkonċernati sabiex tinġabar id-dejta rilevanti għall-iskop tal-għażla ta’ kampjun. Għaldaqstant l-allegazzjonijiet imsemmija hawn fuq ġew miċħuda.

(24)

Finalment, ġie allegat li l-kampjun kien imissu inkluda kumpaniji li jipproduċu l-bijoetanol mill-pitrava zokkrija ladarba l-produzzjoni minn din il-materja prima tista’ tagħmel ħafna aktar qligħ mill-produzzjoni minn, pereżempju, il-qamħ. Għalkemm din l-allegazzjoni ma kinitx sostanzjata, l-informazzjoni disponibbli wriet li l-bijoetanol prodott mill-pitrava zokkrija jirrappreżenta biss parti żgħira tal-produzzjoni totali tal-Unjoni, madwar 12 % fl-2011 u li tnejn mill-kumpaniji inklużi fil-kampjun parzjalment jużaw pitrava zokrija bħala prodott ta’ għalf għall-produzzjoni tal-bijoetanol. Għaldaqstant, din l-allegazzjoni ġiet miċħuda.

(25)

Fid-dawl tal-għadd potenzjalment kbir ta' importaturi involuti fil-proċedura, it-teħid tal-kampjuni kien maħsub għall-importaturi fin-notifika ta' bidu skont l-Artikolu 27 tar-Regolament bażiku.

(26)

Tliet importaturi biss ipprovdew l-informazzjoni mitluba u qablu li jkunu inklużi fil-kampjun sal-iskadenza stabbilita fin-notifika ta’ bidu. Fid-dawl tan-numru limitat ta’ importaturi li kkooperaw, it-teħid ta’ kampjun ma tqisx li huwa meħtieġ.

(27)

Il-Kummissjoni bagħtet kwestjonarji lill-partijiet kollha magħrufa li huma kkonċernati. B’hekk intbagħtu kwestjonarji lill-awtoritajiet tal-Istati Uniti tal-Amerika, l-esportaturi/produtturi tal-Istati Uniti inklużi fil-kampjun, il-produtturi tal-Unjoni inklużi fil-kampjun, it-tliet importaturi mhux relatati li kkooperaw fl-Unjoni u lill-utenti kollha magħrufa li huma kkonċernati fl-investigazzjoni.

(28)

Ġew riċevuti tweġibiet mill-awtoritajiet tal-Istati Uniti tal-Amerika, mill-esportaturi/produtturi tal-Istati Uniti inklużi fil-kampjun, il-produtturi tal-Unjoni inklużi fil-kampjun, żewġ importaturi mhux relatati u erba’ utenti.

(29)

Il-Kummissjoni fittxet u vverifikat l-informazzjoni kollha pprovduta mill-partijiet interessati u meqjusa bħala meħtieġa għall-finijiet tad-determinazzjoni ta’ sussidjar, dannu li jirriżulta minnu u interess tal-Unjoni.

(30)

Saru żjarat ta’ verifika f’dawn l-awtoritajiet tal-Istati Uniti:

Awtoritajiet federali tal-Istati Uniti

(31)

Saru wkoll żjarat fil-bini ta’ dawn il-kumpaniji:

(32)

L-investigazzjoni tas-sussidjar u d-dannu kopriet il-perjodu mill-1 ta' Ottubru 2010 sat-30 ta' Settembru 2011. L-eżami tax-xejriet rilevanti għall-evalwazzjoni tad-dannu kopra l-perjodu minn Jannar 2008 sat-tmiem tal-IP (“il-perjodu kkunsidrat”).

(33)

Il-prodott ikkonċernat huwa l-bijoetanol, xi drabi msejjaħ ukoll “fjuwil etanol”, jiġifieri alkoħol etiliku magħmul minn prodotti agrikoli, denaturat jew mhux denaturat, esklużi prodotti b’kontenut ta’ ilma ta’ aktar minn 0,3 % (m/m) imkejjel skont l-istandard EN 15376, kif ukoll alkoħol etiliku prodott minn prodotti agrikoli li jinsabu f’taħlitiet mal-gażolina b’kontenut ta’ alkoħol etiliku ta’ aktar minn 10 % (v/v) li joriġinaw mill-Istati Uniti tal-Amerika, li preżentament jaqgħu taħt il-kodiċi NM ex 2207 10 00 , ex 2207 20 00 , ex 2208 90 99 , ex 2710 12 11 , ex 2710 12 15 , ex 2710 12 21 , ex 2710 12 25 , ex 2710 12 31 , ex 2710 12 41 , ex 2710 12 45 , ex 2710 12 49 , ex 2710 12 51 , ex 2710 12 59 , ex 2710 12 70 , ex 2710 12 90 , ex 3814 00 10 , ex 3814 00 90 , ex 3820 00 00 u ex 3824 90 97 .

(34)

Il-bijoetanol jista’ jiġi prodott minn bosta għalf agrikolu, bħall-kannamiela, il-pitrava zokkrija, il-patata, il-manjoka, u l-qamħirrun. Fl-Istati Uniti tal-Amerika ssir distinzjoni abbażi tal-bosta għalf, kif deskritt hawn taħt:

(35)

B’mod aktar speċifiku, il-Bijofjuwil Ċellulożiku (5) huwa definit bħala fjuwil rinnovabbli dderivat minn kwalunkwe ċellulożi, emiċellulożi, jew linjina li hija derivata minn bijomassa rinnovabbli u li għandħa emissjonijiet GHG għaċ-ċiklu tal-ħajja, kif iddeterminat mill-Amministratur EPA, li huma ta’ mill-inqas 60 % inqas mill-emissjonijiet GHG bażi għaċ-ċiklu tal-ħajja. Il-bijofjuwils ċellulożiċi jinkludu l-bijoetanol. Hemm riċerki u proġetti bi prova li huma appoġġati l-aktar mill-Gvern Federali tal-Istati Uniti għall-produzzjoni ta’ Bijofjuwils Avvanzati u b’mod partikolari l-bijoetanol ċellulożiku, prodott b’mod partikolari minn skart agrikolu u forestrali. Skont uffiċjali tal-Istati Uniti u dejta disponibbli pubblikament (6), il-produzzjoni ta’ dan it-tip ta’ bijodiżil se tilħaq madwar erba' biljun litru fl-2014 u aktar minn 50 biljun litru sal-2021. Il-produzzjoni tal-bijoetanol ċellulożiku kienet negliġibbli fl-IP.

(36)

Matul il-perjodu tal-investigazzjoni sa issa l-qamħirrun kien il-materja prima prinċipali użata fl-Istati Uniti, waqt li l-materja prima prinċipali użata fl-Unjoni huwa l-qamħ.

(37)

L-investigazzjoni wriet li l-bijoetanol ġeneralment jinbiegħ fil-forma pura tiegħu lil blenders/operaturi tas-suq li jħalltuh (7) mal-gażolina b’mod partikolari biex jipproduċu taħlitiet ta’ livell għoli li huma esportati jew mibjugħa fis-suq domestiku għal taħlit ulterjuri u għall-konsum. It-taħlit mhuwiex operazzjoni kumplessa ħafna u jista’ jsir billi l-prodotti jitħalltu f’tankijiet speċjali waqt li jiżdiedu l-perċentwali mixtieqa ta’ bijoetanol u gażolina.

(38)

Sabiex jiġu identifikati d-diversi tipi ta’ bijoetanol u taħlitiet tal-bijoetanol użati madwar id-dinja, it-taħliet tal-fjuwil tal-etanol għandom numri "E" li jiddeskrivu l-perċentwal ta’ fjuwil tal-etanol fit-taħlita skont il-volum. Pereżempju, E85 huwa 85 % etanol anidruż u 15 % gażolina. It-taħlitiet b’livell baxx ta’ etanol, minn E5 sa E25, huma magħrufa wkoll bħala gasoħol, għalkemm fuq livell internazzjonali l-aktar użu komuni tat-terminu gasoħol jirreferi għat-taħlita E10. It-taħlitiet ta’ E10 jew inqas intużaw f’aktar minn għoxrin pajjiż madwar id-dinja sal-2011, bl-Istati Uniti fl-ewwel post, fejn kważi l-gażolina kollha mibjugħa bl-imnut fl-2010 kienet imħallta b’10 % etanol.

(39)

L-investigazzjoni wriet li t-tipi kollha ta’ bijoetanol huma kkunsidrati li huma bijofjuwils skont il-Programm Nazzjonali dwar l-Istandard tal-Fjuwil Rinnovabbli (National Renewable Fuel Standard program) (RFS1) stabbilit skont l-Att dwar il-Politika tal-Enerġija ((Energy Independence and Security Act) tal-2005, li emenda l-Att dwar l-Arja Nadifa (Clean Air Act) billi stabbilixxa l-ewwel standard nazzjonali dwar il-fjuwil rinnovabbli. L-Istati Uniti Il-Kungress tal-Istati Uniti ta lill-Aġenzija għall-Protezzjoni Ambjentali (Environmental Protection Agency) (EPA) tal-Istati Uniti r-responsabbiltà biex tikkoordina mad-Dipartiment tal-Enerġija tal-Istati Uniti (US Department of Energy), id-Dipartiment tal-Agrikoltura tal-Istati Uniti (US Department of Agriculture), u l-partijiet interessati biex ifasslu u jimplimentaw dan il-programm.

(40)

B’riżultat tal-politika adottata fl-Istati Uniti tal-Amerika għal numru ta’ snin għall-promozzjoni tal-bijoetanol, l-Istati Uniti tal-Amerika saru l-akbar produttur madwar id-dinja tal-bijoetanol sa mill-2005 b’sehem ta’ 57,5 % tal-produzzjoni globali. Fl-2009, l-EPA ħabbret li l-Istandard dwar il-Fjuwil Rinnovabbli ser jeħtieġ li l-biċċa l-kbira tal-irfinaturi, l-importaturi u l-blenders mhux ossiġenati tal-gażolina jissostitwixxu madwar 10 % tal-gażolina tagħhom bi fjuwils rinnovabbli bħall-etanol. Dak ir-rekwiżit kellu l-għan li jiżgura li ta’ mill-inqas 11-il biljun gallun tal-Istati Uniti ta’ fjuwils rinnovabbli jkunu jistgħu jiġu prodotti fl-2009, b’mod partikolari sabiex jinżammu l-miri stabbiliti mill-Att dwar l-Indipendenza tal-Enerġija u s-Sigurtaà tal-2007 (EISA) iżda wkoll sabiex issir esportazzjoni lejn swieq oħrajn.

(41)

Abbażi ta’ sorsi uffiċjali u ta’ informazzjoni disponibbli għas-suq u b’mod pubbliku (8), it-tipi kollha ta’ bijoetanol u bijoetanol li jinsab f’taħlitiet, jiġifieri taħlitiet ta’ bijoetanol b’gażolina minerali, li huma prodotti u mibgjugħa fl-Istati Uniti tal-Amerila u esportati huma meqjusa li huma fjuwils tal-bijoetanol u huma parti minn pakkett leġiżlattiv li jirrigwarda l-effiċjenza tal-enerġija u l-enerġija rinnovabbli u fjuwils alternattivi fl-Istati Uniti tal-Amerika.

(42)

Instab li t-tipi kollha ta’ bijoetanol u bijoetanol f’taħlitiet koperti minn din l-investigazzjoni, minkejja differenzi possibbli f’termini tal-għalf użat għall-produzzjoni, jew varjazzjonijiet fil-proċess tal-produzzjoni, it-tipi kollha għandhom l-istess karatteristiċi bażiċi fiżiċi, kimiċi u tekniċi, jew simili ħafna, u jintużaw għall-istess skopijiet. Il-varjazzjonijiet minuri possibbli fil-prodott ikkonċernat ma jbiddlux id-definizzjoni bażika tiegħu, il-karatteristiċi tiegħu, jew il-perċezzjoni tiegħu li għandhom id-diversi partijiet.

(43)

Xi partijiet ilmentaw li d-definizzjoni tal-prodott ikkonċernat ma kinitx ċara, b’mod partikolari għaliex ma kinitx tippermetti li ssir distinzjoni bejn il-bijoetanol għal applikazzjonijiet ta’ fjuwil minn dak maħsub għal applikazzjonijiet oħrajn. B’hekk, huma sostnew li l-investigazzjoni għandha tkopri l-etanol għal kull tip ta’ użu u l-etanol minn kull sors, inkluż etanol sintetiku li jikkompeti mal-bijoetanol għal użu industrijali.

(44)

Parti oħra lmentat il-kuntrarju, jiġifieri li l-investigazzjoni għandha tkopri biss il-bijoetanol għal applikazzjonijiet ta’ fjuwil u li l-bijoetanol għal użu industrijali b’hekk għandu jiġi eskluż.

(45)

F’dan il-kuntest, huwa osservat li l-prodott ikkonċernat għandu jkun definit primarjament abbażi tal-karatteristiċi fiżiċi, tekniċi u kimiċi bażiċi tiegħu u mhux abbażi tal-użu jew l-applikazzjonijiet tiegħu. Prodott li jkollu diversi applikazzjonijiet jista’ tabilħaqq ikollu l-istess karatteristiċi bażiċi jew simili minkejja l-użu ulterjuri tiegħu u f’ċerti ċirkustanzi jista’ jkun meħtieġ li ssir analiżi aktar dettaljata tad-definizzjoni tal-prodott u l-iskop tal-prodott fid-dawl tal-ispeċifiċità tal-industrija u s-suq.

(46)

F’dan il-każ, kien ċar li n-notifika ta’ bidu ma kellhiex l-għan li jkopri l-etanol sintetiku fid-definizzjoni tal-prodott. L-etanol sintetiku għandu karatteristiċi differenti mill-bijoetanol u ma jikkorrispondix mal-kriterji msemmija hawn fuq li huma relatati mad-definizzjoni tal-prodott ikkonċernat. Ma hemm ebda produttur li jiffoka fuq il-produzzjoni ta’ dak il-prodott li ħa sehem f’din l-investigazzjoni. Għaldaqstant, l-etanol sintetiku ma jistax jiġi inkluż fid-definizzjoni tal-prodott ikkonċernat u jaqa’ barra mill-kamp ta’ applikazzjoni tal-investigazzjoni.

(47)

Matul l-investigazzjoni ta’ operaturi fl-Istati Uniti u fl-Unjoni, ma tqajmet ebda kwistjoni dwar problemi possibbli fid-distinzjoni tal-bijoetanol li jintuża bħala fjuwil u l-bijoetanol li jintuża għal applikazzjonijiet oħrajn u b’hekk ma setgħet tiġi eżaminata ebda evidenza rilevanti. L-investigazzjoni kkonfermat li s-sussidjar fl-Istati Uniti tal-Amerika huwa maħsub għall-bijoetanol bħala fjuwil, jiġifieri l-bijoetanol inkluż f’taħlita ta’ fjuwil u l-investigazzjoni tal-produtturi tal-Unjoni ffukat fuq bijoetanol intiż biex jintuża bħala fjuwil u mhux għal forom oħra ta’ użu.

(48)

Instab li l-bijoetanol manifatturat mill-industrija tal-Unjoni u mibjugħ fis-suq tal-Unjoni għandu karatteristiċi fiżiċi, kimiċi u tekniċi bażiċi simili meta mqabbel mal-bijoetanol esportat lejn l-Unjoni mill-Istati Uniti tal-Amerika.

(49)

Kif deskritt fil-premessa (34) hawn fuq, il-bijoetanol jista’ jiġi prodott minn diversi għalf. Madankollu, l-investigazzjoni ma writx li l-għalf użat jista’ jwassal għal xi differenzi fil-prodott finali. Instab li l-prodott ikkonċernat prodott fl-Istati Uniti tal-Amerika u esportat lejn l-Unjoni huwa interkambjabbli ma’ dak prodott u mibjugħ fl-Unjoni mill-produtturi tal-Unjoni. Barra minn hekk, ma hemm ebda differenza fl-Istati Uniti fil-perċezzjoni minn operaturi u utenti fis-suq.

(50)

Għaldaqstant wieħed għandu jikkonkludi li l-bijoetanol prodott u mibjugħ fl-Unjoni u l-prodott ikkonċernat għandhom jitqiesu bħala simili skont it-tifsira tal-Artikolu 2(c) tar-Regolament bażiku.

(51)

Abbażi tal-informazzjoni li tinsab fl-ilment u t-tweġibiet għall-kwestjonarji tal-Kummissjoni, ġew investigati l-Iskemi Federali li ġejjin, li allegatament involvew l-għoti ta’ sussidji:

Skemi Federali

(52)

Abbażi tal-informazzjoni li tinsab fl-ilment u t-tweġibiet għall-kwestjonarji tal-Kummissjoni, ġew investigati wkoll l-Iskemi Statali li ġejjin, li allegatament involvew l-għoti ta’ sussidji:

Skemi Statali

(53)

It-titolu 26 U.S.C – Internal Revenue Code (Kodiċi dwar id-Dħul Intern) – it-taqsimiet 6426 u 6427 huwa l-bażi legali għall-kreditu ta’ taxxa tal-fjuwil għat-taħlita (“kreditu ta’ taxxa għat-taħlita”) fuq il-bijoetanol.

(54)

Sabiex ikunu eliġibbli għall-kreditu ta’ taxxa għat-taħlita fl-IP, il-persuni kienu meħtieġa li joħolqu taħlita ta’ bijoetanol bi fjuwil taxxabbli (gażolina, fjuwil tad-diżil jew pitrolju), li mbagħad jintuża bħala fjuwil jew jinbiegħ biex jintuża bħala fjuwil. Għal dawk il-persuni (blenders), il-kreditu kien ta’ 0,45 USD għal kull gallun ta’ bijoetanol imħallat fi fjuwil taxxabbli.

(55)

Il-produtturi tal-bijoetanol jistgħu jitolbu l-inċentiv biss meta huma stess ikunu qegħdin iwettqu attività ta’ taħlit. Il-produttur irid iħallat il-bijoetanol mhux imħallat ma’, pereżempju, il-gażolina. Il-kumpaniji li ma jipproduċux iżda jixtru l-bijoetanol mhux imħallat u jħalltuh f’taħlita ta’ bijoetanol huma wkoll intitolati għall-kreditu ta’ taxxa għat-taħlita. F’termini tal-intitolament għall-inċentiv, ma hemm ebda differenza bejn bijoetanol imħallat intiż għal bejgħ domestiku u għal bejgħ b’esportazzjoni.

(56)

B’hekk hija l-attività tat-taħliet li tiskatta l-eliġibbiltà għall-kreditu ta’ taxxa għat-taħlita. L-ammont tas-sussidju mogħti għal fjuwil imħallat jiddependi fuq il-proporzjon ta’ bijoetanol li jkun fih. Is-sussidju jista’ jintalab jew bħala kreditu kontra l-obbligu għat-taxxa tas-sisa jew bħala ħlas dirett fi flus.

(57)

Matul l-IP, il-kreditu ta’ taxxa għat-taħlita kien mitlub b’mod predominanti (aktar minn 90 %) bħala kreditu tat-taxxa tas-sisa minn dak li jħallat fuq l-Iskeda C tal-Formola 720, "Quarterly Federal Excise Tax Return" (Prospett Trimestrali Federali tat-Taxxa tas-Sisa). Il-kreditu kien awtorizzat sal-limitu tal-obbligu tat-taxxa fuq il-fjuwil u b’hekk kien jintalab fuq din il-formola minn kull min ikun soġġett għat-taxxa fuq il-gażolina, pereżempju f’sitwazzjoni fejn it-taħlit tal-bijoetanol u l-gażolina jkun seħħ fit-terminal tal-ħżin qabel it-tassazzjoni tal-gażolina.

(58)

Il-blender seta’ jitlob ukoll kreditu rimborżabbli tat-taxxa fuq id-dħul jew ħlas dirett minflok kreditu tat-taxxa tas-sisa, iżda biss għall-ammont li bih il-kreditu tat-taxxa jkun qabeż l-obbligu totali tat-taxxa tas-sisa, jiġifieri l-ammont li bih is-sussidju massimu permissibbli għat-taħlita jkun qabeż il-kreditu awtorizzat fuq il-Formola 720. Għandu jiġi osservat li l-kreditu tat-taxxa tas-sisa seta’ jaqbeż l-obbligu tat-taxxa tas-sisa jekk, pereżempju, il-gażolina użata biex issir it-taħlita tkun intaxxata qabel ma tiġi akkwistata mill-blender. F’każijiet bħal dawn setgħu jsiru talbiet permezz tal-Formola 8849, "Claim for Refund of Excise Taxes" (“Talba għal Rimborż ta’ Taxxi tas-Sisa”).

(59)

Il-kreditu ta’ taxxa għat-taħlita ma kienx kumulattiv, jiġifieri baqa’ l-istess kemm jekk is-sussidju jkun intalab bħala kreditu tat-taxxa tas-sisa, bħala kreditu tat-taxxa fuq id-dħul, bħala ħlas dirett lill-persuna taxxabbli jew kwalunkwe kombinament ieħor ta’ dawn. It-talbiet għall-ħlas kienu jsiru jew fuq il-Formola 8849, l-Iskeda C tal-Formola 720 jew f’każ tal-kreditu rimborżabbli tat-taxxa fuq id-dħul fuq il-Formola 4136, "Credit for Federal Tax Paid on Fuel" (Kreditu għal Taxxa Federali Mħallsa fuq il-Fjuwil), li kienet mehmuża mal-prospett tat-taxxa fuq id-dħul tal-applikant. Għandu jiġi osservat, madankollu, li l-ammont totali tas-sussidju ma setax jaqbeż il-0,45 USD għal kull gallun ta’ bijoetanol.

(60)

Kreditu mhux rimborżabbli tat-taxxa fuq id-dħul kien disponibbli wkoll għal blenders tal-bijoetanol matul l-IP. Dan il-kreditu mhux rimborżabbli tat-taxxa fuq id-dħul fuq kwantità ta’ fjuwil disponibbli għal blender tnaqqas mill-ammont ta’ kreditu tat-taxxa tas-sisa mitlub fir-rigward ta’ dik l-istess kwantità ta’ fjuwil. Fi kliem ieħor, blender ma setax jitlob kemm il-kreditu tat-taxxa tas-sisa kif ukoll il-kreditu mhux rimborżabbli tat-taxxa fuq id-dħul għall-istess kwantità ta’ bijoetanol imħallat bil-gażolina. Meta japplika għall-kreditu mhux rimborżabbli tat-taxxa fuq id-dħul, il-produttur kellu jiddikjara li ma kienx talab il-kreditu tat-taxxa tas-sisa għall-istess kwantità ta’ bijoetanol.

(61)

Il-kreditu ta’ taxxa għat-taħlita jista’ jintalab biss darba għall-istess kwantità ta’ bijoetanol użat biex issir taħlita, jiġifieri jew mill-produttur li jħallat huwa stess jew minn xerrej li jwettaq l-attività ta’ taħlit. Fiż-żewġ każijiet, il-blender huwa intitolat għal kreditu ta’ taxxa ta’ 0,45 USD għal kull gallun għan-numru ta’ galluni ta’ bijoetanol użati fil-produzzjoni ta’ taħlita.

(62)

L-investigazzjoni wriet li fil-maġġoranza tal-każijiet, il-persuna li titlob is-sussidju (“ir-rikorrent") kienet persuna li tħallat/operatur tas-suq b’obbligazzjoni tat-taxxa tas-sisa bħal kumpanija petrokimika. Tabilħaqq, it-taħlit jiddependi fuq numru ta’ fatturi bħall-kapaċità disponibbli tat-tank kif ukoll is-sit ġeografiku ta’ bijoetanol u gażolina disponibbli rispettivament. Fil-biċċa l-kbira tal-każijiet deher li l-produttur tal-bijoetanol ma talabx il-kreditu ta’ taxxa għat-taħlita. Fil-fatt huwa ċar li t-taħlit fil-biċċa l-kbira tal-każijiet seħħ f’terminals jew fi xkafef tat-terminals. F’dan ir-rigward, jidher li l-applikant fil-biċċa l-kbira tal-każijiet kien persuna b’obbligazzjoni tat-taxxa tas-sisa.

(63)

Is-suq għall-bijoetanol bħala użu finali ma kienx kbir u b’hekk kien jagħmel sens ekonomiku li jitħallat il-bijoetanol prodott u li ssir taħlita li tiskatta l-kreditu ta’ taxxa għat-taħlita. Għandu jiġi osservat li l-kreditu ta’ taxxa għat-taħlita (Excise Tax /Income tax credit – Kreditu tat-Taxxa tas-Sisa/Taxxa fuq id-Dħul) għall-bijoetanol kien ilu jeżisti sa mill-1980, jiġifieri għal aktar minn 30 sena, u skada fl-aħħar ta' Diċembru 2011 (wara l-IP).

(64)

L-investigazzjoni sabet li żewġ kumpaniji fil-kampjun għamlu talbiet għall-kreditu ta’ taxxa għat-taħlita fl-IP. Madankollu, is-sussidji miksuba għaż-żewġ kumpaniji kienu insinifikanti.

(65)

Madankollu, meta titqabbel il-produzzjoni totali tal-bijoetanol fl-Istati Uniti tal-Amerika matul l-IP mal-kwantità totali ta’ bijoetanol li jirċievi kreditu ta’ taxxa għat-taħlita, huwa ċar li l-bijoetanol kollu prodott fl-Istati Uniti tal-Amerika matul l-IP kien jibbenefika minn sussidju taħt din l-iskema. Dan huwa kkonfermat ukoll mill-istatistika pprovduta mill-awtoritajiet rilevanti tal-Istati Uniti.

(66)

Abbażi ta’ dan, i-sejbiet tal-investigazzjoni wrew b’mod ċar li l-bijoetanol kollu kien issussidjat permezz ta’ dan il-kreditu ta’ taxxa fuq it-taħlita matul l-IP.

(67)

L-investigazzjoni wriet li matul l-IP, il-bijoetanol kollu prodott fl-Istati Uniti bbenefika mill-kreditu ta’ taxxa fuq it-taħlita. Dan il-kreditu ta’ taxxa għat-taħlita għandu jitqies bħala inċentiv fiskali irrispettivament minn jekk jingħatax b’kumpens kontra obbligi fiskali jew bħala ħlas fi flus.

(68)

Din l-iskema għandha titqies bħala sussidju fis-sens tal-Artikolu 3(1)(a)(i) u l-Artikolu 3(1)(a)(ii) tar-Regolament bażiku peress li l-iskema tipprovdi kontribut finanzjarju mill-Gvern tal-Istati Uniti tal-Amerika fil-forma ta’ għotjiet diretti (ħlasijiet fi flus) u dħul irrinunzjat li kieku jkun dovut (kumpens ta’ taxxa). Is-sussidju jagħti benefiċċju lill-kumpaniji li jirċevuh.

(69)

L-iskema hija limitata għal kumpaniji li huma involuti fl-industrija tal-bijoetanol, jiġifieri t-taħlit tal-bijoetanol, u b’hekk jitqies li huwa speċifiku taħt l-ewwel subparagrafu tal-Artikolu 4(2), punt (a) tar-Regolament bażiku u b’hekk bħala kumpensatorju.

(70)

Il-kreditu ta’ taxxa fuq it-taħlita tal-bijoetanol ngħata b’referenza għall-kwantitajiet ta’ bijoetanol użati f’taħlita, jiġifieri 0,45 USD għal kull gallun ta’ bijoetanol imħallat fi fjuwil taxxabbli.

(71)

Huwa kkunsidrat li l-ammont ta’ sussidju huwa ta’ 0,45 USD għal kull gallun fuq bażi għall-pajjiż kollu billi l-produzzjoni totali ta’ bijoetanol tal-Istati Uniti, inklużi l-esportazzjonijiet ta’ bijoetanol lejn l-Unjoni, finalment kienet ser tibbenefika mill-kreditu fuq it-taħlita tal-bijoetanol. Għalhekk mhuwiex meħtieġ li wieħed jiddistingwi bejn l-operaturi ekonomiċi, b’mod partikolari billi s-sussidju rari jingħata lill-produtturi tal-bijoetanol iżda prinċipalment lill-operaturi li jħalltu l-bijoetanol pereżempju mal-gażolina.

(72)

It-titolu 26 tal-U.S.C Internal Revenue Code, Artikolu 40, huwa l-bażi legali għall-kreditu tat-taxxa fuq id-dħul għall-produtturi ż-żgħar.

(73)

Din l-iskema hija disponibbli biss għal produtturi żgħar tal-bijoetanol. Produttur żgħir huwa ddefinit bħala kwalunkwe persuna li l-kapaċità tal-produzzjoni tagħha ma taqbiżx 60 miljun gallun ta’ bijoetanol fis-sena. Matul l-IP, produttur żgħir seta’ jitlob kreditu ta’ taxxa fuq id-dħul min-negozju ġenerali, mhux rimborżabbli, ta’ 0,10 USD għal kull gallun ta’ bijoetanol prodott. Kwalunkwe blender jew negozjant li jixtri iżda ma jipproduċix il-bijoetanol mhuwiex eliġibbli għall-kreditu. Barra minn hekk, sabiex tkun eliġibbli għall-kreditu, il-produzzjoni ma tistax taqbeż 15-il miljun gallun fi kwalunkwe sena taxxabbli u l-bijoetanol prodott irid jintuża bħala fjuwil, jinbiegħ għall-użu bħala fjuwil, jew jintuża sabiex tinħoloq taħlita ta’ bijoetanol u fjuwil taxxabbli li suċċessivament jintuża bħala fjuwil jew jinbiegħ għall-użu bħala fjuwil.

(74)

It-talbiet għall-kreditu ta’ taxxa fuq id-dħul għall-produtturi ż-żgħar isiru kull sena, bħala parti mill-prospett tat-taxxa fuq id-dħul tal-applikant. Il-kreditu għal kull gallun ta’ bijoetanol prodott mir-rikorrent matul is-sena fiskali rilevanti, sa massimu ta’ 15-il miljun gallun, jiġi kkumpensat kontra l-obbligazzjoni tar-rikorrent għat-taxxa fuq id-dħul korporattiva. Jekk l-obbligazzjoni tat-taxxa tar-rikorrent tkun inqas mill-ammont ta’ kreditu mitlub, l-ammont żejjed jista’ jitressaq ’il quddiem għas-snin fiskali sussegwenti.

(75)

Minħabba l-kriterji tal-eliġibbiltà, żewġ kumpaniji biss fil-kampjun ibbenefikaw minn din l-iskema matul il-PI.

(76)

Din l-iskema hija kkunsidrata bħala sussidju fis-sens tal-Artikolu 3(1)(a)(ii) tar-Regolament bażiku billi l-iskema tipprovdi kontribuzzjoni finanzjarja mill-Gvern tal-Istati Uniti fil-forma ta’ dħul irrinunzjat li kieku jrid jitħallas. Is-sussidju jagħti benefiċċju lill-kumpaniji li jirċevuh.

(77)

L-iskema hija limitata għall-kumpaniji li jipproduċu l-bijoetanol, u għalhekk hija kkunsidrata bħala speċifika skont l-Artikolu 4(2), l-ewwel subparagrafu, punt (a) tar-Regolament bażiku u għalhekk ta’ natura kumpensatorja.

(78)

Statistika pprovduta mill-awtoritajiet tal-Istati Uniti wriet li l-użu globali tal-kreditu ta’ taxxa fuq id-dħul tal-produtturi ż-żgħar kien żgħir ħafna b’kuntrast ma’ talbiet magħmula għall-kreditu ta’ taxxa fuq it-taħlita tal-fjuwils. Paragun tal-ammont totali ddikjarat taħt din l-inċentiva fir-rigward tal-produzzjoni totali ta’ bijoetanol wera sussidju globali insinifikanti matul l-IP.

(79)

It-titolu 26 tal-U.S.C Internal Revenue Code, Artikolu 40 huwa l-bażi legali għall-kreditu ta’ taxxa fuq id-dħul għall-produtturi tal-bijoetanol ċellulożiku.

(80)

Din l-iskema hija disponibbli biss għall-produtturi tal-bijoetanol ċellulożiku.

(81)

It-talbiet għall-kreditu tat-taxxa fuq id-dħul isiru kull sena, bħala parti mill-prospett tat-taxxa tar-rikorrent.

(82)

Qabel l-1 ta' Jannar 2012, il-kreditu disponibbli kien ta’ 0,46 USD għal kull gallun ta’ bijoetanol ċellulożiku prodott. Mill-1 ta' Jannar 2012 il-kreditu żdied għal 1,01 USD għal kull gallun.

(83)

Din l-iskema hija kkunsidrata bħala sussidju fis-sens tal-Artikolu 3(1)(a)(ii) tar-Regolament bażiku billi l-iskema tipprovdi kontribuzzjoni finanzjarja mill-Gvern tal-Istati Uniti tal-Amerika fil-forma ta’ dħul irrinunzjat li kieku jrid jitħallas. Is-sussidju jagħti benefiċċju lill-kumpaniji li jirċevuh.

(84)

L-iskema hija limitata għal kumpaniji li jipproduċu l-bijoetanol, u għalhekk hija kkunsidrata bħala speċifika skont l-Artikolu 4(2), l-ewwel subparagrafu, punt (a) tar-Regolament bażiku u għalhekk ta’ natura kumpensatorja.

(85)

Ma kien hemm ebda talbiet għall-kreditu ta’ taxxa fuq id-dħul mill-produtturi tal-bijoetanol ċellulożiku matul il-PI li jikkoinċidi man-nuqqas ta’ produzzjoni kummerċjali tal-bijoetanol ċellulożiku sal-aħħar tal-IP.

(86)

Il-Programm dwar il-Bijoenerġija tad-Dipartiment tal-Agrikultura tal-Istati Uniti (US Department of Agriculture - USDA) kien oriġinarjament awtorizzat u ffinanzjat mill-Commodity Credit Corporation (CCC) tal-USDA bl-awtorità ġenerali tagħha skont l-Artikolu 5 tas-CCC Charter Act.

(87)

L-iskema kienet fis-seħħ mill-1 ta' Diċembru 2000 sa Ġunju 2006. Hija kienet amministrata mill-Farm Service Agency (FSA) tal-USDA.

(88)

Meta kien qed jopera l-programm, il-produtturi kummerċjali kollha tal-bijoenerġija kienu eliġibbli sabiex jipparteċipaw. Il-produtturi kienu meħtieġa jipprovdu evidenza tal-produzzjoni, kif ukoll evidenza tax-xiri u l-użu ta’ komoditajiet agrikoli relatati ma’ dik il-produzzjoni. B’mod partikolari, il-produtturi tal-bijoetanol kienu meħtieġa jipproduċu u jbigħu l-bijoetanol b’mod kummerċjali.

(89)

Sabiex ikun eliġibbli, produttur ried jissodisfa ċerti rekwiżiti fir-rigward taż-żamma tar-rekords u l-għoti tal-informazzjoni meħtieġa, kif ukoll jawtorizza lis-CCC sabiex tivverifika dik l-informazzjoni. Ir-regolamenti rilevanti stabbilixxewew id-dettalji tal-proċeduri li kellhom jiġu segwiti għar-reġistrazzjoni fil-programm, l-applikazzjonijiet għall-ħlas u l-proċeduri ta’ rappurtar li l-applikanti kienu meħtieġa li jsegwu sabiex ikunu eliġibbli għall-ħlasijiet.

(90)

F’kull sena fiskali, il-produtturi tal-bijoetanol setgħu jirreġistraw fl-iskema billi jissottomettu l-formoli rilevanti. Wara r-reġistrazzjoni, il-produtturi tal-bijoetanol kienu jissottomettu applikazzjonijiet għall-ħlas kull tliet xhur. Il-produtturi tal-bijoetanol riedu jipprovdu dokumentazzjoni tax-xirjieti nett tagħhom ta’ komoditajiet eliġibbli u tal-produzzjoni netta ta’ bijoetanol matul il-perjodi rilevanti.

(91)

L-iskema kienet tipprovdi ħlasijiet lill-produtturi tal-bijoetanol li kienu bbażati fuq kombinament tal-produzzjoni bażi tagħhom ta’ bijoetanol u żieda fil-produzzjoni tal-bijoetanol fil-perjodu korrispondenti tas-sena fiskali preċedenti. Għas-sena fiskali 2006, il-kumpaniji rċevew biss inċentivi miż-żieda fil-produzzjoni tal-bijoetanol.

(92)

Billi l-iskema ntemmet f’Ġunju 2006, l-ebda waħda mill-kumpaniji fil-kampjun ma rċeviet inċentivi taħt din l-iskema matul il-perjodu tal-investigazzjoni.

(93)

Jidher li kien hemm konfużjoni dwar jekk din l-iskema ġietx introdotta mill-ġdid għas-sena fiskali 2009 (Ottubru 2008-Settembru 2009). Madankollu, l-investigazzjoni kkonfermat li dan ma kienx il-każ. L-iskema kif deskritta hawn fuq skadiet fl-2006.

(94)

Instab li l-iskema ntemmet f’Ġunju 2006 u li ma ġewx provduti sussidji matul l-IP.

(95)

Il-Programm tal-Bijoenerġija għall-Bijofjuwils Avvanzati (ġeneralment imsemmi bħala il-Programm ta’ Ħlas għal Bijofjuwil Avvanzat) jipprovdi produzzjoni lil produtturi eliġibbli ta' "bijofjuwils avvanzati”. Skont l-awtoritajiet tal-Istati Uniti, “bijofjuwils avvanzati” huma definiti speċifikament biex jeskludu fjuwil derivat minn qamħirrun li huwa l-għalf ewlieni għall-produzzjoni tal-bijoetanol tal-Istati Uniti.

(96)

It-Titolu IX, tat-Taqsima 9005 tal-Farm Security and Rural Investment Act tal-2002 (il-Farm Bill tal-2002) kif emendat mit-Titolu IX, it-Taqsima 9001 tal-Food, Conservation, and Energy Act tal-2008 huwa l-bażi legali għall-Programm ta’ Bijoenerġija għal Bijofjuwils Avvanzati.

(97)

Applikant irid ikun “produttur ta’ bijofjuwil avvanzat". It-terminu “produttur ta’ bijofjuwil avvanzat” huwa definit bħala: “Individwu, korporazzjoni, kumpanija, fondazzjoni, assoċjazzjoni, organizzazzjoni tax-xogħol, ditta, sħubija, soċjetà, kumpanija b’kapital konġunt, grupp ta' organizzazzjonijiet, jew entità mingħajr skop ta’ qligħ li tipproduċi u tbigħ bijofjuwil avvanzat. Entità li tħallat jew tgħaqqad b’mod ieħor bijofjuwils avvanzati f’bijofjuwil imħallat mhijiex ikkunsidrata bħala produttur ta’ bijofjuwil avvanzat skont dan il-Programm.

(98)

Bijokarburant avvanzat huwa definit fit-Taqsima 9001 tal-Food, Conservation, and Energy Act tal-2008 bħala “fjuwil derivat minn bijomassa rinnovabbli għajr lamtu tal-qalba tal-qamħirrun”. Skont dan l-Att, il-bijofjuwils avvanzati jinkludu b’mod speċifiku:

(99)

Il-produtturi tal-bijoetanol jistgħu jibbenefikaw minn din l-iskema. Sabiex ikunu eliġibbli għall-ħlasijiet, il-produtturi jridu jżommu rekords għas-snin u t-trimestri fiskali kollha rilevanti. Dawn ir-rekords jinkludu dokumentazzjoni għax-xiri tal-għalf, il-produzzjoni tal-bijoetanol, il-prezz u l-kwantità ta’ bijoetanol mibjugħ. Il-produtturi jirċievu ħlasijiet diretti mill-Gvern.

(100)

L-iskema tipprovdi ħlasijiet għall-produtturi tal-bioetanol li huma bbażati fuq kombinament tal-produzzjoni attwali tagħhom u produzzjoni inkrimentali, jiġifieri ż-żieda fil-produzzjoni meta mqabbla mas-sena ta’ qabel. Ir-rati tal-ħlas għall-produzzjoni attwali huma kkalkulati kull tliet xhur għall-ammont ta’ bijofjuwil avvanzat attwali prodott kull tliet xhur. Il-ħlasijiet tal-produzzjoni inkrimentali jsiru għall-kwantità ta’ bijofjuwil avvanzat eliġibbli li jiġi prodott f’sena fiskali minn produttur eliġibbli, li jaqbeż il-kwantità prodotta fis-sena fiskali preċedenti.

(101)

Il-prodott finali huwa eżattament l-istess irrispettivament minn jekk il-bijoetanol ikunx derivat mill-għalf imsemmi fil-premessa (98), jew jekk ikunx ġie prodott mill-qamħirrun li huwa l-għalf prinċipali għall-produzzjoni tal-bijoetanol fl-Istati Uniti.

(102)

Instab li l-kumpaniji inklużi fil-kampjun ma bbendefika minn ebda sussidju provdut skont l-iskema. Il-maġġoranza tal-produtturi li jibbenefikaw minn din l-iskema huma produtturi tal-bijodiżil. Fil-fatt, 15 biss minn madwar 155 kumpanija fl-Istati Uniti tal-Amerika li rċevew sussidji skont din l-iskema fl-2011 ipproduċew il-bijoetanol.

(103)

Fir-rigward tal-kumpaniji mhux magħżula fil-kampjun, l-investigazzjoni turi li l-ammont totali ta’ sussidji mogħyija skont din l-iskema għall-produzzjoni tal-bijoetanol kien insinifikanti meta mqabbel mal-produzzjoni totali ta’ bijoetanol matul l-IP.

(104)

Għaldaqstant ma kienx meħtieġ li ssir aktar valutazzjoni tal-kumpens ta’ din l-iskema.

(105)

Il-Programm ta’ Għajnuna għall-Bijoraffineriji tal-USDA hu maħsub sabiex jgħin fl-iżvilupp ta’ teknoloġiji ġodda u emerġenti għall-bijofjuwils avvanzati.

(106)

It-Titolu IX, it-Taqsima 9003 tal-Farm Security and Rural Investment Act tal-2002 (il-Farm Bill tal-2002) kif emendat mit-Titolu IX, it-Taqsima 9001 tal-Food, Conservation, and Energy Act tal-2008 huwa l-bażi legali għall-Programm ta’ Għajununa għall-Bijoraffineriji.

(107)

Il-programm huwa amministrat minn fergħa tad-Dipartiment tal-Agrikultura. Huwa joffri garanziji fuq is-self lil applikanti eliġibbli b’appoġġ għall-iżvilupp u l-kostruzzjoni ta’ bijoraffineriji fuq skala kummerċjali li jużaw teknoloġija eliġibbli, jew modifiki ta’ faċilitajiet eżistenti b’teknoloġija eliġibbli. Sabiex ikun eliġibbli għall-iskema, proġett partikolari jrid juża teknoloġija adattata għal operazzjoni vijabbli fuq skala kummerċjali jew irid jintwera li għandu potenzjal tekniku u ekonomiku għall-applikazzjoni kummerċjali f’bijoraffinerija li tipproduċi bijofjuwil avvanzat. Il-proġett irid juża materjal eliġibbli għall-produzzjoni ta’ bijofjuwils avvanzati u prodotti bbażati fuq il-prodotti bijoloġiċi. Eżempji ta’ għalf eliġibbli jinkludu, iżda mhumiex limitati għal, bijomassa rinnovabbli, bijosolidi, ħama tad-drenaġġ ittrattat, u prodotti sekondarji tal-industrija tal-polpa u tal-karta. Il-biċċa l-kbira tal-produzzjoni ta’ bijoraffinerija eliġibbli trid tkun ta’ bijofjuwils avvanzati.

(108)

Il-produtturi tal-bijoetanol jistgħu jibbenefikaw minn din l-iskema jekk huma jissodisfaw il-kriterji tal-eliġibbiltà u sakemm ikun hemm biżżejjed fondi tal-Gvern. Proġett irid ikollu mertu tekniku u l-mutwatarju jrid jissodisfa ċerti kriterji finanzjarji stabbiliti fil-leġiżlazzjoni rilevanti. Irid ikun hemm ukoll assigurazzjoni raġonevoli li s-self li jkun qiegħed jiġi ggarantit ikun se jitħallas lura.

(109)

Kandidat magħżul jirċievi garanzija fuq is-self li tippermetti lill-applikant li jikseb il-fond meħtieġ mingħand mutwanti ta’ parti terza. Il-parteċipazzjoni massima tal-Aġenzija (Gvern Federali) fi proġett eliġibbli hija garanzija ta’ 90 % ta’ self li jkopri sa 80 % tal-ispejjeż eliġibbli tal-proġett li jkun qed jiġi ffinanzjat. Il-mutwatarju jrid jipprovdi l-20 % li jifdal. Barra minn hekk, il-perċentwal massimu ta’ garanzija jonqos hekk kif l-ammont tas-self jiżdied.

(110)

L-investigazzjoni wriet li l-ebda kumpanija kienet għadha ma rċevitx ħlasijiet mill-Gvern tal-Istati Uniti skont din l-iskema. Matul il-PI, tliet kumpaniji li ma kinux magħżula fil-kampjun kienu applikaw għal garanzija fuq is-self relatata mal-produzzjoni ta’ bijoetanol ċellulożiku, għalkemm tnejn miż-żewġ applikazzjonijiet għal garanzija fuq is-self kienu pendenti. L-ebda waħda minn dawn il-kumpaniji ma hi produttur tal-bijoetanol derivat mill-qamħirrun. L-investigazzjoni wriet ukoll li kien għad mhemmx produzzjoni ta’ bijoetanol b’riżultat ta’ din l-iskema.

(111)

L-investigazzjoni wriet ukoll li l-għoti ta’ garanziji fuq is-self lil produtturi futuri ta’ bijoetanol ċellulożiku ma kellu l-ebda impatt fuq il-produzzjoni u l-bejgħ tal-bijoetanol matul l-IP.

(112)

Għaldaqstant mhemmx bżonn li jiġi evalwat aktar l-effett kumpensatorju ta’ din l-iskema fil-kuntest ta’ din l-investigazzjoni.

(113)

Il-Programm ta’ Għajununa tal-USDA dwar l-Għelejjel għall-Bijomassa (“BCAP”) jappoġġa l-produzzjoni ta’ għalf għall-bijofjuwils avvanzati tal-ġenerazzjoni li jmiss. Il-BCAP jipprovdi benefiċċji għall-produtturi ta’ għelejjel eliġibbli jew għas-sidien ta’ materjali tal-bijomassa mkabbra fuq artijiet eliġibbli. Bħala tali, il-benefiċċji jiġu pprovduti għall-produzzjoni ta’ għelejjel u materjali li jistgħu jintużaw bħala input għal bijofjuwils avvanzati, iżda mhux għall-produzzjoni tal-bijofjuwils.

(114)

Skont l-awtoritajiet tal-Istati Uniti tal-Amerika, il-bijoetanol prodott mill-qamħirrun, li jammonta għal kważi l-produzzjoni u l-esportazzjonijiet kollha ta’ bijoetanol tal-Istati Uniti, huwa speċifikament eskluż mill-BCAP. Fl-opinjoni tal-awtoritajiet tal-Istati Uniti tal-Amerika, minħabba l-konċentrazzjoni tal-BCAP fuq il-bijofjuwils avvanzati, u n-nuqqas ta’ produzzjoni kummerċjali ta’ bijofjuwils avvanzati, il-programm ma ta l-ebda benefiċċju lill-produtturi kummerċjali tal-bijoetanol fl-Istati Uniti matul l-IP.

(115)

It-Taqsima 9011 tal-Food, Conservation, and Energy Act tal-2008 (il-Farm Bill tal-2008) hija l-bażi legali tal-Programm ta’ Għajununa tal-USDA dwar l-Għelejjel għall-Bijomassa.

(116)

Il-BCAP għandu żewġ komponenti, kull wieħed b’eliġibbiltà speċifika u differenti. L-ewwel komponent, il-komponent taż-Żona tal-Proġett, jipprovdi benefiċċji lill-produtturi ta’ “għelejjel eliġibbli” filwaqt li t-tieni komponent, il-komponent tat-Tqabbil tal-Għajnuna, jipprovdi benefiċċji għas-sidien ta’ “materjali eliġibbli”. L-għelejjel eliġibbli u l-materjali eliġibbli jservu bħala inputs għall-bijofjuwils avvanzati, is-sħana, l-enerġija, u l-prodotti bijoloġiċi. Skont l-awtoritajiet tal-Istati Uniti tal-Amerika, ma jsirux ħlasijiet lill-produtturi tal-bijofjuwil u tal-bijoenerġija nfushom.

(117)

Għalla eliġibbli hija kwalunkwe għalla ta’ "bijomassa rinnovabbli” bl-esklużjoni ta’ kwalunkwe għalla eliġibbli sabiex tirċievi ħlasijiet skont it-Titolu I tal-Farm Bill tal-2008. Fost affarijiet oħra, l-għelejjel esklużi huma l-qamħirrun, is-sorgu tal-qamħ, il-ħafur, ir-ross, il-qamħ, l-għasel u z-zokkor.

(118)

Il-materjal eliġibbli huwa definit bħala kwalunkwe “bijomassa rinnovabbli”, bl-esklużjoni ta’ qamħ mhux ipproċessat minn kwalunkwe għalla eskluża mill-“għelejjel eliġibbli” kif imsemmi hawn fuq. Għalkemm il-qamħ mill-għelejjel esklużi (bħall-qamħirrun) huwa eskluż mill-“materjali eliġibbli”, ir-residwi minn dawk l-għelejjel (bħall-materjal ċellulożiku) huma “materjali eliġibbli”.

(119)

L-ewwel komponent tal-BCAP jipprovdi benefiċċji lill-produtturi ta’ għelejjel eliġibbli. Sabiex tkun eliġibbli għall-benefiċċji, l-għalla eliġibbli trid tkun prodotta f’żona ġeografika indikata bħala “żona tal-proġett”. It-tieni komponent tal-BCAP jipprovdi ħlasijiet simili għall-ġbir, il-ħsad, il-ħażna u t-trasport ta’ sorsi ta’ bijomassa rinnovabbli eliġibbli jew ta’ materjali eliġibbli.

(120)

Il-faċilitajiet ta’ konverżjoni tal-bijomassa, inklużi l-produtturi tal-bijoetanol, ma jirċivux kumpens permezz tal-BCAP. Il-fornituri tagħhom, li jipproduċu għelejjel eliġibbli jew li huma s-sidien ta’ materjal eliġibbli, jirċievu ħlasijiet. L-awtoritajiet tal-Istati Uniti tal-Amerika sostnew li l-BCAP ma kkontribwixxiex għall-produzzjoni tal-ebda bijoetanol, inkluż bijoetanol ċellulożiku matul l-IP.

(121)

Rigward il-ħlasijiet mill-BCAP matul l-IP, ikkwalifikaw tliet faċilitajiet tal-bijoetanol għall-għan ta’ Riċerka u Żvilupp fil-qasam tat-trasport u l-ħażna. Matul l-IP, tħallsu total ta’ 1,7 miljun USD lil 83 sid ta’ materjal li kkonsenjaw qamħirrun lil faċilità approvata waħda. Ma saru l-ebda ħlasijiet lis-sidien l-oħra ta’ materjal għall-konsenja ta’ materjali liż-żewġ faċilitajiet l-oħra ta’ konverżjoni tal-bijomassa li kkwalifikaw.

(122)

Qabel l-IP kien hemm 458 faċilità ta’ konverżjoni tal-bijomassa li kienu kwalifikati sabiex jirċievu l-konsenja ta’ materjali eliġibbli. Tnejn biss minn dawn il-faċilitajiet kwalifikati kienu produtturi tal-bijoetanol.

(123)

Kien hemm disa’ oqsma stabbiliti fl-IP. Matul dan iż-żmien, l-għelejjel kienu qed jiġu ffirmati jew kienu fil-proċess li jissieħbu fil-BCAP Għalhekk, ma sar l-ebda ġbir jew ħsad f’dak il-perjodu.

(124)

Kif spjegat hawn fuq, fornituri li jipproduċu għelejjel eliġibbli jew li huma s-sidien ta’ materjal eliġibbli, jirċievu ħlasijiet skont din l-iskema. Ma kienx hemm evidenza li turi li għaddew benefiċċji għal għand il-produtturi tal-bijoetanol u li l-ammonti mħallsa għaldaqstant mhumiex kompensatorji.

(125)

Il-Programm tal-USDA dwar l-Enerġija Rurali għall-Amerika (“REAP”) jipprovdi garanziji fuq is-self u għotjiet lil negozji żgħar rurali u produtturi agrikoli biex jixtru sistemi ta’ enerġija rinnovabbli u sabiex jagħmlu titjib fl-effiċjenza enerġetika. Huwa jipprovdi wkoll għotjiet sabiex jitwettqu studji tal-fattibilità għal sistemi ta’ enerġija rinnovabbli, sabiex jitwettqu verifiki tal-enerġija, kif ukoll assistenza għall-iżvilupp tal-enerġija rinnovabbli lil produtturi agrikoli u negozji żgħar rurali. Skont l-awtoritajiet tal-Istati Uniti tal-Amerika, l-REAP jappoġġa firxa wiesgħa ta’ produtturi agrikoli u negozji żgħar fl-isforzi tagħhom sabiex inaqqsu l-konsum tal-enerġija; huwa ma jappoġġax il-produzzjoni ta’ xi komodità speċifika u mhuwiex speċifiku għal intrapriża jew grupp tagħha.

(126)

L-REAP għandu tliet komponenti:

(127)

Permezz ta’ dawn it-tliet komponenti, l-REAP huwa disponibbli għat-tipi ta’ proġetti li ġejjin: Sistemi ta’ Enerġija Rinnovabbli, Titjib fl-Effiċjenza Enerġetika, Verifiki tal-Enerġija, Għajnuna għall-Iżvilupp tal-Enerġija Rinnovabbli u Studji tal-Fattibilità.

(128)

It-Titolu IX, it-Taqsima 9006 tal-Farm Security and Rural Investment Act tal-2002 (il-Farm Bill tal-2002) kif ukoll it-Titolu IX, it-Taqsima 9007 tal-Farm Bill tal-2002 kif emendat mit-Titolu IX, it-Taqsima 9001 tal-Food, Conservation, and Energy Act tal-2008 (il-Farm Bill tal-2008) huwa l-bażi legali għall-USDA Rural Energy for America Program.

(129)

Il-kriterji ta’ eliġibbiltà jvarjaw skont it-tip ta’ proġett, kif imsemmi fil-premessa 127, u, fir-rigward ta’ proġetti għal Sistemi ta’ Sistemi ta’ Enerġija Rinnovabbli u Titjib fl-Effiċjenza Enerġetika, dawn ivarjaw skont jekk hijiex qed tintalab għotja jew self.

(130)

L-investigazzjoni wriet li minn mindu daħal fis-seħħ il-Farm Bill tal-2008, l-REAP ta għotjiet lil aktar minn 5 960 proġett, tul il-perjodu mill-1 ta' Ottubru 2008 sat-30 ta' Settembru 2011 (il-perjodu tal-investigazzjoni). Skont l-awtoritajiet tal-Istati Uniti tal-Amerika, il-maġġoranza ta’ dawn l-għotjiet kienu għal proġetti li ma kinux relatati mal-ebda tip ta’ bijofjuwil. Dawn il-proġetti kienu jinkludu, iżda ma kinux limitat għal enerġija solari, mir-riħ u l-effiċjenza enerġetika.

(131)

Matul l-IP, żewġ produtturi biss tal-bijoetanol irċevew benefiċċji skont il-programmi REAP, kull wieħed għal għotja għal studju dwar il-fattibilità. Qabel l-IP, kumpanija waħda rċeviet għotja għas-Sistemi ta’ Enerġija Rinnovabbli għal proġett li kien jinvolvi l-produzzjoni tal-bijoetanol miz-zokkor u skart ibbażat fuq l-alkoħol.

(132)

Din l-iskema hija kkunsidrata bħala sussidju fis-sens tal-Artikolu 3(1)(a)(i) tar-Regolament bażiku billi l-iskema tipprovdi kontribuzzjoni finanzjarja mill-Gvern tal-Istati Uniti tal-Amerika fil-forma ta’ għotja. Is-sussidju jagħti benefiċċju lill-kumpaniji li jirċevuh.

(133)

Madankollu, għandu jiġi nnutat ukoll li l-ebda waħda minn dawn l-għotjiet ma dehret li kienet speċifika għall-produzzjoni ta’ xi komodità fosthom il-bijoetanol li jfisser li ma jistgħux jitqiesu bħala kumpensatorji skont l-Artikolu 4 tar-Regolament bażiku.

(134)

Il-leġiżlazzjoni rilevanti tawtorizza l-finanzjament ta’ “Proġetti ta’ Turija ta’ Bijoraffineriji Integrati” sabiex jintwerew: l-applikazzjoni kummerċjali ta’ bijoraffineriji integrati b’konċentrazzjoni fuq għalf linjoċellulożiku; l-applikazzjoni kummerċjali ta’ teknoloġiji tal-bijomassa għal varjetà ta’ użi, fosthom fjuwils likwidi għat-trasport, kimiki bijoloġiċi ta’ valur għoli, sostituti għal għalf u prodotti bbażati fuq iż-żejt, u enerġija fil-forma ta’ elettriku jew sħana siewja; u l-ġbir u t-trattament ta’ varjetà ta’ għalf tal-bijomassa.

(135)

L-Energy Policy Act tal-2005, it-Taqsimiet 931-932, huwa l-bażi legali għall-Għotjiet tad-Dipartiment tal-Enerġija għal Proġetti tal-Bijoraffineriji.

(136)

L-eliġibbiltà hija speċifika għat-tħabbira ta’ opportunità ta’ finanzjament (FOA) għal kull proġett ippubblikat mill-awtoritajiet rilevanti tad-Dipartiment tal-Enerġija. Rigward l-FOAs rilevanti għall-bijoetanol, il-benefiċjarji jridu jużaw bijomassa ċellulożika u jipproduċu bijofjuwil; il-bijomassa u l-bijofjuwil(s) partikolari eliġibbli huma delineati f’kull FOA.

(137)

L-iskema hija amministrata permezz ta’ sensiela ta’ sejħiet kompetittivi kull sena jew FOAs li jqassmu fondi approprjati. Is-sejħiet kompetittivi huma miftuħin għal applikanti eliġibbli mill-industrija, l-akkademja u l-laboratorji nazzjonali. L-applikanti eliġibbli jissottomettu proposti li jiġu evalwati mal-kriterji stabbiliti fl-FOA. Ladarba tkun ingħatat għotja, l-awtoritajiet rilevanti tad-Dipartiment tal-Enerġija jimmonitorjaw il-prestazzjoni tal-benefiċjarju kontra l-kamp ta’ applikazzjoni, l-iskeda u l-ispiża tul il-perjodu kollu tal-għotja. Il-ħlas għall-ispejjeż imġarrba mill-benefiċjarju fit-twettiq tal-proġett isiru fuq bażi ta’ rimborż.

(138)

L-ebda ftehim ta’ għajnuna finanzjarja taħt dan il-programm ma jappoġġa l-iżvilupp ta’ teknoloġiji ta’ proċess tal-bijoetanol mill-qamħirrun. L-għajnuna hija ffukata biss fuq bijokarburanti ċellulożiċi avvanzati.

(139)

Il-benefiċjarji jridu jużaw bijomassa ċellulożika u jipproduċu bijokarburant; il-bijomassa u l-bijofjuwil(s) partikolari eliġibbli huma delineati f’kull FOA.

(140)

Matul l-IP kien hemm ħames proġetti fuq skala kbira tal-bijoetanol iffinanzjati taħt din l-iskema. Waħda mill-kumpaniji fil-kampjun irċeviet benefiċċji minn din l-iskema matul l-IP.

(141)

Din l-iskema hija kkunsidrata bħala sussidju fis-sens tal-Artikolu 3(1)(a)(i) tar-Regolament bażiku billi l-iskema tipprovdi kontribuzzjoni finanzjarja mill-Gvern tal-Istati Uniti tal-Amerika fil-forma ta’ għotjiet. Is-sussidju jagħti benefiċċju lill-kumpaniji li jirċevuh.

(142)

Madankollu, l-investigazzjoni stabbilixxiet li matul l-IP ma kien hemm l-ebda bijoetanol ċellulożiku kummerċjali mibjugħ fis-suq. Minħabba ċ-ċirkustanzi partikolari tal-każ preżenti, jiġifieri l-fatt li l-iskema tiffoka pereżempju fuq bijofjuwils ċellulożiċi, u n-nuqqas ta’ produzzjoni ta’ bijoetanol ċellulożiku kummerċjali, huwa meqjus li matul l-IP, din l-iskema ma tat l-ebda benefiċċju lill-produtturi kummerċjali tal-bijoetanol fl-Istati Uniti u għalhekk ma kellha l-ebda impatt fuq l-esportazzjonijiet tal-bijoetanol lejn l-UE matul l-IP.

(143)

Huwa nnotat ukoll li meta mqabbel mal-fatturat tal-prodott ikkonċernat mill-kumpaniji fil-kampjun, l-ammont ta’ sussidji pprovduti taħt din l-iskema kien wieħed insinifikanti.

(144)

Ġie stabbilit li matul l-IP, il-Gvern tal-Istati Uniti pprovda kreditu ta’ 0,45 USD għal kull gallun ta’ etanol użat fil-produzzjoni tat-taħlita ta’ fjuwil u alkoħol. Dan ifisser li dawk li kienu jħalltu l-bijoetanol ibbenefikaw minn rata mnaqqsa ta’ taxxa fil-mument tal-bejgħ jew irċevew ħlas dirett, li kkumpensa għall-obbligazzjoni normali tagħhom għal parti mid-dazju tas-sisa fuq il-gażolina. Il-kreditu ta’ taxxa fuq it-taħlita tal-fjuwils intuża biss b’mod limitat biex jikkumpensa għall-obbligu tat-taxxa fuq id-dħul. Dan huwa kontribut finanzjarju, fil-forma ta’ dħul tal-Gvern li ma jkunx inġabar, li jagħti benefiċċju lir-riċevituri fil-forma ta’ tnaqqis fl-obbligazzjoni fiskali. L-iskema hija limitata għal kumpaniji involuti fl-industrija tal-bijoetanol, jiġifieri t-taħlit tal-bijoetanol, u għalhekk hija ta’ natura kumpensatorja.

(145)

L-investigazzjoni stabbilixxiet, madankollu, li l-iskema prinċipali ta’ sussidju, il-kreditu ta’ taxxa fuq it-taħlita tal-bijoetanol, skadiet fl-aħħar tal-2011 u ma reġgħetx ġiet introdotta.

(146)

Wara l-iżvelar tal-fatti essenzjali u l-kunsiderazzjonijiet li abbażi tagħhom il-Kummissjoni ddeċidiet li tkompli l-investigazzjoni mingħajr l-impożizzjoni ta' miżuri provviżorji, parti waħda stqarret li bosta formoli tat-taxxa jippermettu li r-riċevituri jitolbu dan is-sussidju wara l-31 ta’ Diċembru 2011.

(147)

Bi tweġiba għal din l-istqarrija, huwa nnutat li l-investigazzjoni turi li l-kreditu ta’ taxxa tat-taħlita tal-bijoetanol kienet mitluba b'mod predominanti bħala kreditu ta’ taxxa tas-sisa minn min iħallat fil-ħin tat-taħlita tal-bijoetanol mal-gażolina sabiex inaqqas l-obbligu tat-taxxa tas-sisa tar-rikorrent. Il-kreditu ta’ taxxa fuq it-taħlita tal-bijoetanol intuża biss b’mod limitat biex jikkumpensa għall-obbligu tat-taxxa fuq id-dħul tar-rikorrent. Bla dubju hemm ċerta firxa ta’ żmien bejn iż-żmien tat-taħlit u ż-żmien meta l-kreditu jitħallas lir-rikorrent. L-ammont ta’ krediti tat-taxxa tat-taħlita provduti matul l-IP huma relatati wkoll mat-taħlit li jseħħ qabel l-IP. Konsegwentament, sakemm l-iskema ma tiddaħħalx retroattivament, fil-ħin tad-deċiżjoni dwar jekk għandhomx jiġu imposti miżuri fl-2012, kwalunkwe talba għall-kreditu ta' taxxa għat-taħlita tkun insinifikanti. Għaldaqstant ma hemmx elementi li jgħidu li s-sussidju kompla.

(148)

L-istess parti argumentat li huwa ċar mid-dispożizzjonijiet tal-Artikolu 15(1), ir-raba’ subparagrafu, li sussidju ma għandux jitqies bħala “irtirat” sakemm il-parti li qed tiddefendi ma tkunx ġabet evidenza konvinċenti li ma jistgħu jsiru ebda ħlasijiet, skont kwalunkwe skema ta’ sussidju li jibbenefikaw minnha l-produtturi/esportaturi kkonċernati. Għandu jiġu nnutat, madankollu, li l-kreditu tat-taxxa għat-taħlita tal-bijoetanol kien l-uniku skema ta’ sussidju li pprovda sussidji potenzjalment kompensatorji matul l-IP u din l-iskema skadiet. L-iskemi l-oħra investigati li pprovdew benefiċċji direttament lill-industrija tal-bijoetanol kienu inisinifikanti. Dan l-argument huwa għalhekk miċħud.

(149)

Il-parti lmentat ukoll li l-kreditu tat-taxxa fuq id-dħul għall-produtturi ta’ bijoetanol ċellulożiku, li huwa deskritt fil-premessi minn (79) sa (85), huwa skema mfassla biex tissostitwixxi l-iskema tal-kreditu tat-taxxa bħala mezz ta’ sussidjar tal-prodott ikkonċernat. Bi tweġiba għal din l-istqarrija, huwa nnutat li għalkemm l-ewwel ġenerazzjoni tal-bijoetanol kważi spiċċat, l-iskemi għall-bijofjuwils tat-tieni ġenerazzjoni żdiedu. Madankollu, il-produzzjoni tal-bijofjuwils tat-tieni ġenerazzjoni mhijiex sinifikanti u għaldaqstant is-sussidji mogħtija f’dan l-istadju huma limitati ħafna. Għandu jiġi ċċarat li l-kreditu tat-taxxa fuq id-dħul għall-produtturi ta’ bijoetanol ċellulożiku mhuwiex skema ta’ sostituzzjoni għall-iskema ta’ kreditu ta’ taxxa għat-taħlita għas-sempliċi raġuni li dan diġà jeżisti. Barra minn hekk, il-kreditu tat-taxxa fuq id-dħul għall-produtturi ta’ bijoetanol ċellulożiku huwa, kif jissuġġerixxi l-isem tal-iskema, inċentiv għal produtturi ta' bijoetanol ċellulożiku. Il-kreditu tat-taxxa għat-taħlita jipprovdu inċentiv lil min iħallat. L-investigazzjoni wriet li fil-maġġoranza tal-każijiet, il-persuna li titlob il-kreditu tat-taxxa għat-taħlita kienet dik li tħallat/operatur tas-suq b’obbligazzjoni tat-taxxa tas-sisa bħal kumpanija petrokimika. Fi kliem ieħor, ma kinux il-produtturi tal-bijoetanol li lmentaw dwar il-maġġoranza tal-kreditu tat-taxxa għat-taħlita matul l-IP. Għaldaqstant ma jistax jiġi argumentat li l-kreditu tat-taxxa fuq id-dħul għall-produtturi tal-bijoetanol ċellulożiku jissostitwixxu l-kreditu tat-taxxa għat-taħlit. Konsegwentement, din it-talba hija rifjutata.

(150)

Finalment, il-parti lmentat li l-benefiċċji jistgħu xorta jingħataw wara li tintemm l-iskema tal-kreditu tat-taxxa għat-taħlita minħabba l-użu kontinwu ta' assi fissi mħallsa mis-sussidju. Kien argumentat li f’każ ta’ sussidji rikorrenti marbuta max-xiri ta' assi fissi, il-benefiċċji dovuti mis-snin ta’ qabel fil-perjodu ta’ deprezzament għanhom jiġu kkunsidrati meta jiġi kkalkulat il-benefiċċju. L-ewwel nett, huwa nnutat li s-sussidju mhuwiex marbut max-xiri ta’ assi fissi. Il-kreditu tat-taxxa għat-taħlita huwa sussidju rikorrenti fis-sens li huwa perjodiku u l-benefiċċji huma meqjusa li huma dovuti fis-sena li jingħataw. Barra minn hekk, kif imsemmi hawn fuq, matul l-IP, ir-rikorrenti kienu sa ċertu punt biss produtturi tal-bijoetanol. Għalhekk, it-talba hija rrifjutata.

(151)

Statistika pprovduta mill-awtoritajiet tal-Istati Uniti wriet li l-użu globali tal-kreditu ta’ taxxa fuq id-dħul tal-produtturi ż-żgħar kien żgħir ħafna b’kuntrast mat-talbiet magħmula għall-kreditu ta’ taxxa fuq it-taħlita. Paragun tal-ammont totali ddikjarat taħt din l-inċentiva fir-rigward tal-produzzjoni totali ta’ bijoetanol wera sussidju globali insinifikanti matul l-IP.

(152)

Ma kien hemm ebda talbiet għall-kreditu ta’ taxxa fuq id-dħul mill-produtturi tal-bijoetanol ċellulożiku matul l-IP li jikkoinċidi man-nuqqas ta’ produzzjoni kummerċjali tal-bijoetanol ċellulożiku sal-aħħar tal-IP.

(153)

L-investigazzjoni stabbilixxiet li l-Programm ta’ Bijoenerġija tad-Dipartiment tal-Agrikoltura tal-Istati Uniti (US Department of Agriculture's Bioenergy Program) skada fl-2006 u ma reġgħax ġie introdott. Fir-rigward tal-USDA Bioenergy for Advanced Biofuels, il-USDA Biorefinery Assistance Program, il-USDA Biomass Crop Assistance Program, il-USDA Rural Energy for America Program u l-Biorefinery Project Grants tad-Dipartiment tal-Enerġija, l-investigazzjoni wriet li safejn dawn is-sitt skemi pprovdew benefiċċji għall-produzzjoni tal-bijoetanol matul l-IP, l-ammont ta’ sussidji kien insinifikanti.

(154)

L-investigazzjoni wriet li tliet skemi Statali, jiġifieri l-E85 Infrastructure Grants immexxija mill-Istat ta’ Illinois, il-Biofuels Infrastructure grants immexxija mill-Istat ta’ Iowa u l-E85 Fuelling Infrastructure Grants immexxija mill-Istat ta’ Minnesota mhumiex applikabbli għall-produtturi tal-bijoetanol. Dawn l-iskemi jipprovdu appoġġ lill-istabbilimenti li jbiegħu l-fjuwil għall-installazzjoni ta’ pompi tal-fjuwil li kapaċi jwasslu fjuwil b’kontenut għoli ta’ etanol u huma limitati għall-bejjiegħa tal-bijoetanol. Konsegwentement, il-produtturi tal-bijoetanol ma jirċievu l-ebda benefiċċji minn dawn l-iskemi. F’dan ir-rigward, ġie nnutat li l-ebda waħda mill-kumpaniji fil-kampjun ma rċeviet benefiċċji diretti jew indiretti minn dawn l-iskemi.

(155)

Barra minn hekk, l-awtoritajiet tal-Istati Uniti ċċaraw li l-Istat ta’ Minnesota ma għandux skema ta’ Kreditu ta’ Taxxa għal Investimenti ta’ Etanol Ċellulożiku kif ġie ddikjarat mill-ilmentatur. Ġie ċċarat li kmieni fl-2010 l-Istat ta’ Minnesota adotta liġi msejħa l-‘Kreditu ta’ Taxxa fuq l-Investiment għan-Negozji ż-Żgħar’ magħruf bħala l-‘Kreditu ta’ Taxxa fuq Investitur Privat’. Kuntrarjament għal dak li ġie allegat fl-ilment, il-Kreditu ta’ Taxxa fuq Investitur Privat ma jipprovdi l-ebda krediti ta’ taxxa għan-negozji, iżda għall-investituri li jinvestu f’negozji żgħar.

(156)

Skont l-awtoritajiet tal-Istati Uniti tal-Amerika, din l-iskema ma kinitx topera matul l-IP, ma rċevietx finanzjament minn Lulju 2007 u ilha inoperattiva mill-2008 meta l-fondi ġew eżawriti. Waqt li kienet topera, l-iskema awtorizzat għotjiet għall-bini ta’ faċilitajiet ġodda għall-produzzjoni ta’ fjuwil rinnovabbli jew għall-espansjoni ta’ faċilitajiet eżistenti.

(157)

Fl-2008 ingħataw żewġ għotjiet meta l-iskema kienet għadha topera, u żewġ kumpaniji barra mill-kampjun li kienu jinstabu f’Illinois irċevew għotja kull wieħed. Madankollu, din l-iskema ma għadhiex topera u l-ebda waħda mill-kumpaniji fil-kampjun ma ggwadanjat minn benefiċċji taħt din l-iskema matul l-IP.

(158)

Il-Programm ta’ Iowa ta’ Self li jista’ jerġa’ jintuża għall-Enerġija Alternattiva (AERLP) huwa awtorizzat mill-Artikolu 476.46 tal-Kodiċi tal-Iowa 1997 kif emendat. Dan il-kodiċi jgħid li ċ-Ċentru tal-Enerġija tal-Iowa għandu jistabbilixxi u jamministra programm ta’ self risolventi għall-enerġija alternattiva u joħloq fond għal self li jiġġedded għall-enerġija alternattiva fl-uffiċċju tat-Teżorier tal-Istat li għandu jiġi amministrat miċ-Ċentru tal-Enerġija.

(159)

Flus fil-fond tal-AERLP jistgħu jintużaw biex jipprovdu self għall-bini ta’ faċilitajiet għall-produzzjoni ta’ enerġija alternattiva jew għal faċilitajiet idro żgħar kif definit fl-Artikolu 476.46 tal-Kodiċi tal-Iowa 1997, kif emendat.

(160)

Skont l-awtoritajiet tal-Istati Uniti, l-ebda faċilità li tipproduċi l-bijoetanol ma rċeviet self skont l-AERLP għas-snin 2008, 2009, 2010 u l-PI. L-ebda kumpanija ma rċeviet benefiċċji skont din l-iskema. Konsegwentement, ġie deċiż li din l-iskema ma tkomplix tiġi investigata fil-kuntest ta’ din il-proċedura.

(161)

Ir-rata tat-taxxa attwali fuq il-karburant fl-Istat tan-Nebraska hija ta’ 0,267 USD għal kull gallun għall-gażolina, l-gasoħol, id-diżil, il-bijoetanol u l-gassijiet kompressati kollha mibjugħa fl-Istat. L-iskema Ethanol Production Incentive fis-seħħ matul il-PI tipprovdi kreditu ta’ taxxa ta’ 0,18 USD għal kull gallun lill-faċilitajiet kwalifikati li jipproduċu l-etanol li kienu joperaw fi jew qabel it-30 ta' Ġunju 2004.

(162)

Id-data ta’ skadenza biex wieħed japplika biex jipparteċipa f’din l-iskema kienet is-16 ta' April 2004. Faċilità kwalifikata ta’ produzzjoni kellha tkun tinstab fl-Istat ta’ Nebraska u kellha tkun jew (i) mhux fi produzzjoni fi jew qabel l-1 ta’ Settembru 2001 jew (ii) ma tkun irċeviet l-ebda krediti qabel l-1 ta' Ġunju 1999. Il-fermentazzjoni, id-distillazzjoni u d-deidratazzjoni kollha kellhom iseħħu fil-faċilità kwalifikata.

(163)

Din l-iskema ma kienet ta’ benefiċċju għall-ebda waħda mill-kumpaniji inklużi fil-kampjun. Fi kwalunkwe każ, jidher li meta mqabbel mal-produzzjoni totali tal-bijoetanol fl-Istati Uniti tal-Amerika l-ammont tas-sussidju kien negliġibbli.

(164)

L-Istat ta’ South Dakota jamministra programm ta’ ħlas għall-produtturi tal-bijoetanol li jipprovdi għajnuna finanzjarja lill-impjanti eliġibbli tal-bijoetanol ta’ 0,20 USD għal kull gallun ta’ bijoetanol prodott sa possibilità ta’ miljun USD fis-sena għal kull faċilità.

(165)

L-alkoħol etiliku għandu jkun kompletament distillat u prodott fis-South Dakota, għandu jkun 99 % pur, għandu jkun distillat minn qmuħ taċ-ċereali u għandu jkun denaturat. Il-ħlas għall-produzzjoni tal-etanol huwa disponibbli biss għall-alkoħol etiliku kkwalifikat prodott minn impjanti li bdew il-produzzjoni fil-31 ta' Diċembru 2006 jew qabel.

(166)

Kull faċilità eliġibbli tista’ tirċievi sa massimu ta’ 83 333 USD kull xahar ta’ ħlasijiet bħala inċentiv għall-produzzjoni. Jekk ma jkunx hemm fondi biżżejjed biex jitħallas il-ħlas ta’ 83 333 USD fix-xahar lil kull faċilità li tipproduċi l-bijoetanol, kull faċilità tirċievi sehem pro rata tal-fondi disponibbli abbażi tal-galluni ta’ alkoħol etiliku prodotti dak ix-xahar b’mod proporzjonat għall-galluni kollha ta’ alkoħol etiliku kwalifikat prodotti fil-faċilitajiet kwalifikati kollha. Kull faċilità eliġibbli tista’ tirċievi massimu ta’ miljun USD fis-sena u massimu ta’ 9 682 000 USD għas-snin kollha ta’ parteċipazzjoni fl-iskema fi ħlasijiet għall-produzzjoni. Bħala tali s-sussidji huma rikorrenti u għandhom jitniżżlu f’kull sena partikolari.

(167)

L-investigazzjoni wriet li tnejn mill-kumpaniji fil-kampjun irċevew benefiċċji skont din l-iskema matul l-IP. Għaż-żewġ kumpaniji, l-ammont tas-sussidju ġie kkalkulat abbażi tal-ammont ta’ ħlasijiet riċevuti matul l-IP. L-ammont ta’ sussiju kien imbagħad allokat fuq il-bejgħ totali tal-bijoetanol li sar mill-kumpaniji kkonċernati matul l-IP bħala d-denominatur xieraq.

(168)

Dan il-kalkolu wera li l-ammont tas-sussidju għaż-żewġ kumpaniji kien insinifikanti.

(169)

L-investigazzjoni wriet li tnejn mill-iskemi Statali tal-Istati Uniti identifikati mill-ilmentatur, jiġifieri n-Nebraska Ethanol Production Tax Credit u s-South Dakota Ethanol Production Incentive, pprovdew sussidji għall-produzzjoni tal-bijoetanol li huma kontribuzzjonijiet finanzjarji li jagħtu benefiċċju lill-produtturi f’dawk l-Istati. Għalkemm l-iskemi jidhru li huma speċifiċi fl-Istati kkonċernat, l-ammont ta’ sussidji huwa insinifikanti meta mqabbel mal-produzzjoni totali tal-bijoetanol fl-Istati Uniti tal-Amerika. Rigward is-sussidji riċevuti mill-kumpaniji fil-kampjun, ġie konkluż ukoll li l-ammont ta’ sussidjar kien insinifikanti.

(170)

L-investigazzjoni wriet li l-iskemi kollha investigati ħlief dik imsemmija fil-premessa (171) hawn taħt, kienu negliġibbli u mhux kumpensatorji matul l-IP.

(171)

Kid imsemmi fil-premessi (53) sa (71) hawn fuq, l-investigazzjoni wriet li l-Gvern tal-Istati Uniti jipprovdi kreditu ta’ taxxa fuq it-taħlita ta’ 0,45 USD għal kull gallun ta’ bijoetanol użat fil-produzzjoni ta’ taħlita ta’ fjuwil u alkoħol li jibbenefikaw minnu dawk li jħalltu l-etanol.

(172)

Hekk is-sussidju ngħata fuq bażi ta’ kull unità, jiġifieri b’referenza għall-kwantitajiet ta’ bijoetanol użati. Il-benefiċċju huwa wkoll marbut mal-prodott importat fl-Unjoni.

(173)

L-ammont ta’ sussidji kumpensatorji b’konformità mad-dispożizzjonijiet tar-Regolament bażiku huwa ta’ 0,45 USD għal kull gallun.

(174)

Ġie nnotat li l-ammont ta’ sussidjar jiddependi fuq il-proporzjon, il-piż, ta’ bijoetanol fit-taħlita.

(175)

Ġie meqjus li l-ammont tas-sussidju huwa ta’ 0,45 USD għal kull gallun fuq bażi tal-pajjiż kollu peress li l-bijoetanol kollu prodott fl-Istati Uniti, inkluż l-esportazzjonijiet lejn l-Unjoni, fl-aħħar mill-aħħar ibbenefika mill-kreditu ta’ taxxa fuq it-taħlita tal-bijoetanol. Għalhekk ma hemmx il-ħtieġa li ssir distinzjoni bejn l-operaturi ekonomiċi, partikolarment peress li huwa rari li s-sussidju jingħata lill-produtturi tal-bijoetanol imma b’mod predominanti lill-operaturi tas-suq/operaturi li qed iħalltu l-bijoetanol.

(176)

Wara l-iżvelar tal-fatti essenzjali u kunsiderazzjonijiet li abbażi tagħhom il-Kummissjoni ddeċidiet li tkompli l-investigazzjoni mingħajr l-impożizzjoni ta’ miżuri provviżorji, bosta partijiet argumentaw li fi kwalunkwe każ, il-produtturi fil-kampjun għandhom jiġu assenjati marġini individwali ta’ sussidju, u fil-każ li ma jkunux irċevew il-kreditu ta’ taxxa fuq it-taħlita tal-bijoetanol għandhom jiġu assenjati marġini ta’ sussidju ta’ żero.

(177)

Skont l-Artikolu 15 tar-Regolament bażiku, kwalunkwe regolament li jimponi d-dazju għandu jew jispeċifika d-dazju għall-fornituri individwali jew għall-pajjiż fornitur ikkonċernat. F’dan il-każ, instab li l-istruttura tal-industrija tal-bijoetanol u l-mod ta’ kif is-sussidji ngħataw, b’mod partikolari l-Kreditu ta’ Taxxa fuq it-Taħlita tal-Bijoetanol, kull marġini ta’ sussidju individwali mhuwiex se jkun rappreżentattiv u mhux se jirrifletti s-sitwazzjoni attwali fis-suq tal-bijoetanol, b’mod partikolari għall-esportazzjoni.

(178)

Huwa ċar mill-Ftehim tad-WTO dwar is-Sussidji u l-Miżuri ta’ Kontrobilanċ u l-Artikolu VI:3 tal-GATT li l-għan ta’ kull miżura huwa li tikkumpensa l-effett tal-importazzjonijiet sussidjati.

(179)

F'dan il-każ l-evidenza misjuba fl-investigazzjoni wriet li l-esportazzjonijiet kollha tal-Istati Uniti tal-bijoetanol kienu sussidjati b'ammont massimu ta' 0,45 USD kull gallun matul l-IP. Huwa nnutat li f'punt minnhom waqt l-investigazzjoni sar ċar li kwalunkwe kampjun ma kienx rappreżentattiv minħabba, partikolarment in-natura tas-sussidju f'dan il-każ. Barra minn hekk, il-produtturi inklużi fil-kampjun ma esportawx il-prodott ikkonċernat lejn l-Unjoni.

(180)

Tabilħaqq, kienet l-attività ta' taħlir li saktta l-kreditu irrispettivament minn jekk il-persuna li tħallat hijiex produttur jew esportatur. Fil-każ preżenti kien stabbilit li kienu b'mod predominanti l-esportaturi li talbu l-Kreditu ta’ Taxxa fuq it-Taħlita tal-Bijoetanol.

(181)

Ġie argumentat ukoll li, minflok ma jiġu assenjati marġini individwali ta’ sussidji lill-kumpaniji fil-kampjun, il-Kummissjoni għandha tipprovdi analiżi tal-azzjoni dwar kif il-kreditu ta’ taxxa fuq it-taħlita tal-bijoetanol jista’ awtomatikament jiġi attribwit u jkun ta’ benefiċċju għall-produtturi. It-talba għal analiżi tal-azzjoni tidher infondata. Is-sussidju jitħallas darba biss u l-prodott ma jinbidilx. Huwa l-prodott esportat lejn l-UE, il-bijoetanol, li huwa sussidjat. Għalhekk, ma hemm l-ebda ħtieġa għal analiżi bħal din.

(182)

Il-partijiet enfasizzaw il-fatt li l-iskema prinċipali ta’ sussidju, il-kreditu ta’ taxxa fuq it-taħlita tal-fjuwils, li tat sussidji kumpensatorji lir-riċevituri fl-Istati Uniti fl-IP, skadiet fl-aħħar tal-2011 u ma reġgħetx ġiet introdotta. Huma nnotaw li l-Artikolu 15 tar-Regolament bażiku jipprovdi li l-ebda miżuri ma għandhom jiġu imposti jekk is-sussidju jew is-sussidji jiġu rtirati jew meta s-sussidji ma jkunux għadhom jagħtu xi benefiċċju lill-esportaturi kkonċernati.

(183)

Fid-dawl tal-waqfien attwali tal-iskema prinċipali ta’ sussidju identifikata fl-IP u l-fatt li ma hemm l-ebda sinjali li se terġa’ tiġi introdotta, dawn il-partijiet qiesu li l-impożizzjoni ta’ miżuri kumpensatorji definittivi mhumiex sejrin ikunu meħtieġa. Huma argumentaw ukoll li kwalunkwe impożizzjoni ta’ miżuri definittivi xorta tmur lil hinn minn dak li huwa neċessarju sabiex jingħelbu l-effetti tas-sussidjar fiż-żmien li dawn il-miżuri jiġu imposti.

(184)

L-investigazzjoni wriet li l-kreditu tat-taxxa fuq it-taħlita li ngħata matul l-IP kien irtirat fl-aħħar tal-2011. Minħabba li dan l-avveniment seħħ wara l-IP, għal diversi drabi l-Kummissjoni għalhekk ikkuntattjat lill-awtoritajiet tal-Istati Uniti biex tirċievi aktar informazzjoni dwar it-terminazzjoni definittiva tal-iskema prinċipali ta’ sussidju.

(185)

L-informazzjoni miġbura matul l-investigazzjoni fl-uffiċċji tal-awtoritajiet tal-Istati Uniti u l-kjarifiki oħra li pprovdew urew li ċerti ammonti tħallsu lill-benefiċjarji tal-Istati Uniti eżatt wara l-IP, jiġifieri fis-sena fiskali tal-Istati Uniti tal-2012, li bdiet mill-1 ta' Ottubru 2011 sat-30 ta' Settembru 2012. Filwaqt li dawn l-ammonti xorta jwasslu għat-tkomplija tas-sussidju aktar mil-limitu de minimis fl-ewwel trimestri tas-sena fiskali 2012, l-ammonti li tħallsu wara dak il-perjodu, u b’mod partikolari fl-aħħar tal-2012, se jkunu negliġibbli fid-dawl tal-waqfien tal-iskema prinċipali ta’ sussidju f’Diċembru 2011. Sa issa, ma hemm l-ebda sinjali li l-kreditu ta’ taxxa fuq it-taħlita tal-fjuwils se jerġa’ jiġi introdott u kwalunkwe introduzzjoni mill-ġdid ta’ dik l-iskema normalment tkun tirrikjedi att tal-Kungress tal-Istati Uniti.

(186)

Għal diversi drabi l-ilmentatur talab ir-reġistrazzjoni tal-importazzjonijiet tal-bijoetanol li joriġina mill-Istati Uniti bil-għan ta’ ġbir retroattiv tad-dazji. It-talba kien fiha biżżejjed evidenza biex tiġġustifika r-reġistrazzjoni skont l-Artikolu 24(5) tar-Regolament bażiku.

(187)

Il-Kummissjoni kkunsidrat li, anki jekk kienet ikkonkludiet b’mod proviżorju li l-iskema prinċipali ta’ sussidju fis-seħħ matul l-IP kienet waqfet, fis-sens li ma kinitx għadha tagħti benefiċċju fil-ħin li l-miżuri proviżorji kienu jkunu imposti, kien hemm evidenza li l-Istati Uniti jistgħu jerġgħu jdaħħlu din l-iskema ta’ sussidju. Għalhekk, sabiex jiġu ppreżervati d-drittijiet tal-Unjoni Ewropea taħt dawn iċ-ċirkostanzi speċjali, il-Kummissjoni ddeċidiet li importazzjonijiet tal-prodott ikkonċernat jiġu soġġetti għal reġistrazzjoni skont l-Artikolu 24(5) tar-Regolament bażiku sabiex, eventwalment, jistgħu jiġu imposti miżuri retroattivi kontra dawk l-importazzjonijiet mid-data ta’ din ir-reġistrazzjoni. Ir-Regolament tal-Kummissjoni (UE) Nru 771/2012 ġie ppubblikat fl-24 ta’ Awissu 2012 għal dan il-għan (9).

(188)

L-investigazzjoni stabbilixxiet li minbarra l-iskema ewlenija ta’ sussidju, il-kreditu ta’ taxxa fuq it-taħlita deskritt fil-premessi minn (53) sa (71) hawn fuq, l-ammont ta’ sussidju riċevut għall-iskemi kollha ta’ sussidju kien insinifikanti u mhux kumpensatorju matul l-IP.

(189)

Kif imsemmi hawn fuq fil-premessi minn (182) sa (185), l-investigazzjoni stabbilixxiet li l-iskema prinċipali ta’ sussidji, il-kreditu ta’ taxxa fuq it-taħlita, skadiet fl-aħħar tal-2011 u ma reġgħetx ġiet introdotta. L-informazzjoni disponibbli turi biċ-ċar il-waqfien tal-iskema prinċipali ta’ sussidji. Sa issa, ma hemm l-ebda sinjali li l-kreditu ta’ taxxa fuq it-taħlita se jerġa’ jiġi introdott u kwalunkwe introduzzjoni mill-ġdid ta’ dik l-iskema normalment tkun tirrikjedi att tal-Kungress tal-Istati Uniti.

(190)

L-Artikolu 15 tar-Regolament bażiku jipprovdi li ma għandha tiġi imposta l-ebda miżura jekk is-sussidju jew is-sussidji jiġu rtirati jew jekk ikun intwera li s-sussidji ma għadhomx jagħtu xi benefiċċju lill-esportaturi kkonċernati.

(191)

Huwa nnutat ukoll li skont l-Artikolu 14(3) tar-Regolament bażiku, għandu jkun hemm tmiem immedjat tal-proċediment fejn huwa determinat li l-ammont ta’ sussidji kumpensatorji huwa de minimis, jiġifieri inqas minn 2 % ad valorem.

(192)

Fid-dawl tal-irtirar tal-iskema ewlenija ta’ sussidju stabbilita fl-IP u l-fatt li l-ammont ta’ sussidju riċevut għall-iskemi l-oħra kollha ta' sussidju investigati kien inqas mil-livell limitu ta’ de minimis matul l-IP fit-tifsira tal-Artikolu 14(3) tar-Regolament bażiku, huwa meqjus li l-impożizzjoni ta’ miżuri definittivi mhijiex mogħtija.

(193)

Fid-dawl ta’ dak li ntqal hawn fuq, ġie kkunsidrat li l-investigazzjoni attwali kontra s-sussidji għandha tintemm.

(194)

B’mod konformi mal-waqfien ta’ din l-investigazzjoni, ir-reġistrazzjoni tal-importazzjonijiet għandha għalhekk tintemm.

(195)

Il-partijiet kollha ġew infurmati dwar il-fatti essenzjali u l-kunsiderazzjonijiet li abbażi tagħhom kien maħsub li tintemm il-proċedura. Huma ngħataw perjodu li fih setgħu jagħmlu sottomissjonijiet wara dan l-iżvelar.

(196)

Fid-dawl ta’ dak li ntqal hawn fuq, il-Kummissjoni għalhekk tikkonkludi li l-proċedura kontra s-sussidji li tikkonċerna importazzjonijiet tal-bijoetanol li joriġina mill-Istati Uniti tal-Amerika fl-Unjoni għandha tintemm mingħajr l-impożizzjoni ta’ miżuri kontra s-sussidji u li r-reġistrazzjoni tal-importazzjonijiet għandha wkoll tintemm,

(197)

Tqajmu oġġezzjonijiet għat-tmiem tal-proċediment ta’ kontra s-sussidju fil-Kumitat Konsultattiv. Konsegwentament, b’konformita mal-Artikolu 14 tar-Regolament (KE) 597/2009, il-proċediment għandu jitqies bħala mitmum, jekk fi żmien xahar, il-Kunsill, filwaqt li jaġixxi b’maġġoranza kwalifikata, ma jkunx iddeċieda mod ieħor. Din id-Deċiżjoni għandha tiġi pubblikata f’Il-Ġurnal Uffiċjali tal-Unjoni Ewropea,