(1)

Skont id-Direttiva 2008/106/KE, l-Istati Membri jistgħu jiddeċiedu li jaċċettaw iċ-ċertifikati xierqa tal-baħħara li jkunu nħarġu minn pajjiżi terzi, sakemm il-pajjiż terz ikkonċernat ikun rikonoxxut mill-Kummissjoni. Dawk il-pajjiżi terzi għandhom jissodisfaw ir-rekwiżiti kollha tal-Konvenzjoni tal-Organizzazzjoni Marittima Internazzjonali (IMO) dwar l-Istandards għat-Taħriġ, iċ-Ċertifikazzjoni u l-Għassa għall-Baħħara, 1978 (il-Konvenzjoni STCW) (2), kif ġiet riveduta fl-1995.

(2)

It-talbiet għar-rikonoxximent tal-Bangladexx tressqu permezz tal-ittri tas-26 ta’ Lulju 2007 minn Ċipru, tal-24 ta’ Diċembru 2007 mill-Italja u tal-25 ta' Ġunju 2008 mill-Belġju. Wara dawn it-talbiet, il-Kummissjoni vvalutat is-sistema tat-taħriġ u ċ-ċertifikazzjoni fil-Bangladexx sabiex tivverifika jekk il-Bangladexx jikkonformax mar-rekwiżiti kollha tal-Konvenzjoni STCW u jekk ittiħdux il-miżuri xierqa biex jiġi evitat il-frodi fil-ħruġ taċ-ċertifikati. Dik il-valutazzjoni kienet ibbażata fuq ir-riżultati ta' spezzjoni li għamlu l-esperti tal-Aġenzija Ewropea għas-Sigurtà Marittima fi Frar 2008. Matul dik l-ispezzjoni, ġew identifikati ċerti nuqqasijiet fis-sistemi tat-taħriġ u ċ-ċertifikazzjoni.

(3)

Il-Kummissjoni pprovdiet rapport dwar ir-riżultati tal-valutazzjoni lill-Istati Membri.

(4)

Permezz tal-ittri tas-26 ta' Marzu 2009, tad-9 ta' Diċembru 2009 u tat-28 ta' Settembru 2010, il-Kummissjoni talbet lill-Bangladexx jibagħtilha provi li juru li n-nuqqasijiet identifikati kienu tranġaw.

(5)

Permezz tal-ittri tad-29 ta’ Marzu 2009, tal-21 ta' Mejju 2009, tat-12 ta' Lulju 2009, tal-4 ta' Jannar 2010, tas-27 ta' Frar 2011 u tal-14 ta' Marzu 2011, il-Bangladexx ta t-tagħrif u l-provi mitluba dwar l-implimentazzjoni ta’ azzjoni korrettiva xierqa u suffiċjenti biex jiġu indirizzati ħafna min-nuqqasijiet identifikati matul il-valutazzjoni tal-konformità.

(6)

In-nuqqasijiet li fadal jikkonċernaw, fuq naħa waħda, in-nuqqas ta' ċertu tagħmir ta' taħriġ f'waħda mill-istituzzjonijiet tal-edukazzjoni u t-taħriġ marittimu tal-Bangladexx, u min-naħa l-oħra, it-taħriġ għal korsijiet preparatorji relatati mat-Taqsima A-II/1 tal-Kodiċi STCW. Għalhekk, il-Bangladexx ġie mistieden jimplimenta iktar azzjonijiet korrettivi b’rabta ma’ dan. Madankollu, dawn in-nuqqasijiet ma jwasslux biex iqajmu dubji dwar il-livell ġenerali tal-konformità tal-Bangladexx mar-rekwiżiti tal-Konvenzjoni STCW dwar it-taħriġ u ċ-ċertifikazzjoni tal-baħħara.

(7)

Ir-riżultat tal-valutazzjoni tal-konformità u l-evalwazzjoni tal-informazzjoni pprovdut mill-Bangladexx juri li l-Bangladexx jikkonforma mar-rekwiżiti rilevanti tal-Konvenzjoni STCW, filwaqt li dan il-pajjiż ħa miżuri xierqa biex jevita l-frodi fil-ħruġ taċ-ċertifikati.

(8)

Il-miżuri pprovduti f’din id-Deċiżjoni huma skont l-opinjoni tal-Kumitat dwar l-Ibħra Sikuri u l-Prevenzjoni ta’ Tniġġis minn Vapuri,