ANNESS

IR-REKWIŻITI TA’ SIGURTÀ SPEĊJALI GĦAT-TAGĦMIR FISS GĦAT-TAĦRIĠ

Parti I

Prodott u definizzjoni tal-prodott

It-tagħmir fiss ta’ taħriġ kopert minn dan il-Mandat jintuża għal finijiet ta’ taħriġ, eżerċizzju, dijanjosi jew riabilitazzjoni, li jinvolvi movimenti repetittivi. It-tagħmir jibqa’ statiku matul l-użu. Huwa jew joqgħod wieqaf mal-art, jew ikun imwaħħal mas-saqaf jew ma’ ħajt jew ma’ struttura fissa oħra.

Dan it-tagħmir ġeneralment jintuża f’fitness studios, lukandi, klabbs sportivi u tas-saħħa, ċentri ta’ riabilitazzjoni, jew id-dar. Iż-żona fejn jintuża t-tagħmir tikkostitwixxi “żona ta’ taħriġ” li l-aċċess għaliha jista’ jkun ristrett għall-utenti u għal persunal professjonali (eż. trejners, persunal mediku).

Tagħmir li jitħaddem bil-mutur huwa inkluż fl-ambitu ta’ dawn ir-rekwiżiti għar-riskji li mhumiex koperti mid-Direttiva dwar il-Makkinarju (id-Direttiva 2006/42/KE tal-Parlament Ewropew u tal-Kunsill (1))

Għal xi tagħmir ta’ taħriġ speċifiku, huma pprovduti rekwiżiti ta’ sigurtà addizzjonali biex jikkomplementaw ir-rekwiżiti ġenerali.

Jekk l-użu intenzjonat tat-tagħmir fiss ta’ taħriġ ikun kopert ukoll mid-Direttiva tal-Kunsill 93/42/KEE tal-14 ta’ Ġunju 1993 dwar mezzi mediċi (2), ir-rekwiżiti addizzjonali applikabbli għandhom ikunu ssodisfati.

Tagħmir fiss ta’ taħriġ kopert minn dan il-Mandat għandu jkun ikklassifikat skont preċiżjoni u klassijiet ta’ użu speċifiċi, skont l-iskop tat-tagħmir:

Klassijiet ta’ preċiżjoni

Klassi A: preċiżjoni għolja;

Klassi B: preċiżjoni medja;

Klassi C: preċiżjoni minima.

Klassijiet ta’ użu

Klassi S (Studio): użu kummerċjali u/jew professjonali;

Klassi H (Id-dar): użu domestiku;

Klassi I: użu professjonali u/jew kummerċjali, inkluż użu minn persuni bi bżonnijiet speċjali (eż. diżabilitajiet viżivi, ta’ smigħ, fiżiċi jew ta’ tagħlim)

Parti II

A.   Rekwiżiti ta’ sigurtà ġenerali

Il-prodotti għandhom jikkonformaw mar-rekwiżit ta’ sigurtà ġenerali msemmi fid-Direttiva 2001/95/KE u għandhom ikunu “sikuri” fl-ambitu tat-tifsira tal-Artikolu 2(b) tagħha. B’mod partikolari, il-prodott għandu jkun sikur f’kundizzjonijiet normali u prevedibbli ta’ użu (inkluż eż. ħżin, trasport għall-post ta’ ħżin, installazzjoni, żarmar u manutenzjoni) tul ħajjet il-prodott. It-tagħmir għandu jkun sikur ukoll għal utenti professjonali (eż. trejners, għalliema).

Taħt kundizzjonijiet raġonevoli u prevedibbli ta’ tagħmir fiss għat-taħriġ ir-riskju ta’ korriment jew dannu għas-saħħa u s-sigurtà għandu jkun imminimizzat. Il-partijiet kollha aċċessibbli għall-utent – jew partijiet terzi - matul l-użu normali jew intenzjonat ma għandux jikkawża korrimenti fiżiċi jew jinfluwenza s-saħħa tal-utent b’mod ħażin.

L-utenti għandhom ikunu infurmati bir-riskji u l-perikli li jista’ jkun hemm u kif tipprevenihom.

Għalkemm it-tagħmir għat-taħriġ mhux maħsub għat-tfal, dawn il-prodotti qed isiru dejjem iżjed popolari fid-djar u għalhekk jistgħu jkunu faċilment aċċessibbli għalihom. Inċidenti b’tagħmir tad-dar li jinvolvu t-tfal jistgħu jwasslu għal korrimenti serji (l-iktar fis-swaba’ tal-idejn u tas-saqajn), kif ukoll ħruq, tiċrit tal-ġilda u tgħalliq. Meta dawn ir-riskji ma jkunux jistgħu jiġu mminimizzati biżżejjed mid-disinn jew bis-salvagwardji, ir-riskju residwu għandu jkun indirizzat permezz ta’ informazzjoni relatata mal-prodott indirizzata lill-ġenituri jew il-kuraturi.

B.   Rekwiżiti tas-sigurtà speċifiċi

Dawn li ġejjin għandhom jitqiesu, bħala minimu, fl-applikazzjoni tar-rekwiżit għas-sigurtà ġenerali msemmi fid-Direttiva 2001/95/KE,

(a)	L-istabbiltà ta’ tagħmir li jżomm waħdu;

(b)	Xfar jaqtgħu u xfar tal-metall;

(c)	Ix-xfar tat-tubi;

(d)	Il-punti li jingħafsu, jippressaw, iduru u jirreċiprokaw fi ħdan iż-żona aċċessibbli;

(e)	Il-piżijiet;

(f)	L-aċċess lejn u lil hinn mit-tagħmir;

(g)	Il-mekkaniżmi ta’ aġġustament u llokkjar;

(h)	Il-ħbula, iċ-ċinturini u l-ktajjen;

(i)	Il-ħbula tal-wajer u taljoli;

(j)	Il-gwidi għall-ħbula u ċ-ċinturini;

(k)	Il-punti ta’ ġbid;

(l)	Il-pożizzjonijiet għall-qbid;

(m)	Il-handgrips integrali;

(n)	Il-handgrips applikati;

(o)	Il-handgrips li jduru;

(p)	Is-sigurtà elettrika;

(q)	Il-kura u l-manutenzjoni;

(r)	L-istruzzjonijiet għall-armar;

(s)	L-istruzzjonijiet ġenerali għall-użu;

(t)	Ir-rekwiżiti bijomekkaniċi bażiċi;

(u)	L-immarkar;

(v)	Twissijiet, speċjalment f’dak li jikkonċerna riskji għat-tfal;

(w)	Unità ta’ immobilizzazzjoni speċjalment għat-tfal billi ssakkar is-sors ta’ enerġija barra.

It-testijiet li ġejjin għandhom jitqiesu, bħala minimu, fl-applikazzjoni tar-rekwiżit għas-sigurtà ġenerali msemmi fid-Direttiva 2001/95/KE,

(a)	Kontroll dimensjonali;

(b)	Eżami viżwali;

(c)	Eżami bil-mess;

(d)	Test tal-prestazzjoni;

(e)	Ċertifikat mill-manifattur;

(f)	Ittestjar tal-punti ta’ ġbid;

(g)	Il-kundizzjonijiet tat-test;

(h)	Test ta’ stabbiltà;

(i)	Determinazzjoni tat-tagħbija li taqtal-ħbula, iċ-ċinturini u l-ktajjen;

(j)	Ittestjar tal-volanti (flywheels);

(k)	Determinazzjoni tal-forza ta’ tneħħija ta’ handgrips applikati;

(l)	Ittestjar tal-aċċess ’il ġewwa u ’l barra;

(m)	Ittestjar ta’ kemm jiflaħ tagħbija;

(n)	Ittestjar tal-modalità ta’ kontroll tat-taħbit tal-qalb;

(o)	Ittestjar tal-preċiżjoni tal-indikazzjonijiet tal-qawwa;

(p)	Valutazzjoni tal-istruzzjonijiet u t-twissijiet;

(q)	Rapport tat-test.

---

(1)   ĠU L 157, 9.6.2006, p. 24.

(2)   ĠU L 169, 12.7.1993, p. 1.