4.5.2010   

MT

Il-Ġurnal Uffiċjali tal-Unjoni Ewropea

L 111/5

(1)

Fit-30 ta’ Ġunju 2009, il-Kummissjoni rċeviet ilment li jikkonċerna l-importazzjonijiet ta’ sodium gluconate (“SG”) niexef li joriġinaw mir-Repubblika tal-Poplu taċ-Ċina (“iċ-Ċina”) ippreżentat skont l-Artikolu 5 tar-Regolament bażiku mill-Kunsill tal-Industrija Ewropea tal-Kimiċi (CEFIC) (“il-kwerelant”) f’isem il-produtturi li jirrappreżentaw proporzjon kbir, f’dan il-każ ta’ aktar minn 50 %, tal-produzzjoni totali tal-Unjoni ta’ sodium gluconate niexef.

(2)

L-ilment kien jinkludi evidenza prima facie ta’ dumping u ta’ dannu materjali minn dan id-dumping li tqies li kienet suffiċjenti biex ikun iġġustifikat il-bidu ta' proċediment antidumping.

(3)

Fil-11 ta’ Awwissu 2009, ingћata bidu ta’ proċediment bil-pubblikazzjoni ta’ avviż ta’ inizjazzjoni f’Il-Ġurnal Uffiċjali tal-Unjoni Ewropea  (2).

(4)

Il-Kummissjoni avżat uffiċjalment bl-inizjazzjoni tal-proċediment lill-produtturi esportaturi fiċ-Ċina, l-importaturi, il-kummerċjanti, l-utenti u l-assoċjazzjonijiet magħrufa li huma kkonċernati, l-awtoritajiet taċ-Ċina u l-produtturi tal-Unjoni li lmentaw. Il-partijiet interessati ngħataw l-opportunità li jressqu l-opinjonijiet tagħhom bil-miktub u li jitolbu seduta fil-limitu taż-żmien stipulat fl-avviż ta’ bidu.

(5)

Il-partijiet interessati kollha li talbu dan u li wrew li kien hemm raġunijiet partikolari għaliex għandhom jinstemgħu, ingħataw seduta ta’ smiegħ.

(6)

Sabiex il-produtturi esportaturi jkollhom l-opportunità li jressqu talba għal trattament ta’ ekonomija tas-suq (“TES”) jew għal trattament individwali (“TI”), jekk riedu, il-Kummissjoni bagħtet formoli ta’ talbiet lill-produtturi Ċiniżi li jesportaw li kien magħruf li huma kkonċernati, u lill-awtoritajiet taċ-Ċina. Produttur esportatur wieħed talab it-TES skont l-Artikolu 2(7) tar-Regolament bażiku u produttur esportatur ieħor, li jinkludi żewġ kumpaniji relatati, talbu t-TI skont l-Artikolu 9(5) tal-istess Regolament.

(7)

Minħabba li n-numru ta’ produtturi fiċ-Ċina u importaturi fl-Unjoni deher li kien kbir, il-Kummissjoni fl-avviż tal-bidu indikat li jista' jkun applikat it-teħid ta’ kampjuni fil-każ ta’ dawn il-partijiet skont l-Artikolu 17 tar-Regolament bażiku.

(8)

Sabiex il-Kummissjoni tkun tista' tiddeċiedi jekk ikunx hemm il-ħtieġa ta' teħid ta' kampjuni u, jekk hu hekk, jingħażel kampjun, il-produtturi esportaturi kollha fiċ-Ċina u l-importaturi fl-Unjoni ntalbu jippreżentaw ruħom lill-Kummissjoni u jipprovdu, kif speċifikat fl-avviż ta' bidu, tagħrif bażiku dwar l-attivitajiet tagħhom marbuta mal-prodott ikkonċernat matul il-perjodu ta' investigazzjoni (mill-1 ta' Lulju 2008 sat-30 ta' Ġunju 2009).

(9)

Minħabba n-numru limitat ta’ risposti għall-eżerċizzju ta’ teħid ta’ kampjuni, kien deċiż li ma kienx hemm bżonn ta' teħid ta’ kampjuni għall-produtturi esportaturi Ċiniżi jew għall-importaturi fl-Unjoni.

(10)

Intbagħtu l-kwestjonarji lill-kumpaniji kollha fiċ-Ċina u lill-importaturi fl-Unjoni li rrispondew għall-eżerċizzju tat-teħid tal-kampjun, lill-produtturi fl-Unjoni, u lill-importaturi u l-utenti kollha magħrufa fl-Unjoni. Waslu r-risposti minn żewġ produtturi esportaturi jew gruppi ta' produtturi esportaturi fiċ-Ċina, żewġ produtturi fl-Unjoni u erba' importaturi/utenti.

(11)

Il-Kummissjoni fittxet u vverifikat it-tagħrif kollu li qieset li kien meħtieġ gћad-determinazzjoni provviżorja ta' dumping, għad-dannu li rriżultat kif ukoll għall-interess tal-Unjoni u għamlet żjarat ta’ verifika fil-post fil-kumpaniji li ġejjin:

(12)

Minћabba l-ћtieġa li jiġi stabbilit valur normali gћall-produtturi li jesportaw fiċ-Ċina li jista’ ma jingћatalhomx TES, saret verifika fil-bini tal-kumpanija li ġejja sabiex jiġi stabbilit il-valur normali fuq il-bażi tad-dejta tal-pajjiż analogu, f’dan il-każ l-Istati Uniti tal-Amerika:

(13)

L-investigazzjoni tad-dumping u l-ħsara kopriet il-perjodu mill-1 ta' Lulju 2008 sat-30 ta' Ġunju 2009 (“perjodu ta' investigazzjoni” jew “PI”). L-eżami tat-tendenzi rilevanti għall-evalwazzjoni tal-ħsara kopra l-perjodu mill-1 ta’ Jannar 2005 sal-aħħar tal-perjodu għall-investigazzjoni (“il-perjodu kkunsidrat”).

(14)

Il-prodott ikkonċernat huwa s-sodium gluconate niexef li joriġina miċ-Ċina (“il-prodott ikkonċernat”), bin-numru tal-Unjoni Doganali u tal-Istatistika (CUS) 0023277-9 u n-numru tar-reġistrazzjoni tas-Servizz tal-Astratti Kimiċi (CAS) 527-07-1, attwalment ikklassifikat bil-kodiċi tan-NM ex 2918 16 00.

(15)

Is-sodium gluconate niexef jintuża l-iktar fl-industrija tal-bini bħala ritardatur tat-tgħaqqid u plastiċizzatur tal-konkos u f'industriji oħra bħala trattament tal-wiċċ għall-metalli (tneħħija ta' sadid, ossidi u xaħam) u għat-tindif ta' fliexken u apparat industrijali. Il-prodott jista’ jintuża wkoll fl-industriji tal-ikel u tal-farmaċewtiċi.

(16)

L-investigazzjoni wriet li s-sodium gluconate niexef prodott u mibjugħ mill-industrija tal-Unjoni fl-Unjoni, is-sodium gluconate niexef prodott u mibjugħ fis-suq domestiku tal-Istati Uniti tal-Amerika, li ntgħażlu bħala l-pajjiż analogu, is-sodium gluconate niexef prodott u mibjugħ fis-suq domestiku fiċ-Ċina u s-sodium gluconate niexef prodott fiċ-Ċina u mibjugħ lill-Unjoni essenzjalment għandhom l-istess karatteristiċi fiċiżi u tekniċi bażiċi.

(17)

Għalhekk dawn il-prodotti jitqiesu provviżorjament bħala li jixxiebħu skont it-tifsira tal-Artikolu 1(4) tar-Regolament bażiku.

(18)

Skont l-Artikolu 2(7)(b) tar-Regolament bażiku, fl-investigazzjonijiet kontra d-dumping dwar l-importazzjonijiet li joriġinaw miċ-Ċina, il-valur normali gћal dawk il-produtturi esportaturi li nstabu li qed jissodisfaw il-kriterji stabbiliti fl-Artikolu 2(7)(c) tar-Regolament bażiku gћandu jiġi ddeterminat skont il-paragrafi 1 sa 6 tal-Artikolu msemmi.

(19)

Fil-qosor, u għal faċilità ta’ referenza biss, il-kriterji tat-TES huma elenkati f’forma mqassra hawn taħt:

(20)

Wara l-bidu tal-proċedura, produttur esportatur Ċiniż wieħed, Shandong Kaison Biochemical Co., Ltd, talab TES skont l-Artikolu 2(7)(b) tar-Regolament bażiku u wieġeb għall-formola tat-talba tat-TES fl-iskadenzi taż-żmien mogħtija.

(21)

Il-kumpanija wriet li hi ssodisfat il-kriterji tal-Artikolu 2(7)(c) tar-Regolament bażiku u setgħet tingħata TES.

(22)

Skont l-Artikolu 2(7)(a) tar-Regolament bażiku, dazju fuq skala nazzjonali, jekk jeżisti, għandu jkun stabbilit għal pajjiżi li jaqgħu taħt dak l-Artikolu, ħlief f'dawk il-każijiet fejn il-kumpaniji jkunu jistgħu juru li jissodisfaw il-kriterji kollha stipulati fl-Artikolu 9(5) tar-Regolament bażiku biex jingħataw TI.

(23)

Fil-qosor, u għal referenza aktar faċli biss, dawn il-kriterji huma stabbiliti hawn taħt:

(24)

Wara l-bidu tal-proċedura, produttur esportatur Ċiniż wieħed, Qingdao Kehai Biochemistry Co., Ltd, talab TI skont l-Artikolu 9(5) tar-Regolament bażiku u wieġeb għall-formola tat-talba tat-TI fl-iskadenzi taż-żmien mogħtija.

(25)

Fuq il-bażi tal-informazzjoni disponibbli, instab li l-produttur esportatur Ċiniż issodisfa l-ħtiġijiet kollha għat-TI kif stabbilit fl-Artikolu 9(5) tar-Regolament Bażiku.

(26)

Skont l-Artikolu 2(7)(a) tar-Regolament bażiku, f’ekonomiji fi transizzjoni l-valur normali għall-produtturi li jesportaw li ma ngħatawx it-TES irid jiġi stabbilit fuq il-bażi tal-prezz jew valur kostrutt f’pajjiż terz b’ekonomija tas-suq (‘pajjiż analogu’).

(27)

Fl-avviż ta’ bidu, l-Istati Uniti tal-Amerika ġew proposti bħala pajjiż analogu xieraq biex ikun stabbilit il-valur normali għaċ-Ċina. Il-Kummissjoni ħeġġet lill-partijiet interessati kollha biex jagħtu l-kummenti tagħhom dwar din il-proposta.

(28)

Ma kien hemm l-ebda kummenti minn kwalunkwe parti interessata.

(29)

'Il hinn mill-UE, is-sodium gluconate niexef huwa prodott f'għadd żgħir ħafna ta' pajjiżi, jiġifieri l-Istati Uniti tal-Amerika, iċ-Ċina u l-Korea t'Isfel. Għaldaqstant l-unika alternattiva possibbli għall-Istati Uniti tal-Amerika kienet il-Korea t’Isfel. Il-Kummissjoni kkuntattjat lill-kumpaniji magħrufa li jipproduċu s-sodium gluconate fil-Korea t'Isfel, iżda ma waslet lura ebda risposta minn għand dawk il-produtturi.

(30)

Il-produttur fl-Istati Uniti tal-Amerika kkoopera bis-sħiħ fl-investigazzjoni billi ssottometta tweġiba kompluta għall-kwestjonarju u aċċetta li ssir żjara ta’ verifika.

(31)

Il-Kummissjoni sabet li l-Istati Uniti tal-Amerika jissodisfaw il-kriterji bħala pajjiż analogu xieraq billi l-kwantitajiet mibjugħa f’dan is-suq kienu kbar biżżejjed u kien hemm biżżejjed kompetizzjoni fis-suq kemm mal-produzzjoni domestika kif ukoll mal-importazzjonijiet minn pajjiżi oħra, jiġifieri ċ-Ċina, l-Italja u Franza. Barra minn hekk, l-Istati Uniti tal-Amerika ma kellhom ebda dazju kontra d-dumping fir-rigward tal-prodott ikkonċernat.

(32)

Minħabba dak li ntqal aktar ’il fuq, qed jiġi konkluż b’mod provviżorju li l-Istati Uniti tal-Amerika jikkostitwixxu pajjiż analogu xieraq skont l-Artikolu 2(7)(a) tar-Regolament bażiku.

(33)

Għall-kumpaniji li ngħatat TES, skont l-Artikolu 2(2) tar-Regolament bażiku, il-Kummissjoni l-ewwel stabbiliet jekk il-bejgħ domestiku tas-sodium gluconate niexef lil konsumaturi indipendenti kienx rappreżentattiv matul il-PI, jiġifieri jekk il-volum totali ta’ dan il-bejgħ kienx jirrappreżenta mill-inqas 5 % tal-ammont totali ta’ bejgħ mill-esportazzjoni Ċiniża tal-prodott lejn l-Unjoni.

(34)

Il-Kummissjoni sussegwentement identifikat dawk it-tipi ta’ prodotti mibjugħa b’mod domestiku mill-kumpanija li għandha bejgħ domestiku rappreżentattiv globali, li kienu identiċi jew direttament komparabbli mat-tipi mibjugħa għall-esportazzjoni lill-Unjoni.

(35)

Għal kull tip mibjugħ mill-produttur esportatur fis-suq lokali tiegħu u misjub li huwa komparabbli direttament mat-tipi ta’ sodium gluconate niexef mibjugħa għall-esportazzjoni lejn l-Unjoni, ġie stabbilit jekk il-bejgħ lokali kienx rappreżentattiv biżżejjed għall-għanijiet tal-Artikolu 2(2) tar-Regolament bażiku. Bejgħ domestiku ta’ tip ta’ prodott partikolari kien ikkunsidrat suffiċjentement rappreżentattiv meta l-ammont ta’ dak it-tip ta’ prodott mibjugħ fis-suq domestiku lil klijenti indipendenti matul il-PI rrappreżenta tal-anqas 5 % tal-ammont totali tat-tip ta’ prodott kumparabbli mibjugħ għall-esportazzjoni lejn l-Unjoni.

(36)

Il-Kummissjoni sussegwentement eżaminat jekk il-bejgħ domestiku ta’ sodium gluconate niexef mibjugħ fis-suq domestiku fi kwantitajiet rappreżentattivi setax jitqies li sar tul l-andament normali tal-kummerċ skont l-Artikolu 2(4) tar-Regolament bażiku. Dan sar billi gћal kull tip ta’ prodott ġie stabbilit il-proporzjon tal-bejgћ bi qligħ lill-klijenti indipendenti fis-suq domestiku matul il-perjodu tal-investigazzjoni.

(37)

Fejn il-volum tal-bejgħ ta’ tip ta’ prodott, mibjugħ bi prezz nett ta’ bejgħ daqs jew ogħla mill-ispiża tal-produzzjoni rrappreżenta aktar minn 80 % tal-volum totali ta’ bejgħ ta’ dan it-tip, u fejn il-prezz medju differenzjat ta’ dan it-tip kien daqs jew ogħla mill-ispiża tal-produzzjoni, il-valur normali ġie bbażat fuq il-prezz domestiku effettiv. Dan il-prezz ġie kkalkulat bħala l-medja differenzjata tal-prezzijiet tal-bejgħ domestiku kollu ta' dan it-tip matul il-PI, sew jekk dan il-bejgħ kienx bi qligħ u sew jekk le.

(38)

Fejn il-volum ta’ bejgħ bi profitt ta’ tip ta’ prodott irrappreżenta 80 % jew inqas tal-volum totali ta’ bejgħ ta’ dan it-tip, jew fejn il-prezz medju differenzjat ta’ dan it-tip kien taħt il-kost ta’ produzzjoni, il-valur normali kien ibbażat fuq il-prezz domestiku attwali, ikkalkulat bħala medja differenzjata ta’ bejgħ bi profitt ta’ dan it-tip biss.

(39)

Billi l-investigazzjoni wriet li l-bejgħ domestiku kien kemm rappreżentattiv kif ukoll sar fl-andament ordinarju tal-kummerċ, il-valur normali kien għaldaqstant ibbażat fuq il-prezz domestiku attwali tat-tranżazzjonijiet kollha matul il-perjodu tal-investigazzjoni.

(40)

Skont l-Artikolu 2(7)(a) tar-Regolament bażiku, il-valur normali għaċ-Ċina ġie stabbilit fuq il-bażi tal-informazzjoni vverifikata li ġiet ipprovduta mill-produttur li qed jikkoopera fil-pajjiż analogu. Il-bejgħ domestiku tal-produttur Amerikan tal-prodott simili nstab li kien rappreżentattiv meta mqabbel mal-prodott ikkonċernat esportat lejn l-Unjoni mill-uniku produttur esportatur fiċ-Ċina li kkoopera.

(41)

Sar ukoll eżami dwar jekk il-bejgħ domestiku jistax jitqies li sar fl-andament normali tal-kummerċ, billi ġie stabbilit il-proporzjon ta’ bejgħ bi profitt lil klijenti indipendenti. Għaldaqstant, il-valur normali ġie bbażat fuq il-prezz domestiku attwali għal kull tip ta’ prodott, ikkalkulat bħala medja differenzjata tal-prezzijiet għall-bejgħ domestiku kollu magħmul matul il-PI.

(42)

Il-bejgħ tal-esportazzjoni kollu tal-prodott ikkonċernat mill-produtturi esportaturi li kkooperaw sar direttament lil konsumaturi indipendenti fl-Unjoni, u għalhekk il-prezz tal-esportazzjoni ġie stabbilit abbażi tal-prezzijiet li attwalment tħallsu jew li huma pagabbli għall-prodott ikkonċernat fil-PI skont l-Artikolu 2(8) tar-Regolament bażiku.

(43)

It-tqabbil bejn il-valur normali u l-prezz tal-esportazzjoni sar fuq bażi ta’ kif joħroġ mill-fabbrika.

(44)

Sabiex ikun żgurat paragun ġust bejn il-valur normali u l-prezz tal-esportazzjoni, saret konċessjoni xierqa fil-forma ta’ aġġustamenti għad-differenzi li jaffetwaw il-prezzijiet u l-paragunabbiltà tal-prezzijiet skont l-Artikolu 2(10) tar-Regolament bażiku. Għall-kumpaniji kollha investigati (produtturi li jesportaw li qed jikkooperaw fil-pajjiż analogu) saru aġġustamenti għad-differenzi fil-prezz tat-trasport, spejjeż tal-ġarr u assikurazzjoni, tassazzjoni indiretta, miżati tal-banek, spejjeż tal-ippakkjar, spejjeż tal-kreditu u kummissjonijiet, fejn applikabbli u ġustifikat.

(45)

Għall-kumpanija li ngħatat TES, il-marġini ta’ dumping ġie stabbilit abbażi ta’ tqabbil tal-valur normali b'piż differenzjat ma’ prezz tal-esportazzjoni b’piż differenzjat, kif jipprevedu l-Artikoli 2(11) u (12) tar-Regolament bażiku.

(46)

Gћall-kumpanija li ngћatat TI, il-valur normali medju differenzjat stabbilit gћall-pajjiż analogu kien imqabbel mal-koeffiċjent medju tal-prezz tal-esportazzjonijiet lejn l-Unjoni, kif stipulat skont l-Artikolu 2(11) tar-Regolament bażiku.

(47)

Il-marġini tad-dumping medji differenzjati temporanji espressi bħala perċentwali tal-prezz CIT fil-fruntiera tal-Unjoni, dazju mhux imħallas, huma:

(48)

Fir-rigward tal-esportaturi Ċiniżi l-oħra kollha, il-Kummissjoni l-ewwel stabbiliet il-livell ta’ kooperazzjoni. Sar paragun bejn il-kwantitajiet tal-esportazzjoni totali indikati fit-tweġibiet tal-kwestjonarju tal-produtturi li jesportaw li qed jikkooperaw u l-importazzjonijiet totali miċ-Ċina, kif miġbura mill-istatistiċi tal-importazzjoni tal-Eurostat.

(49)

Billi l-livell ta’ kooperazzjoni kien baxx, jiġifieri 56 %, u minħabba n-nuqqas ta’ dejta adatta tal-Eurostat dwar il-prezz billi din inkludiet prodotti oħra bi prez għoli li ma jistgħux jitnaqqsu b’mod preċiż, il-marġini tad-dumping mal-pajjiż kollu ġiet ikkalkulata billi ntużat id-dejta mill-ilment aġġornata għall-PI.

(50)

Fuq din il-bażi l-livell ta’ dumping mal-pajjiż kollu ġie stabbilit b’mod provviżorju gћal 79,2 % tal-prezz CIF fuq il-fruntiera tal-Unjoni, bid-dazju mhux imħallas.

(51)

Il-gruppi industrijali li kkooperaw Jungbunzlauer (JBL) u Roquette Frères (RF) ammontaw għal 100 % tal-produzzjoni tal-Unjoni.

(52)

Huma għalhekk meqjusin li jikkostitwixxu l-industrija tal-Unjoni (‘IU’) fit-tifsira tal-Artikolu 4(1) u l-Artikolu 5(4) tar-Regolament bażiku.

(53)

Peress li l-IU b’hekk hija magħmula minn żewġ produtturi biss, iċ-ċifri kollha relatati ma’ dejta sensittiva kellhom jiġu indiċjati jew jingħataw f’firxa għal raġunijiet ta’ kunfidenzjalità.

(54)

Il-konsum tal-Unjoni ġie stabbilit abbażi tal-volumi tal-bejgħ tal-industrija tal-Unjoni fis-suq tal-Unjoni, flimkien mal-importazzjonijiet lejn l-Unjoni skont id-dejta tal-Eurostat. Billi din id-dejta tal-aħħar tinkludi mhux biss il-prodott ikkonċernat iżda wkoll xi prodotti oħra apparti s-sodium gluconate, saru l-aġġustamenti xierqa għaċ-ċifri tal-Eurostat ħalli jiġu stmati valuri ta' importazzjoni raġjonevoli tal-prodott ikkonċernat lejn l-Unjoni.

(55)

Il-konsum fis-suq tal-Unjoni żdied bi 12 % bejn l-2005 u l-2007. Wara, naqas b’21 % taħt il-livelli tal-2005 sal-PI. Kumplessivament, matul il-perjodu li qed jiġi kkunsidrat il-konsum naqas bi 8 %.

Tabella 1

(56)

Il-volum tal-importazzjoni Ċiniża żdied b'mod sinifikanti minn madwar 2 300 tunnellata fl-2005 għal madwar 4 000 tunnellata matul il-PI, jiġifieri b’77 %, bl-ogħla rata ta' madwar 5 300 tunnellata tintlaħaq fl-2008. Sehem is-suq Ċiniż korrispondenti kważi rdoppja minn 12,8 % fl-2005 għal 24,8 % matul il-PI. Huwa nnutat li sehem is-suq tal-importazzjonijiet Ċiniżi laħaq it-28,6 % fl-2008 kemxejn qabel il-PI u niżel matul il-PI għal 24,8 %.

Tabella 2

(57)

Il-prezzijiet tal-importazzjoni Ċiniża medja kienu ta' EUR 482 kull tunnellata fl-2005. Dawn żdiedu b'mod regolari sakemm laħqu livell ta' EUR 524 kull tunnellata fl-2008 u mbagħad niżlu f'daqqa matul il-PI għal EUR 502 kull tunnellata. Kumplessivament, tul il-perjodu meqjus dawn żdiedu b’4 %.

Tabella 3

(58)

Sabiex ikun analizzat it-traħħis tal-prezzijiet taħt il-prezz normali, il-prezzijiet medji u mgħobbija tal-bejgħ skont it-tip ta’ prodott tal-IU lil klijenti mhux relatati fis-suq tal-Unjoni, aġġustati għal livell barra mill-fabbrika, kienu pparagunati mal-prezzijiet medji u mgħobbija korrispondenti tal-importazzjonijiet ikkonċernati, stabbiliti fuq bażi CIF b’aġġustament xieraq għad-dazji doganali u għall-ispejjeż ta’ wara l-importazzjoni. Il-paragun sar wara t-tnaqqis tar-ribassi u tal-iskonti.

(59)

Fuq il-bażi tal-metodoloġija ta’ hawn fuq, id-differenza bejn il-prezzijiet hawn fuq imsemmija, imfissra bħala perċentwali tal-medja differenzjata tal-prezz tal-IU (prezzijiet tal-fabbrika), turi marġini ta’ roħs ta’ prezz li jvarja minn 13 % sa 29 %, bl-ogħla livell attribwit għall-produtturi esportaturi li ma kkooperawx.

(60)

Skont l-Artikolu 3(5) tar-Regolament bażiku, l-eżami tal-impatt tal-importazzjonijiet li kienu oġġetti ta' dumping fuq l-IU inkluda valutazzjoni tal-fatturi ekonomiċi rilevanti kollha li għandhom rilevanza għall-istat tal-IU matul il-perjodu meqjus.

(61)

Il-kapaċità tal-produzzjoni żdiedet b’4 % fil-perjodu mill-2005 sal-2007, u baqgħet f’dak il-livell sa tmiem il-perjodu meqjus.

(62)

Il-produzzjoni tal-prodott ikkonċernat żdiedet bejn l-2005 u l-2007 qabel ma naqset fil-perjodu dal-PI. Kumplessivament, il-produzzjoni naqset bi 12 % tul il-perjodu meqjus. Il-produttività totali matul il-PI kienet ta’ bejn 30 000 u 40 000 tunnellata.

(63)

Minħabba t-tnaqqis fil-volumi tal-produzzjoni, tul il-perjodu meqjus l-użu tal-kapaċità tnaqqas bi 15 %.

Tabella 4

(64)

Il-bejgħ f'volum tal-prodott ikkonċernat mill-IU lil klijenti mhux relatati fis-suq tal-Unjoni żamm livelli simili mill-2005 sal-2007 u mbagħad naqas f’daqqa bi 13-il punt perċentwali. Tul il-perjodu meqjus, it-tnaqqis fil-volumi tal-bejgħ kien ta’ 21 %.

(65)

Sehem is-suq tal-IU naqas tul il-perjodu meqjus, b'waqgħa minn 74,9 % fl-2005 għal 64,7 % matul il-PI.

(66)

Il-prezzijiet medji tal-bejgħ lil klijenti li mhumiex relatati fis-suq tal-Unjoni naqsu bi 12 % matul il-perjodu meqjus. Mill-2006 sal-2008 il-prezzijiet medji tal-bejgħ żammew f'livelli simili iżda mbagħad niżlu f'daqqa b'9 % matul il-PI.

Tabella 5

(67)

Tul il-perjodu meqjus, il-ħażniet naqsu b’37 %. Fi tmiem il-PI, il-livell tal-ħażna kien bejn 1 000 u 5 000 tunnellata.

Tabella 6

(68)

Il-bejgħ tal-IU tal-prodott simili fis-suq tal-Unjoni kienu profittabbli matul il-perjodu meqjus, iżda l-profittabilità naqset drammatikament mill-2005 sal-PI.

(69)

Minkejja li l-investiment baqgħu għaddejjin tul il-perjodu bejn l-2005 u l-2007, bi tnaqqis fl-2006, dawn naqsu bil-qawwi fl-2008 u matul il-PI. Tul il-perjodu meqjus l-investimenti naqsu b’76 %.

(70)

Fuq xejra simili, ir-redditu fuq l-investimenti mill-produzzjoni u l-bejgħ tal-prodott ikkonċernat kien stabbli mill-2005 sal-2007, iżda naqas fl-2008 u matul il-PI.

(71)

Bħal fil-każ tal-indikaturi finanzjarji l-oħrajn, il-likwidità tal-flus iġġenerata mill-IU naqset b'51 % tul il-perjodu meqjus.

Tabella 7

(72)

L-impjiegi żdiedu ftit mill-2005 sal-2007 u mbagħad naqsu fl-2008 u tul il-PI. Matul il-perjodu meqjus l-impjiegi naqsu bi 13 %.

(73)

Il-pagi naqsu b’6 % fl-2006 iżda reġgħu lura għal-livelli tal-2005 fl-2007 u mbagħad żdiedu fl-2008 u matul il-PI. Matul il-perjodu kkunsidrat il-pagi żdiedu b’10 %.

(74)

Il-produttività għal kull impjegat baqgħet stabbli matul il-perjodu meqjus, b’żieda ta’ 1 % mill-2005 sal-PI.

Tabella 8

(75)

Filwaqt li l-konsum tal-Unjoni tul il-perjodu meqjus naqas b’9 %, il-volum tal-bejgħ tal-IU naqas b’21 %. Dan wassal għal telf tas-sehem mis-suq mill-IU tul il-perjodu meqjus ta’ 10 punti perċentwali.

(76)

Il-marġnijiet ta’ dumping għaċ-Ċina, speċifikati hawn fuq fit-taqsima dwar id-dumping, huma sinifikanti. Minħabba l-ammonti u l-prezzijiet tal-importazzjonijiet tal-oġġetti ta’ dumping, l-impatt tal-marġini tad-dumping ma jistax jiġi kkunsidrat bħala negliġibbli.

(77)

Tul il-perjodu meqjus, il-parti l-kbira tal-indikaturi tad-dannu li għandhom x’jaqsmu mal-IU żviluppaw negattivament. L-indikaturi relatati mal-prestazzjoni finanzjarja tal-IU, inklużi r-redditu fuq l-investimenti, il-likwidità tal-flus u l-profittabilità, ukoll żviluppaw negattivament.

(78)

L-investigazzjoni wriet ukoll li l-importazzjonijiet irħas Ċiniżi kienu qed jinbiegħu taħt il-prezzijiet tal-industrija tal-Unjoni b’sa 29 % matul il-PI. L-IU sofriet tnaqqis fil-volumi tal-bejgħ u waqgħa fis-sehem mis-suq.

(79)

Fid-dawl ta' dak li ssemma, huwa konkluż provviżorjament li l-industrija tal-Unjoni sofriet dannu materjali fis-sens tal-Artikolu 3(5) tar-Regolament bażiku.

(80)

Skont l-Artikoli 3(6) u 3(7) tar-Regolament bażiku, il-Kummissjoni Ewropea eżaminat jekk l-importazzjonijiet li kienu suġġetti għal dumping ta’ sodium gluconate niexef li oriġinaw miċ-Ċina kkawżawx dannu lill-IU sal-punt li jkun jista’ jiġi kklassifikat bħala wieħed materjali. Fatturi magħrufa oħra differenti mill-importazzjonijiet li kienu l-oġġett ta’ dumping, li setgħu fl-istess ħin ikunu qed jikkawżaw dannu lill-IU, ġew ukoll eżaminati biex ikun żgurat li l-ħsara li possibbilment kienet ikkaġunata minn dawn il-fatturi l-oħra ma kinitx attribwita lill-importazzjonijiet li kienu l-oġġett ta’ dumping.

(81)

Tul il-perjodu kkunsidrat l-importazzjonijiet ta’ oġġetti ta’ dumping bi prezz irħis miċ-Ċina żdiedu fil-volum b’77 %, biex wasslu f’żieda tas-sehem tal-importazzjonijiet Ċiniżi mis-suq tal-Unjoni ta’ 94 % tul l-istess perjodu. It-tnaqqis ta’ importazzjonijiet miċ-Ċina bejn l-2008 u l-PI inkluż it-telf tas-sehem mis-suq mhux meqjus bħala sinfikanti meta mqabbel mal-qagħda kumplessiva osservata matul il-perjodu kkunsidrat.

(82)

Din iż-żieda fl-importazzjonijiet miċ-Ċina matul il-perjodu kkunsidrat ħabtet ma’ xejra ’l isfel fil-biċċa l-kbira tal-indikaturi ta' dannu tal-IU. L-IU sofriet tnaqqis fil-bejgħ tagħha, kemm fil-volumi kif ukoll fil-valuri, fis-suq tal-Unjoni, li rriżulta f'telf ta' sehem mis-suq ta' 10 punti perċentwali tul il-perjodu kkunsidrat kif issemma hawn fuq fil-premessa (65). Il-bejgħ taħt il-prezz tal-importazzjonijiet Ċiniżi li kienu oġġett ta’ dumping żamm lill-IU milli żżomm il-livelli tal-prezzijiet tagħha fis-suq tal-Unjoni. Dan wassal għal tnaqqis sinifikanti fil-profittabilità taħt livelli li jħallu lok għall-investimenti neċessarji.

(83)

Fuq il-bażi ta’ dak li ssemma aktar ’il fuq, qed jiġi provviżorjament konkluż li l-importazzjonijiet bi prezzijiet baxxi li kienu suġġetti għal dumping miċ-Ċina li kienu ferm irħas mill-prezzijiet tal-IU matul il-perjodu kkunsidrat kellhom rwol determinanti fid-dannu li sofriet l-industrija tal-Unjoni, li huwa rifless fis-sitwazzjoni finanzjarja batuta tagħha u fid-deterjorament tal-indikaturi tad-dannu l-oħra matul il-perjodu kkunsidrat, kif ukoll fit-telf tas-sehem mis-suq.

(84)

L-importazzjonijiet minn pajjiżi terzi mhux ikkonċernati f'din l-investigazzjoni naqsu bi 23 % tul il-perjodu kkunsidrat bir-riżultat ta' telf ta' sehem mis-suq ta' 2 punti perċentwali tul il-perjodu kkunsidrat. Matul il-perjodu ikkunsidrat, il-prezzijiet ta’ dawn l-importazzjonijiet żdied b’102 %.

(85)

It-tendenzi fl-ammonti u l-prezzijiet ta’ importazzjoni minn pajjiżi terzi matul il p-perjodu kkunsidrat kienu kif ġej:

Tabella 9

(86)

Il-volumi tal-importazzjoni minn pajjiżi terzi oħra naqsu bi 23 % matul il-perjodu kkunsidrat, filwaqt li l-prezzijiet tal-importazzjoni rduppjaw matul l-istess perjodu. Il-prezzijiet tal-importazzjoni minn pajjiżi terzi oħra kienu sinifikament ogħla mill-prezzijiet tal-bejgħ tal-IU matul il-perjodu kollu kkunsidrat. Abbażi ta’ dan, hu provviżorjament konkluż li l-importazzjonijiet minn pajjiżi terzi oħrajn ma kisrux ir-rabta kawżali bejn id-dumping misjub u d-dannu materjali kkawżat lill-IU mill-importazzjonijiet li kienu suġġetti għal dumping miċ-Ċina.

(87)

Matul il-perjodu kkunsidrat, il-bejgħ għall-esportazzjoni mill-IU naqas b’10 % u l-prezzijiet żdiedu bi 8 %.

(88)

Fid-dawl ta' dan ta' hawn fuq, il-bejgħ għall-esportazzjoni tal-IU lil pajjiżi terzi oħra jitqies li ma jiksirx ir-rabta kawżali bejn l-importazzjonijiet li kienu oġġett ta' dumping miċ-Ċina u d-dannu materjali li sofriet.

(89)

Matul il-perjodu kkunsidrat l-użu intern mill-IU żdied b’56 % kif turi t-tabella li ġejja:

Tabella 10

(90)

Madankollu, huwa nnotat li l-IU xorta kellha kapaċità żejda f'firxa bejn 10 000 u 20 000 tunnellata. Dan ifisser li trasferiment għal użu intern jista’ jidher bħala reazzjoni tan-negozju għall-importazzjonijiet li kienu oġġett ta’ dumping miċ-Ċina, billi jaf iħalli iktar qliegħ li tipproduċi prodotti 'l isfel fil-katina tal-bejgħ (downsteam products) minħabba l-livelli baxxi fil-prezz tas-sodium gluconate. Il-fatt li għadha disponibbli kapaċità żejda konsiderevoli għas-sodium gluconate jindika li l-IU ma tfittix li tittrasferixxi b'mod definittiv il-produzzjoni lejn prodotti downstream u li l-produzzjoni ta' prodotti downstream tista' titqies bħala miżura ta' difiża kontra l-importazzjonijiet li kienu oġġett ta' dumping.

(91)

Għaldaqstant jitqies li ż-żieda fl-użu intern ma kisritx ir-rabta kawżali bejn l-importazzjonijiet li kienu l-oġġett ta’ dumping miċ-Ċina u d-dannu materjali li sofriet l-IU.

(92)

Huwa nnutat li l-konsum fl-UE naqas b’9 % matul il-perjodu kkunsidrat, u dan jista’ jidher bħala konsegwenza tan-nuqqas fir-ritmu ekonomiku ta' bħalissa. Għaldaqstant ġie mistħarreġ jekk it-tnaqqis fil-konsum setax kellu effett fuq il-qagħda dannuża fl-IU.

(93)

Madankollu, il-volum tal-bejgħ tal-IU naqas sa punt ferm akbar, jiġifieri b’21 % filwaqt li l-importazzjonijiet Ċiniżi żdiedu b’77 % matul l-istess perjodu. Meta wieħed iqis is-sehem mis-suq, tista’ tiġi osservata l-istess xejra. L-IU tilfet madwar 10 punti perċentwali tas-sehem mis-suq tagħha filwaqt li l-importaturi Ċiniżi kważi rduppjaw tagħhom, minn 12,8 % fl-2005 għal 24,9 % fil-PI.

(94)

Fid-dawl ta’ dan t'hawn fuq, qed jiġi provviżorjament konkluż li t-tnaqqis fil-konsum tal-UE ma jistax minnu nniffsu jitqies bħal kawża li tikser ir-rabta kawżali bejn l-importazzjonijiet miċ-Ċina li kienu oġġett ta’ dumping u d-dannu materjali sofrut mill-IU.

(95)

L-analiżi t’hawn fuq uriet li kien hemm żieda sostanzjali fil-volum u s-sehem mis-suq tal-importazzjonijiet li kienu oġġett ta' dumping li oriġinaw miċ-Ċina matul il-perjodu kkunsidrat flimkien ma bejgħ taħt il-prezz sinifikanti. Din iż-żieda fis-sehem mis-suq tal-importazzjonijiet bi prezzijiet baxxi miċ-Ċina ħabtet ma’ tnaqqis fis-sehem mis-suq tal-IU li, flimkien mal-pressjoni ’l isfel fuq il-prezzijiet, irriżultat f’deterjorazzjoni tal-qagħda tal-IU tul il-perjodu kkunsidrat. Min-naħa l-oħra, l-eżami tal-fatturi l-oħra li setgħu kienu ta’ ħsara għall-IU wrew li ebda wieħed minnhom ma seta’ kellu impatt negattiv sinifikanti.

(96)

Fuq il-bażi tal-analiżi ta’ hawn fuq, li għamlet distinzjoni xierqa u sseparat l-effetti tal-fatturi magħrufa kollha li kellhom effett fuq is-sitwazzjoni tal-IU, mill-effett dannuż tal-importazzjonijiet li kienu suġġetti għal dumping, qed jiġi konkluż provviżorjament li l-importazzjonijiet miċ-Ċina kkawżaw dannu materjali lill-IU fit-tifsira tal-Artikolu 3(6) tar-Regolament bażiku.

(97)

Skont l-Artikolu 21 tar-Regolament bażiku, il-Kummissjoni Ewropea eżaminat jekk, minkejja l-konklużjoni dwar id-dumping li huwa ta’ ħsara, kinux jeżistu raġunijiet kostrinġenti li m’huwiex fl-interess tal-Unjoni li tadotta miżuri kontra d-dumping f’dan il-każ partikolari. Id-determinazzjoni tal-interess tal-Unjoni kienet ibbażata fuq apprezzament tal-interessi kollha differenti involuti, jiġifieri dawk tal-IU, tal-importaturi u tal-utenti tal-prodott ikkonċernat.

(98)

Kif spjegat hawn fuq, minħabba l-importazzjonijiet li kienu oġġett ta' dumping, seħħ dannu fl-għamla ta' tnaqqis sinifikanti fil-volum tal-bejgħ u l-prezzijiet, li min-naħa tiegħu rriżulta f'deterjorament tal-qagħda tal-IU. Huwa mistenni li, wara l-impożizzjoni ta’ dazji kontra d-dumping, il-volumi u l-prezzijiet tas-sodium gluconate niexef mibjugħa mill-IU jiżdiedu u dan konsegwentement jippermetti lill-IU biex tilħaq livell aċċettabbli ta’ profittabilità.

(99)

Jitqies li l-impożizzjoni tal-miżuri għandha terġa’ ġġib il-kompetizzjoni ġusta fis-suq. Għandu jiġi nnotat li t-tnaqqis fil-profitti tal-IU hija r-riżultat tad-diffikultà li għandha biex tikkompeti mal-importazzjonijiet li kienu l-oġġett ta’ dumping, bi prezzijiet baxxi li joriġinaw miċ-Ċina. L-impożizzjoni ta’ miżuri antidumping probabbilment tqiegħed lill-IU fil-pożizzjoni li tikseb mill-ġdid għallinqas parti mis-sehem mis-suq mitluf tagħha b’impatt pożittiv konsegwenti fuq il-profittabilità.

(100)

Jekk ma jkunux imposti miżuri, huwa probabbli li s-sitwazzjoni tal-IU tkompli tiddeterjora. L-effett dipressiv tal-prezz tal-importazzjonijiet iddampjati se jkompli jġib fix-xejn l-isforzi mill-IU, biex terġa’ tilħaq livell suffiċjentement profittabbli. Jekk ma jittieħdux miżuri tkun qed titqiegħed f’riskju l-preżenza tul perjodu twil ta’ żmien tal-IU.

(101)

Fl-aħħarnett, huwa mistenni li l-miżuri jkunu effettivi biex jagħtu lill-industrija tal-Unjoni l-opportunità li tirkupra mid-dumping dannuż li nstab matul l-investigazzjoni.

(102)

Intbagħtu kwestjonarji lil ħames importaturi. Ebda wieħed fosthom ma kkoopera mal-investigazzjoni.

(103)

F’dawn iċ-ċirkustanzi, qed jiġi konkluż provviżorjament li l-effett tal-miżuri kontra d-dumping, jekk ikun hemm, aktarx ma jkollux impatt materjali fuq l-importaturi/kummerċjanti.

(104)

Intbagħtu kwestjonarji lil 23 utent. Madankollu, erba’ utenti biss ikkooperaw fl-investigazzjoni, li fosthom tlieta biss kienu jużaw u jimportaw direttament il-prodott ikkonċernat miċ-Ċina. L-importazzjonijiet diretti ta’ dawn it-tliet utenti li kkooperaw ammontaw għal 10 % tal-importazzjonijiet totali tas-sodium gluconate niexef miċ-Ċina matul il-PI. Ir-raba' utent li kkoopera ma kienx qed juża l-prodott ikkonċernat importat miċ-Ċina.

(105)

Dawn l-erba’ utenti, li jinsabu fil-Ġermanja, fi Franza u fir-Renju Unit, huma attivi fl-industrija tal-kimiċi, u jipproduċu varjetà estensiva ta' prodotti, li xi wħud minnhom jużaw is-sodium gluconate bħala materja prima. Bħala medja, is-sodium gluconate ma jirrappreżentax parti sinifikanti mill-ispiża tal-input. B’mod ġenerali, l-effett massimu tad-dazju kontra d-dumping propost, bis-suppożizzjoni li ż-żidiet fil-prezz ma jistgħux jingħaddu lill-konsumatur finali, ġie stmat bħala baxx ħafna. Għandu jiġi nnutat ukoll li l-valur ta' bejgħ ta' dawn il-kumpaniji għall-prodotti li jużaw is-sodium gluconate kien ta' inqas minn 5 % tal-valur ta' bejgħ totali tagħhom.

(106)

Fid-dawl ta’ dan t'hawn fuq, qed jiġi provviżorjament konkluż li, fuq il-bażi tal-informazzjoni pprovduta, l-effett tal-miżuri kontra d-dumping, jekk kien hemm, probabbilment mhux se jkollu impatt materjali fuq l-utenti.

(107)

Meta jitqies dak li ngħad hawn fuq, qed jiġi provviżorjament konkluż li f’dan il-każ mhemm ebda raġuni konvinċenti kontra l-impożizzjoni ta’ dazji antidumping.

(108)

Fid-dawl tal-konklużjonijiet li ntlaћqu dwar id-dumping, id-dannu li rriżulta, il-kawża u l-interess tal-Unjoni, gћandhom jiġu imposti miżuri provviżorji sabiex jiġi evitat dannu ulterjuri lill-industrija tal-Unjoni mill-importazzjonijiet li huma l-oġġett ta' dumping.

(109)

Bl-iskop li jiġi ddeterminat il-livell ta' dawn il-miżuri, kienu kkunsidrati l-marġini ta' dumping li nstabu u l-ammont ta' dazju neċessarju biex ikun eliminat id-dannu sostnut mill-IU.

(110)

Meta ġie kkalkulat l-ammont ta’ dazju meħtieġ biex jitneħħew l-effetti tad-dumping li jagħmel dannu, tqies li kwalunkwe miżura li tittieħed għandha tippermetti lill-IU tkopri l-ispejjeż tal-produzzjoni tagħha u tikseb qligħ qabel it-taxxa li jista’ jinkiseb b’mod raġonevoli minn industrija ta’ dan it-tip fis-settur f’kundizzjonijiet normali ta’ kompetizzjoni, jiġifieri fin-nuqqas ta’ importazzjonijiet li kienu l-oġġett ta' dumping, fuq il-bejgħ tal-prodott simili fl-Unjoni. Il-marġini tal-profitt qabel it-taxxa mitlub mill-kwerelant tqies bħala raġjonevoli u ntuża għal dan il-għan.

(111)

Fuq din il-bażi, kien ikkalkulat prezz mhux ta’ ħsara għall-IU għall-prodott simili. Il-prezz li ma jagħmilx ħsara nkiseb billi ġie magħdud il-marġini ta' qligħ imsemmi hawn fuq mal-ispiża tal-produzzjoni.

(112)

Iż-żieda meħtieġa fil-prezz kienet imbagħad determinata fuq il-bażi ta’ tqabbil bejn il-prezz medju aġġustat b'piż differenzjat tal-importazzjonijiet, kif kien stabbilit għall-kalkoli tat-traħħis fil-prezz, mal-prezz medju differenzjat li ma jagħmilx ħsara lill-prodotti mibjugħa mill-IU fis-suq tal-Unjoni. Kull differenza li tirriżulta minn dan it-tqabbil ġiet imbagħad espressa bħala perċentwali tal-valur CIF totali tal-importazzjoni.

(113)

Fir-rigward tal-kalkolu tal-livell tat-tneħħija tad-dannu mal-pajjiż kollu gћall-produtturi kollha fiċ-Ċina li jesportaw, ta' min ifakkar li l-livell ta' kooperazzjoni kien baxx. Għaldaqstant dan il-marġini dannuż ġie kkalkulat abbażi tad-dejta mingħand il-kwerelant aġġornata għall-PI.

(114)

Fid-dawl ta’ dak ta' hawn fuq, huwa meqjus li skont l-Artikolu 7(2) tar-Regolament bażiku, il-miżuri antidumping provviżorji għandhom jiġu imposti fuq l-importazzjonijiet li joriġinaw miċ-Ċina fuq il-livell tal-anqas mill-marġini tad-dumping u mill-marġini tad-dannu, skont ir-regola ta’ inqas dazju.

(115)

Id-dazji antidumping proposti huma dawn li ġejjin:

(116)

Ir-rati ta’ dazju antidumping ta’ kumpanija individwali li ġew speċifikati f’dan ir-Regolament kienu stabbiliti fuq il-bażi tas-sejbiet ta’ din l-investigazzjoni. Gћalhekk, jirriflettu l-qagħda misjuba matul din l-investigazzjoni fir-rigward ta’ dawn il-kumpaniji. Dawn ir-rati ta' dazju (għall-kuntrarju tad-dazju madwar il-pajjiż kollu applikabbli għall-“kumpaniji l-oħra kollha”) huma għalhekk applikabbli esklussivament għal importazzjonijiet ta' prodotti li joriġinaw mill-pajjiż ikkonċernat u prodotti mill-kumpaniji u għalhekk mill-entitajiet ġuridiċi speċifiċi msemmija. Il-prodotti importati prodotti minn kwalunkwe kumpanija oħra mhux imsemmija speċifikament fil-parti operattiva ta' dan ir-Regolament bl-isem u bl-indirizz tagħha, inklużi l-entitajiet relatati ma' dawk imsemmija speċifikament, ma jistgħux jibbenefikaw minn dawn ir-rati u għandhom ikunu soġġetti għar-rata tad-dazju applikabbli għall-“kumpaniji l-oħra kollha”.

(117)

Kull talba għall-applikazzjoni ta’ dawn ir-rati ta’ dazju ta’ antidumping ta’ kumpaniji individwali (pereżempju wara tibdil fl-isem tal-entità jew wara l-istabbiliment ta’ entitajiet ġodda tal-produzzjoni jew tal-bejgħ) għandha tiġi indirizzata minnufih lill-Kummissjoni (3) bl-informazzjoni rilevanti kollha, b’mod partikolari fir-rigward ta’ kull modifika fl-attivitajiet tal-kumpanija li għandhom x’jaqsmu mal-produzzjoni, mal-bejgħ domestiku u mal-esportazzjoni li jkunu assoċjati, pereżempju, ma’ bidla fl-isem jew ma’ bidla fl-entitajiet tal-produzzjoni u tal-bejgħ. Jekk ikun xieraq, ir-Regolament jiġi emendat skont dan billi tiġi aġġornata l-lista ta’ kumpaniji li jibbenefikaw minn rati ta’ dazju individwali.

(118)

Sabiex jiġi żgurat infurzar xieraq tad-dazju antidumping, il-livell ta’ dazju li jibqa’ ma għandux japplika biss għall-produtturi esportaturi li ma kkooperawx, iżda wkoll għal dawk il-produtturi li ma kellhomx esportazzjonijiet lejn l-Unjoni matul il-PI.

(119)

Sabiex jitnaqqsu kemm jista’ jkun ir-riskji ta’ ċirkonvenzjoni minħabba d-differenza għolja fir-rati tad-dazju, huwa meqjus li jinħtieġu miżuri speċjali f’dan il-każ biex jiżguraw l-applikazzjoni xierqa tad-dazji kontra d-dumping. Dawn il-miżuri speċjali jinkludu dan li ġej:

(120)

Il-preżentazzjoni lill-awtoritajiet doganali tal-Istati Membri ta’ fattura kummerċjali valida li tkun konformi mar-rekwiżiti stipulati fl-Anness ta’ dan ir-Regolament. L-importazzjonijiet li ma jkunux akkumpanjati minn din il-fattura għandhom ikunu soġġetti għad-dazju residwu ta’ antidumping applikabbli għall-esportaturi l-oħra kollha.

(121)

Jekk l-esportazzjonijiet mill-kumpaniji li jibbenefikaw minn rati aktar baxxi ta’ dazju individwali jiżdiedu b’mod sinifikanti fil-volum wara l-impożizzjoni tal-miżuri kkonċernati, din iż-żieda fil-volum tista’ titqies bћala waħda li tikkostitwixxi fiha nnifisha bidla fil-mudell ta’ kummerċ dovuta għall-impożizzjoni ta’ miżuri skont it-tifsira tal-Artikolu 13(1) tar-Regolament bażiku. F’dawn iċ-ċirkustanzi, u sakemm jintlaħqu l-kundizzjonijiet, jista’ jingħata bidu għal investigazzjoni kontra l-qerq. Din l-investigazzjoni tista’, fost l-oħrajn, teżamina l-ћtieġa għat-tneћћija tar-rati tad-dazju individwali u għall-impożizzjoni konsegwenti tad-dazju għall-pajjiż kollu.

(122)

Fl-interessi ta’ amministrazzjoni tajba, gћandu jiġi ffissat perjodu li fih il-partijiet interessati li ppreżentaw ruħom fil-limitu ta' żmien speċifikat fl-avviż tal-bidu jkunu jistgћu jagћtu l-opinjonijiet tagћhom bil-miktub u jitolbu smigћ. Barra minn hekk, irid jiġi ddikjarat li s-sejbiet dwar l-impożizzjoni ta’ dazji antidumping magћmula gћall-għanijiet ta’ dan ir-Regolament huma provviżorji u jistgћu jitqiesu mill-ġdid gћall-gћan ta' kwalunkwe dazju definittiv,