32009R0495

This document is an excerpt from the EUR-Lex website

EUROPA
EUR-Lex home
Regolament - 495/2009 - EN - EUR-Lex

Help

Search tips

Need more search options? Use the Advanced search

Document 32009R0495

Help

Regolament tal-Kummissjoni (KE) Nru 495/2009 tat- 3 ta’ Ġunju 2009 li jemenda r-Regolament (KE) Nru 1126/2008 li jadotta ċerti standards internazzjonali tal-kontabilità skont ir-Regolament (KE) Nru 1606/2002 tal-Parlament Ewropew u tal-Kunsill rigward l-Istandard Internazzjonali ta’ Rappurtar Finanzjarju (IFRS) 3 (Test b’relevanza għaż-ŻEE )

ĠU L 149, 12.6.2009, pp. 22–59 (BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)

(HR)
⏵Dan id-dokument ġie ppubblikat f’edizzjoni(jiet) speċjali (HR)
Edizzjoni speċjali bil-Kroat: Kapitolu 13 Volum 059 P. 52 - 89

Legal status of the document No longer in force, Date of end of validity: 15/10/2023; Impliċitament imħassar minn 32023R1803

ELI: http://data.europa.eu/eli/reg/2009/495/oj

HTML

PDF

Official Journal

12.6.2009

Il-Ġurnal Uffiċjali tal-Unjoni Ewropea

L 149/22

REGOLAMENT TAL-KUMMISSJONI (KE) Nru 495/2009

tat-3 ta’ Ġunju 2009

li jemenda r-Regolament (KE) Nru 1126/2008 li jadotta ċerti standards internazzjonali tal-kontabilità skont ir-Regolament (KE) Nru 1606/2002 tal-Parlament Ewropew u tal-Kunsill rigward l-Istandard Internazzjonali ta’ Rappurtar Finanzjarju (IFRS) 3

(Test b’relevanza għaż-ŻEE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament (KE) Nru 1606/2002 tal-Parlament Ewropew u tal-Kunsill tad-19 ta’ Lulju 2002 dwar l-applikazzjoni ta’ standards internazzjonali tal-kontabilità (1), u b’mod partikolari l-Artikolu 3(1) tiegħu,

Billi:

(1)	Permezz tar-Regolament tal-Kummissjoni (KE) Nru 1126/2008 (2) ġew adottati ċerti standards internazzjonali u interpretazzjonijiet li kienu fis-seħħ fil-15 ta’ Ottubru 2008.

(2)

Fl-10 ta’ Jannar 2008, il-Bord għall-Istandards Internazzjonali tal-Kontabilità (IASB) ippubblika Standard Internazzjonali ta’ Rappurtar Finanzjarju’l (IFRS) 3 (Rivedut) Kombinamenti ta’ Negozji, minn issa l quddiem imsejjaħ ‘IFRS 3 rivedut’. L-IFRS3 rivedut jistabbilixxi prinċipji u regoli dwar kif akkwirent f’kombinament ta’ negozji għandu jirrikonoxxi u jkejjel fil-kotba tiegħu l-elementi differenti (bħal assi identifikabbli, obbligazzjonijiet preżunti, interess mhux ta’ kontroll u avvjament) marbuta mat-trattament tal-kontabbiltà tat-tranżazzjoni tal-akkwiżizzjoni. Jiddetermina wkoll l-informazzjoni li trid tiġi żvelata dwar tali tranżazzjonijiet.

(3)

Il-konsultazzjoni mal-Grupp ta’ Esperti Tekniċi (TEG) tal-Grupp Konsultattiv Ewropew għar-Rappurtar Finanzjarju (EFRAG) tikkonferma li l-IFRS 3 rivedut jissodisfa l-kriterji tekniċi għall-adozzjoni kif stipulat fl-Artikolu 3(2) tar-Regolament (KE) Nru 1606/2002. F’konformità mad-Deċiżjoni tal-Kummissjoni (KE) Nru 505/2006 tal-14 ta’ Lulju 2006 li tistabbilixxi Grupp ta’ Reviżjoni tal-Konsulenza dwar Normi [Grupp Konsultattiv dwar ir-Reviżjoni tal-Istandards] fil-qasam tal-kontabilità biex jagħti parir lill-Kummissjoni dwar l-oġġettività u n-newtalità tal-opinjonijiet tal-Grupp Konsultattiv Ewropew għall-Informazzjoni Finanzjarja [dwar ir-Rappurtar Finanzjarju] (EFRAG) (3), il-Grupp Konsultattiv dwar ir-Reviżjoni tal-Istandards qies l-opinjoni tal-EFRAG dwar l-adozzjoni u lill-Kummissjoni taha l-parir li din hija bbilanċata kif xieraq u oġġettiva.

(4)

L-adozzjoni tal-IFRS 3 rivedut timplika, bħala konsegwenza, emendi għall-IFRS 1, l-IFRS 2, l-IFRS 7, l-Istandard Internazzjonali tal-Kontabbiltà (IAS) 12, l-IAS 16, l-IAS 284, l-IAS 32, l-IAS 33, l-IAS 34, l-IAS 36, l-IAS 36, l-IAS 38, l-IAS 39 u l-Interpretazzjoni 9 tal-Kumitat Permanenti dwar l-Interpretazzjonijiet (IFRIC) sabiex tiġi żgurata l-konsistenza bejn l-istandards internazzjonali tal-kontabilità.

(5)	Għalhekk ir-Regolament (KE) Nru 1126/2008 għandu jiġi emendat skont dan.

(6)	Il-miżuri stipulati f’dan ir-Regolament huma skont l-opinjoni tal-Kumitat Regolatorju dwar il-Kontabilità,

ADOTTAT DAN IR-REGOLAMENT:

Artikolu 1

L-Anness għar-Regolament (KE) Nru 1126/2008 huwa emendat kif ġej:

(1)	L-Istandard Internazzjonali tar-Rappurtar Finanzjarju (IFRS) 3 Kombinamenti ta’ Negozji tbiddel bl-IFRS 3 rivedut kif stipulat fl-Anness għal dan ir-Regolament;

(2)

L-IFRS 1, l-IFRS 2, l-IFRS 7, l-Istandard Internazzjonali tal-Kontabbiltà (IAS) 12, l-IAS 16, l-IAS 28, l-IAS 32, l-IAS 33, l-IAS 34, l-IAS 36, l-IAS 37, l-IAS 38, l-IAS 39 u l-Interpretazzjoni 9 tal-Kumitat Permanenti dwar l-Interpretazzjonijiet (IFRIC) huma emendati skont l-emendi għall-IFRS 3 kif stipulat fl-Anness għal dan ir-Regolament.

Artikolu 2

Kull kumpanija għandha tapplika l-IFRS 3 rivedut, kif stipulat fl-Anness għal dan ir-Regolament, mhux aktar tard, mid-data tal-bidu tal-ewwel sena finanzjarja li tibda wara t-30 ta’ Ġunju 2009.

Artikolu 3

Dan ir-Regolament għandu jidħol fis-seħħ fit-tielet jum wara l-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussel, 3 ta’ Ġunju 2009

Għall-Kummissjoni

Charlie McCREEVY

Membru tal-Kummissjoni

(1) ĠU L 243, 11.9.2002, p. 1.

(2) ĠU L 320, 29.11.2008, p. 1

(3) ĠU L 199, 21.7.2006, p. 33.

ANNESS

STANDARDS INTERNAZZJONALI TAL-KONTABILITÀ

IFRS 3

Kombinamenti ta’ Negozji

Riproduzzjoni permessa fiż-Żona Ekonomika Ewropea. Id-drittijiet kollha eżistenti huma riżervati barra ż-ŻEE, bl-eċċezzjoni tad-dritt ta’ kkupjar għall-użu personali jew għal skopijiet oħra ta’ kummerċ ġust. Aktar tagħrif jista’ jinkiseb mill-IASB fuq l-Internet www.iasb.org

STANDARD INTERNAZZJONALI TA’ RAPPURTAĠĠ FINANZJARJU 3

Kombinamenti ta’ Negozji:

GĦAN

L-għan ta’ dan l-IFRS huwa li jtejjeb ir-relevanza, l-affidabbiltà u l-kumparabbiltà tal-informazzjoni li entità li tirrapporta għandha tipprovdi fir-rapporti finanzjarji tagħha dwar kombinament ta’ negozji u l-effetti tiegħu. Sabiex dan jinkiseb, dan l-IFRS jistabbilixxi prinċipji u rekwiżiti dwar kif l-akkwirent għandu:

(a)	jirrikonoxxi u jkejjel fir-rapporti finanzjarji tiegħu l-assi identifikabbli akkwistati, l-obbligazzjonijiet merfugħa u kull interess li ma jagħtix kontroll fl-akkwiżit;

(b)	jirrikonoxxi u jkejjel l-avvjament akkwistat fil-kombinament ta’ negozji jew qligħ minn xiri bl-irħis; u

(ċ)	jiddetermina liema informazzjoni għandha tiġi żvelata sabiex l-utenti tar-rapporti finanzjarji jkunu jistgħu jevalwaw in-natura u l-effetti finanzjarji tal-kombinament ta’ negozji.

AMBITU

Dan l-IFRS japplika għal tranżazzjoni jew avveniment ieħor li jissodisfa d-definizzjoni ta’ kombinament ta’ negozji. Dan l-IFRS ma japplikax għal:

(a)	il-formazzjoni ta’ impriża konġunta.

(b)

l-akkwiżizzjoni ta’ assi jew grupp ta’ assi li ma jikkostitwixxux negozju. F’każijiet bħal dawn l-akkwirent għandu jidentifika u jirrikonoxxi l-assi individwali identifikabbli akkwistati (inklużi dawk l-assi li jissodisfaw id-definizzjoni ta’ assi intanġibbli, u l-kriterji ta’ rikonoxximent għalihom, fl-IAS 38 Assi Intanġibbli) u l-obbligazzjonijiet merfugħa. Il-kost tal-grupp għandu jiġi allokat lill-assi u l-obbligazzjonijiet individwali identifikabbli fuq il-bażi tal-valuri ġusti relattivi tagħhom fid-data tax-xiri. Tali tranżazzjoni jew avveniment ma jagħtux lok għal avvjament.

(ċ)	kombinament ta’ entitajiet jew negozji taħt kontroll komuni (il-paragrafi B1–B4 jipprovdu gwida dwar l-applikazzjoni relatata).

IDENTIFIKAZZJONI TA’ KOMBINAMENT TA’ NEGOZJI

Entità għandha tiddetermina jekk tranżazzjoni jew avveniment ieħor huwiex kombinament ta’ negozji billi tapplika d-definizzjoni f’dan l-IFRS, li teħtieġ li l-assi akkwistati u l-obbligazzjonijiet merfugħa jikkostitwixxu negozju. Jekk l-assi akkwistati mhumiex negozju, l-entità li tirrapporta għandha tikkontabilizza t-tranżazzjoni jew l-avveniment l-ieħor bħala akkwiżizzjoni ta’ assi. Il-paragrafi B5–B12 jipprovdu gwida dwar l-identifikazzjoni ta’ kombinament ta’ negozji u d-definizzjoni ta’ negozju.

IL-METODU TAL-AKKWIŻIZZJONI

Entità għandha tikkontabilizza kull kombinament ta’ negozji billi tapplika l-metodu tal-akkwiżizzjoni.

L-applikazzjoni tal-metodu tal-akkwiżizzjoni teħtieġ:

(a)	l-identifikazzjoni tal-akkwirent;

(b)	li tiġi stabbilita d-data tal-akkwiżizzjoni.

(ċ)	ir-rikonoxximent u l-kejl tal-assi identifikabbli akkwistati, l-obbligazzjonijiet merfugħa u kull interess li ma jagħtix kontroll fl-akkwiżit; u

(d)	ir-rikonoxximent u l-kejl ta’ avvjament jew qligħ minn xiri bl-irħis.

Identifikazzjoni tal-akkwirent

Għal kull kombinament ta’ negozji, waħda mill-entitajiet fil-kombinament għandha tiġi identifikata bħala l-akkwirent.

Il-gwida fl-IAS 27 Rapporti Finanzjarji Konsolidati u Separati għandha tintuża sabiex jiġi identifikat l-akkwirent—l-entità li tikseb kontroll tal-akkwiżit. Jekk ikun seħħ kombinament ta’ negozji iżda l-applikazzjoni tal-gwida fl-IAS 27 ma tindikax b’mod ċar liema waħda mill-entitajiet fil-kombinament hija l-akkwirent, il-fatturi fil-paragrafi B14–B18 għandhom jiġu kkunsidrati sabiex jiġi ddeterminat dak il-punt.

L-identifikazzjoni tad-data tal-akkwiżizzjoni

L-akkwirent għandu jidentifika d-data tal-akkwiżizzjoni, li hi d-data li fiha l-akkwirent jikseb kontroll ta’ akkwiżit.

Id-data meta l-akkwirent jikseb kontroll tal-akkwiżit hija ġeneralment id-data meta l-akkwirent jittrasfrixxi legalment il-kumpens, jakkwista l-assi u jassumi l-obbligazzjonijiet tal-akkwiżit—id-data tal-għeluq. Madankollu, l-akkwirent jista’ jikseb kontroll f’data li tkun qabel jew wara d-data tal-għeluq. Pereżempju, id-data tal-akkwiżizzjoni tiġi qabel id-data tal-għeluq jekk ftehim bil-miktub ikun jipprovdi li l-akkwirent jikseb kontroll tal-akkwiżit f’data qabel id-data tal-għeluq. Akkwirent għandu jikkunsidra l-fatti u ċ-ċirkustanzi pertinenti kollha għall-identifikazzjoni tad-data tal-akkwiżizzjoni.

Rikonoxximent u kejl ta’ assi identifikabbli akkwistati, ta’ obbligazzjonijiet merfugħa u ta’ kull interess li ma jagħtix kontroll fl-akkwiżit

Prinċipju ta’ rikonoxximent

10.

Sa mid-data tal-akkwiżizzjoni, l-akkwirent għandu jirrikonoxxi, separatament mill-avvjament, l-assi identifikabbli akkwistati, l-obbligazzjonijiet merfugħa u kull interess li ma jagħtix kontroll fl-akkwiżit. Ir-rikonoxximent tal-assi identifikabbli akkwistati u tal-obbligazzjonijiet merfugħa huwa soġġett għall-kundizzjonijiet speċifikati fil-paragrafi 11 u 12.

Kundizzjonijiet tar-rikonoxximent

11.

Biex jikkwalifikaw għar-rikonoxximent bħala parti mill-applikazzjoni tal-metodu tal-akkwiżizzjoni, l-assi identifikabbli akkwistati u l-obbligazzjonijiet merfugħa jissodisfaw id-definizzjonijiet ta’ assi u obbligazzjonijiet fil-Qafas għat-Tħejjija u l-Preżentazzjoni ta’ Rapporti Finanzjarji fid-data tal-akkwiżizzjoni. Pereżempju, kosti li l-akkwirent jistenna iżda mhuwiex obbligat li jġarrab fil-futur biex jaffettwa l-pjan tiegħu biex joħroġ minn attività tal-akkwiżit jew biex jittermina l-impjieg jew jagħmel rilokazzjoni tal-impjegati tal-akkwiżit mhumiex obbligazzjonijiet fid-data tal-akkwiżizzjoni. Għalhekk, l-akkwirent ma jirrikonoxxix dawk il-kosti bħala parti mill-applikazzjoni tal-metodu tal-akkwiżizzjoni. Minflok, l-akkwirent jirrikonoxxi dawk il-kosti fir-rapporti finanzjarji ta’ wara l-kombinament skont IFRSs oħrajn.

12.

Barra minn hekk, biex jikkwalifikaw għar-rikonoxximent bħala parti mill-applikazzjoni tal-metodu tal-akkwiżizzjoni, l-assi identifikabbli akkwistati u l-obbligazzjonijiet merfugħa jridu jkunu parti minn dak li l-akkwirent u l-akkwiżit (jew dawk li qabel kienu s-sidien tiegħu) ikunu partu fit-tranżazzjoni tal-kombinament ta’ negozji aktar milli r-riżultat ta’ tranżazzjonijiet separati. L-akkwirent għandu japplika l-gwida fil-paragrafi 51–53 biex jiddetermina liema assi akkwistati jew obbligazzjonijiet merfugħa huma parti mill-iskambju għall-akkwiżit u liema, jekk ikun hemm, huma r-riżultat ta’ tranżazzjonijiet separati li għandhom jitniżżlu fil-kontijiet skont in-natura tagħhom u l-IFRSs applikabbli.

13.

L-applikazzjoni mill-akkwirent tal-prinċipju u l-kundizzjonijiet tar-rikonoxximent jistgħu jirriżultaw fir-rikonoxximent ta’ xi assi u obbligazzjonijiet li l-akkwiżit ma kienx irrikonoxxa qabel bħala assi u obbligazzjonijiet fir-rapporti finanzjarji tiegħu. Pereżempju, l-akkwirent jirrikonoxxi l-assi intanġibbli akkwistati li huma identifikabbli, bħall-isem tad-ditta, privattiva jew relazzjoni ma’ klijent, li l-akkwiżit ma rrikonoxxiex bħala assi fir-rapporti finanzjarji tiegħu peress li żviluppahom internament u ddebita l-kosti relatati bħala spiża.

14.

Il-paragrafi B28–B40 jipprovdu gwida dwar ir-rikonoxximent ta’ kiri operattiv u assi intanġibbli. Il-paragrafi 22–28 jispeċifikaw it-tipi ta’ assi u obbligazzjonijiet identifikabbli li jinkludu uħud li għalihom dan l-IFRS jipprovdi eċċezzjonijiet limitati għall-prinċipju u l-kundizzjonijiet tar-rikonoxximent.

Klassifikazzjoni jew speċifikazzjoni ta’ assi akkwistati u obbligazzjonijiet merfugħa li jkunu identifikabbli b’kombinament ta’ negozji

15.

Fid-data tal-akkwiżizzjoni, l-akkwirent għandu jikklassifika jew jispeċifika l-assi akkwistati u l-obbligazzjonijiet merfugħa li jkunu identifikabbli skont kif ikun meħtieġ sabiex jiġu applikati IFRSs oħrajn sussegwentement. L-akkwirent għandu jagħmel dawk il-klassifikazzjonijiet jew speċifikazzjonijiet fuq il-bażi tat-termini kuntrattwali, il-kundizzjonijiet ekonomiċi, il-politika tiegħu tal-operat u tal-kontabilità u kundizzjonijiet pertinenti oħrajn skont kif ikunu jeżistu fid-data tal-akkwiżizzjoni.

16.

F’xi sitwazzjonijiet, l-IFRSs jipprovdu għal kontabilità differenti skont kif entità tikklassifika jew tispeċifika assi jew obbligazzjoni partikolari. Eżempji ta’ klassifikazzjonijiet jew speċifikazzjonijiet li l-akkwirent għandu jagħmel fuq il-bażi tal-kundizzjonijiet pertinenti hekk kif jeżistu fid-data tal-akkwiżizzjoni jinkludu iżda mhumiex limitati għal:

(a)	klassifikazzjoni ta’ assi u obbligazzjonijiet finanzjarji partikolari bħala assi jew obbligazzjoni finanzjarja b’valur ġust permezz tal-profitt jew telf, jew bħala assi finanzjarju disponibbli għall-bejgħ jew miżmum sal-maturità skont l-IAS 39 Strumenti Finanzjarji: Rikonoxximent u Kejl;

(b)	speċifikazzjoni ta’ strument derivat bħala strument ta’ hedging skont l-IAS 39; u

(ċ)	evalwazzjoni dwar jekk derivat imdeffes għandux jiġi sseparat mill-kuntratt li jospitah, skont l-IAS 39, (li hija kwistjoni ta’ “klassifikazzjoni” peress li dan l-IFRS juża dak it-terminu).

17.

Dan l-IFRS jipprovdi żewġ eċċezzjonijiet għall-prinċipju fil-paragrafu 15:

(a)	klassifikazzjoni ta’ kuntratt ta’ kiri jew bħala kiri operattiv jew kiri finanzjarju skont l-IAS 17 Kuntratti ta’ Kiri; u

(b)	klassifikazzjoni ta’ kuntratt bħala kuntratt ta’ assigurazzjoni skont l-IFRS 4 Kuntratti tal-Assigurazzjoni.

L-akkwirent għandu jikklassifika dawk il-kuntratti fuq il-bażi tat-termini kuntrattwali u fatturi oħrajn fil-bidu tal-kuntratt (jew, jekk it-termini tal-kuntratt ikunu ġew immodifikati b’mod li jbiddel il-klassifikazzjoni tiegħu, fid-data tal-modifika, li tista’ tkun id-data tal-akkwiżizzjoni).

Prinċipju tal-kejl

18.

L-akkwirent għandu jkejjel l-assi identifikabbli akkwistati u l-obbligazzjonijiet merfugħa bil-valuri ġusti tagħhom fid-data tal-akkwiżizzjoni.

19.

Għal kull kombinament ta’ negozji, l-akkwirent għandu jkejjel kull interess li ma jagħtix kontroll fl-akkwiżit jew skont il-valur ġust jew skont is-sehem proporzjonat tal-interess li ma jagħtix kontroll mill-assi netti identifikabbli tal-akkwiżit.

20.

Il-paragrafi B41–B45 jipprovdu gwida dwar il-kejl tal-valur ġust ta’ assi partikolari identifikabbli u ta’ interess li ma jagħtix kontroll f’akkwiżit. Il-paragrafi 24-31 jispeċifikaw it-tipi ta’ assi u obbligazzjonijiet identifikabbli li jinkludu uħud li għalihom dan l-IFRS jipprovdi eċċezzjonijiet limitati għall-prinċipju tal-kejl.

Eċċezzjonijiet għall-prinċipji tar-rikonoxximent u tal-kejl

21.

Dan l-IFRS jipprovdi eċċezzjonijiet limitati għall-prinċipji tar-rikonoxximent u tal-kejl. Il-paragrafi 22–31 jispeċifikaw kemm l-entrati partikolari li għalihom huma pprovduti eċċezzjonijiet kif ukoll in-natura ta’ dawk l-eċċezzjonijiet. L-akkwirent għandu jikkontabilizza dawk l-entrati billi japplika r-rekwiżiti fil-paragrafi 22–31, li b’riżultat tagħhom xi entrati jkunu:

(a)	rikonoxxuti jew billi jiġu applikati l-kundizzjonijiet ta’ rikonoxximent flimkien ma’ dawk fil-paragrafi 11 u 12 jew billi jiġu applikati r-rekwiżiti ta’ IFRSs oħrajn, b’riżultati li jvarjaw mill-applikazzjoni tal-prinċipju u l-kundizzjonijiet tar-rikonoxximent.

(b)	mkejla b’ammont differenti mill-valuri ġusti tagħhom fid-data tal-akkwiżizzjoni.

Eċċezzjoni għall-prinċipju tar-rikonoxximent

Obbligazzjonijiet kontinġenti

22.

L-IAS 37 Provvedimenti, Obbligazzjonijiet Kontinġenti u Assi Kontinġenti jiddefinixxi obbligazzjoni kontinġenti bħala:

(a)	obbligazzjoni possibbli li toriġina minn avvenimenti li seħħew fil-passat u li l-eżistenza taghħa ser tkun ikkonfermata biss bl-okkorrenza jew bin-nuqqas ta’ okkorrenza ta’ avveniment jew avvenimenti inċerti fil-futur, li mhumiex għal kollox taħt il-kontroll tal-entità; jew

(b)

obbligazzjoni preżenti li toriġina minn avvenimenti li seħħew fil-passat iżda mhux rikonoxxuta għax:

(i)	mhuwiex probabbli li l-ħruġ ta’ riżorsi li jirrappreżentaw benefiċċji ekonomiċi ser ikun meħtieġ biex titħallas l-obbligazzjoni; jew

(ii)	l-ammont tal-obbligazzjoni ma jistax jitkejjel b’mod affidabbli biżżejjed.

23.

Ir-rekwiżiti fl-IAS 37 ma japplikawx għall-finijiet biex jiġi ddeterminat liema obbligazzjonijiet kontinġenti għandhom jiġu rikonoxxuti sa mid-data tal-akkwiżizzjoni. Minflok, l-akkwirent għandu jirrikonoxxi sa mid-data tal-akkwiżizzjoni obbligazzjoni kontinġenti li jkun ħa fuqu f’kombinament ta’ negozji jekk tkun obbligazzjoni preżenti li tirriżulta minn avvenimenti fil-passat u l-valur ġust tagħha jista’ jitkejjel b’mod affidabbli. Għalhekk, għall-kuntrarju tal-IAS 37, l-akkwirent jirrikonoxxi obbligazzjoni kontinġenti li jkun ħa fuqu f’kombinament ta’ negozji fid-data tal-akkwiżizzjoni anki jekk ma jkunx probabbli li ser ikun meħtieġ ħruġ ta’ riżorsi li jirrappreżentaw benefiċċji ekonomiċi biex titħallas l-obbligazzjoni. Il-paragrafu 56 jagħti gwida dwar il-kontabilità sussegwenti għall-obbligazzjonijiet kontinġenti.

Eċċezzjonijiet għaż-żewġ prinċipji tar-rikonoxximent u tal-kejl

Taxxi fuq id-dħul

24.

L-akkwirent għandu jirrikonoxxi u jkejjel assi jew obbligazzjoni ta’ taxxa differita li tirriżulta mill-assi akkwistati u l-obbligazzjonijiet merfugħa f’kombinament ta’ negozji skont l-IAS 12 Taxxi fuq id-Dħul.

25.

L-akkwirent għandu jikkontabilizza l-effetti potenzjali għat-taxxa ta’ differenzi temporanji u ammonti mtella’ ta’ akkwiżit li jkunu jeżistu fid-data tal-akkwiżizzjoni jew li jirriżultaw bħala riżultat tal-akkwiżizzjoni skont l-IAS 12.

Benefiċċji tal-Impjegati

26.

L-akkwirent għandu jirrikonoxxi u jkejjel obbligazzjoni (jew assi, jekk ikun hemm) relatata mal-arranġamenti ta’ benefiċċji tal-impjegati tal-akkwiżit skont l-IAS 19 Benefiċċji tal-Impjegati.

Assi ta’ indennizz

27.

Il-bejjiegħ f’kombinament ta’ negozji jista’ jindennizza kuntrattwalment lill-akkwirent għall-eżitu ta’ kontinġenza jew inċertezza relatata ma’ assi jew obbligazzjoni speċifika kollha jew parti minnha. Pereżempju, il-bejjiegħ jista’ jindennizza lill-akkwirent kontra telf ‘il fuq minn ammont speċifikat fuq obbligazzjoni li tirriżulta minn kontinġenza partikolari; fi kliem ieħor, il-bejjiegħ jiggarantixxi li l-obbligazzjoni tal-akkwirent mhux ser taqbeż ammont speċifikat. Bħala riżultat, l-akkwirent jikseb assi ta’ indennizz. L-akkwirent għandu jirrikonoxxi assi ta’ indennizz fl-istess ħin li jirrikonoxxi l-oġġett indennizzat u mkejjel fuq l-istess bażi bħall-oġġett indennizzat, soġġett għall-ħtieġa għal konċessjoni ta’ valutazzjoni għal ammonti li ma jistgħux jinġabru. Għalhekk, jekk l-indennizz ikun relatat ma’ assi jew obbligazzjoni li tkun rikonoxxuta fid-data tal-akkwiżizzjoni u mkejla fil-valur ġust tagħha fid-data tal-akkwiżizzjoni, l-akkwirent għandu jirrikonoxxi l-assi ta’ indennizz fid-data tal-akkwiżizzjoni mkejjel skont il-valur ġust tiegħu fid-data tal-akkwiżizzjoni. Għal assi ta’ indennizz imkejjel skont il-valur ġust, l-effetti tal-inċertezza dwar flussi futuri ta’ flus minħabba kunsiderazzjonijiet dwar jekk jistgħux jinġabru huma inklużi fil-kejl tal-valur ġust u konċessjoni separata ta’ valutazzjoni mhijiex neċessarja (il-paragrafu B41 jipprovdi gwida relatata dwar l-applikazzjoni).

28.

F’xi ċirkustanzi, l-indennizz jista’ jkun relatat ma’ assi jew obbligazzjoni li tkun eċċezzjoni għall-prinċipji tar-rikonoxximent jew tal-kejl. Pereżempju, indennizz jista’ jkun relatat ma’ obbligazzjoni kontinġenti li ma tkunx rikonoxxuta fid-data tal-akkwiżizzjoni minħabba li l-valur ġust tagħha ma jkunx jista’ jitkejjel b’mod affidabbli f’dik id-data. Inkella, indennizz jista’ jkun relatat ma’ assi jew obbligazzjoni, pereżempju, waħda li tirriżulta minn benefiċċju tal-impjegati, li tkun imkejla fuq bażi differenti mill-valur ġust fid-data tal-akkwiżizzjoni. F’dawk iċ-ċirkustanzi, l-assi ta’ indennizz għandu jiġi rikonoxxut u mkejjel permezz ta’ suppożizzjonijiet li jkunu konsistenti ma’ dawk użati għall-kejl tal-oġġett indennizzat, soġġett għall-istima tal-maniġment dwar jekk l-assi tal-indennizz jistax jinġabar u dwar kwalunkwe limitazzjonijiet kuntrattwali fir-rigward tal-ammont indennizzat. Il-paragrafu 57 jagħti gwida dwar il-kontabilità sussegwenti ta’ assi ta’ indennizz.

Eċċezzjonijiet għall-prinċipju tal-kejl

Drittijiet akkwistati mill-ġdid

29.

L-akkwirent għandu jkejjel il-valur ta’ dritt akkwistat mill-ġdid rikonoxxut bħala assi intanġibbli fuq il-bażi tat-terminu kuntrattwali rimanenti tal-kuntratt relatat irrispettivament minn jekk il-parteċipanti fis-suq jikkunsidrawx tiġdid potenzjali tal-kuntratt sabiex jiddeterminaw il-valur ġust tiegħu. Il-paragrafi B35 u B36 jipprovdu gwida relatata dwar l-applikazzjoni.

Premji ta’ pagamenti bbażati fuq l-ishma

30.

L-akkwirent għandu jkejjel obbligazzjoni jew strument azzjonarju relatat mas-sostituzzjoni ta’ premji ta’ pagamenti bbażati fuq l-ishma tal-akkwiżit permezz ta’ premji ta’ pagamenti bbażati fuq l-ishma tal-akkwirent skont il-metodu fl-IFRS 2 Pagament ibbażat fuq l-Ishma. (Dan l-IFRS jirreferi għar-riżultat ta’ dak il-metodu bħala l-“kejl ibbażat fuq is-suq” tal-premju.)

Assi miżmuma għall-bejgħ

31.

L-akkwirent għandu jkejjel assi mhux kurrenti (jew grupp ta’ disponiment) akkwistat li jkun ikklassifikat bħala miżmum għall-bejgħ fid-data tal-akkwiżizzjoni skont l-IFRS 5 Assi Mhux Kurrenti Miżmuma għall-Bejgħ u Operazzjonijiet li ma Tkomplewx skont il-valur ġust wara li jitnaqqsu l-kosti tal-bejgħ skont il-paragrafi 15–18 ta’ dak l-IFRS.

Ir-rikonoxximent u l-kejl ta’ avvjament jew ta’ qligħ minn xiri bl-irħis

32.

L-akkwirent għandu jirrikonoxxi l-avvjament fid-data tal-akkwiżizzjoni mkejjel bħala l-ammont li bih (a) hawn isfel jeċċedi (b):

(a)

it-total ta’:

(i)	il-kumpens ittrasferit imkejjel skont dan l-IFRS, li ġeneralment jeħtieġ valur ġust fid-data tal-akkwiżizzjoni (ara l-paragrafu 37);

(ii)	l-ammont ta’ kull interess li ma jagħtix kontroll fl-akkwiżit imkejjel skont dan l-IFRS; u

(iii)

f’kombinament ta’ negozji mwettaq fi stadji (ara l-paragrafi 41 u 42), il-valur ġust fid-data tal-akkwiżizzjoni tal-interess azzjonarju li l-akkwirent kellu qabel fl-akkwiżit.

(b)	in-nett tal-ammonti fid-data tal-akkwiżizzjoni tal-assi identifikabbli akkwistati u l-obbligazzjonijiet merfugħa mkejla skont dan l-IFRS.

33.

F’kombinament ta’ negozji fejn l-akkwirent u l-akkwiżit (jew dawk li qabel kienu s-sidien tiegħu) ipartu biss interessi azzjonarji, il-valur ġust fid-data tal-akkwiżizzjoni tal-interessi azzjonarji fl-akkwiżit jistgħu jiġu mkejla b’mod aktar affidabbli mill-valur ġust fid-data tal-akkwiżizzjoni tal-interessi azzjonarji fl-akkwirent. Jekk dan ikun il-każ, l-akkwirent għandu jiddetermina l-ammont ta’ avvjament billi juża l-valur ġust fid-data tal-akkwiżizzjoni tal-interessi azzjonarji fl-akkwiżit minflok il-valur ġust fid-data tal-akkwiżizzjoni tal-interessi azzjonarji ttrasferiti. Sabiex jiġi ddeterminat l-ammont ta’ avvjament f’kombinament ta’ negozji fejn ebda ħlas ma jiġi ttrasferit, l-akkwirent għandu juża l-valur ġust fid-data tal-akkwiżizzjoni tal-interess tal-akkwirent fl-akkwiżit ikkalkulat permezz ta’ teknika ta’ valutazzjoni minflok il-valur ġust fid-data tal-akkwiżizzjoni tal-ħlas ittrasferit (il-paragrafu 32(a)(i)). Il-paragrafi B46-B49 jipprovdu gwida relatata dwar l-applikazzjoni.

Xiri bl-irħis

34.

Xi kultant, akkwirent jista’ jagħmel xiri bl-irħis, li huwa kombinament ta’ negozji fejn l-ammont fil-paragrafu 32(b) jaqbeż it-total tal-ammonti speċifikati fil-paragrafu 32(a). Jekk dak l-eċċess jibqa’ wara li jiġu applikati r-rekwiżiti fil-paragrafu 36, l-akkwirent għandu jirrikonoxxi l-qligħ riżultanti fil-profitt jew telf fid-data tal-akkwiżizzjoni. Il-qligħ għandu jiġi attribwit lill-akkwirent.

35.

Xiri bl-irħis jista’ jseħħ, pereżempju, f’kombinament ta’ negozji li jkun bejgħ furzat fejn il-bejjiegħ ikun imġiegħel ibigħ. Madankollu, l-eċċezzjonijiet tar-rikonoxximent jew tal-kejl għal entrati partikolari diskussi fil-paragrafi 22–31 jistgħu jirriżultaw ukoll fir-rikonoxximent ta’ qligħ (jew f’bidla fl-ammont tal-qligħ rikonoxxut) fuq xiri bl-irħis.

36.

Qabel ma jiġi rikonoxxut qligħ fuq xiri bl-irħis, l-akkwirent għandu jevalwa mill-ġdid jekk identifikax b’mod korrett l-assi kollha akkwistati u l-obbligazzjonijiet kollha merfugħa u għandu jirrikonoxxi kwalunkwe assi jew obbligazzjonijiet addizzjonali li huma identifikati f’dik ir-reviżjoni. L-akkwirent imbagħad għandu jirrevedi l-proċeduri użati biex jitkejlu l-ammonti li dan l-IFRS jeħtieġ li jiġu rikonoxxuti fid-data tal-akkwiżizzjoni għal dawn kollha li ġejjin:

(a)	l-assi akkwistati u l-obbligazzjonijiet merfugħa li jkunu identifikabbli;

(b)	l-interess li ma jagħtix kontroll fuq l-akkwiżit, jekk ikun hemm;

(ċ)	għal kombinament ta’ negozji mwettaq fi stadji, l-interess azzjonarju li l-akkwirent kellu qabel fl-akkwiżit; u

(d)	il-ħlas ittrasferit.

L-objettiv tar-reviżjoni hu li jiġi żgurat li l-kejl jirrifletti b’mod xieraq il-kunsiderazzjoni ta’ kull informazzjoni disponibbli fid-data tal-akkwiżizzjoni.

Ħlas ittrasferit

37.

Il-ħlas ittrasferit f’kombinament ta’ negozji għandu jitkejjel skont il-valur ġust, li għandu jiġi kkalkulat bħala s-somma tal-valuri ġusti fid-data tal-akkwiżizzjoni tal-assi ttrasferiti mill-akkwirent, l-obbligazzjonijiet li l-akkwirent iġarrab fil-konfront ta’ dawk li qabel kienu s-sidien tal-akkwiżit u l-interessi azzjonarji maħruġa mill-akkwirent. (Madankollu, kull porzjon tal-premji ta’ pagamenti bbażati fuq l-ishma tal-akkwirent skambjati għal premji miżmuma mill-impjegati tal-akkwiżit li jkun inkluż fil-ħlas ittrasferit fil-kombinament ta’ negozji għandu jitkejjel skont il-paragrafu 30 u mhux skont il-valur ġust.) Eżempji ta’ forom potenzjali ta’ ħlas jinkludu flus, assi oħrajn, negozju jew kumpannija sussidjarja tal-akkwirent, ħlas kontinġenti, strumenti azzjonarji ordinarji jew privileġġati, opzjonijiet, garanziji u interessi tal-membri f’entitajiet ta’ benefiċċju komuni.

38.

Il-ħlas ittrasferit jista’ jinkludi assi jew obbligazzjonijiet tal-akkwirent li jkollhom ammonti miżmuma fil-kotba li jkunu jvarjaw mill-valuri ġusti tagħhom fid-data tal-akkwiżizzjoni (pereżempju, assi mhux monetarji jew negozju tal-akkwirent). Jekk dan ikun il-każ, l-akkwirent għandu jkejjel mill-ġdid l-assi jew l-obbligazzjonijiet ittrasferiti skont il-valuri ġusti tagħhom fid-data tal-akkwiżizzjoni u jirrikonoxxi l-qligħ jew telf riżultanti, jekk ikun hemm, fil-profitt jew telf. Madankollu, xi kultant l-assi jew l-obbligazzjonijiet ittrasferiti jibqgħu fi ħdan l-entità kkombinata wara l-kombinament ta’ negozji (pereżempju, għaliex l-assi jew l-obbligazzjonijiet ġew ittrasferiti lill-akkwiżit u mhux lil dawk li kienu s-sidien tiegħu), u l-akkwirent b’hekk iżomm il-kontroll tagħhom. F’dik is-sitwazzjoni, l-akkwirent għandu jkejjel dawk l-assi u obbligazzjonijiet skont l-ammonti tagħhom miżmuma fil-kotba immedjatament qabel id-data tal-akkwiżizzjoni u m’għandux jirrikonoxxi qligħ jew telf fil-profitt jew telf fuq assi jew obbligazzjonijiet li huwa jikkontrolla kemm qabel kif ukoll wara l-kombinament ta’ negozji.

Ħlas kontinġenti

39.

Il-ħlas li l-akkwirent jittrasferixxi bi skambju għall-akkwiżit jinkludi kwalunkwe assi jew obbligazzjoni li tirriżulta minn arranġament ta’ ħlas kontinġenti (ara l-paragrafu 37). L-akkwirent għandu jirrikonoxxi l-valur ġust fid-data tal-akkwiżizzjoni ta’ ħlas kontinġenti bħala parti mill-ħlas ittrasferit bi skambju għall-akkwiżit.

40.

L-akkwirent għandu jikklassifika obbligazzjoni biex jitħallas ħlas kontinġenti bħala obbligazzjoni jew bħala ekwità fuq il-bażi tad-definizzjonijiet ta’ strument azzjonarju u ta’ obbligazzjoni finanzjarja fil-paragrafu 11 tal-IAS 32 Strumenti Finanzjarji: Preżentazzjoni, jew IFRSs oħrajn applikabbli. L-akkwirent għandu jikklassifika bħala assi d-dritt għar-ritorn ta’ ħlas ittrasferit qabel jekk ċerti kundizzjonijiet speċifikati jiġu ssodisfati. Il-paragrafu 58 jagħti gwida dwar il-kontabilità sussegwenti għal ħlas kontinġenti.

Gwida addizzjonali għall-applikazzjoni tal-metodu tal-akkwiżizzjoni għal tipi partikolari ta’ kombinamenti ta’ negozji

Kombinament ta’ negozji mwettaq fi stadji

41.

Akkwirent xi kultant jikseb kontroll ta’ akkwiżit li fih kellu interess azzjonarju immedjatament qabel id-data tal-akkwiżizzjoni. Pereżempju, fil-31 ta’ Diċembru 20X1, l-Entità A kellha 35 fil-mija tal-interess azzjonarju li ma jagħtix kontroll fl-Entità B. F’dik id-data, l-Entità A tixtri interess addizzjonali ta’ 40 fil-mija fl-Entità B, li jagħtiha kontroll fuq l-Entità B. Dan l-IFRS jirreferi għal tranżazzjoni ta’ dan it-tip bħala kombinament ta’ negozji mwettaq fi stadji, li xi kultant jissejjaħ ukoll akkwiżizzjoni f’passi.

42.

F’kombinament ta’ negozji mwettaq fi stadji, l-akkwirent għandu jkejjel mill-ġdid l-interess azzjonarju li kellu qabel fl-akkwiżit skont il-valur ġust tiegħu fid-data tal-akkwiżizzjoni u għandu jirrikonoxxi l-qligħ jew telf riżultanti, jekk ikun hemm, fi profitt jew telf. F’perijodi preċedenti ta’ rapportaġġ, l-akkwirent jista’ jkun irrikonoxxa bidliet fil-valur tal-interess azzjonarju tiegħu fl-akkwiżit fi dħul ieħor komplessiv (pereżempju, għaliex l-investiment ġie kklassifikat bħala disponibbli għall-bejgħ). Jekk dan ikun il-każ, l-ammont li ġie rikonoxxut fi dħul ieħor komplessiv għandu jiġi rikonoxxut fuq l-istess bażi bħal ma jkun meħtieġ kieku l-akkwirent iddispona direttament mill-interess azzjonarju li kellu qabel.

Kombinament ta’ negozji mwettaq mingħajr it-trasferiment ta’ ħlas

43.

Akkwirent xi kultant jikseb kontroll ta’ akkwiżit mingħajr ma jittrasferixxi ħlas. Il-metodu tal-akkwiżizzjoni li bih issir il-kontabilità għal kombinament ta’ negozji japplika għal dawk il-kombinamenti. Dawk iċ-ċirkustanzi jinkludu:

(a)	L-akkwiżit jixtri lura numru suffiċjenti tal-ishma tiegħu stess sabiex investitur eżistenti (l-akkwirent) jikseb kontroll.

(b)	Jiskadu drittijiet minoritarji ta’ veto li preċedentement kienu jżommu lill-akkwirent milli jikkontrolla akkwiżit li fih l-akkwirent kellu l-maġġoranza tad-drittijiet tal-vot.

(ċ)

L-akkwirent u l-akkwiżit jaqblu li jikkombinaw in-negozji tagħhom b’kuntratt biss. L-akkwirent ma jittrasferixxi ebda ħlas bi skambju għall-kontroll tal-akkwiżit u ma jkollu ebda interess azzjonarju fl-akkwiżit, la fid-data tal-akkwiżizzjoni u lanqas qabel. Eżempji ta’ kombinamenti ta’ negozji mwettqa b’kuntratt biss jinkludu meta żewġ negozji jinġiebu flimkien f’arranġament ta’ stapling jew permezz tal-formazzjoni ta’ korporazzjoni kkwotata f’żewġ listi.

44.

F’kombinament ta’ negozji mwettaq b’kuntratt biss, l-akkwirent għandu jattribwixxi lis-sidien tal-akkwiżit l-ammont tal-assi netti tal-akkwiżit rikonoxxut skont dan l-IFRS. Fi kliem ieħor, l-interessi azzjonarji fl-akkwiżit miżmuma minn partijiet apparti l-akkwirent huma interess li ma jagħtix kontroll fir-rapporti finanzjarji ta’ wara l-kombinament tal-akkwirent anki jekk ir-riżultat ikun li l-interessi azzjonarji kollha fl-akkwiżit jiġu attribwiti għall-interess li ma jagħtix kontroll.

Perijodu tal-kejl

45.

Jekk il-kontabilità inizjali għal kombinament ta’ negozji ma tkunx kompleta sat-tmiem tal-perijodu tar-rapportaġġ li fih iseħħ il-kombinament, l-akkwirent għandu jirrapporta fir-rapporti finanzjarji tiegħu ammonti provviżorji għall-entrati li għalihom il-kontabilità ma tkunx kompleta. Matul il-perijodu tal-kejl, l-akkwirent għandu jaġġusta retrospettivament l-ammonti provviżorji rikonoxxuti fid-data tal-akkwiżizzjoni biex jirriflettu informazzjoni ġdida miksuba dwar fatti u ċirkustanzi li kienu jeżistu fid-data tal-akkwiżizzjoni u li, kieku kienet magħrufa, kienet taffettwa l-kejl tal-ammonti rikonoxxuti sa minn dik id-data. Matul il-perijodu tal-kejl, l-akkwirent għandu jirrikonoxxi wkoll assi jew obbligazzjonijiet addizzjonali jekk tinkiseb informazzjoni ġdida dwar fatti u ċirkustanzi li kienu jeżistu fid-data tal-akkwiżizzjoni u li, kieku kienet magħrufa, kienet twassal għar-rikonoxximent ta’ dawk l-assi u obbligazzjonijiet sa minn dik id-data. Il-perijodu tal-kejl jintemm malli l-akkwirent jirċievi l-informazzjoni li kien qed ifittex dwar fatti u ċirkustanzi li kienu jeżistu fid-data tal-akkwiżizzjoni jew isir jaf li ma tistax tinkiseb aktar informazzjoni. Madankollu, il-perijodu tal-kejl ma jistax jaqbeż sena mid-data tal-akkwiżizzjoni.

46.

Il-perijodu tal-kejl huwa l-perijodu wara d-data tal-akkwiżizzjoni li matulu l-akkwirent jista’ jaġġusta l-ammonti provviżorji rikonoxxuti għal kombinament ta’ negozji. Il-perijodu tal-kejl jipprovdi lill-akkwirent bi żmien raġonevoli biex jikseb l-informazzjoni meħtieġa biex jidentifika u jkejjel dan li ġej fid-data tal-akkwiżizzjoni skont ir-rekwiżiti ta’ dan l-IFRS:

(a)	l-assi identifikabbli akkwistati, l-obbligazzjonijiet merfugħa u kull interess li ma jagħtix kontroll fl-akkwiżit;

(b)	il-ħlas ittrasferit għall-akkwiżit (jew l-ammont l-ieħor użat għall-kejl tal-avvjament);

(ċ)	f’kombinament ta’ negozji mwettaq fi stadji, l-interess azzjonarju li l-akkwirent kellu qabel fl-akkwiżit; u

(d)	l-avvjament jew il-qligħ li jirriżulta minn xiri bl-irħis.

47.

L-akkwirent għandu jikkunsidra l-fatturi pertinenti kollha meta jiddetermina jekk l-informazzjoni miksuba wara d-data tal-akkwiżizzjoni għandhiex tirriżulta f’aġġustament tal-ammonti provviżorji rikonoxxuti jew jekk dik l-informazzjoni tirriżultax minn avvenimenti li seħħew wara d-data tal-akkwiżizzjoni. Fatturi pertinenti jinkludu d-data meta tinkiseb l-informazzjoni addizzjonali u jekk l-akkwirent jistax jidentifika raġuni għal bidla fl-ammonti provviżorji. Informazzjoni li tinkiseb ftit wara d-data tal-akkwiżizzjoni iktar hija probabbli li tirrifletti ċirkustanzi li kienu jeżistu fid-data tal-akkwiżizzjoni milli informazzjoni li tinkiseb bosta xhur wara. Pereżempju, il-bejgħ ta’ assi lil terz ftit wara d-data tal-akkwiżizzjoni għal ammont li jvarja b’mod sinifikanti mill-valur ġust provviżorju tiegħu stabbilit f’dik id-data x’aktarx li jindika żball fl-ammont provviżorju, ħlief jekk ikun jista’ jiġi identifikat avveniment li jkun seħħ fl-intervall u li jkun biddel il-valur ġust tiegħu.

48.

L-akkwirent jirrikonoxxi żieda (tnaqqis) fl-ammont provviżorju rikonoxxut għal assi (obbligazzjoni) identifikabbli permezz ta’ tnaqqis (żieda) fl-avvjament. Madankollu, informazzjoni ġdida miksuba matul il-perijodu tal-kejl xi kultant tista’ tirriżulta f’aġġustament tal-ammont provviżorju ta’ aktar minn assi jew obbligazzjoni waħda. Pereżempju, l-akkwirent jista’ jkun ħa fuqu obbligazzjoni li jħallas danni relatati ma’ inċident f’waħda mill-faċilitajiet tal-akkwiżit, li parti minnhom jew it-totalità tagħhom tkun koperta mill-polza ta’ assigurazzjoni għar-responsabbiltà tal-akkwiżit. Jekk l-akkwirent jikseb informazzjoni ġdida matul il-perijodu tal-kejl dwar il-valur ġust fid-data tal-akkwiżizzjoni ta’ dik l-obbligazzjoni, l-aġġustament għall-valur ġust li jirriżulta minn bidla fl-ammont provviżorju rikonoxxut għall-obbligazzjoni jiġi paċut (totalment jew parzjalment) minn aġġustament korrispondenti fl-avvjament li jirriżulta minn bidla fl-ammont provviżorju rikonoxxut għall-klejm riċevibbli mill-assiguratur.

49.

Matul il-perijodu tal-kejl, l-akkwirent għandu jirrikonoxxi aġġustamenti għall-ammonti provviżorji bħallikieku l-kontabilità għall-kombinament tan-negozji kienet tlestiet fid-data tal-akkwiżizzjoni. B’hekk, l-akkwirent għandu jirrevedi kif meħtieġ informazzjoni komparattiva għal perijodi preċedenti ppreżentati fir-rapporti finanzjarji, inkluż li jagħmel kwalunkwe bidla meħtieġa fid-diprezzament, fl-ammortizzament jew f’effetti oħrajn tad-dħul rikonoxxuti fit-tlestija tal-kontabilità inizjali.

50.

Wara li jintemm il-perijodu tal-kejl, l-akkwirent għandu jirrevedi l-kontabilità għal kombinament ta’ negozji biss biex jikkoreġi żball b’konformità mal-IAS 8 Politiki ta’ Kontabilità, Bidliet fl-Istimi ta’ Kontabilità u Żbalji.

Identifikazzjoni ta’ x’inhu parti mit-tranżazzjoni ta’ kombinament ta’ negozji

51.

L-akkwirent u l-akkwiżit jista’ jkollhom relazzjoni jew arranġament ieħor diġà eżistenti qabel ma bdew in-negozjati għall-kombinament tan-negozji, jew jistgħu jidħlu f’arranġament matul in-negozjati li huwa separat mill-kombinament tan-negozji. F’kull waħda minn dawn iż-żewġ sitwazzjonijiet, l-akkwirent għandu jidentifika kwalunkwe ammont li ma jkunx parti minn dak li l-akkwirent u l-akkwiżit (jew dawk li qabel kienu s-sidien tiegħu) skambjaw fil-kombinament tan-negozji, jiġifieri ammonti li mhumiex parti mill-iskambju għall-akkwiżit. L-akkwirent għandu jirrikonoxxi bħala parti mill-applikazzjoni tal-metodu tal-akkwiżizzjoni biss il-ħlas ittrasferit għall-akkwiżit u għall-assi akkwistati u l-obbligazzjonijiet merfugħa fl-iskambju għall-akkwiżit. Tranżazzjonijiet separati għandhom jiġu entrati skont l-IFRSs relevanti.

52.

Tranżazzjoni miftiehma minn jew f’isem l-akkwirent jew primarjament għall-benefiċċju tal-akkwirent jew tal-entità kkombinata, aktar milli primarjament għall-benefiċċju tal-akkwiżit (jew dawk li qabel kienu s-sidien tiegħu) qabel il-kombinament, aktarx li tkun tranżazzjoni separata. Dawn li ġejjin huma eżempji ta’ tranżazzjonijiet separati li m’għandhomx jiġu inklużi fl-applikazzjoni tal-metodu tal-akkwiżizzjoni:

(a)	tranżazzjoni li effettivament tissalda relazzjonijiet li kienu jeżistu qabel bejn l-akkwirent u l-akkwiżit;

(b)	tranżazzjoni li tagħti remunerazzjoni lill-impjegati jew dawk li qabel kienu s-sidien tal-akkwiżit għal servizzi futuri; u

(ċ)	tranżazzjoni li tirrimborsa lill-akkwiżit jew lil dawk li qabel kienu s-sidien tiegħu sabiex jitħallsu l-kosti tal-akkwirent relatati mal-akkwiżizzjoni.

Il-paragrafi B50–B62 jipprovdu gwida relatata dwar l-applikazzjoni.

Kosti relatati mal-akkwiżizzjoni

53.

Kosti relatati mal-akkwiżizzjoni huma kosti li l-akkwirent iġarrab biex iwettaq kombinament ta’ negozji. Dawn il-kosti jinkludu l-ħlasijiet ta’ min isib; ħlasijiet oħrajn għal servizzi ta’ pariri, servizzi legali, ta’ kontabilità, ta’ valutazzjoni u servizzi oħrajn professjonali jew ta’ konsulenza; kosti ta’ amministrazzjoni ġenerali, inklużi l-kosti għaż-żamma ta’ dipartiment intern għall-akkwiżizzjonijiet; u kosti għar-reġistrazzjoni u l-ħruġ ta’ titoli ta’ djun u azzjonarji. L-akkwirent għandu jikkontabilizza l-kosti relatati mal-akkwiżizzjoni bħala spejjeż fil-perijodi meta l-kosti ġew imġarrba u s-servizzi ġew riċevuti, b’eċċezzjoni waħda. Il-kosti biex jinħarġu titoli ta’ djun jew azzjonarji għandhom jiġu rikonoxxuti skont l-IAS 32 u l-IAS 39.

KEJL U KONTABILITÀ SUSSEGWENTI

54.

B’mod ġenerali, akkwirent għandu sussegwentement ikejjel u jagħti rendikont ta’ assi akkwistati, obbligazzjonijiet merfugħa jew imġarrba u strumenti azzjonarji maħruġa f’kombinament ta’ negozji skont IFRSs oħrajn applikabbli għal dawk l-entrati, skont in-natura tagħhom. Madankollu, dan l-IFRS jipprovdi gwida dwar il-kejl u l-kontabilità sussegwenti għal dawn l-assi akkwistati, obbligazzjonijiet merfugħa jew imġarrba u strumenti azzjonarji maħruġa f’kombinament ta’ negozji:

(a)	drittijiet akkwistati mill-ġdid;

(b)	obbligazzjonijiet kontinġenti rikonoxxuti fid-data tal-akkwiżizzjoni;

(ċ)	assi ta’ kumpens; u

(d)	ħlas kontinġenti.

Il-paragrafu B63 jipprovdi gwida relatata dwar l-applikazzjoni.

Drittijiet akkwistati mill-ġdid

55.

Dritt akkwistat mill-ġdid rikonoxxut bħala assi intanġibbli għandu jiġi amortizzat fuq il-perijodu kuntrattwali rimanenti tal-kuntratt li fih ikun ingħata d-dritt. Akkwirent li sussegwentement ibigħ dritt akkwistat mill-ġdid lil terz għandu jinkludi l-ammont miżmum fil-kotba tal-assi intanġibbli meta jiddetermina l-qligħ jew telf fuq il-bejgħ.

Obbligazzjonijiet kontinġenti

56.

Wara r-rikonoxximent inizjali u sakemm l-obbligazzjoni tiġi saldata, ikkanċellata jew tiskadi, l-akkwirent għandu jkejjel obbligazzjoni kontinġenti rikonoxxuta f’kombinament ta’ negozji bħala l-ogħla minn:

(a)	l-ammont li kieku kien jiġi rikonoxxut b’konformità mal-IAS 37; u

(b)	l-ammont inizjalment rikonoxxut li minnu jitnaqqas, meta meħtieġ, l-amortizzament kumulattiv rikonoxxut b’konformità mal-IAS 18 Dħul.

Dan ir-rekwiżit ma japplikax għall-kuntratti li l-kontabilità tagħhom issir b’konformità mal-IAS 39.

Assi ta’ indennizz

57.

Fit-tmiem ta’ kull perijodu ta’ rapportaġġ sussegwenti, l-akkwirent għandu jkejjel assi ta’ indennizz li kien rikonoxxut fid-data tal-akkwiżizzjoni fuq l-istess bażi bħall-obbligazzjoni jew l-assi indennizzati, soġġett għal kwalunkwe limitazzjonijiet kuntrattwali fuq l-ammont tagħhom u, għal assi ta’ indennizz li sussegwentement ma jiġix imkejjel bil-valur ġust tiegħu, l-evalwazzjoni mill-maniġment dwar kemm l-assi ta’ indennizz jista’ jinġabar. L-akkwirent għandu jirtira r-rikonoxximent tal-assi ta’ indennizz biss meta jiġbor l-assi, ibiegħu jew b’xi mod ieħor jitlef id-dritt għalih.

Ħlas kontinġenti

58.

Xi bidliet fil-valur ġust tal-ħlas kontinġenti li l-akkwirent jirrikonoxxi wara d-data tal-akkwiżizzjoni jistgħu jkunu r-riżultat ta’ informazzjoni addizzjonali li l-akkwirent ikun kiseb wara dik id-data dwar fatti u ċirkostanzi li kienu jeżistu fid-data tal-akkwiżizzjoni. Dawk il-bidliet huma aġġustamenti tal-perijodu tal-kejl skont il-paragrafi 45–49. Madankollu, bidliet li jirriżultaw minn avvenimenti wara d-data tal-akkwiżizzjoni, bħall-ilħuq ta’ mira dwar qligħ, l-ilħuq ta’ prezz speċifikat tal-ishma jew l-ilħuq ta’ pass importanti fi proġett ta’ riċerka u żvilupp, mhumiex aġġustamenti tal-perijodu tal-kejl. L-akkwirent għandu jikkontabilizza l-bidliet fil-valur ġust ta’ ħlas kontinġenti li mhumiex aġġustamenti tal-perijodu tal-kejl skont kif ġej:

(a)	Ħlas kontinġenti kklassifikat bħala ekwità m’għandux jitkejjel mill-ġdid u s-saldu sussegwenti tiegħu għandu jiġi kkontabilizzat fi ħdan l-ekwità.

(b)

Ħlas kontinġenti kklassifikat bħala assi jew obbligazzjoni li:

(i)	huwa strument finanzjarju u jaqa’ fl-ambitu tal-IAS 39 għandu jitkejjel skont il-valur ġust, u kull qligħ jew telf riżultanti għandu jiġi rikonoxxut jew fil-profitt jew telf jew inkella fi dħul ieħor komplessiv skont dak l-IFRS.

(ii)	m’huwiex fl-ambitu tal-IAS 39 għandu jiġi kkontabilizzat skont l-IAS 37 jew IFRSs oħrajn skont kif xieraq.

ŻVELAR TA’ INFORMAZZJONI

59.

L-akkwirent għandu jiżvela informazzjoni li tippermetti lill-utenti tar-rapporti finanzjarji biex jevalwaw in-natura u l-effett finanzjarju ta’ kombinament ta’ negozji li jseħħ:

(a)	jew matul il-perijodu ta’ rapportaġġ kurrenti;

(b)	jew wara t-tmiem tal-perijodu tar-rapportaġġ iżda qabel ma r-rapporti finanzjarji jkunu awtorizzati għall-ħruġ.

60.

Biex jintlaħaq l-objettiv fil-paragrafu 59, l-akkwirent għandu jiżvela l-informazzjoni speċifikata fil-paragrafi B64—B66.

61.

L-akkwirent għandu jiżvela l-informazzjoni li tippermetti lill-utenti tar-rapporti finanzjarji tiegħu biex jevalwaw l-effetti finanzjarji ta’ aġġustamenti rikonoxxuti fil-perijodu ta’ rapportaġġ kurrenti li huma marbuta ma’ kombinamenti ta’ negozji li kienu mwettqa fil-perijodu preżenti jew perijodi preċedenti.

62.

Biex jintlaħaq l-objettiv fil-paragrafu 61, l-akkwirent għandu jiżvela l-informazzjoni speċifikata fil-paragrafu B67.

63.

Jekk l-informazzjoni li hi meħtieġa li tiġi żvelata minn dan l-IFRS jew IFRSs oħrajn ma tissodisfax l-objettivi stipulati fil-paragrafi 59 u 61, l-akkwirent għandu jiżvela kull informazzjoni addizzjonali li hi meħtieġa biex tilħaq dawk l-għanijiet.

DATA EFFETTIVA U TRANŻIZZJONI

Data effettiva

64.

Dan l-IFRS għandu jiġi applikat b’mod prospettiv għal kombinamenti ta’ negozji li d-data tal-akkwiżizzjoni tagħhom tkun fil-bidu jew wara l-bidu tal-ewwel perijodu ta’ rapportaġġ annwali li jibda fl-1 ta’ Lulju 2009 jew wara. Applikazzjoni aktar bikrija hija permessa. Madankollu, dan l-IFRS għandu jiġi applikat biss fil-bidu ta’ perijodu ta’ rapportaġġ annwali li jibda fit-30 ta’ Ġunju 2007 jew wara. Jekk entità tapplika dan l-IFRS qabel l-1 ta’ Lulju 2009, hija għandha tiżvela dak il-fatt u tapplika l-IAS 27 (kif emendat mill-Bord tal-Istandards Internazzjonali tal-Kontabilità fl-2008) fl-istess ħin.

Tranżizzjoni

65.

Assi u obbligazzjonijiet li rriżultaw minn kombinamenti ta’ negozji li d-dati tal-akkwiżizzjoni tagħhom ġew qabel l-applikazzjoni ta’ dan l-IFRS m’għandhomx jiġu aġġustati mal-applikazzjoni ta’ dan l-IFRS.

66.

Entità, bħal entità ta’ benefiċċju komuni, li tkun għadha ma applikatx IFRS 3 u li kellha kombinament jew kombinamenti ta’ negozji li ġew ikkontabilizzati permezz tal-metodu tax-xiri għandhom japplikaw id-dispożizzjonijiet tranżitorji fil-paragrafi B68 u B69.

Taxxi fuq id-dħul

67.

Għal kombinamenti ta’ negozji li fihom id-data tal-akkwiżizzjoni kienet qabel l-applikazzjoni ta’ dan l-IFRS, l-akkwirent għandu japplika r-rekwiżiti tal-paragrafu 68 tal-IAS 12, kif emendati b’dan l-IFRS, prospettivament. Dan ifisser li l-akkwirent m’għandux jaġġusta l-kontabilità ta’ kombinamenti ta’ negozji preċedenti għal bidliet li kienu ġew rikonoxxuti qabel f’assi rikonoxxuti ta’ taxxa differita. Madankollu, mid-data meta dan l-IFRS jiġi applikat, l-akkwirent għandu jirrikonoxxi, bħala aġġustament għall-profitt jew telf (jew jekk ikun meħtieġ mill-IAS 12, barra l-profitt jew telf), bidliet fl-assi rikonoxxuti ta’ taxxa differita.

IRTIRAR TAL-IFRS 3 (2004)

68.

Dan l-IFRS jieħu post l-IFRS 3 Kombinamenti ta’ Negozji (kif maħruġ fl-2004).

Appendiċi A

Termini definiti

Dan l-appendiċi huwa parti integrali mill-IFRS.

akkwirent

L-entità li tikseb kontroll tal-akkwiżit.

akkwiżit

In-negozju jew negozji li tagħhom l-akkwirent jikseb kontroll f’kombinament ta’ negozji.

assi intanġibbli

Assi mhux monetarju identifikabbli mingħajr sustanza fiżika.

avvjament

Assi li jirrappreżenta l-benefiċċji ekonomiċi futuri li jirriżultaw minn assi oħrajn akkwistati f’kombinament ta’ negozji li ma jkunux identifikati individwalment u rikonoxxuti separatament.

data tal-akkwiżizzjoni

Id-data li fiha l-akkwirent jikseb kontroll tal-akkwiżit.

entità ta’ benefiċċju komuni

Entità, apparti minn entità li hija propjetà ta’ investituri, li tipprovdi dividendi, kosti aktar baxxi jew benefiċċji ekonomiċi oħrajn lis-sidien, membri jew parteċipanti tagħha. Pereżempju, kumpannija tal-assigurazzjoni ta’ benefiċċju komuni, unjoni ta’ kreditu u entità kooperattiva lkoll huma entitajiet ta’ benefiċċju komuni.

identifikabbli

Assi huwa identifikabbli jekk ikun jew:

(a)	separabbli, i.e. kapaċi li jkun separat jew mifrud mill-entità u mibjugħ, ittrasferit, liċenzjat, mikri jew skambjat, jew individwalment jew flimkien ma’ kuntratt, assi jew obbligazzjoni identifikabbli relatat/a, irrispettivament minn jekk l-entità jkollhiex il-ħsieb li tagħmel hekk; jew

(b)	joriġina minn drittijiet kuntrattwali jew drittijiet legali oħrajn, irrispettivament minn jekk dawk id-drittijiet ikunux trasferibbli jew separabbli mill-entità jew minn drittijiet u obbligi oħrajn.

interessi azzjonarji

Għall-iskopijiet ta’ dan l-IFRS, interessi azzjonarji tintuża biex tfisser b’mod ġenerali interessi propjetarji ta’ entitajiet li jkunu l-propjetà ta’ investituri u interessi ta’ sidien, membri jew parteċipanti f’entitajiet ta’ benefiċċju komuni.

interess li ma jagħtix kontroll

L-ekwità f’kumpannija sussidjarja li mhuwiex attribwibbli, direttament jew indirettament, lil kumpannija prinċipali.

kombinament ta’ negozji

Tranżazzjoni jew avveniment ieħor fejn akkwirent jikseb kontroll ta’ negozju wieħed jew aktar. Tranżazzjonijiet xi kultant magħrufa bħala “amalgamazzjonijiet veri” jew “amalgamazzjonijiet ta’ partijiet ugwali” huma wkoll kombinamenti ta’ negozji skont kif dak it-terminu jintuża f’dan l-IFRS.

kontroll

Is-setgħa li tirregola l-politika finanzjarja u tal-operat ta’ entità b’mod li jinkisbu benefiċċji mill-attivitajiet tagħha.

kumpens kontinġenti

Normalment, obbligu tal-akkwirent li jittrasferixxi assi jew interessi azzjonarji addizzjonali lil dawk li qabel kienu s-sidien ta’ akkwiżit bħala parti mill-iskambju għall-kontroll tal-akkwiżit jekk iseħħu avvenimenti futuri speċifikati jew jekk jiġu ssodisfati ċerti kundizzjonijiet. Madankollu, ħlas kontinġenti jista’ wkoll jagħti lill-akkwirent id-dritt għar-restituzzjoni ta’ ħlas ittrasferit qabel jekk ċerti kundizzjonijiet jiġu ssodisfati.

negozju

Ġabra integrata ta’ attivitajiet u assi li tista’ titmexxa u tiġi amministrata bl-iskop li tipprovdi redditu fil-forma ta’ dividendi, kosti aktar baxxi jew benefiċċji ekonomiċi oħrajn direttament lill-investituri jew sidien, membri jew parteċipanti oħrajn.

sidien

Għall-iskopijiet ta’ dan l-IFRS, sidien tintuża b’mod ġenerali biex tinkludi detenturi ta’ interessi azzjonarji ta’ entitajiet li jkunu l-propjetà ta’ investituri u sidien jew membri ta’ entitajiet ta’ benefiċċju komuni jew parteċipanti fihom.

valur ġust

L-ammont li għalih jista’ jiġi skambjat xi assi, jew li bih titħallas xi obbligazzjoni, bejn partijiet infurmati u disposti fi tranżazzjoni distakkata.

Appendiċi B

Gwida għall-applikazzjoni

Din l-appendiċi hija parti integrali mill-IFRS.

KOMBINAMENTI TA’ NEGOZJI LI JINVOLVU ENTITAJIET TAĦT KONTROLL KOMUNI (APPLIKAZZJONI TAL-PARAGRAFU 2(C))

Dan l-IFRS ma japplikax għal kombinament ta’ negozji ta’ entitajiet jew negozji taħt kontroll komuni. Kombinament ta’ negozji li jinvolvi entitajiet jew negozji taħt kontroll komuni hu kombinament ta’ negozji li fih l-entitajiet jew negozji kollha li qed jikkombinaw huma fl-aħħar mill-aħħar ikkontrollati mill-istess parti jew partijiet kemm qabel kif ukoll wara l-kombinament ta’ negozji, u dak il-kontroll mhux tranżitorju.

Grupp ta’ individwi għandhom jitqiesu li qed jikkontrollaw entità meta, bħala riżultat ta arranġament kuntrattwali, kollettivament huma għandhom is-setgħa li jiggvernaw il-politika finanzjarja u tal-operat tagħha biex jinkisbu benefiċċji mill-attivitajiet tagħha. Għalhekk, kombinament ta’ negozji jkun barra l-ambitu ta’ dan l-IFRS meta l-istess grupp ta’ individwi għandu, b’riżultat ta’ arranġament kuntrattwali, setgħa kollettiva finali li jiggverna l-politika finanzjarja u tal-operat ta’ kull waħda mill-entitajiet li jkunu qed jikkombinaw biex jikseb benefiċċji mill-attivitajiet tagħhom, u dik is-setgħa kollettiva finali mhix tranżitorja.

Entità tista’ tkun ikkontrollata minn individwu, jew minn grupp ta’ individwi li jaġixxu flimkien taħt arranġament kuntrattwali, u dak l-individwu jew grupp ta’ individwi jistgħu ma jkunux soġġetti għar-rekwiżiti tar-rappurtaġġ finanzjarju tal-IFRSs. Għalhekk, mhux meħtieġ għall-entitajiet li qed jikkombinaw li jkunu inklużi bħala parti tal-istess rapporti finanzjarji konsolidati biex kombinament ta’ negozji jitqies bħala wieħed li jinvolvi entitajiet taħt kontroll komuni.

Il-grad tal-interessi li ma jagħtux kontroll f’kull waħda mill-entitajiet li qed jikkombinaw sew qabel kemm wara l-kombinament ta’ negozji mhux rilevanti fid-determinazzjoni ta’ jekk il-kombinament jinvolvix entitajiet taħt kontroll komuni. Bl-istess mod, il-fatt li waħda mill-entitajiet li qed jikkombinaw hija sussidjarja li kienet eskluża mir-rapporti finanzjarji konsolidati mhux rilevanti fid-determinazzjoni ta’ jekk il-kombinament jinvolvix entitajiet taħt kontroll komuni.

IDENTIFIKAZZJONI TA’ KOMBINAMENT TA’ NEGOZJI (APPLIKAZZJONI TAL-PARAGRAFU 3)

Dan l-IFRS jiddefinixxi kombinament ta’ negozji bħala tranżazzjoni jew avveniment ieħor fejn akkwirent jikseb kontroll ta’ negozju wieħed jew aktar. Akkwirent jista’ jikseb kontroll ta’ akkwiżit b’diversi modi, pereżempju:

(a)	billi jittrasferixxi flus, ekwivalenti ta’ flus jew assi oħrajn (inklużi assi netti li jikkostitwixxu negozju);

(b)	billi jġarrab obbligazzjonijiet;

(ċ)	billi joħroġ interessi azzjonarji;

(d)	billi jipprovdi aktar minn tip wieħed ta’ ħlas; jew

(e)	mingħajr ma jittrasferixxi ħlas, inkluż biss b’kuntratt (ara l-paragrafu 43).

Kombinament ta’ negozji jista’ jkun strutturat f’varjetà ta’ modi għal raġunijiet legali, ta’ taxxa jew raġunijiet oħrajn, li jinkludu iżda mhumiex limitati għal:

(a)	negozju wieħed jew aktar isiru sussidjarji ta’ akkwirent jew l-assi netti ta’ negozju wieħed jew aktar jiġu legalment amalgamenti mal-akkwirent;

(b)	entità waħda fil-kombinament tittrasferixxi l-assi netti tagħha, jew is-sidien tagħha jittrasferixxu l-interessi azzjonarji tagħhom, lil entità oħra fil-kombinament jew lis-sidien tagħha;

(ċ)	l-entitajiet kollha fil-kombinament jittrasferixxu l-assi netti tagħhom, jew is-sidien ta’ dawk l-entitajiet jittrasferixxu l-interessi azzjonarji tagħhom, lil entità ffurmata ġdida (xi kultant imsejħa tranżazzjoni roll-up jew put-together); jew

(d)	grupp ta’ dawk li qabel kienu sidien ta’ waħda mill-entitajiet fil-kombinament jikseb kontroll tal-entità kkombinata.

DEFINIZZJONI TA’ NEGOZJU (APPLIKAZZJONI TAL-PARAGRAFU 3)

Negozju jikkonsisti f’inputs u proċessi applikati għal dawk l-inputs li jkollhom il-kapaċità li joħolqu outputs. Għalkemm in-negozji normalment ikollhom outputs, l-outputs m’humiex meħtieġa biex ġabra integrata tikkwalifika bħala negozju. It-tlett elementi ta’ negozju huma ddefiniti skont kif ġej:

(a) Input: Kull riżorsa ekonomika li toħloq, jew li jkollha l-kapaċità li toħloq, outputs meta proċess wieħed jew aktar jiġu applikati għaliha. Eżempji jinkludu assi mhux kurrenti (inklużi assi intanġibbli jew drittijiet biex jintużaw assi mhux kurrenti), propjetà intellettwali, il-kapaċità li jinkiseb aċċess għal materjali neċessarji jew drittijiet u għal impjegati.

(b) Proċess: Kull sistema, standard, protokoll, konvenzjoni jew regola li meta tiġi applikata għal input jew inputs, toħloq jew ikollha l-kapaċità li toħloq outputs. Eżempji jinkludu proċessi ta’ mmaniġġjar strateġiku, proċessi operattivi u proċessi ta’ mmaniġġjar tar-riżorsi. Dawn il-proċessi tipikament ikunu dokumentati, iżda korp ta’ ħaddiema organizzat li jkollu l-kapaċitajiet u l-esperjenza meħtieġa u li jimxi skont regoli u konvenzjonijiet jista’ jipprovdi l-proċessi meħtieġa li jistgħu jiġu applikati għall-inputs biex jinħolqu outputs. (Il-kontabilità, il-fatturazzjoni, il-ħdim tal-pagi u sistemi amministrattivi oħrajn tipikament mhumiex proċessi użati biex jinħolqu outputs.)

(c) Output: Ir-riżultat ta’ inputs u proċessi applikati għal dawk l-inputs li jipprovdu jew għandhom il-kapaċità li jipprovdu redditu fil-forma ta’ dividendi, kosti aktar baxxi jew benefiċċji ekonomiċi oħrajn direttament lill-investituri jew sidien, membri jew parteċipanti oħrajn.

Sabiex tkun tista’ titmexxa u tiġi mmaniġġjata għall-iskopijiet iddefiniti, ġabra integrata ta’ attivitajiet u assi teħtieġ żewġ elementi essenzjali—inputs u proċessi applikati għal dawk l-inputs, li flimkien jintużaw jew ser jintużaw biex joħolqu outputs. Madankollu, negozju mhux bilfors jinkludi l-inputs jew il-proċessi kollha li l-bejjiegħ kien juża għall-operat ta’ dak in-negozju jekk il-parteċipanti fis-suq ikunu kapaċi jakkwistaw in-negozju u jkomplu jipproduċu outputs, pereżempju, billi jintegraw in-negozju fl-inputs u l-proċessi tagħhom stess.

In-natura tal-elementi ta’ negozju tvarja skont l-industrija u l-istruttura tal-operazzjonijiet (attivitajiet) tal-entità, inkluż l-istadju ta’ żvilupp tal-entità. Negozji stabbiliti spiss ikollhom bosta tipi differenti ta’ inputs, proċessi u outputs, waqt li negozji ġodda spissa jkollhom ftit inputs u proċessi u xi kultant output (prodott) wieħed biss. Kważi n-negozji kollha jkollhom ukoll obbligazzjonijiet, iżda negozju mhux bilfors ikollu obbligazzjonijiet.

B10

Ġabra integrata ta’ attivitajiet u assi fl-istadju ta’ żvilupp jista’ ma jkollhiex outputs: Jekk le, l-akkwirent għandu jikkunsidra fatturi oħrajn biex jiddeterima jekk il-ġabra hijiex negozju. Dawn il-fatturi jinkludu, iżda mhumiex limitati għal, jekk il-ġabra:

(a)	bdietx attivitajiet prinċipali ppjanati;

(b)	għandhiex impjegati, propjetà intellettwali u inputs u proċessi oħrajn li jistgħu jiġu applikati għal dawk l-inputs;

(ċ)	hux qed issegwi pjan biex tipproduċi outputs; u

(d)	hux ser tkun tista’ tikseb aċċess għal klijenti li ser jixtru l-outputs.

Mhuwiex meħtieġ li dawk il-fatturi kollha jkunu preżenti sabiex ġabra integrata partikolari ta’ attivitajiet u assi fl-istadju ta’ żvilupp tikkwalifika bħala negozju.

B11

Id-determinazzjoni dwar jekk ġabra partikolari ta’ assi u attivitajiet hijiex negozju għandha tkun ibbażata fuq jekk il-ġabra integrata tistax tiġi mmexxijja u mmaniġġjata bħala negozju minn parteċipant fis-suq. B’hekk, għall-finijiet tal-evalwazzjoni dwar jekk ġabra partikolari hijiex negozju, mhuwiex relevanti jekk bejjiegħ ħaddimx il-ġabra bħala negozju jew jekk l-akkwirent għandux il-ħsieb li jħaddem il-ġabra bħala negozju.

B12

Fin-nuqqas ta’ evidenza għall-kuntrarju, ġabra partikolari ta’ assi u attivitajiet li fiha jkun hemm avvjament għandha tiġi preżunta li hija negozju. Madankollu, negozju mhux bilfors ikollu avvjament.

IDENTIFIKAZZJONI TAL-AKKWIRENT (APPLIKAZZJONI TAL-PARAGRAFI 6 U 7)

B13

Il-gwida fl-IAS 27 Rapporti Finanzjarji Konsolidati u Separati għandha tintuża sabiex jiġi identifikat l-akkwirent—l-entità li tikseb kontroll tal-akkwiżit. Jekk kombinament ta’ negozji jkun seħħ iżda l-applikazzjoni tal-gwida fl-IAS 27 ma tindikax b’mod ċar liema mill-entitajiet fil-kombinament hija l-akkwirent, il-fatturi fil-paragrafi B14-B18 għandhom jiġu kkunsidrati sabiex issir dik id-determinazzjoni.

B14

Jekk kombinament ta’ negozji jitwettaq primarjament billi jiġu ttrasferiti flus jew assi oħrajn jew billi jiġġarbu obbligazzjonijiet, l-akkwirent normalment ikun l-entità li tittrasferixxi l-flus jew l-assi l-oħrajn jew li ġġarrab l-obbligazzjonijiet.

B15

F’kombinament ta’ negozji mwettaq primarjament permezz ta’ skambju ta’ interessi azzjonarji, l-akkwirent normalment ikun l-entità li toħroġ l-interessi azzjonarji tagħha. Madankollu, f’xi kombinamenti ta’ negozji, komunament imsejħa “akkwiżizzjonijiet inversi”, l-entità li toħroġ l-interessi azzjonarji hija l-akkwiżit. Il-paragrafi B19-B27 jipprovdu gwida dwar kontabilità għal akkwiżizzjonijiet inversi. Għandhom jiġu kkunsidrati wkoll fatti u ċirkustanzi pertinenti oħrajn għall-identifikazzjoni tal-akkwirent f’kombinament ta’ negozji mwettaq bl-iskambju ta’ interessi azzjonarji, inklużi:

(a)

id-drittijiet relattivi tal-vot fl-entità kkombinata wara l-kombinament tan-negozji—L-akkwirent normalment ikun l-entità fil-kombinament li s-sidien tagħha bħala grupp iżommu jew jirċievu l-akbar porzjon tad-drittijiet tal-vot fl-entità kkombinata. Sabiex jiġi ddeterminat liema grupp ta’ sidien iżomm jew jirċievi l-akbar porzjon tad-drittijiet tal-vot, entità għandha tikkunsidra l-eżistenza ta’ kwalunkwe arranġament mhux normali jew speċjali ta’ votazzjoni kif ukoll ta’ opzjonijiet, garanziji jew titoli konvertibbli.

(b)

l-eżistenza ta’ interess minoritarju kbir bi dritt tal-vot fl-entità kkombinata jekk ebda sid ieħor jew grupp organizzat ta’ sidien ma jkollu interess sinifikanti ta’ vot—L-akkwirent normalment ikun l-entità fil-kombinament li s-sid uniku jew grupp ta’ sidien tagħha jkollu l-akbar interess minoritarju bid-dritt tal-vot fi ħdan l-entità kkombinata.

(ċ)	il-kompożizzjoni tal-korp governattiv tal-entità kkombinata—L-akkwirent normalment ikun l-entità fil-kombinament li s-sidien tagħha jkollhom il-kapaċità li jeleġġu jew jaħtru jew inkella li jneħħu maġġoranza tal-membri tal-korp governattiv tal-entità kkombinata.

(d)	il-kompożizzjoni tal-maniġment ta’ grad għoli tal-entità kkombinata—L-akkwirent normalment ikun l-entità fil-kombinament li l-maniġment tagħha (li kellha qabel) jiddomina l-maniġment tal-entità kkombinata.

(e)	it-termini tal-iskambju tal-interessi azzjonarji—L-akkwirent normalment ikun l-entità fil-kombinament li tħallas primjum fuq il-valur ġust ta’ qabel il-kombinament tal-interessi azzjonarji tal-entità jew l-entitajiet l-oħrajn fil-kombinament.

B16

L-akkwirent normalment ikun l-entità fil-kombinament li d-daqs relattiv tagħha (imkejjel, pereżempju, f’assi, dħul jew profitt) huwa akbar b’mod sinifikanti minn dak tal-entità jew l-entitajiet l-oħrajn fil-kombinament.

B17

F’kombinament ta’ negozji li jinvolvi aktar minn żewġ entitajiet, l-identifikazzjoni tal-akkwirent għandha tinkludi kunsiderazzjoni, fost affarijiet oħra, ta’ liema mill-entitajiet fil-kombinament tat bidu għall-kombinament, kif ukoll tad-daqs relattiv tal-entitajiet fil-kombinament.

B18

Entità ġdida fformata biex teffettwa kombinament ta’ negozji mhijiex neċessarjament l-akkwirent. Jekk entità ġdida tiġi ffurmata biex toħroġ interessi azzjonarji biex jitwettaq kombinament ta’ negozji, waħda mill-entitajiet fil-kombinament li kienet teżisti qabel il-kombinament għandha tkun identifikata bħala l-akkwirent billi tiġi applikata l-gwida fil-paragrafi B13-B17. B’kuntrast, entità ġdida li tittrasferixxi flus jew assi oħrajn jew li ġġarrab obbligazzjonijiet bħala ħlas tista’ tkun l-akkwirent.

AKKWIŻIZZJONIJIET INVERSI

B19

Akkwiżizzjoni inversa sseħħ meta l-entità li toħroġ titoli (l-akkwirent legali) tiġi identifikata bħala l-akkwiżit għall-iskopijiet ta’ kontabilità fuq il-bażi tal-gwida fil-paragrafi B13–B18. L-entità li l-interessi azzjonarji tagħha huma akkwistati (l-akkwiżit legali) għandha tkun l-akkwirent għall-iskopijiet tal-kontabilità biex it-tranżazzjoni titqies bħala akkwiżizzjoni inversa. Pereżempju, akkwiżizzjonijiet inversi xi kultant iseħħu meta entità operattiva privata tkun trid issir entità pubblika iżda ma tkunx trid tirreġistra l-ishma azzjonarji tagħha. Biex isir dan, l-entità privata tirranġa sabiex entità pubblika takkwista l-interessi azzjonarji tagħha bi skambju għall-interessi azzjonarji tal-entità pubblika. F’dan l-eżempju, l-entità pubblika hija l-akkwirent legali minħabba li tkun ħarġet l-interessi azzjonarji tagħha, u l-entità privata hija l-akkwiżit legali peress li l-interessi azzjonarji tagħha jkunu ġew akkwistati. Madankollu, l-applikazzjoni tal-gwida fil-paragrafi B13–B18 tirriżulta fl-identifikazzjoni:

(a)	tal-entità pubblika bħala l-akkwiżit għal skopijiet ta’ kontabilità (l-akkwiżit għall-iskopijiet tal-kontabilità); u

(b)	tal-entità privata bħala l-akkwirent għal skopijiet ta’ kontabilità (l-akkwirent għall-iskopijiet tal-kontabilità);

L-akkwiżit għall-iskopijiet tal-kontabilità jrid jissodisfa d-definizzjoni ta’ negozju sabiex it-tranżazzjoni tiġi kkontabilizzata bħala akkwiżizjoni inversa, u l-prinċipji kollha ta’ rikonoxximent u ta’ kejl f’dan l-IFRS, inkluż ir-rekwiżit li jiġi rikonoxxut avvjament, japplikaw.

Kejl tal-ħlas ittrasferit

B20

F’akkwiżizzjoni inversa, l-akkwirent għall-iskopijiet tal-kontabilità normalment ma joħroġ ebda ħlas għall-akkwiżit. Minflok, l-akkwiżit għall-iskopijiet tal-kontabilità joħroġ l-ishma azzjonarji tiegħu lis-sidien ta’ dak li hu l-akkwirent għall-iskopijiet tal-kontabilità. Għaldaqstant, il-valur ġust tal-ħlas fid-data tal-akkwiżizzjoni ttrasferit minn dak li hu l-akkwirent għall-iskopijiet tal-kontabilità għall-interess tiegħu fl-akkwiżit għall-iskopijiet tal-kontabilità huwa bbażat fuq in-numru ta’ interessi azzjonarji li l-kumpannija sussidjarja legali kellha toħroġ biex tagħti lis-sidien tal-kumpannija prinċipali legali l-istess perċentwali ta’ interessi azzjonarji fl-entità kkombinata li jirriżulta mill-akkwiżizzjoni inversa. Il-valur ġust tan-numru ta’ interessi azzjonarji kkalkulat b’dak il-mod jista’ jintuża bħala l-valur ġust tal-ħlas ittrasferit bi skambju għall-akkwiżit.

Preparazzjoni u preżentazzjoni ta’ rapporti finanzjarji konsolidati

B21

Rapporti finanzjarji konsolidati mħejjija wara akkwiżizzjoni inversa għandhom jinħarġu taħt l-isem tal-kumpannija prinċipali legali (l-akkwiżit għall-iskopijiet tal-kontabilità), iżda deskritti fin-noti bħala kontinwazzjoni tar-rapporti finanzjarji tas-sussidjarja legali (l-akkwirent għall-iskopijiet tal-kontabilità), b’aġġustament wieħed, jiġifieri li jiġi aġġustat retroattivament il-kapital legali tal-akkwirent għall-iskopijiet tal-kontabilità biex jirrifletti l-kapital legali tal-akkwiżit għall-iskopijiet tal-kontabilità. Dak l-aġġustament huwa meħtieġ biex jirrifletti l-kapital tal-kumpannija prinċipali legali (l-akkwiżit għall-iskopijiet tal-kontabilità). Informazzjoni komparattiva ppreżentata f’dawk ir-rapporti finanzjarji kkonsolidati wkoll tiġi aġġustata retroattivament biex tirrifletti l-kapital legali tal-kumpannija prinċipali legali (akkwiżit għall-iskopijiet tal-kontabilità).

B22

Peress li r-rapporti finanzjarji konsolidati jirrappreżentaw kontinwazzjoni tar-rapporti finanzjarji tas-sussidjarja legali ħlief għall-istruttura kapitali tagħha, ir-rapporti finanzjarji konsolidati jirriflettu:

(a)	l-assi u l-obbligazzjonijiet tas-sussidjarja legali (l-akkwirent għall-iskopijiet tal-kontabilità) li jkunu rikonoxxuti u mkejla skont l-ammonti tagħhom miżmuma fil-kotba ta’ qabel il-kombinament.

(b)	l-assi u l-obbligazzjonijiet tal-kumpannija prinċipali legali (l-akkwiżit għall-iskopijiet tal-kontabilità) li jkunu rikonoxxuti u mkejla skont dan l-IFRS.

(ċ)	il-qligħ imfaddal u bilanċi oħrajn tal-ekwità tas-sussidarja legali (l-akkwirent għall-iskopijiet tal-kontabilità) qabel il-kombinament ta’ negozji.

(d)

l-ammont rikonoxxut fir-rapporti finanzjarji kkonsolidati bħala interessi azzjonarji maħruġa li jiġi ddeterminat billi jingħadd l-interess azzjonarju maħruġ tas-sussidjarja legali (l-akkwirent għall-iskopijiet tal-kontabilità) li kien pendenti immedjatament qabel il-kombinament tan-negozju mal-valur ġust tal-kumpannija prinċipali legali (l-akkwiżit għall-iskopijiet tal-kontabilità) iddeterminat skont dan l-IFRS. Madankollu, l-istruttura tal-ekwità (jiġifieri n-numru u t-tip ta’ interessi azzjonarji maħruġa) għandha tirrifletti l-istruttura tal-ekwità tal-kumpannija prinċipali legali (l-akkwiżit għall-iskopijiet tal-kontabilità), inklużi l-interessi azzjonarji maħruġa mill-kumpannija prinċipali legali biex jitwettaq il-kombinament tan-negozji. Għaldaqstant, l-istruttura tal-ekwità tas-sussidarja legali (l-akkwirent għall-iskopijiet tal-kontabilità) għandha tiġi ddikjarata b’mod ġdid billi jintuża l-proporzjon ta’ skambju stabbilit fil-ftehim tal-akkwiżizzjoni biex jiġi rifless in-numru ta’ ishma tal-kumpannija prinċipali legali (l-akkwiżit għall-iskopijiet tal-kontabilità) maħruġa fl-akkwiżizzjoni inversa.

(e)	is-sehem proporzjonat tal-interess li ma jagħtix kontroll tal-ammonti miżmuma fil-kotba qabel il-kombinament ta’ qligħ imfaddal u interessi azzjonarji oħrajn tas-sussidjarja legali (l-akkwirent għall-iskopijiet tal-kontabilità) kif diskuss fil-paragrafi B23 u B24.

Interess li ma jagħtix kontroll

B23

F’akkwiżizzjoni inversa, uħud mis-sidien tas-sussidjarja legali (l-akkwirent għall-iskopijiet tal-kontabilità) jistgħu ma jibdlux l-interessi azzjonarji tagħhom ma’ interessi azzjonarji tal-kumpanija prinċipali legali (l-akkwiżit għall-iskopijiet tal-kontabilità). Dawk is-sidien jiġi ttrattati bħala interess li ma jagħtix kontroll fir-rapporti finanzjarji konsolidati wara l-akkwiżizzjoni inversa. Dan għaliex is-sidien tal-akkwiżit legali li ma jibdlux l-interessi azzjonarji tagħhom ma’ interessi azzjonarji tal-akkwirent legali għandhom interess biss fir-riżultati u l-assi netti tal-akkwiżit legali, u mhux fir-riżultati u l-assi netti tal-entità kkombinata. Min-naħa l-oħra, minkejja li l-akkwirent legali huwa l-akkwiżit għall-iskopijiet tal-kontabilità, is-sidien tal-akkwirent legali għandhom interess fir-riżultati u fl-assi netti tal-entità kkombinata.

B24

L-assi u l-obbligazzjonijiet tal-akkwiżit legali huma mkejla u rikonoxxuti fir-rapporti finanzjarji konsolidati fl-ammonti tagħhom miżmuma fil-kotba ta’ qabel il-kombinament (ara l-paragrafu B22(a)). Għalhekk, f’akkwiżizzjoni inversal-interess li ma jagħtix kontroll jirrifletti l-interess proporzjonat tal-azzjonisti li ma għandhomx kontroll fl-ammonti miżmuma fil-kotba ta’ qabel il-kombinament tal-assi netti tal-akkwiżit legali anki jekk l-interessi li ma jagħtux kontroll f’akkwiżizzjonijiet oħrajn huma mkejla skont il-valur ġust tagħhom fid-data tal-akkwiżizzjoni.

Qligħ sehem b’sehem

B25

Kif innutat fil-paragrafu B22(d), l-istruttura tal-ekwità li tidher fir-rapporti finanzjarji konsolidati mħejjija wara akkwiżizzjoni inversa tirrifletti l-istruttura tal-ekwità tal-akkwirent legali (l-akkwiżit għall-iskopijiet tal-kontabilità) inklużi l-interessi azzjonarji maħruġa mill-akkwirent legali biex jitwettaq il-kombinament tan-negozji.

B26

Għall-iskop li tkun ikkalkulata l-medja ppiżata tan-numru ta’ ishma ordinarji pendenti (id-denominatur tal-kalkolu tal-qligħ sehem b’sehem) matul il-perijodu li fih isseħħ l-akkwiżizzjoni inversa:

(a)

in-numru ta’ ishma ordinarji pendenti mill-bidu ta’ dak il-perijodu sad-data tal-akkwiżizzjoni għandu jkun ikkomputat fuq il-bażi tan-numru medju ppiżat ta’ ishma ordinarji tal-akkwiżit legali (akkwirent għall-iskopijiet tal-kontabilità) li jkunu pendenti matul il-perijodu, immultiplikati bil-proporzjon ta’ skambju stabbilit fil-ftehim ta’ amalgamazzjoni; u

(b)	in-numru ta’ ishma ordinarji pendenti mid-data tal-akkwiżizzjoni sat-tmiem ta’ dak il-perijodu għandu jkun in-numru attwali ta’ ishma ordinarji tal-akkwirent legali (l-akkwiżit għall-iskopijiet tal-kontabilità) pendenti matul dak il-perijodu.

B27

Il-qligħ bażiku sehem b’sehem għal kull perijodu komparattiv qabel id-data tal-akkwiżizzjoni ppreżentat fir-rapporti finanzjarji kkonsolidati wara akkwiżizzjoni inversa għandu jiġi kkalkulat billi jiġi diviż:

(a)	il-profitt jew telf tal-akkwiżit legali attribwibbli għal azzjonisti ordinarji f’kull wieħed minn dawk il-perijodi bin-

(b)	numru medju ppiżat storiku tal-ishma ordinarji pendenti tal-akkwiżit legali mmultiplikat bil-proporzjon ta’ skambju stabbilit fil-ftehim tal-akkwiżizzjoni.

RIKONOXXIMENT TA’ ASSI PARTIKOLARI AKKWISTATI U OBBLIGAZZJONIJIET MERFUGĦA (APPLIKAZZJONI TAL-PARAGRAFI 10–13)

Kirjiet operattivi

B28

L-akkwirent m’għandu jirrikonoxxi ebda assi jew obbligazzjoni relatata ma’ kirja operattiva fejn l-akkwiżit ikun il-kerrej ħlief kif meħtieġ mill-paragrafi B29 u B30.

B29

L-akkwirent għandu jiddetermina jekk it-termini ta’ kull kirja operattiva fejn l-akkwiżit ikun il-kerrej humiex favorevoli jew sfavorevoli. L-akkwirent għandu jirrikonoxxi assi intanġibbli jekk it-termini tal-kirja operattiva jkunu favorevoli meta mqabbla mat-termini tas-suq u obbligazzjoni jekk it-termini jkunu sfavorevoli meta mqabbla mat-termini tas-suq. Il-paragrafu B42 jipprovdi gwida dwar il-kejl tal-valur ġust fid-data tal-akkwiżizzjoni ta’ assi soġġetti għal kirjiet operattivi li fihom l-akkwiżit ikun il-kerrej.

B30

Assi intanġibbli identifikabbli jista’ jkun assoċjat ma’ kiri operattiv, u dan jista’ jkun evidenzjat meta l-parteċipanti fis-suq ikunu disposti li jħallsu prezz għall-kiri anki jekk ikun skont it-termini tas-suq. Pereżempju, il-kiri ta’ gejts f’ajruport jew ta’ spazju ta’ bejgħ bl-imnut f’ċentru ewlieni ta’ bejgħ u xiri jista’ jipprovdi mezz ta’ dħul f’xi suq jew benefiċċji ekonomiċi futuri oħrajn li jikkwalifikaw bħala assi intanġibbli identifikabbli, pereżempju, bħala relazzjoni mal-klijenti. F’dik is-sitwazzjoni, l-akkwirent għandu jirrikonoxxi l-assi intanġibbli identifikabbli assoċjat(i) skont il-paragrafu B31.

Assi intanġibbli

B31

L-akkwirent għandu jirrikonoxxi, separatament mill-avvjament, l-assi intanġibbli identifikabbli akkwistati f’kombinament ta’ negozji. Assi intanġibbli jkun identifikabbli jekk jissodisfa jew il-kriterju ta’ separabbiltà jew inkella l-kriterju kuntrattwali-legali.

B32

Assi intanġibbli li jissodisfa l-kriterju kuntrattwali-legali huwa identifikabbli anki jekk l-assi ma jkunx trasferibbli jew separabbli mill-akkwiżit jew minn drittijiet u obbligi oħrajn. Pereżempju:

(a)

akkwiżit jikri faċilità ta’ manifattura taħt kiri operattiv li jkollu termini li jkunu favorevoli meta mqabbla mat-termini tas-suq. It-termini tal-kiri jkunu jipprojbixxu espliċitament it-trasferiment tal-kuntratt ta’ kiri (jew permezz ta’ twellija jew b’sullokazzjoni). L-ammont li bih it-termini tal-kiri jkunu favorevoli meta mqabbla mat-termini ta’ tranżazzjonijiet kurrenti fis-suq għall-istess oġġetti jew għal oġġetti simili huwa assi intanġibbli li jissodisfa l-kriterju kuntrattwali-legali għar-rikonoxximent separatament mill-avvjament, u dan minkejja li l-akkwirent ma jistax iwilli jew jittrasferixxi b’mod ieħor il-kuntratt tal-kiri.

(b)

akkwirent ikollu, u jopera, impjant tal-enerġija nukleari. Il-liċenzja biex jopera dak l-impjant tal-enerġija hija assi intanġibbli li jossidsfa l-kriterju kuntrattwali-legali għar-rikonoxximent separatament mill-avvjament, anki jekk l-akkwirent ma jistax ibigħha jew jittrasferiha separatament mill-impjant tal-enerġija akkwistat. Akkwirent jista’ jirrikonoxxi l-valur ġust tal-liċenza tal-operat u l-valur ġust tal-impjant tal-enerġija bħala assi wieħed għall-finijiet tar-rapportaġġ finanzjarju jekk iż-żminijiet ta’ utilità ta’ dawk l-assi jkunu simili.

(ċ)

akkwiżit ikollu privattiva teknoloġika. Huwa jkun illiċenzja dik il-privattiva lil ħaddieħor għall-użu esklussiv tagħhom barra s-suq domestiku, u bi skambju jirċievi perċentwal speċifikat tad-dħul barrani futur. Kemm il-privattiva teknoloġika kif ukoll il-ftehim relatat tal-liċenzja jissodisfaw il-kriterju kuntrattwali-legali għar-rikonoxximent separatament mill-avvjament anki jekk ma jkunx prattiku li l-privattiva u l-ftehim relatat tal-liċenzja jinbiegħu jew jiġu skambjati separatament minn xulxin.

B33

Il-kriterju ta’ separabbiltà jfisser li assi intanġibbli akkwistat ikun kapaċi li jiġi separat jew mifrud mill-akkwiżit u mibjugħ, ittrasferit, liċenzjat, mikri jew skambjat, jew individwalment jew flimkien ma’ kuntratt relatat jew ma’ assi jew obbligazzjoni identifikabbli. Assi intanġibbli li l-akkwirent ikun kapaċi jbigħ, jilliċenzja jew jiskambja b’mod ieħor għal xi ħaġa oħra ta’ valur jissodisfa l-kriterju ta’ separabbiltà anki jekk l-akkwirent ma jkollux il-ħsieb li jbigħu, jilliċenzjah jew jiskambjah b’mod ieħor. Assi intanġibbli akkwistat jissodisfa l-kriterju tas-separabbiltà jekk ikun hemm evidenza ta’ tranżazzjonijiet ta’ skambju għal dak it-tip ta’ assi jew għal assi ta’ tip simili, anki jekk dawk it-tranżazzjonijiet ma jkunux frekwenti u irrispettivament minn jekk l-akkwirent ikunx involut fihom. Pereżempju, listi ta’ klijenti u abbonati ta’ spiss ikunu liċenzjati u b’hekk jissodisfaw il-kriterju tas-separabbiltà. Anki jekk l-akkwiżit ikun tal-fehma li l-listi tal-klijenti tiegħu għandhom karatteristiċi differenti minn listi ta’ klijenti oħrajn, il-fatt li l-listi tal-klijenti ta’ spiss huma liċenzjati ġeneralment ifisser li l-lista ta’ klijenti akkwistata tissodisfa l-kriterju ta’ separabbiltà. Madankollu, lista ta’ klijenti akkwistata f’kombinament ta’ negozji ma tissodisfax il-kriterju ta’ separabbiltà jekk it-termini ta’ kunfidenzjalità jew ftehimiet oħrajn jipprojbixxu entità milli tbigħ, tikri jew tiskambja b’mod ieħor informazzjoni dwar il-klijenti tagħha.

B34

Assi intanġibbli li m’huwiex separabbli individwalment mill-akkwiżit jew mill-entità kkombinata jissodisfa l-kriterju ta’ separabbiltà jekk ikun separabbli meta kkombinat ma’ kuntratt relatat, jew ma’ assi jew obbligazzjoni identifikabbli. Pereżempju:

(a)	il-parteċipanti fis-suq jiskambjaw obbligazzjonijiet ta’ depożitu u assi intanġibbli relatati tar-relazzjoni mad-depożitant fi tranżazzjonijiet ta’ skambju osservabbli. Għalhekk, l-akkwirent għandu jirrikonoxxi l-assi intanġibbli tar-relazzjoni mad-depożitant separatament mill-avvjament.

(b)

akkwiżit ikollu marka reġistrata u dokumentazzjoni ta’ ħila teknika, li iżda ma tkunx irreġistrata bi privattiva, li jintużaw biex jiġi mmanifatturat il-prodott soġġett għall-marka reġistrata. Biex jiġi ttrasferit id-dritt ta’ marka reġistrata, is-sid huwa meħtieġ li jittrasferixxi wkoll dak kollu li huwa meħtieġ sabiex is-sid il-ġdid ikun jista’ jipproduċi prodott jew servizz li ma jintgħarafx minn dak li kien jipproduċi s-sid ta’ qabel. Peress li l-ħila teknika mhux reġistrata bħala privattiva għandha tkun isseparata mill-akkwiżit jew mill-entità kkombinata u għandha tkun mibjugħa jekk tinbiegħ il-marka reġistrata relatata, din tissodisfa l-kriterju ta’ separabbiltà.

Drittijiet akkwistati mill-ġdid

B35

Bħala parti minn kombinament ta’ negozji, akkwirent jista’ jakkwista mill-ġdid dritt li kien ta qabel lill-akkwiżit biex juża wieħed jew aktar mill-assi rikonoxxuti jew mhux rikonoxxuti tal-akkwirent. Eżempji ta’ drittijiet bħal dawn jinkludu dritt li jintuża l-isem kummerċjali tal-akkwirent fi ftehim ta’ konċessjoni jew dritt li tintuża t-teknoloġija tal-akkwirent taħt ftehim ta’ liċenzjar ta’ teknoloġija. Dritt akkwistat mill-ġdid huwa assi intanġibbli identifikabbli li l-akkwirent jirrikonoxxi separatament mill-avvjament. Il-paragrafu 29 jipprovdi gwida dwar il-kejl ta’ dritt akkwistat mill-ġdid u l-paragrafu 55 jipprovdi gwida dwar il-kontabilità sussegwenti għal dritt akkwistat mill-ġdid.

B36

Jekk it-termini tal-kuntratt li jagħtu lok għal dritt akkwistat mill-ġdid ikunu favorevoli jew sfavorevoli meta mqabbla mat-termini ta’ tranżazzjonijiet kurrenti fis-suq għall-istess oġġetti jew oġġetti simili, l-akkwirent għandu jirrikonoxxi qligħ jew telf ta’ saldu. Il-paragrafu B52 jipprovdi gwida dwar il-kejl ta’ dak il-qligħ jew telf ta’ saldu.

Korp ta’ ħaddiema miġbura u oġġetti oħrajn li mhumiex identifikabbli

B37

L-akkwirent għandu jeqleb f’avvjament il-valur ta’ assi intanġibbli akkwistat li ma jkunx identifikabbli fid-data tal-akkwiżizzjoni. Pereżempju, akkwirent jista’ jattribwixxi valur għall-eżistenza ta’ korp ta’ ħaddiema miġbura, li huwa ġabra eżistenti ta’ impjegati li tippermetti lill-akkwirent biex ikompli jopera negozju akkwistat mid-data tal-akkwiżizzjoni. Korp ta’ ħaddiema miġbura ma jirrappreżentax il-kapital intellettwali tal-korp ta’ ħaddiema mħarrġa—l-għarfien u l-esperjenza (spiss speċjalizzati) li l-impjegati ta’ akkwiżit iġibu magħhom f’xogħolhom. Peress li l- korp ta’ ħaddiema miġbura m’huwiex assi identifikabbli li għandu jiġi rikonoxxut separatament mill-avvjament, kwalunkwe valur attribwit lilu għandu jinqeleb f’avvjament.

B38

L-akkwirent għandu jeqleb ukoll f’avvjament kwalunkwe valur attribwit lil oġġetti li ma jikkwalifikawx bħala assi fid-data tal-akkwiżizzjoni. Pereżempju, l-akkwirent jista’ jattribwixxi valur għal kuntratti potenzjali li l-akkwirent ikun qed jinnegozja ma’ klijenti ġodda prospettivi fid-data tal-akkwiżizzjoni. Peress li dawk il-kuntratti potenzjali m’humiex fihom infushom assi fid-data tal-akkwiżizzjoni, l-akkwirent ma jirrikonoxxihomx separatament mill-avvjament. L-akkwirent m’għandux sussegwentement, għal avvenimenti li jseħħu wara d-data tal-akkwiżizzjoni, jikklassifika mill-ġdid mill-avvjament il-valur ta’ dawk il-kuntratti. Madankollu, l-akkwirent għandu jevalwa l-fatti u ċ-ċirkustanzi li jiċċirkondaw avvenimenti li jseħħu ftit wara l-akkwiżizzjoni sabiex jiddetermina jekk assi intanġibbli rikonoxxibbli separatament kienx jeżisti fid-data tal-akkwiżizzjoni.

B39

Wara r-rikonoxximent inizjali, akkwirent jikkontabilizza assi intanġibbli akkwistati f’kombinament ta’ negozji skont id-dispożizzjonijiet tal-IAS 38 Assi Intanġibbli. Madankollu, kif deskritt fil-paragrafu 3 tal-IAS 38, il-kontabilità għal xi assi intanġibbli akkwistati wara r-rikonoxximent inizjali hija preskritta minn IFRSs oħrajn.

B40

Il-kriterji ta’ identifikabbiltà jiddeterminaw jekk assi intanġibbli huwiex rikonoxxut separatament mill-avvjament. Madnakollu, il-kriterji la jipprovdu gwida dwar il-kejl tal-valur ġust ta’ assi intanġibbli u lanqas ma jirrestrinġu s-suppożizzjonijiet użati fl-istima tal-valur ġust ta’ assi intanġibbli. Pereżempju, l-akkwirent jieħu inkunsiderazzjoni suppożizzjonijiet li l-parteċipanti fis-suq jikkunsidraw, bħal aspettattivi ta’ tiġdid ta’ kuntratti fil-futur, għall-iskopijiet tal-kejl tal-valur ġust. Mhuwiex neċessarju li t-tiġdid innifsu jissodisfa l-kriterji ta’ identifikabbiltà. (Madankollu, ara l-paragrafu 29, li jistabbilixxi eċċezzjoni għall-prinċipju ta’ kejl tal-valur ġust għal drittijiet akkwistati mill-ġdid rikonoxxuti f’kombinament ta’ negozji.) Il-paragrafi 36 u 37 tal-IAS 38 jipprovdu gwida sabiex jiġi ddeterminat jekk assi intanġibbli għandhomx ikunu kkombinati f’unità waħda ta’ kont ma’ assi oħrajn intanġibbli jew tanġibbli.

KEJL TAL-VALUR ĠUST TA’ ASSI PARTIKOLARI IDENTIFIKABBLI U TA’ INTERESS LI MA JAGĦTIX KONTROLL F’AKKWIŻIT (APPLIKAZZJONI TAL-PARAGRAFI 18 U 19)

Assi bi flussi inċerti ta’ flus (konċessjonijiet ta’ valutazzjoni)

B41

L-akkwirent m’għandux jirrikonoxxi konċessjoni separata ta’ valutazzjoni sa mid-data tal-akkwiżizzjoni għal assi akkwistati f’kombinament ta’ negozji li jiġu mkejla skont il-valuri ġusti tagħhom fid-data tal-akkwiżizzjoni minħabba li l-effetti ta’ inċertezza dwar flussi futuri ta’ flus jkunu inklużi fil-kejl tal-valur ġust. Pereżempju, peress li dan l-IFRS jeħtieġ li l-akkwirent ikejjel l-ammonti riċevibbli akkwistati, inklużi s-self fiss, skont il-valur ġust tagħhom fid-data tal-akkwiżizzjoni, l-akkwirent ma jirrikonoxxix konċessjoni separata ta’ valutazzjoni għall-flussi kuntrattwali ta’ flus li jitqiesu li ma jistgħux jinġabru f’dik id-data.

Assi soġġetti għal kirjiet operattivi li fihom l-akkwiżit ikun sid il-kera

B42

Għall-kejl tal-valur ġust fid-data tal-akkwiżizzjoni ta’ assi bħal bini jew privattiva li tkun soġġetta għal kiri operattiv fejn l-akkwiżit ikun sid il-kera, l-akkwirent għandu jikkunsidra t-termini tal-kuntratt ta’ kiri. Fi kliem ieħor l-akkwirent ma jirrikonoxxix assi jew obbligazzjoni separata jekk it-termini tal-kiri operattiv ikunu jew favorevoli jew sfavorevoli meta mqabbla mat-termini tas-suq kif meħtieġ mill-paragrafu B29 għal kirjiet fejn l-akkwiżit ikun sid il-kera.

Assi li l-akkwirent ma jkollux il-ħsieb li juża jew li jkun bi ħsiebu juża b’mod li jkun differenti mill-mod kif jużawhom parteċipanti oħrajn fis-suq

B43

Għal raġunijiet ta’ kompetizzjoni jew raġunijiet oħrajn, l-akkwirent jista’ ma jkollux ħsieb li juża assi akkwistat, bħal pereżempju, assi intanġibbli ta’ riċerka u żvilupp, jew jista’ jkollu l-ħsieb li juża l-assi b’mod differenti minn kif jużawh parteċipanti oħrajn fis-suq. Madankollu, l-akkwirent għandu jkejjel l-assi skont il-valur ġust ikkalkulat skont l-użu tiegħu minn parteċipanti oħrajn fis-suq.

Interess li ma jagħtix kontroll f’akkwiżit

B44

Dan l-IFRS jippermetti lill-akkwirent li jkejjel interess li ma jagħtix kontroll fl-akkwiżit skont il-valur ġust tiegħu fid-data tal-akkwiżizzjoni. Xi kultant akkwirent ikun jista’ jkejjel il-valur ġust fid-data tal-akkwiżizzjoni ta’ interess li ma jagħtix kontroll fuq il-bażi tal-prezzijiet ta’ suq attiv għall-ishma azzjonarji mhux miżmuma mill-akkwirent. F’sitwazzjonijiet oħrajn, madankollu, prezz ta’ suq attiv għall-ishma azzjonarji ma jkunx disponibbli. F’dawk is-sitwazzjonijiet, l-akkwirent ikejjel il-valur ġust tal-interess li ma jagħtix kontroll permezz ta’ tekniki oħrajn ta’ valutazzjoni.

B45

Il-valuri ġusti tal-interess tal-akkwirent fl-akkwiżit u tal-interess li ma jagħtix kontroll fuq bażi ta’ sehem b’sehem jistgħu jvarjaw. Id-differenza ewlenija aktarx li tkun l-inklużjoni ta’ primjum ta’ kontroll fil-valur ġust sehem b’sehem tal-interess tal-akkwirent fl-akkwiżit jew, bil-maqlub, l-inklużjoni ta’ skont għan-nuqqas ta’ kontroll (imsejjaħ ukoll skont ta’ minoranza) fil-valur ġust sehem b’sehem tal-interess li ma jagħtix kontroll.

KEJL TAL-AVVJAMENT JEW TA’ QLIGĦ MINN XIRI BL-IRĦIS

Kejl tal-valur ġust fid-data tal-akkwiżizzjoni tal-interess tal-akkwirent fl-akkwiżit permezz ta’ tekniki ta’ valutazzjoni (applikazzjoni tal-paragrafu 33)

B46

F’kombinament ta’ negozji mwettaq mingħajr it-trasferiment ta’ ħlas, l-akkwirent għandu jissostitwixxi l-valur ġust fid-data tal-akkwiżizzjoni tal-interess tiegħu fl-akkwiżit minflok il-valur ġust fid-data tal-akkwiżizzjoni tal-ħlas ittrasferit biex jitkejjel l-avvjament jew il-qligħ fuq xiri bl-irħis (ara l-paragrafi 32-34). L-akkwirent għandu jkejjel il-valur ġust fid-data tal-akkwiżizzjoni tal-interess tiegħu fl-akkwiżit billi juża teknika waħda jew aktar ta’ valutazzjoni li jkunu xierqa fiċ-ċirkustanzi u li għalihom ikun hemm data suffiċjenti disponibbli. Jekk tintuża aktar minn teknika waħda ta’ valutazzjoni, l-akkwirent għandu jevalwa r-riżultati tat-tekniki, waqt li jikkunsidra r-relevanza u l-affidabbiltà tal-inputs użati u kemm ikun hemm data disponibbli.

Kunsiderazzjonijiet speċjali għall-applikazzjoni tal-metodu tal-akkwiżizzjoni għal kombinamenti ta’ entitajiet ta’ benefiċċju komuni (applikazzjoni tal-paragrafu 33)

B47

Meta żewġ entitajiet ta’ benefiċċju komuni jikkombinaw flimkien, il-valur ġust tal-interessi azzjonarji jew tal-membri fl-akkwiżit (jew il-valur ġust tal-akkwiżit) jista’ jitkejjel b’mod aktar affidabbli mill-valur ġust tal-interessi tal-membri ttrasferiti mill-akkwirent. F’dik is-sitwazzjoni, il-paragrafu 33 jeħtieġ li l-akkwirent jiddetermina l-ammont ta’ avvjament billi juża l-valur ġust tad-data tal-akkwiżizzjoni tal-interessi azzjonarji tal-akkwiżit minflok il-valur ġust tad-data tal-akkwiżizzjoni tal-interessi azzjonarji tal-akkwirent ittrasferiti bħala ħlas. Barra minn hekk, l-akkwirent f’kombinament ta’ entitajiet ta’ benefiċċju komuni għandu jirrikonoxxi l-assi netti tal-akkwiżit bħala żieda diretta mal-kapital jew l-ekwità fir-rapport tiegħu tal-pożizzjoni finanzjarja, u mhux bħala żieda fil-qligħ imfaddal, li huwa konsistenti mal-mod kif tipi oħrajn ta’ entitajiet japplikaw il-metodu tal-akkwiżizzjoni.

B48

Għalkemm f’ħafna modi huma simili għal negozji oħrajn, entitajiet ta’ benefiċċju komuni għandhom karatteristiċi distinti minħabba l-fatt li l-membri tagħhom huma kemm klijenti kif ukoll sidien. Membri ta’ entitajiet ta’ benefiċċju komuni ġeneralment jippretendu li jirċievu benefiċċji għas-sħubija tagħhom, spiss fil-forma ta’ ħlasijiet skontati għal prodotti u servizzi jew ta’ dividendi ta’ patronċinju. Il-porzjon ta’ dividendi ta’ patronċinju allokat lil kull membru spiss huwa bbażat fuq l-ammont ta’ negozju li l-membru jkun għamel mal-entità ta’ benefiċċju komuni matul is-sena.

B49

Kejl tal-valur ġust ta’ entità ta’ benefiċċju komuni għandu jinkludi s-suppożizzjonijiet li l-parteċipanti fis-suq jagħmlu dwar benefiċċji futuri għall-membri kif ukoll kwalunwe suppożizzjoni relevanti oħra li l-parteċipanti fis-suq jagħmlu dwar l-entità ta’ benefiċċju komuni. Pereżempju, jista’ jintuża mudell ta’ stima ta’ flussi ta’ flus sabiex jiġi ddeterminat il-valur ġust ta’ entità ta’ benefiċċju komuni. Il-flussi ta’ flus użati bħala inputs għall-mudell għandhom ikunu bbażati fuq il-flussi ta’ flus mistennija tal-entità ta’ benefiċċju komuni, li aktarx li jirriflettu tnaqqis għal benefiċċji tal-membri, bħal ħlasijiet skontati għal prodotti u servizzi.

IDENTIFIKAZZJONI TA’ X’INHU PARTI MINN TRANŻAZZJONI TA’ KOMBINAMENT TA’ NEGOZJI (APPLIKAZZJONI TAL-PARAGRAFI 51 U 52)

B50

L-akkwirent għandu jikkunsidra l-fatturi li ġejjin, li la huma reċiprokament esklussivi u lanqas individwalment konklużivi, biex jiddetermina jekk tranżazzjoni hijiex parti mill-iskambju għall-akkwiżit jew jekk it-tranżazzjoni hijiex separata mill-kombinament ta’ negozji:

(a)

ir-raġunijiet għat-tranżazzjoni—Li wieħed jifhem ir-raġunijiet għalfejn il-partijiet fil-kombinament (l-akkwirent u l-akkwiżit u s-sidien, id-diretturi u l-maniġers tagħhom—kif ukoll l-aġenti tagħhom) daħlu fi tranżazzjoni jew arranġament partikolari jista’ jixħet dawl fuq jekk hijiex parti mill-ħlas ittrasferit u mill-assi akkwistati jew l-obbligazzjonijiet merfugħa. Pereżempju, jekk tranżazzjoni ssir primarjament għall-benefiċċju tal-akkwirent jew tal-entità kkombinata, aktar milli primarjament għall-benefiċċju tal-akkwiżit jew dawk li l kienu s-sidien tiegħu qabel il-kombinament, huwa inqas probabbli li dak il-porzjon tal-prezz tat-tranżazzjoni mħallas (u kull assi jew obbligazzjoni relatata) ikun parti mill-iskambju għall-akkwiżit. Għaldaqstant, l-akkwirent jikkontabilizza dak il-porzjon separatament mill-kombinament ta’ negozji.

(b)

min ta bidu għat-tranżazzjoni—Li wieħed jifhem min ta bidu għat-tranżazzjoni jista’ wkoll jixħet dawl fuq jekk hijiex parti mill-iskambju għall-akkwiżit. Pereżempju, tranżazzjoni jew avveniment ieħor li jingħata bidu mill-akkwirent jista’ jsir għall-iskop li jiġu pprovduti benefiċċji ekonomiċi futuri lill-akkwirent jew lill-entità kkombinata bi ftit jew ebda benefiċċju riċevut mill-akkwiżit jew minn dawk li kienu s-sidien tiegħu qabel il-kombinament. Min-naħa l-oħra, tranżazzjoni jew arranġament li jingħata bidu mill-akkwiżit jew dawk li qabel kienu s-sidien tiegħu inqas huwa probabbli li jkun għall-benefiċċju tal-akkwirent jew tal-entità kkombinata u aktar probabbli li jkun parti mit-tranżazzjoni tal-kombinament ta’ negozji.

(ċ)

meta ssir it-tranżazzjoni—Iż-żmien meta ssir it-tranżazzjoni jista’ wkoll jixħet dawl fuq jekk hijiex parti mill-iskambju għall-akkwiżit. Pereżempju, tranżazzjoni bejn l-akkwirent u l-akkwiżit li sseħħ matul in-negozjati tat-termini ta’ kombinament ta’ negozji tista’ tkun saret bil-ħsieb tal-kombinament ta’ negozji sabiex jiġu pprovduti benefiċċji ekomoniċi futuri lill-akkwirent tal-entità kkombinata. Jekk dan ikun il-każ, l-akkwiżit jew dawk li kienu s-sidien tiegħu qabel il-kombinament ta’ negozji aktarx li jirċievu ftit jew ebda benefiċċju mit-tranżazzjoni ħlief għall-benefiċċji li jirċievu bħala parti mill-entità kkombinata.

Saldu effettiv ta’ relazzjoni li kienet teżisti qabel bejn l-akkwirent u l-akkwiżit f’kombinament ta’ negozji (applikazzjoni tal-paragrafu 52(a))

B51

L-akkwirent u l-akkwiżit jista’ jkollhom relazzjoni li kienet teżisti qabel ma kkontemplaw il-kombinament ta’ negozji, hawnhekk imsejħa “relazzjoni li kienet teżisti qabel”. Relazzjoni li kienet teżisti qabel bejn l-akkwirent u l-akkwiżit tista’ tkun kuntrattwali (pereżempju, bejjiegħ u klijent jew liċenzjatur u liċenzjat) jew mhux kuntrattwali (pereżempju, attur u konvenut).

B52

Jekk il-kombinament ta’ negozji effettivament jissalda relazzjoni li kienet teżisti qabel, l-akkwirent jirrikonoxxi qligħ jew telf, imkejjel skont kif ġej:

(a)	għal relazzjoni mhux kuntrattwali li kienet teżisti qabel (bħal kawża legali), il-valur ġust.

(b)

għal relazzjoni kuntrattwali li kienet teżisti qabel, l-inqas bejn (i) u (ii):

(i)

l-ammont li bih il-kuntratt ikun favorevoli jew sfavorevoli mill-perspettiva tal-akkwirent meta mqabbel mat-termini għal tranżazzjonijiet kurrenti fis-suq għall-istess oġġett jew oġġetti simili. (Kuntratt sfavorevoli huwa kuntratt li huwa sfavorevoli f’termini ta’ termini kurrenti tas-suq. Mhuwiex neċessarjament kuntratt oneruż fejn il-kosti li ma jistgħux jiġu evitati biex jintlaħqu l-obbligi taħt il-kuntratt jeċċedu l-benefiċċji ekonomiċi mistennija li jkunu riċevuti minnu).

(ii)	l-ammont ta’ kwalunkwe dispożizzjoni ta’ saldu mniżżla fil-kuntratt li tkun disponibbli għall-kontroparti li għaliha l-kuntratt ikun sfavorevoli.

Jekk it-(ii) ikun inqas mill-(i), id-differenza tiġi inkluża bħala parti mill-kontabilità tal-kombinament ta’ negozji.

L-ammont ta’ qligħ jew telf rikonoxxut jista’ jiddependi parzjalment fuq jekk l-akkwirent kienx irrikonoxxa qabel assi jew obbligazzjoni relatata, u l-qligħ jew telf irrapportat b’hekk jista’ jvarja mill-ammont ikkalkulat bl-applikazzjoni tar-rekwiżiti hawn fuq imsemmija.

B53

Relazzjoni li kienet teżisti qabel tista’ tkun kuntratt li l-akkwirent jirrikonoxxi bħala dritt akkwistat mill-ġdid. Jekk il-kuntratt jinkludi termini li huma favorevoli jew sfavorevoli meta mqabbla mal-prezzijiet għal tranżazzjonijiet kurrenti fis-suq għall-istess oġġetti jew oġġetti simili, l-akkwirent jirrikonoxxi, separatament mill-kombinament ta’ negozji, qligħ jew telf għas-saldu effettiv tal-kuntratt, imkejjel skont il-paragrafu B52.

Arranġamenti għal ħlasijiet kontinġenti lill-impjegati jew lill-azzjonisti li jbiegħu (applikazzjoni tal-paragrafu 52(b))

B54

Jekk arranġamenti għal ħlasijiet kontinġenti lill-impjegati jew lill-azzjonisti li jbiegħu humiex ħlas kontinġenti fil-kombinament ta’ negozji jew tranżazzjonijiet separati jiddependi fuq in-natura tal-arranġamenti. Sabiex tiġi evalwata n-natura tal-arranġament ikun utli li wieħed jifhem ir-raġunijiet għalfejn il-ftehim ta’ akkwiżizzjoni jinkludi dispożizzjoni għal ħlasijiet kontinġenti, min ta bidu għall-arranġament u meta l-partijiet daħlu għall-arranġament.

B55

Jekk ma jkunx ċar jekk arranġament għal ħlasijiet lill-impjegati jew lill-azzjonisti li jbiegħu huwiex parti mill-iskambju għall-akkwiżit jew huwiex tranżazzjoni separata mill-kombinament ta’ negozji, l-akkwirent għandu jikkunsidra dawn l-indikaturi:

(a)

Kontinwazzjoni ta’ impjieg—It-termini ta’ kontinwazzjoni ta’ impjieg mill-azzjonisti li jbiegħu li jsiru impjegati kruċjali jistgħu jkunu indikatur tas-sustanza ta’ arranġament ta’ ħlas kontinġenti. It-termini relevanti tal-kontinwazzjoni tal-impjieg jistgħu jiġu inklużi fi ftehim ta’ impjieg, fi ftehim tal-akkwiżizzjoni jew f’xi dokument ieħor. Arranġament ta’ ħlas kontinġenti fejn il-ħlasijiet awtomatikament jintilfu jekk jintemm l-impjieg huwa remunerazzjoni għal servizzi ta’ wara l-kombinament. Arranġamenti li fihom il-ħlasijiet kontinġenti m’humiex affettwati mit-temm tal-impjieg jistgħu jindikaw li l-ħlasijiet kontinġenti huma ħlas addizzjonali u mhux remunerazzjoni.

(b)	Tul ta’ żmien tal-kontinwazzjoni tal-impjieg—Jekk il-perijodu tal-impjieg meħtieġ ikun daqs jew itwal mill-perijodu tal-ħlas kontinġenti, dak il-fatt jista’ jindika li l-ħlasijiet kontinġenti huma, essenzjalment, remunerazzjoni.

(ċ)

Livell ta’ remunerazzjoni—Sitwazzjonijiet fejn ir-remunerazzjoni ta’ impjegat apparti mill-ħlasijiet kontinġenti tkun f’livell raġonevoli meta mqabbla ma’ dik ta’ impjegati kruċjali oħrajn fl-entità kkombinata jistgħu jindikaw li l-ħlasijiet kontinġenti huma ħlas addizzjonali aktar milli remunerazzjoni.

(d)

Ħlasijiet inkrementali lill-impjegati—Jekk l-azzjonisti li jbiegħu u li ma jsirux impjegati jirċievu ħlasijiet kontinġenti aktar baxxi fuq bażi ta’ sehem b’sehem mill-azzjonisti li jbiegħu u li jsiru impjegati tal-entità kkombinata, dak il-fatt jista’ jindika li l-ammont inkrementali tal-ħlasijiet kontinġenti lill-azzjonisti li jbiegħu u li jsiru impjegati huwa remunerazzjoni.

(e)

Numru ta’ ishma miżmuma—In-numru relattiv ta’ ishma li jkollhom l-azzjonisti li jbiegħu li jibqgħu bħala kruċjali importanti jista’ jkun indikatur tas-sustanza tal-arranġament tal-ħlas kontinġenti. Pereżempju, jekk l-azzjonisti li jbiegħu u li sostanzjalment kellhom l-ishma kollha fl-akkwiżit ikomplu bħala impjegati kruċjali, dak il-fatt jista’ jindika li l-arranġament hu, essenzjalment, arranġament għall-qsim ta’ profitti intenzjonat biex jipprovdi remunerazzjoni għal servizzi ta’ wara l-kombinament. Alternattivament, jekk l-azzjonisti li jbiegħu u li jkomplu bħala impjegati kruċjali kellhom biss numru żgħir ta’ ishma fl-akkwiżit u l-azzjonisti kollha li jbiegħu jirċievu l-istess ammont ta’ ħlas kontinġenti fuq bażi ta’ sehem b’sehem, dak il-fatt jista’ jindika li l-ħlasijiet kontinġenti huma ħlas addizzjonali. L-interessi propjetarji ta’ qabel l-akkwiżizzjoni miżmuma minn partijiet relatati mal-azzjonisti li jbiegħu u li jkomplu bħala impjegati kruċjali, bħal membri tal-familja, għandhom jiġu kkunsidrati wkoll.

(f)

Konnessjoni mal-valutazzjoni—Jekk il-ħlas inizjali ttrasferit fid-data tal-akkwiżizzjoni huwa bbażat fuq livell in-naħa t’isfel ta’ medda stabbilita fil-valutazzjoni tal-akkwiżit u l-formola kontinġenti hija relatata ma’ dak il-metodu ta’ valutazzjoni, dak il-fatt jista’ jissuġġerixxi li l-ħlasijiet kontinġenti huma ħlas addizzjonali. Alternattivament, jekk il-formola ta’ ħlas kontinġenti tkun konsistenti ma’ arranġamenti preċedenti għall-qsim ta’ profitti, dak il-fatt jista’ jissuġġerixxi li l-qofol tal-arranġament huwa li jipprovdi remunerazzjoni.

(g)

Formola biex jiġi ddeterminat il-ħlas—Il-formola użata biex jiġi ddeterminat il-ħlas kontinġenti tista’ tkun utli fl-evalwazzjoni tal-qofol tal-arranġament. Pereżempju, jekk ħlas kontinġenti huwa ddeterminat fuq il-bażi ta’ multiplu tad-dħul, dak jista’ jissuġġerixxi li l-obbligu huwa ħlas kontinġenti fil-kombinament ta’ negozji u li l-formola hija intenzjonata biex tistabbilixxi jew tivverifika l-valur ġust tal-akkwiżit. Għall-kuntrarju, ħlas kontinġenti li huwa perċentwal speċifikat tad-dħul jista’ jissuġġerixxi li l-obbligu lejn l-impjegati huwa arranġament għall-qsim ta’ profitti biex jiġu rremunerati l-impjegati għas-servizzi mogħtija.

(h)

Ftehimiet u kwistjonijiet oħrajn—It-termini ta’ arranġamenti oħrajn mal-azzjonisti li jbigħu (bħal ftehimiet biex ma ssirx kompetizzjoni, kuntratti eżekutorji, kuntratti ta’ konsulenza u ftehimiet għall-kiri ta’ propjetà) u t-trattament għall-iskopijiet tat-taxxa fuq id-dħul ta’ ħlasijiet kontinġenti jistgħu jindikaw li l-ħlasijiet kontinġenti huma attribwibbli għal xi ħaġa differenti mill-ħlas għall-akkwiżit. Pereżempju, b’konnessjoni mal-akkwiżizzjoni, l-akkwirent jista’ jidħol għal arranġament għall-kiri ta’ propjetà ma’ azzjonist sinifikanti li jkun qed ibigħ. Jekk il-ħlasijiet tal-kera speċifikati fil-kuntratt tal-kiri jkunu inqas b’mod sinifikanti minn dawk tas-suq, xi wħud mill-ħlasijiet kontinġenti jew kollha lil sid il-kera (l-azzjonist li jbigħ) meħtieġa permezz ta’ arranġament separat għal ħlasijiet kontinġenti jistgħu jkunu, essenzjalment, ħlasijiet għall-użu tal-propjetà mikrija li l-akkwirent għandu jirrikonoxxi separatament fir-rapporti finanzjarji tiegħu ta’ wara l-kombinament. Għall-kuntrarju, jekk kuntratt ta’ kiri jispeċifika ħlasijiet ta’ kera li huma konsistenti mat-termini tas-suq għall-propjetà mikrija, l-arranġament għal ħlasijiet kontinġenti lill-azzjonist li jbigħ jista’ jkun ħlas kontinġenti fil-kombinament ta’ negozji.

Premji ta’ pagamenti bbażati fuq l-ishma tal-akkwirent skambjati għal premji miżmuma mill-impjegati tal-akkwiżit (applikazzjoni tal-paragrafu 52(b))

B56

Akkwirent jista’ jiskambja l-premji ta’ pagamenti bbażati fuq l-ishma (premji ta’ sostituzzjoni) għal premji miżmuma mill-impjegati tal-akkwiżit. L-iskambji ta’ opzjonijiet ta’ ishma jew premji oħra ta’ pagamenti bbażati fuq l-ishma f’konnessjoni ma’ kombinament ta’ negozji huma kkontabilizzati bħala modifikazzjonijiet ta’ premji ta’ pagamenti bbażati fuq l-ishma skont l-IFRS 2 Pagament ibbażat fuq l-Ishma. Jekk l-akkwirent ikun obbligat li jissostitwixxi l-premji tal-akkwiżit, il-kejl kollu jew parti minnu, ibbażat fuq is-suq, tal-premji ta’ sostituzzjoni tal-akkwirent għandu jiġi inkluż fil-kejl tal-ħlas ittrasferit fil-kombinament ta’ negozji. L-akkwirent huwa obbligat li jissostitwixxi l-premji tal-akkwiżit jekk l-akkwiżit jew l-impjegati tiegħu jkollhom il-kapaċità li jinfurzaw is-sostituzzjoni. Pereżempju, għall-iskopijiet tal-applikazzjoni ta’ dan ir-rekwiżit, l-akkwirent huwa obbligat li jissostitwixxi l-premji tal-akkwiżit jekk is-sostituzzjoni tkun meħtieġa minn:

(a)	it-termini tal-ftehim tal-akkwiżizzjoni;

(b)	it-termini tal-premji tal-akkwiżit; jew

(ċ)	il-liġijiet jew regolamenti applikabbli.

F’xi sitwazzjonijiet, il-premji tal-akkwiżit jistgħu jiskadu bħala konsegwenza ta’ kombinament ta’ negozji. Jekk l-akkwirent jissostitwixxi dawk il-premji minkejja li ma jkunx obbligat li jagħmel hekk, il-kejl kollu, ibbażat fuq is-suq, tal-premji ta’ sostituzzjoni għandu jiġi rikonoxxut bħala kost tar-remunerazzjoni fir-rapporti finanzjarji ta’ wara l-kombinament. Dan ifisser li xejn mill-kejl ibbażat fuq is-suq ta’ dawk il-premji m’għandu jiġi inkluż fil-kejl tal-ħlas ittrasferit fil-kombinament ta’ negozji.

B57

Biex jiġi ddeterminat il-porzjon ta’ premju ta’ sostituzzjoni li jkun parti mill-ħlas ittrasferit għall-akkwiżit u l-porzjon li jkun remunerazzjoni għal servizz ta’ wara l-kombinament, l-akkwirent għandu jkejjel kemm il-premji ta’ sostituzzjoni mogħtija mill-akkwirent kif ukoll il-premji tal-akkwiżit sa mid-data tal-akkwiżizzjoni skont l-IFRS 2. Il-porzjon tal-kejl ibbażat fuq is-suq tal-premju ta’ sostituzzjoni li huwa parti mill-ħlas ittrasferit bi skambju għall-akkwiżit huwa ugwali għall-porzjon tal-premju tal-akkwiżit li huwa attribwibbli għas-servizz ta’ qabel il-kombinament.

B58

Il-porzjon tal-premju ta’ sostituzzjoni attribwibbli għas-servizz ta’ qabel il-kombinament huwa l-kejl ibbażat fuq is-suq tal-premju tal-akkwiżit immultiplikat bil-proporzjon ta’ bejn il-porzjon tal-perijodu ta’ vestiment komplut u l-akbar mill-perijodu totali ta’ vestiment jew il-perijodu oriġinali ta’ vestiment tal-premju tal-akkwiżit. Il-perijodu ta’ vestiment huwa l-perijodu li matulu l-kundizzjonijiet speċifikati kollha tal-vestiment għandhom jiġu ssodisfati. Kundizzjonijiet ta’ vestiment huma ddefiniti fl-IFRS 2.

B59

Il-porzjon ta’ premju ta’ sostituzzjoni mhux vestit attribwibbli għal servizz ta’ wara l-kombinament, u għalhekk rikonoxxut bħala kost ta’ remunerazzjoni fir-rapporti finanzjarji ta’ wara l-kombinament, huwa ugwali għat-total tal-kejl ibbażat fuq is-suq tal-premju ta’ sostituzzjoni wara li jitnaqqas l-ammont attribwit għal servizz ta’ wara l-kombinament. Għalhekk, l-akkwirent jattribwixxi kwalunkwe eċċess tal-kejl ibbażat fuq is-suq tal-premju ta’ sostituzzjoni fuq il-kejl ibbażat fuq is-suq tal-premju tal-akkwiżit għal servizz ta’ wara l-kombinament u jirrikonoxxi dak l-eċċess bħala kost ta’ remunerazzjoni fir-rapporti finanzjarji ta’ wara l-kombinament. L-akkwirent għandu jattribwixxi porzjon ta’ premju ta’ sostituzzjoni lil servizz ta’ wara l-kombinament jekk ikun jeħtieġ servizz ta’ wara l-kombinament, irrispettivament minn jekk l-impjegati jkunux taw is-servizz kollu meħtieġ biex il-premji tagħhom tal-akkwiżit jiġu vestiti qabel id-data tal-akkwiżizzjoni.

B60

Il-porzjon ta’ premju ta’ sostituzzjoni mhux vestit attribwibbli għal servizz ta’ qabel il-kombinament, kif ukoll il-porzjon attribwibbli għal servizz ta’ wara l-kombinament, għandu jirrifletti l-aħjar stima possibbli tan-numru ta’ premji ta’ sostituzzjoni li jkunu mistennija li jiġu vestiti. Pereżempju, jekk il-kejl ibbażat fuq is-suq tal-porzjon ta’ premju ta’ sostituzzjoni attribwit lil servizz ta’ wara l-kombinament ikun CU100 (100 unità monetarja) u l-akkwirent ikun jistenna li 95 fil-mija biss tal-premju ser jiġu vestiti, l-ammont inkluż fil-ħlas ittrasferit fil-kombinament ta’ negozji huwa CU95. Bidliet fin-numru stmat ta’ premji ta’ sostituzzjoni mistennija li jiġu vestiti huma riflessi fil-kost ta’ remunerazzjoni għall-perijodi li matulhom iseħħu l-bidliet jew ir-rinunzji—mhux bħala aġġustamenti għall-ħlas ittrasferit fil-kombinament ta’ negozji. Bl-istess mod, l-effetti ta’ avvenimenti oħrajn, bħal modifiki jew l-eżitu finali ta’ premji b’kundizzjonijiet ta’ prestazzjoni, li jseħħu wara d-data tal-akkwiżizzjoni għandhom jiġu kkontabilizzati skont l-IFRS 2 sabiex jiġi ddeterminat il-kost tar-remunerazzjoni għall-perijodu li fih iseħħ avveniment.

B61

L-istess rekwiżiti li japplikaw sabiex jiġu ddeterminati l-porzjonijiet ta’ premju ta’ sostituzzjoni attribwibbli għas-servizz ta’ qabel u ta’ wara l-kombinament japplikaw irrispettivament minn jekk premju ta’ sostituzzjoni jkunx ikklassifikat bħala obbligazzjoni jew bħala strument azzjonarju skont id-dispożizzjonijiet tal-IFRS 2. Il-bidliet kollha fil-kejl ibbażat fuq is-suq ta’ premji kklassifikati bħala obbligazzjonijiet wara d-data tal-akkwiżizzjoni u l-effetti relatati tat-taxxa fuq id-dħul huma rikonoxxuti fir-rapporti finanzjarji tal-akkwirent ta’ wara l-kombinament fil-perijodu(i) meta jseħħu l-bidliet.

B62

L-effetti tat-taxxa fuq id-dħul ta’ premji ta’ sostituzzjoni ta’ pagamenti bbażati fuq l-ishma għandhom jiġu rikonoxxuti skont id-dispożizzjonijiet tal-IAS 12 Taxxi fuq id-Dħul.

IFRSS OĦRAJN LI JIPPROVDU GWIDA DWAR KEJL U KONTABILITÀ SUSSEGWENTI (APPLIKAZZJONI TAL-PARAGRAFU 54)

B63

Eżempji ta’ IFRSs oħrajn li jipprovdu gwida dwar il-kejl u l-kontabilità sussegwenti għal assi akkwistati u obbligazzjonijiet merfugħa jew imġarrba f’kombinament ta’ negozji jinkludu:

(a)

L-IAS 38 jippreskrivi l-kontabilità għal assi intanġibbli identifikabbli akkwistati f’kombinament ta’ negozji. L-akkwirent ikejjel l-avvjament skont l-ammont rikonoxxut fid-data tal-akkwiżizzjoni wara li jitnaqqsu kwalunkwe telf ta’ indeboliment. L-IAS 36 Indeboliment ta’ Assi jippreskrivi l-kontabilità għal telf ta’ indeboliment.

(b)	L-IFRS 4 Kuntratti tal-Assigurazzjoni jipprovdi gwida dwar il-kontabilità sussegwenti għal kuntratt tal-assigurazzjoni akkwistat f’kombinament ta’ negozji.

(ċ)	L-IAS 12 jippreskrivi l-kontabilità sussegwenti għal assi ta’ taxxa differita (inklużi assi ta’ taxxa differita mhux rikonoxxuti) u għal obbligazzjonijiet akkwistati f’kombinament ta’ negozji.

(d)	L-IFRS 2 jipprovdi gwida dwar kejl u kontabilità sussegwenti għall-porzjon ta’ premji ta’ pagamenti bbażati fuq l-ishma maħruġa minn akkwirent li jkun attribwibbli għas-servizzi futuri ta’ impjegati.

(e)	L-IAS 27 (kif emendat mill-Bord tal-Istandards Internazzjonali tal-Kontabilità fl-2008) jipprovdi gwida dwar kontabilità għal bidliet fl-interess propjetarju ta’ kumpannija prinċipali f’kumpannija sussidjarja wara li jinkiseb il-kontroll.

ŻVELAR TA’ INFORMAZZJONI (APPLIKAZZJONI TAL-PARAGRAFI 59 U 61)

B64

Sabiex jintlaħaq l-objettiv fil-paragrafu 59, l-akkwirent għandu jiżvela l-informazzjoni li ġejja għal kull kombinament ta’ negozji li jseħħ matul il-perijodu tar-rapportaġġ:

(a)	l-isem u deskrizzjoni tal-akkwiżit.

(b)	id-data tal-akkwiżizzjoni.

(ċ)	il-perċentwal ta’ strumenti azzjonarji bid-dritt tal-vot akkwistati.

(d)	ir-raġunijiet ewlenin għall-kombinament tan-negozji u deskrizzjoni ta’ kif l-akkwirent kiseb kontroll tal-akkwiżit.

(e)	deskrizzjoni kwalitattiva tal-fatturi li jikkostitwixxu l-avvjament rikonoxxut, bħal sinerġiji mistennija mill-kombinament ta’ operazzjonijiet tal-akkwiżit u tal-akkwirent, assi intanġibbli li ma jikkwalifikawx għal rikonoxximent separat jew fatturi oħrajn.

(f)

il-valur ġust fid-data tal-akkwiżizjoni tal-ħlas totali ttrasferit u l-valur ġust fid-data tal-akkwiżizzjoni ta’ kull klassi maġġuri ta’ ħlas, bħal m’huma:

(i)

flus;

(ii)	assi oħrajn tanġibbli jew intanġibbli, inkluż negozju jew kumpannija sussidjarja tal-akkwirent;

(iii)

obbligazzjonijiet imġarrba, pereżempju, obbligazzjoni ta’ ħlas kontinġenti; u

(iv)	interessi azzjonarji tal-akkwirent, inkluż in-numru ta’ strumenti jew interessi maħruġa jew li jistgħu jinħarġu u l-metodu biex jiġi ddeterminat il-valur ġust ta’ dawk l-istrumenti jew interessi.

(g)

għal arranġamenti ta’ ħlas kontinġenti u assi ta’ indennizz:

(i)	l-ammont rikonoxxut sa mid-data tal-akkwiżizzjoni;

(ii)	deskrizzjoni tal-arranġament u l-bażi biex jiġi ddeterminat l-ammont tal-ħlas; u

(iii)

stima tal-medda ta’ eżiti (mhux skontati) jew, jekk medda ma tistax tiġi stmata, dak il-fatt u r-raġunijiet għalfejn medda ma tistax tiġi stmata. Jekk l-ammont massimu tal-ħlas ma jkunx limitat, l-akkwirent għandu jiżvela dak il-fatt.

(h)

għal ammonti riċevibbli akkwistati:

(i)	il-valur ġust tal-ammonti riċevibbli;

(ii)	l-ammonti kuntrattwali grossi riċevibbli; u

(iii)

l-aħjar stima fid-data tal-akkwiżizzjoni tal-flussi kuntrattwali ta’ flus mhux mistennija li jinġabru.

L-iżvelar għandu jiġi pprovdut għal kull klassi prinċipali ta’ ammonti riċevibbli, bħal self, kirjiet finanzjarji diretti u kull klassi oħra ta’ ammonti riċevibbli.

(i)	l-ammonti rikonoxxuti sa mid-data tal-akkwiżizzjoni għal kull klassi prinċipali ta’ assi akkwistati u obbligazzjonijiet merfugħa.

(j)

għal kull obbligazzjoni kontinġenti rikonoxxuta skont il-paragrafu 23, l-informazzjoni meħtieġa fil-paragrafu 85 tal-IAS 37 Provvedimenti, Obbligazzjonijiet Kontinġenti u Assi Kontinġenti. Jekk obbligazzjoni kontinġenti ma tkunx rikonoxxuta minħabba li l-valur ġust tagħha ma jkunx jista’ jitkejjel b’mod affidabbli, l-akkwirent għandu jiżvela:

(i)	l-informazzjoni meħtieġa mill-paragrafu 86 tal-IAS 37; u

(ii)	ir-raġunijiet għalfejn l-obbligazzjoni ma tistax tiġi mkejla b’mod affidabbli.

(k)	l-ammont totali ta’ avvjament li jkun mistenni li jista’ jitnaqqas għal skopijiet ta’ taxxa.

(l)

għal tranżazzjonijiet li huma rikonoxxuti separatament mill-akkwiżizzjoni ta’ assi u l-irfigħ ta’ obbligazzjonijiet fil-kombinament ta’ negozji skont il-paragrafu 51:

(i)	deskrizzjoni ta’ kull tranżazzjoni;

(ii)	kif l-akkwirent irrapporta kull tranżazzjoni;

(iii)

l-ammonti rikonoxxuti għal kull tranżazzjoni u l-entrata linja b’linja fir-rapporti finanzjarji li fiha kull ammont huwa rikonoxxut; u

(iv)	jekk it-tranżazzjoni tkun is-saldu effettiv ta’ relazzjoni li kienet teżisti qabel, il-metodu użat biex jiġi ddeterminat l-ammont tas-saldu.

(m)

l-iżvelar ta’ tranżazzjonijiet rikonoxxuti separatament li hu meħtieġ minn (l) għandu jinkludi l-ammont ta’ kosti relatati mal-akkwiżizzjoni u, separatament, l-ammont ta’ dawk il-kosti rikonoxxuti bħala spiża u l-entrata jew entrati linja b’linja fir-rapport tad-dħul komplessiv li fih ikunu rikonoxxuti dawk l-ispejjeż. Għandu jiġi żvelat ukoll l-ammont ta’ kwalunkwe kosti ta’ ħruġ mhux rikonoxxuti bħala spiża u kif ġew rikonoxxuti.

(n)

f’xiri bl-irħis (ara l-paragrafi 34-36):

(i)	l-ammont ta’ qligħ rikonoxxut skont il-paragrafu 34, u l-entrata f’linja fir-rapport ta’ dħul komplessiv li fiha hu rikonoxxut il-qligħ; u

(ii)	deskrizzjoni tar-raġunijiet għaliex it-tranżazzjoni rriżultat fi qligħ.

(o)

għal kull kombinament ta’ negozji fejn l-akkwirent ikollu inqas minn 100 fil-mija tal-interessi azzjonarji fl-akkwiżit fid-data tal-akkwiżizzjoni:

(i)	l-ammont ta’ interess li ma jagħtix kontroll fl-akkwiżit rikonoxxut fid-data tal-akkwiżizzjoni u l-bażi ta’ kejl għal dak l-ammont; u

(ii)	għal kull interess li ma jagħtix kontroll f’akkwiżit imkejjel skont il-valur ġust, it-tekniki ta’ valutazzjoni u l-inputs ewlenin użati fil-mudell biex jiġi ddeterminat dak il-valur.

(p)

f’kombinament ta’ negozji mwettaq fi stadji:

(i)	il-valur ġust fid-data tal-akkwiżizzjoni tal-interess azzjonarju fl-akkwiżit miżmum mill-akkwirent immedjatament qabel id-data tal-akkwiżizzjoni; u

(ii)

l-ammont ta’ kwalunkwe qligħ jew telf rikonoxxut bħala riżultat ta’ kejl mill-ġdid skont il-valur ġust tal-interess azzjonarju fl-akkwiżit miżmum mill-akkwirent qabel il-kombinament ta’ negozji (ara l-paragrafu 42) u l-entrata f’linja fir-rapport tad-dħul komplessiv li fiha huwa rikonoxxut il-qligħ jew telf.

(q)

l-informazzjoni li ġejja:

(i)	l-ammonti ta’ dħul u profitt jew telf tal-akkwiżit sa mid-data tal-akkwiżizzjoni inklużi fir-rapport konsolidat tad-dħul komplessiv għall-perijodu ta’ rapportaġġ; u

(ii)	id-dħul u l-profitt jew telf tal-entità kkombinata għall-perijodu kurrenti ta’ rapportaġġ bħal li kieku d-data tal-akkwiżizzjoni għall-kombinamenti kollha ta’ negożji li seħħew matul is-sena kienu sa mill-bidu tal-perijodu annwali ta’ rapportaġġ.

Jekk l-iżvelar ta’ kwalunkwe informazzjoni meħtieġa minn dan is-subparagrafu ma tkunx prattikabbli, l-akkwirent għandu jiżvela dan il-fatt u jispjega għaliex l-iżvelar mhux prattikabbli. Dan l-IFRS juża t-terminu “mhux prattikabbli” bl-istess tifsira bħal fl-IAS 8 Politika ta’ Kontabilità, Bidliet fl-Istimi ta’ Kontabilità u Żbalji.

B65

Għal kombinamenti ta’ negozji individwalment immaterjali li jseħħu matul il-perijodu ta’ rapportaġġ u li jkunu materjali kollettivament, l-akkwirent għandu jiżvela b’mod aggregat l-informazzjoni meħtieġa mill-paragrafu B64(e)–(q).

B66

Jekk id-data tal-akkwiżizzjoni ta’ kombinament ta’ negozji tkun wara t-tmiem tal-perijodu ta’ rapportaġġ iżda qabel ma r-rapporti finanzjarji jkunu awtorizzati għall-ħruġ, l-akkwirent għandu jiżvela l-informazzjoni meħtieġa mill-paragrafu B64 ħlief jekk il-kontabilità inizjali għall-kombinament ta’ negozji ma tkunx kompluta fil-ħin meta r-rapporti finanzjarji jkunu awtorizzati għall-ħruġ. F’dik is-sitwazzjoni, l-akkwirent għandu jiddeskrivi liema żvelar ma setax isir u r-raġunijiet għaliex ma jistax isir.

B67

Sabiex jintlaħaq l-objettiv fil-paragrafu 61, l-akkwirent għandu jiżvela l-informazzjoni li ġejja għal kull kombinament ta’ negozji materjali jew b’mod aggregat għal kombinamenti ta’ negozji individwalment immaterjali li jkunu materjali kollettivament:

(a)

jekk il-kontabilità inizjali għal kombinament ta’ negozji ma tkunx kompluta (ara l-paragrafu 45) għal assi partikolari, obbligazzjonijiet partikolari, interessi partikolari li ma jagħtux kontroll jew entrati partikolari ta’ ħlas u l-ammonti rikonoxxuti fir-rapporti finanzjarji għall-kombinament ta’ negozji b’hekk ikunu ġew idderminati biss provviżorjament:

(i)	ir-raġunijiet għaliex il-kontabilità inizjali għall-kombinament ta’ negozji m’hijiex kompluta;

(ii)	l-assi, l-obbligazzjonijiet, l-interessi azzjonarji jew l-entrati ta’ ħlas li għalihom il-kontabilità inizjali ma tkunx kompluta; u

(iii)

in-natura u l-ammont ta’ kwalunkwe aġġustament fil-perijodu tal-kejl rikonoxxut matul il-perijodu ta’ rapportaġġ skont il-paragrafu 49.

(b)

għal kull perijodu ta’ rapportaġġ wara d-data tal-akkwiżizzjoni sakemm l-entità tiġbor, tbigħ jew b’xi mod ieħor titlef id-dritt għal assi ta’ ħlas kontinġenti, jew sakemm l-entità tissalda obbligazzjoni ta’ ħlas kontinġenti jew l-obbligazzjoni tiġi kkanċellata jew tiskadi:

(i)	kull bidla fl-ammonti rikonoxxuti, inkluża kwalunkwe differenza li tirriżulta mas-saldu;

(ii)	kwalunkwe bidla fil-medda ta’ eżiti (mhux skontati) u r-raġunijiet għal dawk il-bidliet; u

(iii)

it-tekniki ta’ valutazzjoni u l-inputs ewlenin użati fil-mudell biex jitkejjel il-ħlas kontinġenti.

(ċ)	għal obbligazzjonijiet kontinġenti rikonoxxuti f’kombinament ta’ negozji, l-akkwirent għandu jiżvela l-informazzjoni meħtieġa mill-paragrafi 84 u 85 tal-IAS 37 għal kull klassi ta’ provvediment.

(d)

tqabbil tal-ammont miżmum fil-kotba tal-avvjament fil-bidu u fit-tmiem tal-perijodu tar-rapportaġġ li juri separatament:

(i)	l-ammont gross u t-telf akkumulat minn indeboliment fil-bidu tal-perijodu ta’ rapportaġġ.

(ii)

avvjament addizzjonali rikonoxxut matul il-perijodu ta’ rapportaġġ, minbarra avvjament inkluż fi grupp ta’ disponiment li, mal-akkwiżizzjoni, jissodisfa l-kriterji biex jiġi kklassifikat bħala miżmum għall-bejgħ b’konformità mal-IFRS 5 Assi Mhux Kurrenti Miżmuma għall-Bejgħ u Operazzjonijiet li Ma Tkomplewx.

(iii)

aġġustamenti li jirriżultaw mir-rikonoxximent sussegwenti ta’ assi ta’ taxxa differita matul il-perijodu ta’ rapportaġġ b’konformità mal-paragrafu 67.

(iv)	avvjament inkluż fi grupp ta’ disponiment ikklassifikat bħala miżmum għal bejgħ b’konformità mal-IFRS 5 u avvjament li r-rikonoxximent tiegħu ġie rtirar matul il-perijodu ta’ rappurtaġġ mingħajr ma qabel kien inkluż fi grupp ta’ disponiment ikklassifikat bħala miżmum għall-bejgħ;

(v)	telf ta’ indeboliment rikonoxxut matul il-perijodu ta’ rapportaġġ skont l-IAS 36. (Minbarra dan ir-rekwiżit l-IAS 36 jeħtieġ l-iżvelar ta’ informazzjoni dwar l-ammont li jista’ jiġi rkuprat u l-indeboliment tal-avvjament.)

(vi)	differenzi netti tal-kambju li joriġinaw matul il-perijodu ta’ rapportaġġ b’konformità mal-IAS 21 L-Effettita’ Tibdil fir-Rati tal-Kambju.

(vii)

kull bidla oħra fl-ammont miżmum fil-kotba matul il-perijodu ta’ rapportaġġ.

(viii)

l-ammont gross u t-telf ta’ indeboliment akkumulat fit-tmiem tal-perijodu ta’ rappurtaġġ.

(e)

l-ammont u spjegazzjoni ta’ kwalunkwe qligħ jew telf rikonoxxut fil-perijodu kurrenti ta’ rapportaġġ li sew:

(i)	huwa relatat mal-assi identifikabbli akkwistati jew l-obbligazzjonijiet merfugħa f’kombinament ta’ negozji li kien imwettaq fil-perijodu kurrenti jew f’perijodu preċedenti ta’ rapportaġġ; kemm

(ii)	hu ta’ daqs, natura jew inċidenza tali li l-iżvelar tiegħu hu rilevanti biex jinftiehmu r-rapporti finanzjarji tal-entità kkombinata.

DISPOŻIZZJONIJIET TRANŻITORJI GĦAL KOMBINAMENTI TA’ NEGOZJI LI JINVOLVU BISS ENTITAJIET TA’ BENEFIĊĊJU KOMUNI JEW B’KUNTRATT BISS (APPLIKAZZJONI TAL-PARAGRAFU 66)

B68

Il-paragrafu 64 jistabbilixxi li dan l-IFRS għandu jiġi applikat b’mod prospettiv għal kombinamenti ta’ negozji li d-data tal-akkwiżizzjoni tagħhom tkun fil-bidu jew wara tal-ewwel perijodu ta’ rapportaġġ annwali li jibda fl-1 ta’ Lulju 2009 jew wara. Applikazzjoni aktar bikrija hija permessa. Madankollu, entità għandha tapplika dan l-IFRS biss fil-bidu ta’ perijodu ta’ rapportaġġ annwali li jibda fit-30 ta’ Ġunju 2007 jew wara. Jekk entità tapplika dan l-IFRS qabel id-data effettiva tiegħu, l-entità għandha tiżvela dak il-fatt u tapplika l-IAS 27 (kif emendat mill-Bord tal-Istandards Internazzjonali tal-Kontabilità fl-2008) fl-istess ħin.

B69

Ir-rekwiżit li dan l-IFRS jiġi applikat prospettivament għandu l-effett li ġej għal kombinament ta’ negozji li jinvolvi biss entitajiet ta’ benefiċċju komuni jew b’kuntratt biss jekk id-data tal-akkwiżizzjoni għal dak il-kombinament ta’ negozji tkun qabel l-applikazzjoni ta’ dan l-IFRS:

(a)	Klassifikazzjoni—Entità għandha tkompli tikklassifika l-kombinamenti ta’ negozji preċedenti skont il-politika ta’ kontabilità preċedenti tal-entità għal tali kombinamenti.

(b)

Avvjament rikonoxxut qabel—Fil-bidu tal-ewwel perijodu annwali li fih jiġi applikat dan l-IFRS, l-ammont miżmum fil-kotba ta’ avvjament li joriġina mill-kombinament ta’ negozji preċedenti għandu jkun l-ammont tiegħu miżmum fil-kotba f’dik id-data skont il-politika ta’ kontabilità preċedenti tal-entità. Sabiex tiddetermina dak l-ammont, l-entità għandha telimina l-ammont miżmum fil-kotba ta’ kwalunkwe amortizzament akkumulat ta’ dak l-avvjament u t-tnaqqis korrispondenti fl-avvjament. Ebda aġġustament ieħor m’għandu jsir lill-ammont ta’ avvjament miżmum fil-kotba.

(ċ)

Avvjament rikonoxxut qabel bħala tnaqqis mill-ekwità—Il-politika ta’ kontabilità preċedenti tal-entità tista’ tkun wasslet biex avvjament li joriġina mill-kombinament ta’ negozji preċedenti jkun ġie rikonoxxut bħala tnaqqis mill-ekwità. F’dik is-sitwazzjoni l-entità m’għandhiex tirrikonoxxi l-avvjament bħala assi fil-bidu tal-ewwel perijodu annwali li fih jiġi applikat dan l-IFRS. Barra minn hekk, l-entità m’għandhiex tirrikonixxi bħala profitt jew telf xi parti minn dak l-avvjament meta tiddisponi min-negozju jew parti minnu li miegħu l-avvjament hu marbut jew meta tkun indebolita unità li tiġġenera l-flus li magħha hu marbut l-avvjament.

(d)	Kontabilità sussegwenti għall-avvjament—Sa mill-bidu tal-ewwel perijodu annwali li fih jiġi applikat dan l-IFRS, entità m’għandhiex tkompli tamortizza l-avvjament li joriġina mill-kombinament ta’ negozji preċedenti u għandha teżamina l-avvjament għal indeboliment skont l-IAS 36.

(e)

Avvjament negattiv rikonoxxut qabel—Entità li tkun ikkontabilizzat il-kombinament ta’ negozji preċedenti billi applikat il-metodu tax-xiri tista’ tkun irrikonoxxiet kreditu differit għal eċċess tal-interess tagħha fil-valur ġust nett tal-assi u l-obbligazzjonijiet identifikabbli tal-akkwiżit fuq il-kost ta’ dak l-interess (xi kultant imsejjaħ avvjament negattiv). Jekk dan ikun il-każ, entità għandha tirtira r-rikonoxximent tal-ammont miżmum fil-kotba ta’ dak il-kreditu differit fil-bidu tal-ewwel perijodu annwali li fih huwa applikat dan l-IFRS b’aġġustament korrispondenti għall-bilanċ tal-ftuħ tal-qligħ imfaddal f’dik id-data.

Appendiċi C

Emendi għal IFRSs oħra

L-emendi f’din l-appendiċi għandhom jiġu applikati għal perijodi ta’ rapportaġġ annwali li jibdew fl-1 ta’ Lulju 2009, jew wara. Jekk xi entità tapplika dan l-IFRS għal perijodu aktar bikri, dawn l-emendi għandhom jiġu applikati għal dak il-perijodu aktar bikri.

IFRS 1 ADOZZJONI GĦALL-EWWEL DARBA TAL-ISTANDARDS INTERNAZZJONALI TAR-RAPPURTAĠĠ FINANZJARJU

L-IFRS 1 hu emendat kif deskritt hawn taħt.

Il-paragrafu 14 hu emendat kif ġej:

“14.

Xi eżenzjonijiet hawn taħt jirreferu għall-valur ġust. Meta tiddetermina l-valuri ġusti skont dan l-IFRS, entità għandha tapplika d-definizzjoni ta’ valur ġust fl-Appendiċi A u kull gwida aktar speċifika f’IFRSs oħrajn dwar id-determinazzjoni ta’ valuri ġusti għall-assi jew l-obbligazzjoni inkwistjoni. Dawk il-valuri ġusti għandhom jirriflettu l-kundizzjonijiet li kienu jeżistu fid-data li għaliha ġew determinati.”

Il-paragrafu 47I hu miżjud kif ġej:

“47I

L-IFRS 3 (kif rivedut mill-Bord tal-Istandards Internazzjonali tal-Kontabilità fl-2008) emenda l-paragrafi 14, B1, B2(f) u B2(g). Entità għandha tapplika dawk l-emendi għal perijodi annwali li jibdew fl-1 ta’ Lulju 2009 jew wara. Jekk entità tapplika l-IFRS 3 (rivedut fl-2008) għal perijodu aktar bikri, dawn l-emendi għandhom jiġu applikati għal dak il-perijodu aktar bikri.”

Fl-Appendiċi B, il-paragrafi B1, B2(f) u B2(g) huma emendati kif ġej:

“B1

Min jadotta l-IFRSs għall-ewwel darba jista’ jagħżel li ma japplikax l-IFRS 3 Kombinamenti ta’ Negozji b’mod retroattiv għal kombinamenti ta’ negozji mgħoddija (kombinamenti ta’ negozji li seħħu qabel id-data ta’ tranżizzjoni għall-IFRSs). Madankollu, jekk min jadotta l-IFRSs għall-ewwel darba jiddikjara b’mod ġdid xi kombinament ta’ negozji biex ikun konformi mal-IFRS 3, dan għandu jiddikjara b’mod ġdid il-kombinamenti ta’ negozji kollha li seħħew wara u japplika wkoll l-IAS 27 (kif emendat mill-Bord tal-Istandards Internazzjonali tal-Kontabilità fl-2008) minn dik l-istess data. Pereżempju, jekk min jadotta l-IFRSs għall-ewwel darba jagħżel li jiddikjara b’mod ġdid kombinazzjoni ta’ negozji li seħħet fit-30 ta’ Ġunju 20X6, għandu jiddikjara b’mod ġdid il-kombinamenti ta’ negozji kollha li seħħew bejn it-30 ta’ Ġunju 20X6 u d-data ta’ tranżizzjoni għall-IFRSs, u għandu japplika wkoll l-IAS 27 (emendat fl-2008) mit-30 ta’ Ġunju 20X6.

B2(f)

Jekk xi assi akkwistat, jew xi obbligazzjoni merfugħa, f’xi kombinament ta’ negozji fil-passat ma kienx rikonoxxut skont il-GAAP preċedenti, m’għandhux valur preżunt ta’ żero fir-rapport tal-ftuħ dwar il-pożizzjoni finanzjarja taħt l-IFRS. Minflok, l-akkwirent għandu jirrikonoxxih u jkejlu fir-rapport konsolidat tiegħu tal-pożizzjoni finanzjarja fuq il-bażi meħtieġa mill-IFRSs għar-rapport tal-pożizzjoni finanzjarja tal-akkwiżit. Biex nagħtu eżempju: jekk l-akkwirent ma kienx, skont il-GAAP preċedenti tiegħu, ikkapitalizza l-kirjiet finanzjarji akkwistati f’kombinament ta’ negozji fl-imgħoddi, għandu jikkapitalizza dawk il-kirjiet fir-rapporti finanzjarji konsolidati tiegħu, l-istess bħalma kieku l-IAS 17 Kuntratti ta’ Kiri jeħtieġ li l-akkwiżit jagħmel fir-rapport tal-pożizzjoni finanzjarja tiegħu mħejji skont l-IFRS. Bl-istess mod, jekk l-akkwirent ma kienx, taħt il-GAAP preċedenti tiegħu, irrikonoxxa obbligazzjoni kontinġenti li tkun għadha teżisti fid-data tat-tranżizzjoni għall-IFRSs, l-akkwirent għandu jirrikonoxxi dik l-obbligazzjoni kontinġenti f’dik id-data ħlief jekk l-IAS 37 jipprojbixxi r-rikonoxximent tagħha fir-rapporti finanzjarji tal-akkwiżit. Min-naħa l-oħra, ...

B2(g)

L-ammont miżmum fil-kotba tal-avvjament fir-rapport tal-ftuħ tal-pożizzjoni finanzjarja mħejji skont l-IFRS għandu jkun l-ammont tiegħu miżmum fil-kotba skont il-GAAP preċedenti fid-data ta’ tranżizzjoni għall-IFRSs, wara li jsiru ż-żewġ aġġustamenti li ġejjin:

(i)

…

(ii)	[imħassar]

(iii)

Irrispettivament …”

IFRS 2 PAGAMENT IBBAŻAT FUQ L-ISHMA

L-IFRS 2 hu emendat kif deskritt hawn taħt.

Il-paragrafu 5 hu emendat kif ġej:

“5.

Kif innutat fil-paragrafu 2, dan l-IFRS … Bl-istess mod, il-kanċellazzjoni, is-sostituzzjoni jew kull modifika oħra ta’ arranġamenti ta’ pagament ibbażat fuq l-ishma minħabba kombinament ta’ negozji jew ristrutturar ieħor tal-ekwità għandu jiġi kkontabilizzat skont dan l-IFRS. l-IFRS 3 jipprovdi gwida dwar kif għandu jiġi ddeterminat jekk strumenti azzjonarji maħruġa f’kombinament ta’ negozji humiex parti mill-ħlas ittrasferit bi skambju għal kontroll tal-akkwiżit (u għalhekk fl-ambitu tal-IFRS 3) jew humiex bi skambju għal kontinwazzjoni ta’ servizz li għandu jiġi rikonoxxut fil-perijodu ta’ wara l-kombinament (u għalhekk fl-ambitu ta’ dan l-IFRS).”

Il-paragrafu 61 hu miżjud kif ġej:

“61.

L-IFRS 3 (kif rivedut mill-Bord tal-Istandards Internazzjonali tal-Kontabilità fl-2008) emenda l-paragrafu 5. Entità għandha tapplika dik l-emenda għal perijodi annwali li jibdew fl-1 ta’ Lulju 2009 jew wara. Jekk entità tapplika l-IFRS 3 (rivedut fl-2008) għal perijodu iktar bikri, l-emenda għandha tkun applikata wkoll għal dak il-perijodu iktar bikri.”

IFRS 7 STRUMENTI FINANZJARJI: ŻVELAR

L-IFRS 7 hu emendat kif deskritt hawn taħt.

Il-paragrafu 3(c) huwa mħassar.

Il-paragrafu 44B hu miżjud kif ġej:

“44B

L-IFRS 3 (kif rivedut mill-Bord tal-Istandards Internazzjonali tal-Kontabilità fl-2008) ħassar il-paragrafu 3(c). Entità għandha tapplika dik l-emenda għal perijodi annwali li jibdew fl-1 ta’ Lulju 2009, jew wara. Jekk entità tapplika l-IFRS 3 (rivedut fl-2008) għal perijodu iktar bikri, l-emenda għandha tkunu applikati wkoll għal dak il-perijodu iktar bikri.”

IAS 12 TAXXI FUQ ID-DĦUL

L-IAS 12 hu emendat kif deskritt hawn taħt.

It-tielet paragrafu tal-“ Għan ” huwa emendat kif ġej:

“ Għan

Dan l-Istandard ... Bl-istess mod, ir-rikonoxximent ta’ assi u obbligazzjonijiet ta’ taxxa differita f’kombinament ta’ negozji jaffettwa l-ammont ta’ avvjament li oriġina f’dak il-kombinament ta’ negozji jew l-ammont tal-qligħ rikonoxxut mix-xiri bl-irħis.”

Il-paragrafi 18, 19, 21-22 u 26 huma emendati kif ġej:

“18.

Differenzi temporanji jinħolqu wkoll meta:

(a)	l-assi akkwistati u l-obbligazzjonijiet merfugħa li jkunu identifikabbli f’kombinament ta’ negozji huma rikonoxxuti skont il-valuri ġusti tagħhom skont l-IFRS 3 Kombinamenti ta’ Negozji, iżda l-ebda aġġustament ekwivalenti ma jsir għal għanijiet ta’ taxxa (ara l-paragrafu 19);

(b)

…

Kombinamenti ta’ negozji

19.

B’ċerti eċċezzjonijiet limitati, l-assi akkwistati u l-obbligazzjonijiet merfugħa li huma identifikabbli f’kombinament ta’ negozji huma rikonoxxuti bil-valuri ġusti tagħhom fid-data tal-akkwiżizzjoni. Differenzi temporanji …

Avvjament

21.

L-avvjament li joriġina minn kombinament ta’ negozji huwa mkejjel bħala l-eċċess ta’ (a) fuq (b) hawn isfel:

(a)

it-total ta’:

(i)	il-ħlas ittrasferit imkejjel skont l-IFRS 3, li ġeneralment jeħtieġ il-valur ġust fid-data tal-akkwiżizzjoni;

(ii)	l-ammont ta’ kwalunkwe interess li ma jagħtix kontroll fl-akkwiżit rikonoxxut skont l-IFRS 3; u

(iii)

f’kombinament ta’ negozji mwettaq fi stadji, il-valur ġust fid-data tal-akkwiżizzjoni tal-interess azzjonarju li l-akkwirent kellu qabel fl-akkwiżit.

(b)	in-nett tal-ammonti fid-data tal-akkwiżizzjoni tal-assi akkwistati u l-obbligazzjonijiet merfugħa li huma identifikabbli, imkejla skont l-IFRS 3.

Bosta awtoritajiet tat-taxxa …

21A

Tnaqqis sussegwenti f’obbligazzjoni ta’ taxxa differita li mhix rikonoxxuta minħabba li toriġina mir-rikonoxximent inizjali tal-avvjament huma meqjusa wkoll bħala li joriġinaw mir-rikonoxximent inizjali tal-avvjament u għalhekk mhumiex rikonoxxuti taħt il-paragrafu 15(a). Pereżempju, jekk f’kombinament ta’ negozji entità tirrikonoxxi avvjament ta’ CU100 li jkollu bażi tat-taxxa ta’ żero, il-paragrafu 15(a) jipprojbixxi lill-entità milli tirrikonoxxi l-obbligazzjoni ta’ taxxa differita li tirrriżulta. Jekk, sussegwentament, l-entità tirrikonoxxi telf ta’ indeboliment ta’ CU20 għal dak l-avvjament, l-ammont ta’ differenza temporanja taxxabbli relatat mal-avvjament jonqos minn CU100 għal CU80, u dan jirriżulta fi tnaqqis fil-valur tal-obbligazzjoni ta’ taxxa differita mhux rikonoxxuta. Dak it-tnaqqis fil-valur tal-obbligazzjoni ta’ taxxa differita mhux rikonoxxuta hu meqjus ukoll bħala li hu marbut mar-rikonoxximent inizjali tal-avvjament u għalhekk hu pprojbit milli jkun rikonoxxut taħt il-paragrafu 15(a).

21B

Obbligazzjonijiet ta’ taxxa differita għal differenzi temporanji taxxabbli marbuta mal-avvjament huma, madankollu, rikonoxxuti sal-punt li ma joriġinawx mir-rikonoxximent inizjali tal-avvjament. Pereżempju, jekk f’kombinament ta’ negozji entità tirrikonoxxi avvjament ta’ CU100 li huwa deduċibbli għal għanijiet ta’ taxxa b’rata ta’ 20 fil-mija fis-sena, li jibda mis-sena tal-akkwiżizzjoni, il-bażi tat-taxxa tal-avvjament hu ta’ CU100 fuq ir-rikonoxximent inizjali u ta’ CU80 fit-tmiem tas-sena tal-akkwiżizzjoni. Jekk l-ammont tal-avvjament miżmum fil-kotba fit-tmiem tas-sena tal-akkwiżizzjoni jibqa’ mhux mibdul, jiġifieri CU100, fl-aħħar ta’ dik is-sena tirriżulta differenza temporanja taxxabbli ta’ CU20. Minħabba li ...

Rikonoxximent inizjali ta’ assi jew obbligazzjoni

22.

Tista’ tinħoloq differenza temporanja mar-rikonoxximent inizjali ta’ assi jew obbligazzjoni, pereżempju jekk parti mill-kost jew il-kost kollu ta’ assi ma jkunx deduċibbli għal għanijiet ta’ taxxa. Il-metodu tal-kontabilità għal tali differenza temporanja jiddependi fuq in-natura tat-tranżazzjoni li tkun wasslet għar-rikonoxximent inizjali tal-assi jew l-obbligazzjoni:

(a)	f’kombinament ta’ negozji, entità tirrikonoxxi kwalunkwe obbligazzjoni jew assi ta’ taxxa differita u dan jaffettwa l-ammont ta’ avvjament jew qligħ minn xiri bl-irħis li hija tirrikonoxxi (ara l-paragrafu 19);

(b)

...

26.

Dawn li ġejjin huma eżempji ta’ differenzi temporanji deduċibbli li jirriżultaw f’assi ta’ taxxa differita:

(a)

…

(ċ)

b’ċerti eċċezzjonijiet limitati, entità tirrikonoxxi l-assi akkwistati u l-obbligazzjonijiet merfugħa li huma identifikabbli f’kombinament ta’ negozji skont il-valuri ġusti tagħhom fid-data tal-akkwiżizzjoni. Meta obbligazzjoni merfugħa hi rikonoxxuta fid-data tal-akkwiżizzjoni iżda l-kosti relatati ma jkunux imnaqqsa fid-determinazzjoni tal-profitti taxxabbli sa perijodu aktar tard, tinħoloq differenza temporanja deduċibbli li tirriżulta f’assi ta’ taxxa differita. Assi ta’ taxxa differita jinħoloq ukoll meta l-valur ġust ta’ assi identifikabbli akkwistat hu inqas mill-bażi tat-taxxa tiegħu. Fiż-żewġ każijiet, l-assi ta’ taxxa differita li jirrriżulta jaffettwa l-avvjament (ara l-paragrafu 66); u

(d)

…”

Wara l-paragrafu 31 għandhom jiżdiedu intestatura ġdida u l-paragrafu 32 A skont kif ġej:

“32.	[Imħassra]

Avvjament

32A

Jekk l-ammont miżmum fil-kotba ta’ avvjament li joriġina f’kombinament ta’ negozji jkun inqas mill-bażi tat-taxxa tiegħu, id-differenza tagħti lok għal assi ta’ taxxa differita. L-assi ta’ taxxa differita li joriġina mir-rikonoxximent inizjali ta’ avvjament għandu jiġi rikonoxxut bħala parti mill-kontabilità għal kombinament ta’ negozji sal-punt fejn ikun probabbli li profitt taxxabbli ser ikun disponibbli li kontrih tista’ tintuża d-differenza temporanja deduċibbli.”

Il-paragrafi 66-68 huma emendati kif ġej:

“ Taxxa differita li tinħoloq minn kombinament ta’ negozji

66.

Kif spjegat fil-paragrafi 19 u 26(c), differenzi temporanji jistgħu joriġinaw f’kombinament ta’ negozji. B’konformità mal-IFRS 3 entità tirrikonoxxi kwalunkwe assi ta’ taxxa differita li jirriżultaw (sal-punt fejn dawn jissodisfaw il-kriterji ta’ rikonoxximent fil-paragrafu 24) jew obbligazzjonijiet ta’ taxxa differita bħala assi u obbligazzjonijiet identifikabbli fid-data tal-akkwiżizzjoni. Għaldaqstant, dawk l-assi ta’ taxxa differita u l-obbligazzjonijiet ta’ taxxa differita jaffettwaw l-ammont ta’ avvjament jew il-qligħ mix-xiri bl-irħis li l-entità tirrikonoxxi. Madankollu, b’konformità mal-paragrafu 15(a), entità ma tirrikonoxxix obbligazzjonijiet ta’ taxxa differita li joriġinaw mir-rikonoxximent inizjali tal-avvjament.

67.

Bħala riżultat ta’ kombinament ta’ negozji, il-probabbiltà li jiġi rrealizzat assi ta’ taxxa differita ta’ qabel l-akkwiżizzjoni tal-akkwirent tista’ tinbidel. Akkwirent jista’ jikkunsidra li jkun probabbli li jkun ser jirkupra l-assi ta’ taxxa differita tiegħu stess li ma kienx rikonoxxut qabel il-kombinament tan-negozji. Pereżempju, l-akkwirent jista’ jkun jista’ jagħmel użu mill-benefiċċju tat-telf għat-taxxa tiegħu mhux użat billi japplikah kontra l-profitt taxxabbli futur tal-akkwiżit. Alternattivament, bħala riżultat tal-kombinament ta’ negozji jista’ ma jkunx aktar probabbli li l-profitt futur taxxabbli jkun ser jippermetti li l-assi ta’ taxxa differita jiġi rkuprat. F’każijiet bħal dawn, l-akkwirent jirrikonoxxi bidla fl-assi ta’ taxxa differita fil-perijodu tal-kombinament ta’ negozji, iżda ma jinkludihiex bħala parti mill-kontabilità għall-kombinament ta’ negozji. Għalhekk, l-akkwirent ma jikkunsidrahiex meta jkejjel l-avvjament jew il-qligħ mix-xiri bl-irħis li jirrikonoxxi fil-kombinament ta’ negozji.

68.

Il-benefiċċju potenzjali tal-ammonti mgħoddija ‘l quddiem minn telf għat-taxxa tad-dħul min-naħa ta’ akkwiżit jew ta’ assi oħra ta’ taxxa differita jistgħu ma jissodisfawx il-kriterji għal rikonoxximent separat meta tkun saret il-kontabilità oriġinali tal-kombinament ta’ negozji iżda jista’ jiġi rrealizzat sussegwentement.

Entità għandha tirrikonoxxi benefiċċji akkwistati ta’ taxxa differita li hija tirrealizza wara l-kombinament ta’ negozji, skont kif ġej:

(a)

Benefiċċji akkwistati ta’ taxxa differita rikonoxxuti waqt il-perijodu tal-kejl li jirriżultaw minn informazzjoni ġdida dwar fatti u ċirkustanzi li kienu jeżistu fid-data tal-akkwiżizzjoni għandhom jiġu applikati biex jitnaqqas l-ammont miżmum fil-kotba ta’ kwalunkwe avvjament relatat ma’ dik l-akkwiżizzjoni. Jekk l-ammont miżmum ta’ dak l-avvjament fil-kotba jkun żero, kwalunkwe benefiċċji ta’ taxxa differita rimanenti għandhom jiġu rikonoxxuti fil-profitt jew telf.

b)	Kwalunkwe benefiċċji oħra akkwistati ta’ taxxa differita għandhom jiġu rikonoxxuti fil-profitt jew telf (jew jekk dan l-Istandard ikun hekk jeħtieġ, barra l-profitt jew telf).”

L-eżempju li jinsab wara l-paragrafu 68 huwa mħassar.

Il-paragrafu 81 hu emendat kif ġej:

“81.

Dawn li ġejjin għandhom ikunu wkoll żvelati separatament:

(a)

…

(h)

għar-rigward ta’ operazzjonijiet li ma tkomplewx, l-ispiża tat-taxxa li għandha x’taqsam ma’:

(i)	il-qligħ jew telf malli l-operazzjonijiet ma jitkomplewx; u

(ii)	il-profitt jew telf għall-perijodu mill-attivitajiet ordinarji tal-operazzjoni li ma tkomplietx, flimkien mal-ammonti li jikkorrispondu għal kull perijodu preċedenti ppreżentat;

(i)	l-ammont tal-konsegwenzi għat-taxxa fuq id-dħul tad-dividendi lill-azzjonisti tal-entità li ġew proposti jew iddikjarati qabel ma r-rapporti finanzjarji ġew awtorizzati għall-ħruġ, iżda li mhumiex rikonoxxuti bħala obbligazzjoni fir-rapporti finanzjarji.

(j)	jekk kombinament ta’ negozji li fih l-entità tkun l-akkwirent jikkawża bidla fl-ammont rikonoxxut għall-assi ta’ taxxa differita tagħha ta’ qabel l-akkwiżizzjoni (ara l-paragrafu 67), l-ammont ta’ dik il-bidla; u

(k)

jekk il-benefiċċji ta’ taxxa differita akkwistati f’kombinament ta’ negozji mhumiex rikonoxxuti fid-data tal-akkwiżizzjoni iżda huma rikonoxxuti wara d-data tal-akkwiżizzjoni (ara l-paragrafu 68), deskrizzjoni tal-avveniment jew tal-bidla fiċ-ċirkustanzi li kkawżat ir-rikonoxximent tal-benefiċċji tat-taxxa differita.”

Il-paragrafi 93-95 huma miżjuda skont kif ġej:

“93.	Il-paragrafu 68 għandu jiġi applikat prospettivament mid-data effettiva tal-IFRS 3 (kif rivedut mill-Bord tal-Istandards Internazzjonali tal-Kontabilità fl-2008) għar-rikonoxximent ta’ assi ta’ taxxa differita akkwistati f’kombinamenti ta’ negozji.

94.

Għalhekk, l-entitajiet m’għandhomx jaġġustaw il-kontabilità għal kombinamenti ta’ negozji preċedenti jekk il-benefiċċji tat-taxxa ma kinux issodisfaw il-kriterji għal rikonoxximent separat fid-data tal-akkwiżizzjoni u jkunu rikonoxxuti wara d-data tal-akkwiżizzjoni, ħlief jekk il-benefiċċji jkunu rikonoxxuti waqt il-perijodu ta’ kejl u jirriżultaw minn informazzjoni ġdida dwar fatti u ċirkustanzi li kienu jeżistu fid-data tal-akkwiżizzjoni. Benefiċċji oħra ta’ taxxa rikonoxxuti għandhom jiġu rikonoxxuti fil-profitt jew telf (jew, jekk dan l-Istandard ikun hekk jeħtieġ, barra l-profitt jew telf).

95.

L-IFRS 3 (kif rivedut mill-Bord tal-Istandards Internazzjonali tal-Kontabilità fl-2008) emenda l-paragrafi 21 u 67 u żied il-paragrafi 32 A u 81(j) u (k). Entità għandha tapplika dawk l-emendi għal perijodi annwali li jibdew fl-1 ta’ Lulju 2009 jew wara. Jekk entità tapplika l-IFRS 3 (rivedut fl-2008) għal perijodu aktar bikri, dawn l-emendi għandhom jiġu applikati għal dak il-perijodu aktar bikri.”

IAS 16 PROPRJETÀ, IMPJANT U TAGĦMIR

Fl-IAS 16, il-paragrafu 44 hu emendat kif ġej:

“44.

Entità talloka l-ammont rikonoxxut fil-bidu b’konnessjoni ma’ oġġett ta’ proprjetà, impjant u tagħmir għall-partijiet sinifikanti tiegħu u tiddeprezza separatament kull waħda minn dawn il-partijiet. Pereżempju, jista’ jkun f’waqtu li jsir deprezzament separat tal-korp tal-ajruplan u tal-magni tiegħu, sew jekk hu proprjetà tal-entità kemm jekk suġġett għal kiri finanzjarju. Bl-istess mod, jekk entità takkwista proprjetà, impjanti u tagħmir soġġetti għal kiri operattiv fejn hija tkun sid il-kera, jista’ jkun xieraq li jiġu diprezzati separatament ammonti riflessi fil-kost ta’ dak l-oġġett li jkunu attribwibbli għal termini ta’ kiri favorevoli jew sfavorevoli meta mqabbla mat-termini tas-suq.”

Il-paragrafu 81C hu miżjud kif ġej:

“81C

L-IFRS 3 Kombinamenti ta’ Negozji (kif rivedut mill-Bord tal-Istandards Internazzjonali tal-Kontabilità fl-2008) emenda l-paragrafu 44. Entità għandha tapplika dik l-emenda għal perijodi annwali li jibdew fl-1 ta’ Lulju 2009, jew wara. Jekk entità tapplika l-IFRS 3 (rivedut fl-2008) għal perijodu iktar bikri, l-emendi għandhom ikunu applikati wkoll għal dak il-perijodu iktar bikri.”

IAS 28 INVESTIMENTI F’KUMPANIJI ASSOĊJATI

Fl-IAS 28, il-paragrafu 23 hu emendat kif ġej:

“23.

Investiment f’kumpannija assoċjata hu kkontabilizzat bil-metodu tal-ekwità mid-data li din issir kumpannija assoċjata. Mal-akkwiżizzjoni tal-investiment, kwalunkwe differenza bejn il-kost tal-investiment u s-sehem tal-investitur fil-valur ġust nett tal-assi u tal-obbligazzjonijiet identifikabbli tal-kumpanija assoċjata huma kkontabilizzati skont kif ġej:

(a)	avvjament marbut ma’ kumpannija assoċjata hu inkluż fl-ammont tal-investiment miżmum fil-kotba. L-amortizzament ta’ dak l-avvjament mhuwiex permess.

(b)

kwalunkwe eċċess tas-sehem tal-investitur fil-valur ġust nett tal-assi u tal-obbligazzjonijiet identifikabbli tal-kumpanija assoċjata fuq il-kost tal-investiment hu inkluż bħala dħul fid-determinazzjoni tas-sehem tal-investitur mill-profitt jew telf tal-kumpannija assoċjata fil-perijodu li fih l-investiment kien akkwistat.

Aġġustamenti …”

IAS 32 STRUMENTI FINANZJARJI: PREŻENTAZZJONI

L-IAS 32 hu emendat kif deskritt hawn taħt.

Il-paragrafu 4(c) huwa mħassar.

Il-paragrafu 97B hu miżjud kif ġej:

“97B

L-IFRS 3 (kif rivedut mill-Bord tal-Istandards Internazzjonali tal-Kontabilità fl-2008) ħassar il-paragrafu 4(c). Entità għandha tapplika dik l-emenda għal perijodi annwali li jibdew fl-1 ta’ Lulju 2009, jew wara. Jekk entità tapplika l-IFRS 3 (rivedut fl-2008) għal perijodu iktar bikri, l-emenda għandha tkun applikata wkoll għal dak il-perijodu iktar bikri.”

IAS 33 QLIGĦ SEHEM B’SEHEM

Fl-IAS 33, il-paragrafu 22 hu emendat kif ġej:

“22.	Ishma ordinarji maħruġa bħala parti mill-ħlas ittrasferit f’kombinament ta’ negozji huma inklużi fil-medja ppiżata tan-numru ta’ ishma mid-data tal-akkwiżizzjoni. Dan hu għaliex akkwirent jinkorpora fir-rapport tad-dħul komplessiv tiegħu l-profitti u t-telf ta’ akkwiżit minn dik id-data.”

IAS 34 RAPPURTAĠĠ FINANZJARJU INTERIM

L-IAS 34 hu emendat kif deskritt hawn taħt.

Il-paragrafu 16(i) hu emendat kif ġej:

“(i)

l-effett tal-bidliet fil-kompożizzjoni tal-entità matul il-perijodu interim, inklużi kombinamenti ta’ negozji, rebħ jew tef tal-kontroll ta’ sussidjarji u ta’ investimenti fit-tul, każi ta’ ristrutturar, u operazzjonijiet li ma tkomplewx. Fil-każ ta’ kombinamenti ta’ negozji, l-entità għandha tiżvela l-informazzjoni meħtieġa mill-IFRS 3 Kombinamenti ta’ Negozji; u”

Il-paragrafu 48 hu miżjud kif ġej:

“48.

L-IFRS 3 (kif rivedut mill-Bord tal-Istandards Internazzjonali tal-Kontabilità fl-2003) emenda l-paragrafu 16(i). Entità għandha tapplika dik l-emenda għal perijodi annwali li jibdew fl-1 ta’ Lulju 2009, jew wara. Jekk entità tapplika l-IFRS 3 (rivedut fl-2008) għal perijodu iktar bikri, l-emenda għandha tkun applikata wkoll għal dak il-perijodu iktar bikri.”

IAS 36 INDEBOLIMENT TA’ ASSI

C10

L-IAS 36 hu emendat kif deskritt hawn taħt.

Fil-paragrafu 6, id-definizzjoni tad-data tal-ftehim hija mħassra.

Il-paragrafu 65 hu emendat kif ġej:

“65.	Il-paragrafi 66-108 u l-Appendiċi C jistabbilixxu r-rekwiżiti għall-identifikazzjoni tal-unità li tiġġenera l-flus li għaliha jappartjeni l-assi u għad-determinazzjoni tal-ammont miżmum fil-kotba ta’, u għar-rikonoxximent tat-telf ta’ indeboliment għal, unitajiet li jiġġeneraw il-flus u avvjament.”

Il-paragrafi 81 u 85 huma emendati kif ġej:

“81.

L-avvjament rikonoxxut f’kombinament ta’ negozji huwa assi li jirrappreżenta l-benefiċċji ekonomiċi futuri li jirriżultaw minn assi oħrajn akkwistati f’kombinament ta’ negozji li ma jkunux identifikati individwalment u rikonoxxuti separatament. L-avvjament ma jiġġenerax flussi ta’ flus indipendentement minn assi jew gruppi ta’ assi oħra, u spiss jikkontribwixxi għall-flussi ta’ flus ta’ unitajiet multipli li jiġġeneraw il-flus. Xi kultant, l-avvjament ma jkunx jista’ jiġi allokat fuq bażi mhux arbitrarja għal unitajiet individwali li jiġġeneraw il-flus, iżda biss għal gruppi ta’ unitajiet li jiġġeneraw il-flus. Bħala riżultat, l-inqas livell fl-entità li fih jiġi mmonitorjat l-avvjament għal għanijiet ta’ amministrazzjoni interna xi kultant jinkludi numru ta’ unitajiet li jiġġeneraw il-flus li l-avvjament ikun relatat magħhom iżda li ma jkunx jista’ jiġi allokat għalihom. Ir-referenzi fil-paragrafi 83-99 u l-Appendiċi C għal unità li tiġġenera l-flus li għaliha huwa allokat l-avvjament għandhom jinqraw ukoll bħala referenzi għal grupp ta’ unitajiet li jiġġeneraw il-flus li għalihom huwa allokat l-avvjament.

85.

Skont l-IFRS 3 Kombinamenti ta’ Negozji, jekk il-kontabilità inizjali għal kombinament ta’ negozji tkun tista’ tiġi ddeterminata biss proviżorjament sal-aħħar tal-perijodu li fih isir il-kombinament, l-akkwirent:

(a)	jikkontabilizza l-kombinament billi juża dawk il-valuri proviżorji; u

(b)	jirrikonoxxi kwalunkwe aġġustament għal dawk il-valuri provviżorji bħala riżultat tat-tlestija tal-kontabilità inizjali matul il-perijodu ta’ kejl, li ma jistax jaqbeż tnax-il xahar mid-data tal-akkwiżizzjoni.

F’ċirkustanzi bħal dawn, jista’ jkun ukoll li ma jkunx possibbli li l-allokazzjoni inizjali tal-avvjament rikonoxxut fil-kombinament tiġi kompluta qabel it-tmiem tal-perijodu annwali li matulu jseħħ il-kombinament. Meta jseħħ dan il-każ, l-entità tiżvela l-informazzjoni meħtieġa mill-paragrafu 133.”

Wara l-paragrafu 90 l-intestatura u l-paragrafi 91-95 huma mħassra.

Il-paragrafu 138 hu mħassar.

Il-paragrafu 139 hu emendat kif ġej:

“139.

Entità għandha tapplika dan l-Istandard:

(a)

…”

Il-paragrafu 140B hu miżjud kif ġej:

“140B

L-IFRS 3 (kif rivedut mill-Bord tal-Istandards Internazzjonali tal-Kontabilità fl-2008) emenda l-paragrafi 65, 81, 85 u 139; ħassar il-paragrafi 91-95 u 138 u żied l-Appendiċi C. Entità għandha tapplika dawk l-emendi għal perijodi annwali li jibdew fl-1 ta’ Lulju 2009, jew wara. Jekk entità tapplika l-IFRS 3 (rivedut fl-2008) għal perijodu iktar bikri, l-emendi għandhom ikunu applikati wkoll għal dak il-perijodu iktar bikri.”

Appendiċi ġdid (Appendiċi C) huwa miżjud kif desritt hawn isfel. Dan jinkorpora r-rekwiżiti tal-paragrafi mħassra 91-95.

“Appendiċi C

Din l-Appendiċi hi parti integrali mill-Istandard.

Ittestjar għall-indeboliment ta’ unitajiet li jiġġeneraw il-flus b’avvjament u interessi li ma jagħtux kontroll

Skont l-IFRS 3 (kif rivedut mill-Bord tal-Istandards Internazzjonali tal-Kontabilità fl-2008), l-akkwirent ikejjel u jirrikonoxxi avvjament fid-data tal-akkwiżizzjoni bħala l-eċċess ta’ (a) fuq (b) hawn taħt:

(a)

l-aggregat ta’:

(i)	il-ħlas ittrasferit imkejjel skont l-IFRS 3, li ġeneralment jeħtieġ il-valur ġust fid-data tal-akkwiżizzjoni;

(ii)	l-ammont ta’ kwalunkwe interess li ma jagħtix kontroll fl-akkwiżit imkejjel skont l-IFRS 3; u

(iii)

f’kombinament ta’ negozji mwettaq fi stadji, il-valur ġust fid-data tal-akkwiżizzjoni tal-interess azzjonarju li kellu qabel l-akkwirent fl-akkwiżit.

(b)	l-ammonti netti fid-data tal-akkwiżizzjoni tal-assi akkwistati u l-obbligazzjonijiet merfugħa li huma identifikabbli, imkejla skont l-IFRS 3.

Allokazzjoni ta’ avvjament

Il-paragrafu 80 ta’ dan l-Istandard jeħtieġ li avvjament akkwistat f’kombinament ta’ negozji jkun allokat għal kull waħda mill-unitajiet li jiġġeneraw flus, jew għal gruppi ta’ unitajiet li jiġġeneraw flus tal-akkwirent, li jkunu mistennija li jibbenefikaw mis-sinerġiji tal-kombinament, irrispettivament minn jekk assi jew obbligazzjonijiet oħrajn tal-akkwiżit humiex assenjati għal dawk l-unitajiet jew gruppi ta’ unitajiet. Huwa possibbli li xi wħud mis-sinerġiji li jirriżultaw minn kombinament ta’ negozji jkunu allokati għal unità li tiġġenera l-flus li fiha l-interess li ma jagħtix kontroll ma jkollux interess.

Ittestjar għall-indeboliment

L-ittestjar għall-indeboliment jinvolvi t-tqabbil tal-ammont li jista’ jiġi rkuprat ta’ unità li tiġġenera l-flus mal-ammont miżmum fil-kotba tal-unità li tiġġenera l-flus.

Jekk entità tkejjel l-interessi li ma jagħtux kontroll bħala l-interess proporzjonat tagħha fl-assi netti identifikabbli ta’ kumpannija sussidjarja fid-data tal-akkwiżizzjoni, aktar milli skont il-valur ġust, l-avvjament attribwibbli għall-interessi li ma jagħtux kontroll huwa inkluż fl-ammont li jista’ jiġi rkuprat tal-unità li tiġġenera l-flus relatata iżda mhuwiex rikonoxxut fir-rapporti finanzjarji konsolidati tal-kumpannija prinċipali. B’konsegwenza, entità għandha tingrossal-ammont miżmum fil-kotba ta’ avvjament allokat għall-unità b’mod li jinkludi l-avvjament attribwibbli għall-interess li ma jagħtix kontroll. Dan l-ammont miżmum fil-kotba aġġustat imbagħad jiġi mqabbel mal-ammont li jista’ jiġi rkuprat tal-unità biex jiġi ddeterminat jekk l-unità li tiġġenera l-flus hijiex indebolita.

Allokazzjoni ta’ telf minn indeboliment

Il-paragrafu 104 jeħtieġ li kull telf identifikat minn indeboliment ikun allokat l-ewwel biex inaqqas l-ammont tal-avvjament miżmum fil-kotba allokat għall-unità u mbagħad għall-assi l-oħrajn tal-unità pro rata fuq il-bażi tal-ammont miżmum fil-kotba ta’ kull assi fl-unità.

Jekk kumpannija sussidjarja, jew parti minn sussidjarja, b’interess li ma jagħtix kontroll tkun hi stess unità li tiġġenera l-flus, it-telf minn indeboliment huwa allokat bejn il-kumpannija prinċipali u l-interess li ma jagħtix kontroll fuq l-istess bażi bħal dik li fuqha jiġi allokat il-profitt jew telf.

Jekk kumpannija sussidjarja, jew parti minn sussidjarja, b’interess li ma jagħtix kontroll hija parti minn unità akbar li tiġġenera l-flus, it-telf minn indeboliment tal-avvjament huwa allokat għall-partijiet tal-unità li tiġġenera l-flus li għandhom interess li ma jagħtix kontroll u għall-partijiet li ma għandhomx. It-telf minn indeboliment għandu jiġi allokat għall-partijiet tal-unità li tiġġenera l-flus fuq il-bażi ta’:

(a)	sal-punt li l-indeboliment ikun relatat mal-avvjament fl-unità li tiġġenera l-flus, il-valuri relattivi miżmuma fil-kotba tal-avvjament tal-partijiet qabel l-indeboliment; u

(b)

sal-punt li l-indeboliment ikun relatat ma’ assi identifikabbli fl-unità li tiġġenera l-flus, il-valuri relattivi miżmuma fil-kotba tal-assi identifikabbli netti tal-partijiet qabel l-indeboliment; Kwalunkwe indeboliment bħal dan huwa allokat għall-assi tal-partijiet ta’ kull unità pro rata fuq il-bażi tal-ammont miżmum fil-kotba ta’ kull assi fil-parti.

F’dawk il-partijiet li għandhom interess li ma jagħtix kontroll, it-telf minn indeboliment huwa allokat bejn il-kumpannija prinċipali u l-interess li ma jagħtix kontroll fuq l-istess bażi bħal dik li fuqha huwa allokat il-profitt jew telf.

Jekk telf minn indeboliment li huwa attribwibbli għal interess li ma jagħtix kontroll ikun relatat ma’ avvjament li mhuwiex rikonoxxut fir-rapporti finanzjarji konsolidati tal-kumpannija prinċipali (ara l-paragrafu C4), dak l-indeboliment mhuwiex rikonoxxut bħala telf minn indeboliment tal-avvjament. F’każijiet bħal dawn, it-telf minn indeboliment li għandu x’jaqsam biss mal-avvjament li huwa allokat għall-kumpannija prinċipali huwa rikonoxxut bħala telf minn indeboliment tal-avvjament.

L-eżempju illustrattiv 7 juri l-ittestjar tal-indeboliment ta’ unità li tiġġenera l-flus li ma hijiex kollha tal-istess sid b’avvjament”

IAS 37 PROVEDDIMENTI, OBBLIGAZZJONIJIET KONTINĠENTI U ASSI KONTINĠENTI

C11

Fl-IAS 37, il-paragrafu 5 huwa emendat kif ġej:

“5.

Meta Standard ieħor jittratta tip speċifiku ta’ provvediment, obbligazzjoni kontinġenti jew assi kontinġenti, entità tapplika dak l-Istandard minflok dan l-Istandard. Pereżempju, xi tipi ta’ provvedimenti huma indirizzati fl-Istandards dwar:

(a)	kuntratti ta’ kostruzzjoni (ara l-IAS 11 Kuntratti ta’ Kostruzzjoni);

…”

IAS 38 ASSI INTANĠIBBLI

C12

L-IAS 38 huwa emendat kif deskritt hawn taħt.

Fil-paragrafu 8, id-definizzjoni tad-data tal-ftehim hija mħassra.

Il-paragrafi 11, 12, 25 u 33–35 huma emendati kif ġej:

“11.

Id-definizzjoni ta’ assi intanġibbli teħtieġ li assi intanġibbli jkun identifikabbli biex jingħaraf mill-avvjament. Avvjament rikonoxxut f’kombinament ta’ negozji huwa assi li jirrappreżenta l-benefiċċji ekonomiċi futuri li jirriżultaw minn assi oħrajn akkwistati f’kombinament ta’ negozji li mhumiex identifikati individwalment u rikonoxxuti separatament. Il-benefiċċji ekonomiċi futuri jistgħu jirriżultaw minn sinerġija bejn l-assi identifikabbli akkwistati jew minn assi li, individwalment, ma jikkwalifikawx għal rikonoxximent fir-rapporti finanzjarji.

12.

Assi huwa identifikabbli jekk ikun jew:

(a)	separabbli, jiġifieri jkun jista’ jiġi separat jew mifrud mill-entità u mibjugħ, trasferit, liċenzjat, mikri jew skambjat, jew individwalment jew flimkien ma’ kuntratt relatat, jew ma’ assi jew obbligazzjoni identifikabbli, irrispettivament minn jekk l-entità għandhiex il -ħsieb li tagħmel dan; jew

(b)	joriġina minn drittijiet kuntrattwali jew minn drittijiet legali oħrajn, irrispettivament minn jekk dawk id-drittijiet ikunux trasferibbli jew separabbli mill-entità jew minn drittijiet u obbligi oħrajn.

25.

Normalment, il-prezz li entità tħallas biex takkwista separatament assi intanġibbli jirrifletti l-aspettativi dwar il-probabbiltà li l-benefiċċji ekonomiċi futuri inkorporati fl-assi ser jgħaddu għal fuq l-entità. Fi kliem ieħor, l-entità tistenna li jkun hemm dħul ta’ benefiċċji ekonomiċi, anki jekk ikun hemm inċertezza dwar iż-żmien jew l-ammont tad-dħul. Għalhekk, il-kriterju ta’ rikonoxximent ibbażat fuq il-probabbiltà fil-paragrafu 21(a) jitqies dejjem li hu sodisfatt għal assi intanġibbli akkwistati separatament.

33.

B’konformità mal-IFRS 3 Kombinamenti ta’ Negozji, jekk assi intanġibbli jiġi akkwistat f’kombinament ta’ negozji, il-kost ta’ dak l-assi intanġibbli jkun il-valur ġust tiegħu fid-data tal-akkwiżizzjoni. Il-prezz ġust ta’ assi intanġibbli jirrifletti l-aspettativi dwar il-probabbiltà li l-benefiċċji ekonomiċi futuri mistennija inkorporati fl-assi ser jgħaddu għal fuq l-entità. Fi kliem ieħor, l-entità tistenna li jkun hemm dħul ta’ benefiċċji ekonomiċi, anki jekk ikun hemm inċertezza dwar iż-żmien jew l-ammont ta’ dħul. Għalhekk, il-kriterju ta’ rikonoxximent ibbażat fuq il-probabbiltà fil-paragrafu 21(a) jitqies dejjem li hu ssodisfat għal assi intanġibbli akkwistati f’kombinamenti ta’ negozji. Jekk assi akkwistat f’kombinament ta’ negozji huwa separabbli jew jirriżulta minn drittijiet kuntrattwali jew drittijiet legali oħrajn, tkun teżisti informazzjoni suffiċjenti biex il-valur ġust tal-assi jitkejjel b’mod affidabbli. Għalhekk, il-kriterju tal-kejl affidabbli fil-paragrafu 21(b) jitqies dejjem li hu ssodisfat għal assi intanġibbli akkwistati f’kombinamenti ta’ negozji.

34.

Skont dan l-Istandard u l-IFRS 3 (kif rivedut mill-Bord tal-Istandards Internazzjonali tal-Kontabilità fl-2008), akkwirent jirrikonoxxi fid-data tal-akkwiżizzjoni, separatament mill-avvjament, assi intanġibbli tal-akkwiżit, irrispettivament minn jekk l-assi kienx ġie rikonoxxut mill-akkwiżit qabel il-kombinament ta’ negozji. Dan ifisser li l-akkwiżit jirrikonoxxi bħala assi, separatament mill-avvjament, proġett ta’ riċerka u żvilupp li jkun jinsab għaddej tal-akkwiżit jekk il-proġett jissodisfa d-definizzjoni ta’ assi intanġibbli. Proġett ta’ riċerka u żvilupp li jkun jinsab għaddej tal-akkwiżit jissodisfa d-definizzjoni ta’ assi intanġibbi meta:

(a)	jissodisfa d-definizzjoni ta’ assi; u

(b)	ikun identifikabbli, i.e. ikun separabbli jew joriġina minn drittijiet kuntrattwali jew drittijiet legali oħrajn.

Kejl tal-valur ġust ta’ assi intanġibbli akkwistat fkombinament ta’ negozji.

35.

Jekk assi intanġibbli akkwistat f’kombinament ta’ negozji huwa separabbli jew jirriżulta minn drittijiet kuntrattwali jew minn drittijiet legali oħrajn, tkun teżisti informazzjoni suffiċjenti biex il-valur ġust tal-assi jitkejjel b’mod affidabbli. Meta, għall-istimi użati għall-kejl tal-valur ġust tal-assi intanġibbli, ikun hemm firxa ta’ riżultati possibbli bi probabbiltajiet differenti, dik l-inċertezza tidħol fil-kejl tal-valur ġust tal-assi.”

Il-paragrafu 38 hu mħassar.

Il-paragrafi 68 huwa emendati kif ġej:

“68.

Nefqa fuq oġġett intanġibbli għandha tiġi rikonoxxuta bħala spiża meta ssir, ħlief jekk:

(a)	tifforma parti mill-kost ta’ assi intanġibbli li jissodisfa l-kriterji ta’ rikonoxximent (ara l-paragrafi 18-67); jew

(b)	l-oġġett jiġi akkwistat f’kombinament ta’ negozji u ma jistax jiġi rikonoxxut bħala assi intanġibbli. Jekk dan ikun il-każ, jifforma parti mill-ammont rikonoxxut bħala avvjament fid-data tal-akkwiżizzjoni (ara l-IFRS 3).”

Il-paragrafu 94 hu emendat kif ġej:

“94.

Iż-żmien tal-utilità ta’ assi intanġibbli li jirriżulta minn drittijiet kuntrattwali jew minn drittijiet legali oħrajn ma jistax jaqbeż il-perijodu tad-drittijiet kuntrattwali jew tad-drittijiet legali oħrajn, iżda jista’ jkun iqsar skont il-perijodu li matulu l-entità tkun qed tistenna li tuża l-assi. Jekk id-drittijiet kuntrattwali jew id-drittijiet legali oħrajn jingħataw għal terminu limitat li jista’ jiġi mġedded, iż-żmien tal-utilità tal-assi intanġibbli għandu jinkludi l-perijodu(i) ta’ tiġdid biss jekk ikun hemm evidenza li turi li t-tiġdid mill-entità sar mingħajr kost sinifikanti. Iż-żmien tal-utilità ta’ dritt akkwistat mill-ġdid rikonoxxut bħala assi intanġibbli f’kombinament ta’ negozji huwa l-bqija tal-perijodu kuntrattwali tal-kuntratt li fih ingħata d-dritt u ma għandux jinkludi perijodi ta’ tiġdid.”

Il-paragrafu 115 A hu miżjud kif ġej:

“115A

Fil-każ ta’ dritt akkwistat mill-ġdid f’kombinament ta’ negozji, jekk sussegwentament id-dritt jinħareġ mill-ġdid (jinbigħ) lil terzi, l-ammont relatat miżmum fil-kotba, jekk ikun hemm, għandu jintuża sabiex jiġi ddeterminat il-qligħ jew telf mal-ħruġ mill-ġdid.”

Il-paragrafu 129 hu mħassar.

Il-paragrafu 130 hu emendat kif ġej:

“130.

Entità għandha tapplika dan l-Istandard:

(a)

…”

Il-paragrafu 130C hu miżjud kif ġej:

“130C

L-IFRS 3 (kif rivedut mill-Bord tal-Istandards Internazzjonali tal-Kontabilità fl-2008) emenda l-paragrafi 12, 33-35, 68, 94 u 130, ħassar il-paragrafi 38 u 129 u żied il-paragrafu 115 A. Entità għandha tapplika b’mod prospettiv dawk l-emendi għal perijodi annwali li jibdew fl-1 ta’ Lulju 2009 jew wara. Għaldaqstant, ammonti rikonoxxuti għal assi intanġibbli u għal avvjament f’kombinamenti ta’ negozji preċedenti ma għandhomx jiġu aġġustati. Jekk entità tapplika l-IFRS 3 (rivedut fl-2008) għal perijodu aktar bikri, l-emendi għandhom japplikaw ukoll għal dak il-perijodu aktar bikri.”

IAS 39 STRUMENTI FINANZJARJI: RIKONOXXIMENT U KEJL

C13

L-IAS 39 huwa emendat kif deskritt hawn taħt.

Il-paragrafu 2(f) hu mħassar.

Il-paragrafu 103D hu miżjud kif ġej:

“103D

L-IFRS 3 (kif rivedut mill-Bord tal-Istandards Internazzjonali tal-Kontabilità fl-2008) ħassar il-paragrafu 2(f). Entità għandha tapplika dik l-emenda għal perijodi annwali li jibdew fl-1 ta’ Lulju 2009 jew wara. Jekk entità tapplika l-IFRS 3 (rivedut fl-2008) għal perijodu aktar bikri, l-emenda għandha tiġi applikata wkoll għal dak il-perijodu aktar bikri.”

IFRIC 9 EVALWAZZJONI MILL-ĠDID TA’ DERIVATI MDEFFSA

C14

Il-paragrafu 5 tal-IFRIC 9 għandu din in-nota f’qiegħ il-paġna:

“5.	Din l-Interpretazzjoni ma tindirizzax l-akkwiżizzjoni ta’ kuntratti b’derivati mdeffsa f’kombinament ta’ negozji, u lanqas il-possibbiltà li jerġgħu jiġu evalwati mill-ġdid fid-data tal-akkwiżizzjoni (*1).

(*1) l-IFRS 3 (kif rivedut mill-Bord tal-Istandards Internazzjonali tal-Kontabilità fl-2008) jindirizza l-akkwiżizzjoni ta’ kuntratti b’derivati mdeffsa f’kombinament ta’ negozji.” "

(*1) l-IFRS 3 (kif rivedut mill-Bord tal-Istandards Internazzjonali tal-Kontabilità fl-2008) jindirizza l-akkwiżizzjoni ta’ kuntratti b’derivati mdeffsa f’kombinament ta’ negozji.” ”

Top

Choose the experimental features you want to try