28.7.2009   

MT

Il-Ġurnal Uffiċjali tal-Unjoni Ewropea

L 196/61

(1)

L-Artikolu 19 tad-Deċiżjoni tal-Kummissjoni 2008/721/KE tal-5 ta’ Settembru 2008 li twaqqaf Struttura Konsultattiva ta’ Kumitati Xjentifiċi u esperti fil-qasam tas-sigurtà tal-konsumatur, is-saħħa pubblika u l-ambjent u li tirrevoka d-Deċiżjoni 2004/210/KE (1) tistipula li membri tal-Kumitati Xjentifiċi, il-konsultenti xjentifiċi mill-Grupp u l-esperti esterni għandhom ikunu intitolati għal indennizz għall-parteċipazzjoni tagħhom fil-laqgħat tal-Kumitati, laqgħat ta’ ħidma tematiċi, gruppi ta’ ħidma u laqgħat u avvenimenti oħrajn organizzati mill-Kummissjoni, u talli jservu ta’ Relaturi dwar xi mistoqsija speċifika.

(2)

L-Anness III tad-Direttiva 2008/721/KE jiffissal-indennizz għal kull ġurnata sħiħa ta’ parteċipazzjoni għal EUR 300, l-indennizz għall-parteċipazzjoni f’laqgħa filgħodu jew wara nofsinhar għal EUR 150, u l-indennizz għal Relatur għal EUR 300. Fejn ikun iġġustifikat bis-sħiħ u jekk il-baġit jippermetti, din is-somma tista’ tiżdied għal EUR 600 għal kwistjonijiet li jkunu partikolarment impenjattivi f’termini ta’ ammont ta’ xogħol.

(3)

L-Anness jistipula wkoll li l-Kummissjoni se tistma b’mod regolari l-ħtieġa li jiġu adattati dawn l-indennizzi fid-dawl tal-indiċi tal-prezzijiet, l-evalwazzjoni ta’ indennizzi mħallsa lill-esperti f’istituzzjonijiet Ewropej oħrajn u l-esperjenza għall-ammont ta’ xogħol tal-membri, membri msieħba, konsulenti xjentifiċi oħrajn u esperti esterni. L-ewwel stima se sseħħ fl-2009.

(4)

Il-livell kurrenti tal-indennizzi kien stipulat fl-1997 għall-membri u l-esperti tal-predeċessuri tal-Kumitati Xjentifiċi kkonċernati u ma kienx rivalutat minn dakinhar. L-indennizz aġġornat għal kull ġurnata b’kunsiderazzjoni għaż-żieda fil-prezzijiet tal-konsumatur fil-perjodu 1997-2008 skont l-Indiċi tal-Prezzijiet tal-Konsumatur tal-Eurostat se jkun ta’ EUR 381,50. Dan l-ammont għandu jkun ta’ EUR 385 għad-dritt.

(5)

Id-distinzjoni bejn laqgħat ta’ ġurnata jew ta’ nofstanhar għandha tkun eliminata biex il-ħin tal-ivvjaġġar u tat-trasport ikun ikkunsidrat.

(6)

Fid-dawl tal-esperjenza, il-volum ta’ xogħol għar-Relaturi jiddependi b’mod sostanzjali mill-kumplessità u mit-tul tal-attivitajiet li hemm bżonn biex tkun kompluta l-opinjoni, b’kunsiderazzjoni għall-kumplessità tal-kwistjoni, id-disponibilità u l-aċċessibilità tad-dejta, l-ammont ta’ letteratura li trid tkun eżaminata, il-bżonn għal kollaborazzjoni ma’ korpi oħrajn u l-ammont u l-kumplessità ta’ konsultazzjonijiet li jkun hemm bżonn mal-partijiet interessati u mal-pubbliku. Iż-żewġ livelli kurrenti għall-indennizz tar-Relatur ma jirriflettux il-firxa attwali tas-sitwazzjonijiet u għaldaqstant hemm bżonn li tiddaħħal modulazzjoni usa’ tal-indennizz tar-Relatur,