19.2.2009   

MT

Il-Ġurnal Uffiċjali tal-Unjoni Ewropea

L 48/13

(1)

Id-Direttiva 97/23/KE tipprovdi li apparat ta’ pressjoni u l-assemblaġġi jistgħu jitqiegħdu fis-suq u jitħaddmu jekk biss, meta jkunu installati kif suppost u mantnuti u użati għall-użu maħsub għalihom, ma jpoġġux is-saħħa u s-sigurezza ta’ persuni f’periklu u, fejn ikun xieraq, annimali domestiċi jew proprjetà.

(2)

Apparat ta’ pressjoni u l-assemblaġġi huma meqjusa li jissodisfaw ir-rekwiżiti essenzjali stipulati fl-Anness I tad-Direttiva 97/23/KE jekk dawn jikkonformaw mal-istandards nazzjonali li jittrasponu l-istandards armonizzati li n-numru ta’ referenza tagħhom kienu ġew ippublikati f’Il-Ġurnal Uffiċjali tal-Unjoni Ewropea.

(3)

Skont l-Artikolu 6 tad-Direttiva 97/23/KE, l-Isvezja ressqet oġġezzjoni formali dwar l-istandard EN 3-9:2006 adottat mill-Kumitat Ewropew għall-Istandardizzazzjoni (CEN) fit-2 ta’ Novembru 2006 li s’issa r-referenza tiegħu f’Il-Ġurnal Uffiċjali tal-Unjoni Ewropea għadha ma ġietx ippubblikata.

(4)

L-Isvezja tikkunsidra t-taqsimiet 4, 5.1, 5.2, 5.4, 6 u 8 tal-istandard EN 3-9:2006 ma jissodisfawx ir-rekwiżiti essenzjali tad-Direttiva 97/23/KE.

(5)

Fir-rigward tat-taqsima 4 (materjali) ta’ EN 3-9:2006, l-Isvezja tikkunsidra li informazzjoni ġenerali biss hi mogħtija u għalhekk mhux possibbli li jkun hemm provvediment għal soluzzjonijiet tekniċi fir-rigward tar-rekwiżiti dwar il-materjali fil-punt 4 tal-Anness I tad-Direttiva 97/23/KE. L-għażla preċiża tal-materja hi, f’dan il-kuntest, element essenzjali biex jintlaħqu diversi rekwiżiti essenzjali dwar is-sigurezza għal apparat ta’ pressjoni b’konformità mar-rekwiżiti relevanti tal-Mandat M/071 għas-CEN.

(6)

It-Taqsima 4 tal-istandard EN 3-9:2006 ma tispeċifikax it-tipi ta’ materjali li għandhom jintużaw. L-istandard jipprekludi biss l-użu ta’ materjali mhux tal-metall għall-għamla ta’ apparati li joperaw u jirrikjedi li l-materjali tal-komponenti li jistgħu jkunu f’kuntatt mal-kontenut għandhom ikunu kompatibbli kemm mal-kontenut u anki mal-materjal tal-komponenti oħra. Għalhekk, fin-nuqqas ta’ speċifikazzjonijiet tekniċi konkreti, it-taqsima 4 tal-EN 3-9:2006 ma tistax tagħti l-preżunzjoni ta’ konformità mar-rekwiżiti tal-punt 4 tal-Anness I tad-Direttiva 97/23/KE.

(7)

Fir-rigward tat-taqsima 5 (disinn) tal-istandard EN 3-9:2006, u mod partikolari t-taqsimiet 5.1 u 5.2, l-Isvezja hi tal-opinjoni li dawn ma jinkludux rekwiżiti tekniċi fir-rigward tad-disinn ta’ kontenituri tas-CO2 għas-saħħa xierqa fir-rigward taż-żamma tal-pressjoni. L-Isvezja tikkunsidra li dawn il-klawżoli ma jikkonformawx mal-punti 2.3 u 2.9 tal-Anness I tad-Direttiva 97/23/KE.

(8)

It-Taqsimiet 5.1 u 5.2 tal-istandard EN 3-9:2006 ma jinkludu l-ebda rekwiżiti speċifiċi dwar id-disinn taċ-ċilindru u tal-apparat li jopera, u kif ukoll l-ebda soluzzjoni teknika ddettaljata biex tassigura l-mili u t-tbattil. Għalhekk, dawn mhumiex suffiċjenti biex jagħtu l-preżunzjoni ta’ konformità għar-rekwiżiti ta’ tqandil u operazzjoni siguri fil-punt 2.3 u fil-mili u t-tbattil sigur fil-punt 2.9 tal-Anness I tad-Direttiva 97/23/KE.

(9)

L-Isvezja tikkunsidra wkoll li t-taqsima 5.4 tal-istandard EN 3-9:2006 ma tikkonformax mal-punt 2.11.2 tal-Anness I tad-Direttiva 97/23/KE.

(10)

It-Taqsima 5.4 tal-istandard EN 3-9:2006 tgħid li l-apparat ta’ sigurezza ta’ meta tinfaqa’ d-diska tal-apparat tat-tifi tan-nar irid ikun attivat meta l-pressjoni tkun bejn 10 % aktar mill-pressjoni massima permessa PS u t-test tal-pressjoni PT. Id-diska li tinfaqa’ hi kklassifikata fl-istandard bħala aċċessorju ta’ sigurezza. Madankollu, id-diska li tinfaqa’ mhix apparat tipiku li jillimita l-pressjoni iżda hi apparat ta’ protezzjoni, billi l-għan tagħha hu li tnaqqas il-ħsara f’każ ta’ mili żejjed jew sħana żejda. Barra minn hekk, il-punt 2.11.2 tal-Anness I tad-Direttiva 97/23/KE dwar apparati li jillimitaw il-pressjoni tirrikjedi li dawn l-apparati jkunu ddisinjati biex il-pressjoni ma taqbiżx b’mod permanenti l-pressjoni massima permessa PS u li qabża ta’ żmien qasir biss tista’ taqbeż il-PS u anki f’dak il-każ 10 % biss. Għalhekk, din it-taqsima ma tistax tagħti preżunzjoni ta’ konformità mad-Direttiva 97/23/KE.

(11)

Skont l-Iżvezja, it-taqsima 6 tal-istandard EN 3-9:2006 (il-manifattura tal-apparat tat-tifi tan-nar assemblat) hi intiża, skont l-Anness ZA tiegħu, biex tassigura konformità mar-rekwiżiti tal-punt 2.8 (Assemblaġġi) tal-Anness I tad-Direttiva 97/23/KE. Madankollu, il-punt 2.8 tal-Anness I ta’ dik id-Direttiva tirrelata aktar mad-disinn milli mal-manifattura tal-apparat tat-tifi tan-nar assemblat.

(12)

Il-Punt 2.8 tal-Anness I tad-Direttiva 97/23/KE tinkludi rekwiżiti tad-disinn għall-assemblaġġi, biex tassigura li l-komponenti differenti, l-integrazzjoni proprja u l-assemblaġġ xieraq f’prodott wieħed integrat u funzjonali jkunu adatti. Il-Punt 3 tal-Anness I ta’ dik id-Direttiva tinkludi rekwiżiti dettaljati dwar il-manifattura.

(13)

It-Taqsima 6 tal-istandard EN 3-9:2006 ma tinkludix rekwiżiti speċifiċi fir-rigward tad-disinn. Minflok fiha informazzjoni ġenerali kemm fuq id-disinn u anki l-manifattura, iżda din mhix suffiċjenti biex tagħti l-preżunzjoni ta’ konformità mar-rekwiżiti tal-punt 2.8 tal-Anness I tad-Direttiva 97/23/KE. Barra minn hekk, billi l-kontenut ta’ din it-taqsima ma jikkorrispondix mar-rekwiżiti relevanti tad-Direttiva, din tista’ toħloq konfużjoni.

(14)

Finalment, l-Isvezja tikkunsidra li t-taqsima 8 tal-istandard EN 3-9:2006 ma tikkonformax mar-rekwiżiti tal-punt 3.3 tal-Anness I tad-Direttiva 97/23/KE, billi tnejn mill-aktar parametri importanti, il-pressjoni massima permessa PS u t-temperatura massima permessa (TSmax) huma nieqsa.

(15)

Id-Direttiva 97/23/KE tinkludi fil-punt 3.3 tal-Anness I rekwiżiti dettaljati fuq l-immarkar u l-ittikkettjar tal-apparat ta’ pressjoni. Din tinkludi, għal kull apparat ta’ pressjoni, informazzjoni dwar il-limiti massimi/minimi permessi essenzjali.

(16)

It-Taqsima 8 tal-istandard EN 3-9:2006 tinkludi rekwiżiti ta’ immarkar dwar il-pressjoni massima permessa PS, iżda mhux dwar it-temperatura minima u massima permessi (TSmin/TSmax). Għalhekk, din mhix suffiċjenti biex tagħti l-preżunzjoni ta’ konformità mal-punt 3.3 tal-Anness I tad-Direttiva 97/23/KE.

(17)

Barra minn hekk, l-evalwazzjoni ġenerali tal-istruttura u l-kontenut tal-istandard EN 3-9:2006 mhix ċara biżżejjed dwar il-fatt jekk din tindirizzax ir-rekwiżiti tad-disinn għall-assemblaġġ biss (apparat ta’ pressjoni li jista’ jinġarr) jew tkoprix ukoll id-disinn tal-komponenti u l-fażi ta’ manifattura tal-assemblaġġ. Din jaf toħloq konfużjoni fl-iskop u r-relazzjoni bejn il-klawżoli tagħha u r-rekwiżiti essenzjali tad-Direttiva 97/23/KE.

(18)

Għaldaqstant, fuq il-bażi tal-EN 3-9:2006, tal-informazzjoni rċevuta fil-qasam tal-konsultazzjoni tal-awtoritajiet nazzjonali, is-CEN u l-industrija u wara l-valutazzjoni tal-aspetti kollha kkonċernati, jirriżulta li l-istandard EN 3-9:2006 armonizzat jonqos milli jilħaq ir-rekwiżiti essenzjali li jikkorrispondu tad-Direttiva 97/23/KE.

(19)

Ir-referenzi tal-istandard EN 3-9:2006 għalhekk ma għandhiex tkun ippubblikata f’Il-Ġurnal Uffiċjali tal-Unjoni Ewropea,