15.11.2008   

MT

Il-Ġurnal Uffiċjali ta’ l-Unjoni Ewropea

L 306/22

(1)

Fis-16 ta’ Frar 2008, il-Kummissjoni ħabbret, permezz ta’ avviż (“avviż ta’ inizjazzjoni”) ippubblikat f’Il-Ġurnal Uffiċjali tal-Unjoni Ewropea  (2), il-bidu ta’ proċedura anti-dumping fir-rigward ta’ importazzjonijiet fil-Komunità ta’ ċerti xemgħat, kandiletti u oġġetti simili li joriġinaw mir-Repubblika tal-Poplu taċ-Ċina (“RPĊ” jew il-pajjiż ikkonċernat’).

(2)

Il-proċedura nbdiet b’riżultat ta’ ilment imressaq fit-3 ta’ Jannar 2008 minn ċerti produtturi ta’ ċerti xemgħat, kandiletti u oġġetti simili li jirrappreżentaw il-proporzjon prinċipali, f’dan il-każ madwar 60 % tat-total tal-produzzjoni tal-Komunità ta’ ċerti xemgħat, kandiletti u oġġetti simili. L-ilment kien jinkludi evidenza prima facie ta’ dumping tal-imsemmi prodott u tad-dannu materjali li jirriżulta minnu, li kien ikkunsidrat biżżejjed sabiex tkun ġustifikata l-inizjazzjoni ta’ investigazzjoni.

(3)

Il-Kummissjoni uffiċjalment infurmat lil dawk li qed jagħmlu l-ilment, l-produtturi esportaturi, l-importaturi, l-partijiet oħra magħrufa li huma kkonċernati, u lir-rappreżentanti tar-RPĊ dwar l-inizjazzjoni tal-proċedura. Il-partijiet interessati kienu mogħtija opportunità li jressqu l-opinjonijiet tagħhom bil-miktub u li jitolbu seduta fil-limitu ta’ żmien iffissat fl-avviż ta’ inizjazzjoni.

(4)

Dawk li għamlu l-ilment, produtturi Komunitarji oħra, produtturi esportaturi fir-RPĊ, importaturi li jinkludu gruppi kbar ta’ bejjiegħa bl-imnut u fornituri ta’ materja prima ressqu l-opinjonijiet tagħhom. Il-partijiet interessati kollha, li talbu dan u li wrew li kien hemm raġunijiet partikolari għaliex għandhom ikunu mismugħa, ingħataw seduta.

(5)

Fl-avviż ta’ inizjazzjoni, il-Kummissjoni indikat li l-ġbir ta’ kampjuni biex ikun determinat id-dumping u l-ħsara skont l-Artikolu 17 tar-Regolament bażiku jista’ jkun applikat. Biex il-Kummissjoni titħalla tiddeċiedi jekk il-ġbir ta’ kampjuni hux neċessarju, il-produtturi esportaturi fir-RPĊ magħrufa kollha, importaturi Komunitarji u produtturi Komunitarju kienu mitluba biex jippreżentaw rwieħhom quddiem il-Kummissjoni u biex jipprovdu, kif speċifikat fl-avviż ta’ inizjazzjoni, informazzjoni bażika dwar l-attivitajiet tagħhom fir-rigward tal-prodott ikkonċernat matul il-perjodu ta’ bejn l-1 ta’ Jannar 2007 sal-31 ta’ Diċembru 2007.

(6)

Kif spjegat fil-premessi (33) sa (40) iktar ’il quddiem, 41 produttur esportatur fir-RPĊ ipprovdew l-informazzjoni mitluba u qablu li jkunu inklużi f’kampjun. Fuq il-bażi tal-informazzjoni li waslet mill-produtturi esportaturi li kkooperaw, il-Kummissjoni għażlet kampjun ta’ tmien produtturi fir-RPĊ jew gruppi ta’ kumpaniji relatati li għandhom l-ikbar għadd ta’ esportazzjonijiet lejn il-Komunità. Il-produtturi esportaturi kollha kkonċernati, kif ukoll l-assoċjazzjoni tagħhom u l-awtoritajiet tar-RPĊ, kienu kkonsultati u qablu fuq l-għażla tal-kampjun.

(7)

Sabiex il-produtturi esportaturi fir-RPĊ ikunu jistgħu jressqu talba għal trattament ta’ ekonomija tas-suq (“TES”) jew għal trattament individwali (“TI”), jekk xtaqu dan, il-Kummissjoni bagħtet formoli ta’ talbiet lill-produtturi esportaturi fir-RPĊ magħrufa bħala kkonċernati u lill-awtoritajiet tar-RPĊ.

(8)

Il-Kummissjoni żvelat uffiċjalment ir-riżultati tas-sejbiet tat-TES lill-produtturi esportaturi fir-RPĊ ikkonċernati u lil-dawk li għamlu l-ilment. Huma kienu mogħtija opportunità wkoll biex iressqu l-opinjonijiet tagħhom bil-miktub u biex jitolbu seduta jekk kien hemm raġunijiet partikolari sabiex jinstemgħu.

(9)

Produttur esportatur wieħed li ma kienx inkluż fil-kampjun għax ma ssodisfax il-kriterji stabbiliti fl-Artikolu 17(1) tar-Regolament bażiku talab marġini individwali skont l-Artikolu 17(3) tar-Regolament bażiku. Kien ikkunsidrat madankollu li eżaminar individwali jkun ta’ piż żejjed mhux ġustifikat u kien jimpedixxi t-twettiq fil-ħin tal-investigazzjoni. Għalhekk, kien konkluż proviżorjament li t-talba għal eżaminar individwali tal-produttur esportatur ma setgħetx tkun aċċettata.

(10)

Il-Kummissjoni bagħtet kwestjonarji lill-partijiet kollha magħrufa bħala kkonċernati u lill-kumpaniji l-oħra kollha li ppreżentaw irwieħhom sa qabel l-iskadenzi stabbiliti fl-avviż ta’ inizjazzjoni, jiġifieri lil 31 produttur Komunitarju, 32 importatur kif ukoll żewġ fornituri ta’ materja prima.

(11)

Waslu risposti mill-produtturi Komunitarji li għamlu l-ilment, sitt importaturi mhux relatati u żewġ fornituri.

(12)

Fir-rigward tal-pajjiż ikkonċernat b’din l-investigazzjoni, il-Kummissjoni rċeviet risposti għall-formula ta’ ġbir ta’ kampjuni minn 41 produtturi esportaturi fir-RPĊ.

(13)

Il-Kummissjoni fittxet u vverifikat l-informazzjoni kollha meqjusa neċessarja għal determinazzjoni proviżorja ta’ dumping, ħsara li tirriżulta u interess Komunitarju. Żjarat ta’ verifika saru fl-istabbilimenti tal-kumpaniji li ġejjin:

(14)

L-investigazzjoni tad-dumping u tal-ħsara kopriet il-perjodu mill-1 ta’ Jannar 2007 sal-31 ta’ Diċembru 2007 (il-perjodu għall-investigazzjoni jew “PI”). L-eżaminar ta’ xejriet relevanti għall-evalwazzjoni tal-ħsara kopra il-perjodu mill-2004 sal-aħħar tal-PI (“perjodu kkunsidrat”).

(15)

Il-prodott ikkonċernat huwa ċerti xemgħat, kandiletti u oġġetti simili, ħlief xemgħat taċ-ċimiterju u xemgħat oħra għal barra, esportati lejn il-Komunità u li joriġinaw fir-RPĊ (xemgħat). Il-proċess ta’ produzzjoni għall-manifattura tax-xemgħat huwa pjuttost sempliċi u jikkonsisti fit-tisħin ta’ materja prima (prinċipalment xema’ bajda (tal-pitrolju) u stearina) u ffurmar tax-xema’ f’forom jew kontenituri fi proċess ta’ tkessiħ. Ix-xemgħat jipproduċu sħana u dawl iżda jintużaw l-iktar għal skopijiet ta’ tiżjin fuq ġewwa, eż. f’diversi buġiji, gandlieri u oġġetti oħra ta’ tiżjin.

(16)

Ix-xemgħat huma normalment iddikjarati fil-kodiċi NM ex 3406 00 11, ex 3406 00 19 u ex 3406 00 90.

(17)

Xemgħat taċ-ċimiterju u xemgħat oħra għal barra mhumiex parti mill-prodott ikkonċernat. Dawn jistgħu jkunu definiti bħala prodotti, li l-fjuwil tagħhom fih iktar minn 500 ppm ta’ toluwol u/jew iktar minn 100 ppm ta’ benżin u/jew għandhom niċċa b’dijametru ta’ mill-inqas 5 millimetri u/jew huma ppakkjati individwalment f’kontenitur tal-plastik b’ħitan vertikali ta’ mill-inqas 5 ċm fit-tul. Kien ikkunsidrat li dawn il-kriterji qed jistabbilixxu linja ta’ diviżjoni ċara bejn it-tipi ta’ xemgħat li huma koperti minn din l-investigazzjoni u dawk li mhumiex.

(18)

L-investigazzjoni wriet li hemm numru kbir ta’ tipi differenti ta’ xemgħat bħal kandiletti, tea lights, kif ukoll ħafna tipi oħra tal-istaġun u speċjali magħmula fir-RPĊ u mibjugħa fis-suq Komunitarju. It-tipi diversi ta’ xemgħat jistgħu bażikament jvarjaw fid-daqs, forma, kulur, bil-fwieħa jew mingħajrha, eċċ., iżda dawn it-tipi kollha għandhom l-istess karatteristiċi kimiċi u tekniċi bażiċi u l-istess użi u sa ċertu punt jistgħu jinbidlu bejniethom. Għalhekk, huwa kkunsidrat li x-xemgħat kollha koperti minn din l-investigazzjoni huma parti mill-istess familja tal-prodott.

(19)

Ċerti parijiet interessati għamlu sottomissjonijiet u allegazzjonijiet rigward id-definizzjoni tal-prodott ikkonċernat. Kien allegat li x-xemgħat taċ-ċimiterju u x-xemgħat għal barra kienu esklużi b’mod mhux ġustifikat mill-ambitu tal-prodott għax l-industrija tal-Komunità tiddomina dan is-segment u għax il-kriterji tekniċi fuq imsemmija fil-premessa (17) mhumiex uniċi fis-sens li xemgħat taċ-ċimiterju u xemgħat oħra għal barra mhux dejjem jaqbżu l-karatteristiċi fuq imsemmija. Barra minn hekk, huma allegaw li d-distinzjoni magħmula bejn xemgħat u xemgħat taċ-ċimiterju u xemgħat oħra għal barra ma kinitx fuq bażi ta’ xi standard jew regoli fl-industrija u kienet tikkontradixxi s-suppożizzjoni li tea lights u xemgħat oħra kienu t-tnejn inklużi fid-definizzjoni tal-prodott ikkonċernat.

(20)

Partijiet oħra allegaw li l-proċessi ta’ produzzjoni u l-medda ta’ prodotti magħmula fir-RPĊ kif ukoll it-tipi ta’ xemgħat esportati lejn il-Komunità kienu speċifiċi ħafna. F’dan il-kuntest kien iddikjarat li f’ħafna istanzi esportaturi fir-RPĊ jesportaw il-prodott ikkonċernat flimkien ma’ aċċessorji oħra bħal tazza tal-ħġieġ u/jew gandlieri fejn il-valur ta’ esportazzjoni jinkludi l-oġġetti kollha u mhux biss ix-xemgħat. Dawn it-tipi kollha għandhom ikunu esklużi mill-ambitu tal-investigazzjoni.

(21)

Kien allegat ukoll li produtturi esportaturi fir-RPĊ qed jipproduċu sa ċertu punt xemgħat magħmula bl-idejn jew speċjali permezz ta’ operazzjonijiet ta’ iktar rfinar, bħal stampar, brix u verniċjatura. Dawn huma tipi li jirrikjedu xogħol intensiv, imsejħa xemgħat “ornamentali” jew “speċjali”, li mhumiex manifatturati fil-Komunità. Skont dan, dawn il-partijiet allegaw li x-xemgħat speċjali għandhom ikunu esklużi wkoll mill-ambitu tal-prodott ta’ din l-investigazzjoni.

(22)

Għandu jkun osservat li l-allegazzjonijiet fuq imsemmija ma kinux speċifiċi u ma kinux jinkludu evidenza li turi li l-prodott ikkonċernat ma kienx definit b’mod korrett fl-avviż ta’ inizjazzjoni. Kif iddikjarat iktar ’il fuq, irriżulta li t-tipi kollha tal-prodott ikkonċernat għandhom l-istess karatteristiċi kimiċi u tekniċi bażiċi u l-istess użi li sa ċertu punt jistgħu jinbidlu. Rigward l-allegazzjonijiet magħmula dwar ix-xemgħat taċ-ċimiterju u x-xemgħat għal barra, huwa osservat li dawn il-prodotti jistgħu jkunu distinti minn tipi oħra ta’ xemgħat fuq il-bażi ta’ kriterji tekniċi u kimiċi msemmija fil-premessa (17) hawn fuq. Il-fatt li minn naħa waħda l-produtturi tal-Komunità jistgħu jkunu dominanti f’dan is-segment partikolari u min-naħa l-oħra kwalunkwe allegazzjoni li l-produtturi tal-Komunità mhux qed jimmanifatturaw ċerti tipi tal-prodott ikkonċernat huwa irrelevanti u ma jibdilx id-definizzjoni tal-prodott ikkonċernat.

(23)

Għandu jkun osservat ukoll li l-proċessi ta’ produzzjoni, il-varjetà ta’ tipi ta’ prodotti li huma prodotti u mibjugħa fis-suq Komunitarju, l-eżistenza jew in-nuqqas ta’ regoli mhumiex fihom infushom raġunijiet validi li qed juru li d-definizzjoni tal-prodott ikkonċernat għandha tkun riveduta.

(24)

Ċerti partijiet interessati allegaw li t-tip imsemmi tea light għandu jkun distint minn xemgħat oħrajn għax għandhom karatteristiċi fiżiċi differenti bħad-daqs u l-fatt li x-xema’ tinżamm f’kontenitur sabiex timpedixxi li x-xema’ tfur jew tqattar. Barra minn hekk, filwaqt li l-użu ewlieni ta’ xemgħat huwa li jipproduċu dawl, l-iskop ewlieni ta’ tea light huwa li tipprovdi sħana.

(25)

Ċerti partijiet interessati argumentaw li x-xemgħat prodotti mill-industrija Komunitarja u mibjugħa fis-suq Komunitarju ma kinux bħall-prodott ikkonċernat. Huma allegaw b’mod partikolari li l-prodott ikkonċernat kien prinċipalment mibjugħ f’settijiet inkluż oġġetti oħra ta’ tiżjin bħal buġiji, gandlieri, oġġetti taċ-ċeramika jew tal-ħġieġ oħra u li ma kienx possibbli li tiddistingwi l-valur tax-xemgħa fis-sett. Kien argumentat ukoll li filwaqt li l-produtturi tal-Komunità kienu qed ibiegħu biss tipi standard ta’ xemgħat, produtturi esportaturi fir-RPĊ kienu qed ibiegħu għadd kbir ta’ tipi speċjali ta’ xemgħat li ma jistgħux ikunu mqabbla mat-tipi standard.

(26)

Rigward l-allegazzjoni magħmula dwar l-użu ta’ ċerti tipi ta’ xemgħat, għandu jkun osservat li waqt seduta b’mod partikolari mal-Assoċjazzjoni ta’ produtturi ta’ xemgħat fir-RPĊ kien iddikjarat li l-konsum domestiku fir-RPĊ qed jiżdied b’mod sinifikanti fl-aħħar snin u li x-xemgħat mibjugħa domestikament kellhom l-istess użu ewlieni bħal fil-Komunità, jiġifieri għal tiżjin fuq ġewwa. Fir-rigward tal-allegata differenza fl-użu ta’ xemgħat (dawl) u tea lights (sħana), irriżulta li dawn it-tipi ta’ prodotti jistgħu jinbidlu bejniethom u li ż-żewġ tipi jistgħu jkunu użati għall-provvista ta’ dawl u sħana, iżda li, kif iddikjarat fil-premessa (15) fuq imsemmija, it-tnejn huma prinċipalment użati għal skopijiet ta’ tiżjin fuq ġewwa.

(27)

Huwa mfakkar ukoll li, kif imsemmi fil-premessa (18) hawn fuq, hemm diversi tipi ta’ xemgħat li bażikament għandhom differenzi fid-daqs, forma u kulur iżda dawn it-tipi kollha għandhom l-istess karatteristiċi kimiċi u tekniċi bażiċi u l-istess użi u sa ċertu punt jistgħu jinbidlu bejniethom. Għalhekk huwa kkunsidrat li t-tipi ta’ xemgħat koperti minn din l-investigazzjoni huma parti mill-istess familja tal-prodott.

(28)

Il-kriterji li għandhom ikunu applikati fid-determinazzjoni tal-“prodott simili” huma bbażati fuq il-karatteristiċi tekniċi u kimiċi, kif ukoll użi finali jew funzjonijiet tal-prodott u mhux fuq fatturi bħall-forma, riħa, kulur jew fatturi oħra ddikjarati mill-parti interessata. Id-differenzi fit-termini ta’ daqs ma jaffettwawx id-definizzjoni tal-prodott ikkonċernat u l-prodott simili, billi ma tista’ ssir ebda distinzjoni ċara bejn il-prodotti li jappartjenu fl-istess familja tal-prodott fir-rigward tal-karatteristiċi tekniċi u kimiċi bażiċi ewlenin, tal-użu finali u tal-perċezzjoni tal-utenti.

(29)

Minħabba l-allegazzjonijiet magħmula u l-evidenza pprovduta mill-partijiet interessati u l-informazzjoni l-oħra disponibbli kollha f’dan l-istadju tal-investigazzjoni, huwa kkunsidrat li ma hemm ebda differenzi bejn il-prodott ikkonċernat u x-xemgħat magħmula u mibjugħa mill-esportaturi/produtturi fis-suq domestiku tagħhom u mill-produtturi fil-Komunità, li serva wkoll bħala pajjiż analogu għall-iskop tal-istabbiliment tal-valur normali fir-rigward tar-RPĊ. Dawn ix-xemgħat għandhom essenzjalment l-istess karatteristiċi tekniċi u kimiċi bażiċi u l-istess użu bażiku. Huwa għalhekk konkluż proviżorjament li t-tipi kollha ta’ xemgħat huma kkunsidrati li huma bħal xulxin skont it-tifsira tal-Artikolu 1(4) tar-Regolament bażiku.

(30)

F’dan l-istadju tal-investigazzjoni, il-Kummissjoni ma rċevietx biżżejjed evidenza li l-karatteristiċi fiżiċi u/jew użu finali tat-tea lights huma fundamentalment differenti minn dawk ta’ xemgħat oħra u għandhom iwasslu għall-konklużjoni li t-tea lights u xemgħat oħra mhumiex parti mill-istess familja tal-prodott. L-investigazzjoni għandha tkompli tinvestiga u tesplora l-allegazzjonijiet sostanzjati kollha li jistgħu jsiru fuq il-kwistjoni tal-prodott simili.

(31)

Minħabba n-numru kbir ta’ produtturi Komunitarji li jappoġġjaw l-ilment, it-teħid ta’ kampjuni kien ippjanat fl-avviż ta’ inizjazzjoni skont l-Artikolu 17(1) tar-Regolament bażiku. Fuq il-bażi tal-analiżi tal-kampjuni li ntbagħtu, kampjun ta’ ħames produtturi kien finalment magħżul, ibbażat fuq il-kriterju tal-ikbar ammont ta’ produzzjoni kif previst fl-Artikolu 17(1) tar-Regolament bażiku.

(32)

Minħabba n-numru kbir ta’ importaturi identifikati mill-ilment, it-teħid ta’ kampjuni kien maħsub ukoll għall-importaturi fl-avviż ta’ inizjazzjoni skont l-Artikolu 17(1) tar-Regolament bażiku. Madankollu, fuq il-bażi tal-analiżi tan-numru ta’ kampjuni meħuda li ntbagħtu, ma kienx neċessarju li jkun applikat it-teħid ta’ kampjuni għall-importaturi.

(33)

Minħabba n-numru kbir ta’ produtturi esportaturi fir-RPĊ, it-teħid ta’ kampjuni kien maħsub fl-avviż ta’ inizjazzjoni għad-determinazzjoni tad-dumping, skont l-Artikolu 17(1) tar-Regolament bażiku.

(34)

Sabiex il-Kummissjoni titħalla tiddeċiedi jekk it-teħid ta’ kampjuni jkunx neċessarju u, jekk iva, biex tagħżel kampjun, il-produtturi esportaturi fir-RPĊ intalbu jippreżentaw irwieħhom sa 15-il ġurnata mid-data ta’ inizjazzjoni tal-investigazzjoni u jipprovdu informazzjoni bażika dwar l-esportazzjoni u l-bejgħ domestiku tagħhom, l-attivitajiet preċiżi tagħhom fir-rigward tal-produzzjoni ta’ xemgħat u l-ismijiet u attivitajiet tal-kumpaniji relatati tagħhom kollha involuti fil-produzzjoni u/jew li jbiegħu l-prodott ikkonċernat.

(35)

L-awtoritajiet tar-RPĊ u l-assoċjazzjoni tal-produtturi kienu kkonsultati wkoll għall-għażla tal-kampjun rappreżentattiv.

(36)

Bħala total, 41 produttur esportatur, inklużi gruppi ta’ kumpaniji relatati fir-RPĊ, ippreżentaw irwieħhom u pprovdew l-informazzjoni mitluba sal-iskadenza stabbilita fl-avviż ta’ inizjazzjoni. Kollha kemm huma rrapportaw esportazzjonijiet ta’ xemgħat lill-Komunità matul il-PI u, minbarra produttur wieħed b’ammonti ta’ esportazzjoni pjuttost insinifikanti, urew xewqa li jipparteċipaw fil-kampjun. Għalhekk, 40 produttur esportatur huma kkunsidrati li kkooperaw f’din l-investigazzjoni (“esportaturi li kkooperaw”).

(37)

Produtturi esportaturi li ma ppreżentawx irwieħhom sal-iskadenza msemmija jew li ma pprovdewx l-informazzjoni mitluba fil-ħin, kienu kkunsidrati bħala li ma kkooperawx fl-investigazzjoni. It-tqabbil bejn dejta ta’ importazzjoni tal-Eurostat u l-ammont ta’ esportazzjonijiet lejn il-Komunità tal-prodott ikkonċernat rapportat għall-PI mill-kumpaniji msemmija fil-premessa (36) jissuġġerixxi li l-kooperazzjoni tal-produtturi esportaturi Ċiniżi kien baxx ħafna kif imsemmi fil-premessa (87) iktar ’il quddiem.

(38)

Skont l-Artikolu 17(1) tar-Regolament bażiku, kien magħżul kampjun ibbażat fuq l-ikbar ammont rappreżentattiv ta’ esportazzjonijiet ta’ xemgħat fil-Komunità li jista’ jkun investigat b’mod raġonevoli fil-ħin disponibbli. Fuq il-bażi tal-informazzjoni li waslet mill-produtturi esportaturi, il-Kummissjoni għażlet kampjun ta’ tmien kumpaniji jew gruppi ta’ kumpaniji relatati li għandhom l-ikbar ammont ta’ esportazzjonijiet lejn il-Komunità. Skont l-informazzjoni mit-teħid ta’ kampjuni, il-kumpaniji magħżula ammontaw, fil-PI, għal iktar minn 73 % tal-ammont totali ta’ esportazzjonijiet lejn il-Komunità tal-prodott ikkonċernat irrapportat mill-produtturi esportaturi li kkooperaw imsemmija fil-premessa (36) hawn fuq. Kien għalhekk ikkunsidrat li dan il-kampjun jippermetti limitazzjoni tal-investigazzjoni għal numru raġonevoli ta’ produtturi esportaturi li jistgħu jkunu investigati fil-ħin disponibbli filwaqt li jiżgura livell għoli ta’ rappreżentazzjoni. Il-produtturi esportaturi kkonċernati kollha, kif ukoll l-assoċjazzjoni tagħhom u l-awtoritajiet tar-RPĊ, kienu kkonsultati u qablu fuq l-għażla tal-kampjun.

(39)

Żewġ esportaturi li kkooperaw mhux inklużi fil-kampjun talbu biex ikunu inklużi fil-kampjun billi ssuġġerew li kriterji bħal i) il-medda ta’ prodotti tal-produtturi esportaturi, ii) it-tip ta’ klijenti fil-Komunità, iii) rappreżentazzjoni ġeografika, iv) investiment barrani u v) il-livell ta’ dipendenza f’esportazzjonijiet lejn il-Komunità, għandhom ikunu kkunsidrati fl-għażla tal-kampjun.

(40)

F’dan ir-rigward huwa osservat li dawn il-kriterji mhumiex ipprovduti fl-Artikolu 17(1) tar-Regolament bażiku rigward l-għażla tal-kampjun. It-talbiet għalhekk kienu miċħuda.

(41)

Produttur esportatur li ma kienx inkluż fil-kampjun għax ma ssodisfax il-kriterji stabbiliti fl-Artikolu 17(1) tar-Regolament bażiku talab marġini individwali skont l-Artikolu 17(3) tar-Regolament bażiku.

(42)

Kif imsemmi fil-premessa (38) hawn fuq, il-kampjun kien limitat għal numru raġonevoli ta’ kumpaniji li jistgħu jkunu investigati fiż-żmien disponibbli. Il-kumpaniji investigati għall-iskop tal-investigazzjoni tad-dumping fir-RPĊ huma mniżżla fil-premessa (13)(c) u (d) hawn fuq. Minħabba l-verifika li saret fl-istabbilimenti ta’ numru kbir ta’ kumpaniji fil-kampjun li tinkorpora l-verifika ta’ allegazzjonijiet ta’ talbiet ta’ Trattament ta’ Ekonomija tas-Suq u risposti tal-kwestjonarji, kien ikkunsidrat li eżaminar individwali jkun ta’ piż żejjed u mhux ġustifikat u li jimpedixxi t-twettiq fil-ħin tal-investigazzjoni.

(43)

Għalhekk, kien konkluż proviżjorjament li t-talba għal eżaminar individwali tal-produttur esportatur ma setgħetx tkun aċċettata.

(44)

Waqt l-verifika fuq il-post, esportatur li kkoopera, parti minn grupp ta’ kumpaniji, magħżul fil-kampjun ma pprovdiex dokumentazzjoni bażika għal serje ta’ annotazzjonijiet bħal bejgħ domestiku, bejgħ ta’ esportazzjonijiet, moviment ta’ stokks, irċevuti ta’ valuta barranija, depożiti tal-bank u assi fissi li kienu meqjusa neċessarji għall-verifika tal-formuli tat-talba TES. Barra minn hekk, i) dikjarazzjonijiet tal-VAT, ii) fatturi speċjali tal-VAT rikjesti mill-awtoritajiet għat-tnaqqis tat-taxxa fuq l-esportazzjoni u iii) dikjarazzjonijiet tat-taxxa fuq id-dħul iċċertifikati mill-awtoritajiet ma kinux ipprovduti. Minflok, id-dokumenti pprovduti fuq il-post ma kinux iċċertifikati u kienu kkunsidrati li kienu qarrieqa u li kellhom informazzjoni mhux korretta. Fl-aħħar nett, instabu diskrepanzi bejn dokumenti ta’ kontabilità sottomessi fir-risposti u dokumenti ppreżentati fuq il-post. Dan kien ifisser li l-veraċità u l-preċizjoni tal-formoli tat-talba TES ma setgħux ikunu verifikati fil-post.

(45)

Fid-dawl ta’ din is-sitwazzjoni l-esportatur kien infurmat li skont l-Artikolu 18 tar-Regolament bażiku, kien mistenni li jibbaża s-sejbiet u l-konklużjonijiet fuq fatti disponibbli u ngħata l-opportunità li jikkummenta.

(46)

L-esportatur fir-risposta tiegħu essenzjalment allega li ma kienx iżomm dokumenti ta’ kontabilità li ma kinux legalment rikjesti mill-liġi Ċiniża ta’ kontabilità. Madankollu, ma pprovdiex xi dokumentazzjoni biex jagħti prova tal-allegazzjoni tiegħu u lanqas ma pprovda xi ġustifikazzjoni għala ma kienx żamm u pprovda d-dokumenti uffiċjali ċertifikati mill-awtoritajiet fir-RPĊ. Fl-aħħar nett, fil-kummenti tiegħu ammetta d-diskrepanzi li kien hemm fir-risposti tiegħu u fid-dokumenti li kienu ppreżentati fil-post.

(47)

Skont dawn iċ-ċirkustanzi, l-informazzjoni pprovduta minn dan il-grupp ta’ kumpaniji relatati ma kinitx ikkunsidrata u ntużaw il-fatti disponibbli, skont it-tifsira tal-Artikolu 18 tar-Regolament bażiku.

(48)

Skont l-Artikolu 2(7)(b) tar-Regolament bażiku, f’investigazzjonijiet ta’ anti-dumping li jikkonċernaw importazzjonijiet li joriġinaw fir-RPĊ, valur normali għandu jkun determinat skont il-paragrafi 1 sa 6 tal-imsemmi Artikolu għal dawk il-produtturi esportaturi li nstabu li ssodisfaw il-kriterji stabbiliti fl-Artikolu 2(7)(c) tar-Regolament bażiku.

(49)

Fi ftit kliem, u għal raguni ta’ referenza biss, dawn il-kriterji huma stabbiliti fil-qosor hawn taħt:

(50)

Il-kumpaniji kollha fil-kampjun talbu TES skont l-Artikolu 2(7)(b) tar-Regolament bażiku u wieġbu għal-formola ta’ talba TES fl-iskadenzi mogħtija. Il-Kummissjoni fittxet u vverifikat l-informazzjoni pprovduta fil-formoli ta’ talbiet u l-informazzjoni l-oħra kollha meqjusa neċessarja fl-istabbilimenti tal-kumpaniji inkwistjoni.

(51)

Kif spjegat fil-premessi (44) sa (47) fuq imsemmija l-Artikolu 18 tar-Regolament bażiku kellu jkun applikat għal applikant TES wieħed billi ma pprovdiex l-informazzjoni mitluba jew ipprovda informazzjoni qarrieqa matul il-verifika fuq il-post.

(52)

Il-verifika stabbiliet ukoll li ħames produtturi esportaturi fir-RPĊ oħra li kkooperaw ma ssodisfawx ir-rekwiżiti tal-kriterji stabbiliti fl-Artikolu 2(7)(c) tar-Regolament bażiku biex jingħataw TES.

(53)

Żewġ produtturi esportaturi ma ssodisfawx il-kriterju 2 billi ma setgħux juru li r-rekords ta’ kontabilità tagħhom kienu vverifikati indipendentement skont l-IAS. Iktar speċifikament, irriżulta li l-kontijiet ta’ produttur esporatur wieħed li jikkonċernaw self lil partijiet relatati ma kinux skont IAS 24 u IAS 32. Fil-każ tat-tieni produttur esportatur il-kontijiet tiegħu kellhom numru ta’ inkonsistenzi u żbalji u ma kinux jimxu skont IAS 1 u IAS 38 sa fejn kienu kkonċernati l-assi fissi tiegħu.

(54)

Kooperatur esportatur ma ssodisfax ir-rekwiżiti tal-kriterji 1 sa 3. L-ewwel nett, ma setax juri li d-deċiżjonijiet tiegħu saru bi tweġiba għal sinjali tas-suq u mingħajr interferenza sinifikanti mill-Istat għax instabu restrizzjonijiet fl-attivitajiet ta’ xiri u bejgħ tiegħu (kriterju 1). Fit-tieni lok, ma weriex li r-rekords ta’ kontabilità tiegħu kienu vverifikati skont l-IAS, għax il-kontijiet ta’ assi fissi ma kinux skont IAS 1 u IAS 38 (kriterju 2). Fl-aħħar nett, tgħawwiġ li ġej mis-sistema ta’ qabel li mhix ta’ ekonomija tas-suq kien osservat fil-forma ta’ evalwazzjonijiet mhux xierqa ta’ dritt għall-użu tal-art (kriterju 3).

(55)

Esportatur ieħor li kkoopera ma setax juri li ssodisfa l-kriterju 1 billi d-deċiżjonijiet tiegħu ma kinux magħmula bi tweġiba għal sinjali tas-suq u mingħajr interferenza sinifikanti mill-Istat minħabba restrizzjonijiet fl-attivitajiet tiegħu ta’ xiri u bejgħ.

(56)

Esportatur li kkoopera ma setax juri li ssodisfa l-kriterji 1 u 3. Irriżulta li d-deċiżjonijiet tiegħu ta’ negozju rigward investimenti ma kinux meħuda mingħajr interferenza sinifikanti mill-Istat. L-awtoritajiet lokali influwenzaw id-deċiżjonijiet ta’ negozju tiegħu u kkontribwixxew finanzjarjament għall-kostruzzjoni ta’ ċentru teknoloġiku (kriterju 1). Tgħawwiġ li ġej mis-sistema ta’ qabel li mhix ta’ ekonomija tas-suq kien osservat wkoll fil-forma ta’ evalwazzjonijiet mhux xierqa ta’ dritt għall-użu tal-art (kriterju 3).

(57)

Żewġ esportaturi li kkooperaw urew li huma ssodisfaw il-kriterji tal-Artikolu 2(7)(c) tar-Regolament bażiku u setgħu jingħataw TES. Iżda, minħabba l-kummenti li waslu wara li ġew żvelati l-konklużjonijiet tat-TES, l-għoti tat-TES għaż-żewġ kumpaniji se jiġi investigat aktar.

(58)

Skont l-Artikolu 2(7)(a) tar-Regolament bażiku, dazju għall-pajjiż kollu, jekk jeżisti, huwa stabbilit għal pajjiżi li jaqgħu taħt dak l-Artikolu, minbarra f’dawk il-każijiet fejn kumpaniji huma kapaċi juru li ssodisfaw il-kriterji kollha stabbiliti fl-Artikolu 9(5) tar-Regolament bażiku u jingħataw għalhekk trattament individwali (TI).

(59)

L-esportaturi li kkooperaw li ma ssodisfawx il-kriterji tat-TES kienu talbu TI ukoll f’każ li ma jingħatawx TES.

(60)

Fuq il-bażi tal-informazzjoni disponibbli, kien stabbilit proviżjorjament li l-ħames produtturi esportaturi fir-RPĊ li ġejjin jissodisfaw il-kriterji kollha għal TI kif stabbilit fl-Artikolu 9(5) tar-Regolament bażiku:

(61)

Għad-determinazzjoni tal-valur normali skont l-Artikolu 2(2) tar-Regolament bażiku, il-Kummissjoni l-ewwel stabbiliet, għal kull kumpanija mogħtija TES, jekk il-bejgħ domestiku tal-prodott ikkonċernat lil konsumaturi indipendenti kienx magħmul f’ammonti rappreżentattivi, fi kliem ieħor jekk l-ammont totali ta’ dan il-bejgħ kienx jirrappreżenta mill-inqas 5 % tal-ammont ta’ bejgħ ta’ esportazzjoni totali tal-prodott simili lill-Kumpanija matul l-PI.

(62)

Fil-każ ta’ esportatur li kkoopera l-bejgħ domestiku tiegħu rriżulta li kien magħmul f’ammonti rappreżentattivi. Għat-tieni produttur ta’ esportazzjoni mogħti TES, madankollu, kien stabbilit li ma kellux bejgħ fis-suq domestiku.

(63)

Il-Kummissjoni sussegwentement identifikat dawk it-tipi ta’ prodott mibjugħa domestikament mill-produttur esportatur li għandu ammont ta’ bejgħ domestiku rappreżentattiv ġenerali, li kienu identiċi jew direttament kumparabbli mat-tipi mibjugħa għall-esportazzjoni lejn il-Komunità.

(64)

Bejgħ domestiku ta’ tip ta’ prodott partikolari kien ikkunsidrat suffiċjentement rappreżentattiv meta l-ammont ta’ dak it-tip ta’ prodott mibjugħ fis-suq domestiku lil klijenti indipendenti matul il-PI rrappreżenta 5 % jew iktar mill-ammont totali tat-tip ta’ prodott kumparabbli mibjugħ għall-esportazzjoni lejn il-Komunità.

(65)

Il-Kummissjoni sussegwentement eżaminat jekk il-bejgħ domestiku tal-kumpanija kkonċernata jistax ikun kkunsidrat bħala magħmul fl-andament ordinarju ta’ kummerċ skont l-Artikolu 2(4) tar-Regolament bażiku.

(66)

Għal tipi ta’ prodotti mhux mibjugħa fi kwantitajiet rappreżentattivi fis-suq domestiku, kif imsemmi fil-premessa (64) fuq imsemmija jew mhux mibjugħ fl-andament ordinarju ta’ kummerċ, il-valur normali kellu jinbena fuq il-bażi tal-Artikolu 2(6) tar-Regolament bażiku. Għal dan l-għan, l-spejjeż tal-bejgħ, ġenerali u amministrattivi (‘SG&A’) u l-profitt medju kkalkulat realizzati mill-kumpanija kkonċernata fuq bejgħ domestiku tal-prodott simili ġew miżjuda mal-prezz medju tiegħu ta’ manifattura matul il-PI.

(67)

Għal esportatur kooperatur mogħti TES, il-bejgħ domestiku ma setax jintuża sabiex ikun stabbilit valur normali. Valur normali ġie għalhekk mibni skont l-Artikolu 2(3) tar-Regolament bażiku permezz taż-żieda mal-ispejjeż ta’ manifattura tal-kumpanija għall-prodott ikkonċernat ta’ ammont raġonevoli għal spejjeż u profitt SG&A.

(68)

Ġie deċiż li l-ispejjeż u profitt SG&A ma jiġux stabbiliti fuq il-bażi tal-Artikolu 2(6)(a) għax esportatur kooperatur wieħed b’bejgħ domestiku rappreżentattiv ingħata TES. Barra minn hekk, spejjeż u profitti SG&A ma setgħux ikunu stabbiliti fuq il-bażi tal-Artikolu 2(6)(b) billi l-esportatur inkwistjoni li kkoopera ma kellux bejgħ rappreżentattiv tal-istess kategorija ġenerali ta’ prodotti. Spejjeż u profitti SG&A għalhekk kellhom ikunu determinati bbażati fuq kwalunkwe bażi oħra raġonevoli skont l-Artikolu 2(6)(c) tar-Regolament bażiku.

(69)

Fil-każ inkwistjoni, kien ikkunsidrat li l-medja differenzjata ta’ spejjeż SG&A matul il-PI u profitt raġonevoli ta’ 6,5 % stabbiliti fuq il-bażi ta’ dejta tal-industrija Komunitarja jistgħu jintużaw biex jinbena valur normali għall-imsemmi esportatur li kkoopera u li ngħata TES. L-imsemmi profitt raġonevoli ma eċċediex il-profitt realizzat mill-produttur esporatur l-ieħor li kkoopera u li ngħata TES fuq il-bejgħ tiegħu tal-prodott simili fuq is-suq domestiku matul il-PI.

(70)

Skont l-Artikolu 2(7)(a) tar-Regolament bażiku, f’ekonomiji fi tranżizzjoni valur normali għal produtturi esportaturi li ma ngħatawx TES għandu jkun stabbilit fuq il-bażi tal-prezz jew valur mibni f’ekonomija tas-suq ta’ pajjiż terz (pajjiż analogu).

(71)

Fl-avviż ta’ inizjazzjoni l-Brażil ġie propost bħala pajjiż analogu xieraq għall-iskop ta’ stabbiliment ta’ valur normali fir-RPĊ. Il-Kummissjoni kkuntattjat produtturi magħrufa ta’ xemgħat fil-Brażil u bagħtet kwestjonarji maħsuba biex jiġbru d-dejta meqjusa neċessarja għall-istabbiliment tal-valur normali. Madankollu, ebda kooperazzjoni ma waslet mill-produtturi fil-Brażil.

(72)

Il-Kummissjoni kompliet tfittex kooperazzjoni minn pajjiżi oħra analogi potenzjali. F’dan ir-rigward il-kooperazzjoni ta’ produtturi allokati f’pajjiżi ta’ ekonomija tas-suq bħall-Arġentina, il-Kanada, iċ-Ċili, l-Indja, l-Indoneżja, l-Iżrael, il-Malażja, in-New Zealand, it-Tajwan u t-Tajlandja ġiet mistħarrġa. Madankollu, ebda kooperazzjoni minn produtturi fi kwalnunkwe wieħed minn dawn il-pajjiżi ma setgħet tinkiseb.

(73)

Billi kooperazzjoni ma setgħetx tinkiseb minn produtturi f’pajjiżi terzi ta’ ekonomija tas-suq, il-Kummissjoni esplorat kwalunkwe bażi raġonevoli oħra għad-determinazzjoni tal-valur normali fir-RPĊ. Kien eżaminat jekk skont l-Artikolu 2(7)(a) tar-Regolament bażiku l-prezzijiet għal xemgħat imposti minn pajjiżi terzi fis-suq Komunitarju jistgħux ikunu użati bħala bażi għal valur normali. Madankollu, irriżulta li l-kodiċijiet NM li taħtu x-xemgħat huma importati minn pajjiżi terzi mhumiex speċifiċi biżżejjed fid-deskrizzjoni tagħhom u ma kinux jippermettu tqabbil ġust u xieraq mat-tipi esportati minn esportaturi li kkooperaw fir-RPĊ. Skont dan, kien ikkunsidrat li din l-informazzjoni ma kinitx soda u mhijiex rappreżentattiva u għalhekk ma kienx raġonevoli li jkun stabbilit valur normali fir-RPĊ fuq dik il-bażi.

(74)

Fid-dawl ta’ dak li huwa msemmi hawn fuq, ġie konkluż proviżjorjament li l-użu ta’ prezzijiet attwalment imħallsa jew pagabbli fil-Komunità għall-prodott simili, skont l-Artikolu 2(7)(a) tar-Regolament bażiku, kkostitwixxa bażi raġonevoli għall-istabbiliment tal-valur normali fir-RPĊ.

(75)

Il-bejgħ domestiku tal-produtturi tal-Komunità inkluż fid-definizzjoni tal-industrija Komunitarja rriżulta li kien magħmul f’ammonti rappreżentattivi mqabbel mal-volum ta’ esportazzjoni ta’ xemgħat lejn il-Komunità minn produtturi esportaturi li kkooperaw fil-kampjun mhux mogħtija TES.

(76)

Il-prezzijiet ta’ bejgħ tal-produtturi tal-Komunità kienu mbagħad aġġustati dovutament sabiex jinkludu marġini ta’ profitt raġonevoli kif previst skont l-Artikolu 2(7)(a) tar-Regolament bażiku. Intuża marġini ta’ profitt raġonevoli ta’ 6,5 %. Dan il-marġini kien stabbilit fuq il-bażi tal-profitt medju kkalkulat miksub permezz ta’ produtturi Komunitarji fil-kampjun fl-ewwel sentejn tal-perjodu kkunsidrat li fih il-kundizzjonijiet tas-suq ma kinux influwenzati, sa ċertu punt, mill-importazzjonijiet mir-RPĊ.

(77)

Prezzijiet ta’ bejgħ għall-esportazzjoni kienu stabbiliti fuq il-bażi tal-prezzijiet attwalment imħallsa jew pagabbli għall-prodott simili skont l-Artikolu 2(8) tar-Regolament bażiku.

(78)

Meta sar bejgħ għall-esportazzjoni lejn il-Komunità permezz ta’ kumpanija ta’ kummerċ relatata allokata fil-Komunità, ġew stabbiliti prezzijiet ta’ esportazzjoni fuq il-bażi tal-prezzijiet ta’ bejgħ mill-ġdid lill-ewwel klijenti indipendenti fil-Komunità, skont l-Artikolu 2(9) tar-Regolament bażiku. Għal bejgħ magħmul permezz ta’ kumpaniji relatati barra mill-Komunità, il-prezz ta’ esportazzjoni ġie stabbilit fuq il-bażi tal-prezzijiet ta’ bejgħ mill-ġdid lill-ewwel klijenti indipendenti fil-Komunità.

(79)

It-tqabbil bejn valur normali u prezz ta’ esportazzjoni sar fuq bażi ta’ prezzijiet tal-fabbrika.

(80)

Biex jiġi żgurat tqabbil ġust bejn il-valur normali u l-prezz ta’ esportazzjoni, saret konċessjoni xierqa taħt forma ta’ aġġustamenti għad-differenzi li jaffettwaw prezzijiet u kumparabbiltà ta’ prezz skont l-Artikolu 2(10) tar-Regolament bażiku.

(81)

Fuq din il-bażi, saru kunsiderazzjonijiet għal spejjeż ta’ trasport, spejjeż ta’ merkanzija fuq il-baħar u assigurazzjoni, spejjeż ta’ tqandil, tagħbija u spejjeż anċillari, spejjeż ta’ ppakkjar, spejjeż ta’ kreditu u kummissjonijiet fejn applikabbli u ġustifikat.

(82)

Rigward bejgħ magħmul permezz ta’ negozjanti relatati bbażati barra mill-Komunità, kien applikat aġġustament skont l-Artikolu 2(10)(i) tar-Regolament bażiku, sakemm in-negozjant seta’ juri li kien qed iwettaq funzjonijiet simili għal dawk ta’ aġent li qed jaħdem fuq bażi ta’ kummissjoni. Dan l-aġġustament kien ibbażat fuq l-SG&A attwali mġarrba min-negozjanti relatati, kif ukoll marġini ta’ profitt stabbilit fuq il-bażi ta’ dejta miksuba minn negozjanti mhux relatati fil-Komunità.

(83)

Fejn applikabbli, sare tkonċessjoni fuq il-prezz ta’ esportazzjoni tal-esportaturi kkonċernati li kkooperaw sabiex tiġi riflessa d-differenza bejn it-taxxa fuq il-valur miżjud (VAT) imħallsa u dik imħallsa lura fuq il-produzzjoni u l-esportazzjoni ta’ xemgħat matul il-PI.

(84)

Rigward kumpaniji mogħtija TES jew TI, il-valur normali tal-medja ddifferenzjata ta’ kull tip tal-prodott kkonċernat esportat lejn il-Komunità tqabbel mal-medja ddiferenzjata tal-prezz ta’ esportazzjoni tat-tip korrispondenti, kif stabbilit fl-Artikolu 2(11) u (12) tar-Regolament bażiku.

(85)

Fuq din il-bażi, il-marġini medju differenzjat ta’ dumping proviżorju mfisser bħala perċentwali tal-prezz CIF fuq il-fruntiera tal-Komunità, dazju mhux imħallas, huwa kif ġej:

(86)

Il-marġini medju differenzjat ta’ dumping tal-esportaturi li kkooperaw mhux inklużi fil-kampjun kien ikkalkulat skont id-dispożizzjonijiet tal-Artikolu 9(6) tar-Regolament bażiku. Dan il-marġini kien stabbilit fuq il-bażi tal-marġini stabbiliti għal produtturi esportaturi fil-kampjun, irrelevanti mill-marġini tal-produttur esportatur b’marġini ta’ dumping żero u l-marġini tal-kumpanija li għalih kien applikat l-Artikolu 18 tar-Regolament bażiku. Fuq din il-bażi, il-marġini ta’ dumping ikkalkulat għall-kumpaniji li kkooperaw mhux inkluzi fil-kampjun kien stabbilit proviżorjament għal 26,2 %.

(87)

Fir-rigward tal-esportaturi l-oħra kollha fir-RPĊ, il-Kummissjoni l-ewwel stabbiliet livell ta’ kooperazzjoni. Sar tqabbil magħmul bejn il-kwantitajiet ta’ esportazzjoni totali indikati fir-risposti ta’ teħid ta’ kampjuni li waslu mill-produtturi esportaturi kollha li kkooperaw u l-importazzjonijiet totali mir-RPĊ kif jirriżulta mill-istatistiċi ta’ importazzjoni tal-Eurostat. Il-perċentwali ta’ kooperazzjoni li rriżultat kienet ta’ 46 %. Fuq din il-bażi, il-livell ta’ kooperazzjoni kien meqjus li kien baxx. Kien, għalhekk, ikkunsidrat xieraq li jkun stabbilit marġini ta’ dumping għal produtturi esportaturi li ma kkooperawx fuq livell ogħla mill-iktar marġini għoli ta’ dumping stabbilit għall-produtturi esportaturi li kkooperaw. Informazzjoni disponibbli tissuġġerixxi li l-livell baxx ta’ kooperazzjoni jista’ jkun dovut għall-fatt li l-produtturi esportaturi li ma kkooperawx fir-RPĊ kienu ġeneralment qegħdin iwettqu dumping fuq livell ogħla minn kwalunkwe esportatur li kkoopera waqt il-PI. Il-marġini ta’ dumping kien għalhekk stabbilit fuq livell li jikkorrispondi għall-ogħla marġini ta’ dumping u ta’ ħsara stabbiliti għat-tipi ta’ prodott rappreżentattivi.

(88)

Fuq din il-bażi, il-livell nazzjonali ta’ dumping kien stabbilit proviżorjament għal 66,1 % tal-prezz CIF fuq il-fruntiera tal-Komunità, dazju mhux imħallas.

(89)

Din ir-rata ta’ dazju ġiet applikata wkoll lill-produttur esportatur li dwaru saru s-sejbiet fuq il-bażi ta’ fatti disponibbli kif spjegat fil-premessa (51) hawn fuq imsemmija.

(90)

L-informazzjoni disponibbli kollha, inkluża informazzjoni pprovduta fl-ilment u d-dejta miġbura mill-produtturi Komunitarji qabel u wara l-inizjazzjoni tal-investigazzjoni ntużat sabiex tiġi stabbilita l-produzzjoni Komunitarja totali.

(91)

Fuq il-bażi ta’ din l-informazzjoni, irriżulta li l-produzzjoni Komunitarja kienet ta’ madwar 390 000 tunnellata matul il-PI. Dan l-ammont jinkludi l-produzzjoni possibbli ta’ produtturi li baqgħu siekta waqt il-proċedura u produtturi li baqgħu newtrali fir-rigward tal-inizjazzjoni tal-investigazzjoni. Dawn il-produtturi jammontaw għal madwar 23 % tal-produzzjoni Komunitarja totali. Dan jinkludi wkoll produtturi li kienu opposti għall-inizjazzjoni tal-investigazzjoni. Dawn il-produtturi jirrappreżentaw madwar 17 % tal-produzzjoni Komunitarja.

(92)

L-investigazzjoni uriet li produtturi Komunitarji li jappoġġjaw l-ilment u qablu li jikkooperaw fl-investigazzjoni rrappreżentaw madwar 60 % tal-produzzjoni Komunitarja totali waqt l-PI. Dawn il-produtturi huma għalhekk meqjusa li jikkostitwixxu l-industrija Komunitarja skont it-tifsira tal-Artikolu 4(1) u l-Artikolu 5(4) tar-Regolament bażiku.

(93)

Il-Konsum Komunitarju kien stabbilit fuq il-bażi ta’ ammonti ta’ bejgħ tal-industrija Komunitarja fis-suq Komunitarju, kif ukoll importazzjonijiet mir-RPĊ u terzi pajjiżi oħra, skont l-Eurostat. Dan żviluppa kif ġej:

Tabella 1

(94)

Ġeneralment, il-konsum Komunitarju kiber bi 13 % waqt il-perjodu kkunsidrat. Din l-espansjoni kienet interrotta minn tnaqqis temporanju ta’ 5 % bejn l-2005 u l-2006 u wara dan il-konsum irkupra u żdied bi 11 % waqt il-PI. Il-bidla għall-agħar fil-konsum fl-2006 tista’ tkun parzjalment attribwita għaż-żieda netta fil-prezz ta’ bejgħ tal-materja prima ewlenija użata fil-produzzjoni ta’ xemgħat, xema’ bajda (bil-pitrolju), kif spjegat fil-premessa (122) iktar ’il quddiem.

(95)

Kif intqal fil-premessa (15) fuq imsemmija, l-investigazzjoni wriet li statistiċi ta’ importazzjoni Eurostat jagħmlu distinzjoni bejn tliet kodiċijiet NM ewlenin għal dikjarazzjoni ta’ xemgħat:

(96)

Kien osservat li ċerti produtturi esportaturi fir-RPĊ iddikjaraw settijiet li jinkludu xemgħat iżda wkoll oġġetti oħra bħal ċeramika, ħġieġ, drapp u oġġetti oħra simili ta’ tiżjin skont il-kategorija (2) fuq imsemmija.

(97)

Fl-użu ta’ teħid ta’ kampjuni sabiex jiġi stabbilit d-dumping hija prattika tal-Kummissjoni li mbaghad teżamina jekk kienx hemm evidenza pożittiva li turi jekk il-kumpaniji kollha li ma kinux fil-kampjun kinux effettivament qed iqegħdu l-prodotti tagħhom bi prezz ta’ dumping fis-suq Komunitarju jew le matul il-PI.

(98)

Sabiex tinvestiga l-kwistjoni, il-Kummissjoni stabbiliet l-prezzijiet ta’ esportazzjoni imposti mill-produtturi esportaturi li jikkooperaw mhux inklużi fil-kampjun u l-prezzijiet ta’ esportazzjoni tal-esportaturi li ma kkooperawx fuq il-bażi ta’ dejta Eurostat, ir-risposti tal-kwestjonarji tal-produtturi esportaturi fil-kampjuni fir-RPĊ u l-formoli ta’ teħid ta’ kampjuni pprovduti mill-kumpaniji kollha li kooperaw fir-RPĊ. B’mod parallel, kien ikkunsidrat li permezz taż-żieda tal-marġini medju ta’ dumping li nstab fuq il-bażi tal-produtturi esportaturi fil-kampjun mal-prezzijiet ta’ esportazzjoni medji stabbiliti għall-produtturi esportaturi fil-kampjun li nstabu li kienu qed iwettqu dumping, il-livell ta’ prezzijiet ta’ esportazzjoni mhux oġġett ta’ dumping kien stabbilit. Il-prezzijiet ta’ esportazzjoni stabbilti għall-produtturi esportaturi mhux fil-kampjun kienu mbagħad imqabbla mal-prezzijiet ta’ esportazzjoni li mhumiex oġġett ta’ dumping.

(99)

Dan it-tqabbil wera li kemm i) il-produtturi esportaturi li kkooperaw li ma kinux inklużi fil-kampjun kif ukoll ii) l-esportaturi li ma kkooperawx fl-investigazzjoni kellhom prezzijiet ta’ esportazzjoni medji li kienu fil-każijiet kollha taħt il-prezzijiet medji mhux oġġett ta’ dumping. Fuq din il-bażi kien ikkunsidrat li l-kumpaniji kollha li ma kinux fil-kampjun, fi kliem ieħor dawk li kkooperaw u dawk li ma kkooperawx, kellhom effettivament prodotti tagħhom bi prezz ta’ dumping fis-suq Komunitarju.

(100)

Għandu jkun osservat li produttur esportatur fir-RPĊ inkluż fil-kampjun ma nstabx li kellu l-prodotti tiegħu bi prezz ta’ dumping fis-suq Komunitarju. Skont dan, l-esportazzjonijiet tiegħu għandhom ikunu esklużi mill-analiżi li tikkonċerna l-iżvilupp ta’ importazzjonijiet bi prezz ta’ dumping fis-suq Komunitarju. Madankollu, sabiex tkun evitata kwalunkwe possibbiltà ta’ żvelar ta’ dejta ta’ negozju delikata tal-imsemmi produttur, kien ikkunsidrat xieraq għal raġunijiet ta’ kunfidenzjalità li ma tkunx ippreżentata dejta pubblikament disponibbli, bħal Eurostat, minbarra d-dejta tal-esportatur li ma nstabx li kellu prodotti bi prezz ta’ dumping fis-suq Komunitarju.

(101)

L-ewwel tabella hawn taħt, għalhekk, tinkludi l-importazzjonijiet kollha ta’ xemgħat li joriġinaw fir-RPĊ u t-tieni tabella turi d-dejta fil-forma ta’ indiċi li tirrigwarda l-importazzjonijiet oġġett ta’ dumping fis-suq Komunitarju matul il-perjodu kkunsidrat.

Tabella 2a

(102)

Ġeneralment, l-importazzjonijiet mir-RPĊ żdiedu b’mod sinifikanti minn 147 530 tunnellata fl-2004 għal 199 112 tunnellata fil-PI, fi kliem ieħor b’35 % jew b’iktar minn 51 000 tunnellata matul il-perjodu kkunsidrat. Iż-żieda tas-sehem fis-suq korrispondenti (+5,6 punti perċentwali) kienet inqas pronunċjata minħabba ż-żieda fil-konsum Komunitarju.

(103)

Skont ir-rimarki magħmula fil-premessa (96) fuq imsemmija, l-investigazzjoni uriet li l-prezz medju ta’ importazzjonijiet mir-RPĊ u x-xejriet osservati kienu influwenzati sa ċertu punt mill-fatt li ċerti prodotti ddikjarati bħala xemgħat jinkludu l-valur ta’ settijiet biċ-ċeramika, ħġieġ, kartun jew materjali oħra ta’ ppakkjar.

Tabella 2b

(104)

L-ammonti ta’ importazzjonijiet oġġett ta’ dumping mir-RPĊ żdiedu wkoll b’mod sinifikanti b’36 % matul il-perjodu kkunsidrat. Iż-żieda tas-sehem fis-suq korrispondenti kienet inqas evidenti minħabba ż-żieda fil-konsum Komunitarju. Dejta ta’ Eurostat turi li l-ammont ta’ bejgħ ta’ importazzjonijiet oġġett ta’ dumping u għalhekk ta’ sehem fis-suq kienu prinċipalment akkwistati fl-ewwel kodiċi NM, li jinkludi l-prodott ewlieni tal-industrija Komunitarja, u li jirrappreżenta sehem kbir ta’ esportazzjonijiet mir-RPĊ. Barra minn hekk, irriżulta li minkejja bidla ġenerali għall-agħar fil-konsum tal-perjodu bejn l-2005 u l-2006, l-importazzjonijiet ma tilfu prattikament ebda sehem fis-suq li kellhom.

(105)

Prezzijiet medji għal importazzjonijiet oġġett ta’ dumping mir-RPĊ urew żieda ta’ 10 % matul il-perjodu kkunsidrat iżda xorta kienu magħmula b’ċertu ammont ta’ dumping, fi kliem ieħor 38 % bħala medja, matul il-PI. Il-prezz medju ta’ importazzjonijiet oġġett ta’ dumping naqas b’iktar minn 3 % bejn l-2006 u l-PI u, kif spjegat iktar ’il quddiem, kien qed iwaqqa’ l-prezzijiet tal-industrija Komunitarja f’dak il-perjodu.

(106)

Għall-finijiet tal-analiżi ta’ traħħis fil-prezz, il-medja differenzjata tal-prezzijiet ta’ bejgħ għal kull tip ta’ prodott tal-industrija Komunitarja lil klijenti mhux relatati fis-suq Komunitarju, aġġustati fuq livell ta’ prezzijiet tal-fabbrika, kienu mqabbla mal-medja differenzjata tal-prezzijiet korrispondenti tal-importazzjonijiet ikkonċentrati lill-ewwel klijent indipendenti, stabbiliti fuq bażi ta’ CIF b’aġġustament xieraq għall-spejjeż ta’ wara l-importazzjoni.

(107)

Fuq il-bażi tal-metodoloġija ta’ hawn fuq, id-differenza bejn il-prezzijiet hawn fuq imsemmija, imfissra bħala perċentwali tal-medja differenzjata tal-prezz tal-industrija Komunitarja (prezzijiet tal-fabbrika), turi marġini ta’ roħs ta’ prezz ta’ 9 % bħala medja.

(108)

Irriżulta wkoll li t-traħħis tal-prodott ewlieni tal-industrija Komunitarja kien ogħla meta mqabbel ma’ dak ikkalkulat għat-tipi l-oħra ta’ xemgħat, fi kliem ieħor 12,1 %. Dan juri iktar il-pressjoni tal-prezz li ġejja minn importazzjonijiet oġġett ta’ dumping bi prezz baxx matul il-PI fl-industrija Komunitarja.

(109)

Skont l-Artikolu 3(5) tar-Regolament bażiku, l-eżaminazzjoni tal-impatt ta’ importazzjonijiet oġġett ta’ dumping fl-industrija Komunitarja inkludiet evalwazzjoni tal-indikaturi ekonomiċi kollha relevanti għall-evalwazzjoni tal-istat tal-industrija Komunitarja mill-2004 sal-aħħar tal-PI.

(110)

Kif imsemmi fil-premessa (31) hawn fuq, minħabba n-numru kbir ta’ produtturi li jappoġġjaw l-ilment, ġie deċiż li jiġi applikat it-teħid ta’ kampjuni għall-iskop ta’ investigazzjoni tal-ħsara. Kien oriġinarjament ikkunsidrat li jkunu inklużi tmien produtturi jew gruppi ta’ produtturi fil-kampjun fuq il-bażi tal-ikbar kriterju ta’ produzzjoni kif previst fl-Artikolu 17(1) tar-Regolament bażiku. Madankollu, produttur tal-Komunità li kien qed jiltaqa’ ma’ diffikultajiet finanzjarji serji u żewġ produtturi oħra tal-Komunità, minkejja li jappoġġjaw bis-sħiħ l-ilment, ma setgħux joffru kooperazzjoni sħiħa fl-investigazzjoni. Il-ħames produtturi li jifdal, jew gruppi ta’ produtturi matul il-PI kellhom volum ta’ produzzjoni li jirrappreżenta 44 % tal-produzzjoni totali tal-kumpaniji li kkooperaw. Għalhekk kienu meqjusa rappreżentattivi għall-iskop tal-kampjun.

(111)

Fl-applikazzjoni tat-teħid ta’ kampjuni fil-kuntest tal-investigazzjoni tal-ħsara, hija l-prattika tal-Kummissjoni li tistabbilixxi l-indikaturi ta’ ħsara parzjalment fuq il-bażi tal-produtturi fil-kampjun u parzjalment fuq il-bażi ta’ dejta li tappartjeni lill-produtturi kollha inklużi fid-definizzjoni tal-industrija Komunitarja. Il-fatturi u indiċi ekonomiċi li jirrigwardaw il-prestazzjoni tal-kumpanija, bħal prezzijiet, pagi, qligħ, likwidità, investiment u qligħ fuq l-investiment, u l-abilità li jinġabar il-kapital, kienu stabbiliti fuq il-bażi ta’ informazzjoni miksuba mill-kumpaniji fil-kampjun. Il-fatturi ta’ volum bħal produzzjoni, kapaċità ta’ produzzjoni u utilizzazzjoni ta’ kapaċità, produttività, ammont ta’ bejgħ u sehem fis-suq, inventarji, impjieg, tkabbir, u d-daqs ta’ marġini ta’ dumping kienu stabbiliti fuq il-livell tal-industrija Komunitarja b’mod ġenerali.

(112)

L-investigazzjoni wriet li wieħed mill-prodotti ewlenin tal-industrija Komunitarja hija l-imsemmija xema’ tea light. Din tirrappreżenta madwar 50 % tal-produzzjoni tal-produtturi inkluża fid-definizzjoni tal-industrija Komunitarja.

(113)

Kif muri fit-tabella ta’ hawn fuq, il-produzzjoni tal-industrija Komunitarja żdiedet ftit bi 2 % matul il-perjodu kkunsidrat. It-tnaqqis ta’ 8 % fil-produzzjoni osservat bejn l-2005 u l-2006 kien irkuprat matul il-PI skont żieda fil-konsum Komunitarju ta’ 11 %. L-industrija Komunitarja żdiedet b’mod kostanti l-kapaċità ta’ produzzjoni tagħha għal madwar 300 000 tunnellata matul il-PI iżda l-użu tal-kapaċità disponibbli kienet iktar baxxa waqt il-PI. Billi l-produzzjoni hija pjuttost staġjonali fl-industrija, l-użu totali tal-kapaċità ma jistax jinkiseb matul is-sena, madankollu, l-użu tal-kapaċità ta’ 76 % miksub matul il-PI kien relattivament baxx meta mqabbel mal-livelli tal-2004 u 2005.

(114)

Il-volum ta’ bejgħ tal-prodott ikkonċernat mill-industrija Komunitarja lil klijenti indipendenti, prinċipalment bejjiegħa bl-imnut u distributuri kbar, fis-suq Komunitarju żdied bi 3 % matul il-PI meta mqabbel mal-2004. Skont il-livell relattivament baxx ta’ konsum il-volum ta’ bejgħ tal-2006 naqas b’5 % bejn 2005 u l-2006 iżda irkupra matul il-PI skont l-irkupru tal-konsum Komunitarju.

(115)

Madankollu, kien osservat li l-industrija Komunitarja ma setgħetx issegwi kompletament l-espansjoni tal-konsum Komunitarju bi 13 % waqt il-perjodu kkunsidrat u b’mod partikolari fil-perjodu 2005-2006 meta s-suq kiber bi 11 %. Bħala konsegwenza s-sehem tagħha fis-suq naqas b’3,7 punt perċentwali, minn 39,8 % għal 36,1 % matul il-PI.

(116)

Prezzijiet tal-fabbrika ta’ bejgħ medji lil klijenti mhux relatati fis-suq Komunitarju naqsu b’9 % matul il-perjodu kkunsidrat. Dan it-tnaqqis seħħ gradwalment matul il-perjodu kkunsidrat.

Tabella 5

(117)

It-tabella ta’ hawn fuq turi li l-prezz tal-industrija Komunitarja naqas ukoll fil-perjodu mill-2006 għall-PI minkejja ż-żieda fid-domanda fis-suq Komunitarju.

(118)

Il-livell ta’ stokks tal-aħħar tas-sena, li jirrappreżenta bħala medja madwar 25 % tal-produzzjoni, jista’ jkun ikkunsidrat li jkun għoli matul il-perjodu kkunsidrat.

Tabella 6

(119)

Il-livell għoli ta’ stokks jista’ madankollu jkun spjegat permezz tal-istaġjonalità tal-prodott ikkonċernat, il-fatt li t-tipi prodotti mill-industrija Komunitarja huma prinċipalment tipi standard u minħabba l-medda wiesgħa ta’ prodotti li jeżistu u li għandhom jibqgħu disponibbli għall-klijenti. Il-livell ta’ stokks kien iktar għoli fl-2005 meta, ibbażat fuq l-evoluzzjoni negattiva ta’ volum ta’ bejgħ imqabbel mal-2004, iktar stokks akkumulaw matul is-sena. In-nuqqas ta’ bejgħ sal-aħħar tal-2005 konsegwentement wassal għal livelli għolja ta’ stokks. Mhuwiex ikkunsidrat madankollu li l-inventarji huma indikaturi ta’ ħsara relevanti f’dan il-każ.

(120)

Il-livell relattivament għoli ta’ impjieg fl-2005 kien prinċipalment dovut għall-impjieg ta’ ħaddiema temporanji sabiex ilaħħqu maż-żieda fid-domanda f’dik is-sena. Madankollu, l-impjieg naqas drastikament mill-2006 ’il quddiem u fl-aħħar tal-PI kien 13 % inqas mill-2004. Iż-żieda fil-ħlas tax-xogħol medju kienet limitata għal 9 % matul il-perjodu kkunsidrat.

(121)

Iż-żieda tal-forza tax-xogħol wasslet għal nuqqas żgħir fil-produttività fl-2005, iżda l-forza tax-xogħol iddikjarata żejda matul l-2006 wasslet għal żieda fil-produttività avolja l-ammonti ta’ produzzjoni naqsu bi 8 % bejn l-2005 u l-2006. Il-kombinazzjoni ta’ bejgħ u volumi ta’ produzzjoni ogħla u b’mod partikolari l-impjieg iktar baxx jispjegaw iż-żieda ta’ 23 % fil-produttività matul il-PI mqabbel mal-2004.

(122)

Għandu jkun osservat li l-materja prima, prinċipalment xema’ bajda (bil-pitrolju), tirrappreżenta madwar 50 % tal-ispiża tal-produzzjoni (COP). It-tabella ta’ hawn fuq turi li, minbarra fl-2006, is-COP baqa’ stabbli waqt il-perjodu kkunsidrat. Iż-żieda fl-2006 hija spjegata minn żieda sinifikanti fil-prezzijiet ta’ xema’ bajda (bil-pitrolju) bejn l-2005 u l-2006. L-industrija Komunitarja pattiet għal din iż-żieda mhux mistennija fil-prezz ta’ xema’ bajda (bil-pitrolju) billi ssostitwiet, fejn kien teknikament possibbli xema’ bajda (bil-pitrolju) ma’ stearina. Il-prezzijiet ta’ stearina baqgħu iktar stabbli sal-2006 u kienu inqas minn prezzijiet ta’ xema’ bajda (bil-pitrolju) anki matul l-PI.

(123)

Barra minn hekk, l-investigazzjoni wriet li l-industrija Komunitarja rrazzjonalizzat il-produzzjoni tagħha li kienet parzjalment imressqa lejn l-Istati Membri fil-Komunità Ewropea u fl-istess ħin kellha tnaqqas l-impjieg b’mod drastiku, b’mod partikolari mill-2006 ’il quddiem, sabiex tnaqqas l-ispejjeż.

(124)

Il-kombinazzjoni ta’ dawn il-fatturi kollha wasslet għal sitwazzjoni fejn l-industrija Komunitarja rnexxielha żżomm is-COP matul il-PI għal livelli kumparabbli fl-2004.

(125)

Il-kapaċità ta’ profitt tal-industrija Komunitarja ġiet stabbilita billi l-qligħ nett tal-bejgħ tal-prodott simili qabel it-taxxa ġie espress bħala perċentwali tal-fatturat ta’ dan il-bejgħ. Tul il-perjodu meqjus il-kapaċità ta’ profitt tal-industrija tal-Komunità niżlet minn profitt ta’ 6,9 % fl-2004 sa telf ta’ 0,6 % fil-PI. Filwaqt li l-kapaċità ta’ profitt tal-industrija tal-Komunità fl-2004 u l-2005 kienet tajba, is-sitwazzjoni nbidlet drammatikament fl-2006 minħabba kombinazzjoni ta’ fatturi bħaż-żieda fis-COP u t-tnaqqis fil-prezzijiet ta’ bejgħ. Għalkemm il-prezz medju ta’ bejgħ kompla jonqos matul il-PI, it-tnaqqis tas-COP ikkumpensa għal dak li rriżulta li kien kważi fidi f’dak il-perjodu.

(126)

Ix-xejra murija mil-likwidità, li hija l-abilità tal-industrija ta’ awtoffinanzjar tal-attivitajiet tagħha, tirrifletti sa ċertu punt l-evoluzzjoni tal-qligħ. Għalkemm il-likwidità reġgħet lura għal sitwazzjoni pożittiva matul l-PI, kienet f’livell ħafna iktar baxx milli matul l-2004 u l-2005. L-istess kummenti jistgħu jkunu magħmula rigward il-qligħ fuq l-investimenti li kien negattiv kemm fl-2006 u matul il-PI.

(127)

Minkejja s-sitwazzjoni diffiċli, l-industrija Komunitarja kompliet tinvesti matul il-perjodu kkunsidrat. Dan jissuġġerixxi li l-industrija mhix lesta li tirrinunzja għal produzzjoni iżda tikkunsidra s-settur bħala vijabbli. Il-livell ta’ investimenti juri li s-settur għandu l-abilità li jiġbor il-kapital neċessarju.

(128)

Il-bejgħ tal-industrija Komunitarja bejn l-2004 u l-PI fis-suq Komunitarju żdied bi 3 %, iżda l-industrija Komunitarja ma setgħetx totalment issegwi l-espansjoni tal-konsum Komunitarju li laħaq 13 %. Bħala konsegwenza, s-sehem fis-suq naqas bi kważi 3,7 punti perċentwali.

(129)

Produttur esportatur fir-RPĊ li kien fil-kampjun li rrappreżenta ammont limitat ta’ esportazzjonijiet fil-Komunità ma nstabx li kien qed ibiegħ il-prodotti tiegħu bi prezzijiet ta’ dumping fis-suq Komunitarju. Rigward il-produtturi esportaturi l-oħra li kienu fil-kampjun madankollu, l-marġini ta’ dumping, speċifikat fil-premessi (84) sa (89) fuq imsemmija, huwa b’mod sinifikanti ogħla mid-de minimis. Kif spjegat fil-premessa (99) fuq imsemmija, il-produtturi esportaturi fir-RPĊ l-oħra mhux inklużi fil-kampjun, li kkooperaw u li ma kkooperawx, tqiesu li kienu qed iwettqu dumping fis-suq Komunitarju. Minħabba l-ammonti u l-prezzijiet tal-importazzjonijiet oġġett ta’ dumping, l-impatt tal-marġini attwali tad-dumping, stabbilit bi 48 % bħala medja, ma jistax ikun ikkunsidrat bħala negliġibbli.

(130)

Matul il-perjodu kkunsidrat irriżulta li l-prestazzjoni tal-industrija Komunitarja tjiebet rigward xi indikaturi ta’ ammonti bħal produzzjoni (+ 2 %), kapaċità ta’ produzzjoni (+ 8 %), produttività (+ 23 %) u volum ta’ bejgħ (+ 3 %).

(131)

Madankollu, l-indikaturi kollha li jirrigwardaw is-sitwazzjoni finanzjarja tal-industrija Komunitarja marru għall-agħar b’mod sinifikanti matul il-perjodu kkunsidrat. Minkejja li l-abilità tal-industrija Komunitarja li tiġbor il-kapital għal investimenti, il-qligħ fuq l-investimenti sar negattiv fil-PI u l-likwidità naqset b’81 % matul il-perjodu kkunsidrat. Prezzijiet ta’ bejgħ medji naqsu b’9 % u l-qligħ naqas minn kważi 6,9 % fl-2004 għal telf ta’ 0,6 % matul il-PI.

(132)

Barra minn hekk, indikaturi oħra ta’ ħsara li jappartjenu lill-industrija Komunitarja wkoll żviluppaw b’mod negattiv matul il-perjodu kkunsidrat: l-użu tal-kapaċità waqa’ b’4 %, l-istokks żdiedu b’7 % u l-impjieg waqa’ bi 13 %. Is-sehem fis-suq miżmum mill-industrija Komunitarja naqas ukoll minn 39,8 % fl-2004 għal 36,1 %, fi kliem ieħor 3,7 punti perċentwali. L-industrija Komunitarja kienet ostakolata milli tibbenefika mit-13 % żieda fis-suq billi setgħet iżżid biss l-volum ta’ bejgħ tagħha bi 3 %.

(133)

L-analiżi tal-ispejjeż, inklużi spejjeż ta’ materja prima, uriet li, minkejja żieda netta fil-prezz tal-materja prima ewlenija, l-industrija Komunitarja rnexxielha żżomm spejjeż ta’ unità fil-PI fil-livelli 2004-2005. Madankollu, minkejja żieda ta’ 11 % fid-domanda bejn 2006 u l-PI, il-prezzijiet ta’ bejgħ naqsu bi 3 % u l-impjieg ġie mnaqqas drastikament. Il-qligħ xorta baqa’ negattiv matul il-PI.

(134)

Fid-dawl ta’ dak li ntqal, jista’ jiġi konkluż li l-industrija Komunitarja ġarrbet ħsara materjali skont it-tifsira tal-Artikolu 3(5) tar-Regolament bażiku.

(135)

Skont l-Artikoli 3(6) u 3(7) tar-Regolament bażiku, ġie eżaminat jekk l-importazzjonijiet oġġett ta’ dumping ta’ xemgħat li joriġinaw mir-RPĊ ikkawżawx ħsara lill-industrija Komunitarja sal-livell li jwassal li din tkun ikklassifikata bħala materjali. Fatturi magħrufa minbarra importazzjonijiet oġġett ta’ dumping, li jistgħu fl-istess ħin ikunu qed jagħmlu ħsara lill-industrija Komunitarja, ġew eżaminati wkoll sabiex jiġi żgurat li l-ħsara possibbli kkawżata minn dawn l-fatturi l-oħra ma kinitx attribwita lill-importazzjonijiet.

(136)

L-investigazzjoni wriet li x-xemgħat esportati mir-RPĊ lejn il-Komunità nbiegħu bi prezzijiet oġġett ta’ dumping b’mod sinifikanti fis-suq Komunitarju matul il-PI. Kif intqal fil-premessa (129) fuq imsemmija, irriżulta li l-produtturi esportaturi fir-RPĊ li kkooperaw kienu qed ibiegħu l-prodott ikkonċernat b’marġini ta’ dumping medju ta’ 26,2 %. Għandu jkun imsemmi wkoll li madwar 55 % tal-esportaturi Ċiniżi ma kkooperawx fl-investigazzjoni. Hemm evidenza pożittiva li turi li dawn l-esportaturi kienu qed jużaw id-dumping iktar minn dawk li kkooperaw fl-investigazzjoni.

(137)

Importazzjonijiet li huma oġġett ta’ dumping żdiedu f’volum ta’ 36 % fis-suq Komunitarju matul il-perjodu kkunsidrat. Din iż-żieda kienet magħmula fuq prezzijiet oġġett ta’ dumping b’mod sinifikanti li raħħsu medja ta’ 9 % tal-prezzijiet tal-industrija Komunitarja matul il-PI. Kif spjegat fil-premessa (108) fuq imsemmija l-investigazzjoni wriet li traħħis minn importazzjonijiet oġġett ta’ dumping kien iktar evidenti, jiġifieri 12,1 % fis-segment tas-suq ewlieni tal-industrija Komunitarja. Skont dan, is-sehem fis-suq miżmum minn esportaturi li jipprattikaw d-dumping żdied minn madwar 27,5 % sa madwar 33 %, żieda ta’ iktar minn 5 punti perċentwali matul il-PI.

(138)

Fuq il-bażi tal-istatistiċi ta’ importazzjoni tal-Eurostat jidher li importazzjonijiet oġġett ta’ dumping żdiedu relattivament iktar fil-kategoriji li jinkludu l-prodotti ewlenin magħmula u mibjugħa mill-industrija Komunitarja. Importazzjonijiet ogġett ta’ dumping f’dan is-segment tas-suq żdiedu b’46 % u madwar 3,5 punti perċentwali ta’ sehem fis-suq kienu mirbuħa minn importazzjonijiet oġġett ta’ dumping f’dak is-segment. Din l-evoluzzjoni għandha tidher fid-dawl tat-traħħis fil-prezz ġenerali sinifikanti u l-pressjoni tal-prezz eżerċitata minn importazzjonijiet oġġett ta’ dumping fis-suq Komunitarju.

(139)

Fl-istess ħin, il-volum ta’ bejgħ tal-industrija Komunitarja żdied biss bi 3 % minkejja żieda ġenerali fil-konsum bi 13 %. Skont dan, is-sehem fis-suq tagħha naqas matul il-perjodu kkunsidrat minn 39,8 % għal 36,1 %, fi kliem ieħor telfa ta’ 3,7 punti perċentwali ta’ sehem fis-suq.

(140)

Barra minn hekk, kien osservat li fl-2006 il-prestazzjonijiet tal-industrija Komunitarja kienu partikolarment negattivi billi ġġarrbu telfiet sinifikanti meta mqabbla mal-2005. Din is-sitwazzjoni seħħet flimkien mal-preżenza kontinwa ta’ ammonti kbar ta’ importazzjonijiet bi prezz baxx mir-RPĊ fis-suq Komunitarju u nuqqas ta’ 5 % fil-konsum Komunitarju. Il-volum ta’ bejgħ ġenerali tal-Komunità naqas bl-istess prezz bħal-importazjonijiet oġġett ta’ dumping, filwaqt li l-prezzijiet tal-industrija Komunitarja waqgħu b’5 % sabiex isegwu l-livell tal-prezz ta’ importazzjonijiet oġġett ta’ dumping.

(141)

Meqjus il-perjodu mill-2006 sal-aħħar tal-PI, irriżulta li l-konsum żdied bi 11 %. L-industrija Komunitarja rnexxielha żżid il-volum ta’ bejgħ tagħha bi 8 % iżda importazzjonijiet oġġett ta’ dumping żdiedu b’mod sinifikanti iktar (+ 18 %) inġenerali. Fl-istess ħin, prezzijiet ta’ importazzjonijiet oġġett ta’ dumping naqsu b’iktar minn 3 %. L-industrija Komunitarja ma setgħetx tibbenefika mit-tkabbir tas-suq u COP imnaqqas. Minflok, kellha ssegwi x-xejra ta’ tnaqqis fil-prezz tal-bejgħ u kompliet tnaqqas il-prezzijiet tagħha bi 2,5 % matul il-PI filwaqt li żżid iktar telf ma’ dak imġarrab fl-2006.

(142)

Huwa kkunsidrat li l-pressjoni kontinwa eżerċitata minn importazzjonijiet oġġetti ta’ dumping bi prezz baxx fis-suq Komunitarju ma kinitx tippermetti lill-industrija Komunitarja biex tistabbilixxi l-prezzijiet ta’ bejgħ tagħha skont l-ispejjeż tagħha matul il-PI. Dan jispjega t-telf tas-sehem fis-suq, il-livell baxx ta’ prezzijiet ta’ bejgħ u l-kapaċità ta’ qligħ negattiva miksuba mill-industrija Komunitarja f’dak il-perjodu. Huwa għalhekk konkluż proviżorjament li l-ammont ta’ importazzjonijiet bi prezz baxx mir-RPĊ kellu impatt negattiv konsiderevoli fuq is-sitwazzjoni ekonomika tal-industrija Komunitarja matul il-PI.

(143)

Kif imsemmi fil-premessa (94) ta’ hawn fuq, il-konsum Komunitarju ta’ xemgħat żdied bi 13 % bejn 2004 u l-PI. Billi dan ippermetta lill-industrija Komunitarja biex topera f’suq li jespandi, il-ħsara materjali mġarrba mill-industrija Komunitarja ma tistax tkun attribwita lill-evoluzzjoni ta’ konsum fis-suq Komunitarju.

(144)

L-investigazzjoni wriet li l-importazzjonijiet li ma nstabux li kienu oġġett ta’ dumping kienu mibjugħa fis-suq Komunitarju bi prezz relattivament għoli. Skont dan, kien ikkunsidrat li dawn l-importazzjonijiet ma kkontribbwixxewx għal-livell baxx ta’ prezzijiet ta’ bejgħ u l-ħsara mġarrba mill-industrija Komunitarja.

(145)

Ix-xejriet fl-ammonti ta’ importazzjonijiet u prezzijiet minn pajjiżi terzi oħra bejn 2004 u l-PI kienu kif ġej:

Tabella 10

(146)

L-ammonti ta’ importazzjonijiet minn pajjiżi terzi mhux ikkonċernati minn din l-investigazzjoni żdiedu b’7 % fil-perjodu kkunsidrat iżda baqgħu fuq livell modest matul il-PI. Dawn probabbilment jikkonsistu prinċipalment fi prodotti modesti b’valur għoli importati b’mod partikolari mill-Istati Uniti tal-Amerika (USA). Il-fatt li ż-żieda fil-konsum Komunitarju kien iktar evidenti wassal għal telf ta’ sehem fis-suq ta’ 0,2 punti perċentwali matul il-PI. Il-prezzijiet ta’ dawn l-importazzjonijiet li kienu relattivament għoljin matul il-perjodu kkunsidrat żdiedu b’21 % matul dak il-perjodu.

(147)

Fuq il-bażi ta’ dak fuq imsemmi, kien konkluż proviżorjament li dawn l-importazzjonijiet ma kkontribwixxewx għall-ħsara materjali tal-industrija Komunitarja.

(148)

Kif issuġġerit fil-premessa (92) fuq imsemmija, l-informazzjoni disponibbli fis-suq għal xemgħat fil-Komunità tindika li produtturi li jirrappreżentaw madwar 40 % tal-produzzjoni Komunitarja mhumiex inklużi fid-definizzjoni tal-industrija Komunitarja f’din l-investigazzjoni.

(149)

Ċerti produtturi Komunitarji, li jirrappreżentaw madwar 17 % tal-produzzjoni Komunitarja, kienu kuntrarji għall-inizjazzjoni tal-investigazzjoni, għax ħafna minnhom kienu qed jimportaw kwantitajiet relattivament kbar ta’ xemgħat mir-RPĊ. L-impatt tal-importazzjonijiet tagħhom mir-RPĊ kien ikkunsidrat fl-analiżi tal-effett tal-importazzjonijiet li kienu oġġett ta’ dumping tagħhom mir-RPĊ magħmula fil-premessi (136) sa (142) fuq imsemmija. Il-produtturi Komunitarji li jibqa’, li jirrappreżentaw 23 % tal-produzzjoni Komunitarja, kienu jew siekta jew newtrali rigward l-inizjazzjoni tal-investigazzjoni preżenti.

(150)

L-analiżi tad-dejta li tappartjeni lis-suq Komunitarju ssuġġeriet li l-produtturi l-oħra kollha tal-Komunità ma akkwistawx iżda tilfu sehem fis-suq fuq il-bejgħ tal-produzzjoni tagħhom matul il-perjodu kkunsidrat. L-investigazzjoni ma semmietx xi problema partikolari rigward il-kompetizzjoni bejn produtturi Komunitarji, fuq ix-xemgħat prodotti minnhom infushom, jew għal xi effett li jgħawweġ il-kummerċ li jista’ jispjega l-ħsara materjali li tinstab għall-industrija Komunitarja.

(151)

Ibbażat fuq dak li ntqal fuq, kien konkluż proviżorjament li l-produtturi mhux inklużi fid-definizzjoni tal-industrija Komunitarja ma kkontribwixxewx għall-ħsara mġarrba mill-industrija Komunitarja.

(152)

Skont l-Eurostat u risposti għal kwestjonarji mill-produtturi Komunitarji fil-kampjun, esportazzjonijiet totali ta’ xemgħat barra mill-Komunità mill-produtturi Komunitarji żdiedu b’10 % matul il-perjodu kkunsidrat, fi kliem ieħor minn 47 701 tunnellata fl-2004 għal 52 565 tunnellata matul il-PI. Is-swieq ta’ esportazzjoni ewlenin huma n-Norveġja, l-Iżvizzera u l-Amerika, fejn il-livelli tal-prezzijiet huma ġeneralment relattivament għoljin. L-investigazzjoni wriet li l-industrija Komunitarja rnexxielha żżid l-esportazzjonijiet tagħha lil pajjiżi terzi, b’mod partikolari bejn l-2005 u l-2006, meta l-konsum Komunitarju naqas b’5 %. Din il-prestazzjoni ta’ esportazzjoni relattivament tajba kienet ta’ benefiċċju partikolari matul il-PI.

(153)

Skont dak li ntqal iktar ’il fuq, huwa kkunsidrat li l-prestazzjoni ta’ esportazzjoni tal-industrija Komunitarja ma kkontribwixxietx għall-ħsara mġarrba minn dik l-industrija fil-PI.

(154)

Xi partijiet interessati sostnew li l-importazzjonijiet ta’ xemgħat mir-RPĊ mill-industrija Komunitarja kienu sors ta’ ħsara awto-kkawżata.

(155)

L-investigazzjoni wriet li dawn il-produtturi inklużi fid-definizzjoni tal-industrija Komunitarja importaw xemgħat li joriġinaw mir-RPĊ sabiex jikkumplementaw il-medda ta’ prodotti tagħhom. Madankollu, il-bejgħ magħmul matul il-PI nstab li kien baxx, fi kliem ieħor inqas minn 5 %, kkumparat mal-volum ta’ bejgħ tal-prodotti Komunitarji kkonċernati.

(156)

Fuq dik il-bażi, kien konkluż proviżorjament li l-importazzjonijiet tal-industrija Komunitarja tal-prodott ikkonċernat mir-RPĊ ma kkontribwixxewx għall-ħsara materjali li ġarrbu matul il-PI.

(157)

Ċerti partijiet interessati attribwew it-telf tal-użu tal-kapaċità u sehem fis-suq imġarrba mill-industrija Komunitarja għall-fatt li huma rrilokaw parti mill-produzzjoni tagħhom lil Stati Membri oħra fil-Komunità, b’mod partikolari fl-2006. Barra minn hekk, huma attribwew in-nuqqas fi prezzijiet ta’ bejgħ għall-kundizzjonijiet ta’ kompetizzjonijiet li jeżistu f’dawn l-Istati Membri fejn hemm allegatament iktar pressjoni fuq il-prezzijiet ta’ bejgħ.

(158)

L-investigazzjoni wriet li l-kapaċità ta’ produzzjoni tal-Komunità, ma naqsitx, iżda żdiedet b’mod kostanti bi 8 % matul il-perjodu kkunsidrat. Barra minn hekk, irriżulta li ż-żidiet ewlenin fil-kapaċità kienu osservati fil-perjodi li jibdew fl-2006 u matul il-PI. Fl-aħħar nett, irriżulta wkoll li kemm il-produzzjoni u l-volum ta’ bejgħ tal-industrija Komunitarja żdiedu bi 8 % bejn l-2006 u l-PI. Skont dan, it-talba tikkkontradixxi ruħha permezz tas-sejbiet tal-investigazzjoni li wrew żieda fil-kapaċità ta’ produzzjoni, produzzjoni u stokks. Kif imsemmi fil-premessa (115) ta’ hawn fuq, it-telf fis-sehem fis-suq imġarrab mill-industrija Komunitarja kien dovut għall-fatt li ma setgħetx tibbenefika totalment mit-tkabbir tas-suq li seħħ f’dak il-perjodu.

(159)

Barra minn hekk, kien muri fil-premessi (122) sa (124) fuq imsemmija l-azzjonijiet ta’ ristrutturazzjoni magħmula mill-industrija Komunitarja b’mod partikolari fl-2006 wasslu għal nuqqas sostanzjali ta’ 14 % tas-COP medju tagħha matul il-PI. Ma hemm ebda indikazzjoni fl-investigazzjoni li l-industrija Komunitarja bidlet b’mod sinifikanti l-kombinazzjoni ta’ klijenti tagħha fil-Komunità kif allegat mill-partijiet inkwistjoni. Pjuttost huwa kkunsidrat li l-pressjoni tal-prezz imposta minn importazzjonijiet oġġett ta’ dumping ta’ prezz baxx mir-RPĊ wasslu għal livell baxx ta’ prezzijiet għal xemgħat fis-suq Komunitarju.

(160)

Fuq dik il-bażi, l-investigazzjoni ma semmietx konnessjoni bejn ir-rilokazzjoni ta’ produzzjoni magħmula mill-industrija Komunitarja u l-ħsara materjali li ġarrbet matul il-PI.

(161)

Ċerti partijiet allegaw li l-ħsara mġarrba mill-industrija Komunitarja kienet ikkawżata miż-żieda fil-prezz fil-materja prima ewlenija, fi kliem ieħor xema’ bajda (bil-pitrolju) li seħħet fis-suq Komunitarju. Iktar speċifikament, huma rreferew għal dikjarazzjoni ta’ oġġezzjoni maħruġa mid-Direttorat Ġenerali għal Kompetizzjoni tal-Kummissjoni Ewropea (Kompetizzjoni DĠ) li fiha kien allegat li jeżisti kartell fost produtturi Ewropej ta’ xema’ bajda (bil-pitrolju) sal-bidu tal-2005. Skont dan, il-partijiet staqsew lill-Kummissjoni biex teżamina b’attenzjoni l-fatti u ssegwi kwalunkwe żviluppi ġodda inkonnessjoni mal-impatt tal-kartell fuq is-sitwazzjoni ekonomika tal-industrija Komunitarja.

(162)

L-investigazzjoni wriet li ż-żieda fil-prezz tal-pitrolju ma affettwatx biss is-suq Komunitarju iżda wkoll swieq oħra fid-dinja billi l-evoluzzjoni tal-pitrolju, derivattiv taż-żejt, hija konnessa mill-viċin mal-evoluzzjoni tal-prezz taż-żejt.

(163)

Barra minn hekk kif spjegat fil-premessi (122) sa (124) fuq imsemmija, l-industrija Komunitarja rnexxielha tikkontrolla l-ispejjeż tagħha matul il-PI. Iż-żieda fil-prezz tal-pitrolju kienet ribattuta permezz tas-sostituzzjoni tal-pitrolju mill-istearina. L-industrija Komunitarja rrazzjonalizzat ukoll il-produzzjoni tagħha u rnexxielha tnaqqas b’mod sinifikanti l-ispejjeż tagħha li matul il-PI kienu miżmuma fuq livelli kumparabbli għall-2004 u l-2005.

(164)

Id-DĠ tal-Kompetizzjoni fil-fatt wettqet investigazzjoni fl-eżistenza allegata ta’ kartell bejn ċerti produtturi ta’ xema’ bajda (bil-pitrolju), il-materja prima ewlenija għall-industrija Komunitarja tax-xema’ u ħarġet uffiċjalment is-sejbiet tagħha fil-bidu ta’ Ottubru 2008.

(165)

L-ewwel analiżi ta’ dawn is-sejbiet fir-rigward ta’ din l-investigazzjoni ta’ anti-dumping tindika li l-industrija Komunitarja dderivat madwar terz tal-bżonnijiet tagħha ta’ pitrolju minn kumpaniji li jipparteċipaw fil-kartell matul il-PI, fi kliem ieħor fl-2007. Id-dejta vverifikata matul dak il-perjodu turi li l-prezz medju ta’ pitrolju mixtri minn kumpaniji li jipparteċipaw fil-kartell huwa fl-istess medda bħal prezzijiet ta’ pitrolju mixtri minn fornituri oħra fil-Komunità. Għandu jkun osservat ukoll li l-prezzijiet tal-pitrolju mixtrija mill-industrija Komunitarja nstabu li huma skont il-prezzijiet tal-pitrolju fir-RPĊ, l-unika informazzjoni disponibbli fuq prezzijiet mhux tal-UE f’dan l-istadju tal-investigazzjoni.

(166)

Id-DĠ tal-Kompetizzjoni bdiet l-investigazzjoni tagħha fil-bidu ta’ April 2005 u l-perjodu kkunsidrat għal din l-investigazzjoni inkluda ftit iktar minn sena li matulu nstab li kien jeżisti l-kartell. Jista’ għalhekk ikun argumentat li s-sena 2004 mhix adattata jew rappreżentattiva għall-analiżi ta’ ħsara u rabta kawżali għall-finijiet tal-eżistenza ta’ kartell f’dik is-sena.

(167)

Minħabba li huwa raġonevoli li wieħed jassumi li l-kartell ma baqax jeżisti meta l-investigazzjoni tad-DĠ Kompetizzjoni nbdiet, fi kliem ieħor fil-bidu tal-2005, ix-xejriet li jikkonċernaw is-sitwazzjoni ekonomika tal-industrija Komunitarja, meta l-kartell kien għadu jeżisti, fi kliem ieħor fl-2004, u wara li l-kartell ma baqax jeżisti, fi kliem ieħor fl-2005, ġew imqabbla. Dan it-tqabbil jindika li x-xejriet li jikkonċernaw is-sitwazzjoni ta’ ħsara tal-industrija Komunitarja jibqgħu bejn wieħed u ieħor l-istess. Skont l-iżviluppi tal-indikaturi ta’ ħsara bejn l-2005 u l-PI għalhekk ma tinbidilx is-sitwazzjoni ta’ ħsara u l-konklużjonijiet milħuqa fil-premessi (130) sa (134) fuq imsemmija.

(168)

Skont dan, abbażi tal-informazzjoni li hija preżentament disponibbli, jidher li ż-żieda fl-ispejjeż tal-materja prima u l-kartell ma setax ikollhom impatt materjali fuq is-sitwazzjoni ekonomika tal-industrija Komunitarja li kienet eżaminata fid-dettal mill-2004 sal-aħħar tal-2007.

(169)

L-impatt possibbli li l-kartell seta’ kellu fuq is-suq Komunitarju għandu jkun madankollu investigat iktar fid-dettall fil-bqija tal-investigazzjoni.

(170)

L-analiżi fuq imsemmija wriet li kien hemm żieda sostanzjali fl-ammont u s-sehem fis-suq tal-importazzjonijiet oġġett ta’ dumping bi prezz baxx li joriġinaw mir-RPĊ bejn l-2004 u l-PI. Barra minn hekk, irriżulta li dawn l-importazzjonijiet kienu magħmula bi prezzijiet oġġett ta’ dumping b’mod sinifikanti li kienu ħafna iktar baxxi mill-prezzijiet imposti mill-industrija Komunitarja fis-suq Komunitarju għal tipi ta’ prodotti simili.

(171)

Din iż-żieda fl-ammont u s-sehem fis-suq tal-importazzjonijiet oġġett ta’ dumping bi prezz baxx mir-RPĊ ħabat maż-żieda ġenerali tad-domanda fil-Komunità iżda wkoll mal-iżvilupp negattiv tal-prezzijiet ta’ bejgħ, nuqqas sinifikanti fis-sehem fis-suq tal-industrija Komunitarja u deterjorament tal-indikaturi ewlenin li jappartjenu lis-sitwazzjoni ekonomika matul il-PI. L-industrija Komunitarja ġarrbet telf sostanzjali fl-2006 u baqgħat tagħmel it-telf matul l-PI.

(172)

L-eżaminazzjoni tal-fatturi l-oħra magħrufin li setgħu jikkawżaw ħsara lill-industrija Komunitarja wriet li ebda wieħed minn dawn ma seta’ jkollu impatt negattiv sinifikanti fuq dik l-industrija b’mod partikolari matul il-PI.

(173)

Skont l-analiżi fuq imsemmija, li għamlet distinzjoni b’mod xieraq u sseparat l-effetti tal-fatturi kollha magħrufin dwar is-sitwazzjoni tal-industrija Komunitarja mill-effetti dannużi tal-importazzjonijiet li huma oġġett ta’ dumping, huwa konkluż b’mod proviżorju li l-importazzjonijiet mir-RPĊ kkawżaw ħsara materjali lill-industrija Komunitarja skont it-tifsira tal-Artikolu 3(6) tar-Regolament bażiku.

(174)

Skont l-Artikolu 21 tar-Regolament bażiku, kien eżaminat jekk, minkejja l-konklużjoni dwar dumping ta’ ħsara, eżistewx raġunijiet serji għall-konklużjoni li mhux fl-interess tal-Komunità li tadotta miżuri proviżorji ta’ anti-dumping f’dan il-każ partikolari. L-analiżi tal-interess Komunitarju kienet ibbażata fuq apprezzament tad-diversi interessi kollha involuti, inkluż dawk tal-industrija Komunitarja, il-fornituri ta’ materja prima, l-importaturi u l-konsumaturi tal-prodott ikkonċernat.

(175)

L-industrija Komunitarja hija komposta minn numru ta’ produtturi ta’ daqs żgħir u medju sitwati madwar il-Komunità, li jimpjegaw direttament madwar 5 000 persuna u jidderivaw il-parti prinċipali tal-bżonnijiet tagħhom ta’ materja prima minn fornituri Komunitarji. Dan ifisser li hemm ħafna kumpaniji fil-Komunità li jiddependu fuq din l-industrija. Dan ikabbar l-implikazzjoni ekonomika tal-industrija tax-xema’ u b’mod partikolari l-impatt tagħha fuq l-impjieg fil-Komunità.

(176)

L-industrija Komunitarja kompliet tagħmel sforzi sabiex tiġbor il-kapital u tinvesti fil-modernizzazzjoni u awtomazzjoni ta’ proċessi ta’ produzzjoni sabiex tibqa’ kompetittiva. Kien osservat ukoll li sforzi konsiderevoli kienu magħmula sabiex tkun ristrutturata l-produzzjoni, u biex jitnaqqsu l-ispejjeż. Dan juri li l-industrija hija vijabbli u li mhux lesta li tirrinunzja l-produzzjoni.

(177)

Huwa kkunsidrat li n-nuqqas ta’ impożizzjoni ta’ miżuri ta’ anti-dumping proviżorji jwassal għal iktar deterjorament tas-sitwazzjoni ekonomika tal-industrija Komunitarja, u għalhekk iwaqqa’ l-isforzi, b’mod partikolari l-investimenti, magħmula fis-snin riċenti. Fit-terminu l-qasir dan jimplika għeluq ta’ kumpaniji, mhux biss fl-industrija tax-xemgħa iżda wkoll probabbli fl-industrija ta’ forniment u t-telf ta’ impjiegi sussegwenti fil-Komunità.

(178)

Huwa mistenni li wara l-impożizzjoni ta’ dazji anti-dumping, il-livell tal-prezz tax-xemgħat fis-suq Komunitarju jiżdied u jippermetti restawrazzjoni ta’ qligħ tal-industrija Komunitarja. Żieda fil-prezz ta’ 7 % ikun suffiċjenti sabiex jippermetti lil din l-industrija biex tilħaq malajr livell aċċettabbli ta’ qligħ. Barra minn hekk, il-miżuri proposti probabbilment ipoġġu lill-industrija Komunitarja fil-pożizzjoni li terġa’ takkwista mill-inqas parti mis-sehem fis-suq mitluf waqt il-perjodu kkunsidrat b’impatt pożittiv ieħor fuq is-sitwazzjoni ekonomika tagħha u l-qligħ.

(179)

B’kollox waslu sitt risposti għall-kwestjonarju tal-importaturi, li minnhom tnejn biss jistgħu jkunu kkunsidrati bħala importanti għall-iskop tal-analiżi tal-interess Komunitarju.

(180)

Iż-żewġ importaturi li ssottomettew risposti importanti u kkooperaw fl-investigazzjoni kienu kontra l-impożizzjoni ta’ miżuri anti-dumping. Dawn l-importaturi ammontaw għal madwar 3 % tal-importazzjonijiet totali ta’ xemgħat mir-RPĊ fil-Komunità u 1 % tal-konsum Komunitarju ta’ xemgħat matul il-PI. Id-dħul mill-bejgħ li jikkonċerna l-kummerċ ta’ xemgħat jikkorrispondi għal 3,4 % tal-attività tal-kumpaniji.

(181)

Irriżulta li l-marġini gross imwettaq minn dawn l-importaturi fuq xemgħat mixtrija mir-RPĊ matul il-PI kien bejn 15 u 25 % matul il-PI billi prinċipalment qed ibiegħu lil distributuri fis-suq Komunitarju. L-impatt dirett tal-introduzzjoni ta’ miżuri jista’ għalhekk ma jkunx negliġibbli għal dawn iż-żewġ importaturi li kkooperaw jekk ma jistgħux jgħaddu l-impatt possibbli ta’ miżuri lill-klijenti tagħhom. L-investigazzjoni wriet li l-prezzijiet għal xemgħat lil klijenti kbar bħal distributuri kienu relativament depressi matul il-PI iżda li l-bejjiegħa bl-imnut kienu qed jakkwistaw marġini gross tajba anki fuq l-imnut ta’ prodotti bażiċi. Fuq dik il-bażi, huwa kkunsidrat li mill-inqas parti jew kwanlunkwe żieda fil-prezz ta’ bejgħ dovut għal miżuri ta’ anti-dumping jistgħu jkunu mgħoddija fuq l-istadji varji tal-katina ta’ distribuzzjoni fil-livell tal-bejjiegħa bl-imnut.

(182)

Minħabba s-sehem żgħir li jirrapreżenta l-kummerċ tax-xemgħat fuq il-fatturat tal-importaturi li kkooperaw, fi kliem ieħor 3,4 %, biss u l-probabbilità li l-importaturi jkunu jistgħu jgħaddu mill-inqas parti miż-żidiet ta’ kwalunkwe prezz iktar ’l isfel fil-katina ta’ distribuzzjoni, huwa kkunsidrat proviżorjament li l-impatt tal-miżuri proviżorji fuq is-sitwazzjoni finanzjarja tagħhom ma jkunx sinifikanti.

(183)

Gruppi kbar ta’ bejjiegħa bl-imnut, li importaw kwantitajiet kbar ta’ xemgħat, matul il-PI, jew ma offrewx li jikkooperaw jew issottomettew risposti li ma kinux importanti għall-analiżi tal-interess Komunitarju. Għalhekk ma kienx possibbli li jkun hemm aċċess b’mod preċiż għall-impatt totali tal-miżuri proposti ta’ anti-dumping dwar il-kapaċità ta’ qligħ ta’ dawn il-gruppi fuq il-bażi tad-dejta vverifikata.

(184)

Madankollu, minkejja n-nuqqas ta’ kooperazzjoni minn dawn il-partijiet, il-Kummissjoni fittxet informazzjoni disponibbli pubblikament rigward il-prezzijiet tal-bejgħ bl-imnut ta’ xemgħat u, b’mod partikolari, għal tea lights u għamlet evalwazzjoni rigward l-impatt possibbli li miżuri proviżorji ta’ anti-dumping jista’ jkollhom fuq bejjiegħa bl-imnut. It-tea lights koprew sehem kbir kemm tal-esportazzjonijiet mir-RPĊ kif ukoll tal-bejgħ tal-industrija Komunitarja matul il-PI. Sussegwentement, id-dazju medju pagabbli fuq l-importazzjonijiet ta’ xemgħat importati mir-RPĊ kif ukoll iż-żieda fil-prezz possibbli għal tea lights prodotti mill-industrija Komunitarja kienu mqabbla.

(185)

Skont informazzjoni pubblika, irriżulta li bejjiegħa bl-imnut kbar qed jakkwistaw marġini ta’ profitt gross tajjeb ta’ diversi mijiet fil-mija fil-kummerċ tagħhom tax-xemgħat. F’termini prattiċi, dan ifisser li sabiex pakkett ta’ xemgħat bażiċi jkun mibjugħ bi prezz bl-imnut fil-forma ta’ indiċi ta’ 100 lil konsumaturi l-marġini gross ta’ bejjiegħa bl-imnut jista’ jkun għoli daqs indiċi ta’ 70. Ibbażat fuq dejta vverifikata l-prezz fil-forma ta’ indiċi għall-istess pakkett importat mir-RPĊ għandu jkun 30 u l-impożizzjoni ta’ miżuri proviżorji ta’ anti-dumping twassal għal dazju fil-forma ta’ indiċi ta’ 4 meqjus is-sehem rispettiv tas-suq tal-importazzjonijiet oġġett ta’ dumping.

(186)

Jekk il-bejjiegħa bl-imnut il-kbar kellhom jixtru l-istess pakkett ta’ xemgħat direttament mill-industrija Komunitarja, il-marġini gross tagħhom jibqa’ għoli anki jekk iż-żieda fil-prezz imsemmija fil-premessa (178) ta’ hawn fuq kellha sseħħ. Il-prezz ta’ xiri tal-pakkett f’forma ta’ indiċi jkun madwar 35 għall-bejjiegħa bl-imnut.

(187)

Din l-analiżi twassal għall-konklużijoni li l-impatt, jekk ikun hemm, li jista’ jkollhom il-miżuri provviżorji fuq il-kumpaniji bl-imnut ikun limitat ħafna. Hemm indikazzjonijiet li jistgħu anki jkunu kapaċi jassorbu ħafna mill-miżuri proposti mingħajr ma jgħadduha lill-konsumaturi u mingħajr ma jaffettwaw il-marġini ta’ profitt tagħhom b’mod sinifikanti.

(188)

Skont dawn iċ-ċirkostanzi, kien konkluż proviżorjament li, fuq il-bażi tal-informazzjoni disponibbli, l-effett tal-miżuri anti-dumping, jekk hemm, probabbilment ma jkollux impatt materjali fuq l-importaturi.

(189)

Għalkemm ix-xemgħa hija prodott tipiku tal-konsumatur, ebda kooperazzjoni ma waslet minn assoċjazzjonijiet li jirrappreżentaw l-interessi tal-konsumaturi. L-impatt potenzjali li l-miżuri anti-dumping jista’ jkollhom fuq il-konsumaturi Komunitarji kien madankollu eżaminat skont id-dejta miġbura għall-gruppi kbar ta’ bejgħ bl-imnut fil-Komunità.

(190)

Kif spjegat fil-premessi (185) u (186) il-bejjiegħa bl-imnut u b’mod partikolari l-gruppi kbar ta’ bejgħ bl-imnut qed jiksbu marġini gross tant kbar li huma fuq livell li għandhom ikunu kapaċi jassorbu l-miżuri proviżorji ta’ anti-dumping mingħajr ma jgħaddu kwalunkwe żieda fil-prezz lil konsumaturi.

(191)

F’dawn iċ-ċirkostanzi, kien konkluż proviżorjament li ma għandu jkun hemm ebda impatt materjali għal konsumaturi.

(192)

Fornitur ta’ xema’ bajda ppreżenta ruħu u wieġeb il-kwestjonarju maħsub għal fornituri ta’ materja prima użata fil-produzzjoni ta’ xemgħat. Huwa mfakkar li l-pitrolju jista’ jirrappreżenta sa 50 % tas-COP tal-prodott ikkonċernat.

(193)

Kif imsemmi fil-premessa (175) ta’ hawn fuq, is-sitwazzjoni futura tal-industrija Komunitarja probabbilment taffettwa b’mod pożittiv il-fornituri ta’ materja prima. Proviżorjament, huwa konkluż li l-impożizzjoni ta’ miżuri anti-dumping mhix kontra l-interess tal-fornituri ta’ materja prima.

(194)

Fir-rigward tas-suq Komunitarju, jekk jiġu imposti miżuri anti-dumping, il-produtturi esportaturi Ċiniżi kkonċernati, minħabba l-pożizzjonijiet fis-suq b’saħħithom taghhom, probabbilment ikomplu jbiegħu l-prodotti tagħhom, minkejja li bi prezzijiet li mhumiex oġġett ta’ dumping. Minħabba n-numru kbir ta’ produtturi Komunitarji u Ċiniżi, huwa probabbli wkoll li xorta jkun hemm numru suffiċjenti ta’ kompetituri kbar fis-suq Komunitarju. Huwa għalhekk probabbli l-importaturi, ikunux negozjanti, distributuri jew bejjiegħa bl-imnut, u għalhekk il-konsumaturi jkomplu jkollhom l-għażla ta’ fornituri differenti ta’ xemgħat.

(195)

Jekk, madankollu, ebda miżuri ma kellhom ikunu imposti, il-futur tal-industrija Komunitarja li kellha sehem importanti fis-suq ikun fir-riskju fit-terminu qasir u medju. L-awtorizzazzjoni li importazzjonijiet li huma oġġett ta’ dumping mir-RPĊ jidħlu fis-suq Komunitarju mingħajr ma tikkoreġi l-effetti li jgħawġu l-kummerċ tista’ twassal għal ħruġ mix-xena ta’ ħafna produtturi Komunitarji, għalhekk inqas għażla għad-diversi operaturi, kompetizzjoni mnaqqsa u telf ta’ numru sinifikanti ta’ impjiegi fis-suq Komunitarju.

(196)

Skont dak stabbilit fuq, huwa konkluż proviżorjament li ma hemmx raġunijiet serji kontra l-impożizzjoni ta’ miżuri ta’ anti-dumping proviżorji fil-każ preżenti.

(197)

Skont il-konklużjonijiet milħuqa rigward dumping, ħsara, kawżalita’ u interess Komunitarju, miżuri ta’ anti-dumping proviżorji għandhom ikunu imposti sabiex tkun evitata iktar ħsara kkawżata lill-industrija Komunitarja mill-importazzjonijiet li huma oġġett ta’ dumping.

(198)

Sabiex ikun stabbilit il-livell ta’ dazju, għandu jkun ikkunsidrat il-livell tal-marġini ta’ dumping li jirriżulta u l-ammont ta’ dazju neċessarju sabiex jelimina l-ħsara mġarrba mill-industrija Komunitarja.

(199)

Fuq il-bażi tad-dejta tal-investigazzjoni huwa kkunsidrat li l-profitt li jista’ jkun miksub fin-nuqqas ta’ importazzjonijiet li huma oġġett ta’ dumping għandu jkun ibbażat fuq is-snin 2004 u 2005 meta l-industrija Komunitarja rnexxielha tilħaq livelli ta’ qligħ għoli u meta importazzjonijiet Ċiniżi kienu inqas preżenti fis-suq Komunitarju. Huwa għalhekk ikkunsidrat li marġini ta’ profitt ta’ 6,5 % ta’ dħul mill-bejgħ jista’ jkun ikkunsidrat bħala minimu xieraq li l-industrija Komunitarja setgħat stenniet li takkwista fin-nuqqas ta’ dumping ta’ ħsara. Iż-żieda fil-prezz neċessarju kienet imbagħad determinata fuq il-bażi ta’ tqabbil, għal kull tip ta’ prodott, tal-medja differenzjata tal-prezz ta’ importazzjoni tal-kampjun ta’ produtturi esportaturi fir-RPĊ, bil-prezz mhux ta’ ħsara tat-tipi ta’ prodott mibjugħ mill-industrija Komunitarja fis-suq Komunitarju matul il-PI. Il-prezz mhux ta’ ħsara kien akkwistat permezz taż-żieda tal-prezz ta’ produzzjoni tal-industrija Komunitarja mal-marġini ta’ profitt ta’ 6,5 % fuq imsemmi. Kwalunkwe differenza li tirriżulta minn dan it-tqabbil kienet imbagħad imfissra bħala perċentwali tal-valur ta’ importazzjoni tas-CIF tat-tipi mqabbla.

(200)

Skont dak li ntqal, huwa kkunsidrat li, skont l-Artikolu 7(2) tar-Regolament bażiku, dazji ta’ anti-dumping proviżorji għandhom ikunu imposti fir-rigward ta’ importazzjonijiet li joriġinaw fir-RPĊ fil-livell l-iktar baxx mill-marġini ta’ dumping u ta’ ħsara, skont ir-regola tal-inqas dazji.

(201)

Ir-rati tad-dazju ta’ anti-dumping ta’ kumpaniji individwali speċifikati f’dan ir-Regolament kienu stabbiliti fuq il-bażi tas-sejbiet ta’ din l-investigazzjoni. Għalhekk, huma jirriflettu s-sitwazzjoni li rriżultat matul dik l-investigazzjoni fir-rigward ta’ dawk il-kumpaniji. Dawn ir-rati ta’ dazju (għall-kuntrarju tad-dazju nazzjonali applikabbli għal “l-kumpaniji l-oħra kollha”) huma għalhekk esklussivament applikabbli għal importazzjonijiet ta’ prodotti li joriġinaw fil-pajjiż ikkonċernat u magħmula minn kumpaniji u għalhekk minn entitajiet legali speċifikati msemmija. Prodotti importati magħmula minn xi kumpanija oħra mhux speċifikament imsemmija fil-parti operattiva ta’ dan ir-Regolament bl-isem tagħha u l-indirizz, inklużi entitajiet relatati ma’ dawk speċifikament imsemmija, ma jistgħux jibbenefikaw minn dawn ir-rati u għandhom ikunu suġġetti għar-rata ta’ dazju applikabbli għal “l-kumpaniji l-oħra kollha”.

(202)

Il-marġini tad-dumping u ħsara stabbiliti huma kif ġej:

(203)

Minħabba li ħafna drabi ix-xemgħat huma importati f’settijiet flimkien ma’ gandlieri, buġiji jew oġġetti oħra, kien ikkunsidrat xieraq li jkunu determinati d-dazji bħala ammonti fissi fuq il-bażi ta’ kontenut ta’ fjuwil tax-xemgħat, inkluż in-niċċa billi għal din ir-raġuni din il-forma ta’ miżura tidher xierqa għall-prodott ikkonċernat.

(204)

Is-sejbiet proviżorji fuq imsemmija għandhom ikunu żvelati lill-partijiet interessati kollha li għandhom ikunu mistiedna biex jippreżentaw l-opinjonijiet taghhom bil-miktub u jitolbu seduta. Il-kummenti tagħhom għandhom ikunu analizzati u kkunsidrati fejn meħtieġ qabel ma jkunu magħmula determinazzjonijiet definittivi. Is-sejbiet proviżorji jistgħu jkollhom jiġu kkunsidrati mill-ġdid għall-finijiet ta’ xi sejbiet definittivi,

(a)

il-fjuwil tagħhom fih iktar minn 500 ppm ta’ toluwol;

(b)

il-fjuwil tagħhom fih iktar minn 100 ppm benżin;

(ċ)

għandhom niċċa b’dijametru ta’ mill-inqas 5 millimetri;

(d)

huma individwalment ippakkjati f’kontenitur tal-plastik b’ħitan vertikali ta’ mill-inqas 5 ċm fit-tul.