6.11.2008   

MT

Il-Ġurnal Uffiċjali ta’ l-Unjoni Ewropea

L 297/12

(1)

L-Artikolu 12 tar-Regolament tal-Kummissjoni (KE) Nru 950/2006 tat-28 ta' Ġunju 2006 li jistipula regoli dettaljati tal-applikazzjoni għas-snin tas-suq 2006/2007, 2007/2008 u 2008/2009 għall-importazzjoni u r-raffinar tal-prodotti taz-zokkor skont ċerti kwoti tariffarji u ftehimiet preferenzjali (2) jipprovdi għal regoli dettaljati għall-iffissar tal-obbligi tal-konsenja bla dazju tal-prodotti li jaqgħu taħt il-kodiċi NM 1701, espressi f'ekwivalenti ta' zokkor abjad, għall-importazzjonijiet li joriġinaw f'pajjiżi li huma firmatarji għall-Protokoll 3 mehmuż mal-Anness V tal-Ftehim ta’ Sħubija bejn il-membri tal-grupp ta' Stati mill-Afrika, il-Karibew u l-Paċifiku fuq naħa u l-Komunità Ewropea u l-Istati Membri tagħha fuq in-naħa l-oħra, iffirmat f'Cotonou fit-23 ta' Ġunju 2000 (il-Protokoll tal-AKP) u għall-Ftehim mal-Indja.

(2)

Bid-Deċiżjoni 2007/626/KE (3) il-Kunsill iddeċieda li jtemm, f'isem il-Komunità, il-Ftehim mal-Indja dwar iz-zokkor tal-kannamieli (il-Ftehim mal-Indja) (4), b'effett mill-1 ta’ Ottubru 2009. Bid-Deċiżjoni 2007/627/KE (5) il-Kunsill ddeċieda li jtemm, f'isem il-Komunità, il-Protokoll tal-AKP b'effett mill-1 ta' Ottubru 2009. Il-perjodu tal-konsenja li jibda fl-1 ta' Lulju 2009 għalhekk ser idum biss tliet xhur.

(3)

L-applikazzjoni tal-Artikoli 3 u 7 tal-Protokoll tal-AKP, l-Artikoli 3 u 7 tal-Ftehim mal-Indja u l-Artikolu 12(3) u l-Artikoli 14 u 15 tar-Regolament (KE) Nru 950/2006 wasslet biex il-Kummissjoni tikkalkula l-obbligi tal-konsenja għal kull pajjiż tal-esportazzjoni għall-perjodu tal-esportazzjoni li jibda fl-1 ta' Lulju 2009, abbażi tat-tagħrif disponibbli attwalment.

(4)

Għall-perjodu tal-konsenja ta' bejn l-1 ta' Lulju 2009 u t-30 ta' Settembru 2009, għandu jingħata biżżejjed żmien lill-operaturi sabiex jorganizzaw il-kummerċ. Huwa għalhekk neċessarju li jiġu stabbiliti b'mod proviżorju l-obbligi tal-konsenja għall-perjodu li jibda fl-1 ta' Lulju 2009 skont il-punt (a) tal-Artikolu 12(2) tar-Regolament (KE) Nru 950/2006.

(5)

Il-kuntratti tal-kummerċ bejn l-importaturi mill-Komunità u l-pajjiżi tal-AKP u l-Indja huma marbuta mal-perjodi tal-konsenji. Sabiex tiġi rrispettata l-kronoloġija tal-konsenji, l-applikazzjonijiet għal-liċenzji tal-importazzjoni għall-perjodu tal-konsenja li jibda fl-1 ta' Lulju 2009 ma għandhomx jitressqu qabel l-4 ta' Mejju 2009, sakemm ma jistax jiġi stabbilit li l-pajjiż tal-esportazzjoni ssodisfa l-obbligi tiegħu tal-konsenja għall-perjodu tal-konsenja 2008/2009 kif stipulati mir-Regolament tal-Kummissjoni (KE) Nru 403/2008 (6).

(6)

Skont l-Artikolu 153(3) tar-Regolament (KE) Nru 1234/2007, il-liċenzji tal-importazzjoni taz-zokkor għar-raffinar għandhom jinħarġu biss lir-raffinaturi full-time sakemm il-kwantitajiet ikkonċernati ma jaqbżux il-kwantitajiet li jistgħu jiġu importati fil-qafas tal-provvista tradizzjonali meħtieġa msemmija fl-Artikolu 153(1) tar-Regolament (KE) Nru 1234/2007. Madankollu, skont l-Artikolu 155 tar-Regolament (KE) Nru 1234/2007, il-Kummissjoni tista' tadotta miżuri ta' deroga mill-Artikolu 153(3) ta' dak ir-Regolament sabiex tiżgura li z-zokkor mill-AKP u l-Indja jiġi importat fl-Komunità skont il-kundizzjonijiet stipulati fil-Protokoll tal-AKP u l-Ftehim mal-Indja. Għall-perjodu ta' konsenja li jibda fl-1 ta' Lulju 2009 u b'konsiderazzjoni tat-tnaqqis fil-prezz taz-zokkor tal-kannamieli importat u mhux maħdum fl-1 ta' Ottubru 2009, dawn il-kundizzjonijiet jistgħu biss jiġu sodisfatti jekk in-negozjanti jkollhom aċċess għal-liċenzji tal-importazzjoni taz-zokkor għar-raffinar. Huwa għalhekk meħtieġ li jkun hemm deroga mill-Artikolu 10(1) tar-Regoalment (KE) Nru 950/2006 li jillimita t-tressiq tal-applikazzjonijiet għaz-zokkor għar-raffinar għar-raffinaturi full-time.

(7)

Il-miżuri previsti f’dan ir-Regolament huma skont l-opinjoni tal-Kumitat ta’ Ġestjoni għall-Organizzazzjoni Komuni tas-Swieq Agrikoli,