9.5.2008   

MT

Il-Ġurnal Uffiċjali ta’ l-Unjoni Ewropea

L 125/22

(1)

L-Artikolu 6 tar-Regolament (KE) Nru 1788/2003 jipprovdi li l-produtturi jista’ jkollhom kwantità ta’ referenza individwali waħda jew tnejn, waħda għall-konsenji u l-oħra għall-bejgħ dirett u dawn il-kwantitajiet jistgħu jinbidlu minn kwantità ta’ referenza waħda għall-oħra mill-awtorità kompetenti ta’ l-Istat Membru biss, skond it-talba ġustifikata tal-produttur.

(2)

Ir-Regolament tal-Kummissjoni (KE) Nru 607/2007 ta’ l-1 ta’ Ġunju 2007 dwar id-diviżjoni bejn “twassil”(konsenji) u “bejgħ dirett” ta’ kwantitajiet ta’ referenza nazzjonali stabbiliti għall-2006/2007 fl-Anness I tar-Regolament tal-Kunsill (KE) Nru 1788/2003 (2) jistipula d-diviżjoni bejn “konsenji” u “bejgħ dirett” għall-perjodu mill-1 ta’ April 2006 sal-31 ta’ Marzu 2007 għall-Belġju, ir-Repubblika Ċeka, id-Danimarka, il-Ġermanja, l-Estonja, l-Irlanda, il-Greċja, Spanja, Franza, l-Italja, Ċipru, il-Latvja, il-Litwanja, il-Lussemburgu, l-Ungerija, Malta, l-Olanda, l-Awstrija, il-Polonja, il-Portugall, is-Slovenja, is-Slovakkja, il-Finlandja, l-Iżvezja u r-Renju Unit.

(3)

Ir-Regolament tal-Kummissjoni (KE) Nru 1186/2007 ta’ l-10 ta’ Ottubru 2007 li jemenda l-Anness I għar-Regolament tal-Kunsill (KE) Nru 1788/2003 li jistabbilixxi taxxa fil-qasam tal-ħalib u l-prodotti mill-ħalib fir-rigward tad-diviżjoni bejn bejgħ dirett u konsenji għar-Rumanija u l-Bulgarija (3) ffissa d-diviżjoni bejn bejgħ dirett u konsenji għal dawk l-Istati Membri fil-bidu ta ’l-iskema tal-kwota fl-1 ta’ April 2007.

(4)

Bi qbil ma’ l-Artikolu 25(2) tar-Regolament tal-Kummissjoni (KE) Nru 595/2004 tat-30 ta’ Marzu 2004 li jistipula regoli dettaljati biex japplika r-Regolament tal-Kunsill (KE) Nru 1788/2003 li jistabbilixxi taxxa fil-qasam tal-ħalib u l-prodotti mill-ħalib (4), il-Belġju, il-Bulgarija, ir-Repubblika Ċeka, id-Danimarka, il-Ġermanja, l-Estonja, l-Irlanda, il-Greċja, Spanja, Franza, l-Italja, Ċipru, il-Latvja, il-Litwanja, il-Lussemburgu, l-Ungerija, l-Olanda, l-Awstrija, il-Polonja, il-Portugall, ir-Rumanija, is-Slovenja, is-Slovakkja, il-Finlandja, l-Iżvezja u r-Renju Unit taw notifikazzjoni dwar il-kwantitajiet li fuq talba mill-produtturi ġew mibdulin definittivament bejn kwantitajiet ta’ referenza individwali għall-konsenji u għall-bejgħ dirett.

(5)

Bi qbil ma’ l-Anness I tar-Regolament (KE) Nru 1788/2003 il-kwantitajiet ta’ referenza nazzjonali totali għall-Belġju, id-Danimarka, il-Ġermanja, Franza, il-Lussemburgu, l-Olanda, l-Awstrija, il-Portugall, il-Finlandja, l-Iżvezja u r-Renju Unit għall-2007/2008 huma akbar mill-kwantitajiet ta’ referenza nazzjonali totali tagħhom għall-2006/2007, u dawn l-Istati Membri nnotifikaw lill-Kummissjoni dwar id-diviżjoni bejn “konsenji” u “bejgħ dirett” tal-kwantitajiet ta’ referenza addizzjonali.

(6)

Għalhekk huwa xieraq li tiġi stabbilita d-diviżjoni bejn “konsenji” u “bejgħ dirett” tal-kwantitajiet ta’ referenza nazzjonali applikabbli għall-perjodu mill-1 ta’ April 2007 sal-31 ta’ Marzu 2008 stabbiliti fl-Anness I tar-Regolament (KE) Nru 1788/2003.

(7)

Il-miżuri li hemm provvediment dwarhom f'dan ir-Regolament huma konformi ma’ l-opinjoni tal-Kumitat ta’ Ġestjoni tal-Ħalib u l-Prodotti mill-Ħalib,