(1)

Skond id-Deċiżjoni tal-Kunsill 2001/549/KE tas-16 ta’ Lulju 2001 li tipprovdi għajnuna makrofinanzjarja lir-Repubblika Federali tal-Jugoslavja (2), il-Komunità tat lir-Repubblika Federali tal-Jugoslavja self fit-tul ta’ EUR 225 miljun biex tiżgura sitwazzjoni ta’ bilanċ tal-pagamenti sostenibbli u t-tisħiħ tal-pożizzjoni ta’ riżerva tal-pajjiż. Is-self tħallas bis-sħiħ f’pagament wieħed mill-Kummissjoni f’Ottubru 2001.

(2)

Skond id-Deċiżjoni tal-Kunsill 2002/882/KE tal-5 ta’ Novembru 2002 li tipprovdi għajnuna makrofinanzjarja lir-Repubblika Federali tal-Jugoslavja (3), il-Komunità tat lir-Repubblika Federali tal-Jugoslavja self fit-tul ta’ EUR 55 miljun biex tiżgura sitwazzjoni ta’ bilanċ tal-pagamenti sostenibbli u tisħiħ tal-pożizzjoni ta’ riżerva tal-pajjiż. Is-self tħallas bis-sħiħ mill-Kummissjoni fi tliet pagamenti rispettivament EUR 10 miljun fi Frar 2003, EUR 30 miljun f’Settembru 2003 u EUR 15-il miljun f’April 2005.

(3)

Skond il-Karta Kostituzzjonali ta’ l-Unjoni ta’ l-Istati tas-Serbja u l-Montenegro, adottata fl-4 ta’ Frar 2003, ir-Repubblika Federali tal-Jugoslavja kienet ikkostitwita mill-ġdid bħala l-Unjoni ta’ l-Istati tas-Serbja u l-Montenegro.

(4)

Fit-3 ta’ Ġunju 2006, imsejjes fuq l-Artikolu 60 tal-Karta Kostituzzjonali ta’ l-Unjoni ta’ l-Istati tas-Serbja u l-Montenegro u skond ir-referendum tal-Montenegro tal-21 ta’ Mejju 2006, il-Parlament tal-Montenegro għamel dikjarazzjoni fuq l-indipendenza tal-pajjiż, li ddikjarat li l-Montenegro hu Stat indipendenti b’personalità legali sħiħa skond il-liġi internazzjonali.

(5)

Fil-5 ta’ Ġunju 2006, il-Parlament tas-Serbja adotta deċiżjoni li ddefiniet is-Serbja bħala l-Istat suċċessur ta’ l-Unjoni ta’ l-Istati tas-Serbja u l-Montenegro.

(6)

Il-Kunsill, fil-konklużjonijiet tiegħu tat-12 ta’ Ġunju 2006, ikkunsidra d-dikjarazzjoni tal-Parlament tal-Montenegro u d-deċiżjoni tal-Parlament tas-Serbja u ddikjara li l-Unjoni Ewropea u l-Istati Membri kienu ddeċidew li jiżviluppaw aktar ir-relazzjonijiet mal-Montenegro bħala Stat sovran u indipendenti.

(7)

Fl-10 ta’ Lulju 2006, il-Montenegro u s-Serbja kellhom ftehim dwar ir-regolament tas-sħubija fl-organizzazzjonijiet finanzjarji internazzjonali u t-tqassim ta’ l-assi u l-passivi finanzjarji, skond liema s-self ta’ għajnuna makrofinanzjarja mogħti lir-Repubblika Federali tal-Jugoslavja jew l-Unjoni ta’ l-Istati tas-Serbja u l-Montenegro se jissoktaw jitħallsu bil-proporzjon ta’ 90 % għas-Serbja u 10 % għall-Montenegro, sakemm ma jintużawx perċentwali oħra fuq il-bażi tal-prinċipji tal-benefiċjarju finali.

(8)

Il-Montenegro u s-Serbja, permezz tal-Bank Ċentrali tal-Montenegro u l-Bank Nazzjonali tas-Serbja, qegħdin jissoktaw iħallsu bis-sħiħ id-dejn għal obbligi li jitnisslu mill-operazzjonijiet tas-self Komunitarju.

(9)

Skond l-Appendiċi 4 għall-ftehim ta’ l-10 ta’ Lulju 2006 bejn il-Montenegro u s-Serbja, dejn totali ta’ EUR 6 703 388,62 li ġej mis-self ta’ għajnuna makrofinanzjarja ngħata lill-Montenegro.

(10)

Iż-żewġ pajjiżi qegħdin iħallsu d-dejn għall-obbligi skond it-tqassim 90:10 miftiehem bejniethom, għajr operazzjoni waħda li qegħda titħallas skond il-prinċipju tal-benefiċjarju finali (99.47 % għas-Serbja u 0.53 % għall-Montenegro).

(11)

B’kunsiderazzjoni għar-relazzjonijiet żviluppati bejn l-Unjoni Ewropea u l-Montenegro bħala Stat indipendenti, b’mod partikolari s-Sħubija Ewropea stabbilita mid-Deċiżjoni tal-Kunsill 2007/49/KE tat-22 ta’ Jannat 2007 dwar il-prinċipji, il-prijoritajiet u l-kundizzjonijiet fis-Sħubija Ewropea mal-Montenegro (4), u l-perjodu twil ta’ żmien li fih għandhom isiru l-ħlasijiet lura, il-Kummissjoni għandha tkun awtorizzata li tieħu azzjoni xierqa biex tiżgura li l-passivi li ġejjin mis-self mogħti skond id-Deċiżjonijiet tal-Kunsill 2001/549/KE u 2002/882/KE jinqasmu bejn il-Montenegro u s-Serbja fil-proporzjonijiet miftehma bilateralment bejn iż-żewġ pajjiżi.

(12)

Il-Montenegro u s-Serbja mhumiex se jkunu intitolati għal ħlas supplimentari ieħor ta’ l-għajnuna makrofinanzjarja skond din id-Deċiżjoni.

(13)

Il-Kummissjoni kkonsultat il-Kumitat Ekonomiku u Finanzjarju qabel ma ressqet il-proposta tagħha.

(14)

It-Trattat ma jipprovdix għal poteri, għajr dawk fl-Artikolu 308 tiegħu, għall-adozzjoni ta’ din id-Deċiżjoni,