Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32008D0689

    2008/689/KE: Deċiżjoni tal-Kummissjoni ta’ l- 1 ta’ Awwissu 2008 li temenda l-Anness II tad-Direttiva 2000/53/KE tal-Parlament Ewropew u tal-Kunsill dwar vetturi li m’għadhomx jintużaw (notifikata taħt id-dokument numru C(2008) 4017) Test b’relevanza għaż-ŻEE

    ĠU L 225, 23.8.2008, p. 10–13 (BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)

    ⏵Dan id-dokument ġie ppubblikat f’edizzjoni(jiet) speċjali (HR)

    Legal status of the document In force

    ELI: http://data.europa.eu/eli/dec/2008/689/oj

    23.8.2008   

    MT

    Il-Ġurnal Uffiċjali ta’ l-Unjoni Ewropea

    L 225/10

    DEĊIŻJONI TAL-KUMMISSJONI

    ta’ l-1 ta’ Awwissu 2008

    li temenda l-Anness II tad-Direttiva 2000/53/KE tal-Parlament Ewropew u tal-Kunsill dwar vetturi li m’għadhomx jintużaw

    (notifikata taħt id-dokument numru C(2008) 4017)

    (Test b’relevanza għaż-ŻEE)

    (2008/689/KE)

    IL-KUMMISSJONI TAL-KOMUNITAJIET EWROPEJ,

    Wara li kkunsidrat it-Trattat li jistabbilixxi l-Komunità Ewropea,

    Wara li kkunsidrat id-Direttiva 2000/53/KE tal-Parlament Ewropew u tal-Kunsill tat-18 ta' Settembru 2000 dwar vetturi li m’għadhomx jintużaw (1), u b’mod partikolari l-Artikolu 4(2)(b) tagħha,

    Billi:

    (1)

    L-Artikolu 4(2)(a) tad-Direttiva 2000/53/KE jipprojbixxi l-użu taċ-ċomb, il-merkurju, il-kadmju jew il-kromju eżavalenti f'materjali u komponenti tal-vetturi mqiegħda fis-suq wara l-1 ta’ Lulju 2003, għajr fil-każi elenkati fl-Anness II ta’ dik id-Direttiva u skond il-kundizzjonijiet speċifikati fiha. Skond l-Artikolu 4(2)(b) tad-Direttiva 2000/53/KE, l-Anness II ta' dik id-Direttiva għandu jiġi adattat mill-Kummissjoni fuq bażi regolari għall-progress xjentifiku u tekniku.

    (2)

    L-Anness II tad-Direttiva 2000/53/KE jelenka l-materjali u komponenti tal-vetturi eżenti mill-projbizzjoni tal-metalli tqal li hemm fl-Artikolu 4(2)(a) tagħha. Bosta minn dawn l-eżenzjonijiet jiskadu f’dati speċifikati f’dak l-Anness. Il-vetturi mqiegħda fis-suq qabel id-data ta’ l-iskadenza ta’ eżenzjoni partikolari jistgħu jkollhom il-metalli tqal fil-materjali u l-komponenti elenkati fl-Anness II tad-Direttiva 2000/53/KE.

    (3)

    Ċerti eżenzjonijiet mill-projbizzjoni li hemm fl-Artikolu 4(2)(a) tad-Direttiva 2000/53/KE m’għandhomx jiġu mtawla minħabba li l-użu taċ-ċomb, tal-merkurju, tal-kadmju jew tal-kromju eżavalenti f'dawk l-applikazzjonijiet daż-żmien jista' jiġi evitat bis-saħħa tal-progress tekniku.

    (4)

    Ċerti materjali u komponenti li fihom iċ-ċomb, il-merkurju, il-kadmju jew il-kromju eżavalenti għandhom ikomplu jkunu eżenti mill-projbizzjoni ta’ l-Artikolu 4(2)(a), billi l-użu ta’ dawn is-sustanzi f’dawk il-materjali u komponenti speċifiċi għadu inevitabbli. F’xi każi, jixraq li tiġi riveduta d-data ta’l-iskadenza ta’ dawn l-eżenzjonijiet sabiex jingħata ħin biżżejjed biex jiġu eliminati s-sustanzi pprojbiti fil-ġejjieni.

    (5)

    L-Anness II tad-Direttiva 2000/53/KE kif emendat bid-Deċiżjoni tal-Kummissjoni 2005/438/KE ta’ l-10 ta’ Ġunju 2005 li temenda l-Anness II tad-Direttiva 2000/53/KE tal-Parlament Ewropew u tal-Kunsill dwar vetturi li m’għadhomx jintużaw (2) jipprovdi, fit-tielet inċiż tan-Noti, li l-partijiet tal-bdil (spare parts) imqiegħda fis-suq wara l-1 ta' Lulju 2003 li jintużaw għall-vetturi mqiegħda fis-suq qabel l-1 ta' Lulju 2003 huma eżenti mid-dispożizzjonijiet ta' l-Artikolu 4(2)(a) tad-Direttiva 2000/53/KE. Din l-eżenzjoni tippermetti t-tiswija ta’ vetturi mqiegħda fis-suq qabel id-dħul fis-seħħ tal-projbizzjoni tal-metalli tqal li hemm fl-Artikolu 4(2)(a) tad-Direttiva 2000/53/KE bil-partijiet tal-bdil jilħqu l-istess kwalità u rekwiżiti ta' sigurtà bħall-partijiet li bihom kienu oriġinarjament mgħammra.

    (6)

    Il-partijiet tal-bdil għal vetturi mqiegħda fis-suq wara l-1 ta’ Lulju 2003 iżda qabel id-data ta’ l-iskadenza ta’ eżenzjoni partikolari ta’ l-Anness II tad-Direttiva 2000/53/KE mhumiex koperti mit-tielet inċiż tan-Noti tiegħu. B’hekk, il-partijiet tal-bdil għal dawn il-vetturi jridu jkunu ħielsa mill-metalli tqal, anki jekk jintużaw biex jissostitwixxu partijiet li oriġinarjament kien fihom il-metalli tqal.

    (7)

    F’ċerti każi, hu teknikament impossibbli li jissewwew vetturi b’partijiet li mhumiex oriġinali minħabba li dawn kieku jkunu jeħtieġu bidliet fil-proprjetatjiet dimensjonali u funzjonali tas-sistemi sħaħ tal-vetturi. Partijiet tal-bdil ta' dan it-tip ma jistgħux jitwaħħlu f’sistemi ta’ vetturi oriġinarjament immanifatturati b’partijiet li fihom il-metalli tqal u dawn il-vetturi ma jkunux jistgħu jissewwew u għandu mnejn ikun hemm bżonn li wieħed jeħles minnhom qabel iż-żmien. Bħala riżultat, l-Anness II għandu jiġi emendat skond dan. Din id-deċiżjoni għandha teffettwa biss għadd limitat ta’ vetturi u materjali u komponenti tal-vetturi u għal perjodu ta’ żmien limitat.

    (8)

    Billi s-sigurtà tal-konsumatur hija essenzjali, u billi l-użu mill-ġdid, it-tiġdid u l-estensjoni ta’ ħajjet il-prodott igawdi minnhom l-ambjent, il-partijiet tal-bdil għandhom ikunu disponibbli għat-tiswija tal-vetturi li tqiegħdu fis-suq bejn l-1 ta’ Lulju 2003 u d-data ta’ l-iskadenza ta’ eżenzjoni partikolari. L-użu taċ-ċomb, tal-merkurju, tal-kadmju jew tal-kromju eżavalenti fil-materjali u l-komponenti użati fil-partijiet tal-bdil għat-tiswija ta’ dawn it-tip ta' vetturi għalhekk għandu jiġi ttollerat.

    (9)

    Jixraq li l-mod kif inhuma miktuba dawn l-eżenzjonijiet jiġi armonizzat mad-direttivi ambjentali l-oħrajn marbutin ma' l-iskart li fihom jissemmew eżenzjonijiet simili.

    (10)

    Id-Direttiva 2000/53/KE għandha għalhekk tiġi emendata skond dan.

    (11)

    Il-mizuri pprovduti f’din id-Deċiżjoni huma skond l-opinjoni tal-Kumitat stabbilit bl-Artikolu 18(1) tad-Direttiva 2006/12/KE tal-Parlament Ewropew u tal-Kunsill tal-5 ta’ April 2006 dwar l-iskart (3),

    ADOTTAT DIN ID-DEĊIŻJONI:

    Artikolu 1

    L-Anness II tad-Direttiva 2000/53/KE huwa mibdul mit-test stipulat fl-Anness ta' din id-Deċiżjoni.

    Artikolu 2

    Din id-Deċiżjoni għandha tidħol fis-seħħ fit-3 jum wara l-pubblikazzjoni tagħha fil-Ġurnal Uffiċjali ta' l-Unjoni Ewropea.

    Artikolu 3

    Din id-Deċiżjoni hija indirizzata lill-Istati Membri.

    Magħmula fi Brussell, 1 ta’ Awwissu 2008.

    Għall-Kummissjoni

    Stavros DIMAS

    Membru tal-Kummissjoni

    (1)  ĠU L 269, 21.10.2000, p. 34. Id-Direttiva kif emendata l-aħħar bid-Direttiva 2008/33/KE (ĠU L 81, 20.3.2008, p. 62).

    (2)  ĠU L 152, 15.6.2005, p. 19.

    (3)  ĠU L 114, 27.4.2006, p. 9.

    ANNESS

    “ANNESS II

    Il-materjali u l-komponenti eżenti mill-Artikolu 4(2)(a)

    Il-materjali u l-komponenti

    L-ambitu u d-data ta’ l-iskadenza ta’ l-eżenzjoni

    Li għandu jkollu tikketta jew ikun magħmul identifikabbli skond l-Artikolu 4(2)(b)(iv)

    Iċ-ċomb bħala element ta’ liga

    1.

    Azzar għall-għanijiet ta’ makkinar u azzar iggalvanizzat li fih mhux aktar minn 0,35 % ta’ ċomb bil-piż

     

     

    2(a).

    Aluminju għall-għanijiet ta’ makkinar b’kontenut ta’ ċomb ta' mhux aktar minn 2 % bil-piż

    Bħala partijiet tal-bdil għall-vetturi mqiegħda fis-suq qabel l-1 ta’ Lulju 2005

     

    2(b).

    Aluminju b’kontenut ta’ ċomb ta' mhux aktar minn 1,5 % bil-piż

    Bħala partijiet tal-bdil għall-vetturi mqiegħda fis-suq qabel l-1 ta’ Lulju 2008

     

    2(ċ).

    Aluminju b’kontenut ta’ ċomb ta' mhux aktar minn 0,4 % bil-piż

     

     

    3.

    Liga tar-ram b’kontenut ta’ ċomb ta' mhux aktar minn 4 % bil-piż

     

     

    4(a).

    Ċilindri ta’ ġewwa u ta’ barra tal-bearings

    Bħala partijiet tal-bdil għall-vetturi mqiegħda fis-suq qabel l-1 ta’ Lulju 2008

     

    4(b).

    Ċilindri ta’ ġewwa u ta’ barra tal-bearings fil-magni, trażmissjonijiet (transmissions) u kumpressuri għall-arja kkundizzjonata

    L-1 ta’ Lulju 2011 u wara dik id-data bħala partijiet tal-bdil għall-vetturi mqiegħda fis-suq qabel l-1 ta’ Lulju 2011

     

    Iċ-ċomb u l-komposti taċ-ċomb fil-komponenti

    5.

    Batteriji

     

    X

    6.

    Mezzi għat-taffija tal-vibrazzjonijiet

     

    X

    7(a).

    Aġenti għall-ivvulkanizzar u stabilizzaturi għall-elastomeri f'pajpijiet tal-brejkijiet, pajpijiet tal-fjuwil, pajpijiet tal-ventilazzjoni ta' l-ajru, partijiet ta' l-elastomeru jew tal-metall fix-xażi, u mmuntar fuq il-magna

    Bħala partijiet tal-bdil għall-vetturi mqiegħda fis-suq qabel l-1 ta’ Lulju 2005

     

    7(b).

    Aġenti għall-ivvulkanizzar u stabilizzaturi għall-elastomeri f'pajpijiet tal-brejkijiet, pajpijiet tal-fjuwil, pajpijiet tal-ventilazzjoni ta' l-ajru, partijiet ta' l-elastomeru jew tal-metall fix-xażi, u mmuntar fuq il-magna li fih mhux aktar minn 0,5 % ta' ċomb bil-piż

    Bħala partijiet tal-bdil għall-vetturi mqiegħda fis-suq qabel l-1 ta’ Lulju 2006

     

    7(ċ).

    Aġenti ta’ l-irbit għall-elastomeri f’applikazzjonijiet tal-powertrain li fihom mhux aktar minn 0,5 % ta' ċomb bil-piż

    1 ta’ Lulju 2009

     

    8(a).

    Stann fil-pjanċi taċ-ċirkwiti elettroniċi u f'applikazzjonijiet elettriċi oħrajn ħlief fuq il-ħġieġ

    Tipi ta’ vetturi approvati qabel il-31 ta’ Diċembru 2010 u partijiet tal-bdil għal dawn il-vetturi (reviżjoni fl-2009)

    X (1)

    8(b).

    Stann f’applikazzjonijiet elettriċi fuq il-ħġieġ

    Tipi ta’ vetturi approvati qabel il-31 ta’ Diċembru 2010 u partijiet tal-bdil għal dawn il-vetturi (reviżjoni fl-2009)

    X (1)

    9.

    		 Valve seats

    Bħala partijiet tal-bdil għal tipi ta’ magni żviluppati qabel l-1 ta’ Lulju 2003

     

    10.

    Komponenti elettriċi li fihom iċ-ċomb f’komposti matriċi tal-ħġieġ jew taċ-ċeramika ħlief il-ħġieġ fil-bozoz u l-glejż fuq l-ispark plugs

     

    X (2)

    (għal komponenti għajr il-piezo fil-magni)

    11.

    Inizjaturi pirotekniċi

    Tipi ta’ vetturi approvati qabel l-1 ta’ Lulju 2006 u partijiet tal-bdil għal dawn il-vetturi

     

    Il-kromju eżavalenti

    12(a).

    Kisi preventiv kontra l-korrużjoni

    Bħala partijiet tal-bdil għall-vetturi mqiegħda fis-suq qabel l-1 ta’ Lulju 2007

     

    12(b).

    Kisi preventiv kontra l-korrużjoni marbut ma' l-immuntar bolt u skorfina għall-applikazzjonijiet tax-xażi

    Bħala partijiet tal-bdil għall-vetturi mqiegħda fis-suq qabel l-1 ta’ Lulju 2008

     

    13.

    Friġġijiet ta' assorbiment fil-karavans motorizzati

     

    X

    Il-merkurju

    14(a).

    Bozoz ta’ skariku għall-applikazzjonijiet tal-fanali ta' quddiem

    Tipi ta’ vetturi approvati qabel l-1 ta’ Lulju 2012 u partijiet tal-bdil għal dawn il-vetturi

    X

    14(b).

    Tubi florexxenti użati f’pannelli tal-wiri fuq l-istrumenti

    Tipi ta’ vetturi approvati qabel l-1 ta’ Lulju 2012 u partijiet tal-bdil għal dawn il-vetturi

    X

    Il-kadmju

    15.

    Batteriji għall-vetturi elettriċi

    Il-31 ta’ Diċembru 2008 u wara dik id-data bħala partijiet tal-bdil għall-vetturi mqiegħda fis-suq qabel il-31 ta’ Diċembru 2008

     

    Noti:

    Għandu jiġi ttollerat valur massimu ta’ konċentrazzjoni ta' mhux aktar minn 0,1 % bil-piż u f’materjal omoġeneu, għaċ-ċomb, għall-kromju eżavalenti u għall-merkurju u ta' mhux aktar minn 0,01 % bil-piż f’materjal omoġeneu għall-kadmju.

    L-użu mill-ġdid ta’ partijiet ta’ vetturi li kienu diġà fis-suq fid-data ta’ l-iskadenza ta' l-eżenzjoni għandu jitħalla mingħajr limitazzjoni billi mhuwiex kopert mill-Artikolu 4(2)(a).

    Il-partijiet tal-bdil imqiegħda fis-suq wara l-1 ta’ Lulju 2003 li jintużaw għal vetturi mqiegħda fis-suq qabel l-1 ta’ Lulju 2003 għandhom jiġu eżentati mid-dispożizzjonijiet ta’ l-Artikolu 4(2)(a) (*).

    (1)  Iż-żarmar jekk, f’korrelazzjoni ma’ l-entrata 10, jinqabeż limitu medju ta’ 60 gramma għal kull vettura. Għall-applikazzjoni ta’ din il-klawżola, m’għandhomx jitqiesu mezzi elettroniċi mhux installati mill-manifattur fuq il-linja tal-produzzjoni.

    (2)  Iż-żarmar jekk, f’korrelazzjoni ma’ l-entrata 8, jinqabeż limitu medju ta’ 60 gramma għal kull vettura. Għall-applikazzjoni ta’ din il-klawżola, m’għandhomx jitqiesu mezzi elettroniċi mhux installati mill-manifattur fuq il-linja tal-produzzjoni.

    Top