18.7.2008   

MT

Il-Ġurnal Uffiċjali ta’ l-Unjoni Ewropea

L 190/35

(1)

L-Aġenzija Eżekuttiva tan-Netwerk Trans-Ewropew (minn issa ’l quddiem “l-Aġenzija”) ġiet imwaqqfa bid-Deċiżjoni tal-Kummissjoni KE/2007/60 (2) tas-26 ta’ Ottubru 2006, biex tmexxi l-azzjoni Komunitarja fil-qasam tan-netwerk tat-trasport Trans-Ewropew sal-31 ta’ Diċembru 2008 għall-implimentazzjoni tal-ħidmiet li jikkonċernaw l-għoti ta’ l-għajnuna finanzjarja Komunitarja skond ir-Regolament tal-Kunsill (KE) Nru 2236/95 tat-18 ta’ Settembru 1995 li jistabbilixxi regoli ġenerali għall-għoti ta’ għajnuna finanzjarja Komunitarja fil-qasam tan-netwerks trans-Ewropej (3). Ħafna minn dawn il-proġetti se jibqgħu għaddejjin sa ferm wara l-31 ta’ Diċembru 2008.

(2)

L-Aġenzija għandha ssir responsabbli wkoll għall-proġetti li jirċievu għajnuna finanzjarja abbażi tar-Regolament (KE) Nru 680/2007 tal-Parlament Ewropew u tal-Kunsill (4), għaliex dan ir-Regolament għadu qed jiffinanzja azzjonijiet simili għan-netwerk tat-trasport trans-Ewropew, kif ukoll skond ir-Regolament tal-Kunsill (KE) 2236/95, li l-Aġenzija diġà ġiet iddelegata għalihom.

(3)

L-Aġenzija ma għandhiex issir responsabbli għall-adozzjoni ta’ deċiżjonijiet individwali marbuta ma’ l-għoti ta’ għajnuna finanzjarja Komunitarja. Madankollu, biex l-implimentazzjoni tal-programm tkun aktar effiċjenti u effettiva, il-Kummissjoni tista’ tiddeċiedi li tiddelega lill-Aġenzija l-adozzjoni ta’ l-emendi għat-tali deċiżjonijiet.

(4)

L-Aġenzija, b’mod partikolari għandha ssir responsabbli għal attivitajiet relatati ma’ proġetti indipendentement mis-sura u l-metodu ta’ l-għajnuna finanzjarja Komunitarja kif definita fl-Artikolu 6 tar-Regolament (KE) Nru 680/2007. L-attivitajiet kollha relatati mal-programm, bħal kontroll u tfassil ta’ politika għandhom jiġu esklużi u jinżammu għand il-Kummissjoni.

(5)

L-Aġenzija b’mod partikolari għandha tkun responsabbli wkoll għal miżuri ta’ akkumpanjament biex jikkontribwixxu għall-effiċjenza u l-effettività tal-programm TEN-T, sabiex jiġi massimizzat il-Valur Miżjud Ewropew tiegħu, inkluż il-promozzjoni tal-programm TEN-T lill-partijiet kollha kkonċernati u t-titjib fil-viżibbiltà tiegħu fl-Istati Membri u l-pajjiżi terzi li jmissu magħhom. Tali miżuri jistgħu jinkludu kampanji mmirati għat-trawwim ta’ l-għarfien u għall-promozzjoni, inkluż l-organizzazzjoni ta’ ġranet ta’ TEN-T, workshops u konferenzi, tħabbir u tixrid ta’ riżultati u ta’ l-aħjar prassi permezz ta’ pubblikazzjonijiet adegwati, inkluż l-użu tal-midja elettronika, per eżempju permezz ta’ tħejjija ta’ stqarrijiet għall-istampa, gwida għal applikanti potenzjali, fuljetti dwar stejjer ta’ suċċess u rapporti annwali, u l-organizzazzjoni tal-parteċipazzjoni tar-rappreżentanti ta’ l-aġenzija u/jew tal-Kummissjoni f’avvenimenti rilevanti, bħat-tnedija ta’ l-infrastruttura tat-trasport.

(6)

Twettqet analiżi aġġornata minn konsulenti esterni ta’ l-ispejjeż mal-benefiċċji li turi li r-riżorsi amministrattivi ta’ l-Aġenzija eżistenti, u b’mod partikolari il-persunal, jirrikjedu żieda sinifikanti. L-Aġenzija tibqa’ tkun l-aktar għażla ekonomika.

(7)

Id-Deċiżjoni 2007/60/KE għandha għalhekk tiġi emendata skond dan.

(8)

Id-dispożizzjonijiet stabbiliti f’din id-Deċiżjoni huma konformi ma’ l-opinjoni tal-Kumitat Regolatorju għall-Aġenziji Eżekuttivi,

(1)

L-Artikolu 3 jinbidel b’dan li ġej:

“L-Artkolu 3

Tul ta’ l-iskema

L-Aġenzija għandha tiġi mwaqqfa għal perjodu li jibda fl-1 ta’ Novembru 2006 u jintemm fil-31 ta’ Diċembru 2015.”.

(2)

Fl-Artikolu 4, il-paragrafu 1 jinbidel b’dan li ġej:

“1.   L-Aġenzija għandha tkun responsabbli, fl-ambitu ta’ l-azzjoni Komunitarja fil-qasam tan-netwerk tat-trasport trans-Ewropew, għall-implimentazzjoni tal-ħidmiet li jikkonċernaw l-għoti ta’ għajnuna finanzjarja Komunitarja skond ir-Regolament tal-Kunsill (KE) Nru 2236/95 (*) u r-Regolament (KE) Nru 680/2007 tal-Parlament Ewropew u tal-Kunsill (**), minbarra l-ħidmiet li jirrikjedu setgħat ta’ diskrezzjoni fil-bdil ta’ għażliet ta’ politika f’azzjoni, bħall-ipprogrammar, l-istabbiliment ta’ prijoritajiet, l-għażla ta’ proġetti skond l-Artikolu 5 tar-Regolament (KE) Nru 680/2007, il-valutazzjoni tal-programm u s-sorveljanza ġuridika. L-Aġenzija għandha tkun responsabbli b’mod partikolari għal dan li ġej:

(*)  ĠU L 228, 23.9.1995, p. 1. Ir-Regolament kif emendat l-aħħar bir-Regolament (KE) Nru 1159/2005 tal-Parlament Ewropew u tal-Kunsill (ĠU L 191, 22.7.2005, p. 16)."

(**)  ĠU L 162, 22.6.2007, p. 1.”"