27.6.2008

MT

Il-Ġurnal Uffiċjali ta’ l-Unjoni Ewropea

L 167/135

---

DEĊIŻJONI TAL-KUMMISSJONI

tal-5 ta' Marzu 2008

li tistabbilixxi r-regoli għall-implimentazzjoni tad-Deċiżjoni Nru 575/2007/KE tal-Parlament Ewropew u tal-Kunsill li jistabbilixxi l-Fond Ewropew għar-Ritorn għall-perjodu 2008 sa 2013 bħala parti mill-programm Ġenerali “Solidarjetà u Ġestjoni tal-Flussi ta' Migrazzjoni” fir-rigward tas-sistemi ta' ġestjoni u ta' kontroll ta' l-Istati Membri, ir-regoli għall-ġestjoni amministrattiva u finanzjarja u l-eliġibilità ta' nefqiet fuq proġetti kofinanzjati mill-Fondi

(notifikata skond id-dokument numru C(2008) 796)

(Huma awtentiċi biss it-testijiet bil-Bulgaru, iċ-Ċek, l-Olandiż, l-Ingliż, l-Estonjan, il-Finlandiż, il-Franċiż, il-Ġermaniż, il-Grieg, l-Ungeriż, it-Taljan, il-Latvjan, il-Litwan, il-Malti, il-Pollakk, il-Portugiż, ir-Rumen, is-Slovakk, is-Sloven, l-Ispanjol, u l-Iżvediż)

(2008/458/KE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat id-Deċiżjoni Nru 575/2007/KE tal-Parlament Ewropew u tal-Kunsill li tistabbilixxi l-Fond Ewropew għar-Ritorn għall-perjodu 2008 sa 2013 bħala parti mill-Programm Ġenerali “Solidarjetà u Ġestjoni tal-flussi Migratorji” (1), u partikolarment l-Artikoli 23, 31(5), 33(6) u 35(4) tiegħu,

Billi:

(1)

Huwa meħtieġ li jiġu stabbiliti l-kundizzjonijiet li b'konformità magħhom l-Istati Membri għandhom jimplimentaw l-azzjoni taħt il-Fond, partikolarment biex jidentifikaw taħt liema ċirkostanzi l-awtorità responsabbli tista' timplimenta proġetti b'mod dirett. Barra minn hekk għandhom jiġu stabbiliti dispożizzjonijiet ulterjuri għall-awtoritajiet iddelegati.

(2)	Huwa meħtieġ li tiġi identifikata lista ta' proċeduri u/jew arranġamenti prattiċi li l-awtoritajiet magħżula differenti għandhom jistabbilixxu u jsegwu għall-implimentazzjoni tal-Fond.

(3)

Huwa meħtieġ li jiġu stabbiliti l-obbligi li l-awtoritajiet responsabbli għandu jkollhom fir-rigward tal-benefiċjarji finali fil-fażi li twassal għall-għażla u l-approvazzjoni tal-proġetti li ser jiġu ffinanzjati u fir-rigward ta' l-apsetti li għandhom ikunu koperti mill-verifiki tan-nefqa ddikjarati mill-benefiċarju finali u/jew mill-imsieħba fil-proġett, inklużi l-verifiki amministrattivi ta' l-applikazzjonijiet għar-rimbors u l-verifiki fuq il-post tal-proġetti individwali.

(4)	Sabiex jiġi żgurat li n-nefqa taħt il-programmi annwali tista' tiġi verifikata sew, jeħtieġ li jiġu stipulati l-kriterji li magħhom għandu jikkonforma r-rekord sekwenzjali tal-verifika sabiex ikun meqjus xieraq.

(5)

Il-verifiki tal-proġetti u tas-sistemi jitwettqu taħt ir-responsabbiltà ta' awtorità ta' verifika. Biex jiġi żgurat li l-iskop u l-effettività tal-verifiki jkunu xierqa u li jsir skond l-istess standards fl-Istati Membri kollha, jeħtieġ li jiġu stipulati l-kundizzjonijiet li għandu tissodisfa dik il-verifika, inkluż il-bażi ta' teħid ta' kampjuni.

(6)

Minbarra l-programmi multiannwali tagħhom, l-Istati Membri għandhom iressqu deskrizzjoni dwar is-sistemi ta' ġestjoni u kontroll tagħhom lill-Kummissjoni. Billi dan id-dokument huwa fost il-bażi prinċipali li fuqhom isserraħ il-Kummissjoni, fil-kuntest ta' ġestjoni maqsuma tal-baġit Komunitarju, biex tiddeċiedi dwar jekk l-assistenza finanzjarja kkonċernata tintużax mill-Istati Membri skond ir-regoli applikabbli u l-prinċipji li jħarsu l-interessi finanzjarji tal-Komunità, jeħtieġ li l-informazzjoni inkluża f'dan id-dokumenti tiġi stipulata bir-reqqa.

(7)

Sabiex jiġu armonizzati l-istandards ta' l-ipprogrammar, wara l-implimentazzjoni tal-Fond, il-verifika u ċ-ċertifikazzjoni tan-nefqa, huwa meħtieġ li l-kontenuti tal-programmi multiannwali, tal-programm annwali, tar-rapport dwar il-progress, tar-rapport finali, ta' l-applikazzjonijiet għall-pagamenti kif ukoll ta' l-istrateġija tal-verifika, tar-rapport annwali tal-verifika, tad-dikjarazzjoni tal-validità u ċ-ċertifikazzjoni tan-nefqa jiġu definiti bir-reqqa.

(8)	Billi l-Istati Membri huma meħtieġa jirrapportaw u jissorveljaw l-irregolarotajiet u li jirkupraw ammonti mħallsa bi żball b'rabta ma' l-iffinanzjar mill-Fond, huwa meħtieġ li jiġu definiti rekwiżiti dwar id-data mibgħuta lill-Kummissjoni.

(9)

L-esperjenza ta' l-imgħoddi wriet li ċ-ċittadini ta' l-Unjoni Ewropea mhumiex biżżejjed konxji mir-rwol li għandha l-Komunità fi programmi ta' finanzjament. Għalhekk huwa xieraq li l-informazzjoni u l-miżuri ta' reklamar meħtieġa sabiex jitranġa dan in-nuqqas fil-komunikazzjoni u informazzjoni jiġu definiti bir-reqqa.

(10)

Sabiex jiġi garantit li l-informazzjoni dwar opportunitajiet possibbli ta' finanzjament tinfirex b'mod wiesa’ lill-partijiet interessati kollha u għal raġunijiet ta' trasparenza, għandhom jiġu stipulati l-miżuri minimi meħtieġa sabiex il-benefiċjarji finali potenzjali jiġu informati dwar l-opportunitajiet ta' fondi mogħtija b'mod konġunt mill-Komunità u l-Istati Membri permezz tal-Fond. Sabiex tittejjeb it-trasparenza dwar l-użu tal-Fond, il-lista ta' benefiċjarji finali, l-ismijiet tal-proġetti u l-ammont ta' fondi pubbliċi allokati lill-proġetti għandhom jiġu ppubblikati.

(11)

Fid-dawl tad-Direttiva 95/46/KE tal-Parlament Ewropew u tal-Kunsill ta' l-24 ta' Ottubru 1995 dwar il-protezzjoni ta' individwi fir-rigward ta' l-ipproċessar ta' data personali u dwar il-moviment liberu ta' dik id-data  (2) u Regolament (KE) Nru 45/2001 tal-Parlament Ewropew u tal-Kunsill tat-18 ta' Diċembru 2000 dwar il-protezzjoni ta' individwu fir-rigward ta' l-ipproċessar ta' data personali mill-istituzzjonijiet u l-korpi tal-Komunità u dwar il-moviment liberu ta' dik id-data  (3), jeħtieġ li jkun hemm provdut, fir-rigward tal-miżuri dwar l-informazzjoni u l-pubbliċità u l-ħidma ta' verifika skond din id-Deċiżjoni, li l-Kummissjoni u l-Istati Membri għandhom jipprevjenu milli tinkixef b'mod mhux awtorizzat jew ikun hemm aċċess għad-data personali, u biex jiġi speċifikat l-għan li għalih il-Kummissjoni u l-Istati Membri jistgħu jipproċessaw dik id-data.

(12)

L-użu ta' mezzi elettroniċi għall-iskambju ta' informazzjoni u data finanzjarja bejn l-Istati Membri u l-Kummissjoni twassal għal simplifikazzjoni, aktar effiċjenza, trasparenza u anqas ħela ta' ħin. Sabiex jinkiseb l-aħjar benefiċċju minn dawn il-vantaġġi filwaqt li tinżamm is-sigurtà fl-iskambji, il-Kummissjoni tista' tistabbilixxi sistema kompjuterizzata komuni.

(13)

Biex tiġi żgurata l-implimentazzjoni effiċjenti tal-Fond fl-Istati Membri, f'konformità mal-prinċipji ta' ġestjoni finanzjarja soda, għandhom ikunu adottati sensiela ta' regoli komuni dwar l-eliġibilità tan-nefqa mill-Fond. Sabiex jitnaqqas il-piż amministrattiv fuq il-benefiċjarji finali u l-awtoritajiet magħżula, rati fissi għal spejjeż indiretti għandhom ikunu eliġibbli taħt ċerti kundizzjonijiet.

(14)	Skond l-Artikolu 3 tal-Protokoll dwar il-pożizzjoni tar-Renju Unit u l-Irlanda, anness mat-Trattat dwar l-Unjoni Ewropea u mat-Trattat li jistabbilixxi l-Komunità Ewropea, ir-Renju Unit hu marbut bl-att bażiku u, b'konsegwenza, ta'din id-Deċiżjoni.

(15)	Skond l-Artikolu 3 tal-Protokoll dwar il-pożizzjoni tar-Renju Unit u l-Irlanda, anness mat-Trattat dwar l-Unjoni Ewropea u mat-Trattat li jistabilixxi il-Komunità Ewropea, L-Irlanda hi marbuta bl-att bażiku u, b'konsegwenza, ta'din id-Deċiżjoni.

(16)	Skond l-Artikolu 2 tal-Protokoll dwar il-pożizzjoni tad-Danimarka, anness mat-Trattat dwar l-Unjoni Ewropea u mat-Trattat li jistabbilixxi l-Komunità Ewropea, id-Danimarka mhijiex marbuta b'din id-Deċiżjoni jew soġġetta għall-applikazzjoni tagħha.

(17)	Il-miżuri pprovduti f'din id-Deċiżjoni jikkonformaw ma' l-opinjoni tal-Kumitat għall-Ġestjoni tal-Fond,

ADOTTAT DIN ID-DEĊIŻJONI:

WERREJ

Parti I

Daħla

139

Kapitolu I

Suġġett u definizzjonijiet

139

Artikolu 1

Is-suġġett

139

Article 2

Id-definizzjonijiet

139

Parti II

Dispożizzjonijiet komuni għall-erba’ fondi

140

Kapitolu 1

L-awtoritajiet maħtura

140

Artikolu 3

L-awtoritajiet komuni

140

Artikolu 4

L-awtorità delegata

140

Artikolu 5

L-esternalizzazzjoni (outsourcing) tal-kompiti

140

Kapitolu 2

Is-sistemi ta' ġestjoni u ta' kontroll

140

Artikolu 6

Il-manwal tal-proċeduri

140

Artikolu 7

L-implimentazzjoni tal-Fond mill-awtorità responsabbli

141

Artikolu 8

Il-kundizzjonijiet li fihom l-awtorità responsabbli tagħmilha ta' l-entità li teżegwixxi

141

Artikolu 9

Il-proċedura ta' l-għażla u ta' l-għotja meta l-awtorità responsabbli tagħmilha ta' l-entità li tagħmel l-għotjiet

141

Artikolu 10

Ftehimiet ta' għotja mal-benefiċjarji finali fejn l-awtorità responsabbli tagħmilha ta' l-entità li tagħmel l-għotjiet

142

Artikolu 11

Il-kuntratti ta' implimentazzjoni

143

Artikolu 12

Id-determinazzjoni tal-kontribuzzjoni Komunitarja finali

143

Artikolu 13

L-assistenza teknika

143

Artikolu 14

In-nefqa ta' l-assistenza teknika fil-każ ta' awtorità komuni

143

Artikolu 15

Il-verifiki mill-awtorità responsabbli

143

Artikolu 16

Ir-rekord ta' verifika

144

Artikolu 17

Il-verifiki tas-sistemi u l-verifiki tal-proġetti

144

Artikolu 18

Il-verifiki mill-awtorità ta' ċertifikazzjoni

145

Kapitolu 3

L-informazzjoni li għandha tkun ipprovduta dwar l-użu tal-Fond

145

Artikolu 19

Il-prinċipju ta' proporzjonalità

145

Artikolu 20

Id-deskrizzjoni tas-sistemi ta' ġestjoni u ta' kontroll

145

Artikolu 21

Ir-reviżjoni tad-deskrizzjoni tas-sistemi ta' ġestjoni u ta' kontroll

145

Artikolu 22

Id-dokumenti ta' programmazzjoni

146

Artikolu 23

Ir-reviżjoni tat-tqassim finanzjarju fi programmi annwali

146

Artikolu 24

Ir-rapporti ta' progress u r-rapporti finali dwar l-implimentazzjoni tal-programmi annwali

146

Artikolu 25

Id-dokumenti stabbiliti mill-awtorità ta' verifika

146

Artikolu 26

Id-dokumenti stabbiliti mill-awtorità ta' ċertifikazzjoni

146

Kapitolu 4

Ir-rapportaġġ ta' l-irregolaritajiet

147

Artikolu 27

Ir-rapportaġġ inizjali – Id-derogi

147

Artikolu 28

Ir-rapportaġġ ta' l-azzjoni ta' segwitu – In-nuqqas ta' rkupru

147

Artikolu 29

Il-kuntatti ma' l-Istati Membri

148

Artikolu 30

L-użu ta' l-informazzjoni

148

Kapitolu 5

L-informazzjoni u l-pubbliċità

148

Artikolu 31

L-informazzjoni għall-benefiċjarji finali potenzjali

148

Artikolu 32

L-informazzjoni għall-benefiċjarji finali

148

Artikolu 33

Ir-responsabbiltajiet ta' l-awtorità responsabbli fir-rigward ta' l-informazzjoni u l-pubbliċità għall-pubbliku ġenerali

148

Artikolu 34

Ir-responsabbiltajiet tal-benefiċjarji finali fir-rigward ta' l-informazzjoni u l-pubbliċità għall-pubbliku ġenerali

149

Artikolu 35

Karatteristiċi tekniċi ta' l-informazzjoni u l-pubbliċità għall-operazzjoni

149

Kapitolu 6

Id-data personali

149

Artikolu 36

Il-protezzjoni tad-data personali

149

Kapitolu 7

L-iskambju elettroniku tad-dokumenti

149

Artikolu 37

L-iskambju elettroniku tad-dokumenti

149

Artikolu 38

Is-sistema kompjuterizzata għall-iskambju tad-dokumenti

149

Parti III

Dispożizzjonijiet speċifiċi għall-fond ewropew għar-ritorn

150

Kapitolu 1

Ir-regoli ta' eliġibbiltà

150

Artikolu 39

Ir-regoli ta' eliġibbiltà

150

Parti IV

Dispożizzjonijiet finali

150

Artikolu 40

Destinatarji

150

ANNESSI

151

PARTI I

DAĦLA

KAPITOLU I

Suġġett u definizzjonijiet

L-Artikolu 1

Is-suġġett

1.   Din id-Deċiżjoni tistabbilixxi regoli għall-implimentazzjoni tal-Fond fir-rigward ta':

(a)	l-awtoritajiet maħtura;

(b)	is-sistemi ta' ġestjoni u ta' kontroll;

(ċ)	l-informazzjoni li għandha tkun ipprovduta lill-Kummissjoni mill-Istati Membri dwar l-użu tal-Fond;

(d)	ir-rapportaġġ ta' l-irregolaritajiet;

(e)	l-informazzjoni u l-pubbliċità;

(f)	id-data personali;

(g)	l-iskambju elettroniku tad-dokumenti.

2.   Id-dispożizzjonijiet stabbiliti hawn taħt għandhom japplikaw bla ħsara għar-Regolament tal-Kunsill (Euratom, KE) Nru 2185/96 tal-11 ta' Novembru 1996 dwar il-verifiki u l-ispezzjonijiet fuq il-post imwettqa mill-Kummissjoni sabiex tipproteġi l-interessi finanzjarji tal-Komunità Ewropea kontra l-frodi u irregolarijiet oħra (4).

L-Artikolu 2

Id-definizzjonijiet

Għall-finijiet ta' din id-Deċiżjoni, għandhom japplikaw id-definizzjonijiet li ġejjin:

—	“att bażiku”: Deċiżjoni Nru 575/2007/KE;

—	“Fond”: il-Fond Ewropew għar-Ritorn, kif ġie stabbilit skond l-att bażiku;

—

“erba' Fondi”: il-Fond Ewropew għar-Refuġjati, il-Fond għall-Fruntieri Esterni, il-Fond Ewropew għar-Ritorn u l-Fond Ewropew għall-Integrazzjoni taċ-ċittadini ta' pajjiżi terzi, kif ġie stabbilit mid-Deċiżjoni Nru 573/2007/KE (5), mid-Deċiżjoni Nru 574/2007/KE (6), mid-Deċiżjoni Nru 575/2007/KE u mid-Deċiżjoni Nru 2007/435/KE (7) bħala parti mill-Programm Ġenerali “Solidarjetà u Ġestjoni tal-Flussi Migratorji”;

—	“awtorità responsabbli”: l-entità maħtura minn Stat Membru skond l-Artikolu 25(1)(a) ta' l-att bażiku;

—	“awtorità ta' ċertifikazzjoni”: l-entità maħtura minn Stat Membru skond l-Artikolu 25(1)(b) ta' l-att bażiku;

—	“awtorità ta' verifika”: l-entità maħtura minn Stat Membru skond l-Artikolu 25(1)(ċ) ta' l-att bażiku;

—	“awtorità delegata”: l-entità maħtura minn Stat Membru skond l-Artikolu 25(1)(d) ta' l-att bażiku;

—	“awtoritajiet maħtura”: l-awtoritajiet kollha maħtura minn Stat Membru skond l-Artikolu 25 ta' l-att bażiku;

—	“azzjoni”: l-azzjoni taħt il-Fond, kif definita fl-Artikolu 4 ta' l-att bażiku;

—	“proġett”: il-mezz speċifiku u prattiku użat biex il-benefiċjarji finali ta' l-għotjiet jimplimentaw azzjoni b'mod sħiħ jew parzjali;

—

“benefiċjarju finali”: l-entità legali responsabbli għall-implimentazzjoni ta' proġetti bħalma huma l-organizzazzjonijiet mhux governattivi (NGOs), l-awtoritajiet federali, nazzjonali, reġjonali jew lokali, organizzazzjonijiet oħra li ma jagħmlux qligħ, kumpaniji tal-liġi pubblika jew privata jew organizzazzjonijiet internazzjonali;

—	“imsieħeb fil-proġett”: kwalunkwe entità legali li timplimenta proġett f'kooperazzjoni ma' benefiċjarju finali billi tipprovdi riżorsi għall-proġett u billi tirċievi parti mill-kontribuzzjoni Komunitarja permezz tal-benefiċjarju finali;

—	“linji ta' gwida strateġiċi”: il-qafas għal intervent mill-Fond, kif adottati mid-Deċiżjoni tal-Kummissjoni Nru 2007/837/KE (8);

—	“prijorità”: ġabra ta' azzjonijiet iddefiniti bħala prijorità fil-linji ta' gwida strateġiċi;

—	“prijorità speċifika”: ġabra ta' azzjonijiet iddefiniti bħala prijorità speċifika fil-linji ta' gwida strateġiċi, li jippermettu kofinanzjament b'rata ogħla, skond l-Artikolu 15(4) ta' l-att bażiku;

—

“sejba primarja amministrattiva jew ġudizzjarja”: l-ewwel valutazzjoni bil-miktub minn awtorità kompetenti, jew amministrattiva jew ġudizzjarja, li tikkonkludi abbażi ta' fatti speċifiċi li saret irregolarità, mingħajr preġudizzju għall-possibbiltà li din il-konklużjoni sussegwentement jista' jkollha tiġi riveduta jew irtirata minħabba l-iżviluppi waqt il-proċedura amministrattiva jew ġudizzjarja;

—

“irregolarità”: kwalunkwe ksur ta' dispożizzjoni tal-liġi Komunitarja li jirriżulta minn att jew omissjoni min-naħa ta' operatur ekonomiku li għandu, jew għandu jkollu, l-effett li jippreġudika l-baġit ġenerali ta' l-Unjoni Ewropea billi jitlob ħlas għal element ta' nefqa mhux iġġustifikat mill-baġit ġenerali;

—

“frodi suspettat”: irregolarità li tagħti lok biex jingħata bidu għal proċeduri amministrattivi jew ġudizzjarji fuq livell nazzjonali sabiex jiġi stabbilit li teżisti mġiba intenzjonata, partikolarment frodi, kif imsemmi fil-punt (a) ta' l-Artikolu 1(1) tal-Konvenzjoni mfassla abbażi ta' l-Artikolu K.3 tat-Trattat dwar l-Unjoni Ewropea, dwar il-protezzjoni ta' l-interessi finanzjarji tal-Komunitajiet Ewropej (9);

—	“falliment”: proċeduri ta' insolvenza, kif iddefiniti fl-Artikolu 2(a), tar-Regolament tal-Kunsill (KE) Nru 1346/2000 (10);

—	“ftehim ta' għotja”: ftehim jew forma ekwivalenti ta' strument legali li fuq il-bażi tiegħu l-Istati Membri jipprovdu għotjiet lill-benefiċjarji finali sabiex jimplimentaw il-proġett taħt il-Fond.

PARTI II

DISPOŻIZZJONIJIET KOMUNI GĦALL-ERBA’ FONDI

KAPITOLU 1

L-awtoritajiet maħtura

L-Artikolu 3

L-awtoritajiet komuni

L-Istati Membri jistgħu jaħtru l-istess awtorità responsabbli, awtorità ta' verifika jew awtorità ta' ċertifikazzjoni għal tnejn jew aktar mill-erba' Fondi.

L-Artikolu 4

L-awtorità delegata

1.   Kwalunkwe delegazzjoni tal-kompiti għandha tkun konformi mal-prinċipju ta' ġestjoni finanzjarja soda, li teħtieġ kontroll intern effettiv u effiċjenti, u għandha tiżgura konformità mal-prinċipju ta' nondiskriminazzjoni u l-viżibbiltà tal-finanzjament Komunitarju. In-nuqqas ta' implimentazzjoni tal-kompiti delegati jista' jagħti lok għal kunflitti ta' interess.

2.   L-ambitu tal-kompiti delegati mill-awtorità responsabbli lill-awtorità delegata u l-proċeduri ddettaljati għall-implimentazzjoni tal-kompiti delegati għandhom jiġu reġistrati formalment bil-miktub.

L-att ta' delegazzjoni għandu jsemmi għallinqas:

(a)	ir-referenzi tal-leġiżlazzjoni rilevanti tal-Komunità;

(b)	il-kompitu fdat lill-awtorità delegata;

(ċ)	id-drittijiet u d-dmirijiet ta' l-awtorità delegata u r-responsabbiltajiet li tassumi;

(d)	l-obbligu ta' l-awtorità delegata li tistabbilixxi u żżomm struttura organizzattiva u sistema ta' ġestjoni u ta' kontroll adattata għat-twettiq tal-kompiti tagħha;

(e)	l-assikurazzjoni li għandha tiġi provduta fir-rigward ta' ġestjoni finanzjarja soda u l-legalità u r-regolarità tal-kompiti delegati.

3.   L-immaniġġjar tal-komunikazzjoni mal-Kummissjoni msemmija fl-Artikolu 25(1)(a) ta' l-att bażiku m'għandux jiġi delegat. L-awtorità delegata għandha tikkomunika mal-Kummissjoni permezz ta' l-awtorità responsabbli.

4.   Jekk l-awtorità delegata mhijiex amministrazzjoni pubblika jew entità regolata mil-liġi privata ta' l-Istat Membru li għandha missjoni ta' servizz pubbliku, l-awtorità responsabbli ma tista' tiddelega lil dik l-awtorità l-ebda poter eżekuttiv li jinvolvi għadd kbir ta' diskrezzjoni li timplika għażliet politiċi.

5.   Id-delegazzjoni tal-kompiti lill-awtoritajiet delegati m'għandhiex taffettwa r-responsabbiltà ta' l-awtorità responsabbli, li għandha tibqa’ hija li twieġeb għall-kompiti li tkun iddelegat.

6.   Fejn l-awtorità responsabbli tkun iddelegat kompiti lill-awtorità delegata, għall-awtorità delegata għandhom japplikaw mutatis mutandis id-dispożizzjonijiet kollha ta' din id-Deċiżjoni relatati ma' l-awtorità responsabbli.

L-Artikolu 5

L-esternalizzazzjoni (outsourcing) tal-kompiti

L-awtoritajiet maħtura jistgħu jesternalizzaw (outsource) xi wħud mill-kompiti tagħhom imma għandhom jibqgħu huma li jwieġbu għall-kompiti esternalizzati skond ir-responsabbiltajiet iddefiniti fl-Artikoli 27, 29 u 30 ta' l-att bażiku.

KAPITOLU 2

Is-sistemi ta' ġestjoni u ta' kontroll

L-Artikolu 6

Il-manwal tal-proċeduri

Skond l-Artikolu 31(2) ta' l-att bażiku u meta jitqies il-prinċipju ta' proporzjonalità, l-Istati Membri għandhom jistabbilixxu manwal li jiddeskrivi proċeduri u arranġamenti prattiċi rigward:

(a)	il-funzjonament ta' l-awtoritajiet maħtura;

(b)	l-arranġamenti li jiżguraw is-separazzjoni xierqa tal-funzjonijiet;

(ċ)	fejn ikun xieraq, il-monitoraġġ ta' l-awtoritajiet delegati u ta' kompiti esternalizzati oħra;

(d)	l-istabbiliment ta' programmi multiannwali u annwali;

(e)	l-istabbiliment ta' strateġija ta' verifika u ta' pjanijiet ta' verifika annwali;

(f)	l-għażla tal-proġetti, l-għoti ta' l-għotjiet u l-monitoraġġ u l-ġestjoni finanzjarja tal-proġetti;

(g)	il-ġestjoni ta' l-irregolaritajiet, il-korrezzjonijiet finanzjarji u l-irkupri;

(h)	it-tħejjija u l-implimentazzjoni tal-missjonijiet ta' verifika;

(i)	it-tħejjija tar-rapporti u tad-dikjarazzjonijiet ta' verifika;

(j)	iċ-ċertifikazzjoni tan-nefqa;

(k)	l-evalwazzjoni tal-programm;

(l)	ir-rapportaġġ lill-Kummissjoni;

(m)	ir-rekord ta' verifika.

L-Artikolu 7

L-implimentazzjoni tal-Fond mill-awtorità responsabbli

1.   Għall-implimentazzjoni tal-Fond, l-awtorità responsabbli tista' tagħmilha ta' entità li tagħmel l-għotjiet u/jew ta' entità li teżegwixxi.

2.   L-awtorità responsabbli tagħmilha ta' entità li tagħmel l-għotjiet f'każijiet fejn timplimenta l-proġetti, bħala regola ġenerali, abbażi ta' sejħiet miftuħa annwali għal proposti.

La l-awtorità responsabbli u lanqas kwalunkwe awtorità delegata oħra ma jistgħu japplikaw b'reazzjoni għal dawn is-sejħiet għal proposti.

F'każijiet debitament iġġustifikati, inkluża t-tkomplija ta' proġetti multiannwali skond l-Artikolu 15(6) ta' l-att bażiku li ġew magħżula wara sejħa għal proposti preċedenti jew f'sitwazzjonijiet ta' emerġenza, l-għotjiet jistgħu jingħataw mingħajr sejħa għall-proposti.

3.   L-awtorità responsabbli tagħmilha ta' entità li teżegwixxi f'każijiet fejn tiddeċiedi li timplimenta l-proġetti direttament minħabba li l-karatteristiċi tal-proġetti ma jħallu l-ebda għażla oħra għall-implimentazzjoni, bħalma huma sitwazzjonijiet ta' monopolju de jure jew minħabba raġunijiet ta' sigurtà. F'dawn il-każijiet, għall-awtorità responsabbli għandhom japplikaw mutatis mutandis ir-regoli li jikkonċernaw lill-benefiċjarju finali.

L-Artikolu 8

Il-kundizzjonijiet li fihom l-awtorità responsabbli tagħmilha ta' l-entità li teżegwixxi

1.   Ir-raġunijiet li wasslu lill-awtorità responsabbli biex tagħmilha ta' entità li teżegwixxi għall-implimentazzjoni tal-proġetti għandhom jiġu identifikati u komunikati lill-Kummissjoni fil-qafas tal-programm annwali konċernat.

2.   Waqt l-implimentazzjoni tal-proġetti, l-awtorità responsabbli għandha tiżgura l-prinċipju tal-valur għall-flus u tipprevjeni l-kunflitti ta' interess.

3.   L-awtorità responsabbli tista' timplimenta l-proġetti identifikati skond l-Artikolu 7(3) direttament u/jew flimkien ma' kwalunkwe awtorità nazzjonali kompetenti minħabba l-kompetenza teknika tagħha, il-livell għoli ta' speċjalizzazzjoni tagħha jew il-poteri amministrattivi tagħha. L-awtoritajiet nazzjonali ewlenin involuti fl-implimentazzjoni għandhom jiġu identifikati wkoll fil-programm annwali konċernat.

4.   Id-deċiżjoni amministrattiva li tikkofinanzja proġett taħt il-Fond għandha tinkludi l-informazzjoni meħtieġa sabiex jiġu monitorjati l-prodotti u s-servizzi kofinanzjati u sabiex tiġi kontrollata n-nefqa li tkun saret. Id-dispożizzjonijiet rilevanti kollha li ġew stabbiliti għal ftehim ta' għotja fl-Artikolu 10(2) għandhom jiġu speċifikati f'forma ekwivalenti ta' strument legali.

5.   Ir-rapport finali dwar l-implimentazzjoni tal-programm annwali għandu jinkludi informazzjoni dwar il-proċeduri u l-prattiki applikati sabiex tiġi żgurata separazzjoni adegwata tal-funzjonijiet, kontroll effettiv u protezzjoni sodisfaċenti ta' l-interessi finanzjarji tal-Komunitajiet Ewropej u għandu jipprovdi spjegazzjonijiet dwar kif ġew evitati l-kunflitti ta' interess.

6.   Meta jkun mistenni li l-awtorità responsabbli tkun entità li teżegwixxi fuq bażi regolari għal proġetti kofinanzjati mill-Fond:

(a)	l-awtorità ta' verifika m'għandhiex tkun parti mill-istess entità bħall-awtorità responsabbli, għajr meta l-indipendenza fil-verifika tagħha tkun iggarantita u hija tirrapporta wkoll lil entità oħra barra mill-entità li hija u l-awtorità responsabbli jiffurmaw parti minnha;

(b)	il-kompiti ta' l-awtorità responsabbli, kif iddefiniti fl-Artikolu 27 ta' l-att bażiku, m'għandhomx jiġu affettwati meta l-awtorità responsabbli timplimenta wkoll proġetti direttament.

7.   Meta jkun mistenni li awtorità delegata tkun entità li teżegwixxi għal proġetti kofinanzjati mill-Fond, din l-awtorità delegata ma tistax tkun l-unika benefiċjarja finali ta' l-approprjazzjonijiet li ġiet iddelegata biex tiġġestixxi.

L-Artikolu 9

Il-proċedura ta' l-għażla u ta' l-għotja meta l-awtorità responsabbli tagħmilha ta' l-entità li tagħmel l-għotjiet

1.   Is-sejħiet għall-proposti definiti fl-Artikolu 7(2) għandhom jiġu pubblikati b'mod li jiżgura pubbliċità massima fost il-benefiċjarji potenzali. Kwalunkwe bidla fil-kontenut tas-sejħiet għall-proposti għandha tiġi pubblikata fl-istess kundizzjonijiet.

Is-sejħiet għall-proposti għandhom jispeċifikaw:

(a)	l-għanijiet;

(b)	il-kriterji ta' għażla, li għandhom ikunu konformi ma' l-Artikolu 15(5) ta' l-att bażiku, u d-dokumenti ta' sostenn rilevanti;

(ċ)	l-arranġamenti għal finanzjament Komunitarju, u jekk ikun applikabbli, għal finanzjament nazzjonali;

(d)	l-arranġamenti u d-data finali biex jitressqu l-proposti.

2.   Għall-finijiet ta' l-għażla tal-proġetti u ta' l-għoti ta' l-għotjiet, l-awtorità responsabbli għandha tiżgura li l-benefiċjarji potenzjali jiġu informati bil-kundizzjonijiet speċifiċi li ġejjin fir-rigward tal-proġetti li għandhom jiġu implimentati:

(a)	ir-regoli ta' eliġibbiltà għan-nefqa;

(b)	il-limitu ta' żmien għall-implimentazzjoni; u

(ċ)	l-informazzjoni finanzjarja u informazzjoni oħra li trid tinżamm u tiġi komunikata.

Qabel ma tittieħed id-deċiżjoni ta' l-għotja, l-awtorità responsabbli għandha tissodisfa ruħha li l-benefiċjarju finali u/jew l-imsieħba fil-proġett għandhom il-kapaċità li jissodisfaw dawn il-kundizzjonijiet.

3.   L-awtorità responsabbli għandha tiżgura li l-proġetti li ngħataw għotjiet ikunu ġew suġġetti għal analiżi formali, teknika u baġitarja u għal valutazzjoni kwalitattiva li tapplika l-kriterji stabbiliti fis-sejħa għall-proposti. Ir-raġunijiet għar-rifjut tal-proġetti l-oħra għandhom jiġu reġistrati.

4   L-Istati Membri għandhom jiddeterminaw min għandu jkollu l-poter li jagħti l-proġetti u għandhom jiżguraw li l-kunflitti ta' interess jiġu evitati fil-każijiet kollha u, partikolarment, meta l-applikanti jkunu entitajiet nazzjonali.

5.   Id-deċiżjoni ta' l-għotja għandha tindika, għallinqas, l-isem tal-benefiċjarju finali u/jew ta' l-imsieħba fil-proġett, id-dettalji essenzjali tal-proġett u l-għanijiet operattivi tiegħu, l-ammont massimu ta' kofinanzjament mill-Fond u r-rata massima ta' kofinanzjament ta' l-ispejjeż eliġibbli totali.

6.   Lil kull applikant għandha tintbagħatlu informazzjoni bil-miktub dwar ir-riżultati tal-proċess ta' l-għażla li tinkludi spjegazzjoni tad-deċiżjonijiet ta' l-għażla. Jekk ipprovduta fil-leġiżlazzjoni nazzjonali, għandha tissemma l-proċedura rilevanti ta' reviżjoni.

L-Artikolu 10

Il-ftehimiet ta' għotja mal-benefiċjarji finali fejn l-awtorità responsabbli tagħmilha ta' l-entità li tagħmel l-għotjiet

1.   L-awtorità responsabbli għandha tistabbilixxi proċeduri dettaljati ta' ġestjoni tal-proġetti li jkopru, fost l-oħrajn:

(a)	l-iffirmar tal-ftehimiet ta' għotja mal-benefiċjarji finali magħżula;

(b)	l-azzjoni ta' segwitu tal-ftehimiet u kwalunkwe emenda li ssirilhom billi tiġi stabbilita sistema għall-monitoraġġ amministrattiv tal-proġetti (l-iskambju tal-korrispondenza, il-ħruġ u l-monitoraġġ ta' l-emendi u ittri ta' tfakkira, il-wasla u l-ipproċessar tar-rapporti, eċċ.).

2.   Il-ftehimiet ta' għotja għandhom jistabbilixxu, inter alia:

(a)	l-ammont massimu ta' l-għotja;

(b)	il-persentaġġ massimu tal-kontribuzzjoni Komunitarja skond l-Artikolu 15(4) ta' l-att bażiku;

(ċ)	deskrizzjoni dettaljata u skeda tal-proġett appoġġjat;

(d)	jekk ikun applikabbli, il-parti tal-kompiti u l-ispejjeż relatati li l-benefiċjarju finali biħsiebu joffri b'sottokuntratt lil partijiet terzi;

(e)	il-pjan miftiehem tal-baġit bikri u ta' finanzjament għall-proġett, inkluż il-persentaġġ fiss ta' l-ispejjeż indiretti kif iddefiniti fl-Anness 11 rigward ir-regoli dwar l-eliġibbiltà tan-nefqa;

(f)	l-iskeda u d-dispożizzjonijiet għall-implimentazzjoni tal-ftehim (ir-rapportaġġ ta' l-obbligi, ta' l-emendi u tat-tmien);

(g)	l-għanijiet operattivi tal-proġett u l-indikaturi li għandhom jintużaw;

(h)	id-definizzjoni ta' spejjeż eliġibbli;

(i)	il-kundizzjonijiet relatati mal-pagament ta' l-għotja u r-rekwiżiti taż-żamma tal-kotba;

(j)	il-kundizzjonijiet relatati mar-rekord ta' verifika;

(k)	id-dispożizzjonijiet rilevanti relatati mal-protezzjoni tad-data;

(l)	id-dispożizzjonijiet rilevanti relatati mal-pubbliċità.

3.   Fejn ikun xieraq, il-benefiċjarji finali għandhom jiżguraw li l-imsieħba kollha fil-proġett jiġu suġġetti għall-istess obbligi bħalhom. L-imsieħba għandhom jinvolvu r-responsabbiltà tagħhom permezz tal-benefiċjarju finali li jibqa' huwa li jwieġeb, fl-aħħar mill-aħħar, għar-rispett tal-kundizzjonijiet kuntrattwali minnu u mill-imsieħba kollha fil-proġett.

Il-benefiċjarji finali għandhom iżommu kopji ċertifikati tad-dokumenti ta' kontabbiltà li jiġġustifikaw id-dħul u n-nefqa li saru mill-imsieħba b'relazzjoni għall-proġett ikkonċernat.

4   Il-ftehimiet ta' għotja għandhom jipprovdu b'mod espliċitu biex il-Kummissjoni u l-Qorti ta' l-Awdituri jeżerċitaw il-poteri ta' kontroll tagħhom, abbażi tad-dokumenti u fuq il-post, fuq il-benefiċjarji finali, l-imsieħba fil-proġett u s-sottokuntratturi kollha.

L-Artikolu 11

Il-kuntratti ta' implimentazzjoni

Mingħajr preġudizzjoni għar-regoli Komunitarji u nazzjonali applikabbli dwar l-akkwist pubbliku, il-ftehimiet ta' għotja għandhom jistabbilixxu li, meta jiġu implimentati l-proġetti, il-benefiċjarji finali u/jew l-imsieħba fil-proġett għandhom jagħtu l-kuntratt ta' l-akkwist pubbliku, wara proċedura ta' sejħa għall-offerti, lill-offerta li tagħti l-aħjar valur għall-flus u li tingħata attenzjoni biex jiġi evitat kwalunkwe kunflitt ta' interess. Madankollu, mingħajr preġudizzju għar-regoli Komunitarji u nazzjonali applikabbli dwar l-akkwist pubbliku, il-kuntratti b'valur ta' inqas minn EUR 5 000 jistgħu jingħataw abbażi ta' offerta waħda mingħajr sejħa għall-offerti.

L-Artikolu 12

Id-determinazzjoni tal-kontribuzzjoni Komunitarja finali

Biex jiġi kalkulat il-pagament finali lill-benefiċjarju finali, il-kontribuzzjoni Komunitarja totali għal kull proġett għandha tkun l-aktar waħda baxxa mit-tliet ammonti li ġejjin:

(a)	l-ammont massimu dikjarat fil-ftehim ta' għotja;

(b)	il-kofinanzjament massimu li jirriżulta mill-multiplikazzjoni ta' l-ispejjeż totali eliġibbli tal-proġett ikkonċernat bil-persentaġġ stabbilit fl-Artikolu 15(4) ta' l-att bażiku (jiġifieri 50 % jew 75 %); u

(ċ)	l-ammont li jirriżulta mill-applikazzjoni tal-prinċipju ta' nuqqas ta' qligħ, kif iddefinit fil-punt I.3.3 ta' l-Anness 11.

L-Artikolu 13

L-assistenza teknika

1.   L-assistenza teknika fuq l-inizjattiva tal-Kummissjoni, kif iddefinita fl-Artikolu 16 ta' l-att bażiku, tista' tiġi finanzjata sa 100 % mill-Fond.

2.   L-assistenza teknika fuq l-inizjattiva ta' l-Istati Membri, kif iddefinita fl-Artikolu 17 ta' l-att bażiku, tista' tiġi finanzjata sa 100 % mill-Fond.

3.   L-assistenza teknika fuq l-inizjattiva tal-Kummissjoni jew ta' l-Istati Membri tista' tieħu l-forma ta' kuntratti ta' akkwist, ta' ħlasijiet lill-esperti u/jew ta' kwalunkwe nefqa amministrattiva suġġetta għar-regoli ta' eliġibbiltà definiti fil-Kapitolu 1 tal-Parti III.

L-Artikolu 14

In-nefqa ta' l-assistenza teknika fil-każ ta' awtorità komuni

1.   Meta awtorità maħtura waħda jew aktar tkun komuni għal tnejn jew aktar mill-erba' Fondi, l-appropriazzjonijiet għan-nefqa ta' l-assistenza teknika fuq kull wieħed mill-programmi annwali konċernati jistgħu jiġu amalgamati, parzjalment jew b'mod sħiħ.

2.   In-nefqa fuq l-assistenza teknika għandha tiġi allokata bejn il-Fondi konċernati, preferibbilment abbażi ta' formuli ta' tqassim sempliċi u rappreżentattivi. L-applikazzjoni tal-formuli m'għandha twassal għall-ebda żjieda fl-ammont massimu tan-nefqa ta' l-assistenza teknika fuq kull programm annwali konċernat.

L-Artikolu 15

Il-verifiki mill-awtorità responsabbli

1.   Il-verifiki li għandhom isiru mill-awtorità responsabbli, jew taħt ir-responsabbiltà tagħha, skond l-Artikolu 27(1)(g) ta' l-att bażiku għandhom ikopru l-aspetti amministrattivi, finanzjarji, tekniċi u fiżiċi tal-proġetti, kif ikun xieraq.

Il-verifiki għandhom jiżguraw li n-nefqa dikjarata tkun reali u ġustifikata għall-fini tal-proġett, li l-proġetti li ngħataw ikunu saru skond il-ftehimiet ta' l-għotja, li l-kontribuzzjoni Komunitarja hija konformi mar-regoli, partikolarment dwar l-istruttura ta' finanzjament iddefinita fl-Artikolu 15 ta' l-att bażiku, li l-applikazzjonijiet għar-rimbors mill-benefiċjarju finali huma korretti u li l-proġetti u n-nefqa jikkonformaw mar-regoli Komunitarji u nazzjonali u jevitaw il-finanzjament doppju tan-nefqa bi skemi Komunitarji jew nazzjonali oħra u b'perijodi oħra ta' programmazzjoni.

Barra minn hekk, il-verifiki għandhom jinkludu:

(a)	il-verifiki amministrattivi u finanzjarji ta' kull applikazzjoni għar-rimbors mibgħuta mill-benefiċjarji finali;

(b)	il-verifiki, għallinqas fuq kampjun rappreżentattiv tad-dokumenti ta' appoġġ li jkopri l-intestaturi kollha tal-baġit anness mal-ftehim ta' għotja, tar-rilevanza, ta' l-eżattezza u ta' l-eliġibbiltà ta' l-infiq, tad-dħul u ta' l-infiq kopert mid-dħul assenjat iddikjarati mill-benefiċjarji finali;

(ċ)

verifiki fuq il-post ta' proġetti individwali, għallinqas fuq kampjun li jirrappreżenta taħlita xierqa ta' tipi u ta' daqsijiet ta' proġetti u billi jitqies kwalunkwe fattur ta' riskju diġà identifikat, sabiex tinkiseb assikurazzjoni raġonevoli rigward il-legalità u r-regolarità tat-transazzjonijiet sottostanti, fejn jitqies il-livell ta' riskju identifikat mill-awtorità reponsabbli.

Il-verifiki indikati fil-punti (a) u (b) m'għandhomx għalfejn isiru jekk jiġi impost obbligu fuq il-benefiċjarju finali li jipprovdi ċertifikat ta' verifika mingħand awditur indipendenti li jkopri l-aspetti kollha msemmija fil-punti (a) u (b).

2.   Għandhom jinżammu rekords ta' kull verifika, li jiddikjaraw ix-xogħol li sar, id-data, ir-riżultati u l-miżuri meħuda bħala reazzjoni għall-iżbalji li ġew skoperti. L-awtorità responsabbli għandha tiżgura li d-dokumenti kollha ta' appoġġ rigward il-verifiki li saru jinżammu disponibbli għall-Kummissjoni u għall-Qorti ta' l-Awdituri għal perijodu ta' ħames snin wara l-għeluq tal-proġett. Dan il-perjodu għandu jiġi interrott fil-każ ta' proċedimenti legali jew fuq it-talba debitament sostanzjata tal-Kummissjoni.

3.   Fejn l-awtorità responsabbli tagħmilha ta' entità li teżegwixxi taħt il-programm annwali, kif iddefinit fl-Artikolu 7(3), il-verifiki msemmija fil-paragrafu 1 għandhom jiġu implimentati skond il-prinċipju tas-separazzjoni adegwata tal-funzjonijiet.

L-Artikolu 16

Ir-rekord ta' verifika

1.   Għall-finijiet ta' l-Artikolu 27(1)(k) ta' l-att bażiku, ir-rekord ta' verifika għandu jitqies li huwa adegwat jekk jikkonforma mal-kriterji li ġejjin:

(a)	jippermetti r-rikonċiljazzjoni ta' l-ammonti ċertifikati lill-Kummissjoni mar-rekords dettaljati tal-kontabbiltà u mad-dokumenti ta' appoġġ għand l-awtorità ta' ċertifikazzjoni, l-awtorità responsabbli, l-awtoritajiet delegati u l-benefiċjarji finali fuq proġetti kofinanzjati taħt il-Fond;

(b)	jippermetti l-verifika tal-pagament tal-kontribuzzjoni pubblika lill-benefiċjarju finali, ta' l-allokazzjoni u tat-trasferiment tal-finanzjament Komunitajru li ngħata taħt il-Fond u tas-sorsi ta' kofinanzjament tal-proġett;

(ċ)	jippermetti l-verifika ta' l-applikazzjoni tal-kriterji ta' l-għażla li ġew stabbiliti għall-programm annwali;

(d)	fir-rigward ta' kull proġett, kif ikun xieraq, ikun fih l-ispeċifikazzjonijiet tekniċi u l-pjan ta' finanzjament, dokumenti li jikkonċernaw l-approvazzjoni ta' l-għotja, dokumenti relatati mal-proċeduri ta' akkwist pubbliku u rapporti dwar il-verifiki u dwar il-verifiki finanzjarji li jkunu saru.

2.   L-awtorità responsabbli għandha tiżgura li jinżamm rekord tal-post fejn jinstabu d-dokumenti kollha relatati ma' pagamenti speċifiċi li jkunu saru taħt il-Fond.

L-Artikolu 17

Il-verifiki tas-sistemi u l-verifiki tal-proġetti

1.   Il-verifiki msemmija fl-Artikolu 30(1)(a) u (b) ta' l-att bażiku għandhom isiru fuq is-sistemi ta' ġestjoni u ta' kontroll stabbiliti mill-Istati Membri u fuq kampjun ta' proġetti magħżula permezz ta' metodu approvat mill-awtorità ta' verifika.

Il-metodu tat-teħid ta' kampjuni għandu:

(a)	jinkludi taħlita xierqa ta' tipi u ta' daqsijiet ta' proġetti;

(b)	iqis kwalunkwe fattur ta' riskju li jkun ġie identifikat permezz ta' kontrolli nazzjonali jew Komunitarji u l-aspetti ta' l-ispejjeż u l-benefiċċji tal-verifiki.

Il-kampjun għandu jinkludi wkoll proġetti li ġew implimentati mill-awtorità responsabbli li tagħmilha ta' entità li teżegwixxi għallinqas fuq bażi proporzjonali.

Il-metodu użat sabiex jintgħażel il-kampjun għandu jiġi dokumentat.

2.   Il-verifika fuq is-sistemi ta' ġestjoni u ta' kontroll għandha tkopri kull wieħed mill-proċessi li ġejjin għallinqas darba qabel l-2013: il-programmazzjoni, id-delegazzjoni tal-kompiti, l-għażla u l-għotja, il-monitoraġġ tal-proġetti, il-pagament, iċ-ċertifikazzjoni tan-nefqa, ir-rapportaġġ lill-Kummissjoni, l-iskoperta u t-trattament ta' irregolaritajiet potenzjali u l-evalwazzjoni tal-programmi.

3.   Il-verifiki tal-proġetti għandhom isiru fil-post abbażi tad-dokumentazzjoni u tar-rekords li jkollhom il-benefiċjarju finali u/jew l-imsieħba fil-proġett. Il-verifiki għandhom jikkontrollaw li:

(a)	il-proġett jissodisfa l-kriterji ta' l-għażla għall-programm annwali, ġie implimentat skond il-ftehim ta' għotja u jissodisfa kwalunkwe kundizzjoni applikabbli li tikkonċerna l-funzjonalità u l-użu tiegħu jew l-għanijiet li għandhom jintlaħqu;

(b)	in-nefqa dikjarata tikkorrispondi għar-rekords tal-kontabbiltà u għad-dokumenti ta' sostenn li għandhom il-benefiċjarju finali u/jew l-imsieħba fil-proġett, u dawk ir-rekords jikkorrispondu għad-dokumenti ta' sostenn li għandha l-awtorità responsabbli jew kwalunkwe entità delegata;

(ċ)

l-elementi tan-nefqa jikkorrispondu għar-rekwiżiti ta' eliġibblità stabbiliti fl-Anness 11, għar-rekwiżiti speċifikati matul il-proċedura nazzjonali ta' l-għażla, għat-termini tal-ftehim ta' għotja u għax-xogħlijiet li jkunu saru effettivament u, fejn ikun xieraq, għal regoli oħra Komunitarji u nazzjonali;

(d)	l-użu jew l-użu intenzjonat tal-proġett huwa konsistenti ma' l-għanijiet, ma' l-azzjoni jew mal-miżuri stabbiliti fl-Artikoli 2, 3, 4, 5 u 17 ta' l-att bażiku u, fejn ikun xieraq, ikopri l-popolazzjoni fil-mira;

(e)	il-kontribuzzjoni pubblika jew privata tħallset lill-benefiċjarju finali skond l-Artikolu 15(2) ta' l-att bażiku;

(f)	hemm rekord ta' verifika adegwat;

(g)	mhemm l-ebda kunflitt ta' interess u nkiseb valur tajjeb għall-flus, partikolarment f'każijiet fejn l-awtorità responsabbli tagħmilha ta' l-entità li teżegwixxi tal-proġett.

4.   Hija biss in-nefqa fl-ambitu ta' verifika li saret skond il-paragrafu 3 li għandha titqies fir-rigward ta' l-ammont ta' nefqa verifikat għall-fini ta' l-Artikolu 30(1)(b) ta' l-att bażiku. Jekk il-verifika titwettaq qabel ma jkun ingħalaq il-proġett, biex tiġi kalkulata r-rata ta' kopertura titqies biss in-nefqa effettivament ivverifikata.

5.   Fejn il-problemi skoperti jidher li huma ta' natura sistemika u għalhekk jistgħu jinvolvu riskju għal proġetti oħra, l-awtorità ta' verifika għandha tiżgura li jsir eżami ulterjuri, inklużi, fejn ikun meħtieġ, verifiki addizzjonali biex tiġi stabbilita l-iskala ta' tali problemi. L-awtoritajiet rilevanti għandhom jieħdu l-miżuri preventivi u korrettivi meħtieġa.

6.   L-awtorità ta' verifika għandha tiġbed konklużjonijiet abbażi tar-riżultati tal-verifiki relatati man-nefqa dikjarata lill-Kummissjoni u għandha tikkomunika l-konklużjonijiet lill-Kummissjoni fir-rapport ta' verifika annwali. Fil-programmi annwali li għalihom ir-rata ta' żball hija 'l fuq mil-livell ta' materjalità ta' 2 % tal-kontribuzzjoni Komunitarja, l-awtorità ta' verifika għandha tanalizza s-sinifikat ta' dan l-iżball u għandha tieħu l-miżuri meħtieġa, inkluż li tagħmel ir-rakkomandazzjonijiet xierqa, li għandhom jiġu komunikati għallinqas fir-rapport ta' verifika annwali.

L-Artikolu 18

Il-verifiki mill-awtorità ta' ċertifikazzjoni

1.   F'każijiet fejn l-awtorità ta' verifika tagħti opinjoni kwalifikata jew opinjoni avversa dwar il-funzjonament tas-sistema ta' ġestjoni u ta' kontroll, l-awtorità ta' ċertifikazzjoni għandha tivverifika li din l-informazzjoni intbagħtet lill-Kummissjoni. Hija għandha wkoll tiżgura li, min-naħa ta' l-awtorità responsabbli, ġie implimentat pjan ta' azzjoni adegwat sabiex jiġu stabbiliti mill-ġdid sistemi ta' ġestjoni u ta' kontroll li effettivament jiffunzjonaw u jiġi valutat l-impatt tal-funzjonament ħażin fuq id-dikjarazzjoni tan-nefqa.

2.   Jekk il-talba għall-pagament jew id-dikjarazzjoni ta' rimbors ma tkunx ivvalidata mill-awtorità ta' verifika għar-rapport finali dwar l-implimentazzjoni tal-programm annwali, l-awtorità ta' ċertifikazzjoni għandha tiżgura li talba korretta għall-pagament jew dikjarazzjoni korretta ta' rimbors tiġi stabbilita mingħajr dewmien.

KAPITOLU 3

L-informazzjoni li għandha tkun ipprovduta dwar l-użu tal-Fond

L-Artikolu 19

Il-prinċipju ta' proporzjonalità

1.   Skond l-Artikolu 10(2) ta' l-att bażiku, l-estent li l-informazzjoni disponibbli għal Stat Membru dwar l-użu tal-Fond tiġi trażmessa lill-Kummissjoni fid-dokumenti msemmija f'dan il-kapitolu jista' jkun proporzjonali għall-ammont tal-kontribuzzjoni Komunitarja allokata lill-Istat Membru konċernat u, fejn ikun xieraq, din l-informazzjoni tista' tiġi provduta f'forma mqassra.

2.   Madankollu, fuq talba mill-Kummissjoni, l-Istat Membru għandu fi kwalunkwe każ jipprovdi informazzjoni aktar dettaljata. Il-Kummissjoni tista' titlob din l-informazzjoni jekk jidher li tkun meħtieġa sabiex il-Kummissjoni tissodisfa effettivament l-obbigi tagħha skond l-att bażiku u r-Regolament Finanzjarju.

L-Artikolu 20

Id-deskrizzjoni tas-sistemi ta' ġestjoni u ta' kontroll

1.   Id-deskrizzjoni tas-sistemi ta' ġestjoni u ta' kontroll imsemmija fl-Artikoli 31(4) u 32(2) ta' l-att bażiku għandha titressaq skond il-mudell fl-Anness 1.

2.   L-awtorità responsabbli għandha tivvalida d-deskrizzjoni tas-sistemi implimentati minn kwalunkwe awtorità delegata. Kull waħda mill-awtoritajiet maħtura għandha tikkonferma l-eżattezza tad-deskrizzjoni tas-sistemi ta' ġestjoni u ta' kontroll li għandhom x'jaqsmu magħha. Barra dan, l-awtorità ta' verifika għandha tikkonferma wkoll il-kompletezza tad-deskrizzjoni.

3.   Meta teżamina d-deskrizzjoni, il-Kummissjoni tista' titlob kjarifiki u tipproponi miżuri biex ikun hemm konformità mad-dispożizzjonijiet iddefiniti fl-att bażiku. Jekk ikun meħtieġ, jistgħu jsiru żjarat fil-post mill-uffiċjali tal-Kummissjoni jew mir-rappreżentanti awtorizzati tal-Kummissjoni.

4.   Jekk l-awtorità responsabbli tkun l-istess għal tnejn jew aktar mill-erba' Fondi jew fejn sistemi komuni japplikaw għal tnejn jew aktar mill-Fondi, tista' titressaq deskrizzjoni tas-sistemi komuni ta' ġestjoni u ta' kontroll li tagħmel enfasi, fejn ikun xieraq, fuq kwalunkwe fattur speċifiku.

L-Artikolu 21

Ir-reviżjoni tad-deskrizzjoni tas-sistemi ta' ġestjoni u ta' kontroll

1.   L-awtorità responsabbli għandha:

(a)	meta tressaq l-abbozz tal-programm annwali, tirrapporta jekk ikunux saru bidliet fis-sistemi ta' ġestjoni u ta' kontroll;

(b)	tinnotifika lill-Kummissjoni bi kwalunkwe bidla sostanzjali, mhux iktar tard minn meta kwalunkwe bidla bħal din tkun daħlet fis-seħħ;

(ċ)	fuq it-talba tal-Kummissjoni, tipprovdi deskrizzjoni riveduta fil-każ ta' bidliet sostanzjali multipli.

2.   Il-bidliet sostanzjali huma bidliet li x'aktarx ikollhom impatt fuq is-separazzjoni tal-funzjonijiet, fuq l-effettività tal-mekkaniżmi ta' l-għażla, ta' l-għotja, tal-kontroll u tal-pagament u fuq il-komunikazzjoni mal-Kummissjoni. Għandhom jinkludu, partikolarment, il-bidliet f'waħda mill-awtoritajiet maħtura, fis-sistema ta' kontabbiltà u fil-proċessi ta' pagament u ta' ċertifikazzjoni.

3.   Ir-reviżjoni tas-sistemi ta' ġestjoni u ta' kontroll għandha ssegwi l-istess proċedura hekk kif ġie stabbilit fl-Artikolu 20.

L-Artikolu 22

Id-dokumenti ta' programmazzjoni

1.   L-Istati Membri għandhom iressqu quddiem il-Kummissjoni programm multiannwali, kif imsemmi fl-Artikolu 19 ta' l-att bażiku, skond il-mudell fl-Anness 2.

2.   L-Istati Membri għandhom iressqu quddiem il-Kummissjoni l-programmi annwali, kif imsemmija fl-Artikolu 21 ta' l-att bażiku, skond il-mudell fl-Anness 3.

3.   Il-pjanijiet finanzjarji marbuta mal-programm multiannwali għandhom jippreżentaw tqassim ta' l-ammonti bbaġitjati skond il-prijorità, kif ġie definit fil-linji ta' gwida strateġiċi.

Il-pjanijiet finanzjarji marbuta mal-programmi annwali għandhom jippreżentaw tqassim ta' l-ammonti bbaġitjati skond il-kategorija ta' azzjoni, kif ġew definiti fl-Artikolu 4 ta' l-att bażiku, b'referenza għall-prijoritajiet.

L-Artikolu 23

Ir-reviżjoni tat-tqassim finanzjarju fi programmi annwali

1.   Sabiex jiġi rivedut il-programm annwali approvat mill-Kummissjoni skond l-Artikolu 21(5) ta' l-att bażiku, l-Istat Membru konċernat għandu jressaq abbozz tal-programm annwali rivedut lill-Kummissjoni qabel l-1 ta' Mejju tas-sena ta' wara s-sena ta' referenza. Il-Kummissjoni għandha teżamina u, mill-aktar fis possibbli, tapprova l-programm rivedut skond il-proċedura stabbilita fl-Artikolu 21(5) ta' l-att bażiku.

2.   Il-bidliet fit-tqassim finanzjarju, mingħajr ma tkun saret reviżjoni tal-programm annwali skond il-paragrafu 1, m'għandhomx jeċċedu l-10 % tal-kontribuzzjoni totali mill-Fond u għandhom jitħallew isiru biss f'ċirkostanzi ġustifikati minn kawżi lilhinn mill-kontroll ta' l-awtorità responsabbli. Fir-rapport ta' progress u/jew fir-rapport finali dwar l-implimentazzjoni tal-programm annwali, għandha tiġi provduta spjegazzjoni adegwata għal bidliet bħal dawn.

L-Artikolu 24

Ir-rapporti ta' progress u r-rapporti finali dwar l-implimentazzjoni tal-programmi annwali

1.   L-Istati Membri għandhom iressqu quddiem il-Kummissjoni ir-rapporti ta' progress dwar l-implimentazzjoni tal-programm annwali u t-talbiet ta' pagament, kif imsemmi fl-Artikolu 39(4) ta' l-att bażiku, skond il-mudell fl-Anness 4.

2.   L-Istati Membri għandhom iressqu quddiem il-Kummissjoni ir-rapporti finali dwar l-implimentazzjoni tal-programm annwali u t-talbiet ta' pagament, kif imsemmi fl-Artikolu 40(1)(b) ta' l-att bażiku, skond il-mudell fl-Anness 5.

3.   It-tabelli finanzjarji marbuta mar-rapporti ta' progress u mar-rapporti finali għandhom jippreżentaw tqassim ta' l-ammonti kemm skond il-prijorità, kif ġie definit fil-linji ta' gwida strateġiċi, u skond il-proġetti għal kull kategorija ta' azzjoni, kif ġie definit fl-Artikolu 4 ta' l-att bażiku.

L-Artikolu 25

Id-dokumenti stabbiliti mill-awtorità ta' verifika

1.   L-istrateġija ta' verifika msemmija fl-Artikolu 30(1)(ċ) ta' l-att bażiku għandha tiġi stabbilita skond il-mudell fl-Anness 6.

2.   Mill-2009, l-awtorità ta' verifika għandha tressaq pjan ta' verifika annwali qabel il-15 ta' Frar ta' kull sena, ħlief meta kull wieħed mill-aħħar żewġ programmi annwali adottati mill-Kummissjoni jikkorrispondi għal kontribuzzjoni Komunitarja annwali taħt EUR 1 miljun. Il-pjan ta' verifika għandu jiġi stabbilit bħala anness għall-istrateġija ta' verifika skond il-mudell fl-Anness 6. Fil-każ ta' strateġija ta' verifika kombinata, kif ġie provdut fl-Artikolu 30(2) ta' l-att bażiku, jista' jitressaq pjan ta' verifika annwali kombinata.

3.   Ir-rapport ta' verifika u l-opinjonijiet imsemmija fl-Artikolu 30(3)(a) u 30(3)(b) ta' l-att bażiku għandhom ikunu bbażati fuq il-verifiki tas-sistemi u fuq il-verifiki tal-proġetti li saru skond l-istrateġija ta' verifika u għandhom jitfasslu skond il-mudelli fl-Annessi 7.A u 7.B.

4.   Id-dikjarazzjoni ta' validità msemmija fl-Artikolu 30(3)(ċ) ta' l-att bażiku għandha tkun ibbażata fuq ix-xogħol ta' verifika kollu li sar mill-awtorità ta' verifika u, jekk ikun meħtieġ, fuq kontrolli addizzjonali. Id-dikjarazzjoni ta' validità għandha titfassal skond il-mudell fl-Anness 7.C.

5.   Jekk ikun hemm kwalunkwe limitazzjoni għall-ambitu ta' l-eżami jew jekk il-livell tan-nefqa irregolari skoperta ma jippermettix li tingħata opinjoni mhux kwalifikata għall-opinjoni annwali msemmija fl-Artikolu 30(3)(b) ta' l-att bażiku jew fid-dikjarazzjoni msemmija fil-punt (ċ) ta' l-istess Artikolu, l-awtorità ta' verifika għandha tagħti r-raġunijiet u tistma l-iskala tal-problema u l-impatt finanzjarju tagħha.

L-Artikolu 26

Id-dokumenti stabbiliti mill-awtorità ta' ċertifikazzjoni

1.   Id-dikjarazzjoni ċertifikata tan-nefqa relatata mat-talba għal pagament ta' pre-finanzjament ieħor imsemmija fl-Artikolu 39(4) ta' l-att bażiku għandha titfassal u tiġi trażmessa lill-Kummissjoni fil-format ta' l-Anness 8.

2.   Id-dikjarazzjoni ċertifikata tan-nefqa relatata mat-talba għal pagament finali msemmija fl-Artikolu 40(1)(a) ta' l-att bażiku għandha titfassal u tiġi trażmessa lill-Kummissjoni fil-format ta' l-Anness 9.

KAPITOLU 4

Ir-rapportaġġ ta' l-irregolaritajiet

L-Artikolu 27

Ir-rapportaġġ inizjali – Id-derogi

1.   Skond il-mudelli fl-Annessi 4 u 5, l-Istati Membri għandhom jirrapportaw lill-Kummissjoni kwalunkwe irregolarità li kienet is-suġġett ta' sejba primarja amministrattiva jew ġudizzjarja fir-rapporti ta' progress jew fir-rapporti finali dwar l-implimentazzjoni tal-programmi annwali:

Ir-rapport għandu jindika:

(a)	il-Fond, il-programm annwali u l-proġett ikkonċernat;

(b)	id-dispożizzjoni li nkisret;

(ċ)	id-data u s-sors ta' l-ewwel informazzjoni li wasslet biex jiġi suspettat li saret irregolarità;

(d)	il-prattiki użati fit-twettiq ta' l-irregolarità;

(e)	fejn ikun xieraq, jekk il-prattika tagħtix lok għal suspett ta' frodi;

(f)	il-mod li bih ġiet skoperta l-irregolarità;

(g)	l-ammont tal-kontribuzzjoni Komunitarja konċernata.

Madankollu, il-każijiet li ġejjin mhemmx għalfejn jiġu rapportati, ħlief f'każijiet ta' suspett ta' frodi:

(a)	każijiet fejn l-irregolaritajiet ikunu relatati ma' ammonti ta' inqas minn EUR 10 000 li jridu jitħallsu mill-baġit ġenerali tal-Komunitajiet Ewropej;

(b)	każijiet fejn l-irregolarità tikkonsisti biss fin-nuqqas ta' implimentazzjoni, b'mod sħiħ jew parzjali, ta' proġett inkluż fil-programm annwali minħabba li l-benefiċjarju finali falla;

(ċ)	każijiet li nġiebu għall-attenzjoni ta' l-awtorità responsabbli mill-benefiċjarju finali b'mod volontarju u qabel ma ġew skoperti mill-awtorità responsabbli, sew qabel jew wara l-pagament tal-kontribuzzjoni pubblika;

(d)	każijiet skoperti u kkorreġuti mill-awtorità responsabbli qabel ma sar kwalunkwe pagament tal-kontribuzzjoni pubblika lill-benefiċjarju finali u qabel ma n-nefqa konċernata ġiet inkluża f'dikjarazzjoni ta' nefqa mressqa quddiem il-Kummissjoni.

2.   Fuq it-talba tal-Kummissjoni, fil-każijiet kollha, l-Istati Membri għandhom jagħtu aktar dettalji rigward:

(a)	fejn ikun xieraq, l-Istati Membri u l-pajjiżi terzi l-oħra involuti;

(b)	il-perjodu li matulu, jew il-mument li fih, twettqet l-irregolarità;

(ċ)	l-awtoritajiet nazzjonali jew l-entitajiet li fasslu r-rapport uffiċjali dwar l-irregolarità u l-awtoritajiet responsabbli għall-azzjoni ta' segwitu amministrattiva jew ġudizzjarja;

(d)	id-data meta ġiet stabbilita s-sejba primarja amministrattiva jew ġudizzjarja dwar l-irregolarità;

(e)	l-identità tal-persuni naturali u legali involuti jew ta' kwalunkwe entità oħra parteċipanti, ħlief fejn din l-informazzjoni hija irrilevanti għall-finijiet tal-ġlieda kontra l-irregolaritajiet, minħabba n-natura ta' l-irregolarità konċernata;

(f)	il-baġit totali u l-kontribuzzjoni pubblika approvata għall-proġett u t-tqassim tal-kofinanzjament tiegħu bejn il-Komunità u l-kontribuzzjonijiet nazzjonali;

(g)	l-ammont tal-kontribuzzjoni pubblika li ġie affettwat mill-irregolarità u l-kontribuzzjoni Komunitarja korrispondenti li tinsab f'riskju;

(h)	fejn ma sar l-ebda pagament tal-kontribuzzjoni pubblika, imsemmija fil-punt (g), lil nies jew lil entitajiet oħra identifikati, l-ammonti li kienu se jitħallsu indebitament kieku l-irregolarità ma ġietx identifikata;

(i)	is-sospensjoni tal-pagamenti, fejn ikun applikabbli, u l-possibbiltajiet ta' rkupru;

(j)	in-natura tan-nefqa irregolari.

3.   Fejn parti mill-informazzjoni msemmija fil-paragrafu 2, partikolarment dwar il-prattiki użati biex titwettaq l-irregolarità u dwar il-mod li bih l-irregolarità ġiet skoperta, ma tkunx disponibbli, safejn ikun possibbli, l-Istati Membri għandhom jipprovdu l-informazzjoni nieqsa meta jgħaddu r-rapporti sussegwenti dwar l-irregolaritajiet lill-Kummissjoni.

L-Artikolu 28

Ir-rapportaġġ ta' l-azzjoni ta' segwitu – In-nuqqas ta' rkupru

1.   L-Istati Membri għandhom jinformaw lill-Kummissjoni, b'referenza għal kwalunkwe rapport preċedenti li sar skond l-Artikolu 27, bil-proċeduri istitwiti fir-rigward ta' l-irregolaritajiet kollha li ġew innotifikati qabel u b'bidliet sinifikanti li jirriżultaw minnhom. Din l-informazzjoni għandha tingħata fir-rapporti ta' progress jew fir-rapporti finali dwar l-implimentazzjoni tal-programmi annwali skond il-mudelli fl-Annessi 4 u 5.

Ir-rapport għandu jindika l-ammonti li ġew, jew li mistennija jiġu rkuprati.

2.   Fuq it-talba tal-Kummissjoni, fil-każijiet kollha, l-Istati Membri għandhom jagħtu aktar dettalji rigward:

(a)	kwalunkwe miżura interim meħuda mill-Istati Membri biex jissalvagwardjaw l-irkupru tas-somom imħallsa indebitament;

(b)	kwalunkwe proċedura ġudizzjarja u amministrattiva li ġiet istitwita bil-għan li jiġu rkuprati s-somom imħallsa indebitament u biex jiġu imposti sanzjonijet;

(ċ)	ir-raġunijiet għal kwalunkwe abbandun tal-proċeduri ta' rkupru;

(d)	ir-raġunijiet għal kwalunkwe abbandun tal-prosekuzzjonijiet kriminali.

L-Istati Membri għandhom jirrapportaw lill-Kummissjoni id-deċiżjonijiet amministrattivi jew ġudizzjarji kollha li jtemmu tali proċeduri, jew il-punti ewlenin tagħhom, u għandhom jiddikjaraw, partikolarment, jekk is-sejbiet humiex tali li tiġi suspettata frodi jew le.

L-Artikolu 29

Il-kuntatti ma' l-Istati Membri

1.   Il-Kummissjoni għandha żżomm kuntatti xierqa ma' l-Istati Membri konċernati sabiex tiġi supplimentata l-informazzjoni provduta dwar l-irregolaritajiet imsemmija fl-Artikolu 27 u dwar il-proċeduri msemmija fl-Artikolu 28 dwar il-possibbiltà ta' rkupru.

2.   Indipendentement mill-kuntatti msemmija fil-paragrafu 1, il-Kummissjoni għandha tinforma lill-Istati Membri f'każijiet fejn in-natura ta' l-irregolarità tkun tali li tissuġġerixxi li fi Stati Membri oħra jistgħu jseħħu prattiki identiċi jew simili.

L-Artikolu 30

L-użu ta' l-informazzjoni

1.   Il-Kummissjoni tista' tuża kwalunkwe informazzjoni ta' natura ġenerali jew operattiva li ġiet ikkomunikata mill-Istati Membri skond din id-Deċiżjoni biex tagħmel analiżijiet tar-riskji, u, abbażi ta' l-informazzjoni miksuba, tista' tipproduċi rapporti u tiżviluppa sistemi ta' twissija bikrija li jservu biex jidentifikaw ir-riskji b'mod aktar effettiv.

2.   Il-Kummissjoni għandha tinforma b'mod regolari lill-Istati Membri konċernati dwar l-użu li jkun sar mill-informazzjoni taħt il-paragrafu 1.

KAPITOLU 5

L-informazzjoni u l-pubbliċità

L-Artikolu 31

L-informazzjoni għall-benefiċjarji finali potenzjali

1.   L-awtorità responsabbli għandha tiżgura li l-indikazzjonijiet ewlenin dwar il-programmi multiannwali u l-programmi annwali jkunu mifruxa b'mod wiesa’, bid-dettalji tal-kontribuzzjonijiet finanzjarji konċernati, u li jkunu disponibbli għall-partijiet kollha interessati.

Madankollu, l-awtorità responsabbli tista' tiddeċiedi li żżomm kunfidenzjali l-arranġamenti ta' ġestjoni interna stabbiliti fil-programm multiannwali jew fil-programmi annwali u kwalunkwe informazzjoni oħra relatata ma' l-implimentazzjoni tal-Fond għal raġunijiet ta' sigurtà pubblika.

2.   L-awtorità responsabbli għandha tipprovdi lill-benefiċjarji finali potenzjali għallinqas bl-informazzjoni li ġejja:

(a)	il-kundizzjonijiet ta' eliġibbiltà li għandhom jiġu sodisfatti sabiex jikkwalifikaw għall-finanzjament taħt programm anwali;

(b)	deskrizzjoni tal-proċeduri biex jiġu eżaminati applikazzjonijiet għal finanzjament u l-perjodi ta' żmien involuti;

(ċ)	il-kriterji biex jiġu magħżula l-proġetti li għandhom jiġu finanzjati;

(d)	il-kuntatti li jistgħu jipprovdu informazzjoni dwar il-programmi annwali.

Minbarra dan, l-awtorità responsabbli għandha tinforma lill-benefiċjarji finali potenzjali bil-pubblikazzjoni kif inhu provdut fl-Artikolu 33(2)(b).

L-Artikolu 32

L-informazzjoni għall-benefiċjarji finali

L-awtorità responsabbli għandha tinforma lill-benefiċjarji finali li l-aċċettazzjoni tal-finanzjament timplika li jkunu qed jaċċettaw ukoll li jiġu inklużi fil-lista tal-benefiċjarji finali pubblikata skond l-Artikolu 33(2)(b).

L-Artikolu 33

Ir-responsabbiltajiet ta' l-awtorità responsabbli fir-rigward ta' l-informazzjoni u l-pubbliċità għall-pubbliku ġenerali

1.   L-awtorità responsabbli għandha tiżgura li l-miżuri ta' informazzjoni u ta' pubbliċità jiġu implimentati bil-għan li jkollhom l-aktar kopertura wiesgħa possibbli mill-midja billi jużaw diversi forom u metodi ta' komunikazzjoni fuq il-livell territorjali xieraq.

2.   L-awtorità responsabbli għandha torganizza għallinqas il-miżuri ta' informazzjoni u ta' pubbliċità li ġejjin:

(a)	għallinqas attività waħda ta' informazzjoni fis-sena, li tippreżenta, mill-2008, it-tnedija tal-programm multiannwali jew il-kisbiet tal-programm(i) annwali;

(b)

pubblikazzjoni annwali, għallinqas fuq sit web, tal-lista tal-benefiċjarji finali, l-ismijiet tal-proġetti u l-ammont ta' finanzjament pubbliku u Komunitarju allokat lilhom. L-individwi li jappartjenu lill-gruppi fil-mira li ġew iddefiniti fl-Artikolu 7 ta' l-att bażiku m'għandhomx jissemmew. L-indirizz tas-sit web għandu jiġi komunikat lill-Kummissjoni.

L-Artikolu 34

Ir-responsabbiltajiet tal-benefiċjarji finali fir-rigward ta' l-informazzjoni u l-pubbliċità għall-pubbliku ġenerali

1.   Il-benefiċjarju finali għandu jkun responsabbli biex jinforma lill-pubbliku, permezz tal-miżuri stabbiliti fil-paragrafi 2, 3 u 4, dwar l-assistenza miksuba mill-Fond.

2.   Il-benefiċjarju finali għandu jwaħħal plakka prominenti u permanenti li tkun ta' daqs sinifikanti mhux aktar tard minn tliet xhur wara li jiġi kompletat kwalunkwe proġett li jissodisfa l-kundizzjonijiet li ġejjin:

(a)	il-kontribuzzjoni Komunitarja totali tal-proġett teċċedi EUR 100 000; u

(b)	l-operazzjoni tikkonsisti mix-xiri ta' oġġett fiżiku jew mill-finanzjament ta' proġetti ta' infrastruttura jew ta' kostruzzjoni.

Fuq il-plakka għandu jkun hemm it-tip u l-isem tal-proġett. Barra dan, l-informazzjoni msemmija fl-Artikolu 35 għandha tieħu għallinqas 25 % tal-plakka.

3.   Fejn proġett jingħata finanzjament taħt programm annwali li huwa kofinanzjat mill-Fond, il-benefiċjarju finali għandu jiżgura li dawk li qed jieħdu sehem fil-proġett ġew informati b'dak il-finanzjament.

4.   Kwalunkwe dokument, inkluż kwalunkwe ċertifikat ta' attendenza jew ċertifikat ieħor, li jikkonċerna tali proġetti għandu jinkludi dikjarazzjoni li tindika li l-proġett qed ikun kofinanzjat mill-Fond.

L-Artikolu 35

Il-karatteristiċi tekniċi ta' l-informazzjoni u l-pubbliċità għall-operazzjoni

Il-miżuri kollha ta' informazzjoni u ta' pubbliċità immirati lejn il-benefiċjarji finali, il-benefiċjarji finali potenzjali u l-pubbliku ġenerali għandhom jinkludu:

1.	l-emblema ta' l-Unjoni Ewropea, skond l-istandards grafiċi indikati fl-Anness 10 u referenza għall-Unjoni Ewropea;

2.	referenza għall-Fond;

3.	dikjarazzjoni magħżula mill-awtorità responsabbli, li tagħmel enfasi fuq il-valur miżjud tal-kontribuzzjoni mill-Komunità.

Għal oġġetti promozzjonali żgħar jew għal oġġetti promozzjonali marbuta ma' tnejn jew aktar mill-erba' Fondi, il-punti 1 u 3 m'għandhomx japplikaw.

KAPITOLU 6

Id-data personali

L-Artikolu 36

Il-protezzjoni tad-data personali

1.   L-Istati Membri u l-Kummissjoni għandhom jieħdu l-miżuri kollha meħtieġa biex ma jħallux li jkun hemm xi kxif mhux awtorizzat ta', jew aċċess illeġittimu għall-informazzjoni msemmija fl-Artikolu 27(1)(h) ta' l-att bażiku, għall-informazzjoni miġbura mill-Kummissjoni waqt il-kontrolli tagħha fil-post u għall-informazzjoni msemmija fil-Kapitolu 4.

2.   L-informazzjoni msemmija fil-Kapitolu 4 m'għandhiex tintbagħat lil persuni għajr dawk fl-Istati Membri jew fl-istituzzjonijiet Komunitarji li dmirijiethom jeħtieġu li jkollhom aċċess għaliha, sakemm l-Istat Membru li jipprovdi tali informazzjoni ma jkunx qabel espressament dwar dan.

KAPITOLU 7

L-iskambju elettroniku tad-dokumenti

L-Artikolu 37

L-iskambju elettroniku tad-dokumenti

Minbarra l-verżjonijiet fuq il-karti debitament iffirmati tad-dokumenti msemmija fil-Kapitolu 3, l-informazzjoni għandha tintbagħat ukoll, kulmeta jkun possibbli, permezz ta' mezzi elettroniċi.

L-Artikolu 38

Is-sistema kompjuterizzata għall-iskambju tad-dokumenti

1.   Jekk il-Kummissjoni tiżviluppa sistema kompjuterizzata għal skambju sigur tad-data bejn il-Kummissjoni u kull Stat Membru għall-implimentazzjoni tal-Fond, l-Istati Membri għandhom jiġu informati bl-iżvilupp ta' kwalunkwe sistema kompjuterizzata bħal din u, fuq it-talba tagħhom, jiġu involuti f'dan l-iżvilupp.

2.   Il-Kummissjoni u l-awtoritajiet maħtura, flimkien ma' l-entitajiet li lilhom ġew delegati l-kompiti, għandhom jirreġistraw id-dokumenti msemmija fil-Kapitolu 3 fis-sistema kompjuterizzata msemmija fil-paragrafu 1.

3.   Minbarra dan, l-Istati Membri jistgħu jiġu mistiedna biex volontarjament jipprovdu l-informazzjoni msemmija fl-Artikoli 27 u 28 billi jużaw is-sistema speċifika eżistenti ġestita mill-Kummissjoni għall-ġbir ta' l-irregolaritajiet skoperti taħt il-Fondi Strutturali.

4.   Kwalunkwe spiża ta' kollegament (interface) bejn is-sistema kompjuterizzata komuni u sistemi kompjuterizzati nazzjonali, reġjonali u lokali u kwalunkwe spiża biex jiġu adattati s-sistemi nazzjonali reġjonali u lokali għar-rekwiżiti tekniċi tas-sistema komuni għandhom ikunu eliġibbli skond l-Artikolu 17 ta' l-att bażiku.

PARTI III

DISPOŻIZZJONIJIET SPEĊIFIĊI GĦALL-FOND EWROPEW GĦAR-RITORN

KAPITOLU 1

Ir-regoli ta' eliġibbiltà

L-Artikolu 39

Ir-regoli ta' eliġibbiltà

1.   Ir-regoli stabbiliti fl-Anness 11 għandhom jintużaw biex tiġi determinata l-eliġibbiltà tan-nefqa fuq azzjoni finanzjata taħt il-programmi annwali msemmija fl-Artikolu 35(4) ta' l-att bażiku.

2.   Ir-regoli huma applikabbli għan-nefqa li tkun saret mill-benefiċjarji finali u għandhom japplikaw mutatis mutandis għan-nefqa li tkun saret mill-imsieħba fil-proġett.

3.   L-Istati Membri jistgħu japplikaw regoli nazzjonali ta' eliġibbiltà li huma aktar rigorużi minn dawk stabbiliti f'din id-Deċiżjoni.

Għandha tkun il-Kummissjoni li tevalwa jekk ir-regoli nazzjonali ta' eliġibbiltà applikabbli jikkonformawx ma' din il-kundizzjoni.

PARTI IV

DISPOŻIZZJONIJIET FINALI

L-Artikolu 40

Id-destinatarji

Din id-Deċiżjoni hija indirizzata lir-Renju tal-Belġju, lir-Repubblika tal-Bulgarija, lir-Repubblika Ċeka, lir-Repubblika Federali tal-Ġermanja, lir-Repubblika ta' l-Estonja, lill-Irlanda, lir-Repubblika Ellenika, lir-Renju ta' Spanja, lir-Repubblika Franċiża, lir-Repubblika Taljana, lir-Repubblika ta' Ċipru, lir-Repubblika tal-Latvja, lir-Repubblika tal-Litwanja, lill-Gran Dukat tal-Lussemburgu, lir-Repubblika ta' l-Ungerija, lir-Repubblika ta' Malta, lir-Renju ta' l-Olanda, lir-Repubblika ta' l-Awstrija, lir-Repubblika tal-Polonja, lir-Repubblika Portugiża, lir-Rumanija, lir-Repubblika tas-Slovenja, lir-Repubblika Slovakka, lir-Repubblika tal-Finlandja, lir-Renju ta' l-Iżvezja u lir-Renju Unit tal-Gran Brittanja u ta' l-Irlanda ta' Fuq.

---

(1)  ĠU L 144, 6.6.2007, p. 45.

(2)  ĠU L 281, 23.11.1995, p. 31. Id-Direttiva kif emendata bir-Regolament (KE) Nru 1882/2003 (ĠU L 284, 31.10.2003, p. 1).

(3)  ĠU L 8, 12.1.2001, p. 1.

(4)  ĠU L 292, 15.11.1996, p. 2.

(5)  ĠU L 144, 6.6.2007, p. 1.

(6)  ĠU L 144, 6.6.2007, p. 22.

(7)  ĠU L 168, 28.6.2007, p. 18.

(8)  ĠU L 330, 15.12.2007, p. 48

(9)  ĠU C 316, 27.11.1995, p. 49.

(10)  ĠU L 160, 30.6.2000, p. 1. Ir-Regolament kif emendat l-aħħar bir-Regolament (KE) Nru 681/2007 (ĠU L 159, 20.6.2007, p. 1).

---

---