4.6.2008   

MT

Il-Ġurnal Uffiċjali ta’ l-Unjoni Ewropea

L 144/77

(1)

Il-Kummissjoni wriet l-appoġġ tagħha għal użu aktar flessibbli ta’ l-ispettru tar-radju fil-Komunikazzjoni tagħha “Aċċess ta’ malajr għall-ispettru għas-servizzi ta’ komunikazzjoni elettronika bla wajers permezz ta’ iktar flessibiltà” (2), li tirrigwarda fost l-oħrajn il-medda ta’ frekwenzi bejn it-3 400 u t-3 800 MHz. Fl-opinjoni tal-Grupp għall-Politika ta’ l-Ispettru tar-Radju (RSPG) tat-23 ta’ Novembru 2005 dwar il-Politika ta’ Aċċess bla Wajers għal Servizzi ta’ Komunikazzjoni Elettronika (WAPECS), l-Istati Membri saħqu fuq in-newtralità teknoloġika u n-newtralità tas-servizz bħala għanijiet importanti ta’ politika fit-triq lejn użu aktar flessibbli ta’ l-ispettru tar-radju. Barra minn hekk, skond din l-opinjoni, dawn l-għanijiet ta’ politika ma għandhomx jiġu introdotti f'daqqa, iżda b'mod progressiv sabiex ma jkunx hemm xkiel għas-suq.

(2)

L-allokazzjoni tal-medda ta’ frekwenzi bejn it-3 400 u t-3 800 MHz għall-applikazzjonijiet fissi, nomadiċi u mobbli hija element importanti għall-konverġenza tas-setturi tal-komunikazzjoni mobbli u fissa u tax-xandir, u tirrifletti l-innovazzjoni teknika. Is-servizzi pprovduti f'din il-medda ta’ frekwenzi għandhom ikunu mmirati l-aktar lejn l-aċċess ta’ l-utent aħħari għall-komunikazzjoni broadband.

(3)

Huwa mistenni li s-servizzi ta’ komunikazzjoni elettronika broadband bla wajers li għalihom se tkun allokata l-medda ta’ frekwenzi bejn it-3 400 u t-3 800 MHz fil-parti l-kbira tagħhom ikunu pan-Ewropej, fis-sens illi min jinqeda bit-tali servizzi ta’ komunikazzjoni elettronika fi Stat Membru partikolari jkun jista' jikseb aċċess għal servizzi ekwivalenti fi kwalunkwe Stat Membru ieħor.

(4)

Skond l-Artikolu 4(2) tad-Deċiżjoni Nru 676/2002/KE, fl-4 ta’ Jannar 2006 l-Kummissjoni tat mandat lill-Konferenza Ewropea ta’ l-amministrazzjonijiet tal-posta u tat-telekomunikazzjonijiet (minn issa 'l quddiem “is-CEPT”) biex tidentifika l-kundizzjonijiet marbutin mal-provvista ta’ meded ta’ frekwenzi tar-radju armonizzati fl-UE għall-applikazzjonijiet ta’ Aċċess għall-Broadband bla Wajers (BWA).

(5)

Bħala tweġiba għal dak il-mandat, is-CEPT ħarġet rapport (ir-Rapport Nru 15 tas-CEPT) dwar l-aċċess għall-broadband bla wajers, li jikkonkludi li l-implimentazzjoni ta’ netwerks fissi, nomadiċi u mobbli huwa teknikament vijabbli fil-medda ta’ frekwenzi bejn it-3 400 u t-3 800 MHz skond il-kundizzjonijiet tekniċi deskritti fid-Deċiżjoni ECC/DEC/(07)02 u r-Rakkomandazzjoni ECC/REC/(04)05 tal-Kumitat tal-Komunikazzjoni Elettronika.

(6)

Fid-dawl tad-domanda tas-suq għall-introduzzjoni ta’ servizzi ta’ komunikazzjoni elettronika terrestri li jipprovdu aċċess għall-broadband f'dawn il-meded ta’ frekwenzi, ir-riżultati tal-mandat tas-CEPT għandhom isiru applikabbli fil-Komunità u jiġu implimentati fl-Istati Membri mingħajr dewmien. B'qies għad-differenzi fl-użu attwali u fid-domanda tas-suq għall-meded sekondarji ta’ bejn it- 3 400 u t-3 600 MHz u ta’ bejn it-3 600 u t-3 800 MHz fuq il-livell nazzjonali, għandha tiġi stabbilita skadenza differenti għall-allokazzjoni u d-disponibbiltà ta’ dawn il-meded sekondarji.

(7)

L-allokazzjoni u t-tqegħid għad-dispożizzjoni tal-medda ta’ frekwenzi bejn it-3 400 u t-3 800 MHz skond ir-riżultati tal-mandat għall-BWA jirrispettaw il-fatt li hemm applikazzjonijiet oħrajn f'dawn il-meded ta’ frekwenzi, u ma jeskludux l-użu ta’ dawn il-meded fil-ġejjieni minn sistemi u servizzi oħrajn li għalihom jiġu allokati dawn il-meded skond ir-Regolamenti tar-Radju ta’ l-UIT (allokazzjoni fuq bażi mhux esklussiva). Fir-Rapport 100 ta’ l-ECC ġew żviluppati kriterji xierqa ta’ qsim għall-koeżistenza ma’ sistemi u servizzi oħrajn fl-istess meded ta’ frekwenzi jew fil-meded li jmissu magħhom. Dan ir-rapport jikkonferma, fost l-oħrajn, li l-qsim ma’ servizzi tas-satellita sikwit ikun vijabbli meta wieħed iqis il-firxa ta’ l-implimentazzjoni tagħhom fl-Ewropa, ir-rekwiżiti tal-firda ġeografika u l-evalwazzjoni każ b'każ tat-topografija reali ta’ l-art.

(8)

Il-Block Edge Masks (BEM) huma parametri tekniċi li japplikaw għall-blokk sħiħ ta’ l-ispettru ta’ utent speċifiku, irrispettivament mill-għadd ta’ kanali okkupati mit-teknoloġija magħżula mill-utent. Dawn il-masks huma maħsubin biex jiffurmaw parti mir-reġim ta’ awtorizzazzjoni għall-użu ta’ l-ispettru. Ikopru kemm l-emissjonijiet ġewwa l-blokk ta’ l-ispettru (jiġifieri l-potenza ġewwa l-blokk) kif ukoll l-emissjonijiet barra mill-blokk (jiġifieri l-emissjoni 'l barra mill-blokk). Huma rekwiżiti regolatorji mmirati li jevitaw ir-riskju ta’ interferenza ta’ ħsara bejn netwerks li jinsabu qrib xulxin, u huma mingħajr preġudizzju għal-limiti stabbiliti fi standards għat-tagħmir skond id-Direttiva tal-Parlament Ewropew u tal-Kunsill Nru 1999/5/KE tad-9 ta’ Marzu 1999 dwar it-tagħmir tar-radju u tagħmir terminali ta’ telekomunikazzjonijiet u r-rikonoxximent reċiproku tal-konformità tagħhom (id-Direttiva R&TTE) (3).

(9)

L-armonizzazzjoni tal-kundizzjonijiet tekniċi għad-disponibbiltà u għall-użu effiċjenti ta’ l-ispettru ma tkoprix l-allokazzjoni, il-proċeduri għal kif u meta jinħarġu l-liċenzji, u lanqas ma tkopri d-deċiżjoni rigward jekk għandhomx jintużaw proċeduri ta’ selezzjoni kompetittiva għall-allokazzjoni tal-frekwenzi tar-radju, li se jiġu organizzati mill-Istati Membri skond il-leġiżlazzjoni Komunitarja.

(10)

Id-differenzi fil-qagħdiet fuq livell nazzjonali jistgħu jirriżultaw f'tagħwiġ tal-kompetizzjoni. Il-qafas regolatorju ezistenti jagħti l-għodda meħtieġa lill-Istati Membri biex jaffrontaw dawn il-problemi b'mod proporzjonat, oġġettiv u mhux diskriminatorju, soġġett għal-leġiżlazzjoni Komunitarja, inkluż għad-Direttiva tal-Parlament Ewropew u tal-Kunsill Nru 2002/20/KE tas-7 ta’ Marzu 2002 dwar l-awtorizzazzjoni ta’ netwerks u servizzi ta’ komunikazzjonijiet elettroniċi (id-Direttiva ta’ Awtorizzazzjoni) (4) u għad-Direttiva tal-Parlament Ewropew u tal-Kunsill Nru 2002/21/KE tas-7 ta’ Marzu 2002 dwar kwadru regolatorju komuni għan-netwerks ta’ komunikazzjonijiet u servizzi elettroniċi (id-Direttiva Kwadru) (5).

(11)

L-użu tal-medda ta’ frekwenzi bejn it-3 400 u t-3 800 MHz minn applikazzjonijiet oħra eżistenti f'pajjiżi terzi jista’ jillimita l-introduzzjoni u l-użu ta’ din il-medda minn netwerks ta’ komunikazzjoni elettronika f'għadd ta’ Stati Membri. It-tagħrif rigward dawn il-limitazzjonijiet għandu jiġi mgħarraf lill-Kummissjoni skond l-Artikoli 7 u 6(2) tad-Deċiżjoni 676/2002/KE, u għandu jiġi ppubblikat skond l-Artikolu 5 ta’ l-istess Deċiżjoni.

(12)

Sabiex jiġi żgurat l-użu effettiv tal-medda bejn it-3 400 u t-3 800 MHz ukoll għal żmien fit-tul, l-amministrazzjonijiet għandhom ikomplu bl-istudji li jistgħu jżidu l-effiċjenza u l-użu innovattiv, bħall-arkitetturi ta’ “mesh networks”. Dawn l-istudji għandhom jitqiesu meta tkun se tiġi kkunsidrata reviżjoni ta’ din id-Deċiżjoni.

(13)

Il-miżuri pprovduti f'din id-Deċiżjoni huma konformi ma’ l-opinjoni tal-Kumitat dwar l-Ispettru tar-Radju,