EUR-Lex Access to European Union law
This document is an excerpt from the EUR-Lex website
Document 32008D0361
2008/361/EC: Commission Decision of 6 May 2008 on the financial contribution of the Community for the year 2008 for the computerisation of veterinary procedures, the Animal disease notification system, communication measures and studies and evaluations
2008/361/KE: Deċiżjoni tal-Kummissjoni tas- 6 ta’ Mejju 2008 dwar il-kontribut finanzjarju tal-Komunità għas-sena 2008 għall-kompjuterizzazzjoni tal-proċeduri veterinarji, is-sistema ta’ notifika tal-mard ta’ l-Annimali, miżuri ta’ komunikazzjoni u studji u valutazzjonijiet
2008/361/KE: Deċiżjoni tal-Kummissjoni tas- 6 ta’ Mejju 2008 dwar il-kontribut finanzjarju tal-Komunità għas-sena 2008 għall-kompjuterizzazzjoni tal-proċeduri veterinarji, is-sistema ta’ notifika tal-mard ta’ l-Annimali, miżuri ta’ komunikazzjoni u studji u valutazzjonijiet
ĠU L 120, 7.5.2008, p. 18–19
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
7.5.2008 |
MT |
Il-Ġurnal Uffiċjali ta’ l-Unjoni Ewropea |
L 120/18 |
DEĊIŻJONI TAL-KUMMISSJONI
tas-6 ta’ Mejju 2008
dwar il-kontribut finanzjarju tal-Komunità għas-sena 2008 għall-kompjuterizzazzjoni tal-proċeduri veterinarji, is-sistema ta’ notifika tal-mard ta’ l-Annimali, miżuri ta’ komunikazzjoni u studji u valutazzjonijiet
(2008/361/KE)
IL-KUMMISSJONI TAL-KOMUNITAJIET EWROPEJ,
Wara li kkunsidrat it-Trattat li jistabbilixxi l-Komunità Ewropea,
Wara li kkunsidrat id-Deċiżjoni tal-Kunsill 90/424/KEE tas-26 ta’ Ġunju 1990 dwar in-nefqa fil-kamp veterinarju (1), u partikolarment l-Artikoli 17, 20, u 37(2) u 37a(2) tagħha,
Billi:
(1) |
Id-Deċiżjoni 90/424/KEE tfassal il-proċeduri li jirregolaw il-kontribut finanzjarju Komunitarju lejn miżuri veterinarji speċifiċi, b'mod partikolari fir-rigward tal-politika ta’ tagħrif għal saħħet l-annimali, il-benessri ta’ l-annimali u s-sigurtà fl-ikel, miżuri tekniċi u xjentifiċi u kontroll. |
(2) |
L-Artikolu 37a(1)(b) tad-Deċiżjoni 90/424/KEE tistipula li kontribut finanzjarju Komunitarju jista' jingħata għall-kompjuterizzazzjoni tal-proċeduri veterinarji relatati ma’ l-akkomodazzjoni, il-ġestjoni u l-manutenzjoni ta’ sistemi veterinarji kompjuterizzati integrati, inklużi interfaces mad-databases nazzjonali, fejn xieraq. Għalhekk għandu jingħata kontribut finanzjarju Komunitarju għall-akkomodazzjoni, ġestjoni u manutenzjoni tas-sistema veterinarja kompjuterizzata integrata TRACES (Trade Control and Expert System), introdotta mid-Deċiżjoni tal-Kummissjoni 2003/24/KE tat-30 ta’ Diċembru 2002 li tirrigwarda l-iżvilupp ta’ sistema veterinarja integrata u kompjuterizzata (2), biex ikun żgurat li s-sistema hija disponibbli, sikura u aġġornata. |
(3) |
L-Artikolu 37(1) tad-Deċiżjoni 90/424/KEE tistipula li l-introduzzjoni ta’ sistemi sabiex jiġu identifikati annimali u jiġi nnotifikat mard skond il-leġiżlazzjoni li tikkonċerna kontrolli veterinarji fil-kummerċ intra-Komunitarju ta’ annimali ħajjin, bil-ħsieb li jitlesta s-suq intern, tista’ tirċevi għajnuna finanzjarja mill-Komunità. Għalhekk għandu jingħata kontribut finanzjarju Komunitarju biex tiġi aġġornata s-sistema ta’ notifika tal-mard ta’ l-annimali (ADNS), ibbażat fuq id-Deċiżjoni tal-Kummissjoni 2005/176/KE ta’ l-1 ta’ Marzu 2005 li twaqqaf l-għamla kkodifikata u l-kodiċi għan-notifika tal-mard ta’ l-annimali skond id-Direttiva tal-Kunsill 82/894/KEE (3), bit-titjib tekniku neċessarju. |
(4) |
Il-Komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali u lill-Kumitat tar-Reġjuni dwar Strateġija ġdida tas-Saħħa ta’ l-Annimali għall-Unjoni Ewropea (2007-2013) fejn “Il-prevenzjoni hija aqwa mill-kura” (4) (”il-Komunikazzjoni dwar strateġija ta’ saħħa ġdida għall-annimali”) tistipula li l-Kummissjoni hija impenjata biex ittejjeb il-komunikazzjoni lejn il-konsumaturi u l-partijiet interessati. |
(5) |
L-Artikolu 16 tad-Deċiżjoni 90/424/KEE jistipula li l-Komunità għandha tagħti kontribut finanzjarju għat-twaqqif ta’ politika informattiva fil-qasam tas-saħħa ta’ l-annimali, tal-benessri ta’ l-annimali u tas-sigurtà fl-ikel fil-prodotti li joriġinaw mill-annimali. Għalhekk għandu jingħata kontribut finanzjarju Komunitarju għall-implimentazzjoni tal-miżuri mmirati lejn it-titjib tal-komunikazzjoni lejn il-konsumaturi u l-partijiet interessati fil-qasam tas-saħħa ta’ l-annimali u l-benessri ta’ l-annimali fil-qafas tal-Komunikazzjoni dwar strateġija ġdida għas-saħħa ta’ l-annimali. |
(6) |
Skond l-Artikolu 19 tad-Deċiżjoni 90/424/KEE, il-Komunità għandha twettaq, jew tgħin lill-Istati Membri jew lill-organizzazzjonijiet internazzjonali biex iwettqu, il-miżuri tekniċi u xjentifiċi meħtieġa għall-iżvilupp ta’ leġiżlazzjoni veterinarja tal-Komunità u għall-iżvilupp ta’ edukazzjoni jew taħriġ veterinarju. |
(7) |
L-introduzzjoni gradwali ta’ identifikazzjoni elettronika għal ruminanti hija waħda mir-riżultati mistennija ta’ l-istrateġija. Minħabba f'hekk, studju li jqabbel kwistjonijiet bħall-ispejjeż mal-benefiċċju u l-effikaċja fl-ispiża li għandhom x'jaqsmu ma’ l-identifikazzjoni elettronika tal-baqar huwa neċessarju qabel l-introduzzjoni ta’ leġiżlazzjoni ġdida f'dan il-qasam. Sabiex jitjieb ir-rwol tal-laboratorji ta’ referenza tal-Komunità, valutazzjoni tal-funzjonament u r-rendiment tagħhom huwa meqjus neċessarju. Ir-riżultat ta’ dawn l-istudji u valutazzjonijiet se jkun il-bażi għal reviżjoni leġiżlattiva f'dawn l-oqsma jekk ikun hemm bżonn. Għalhekk għandu jingħata kontribut finanzjarju Komunitarju biex jiġu ffinanzjati studji u valutazzjonijiet fl-oqsma tas-sigurtà fl-ikel, is-saħħa u l-benessri ta’ l-annimali u ż-żooteknika. L-ammont massimu li għandu jiġi allokat għal dawn l-azzjonijiet għandu jkun speċifikat. Se jitnedew sejħiet għall-offerti fl-2008 għat-twettiq, taħt kuntratti, studji u valutazzjonijiet speċifiċi fl-oqsma tas-sigurtà fl-ikel, is-saħħa u l-benessri ta’ l-annimali u ż-żooteknika. Skond ir-Regolament tal-Kunsill (KE) Nru 1290/2005 tal-21 ta’ Ġunju 2005 dwar il-finanzjament tal-Politika Agrikola Komuni (5), il-miżuri veterinarji jridu jiġu ffinanzjati mill-Fond Agrikolu Ewropew ta’ Garanzija. Għal finijiet ta’ kontroll finanzjarju, għandhom japplikaw l-Artikoli 9, 36 u 37 ta’ dak ir-Regolament. |
(8) |
Il-ħlas tal-kontribut finanzjarju mill-Komunità għandu jkun suġġett għall-kundizzjoni li l-azzjonijiet effettivament twettqu u li l-kuntratturi jipprovdu t-tagħrif meħtieġ kollu. |
(9) |
Il-miżuri stipulati f’din id-Deċiżjoni huma skond l-opinjoni tal-Kumitat Permanenti għall-Katina Almentari u s-Saħħa ta’ l-Annimali, |
IDDEĊIDIET KIF ĠEJ:
Artikolu 1
TRACES (Trade Control and Expert system – Sistema Esperta u ta’ Kontroll tal-Kummerċ)
Qiegħed jingħata kontribut finanzjarju Komunitarju għall-akkomodazzjoni, il-ġestjoni u l-manteniment tas-sistema TRACES, introdotta mid-Deċiżjoni 2003/2/KE, għall-ammonti u l-objettivi li ġejjin:
(a) |
EUR 1 000 000 għall-akkomodazzjoni; |
(b) |
EUR 500 000 għall-akkwist ta’ l-appoġġ loġistiku neċessarju fi ħdan il-qafas ta’ l-għajnuna għall-utenti; |
(ċ) |
EUR 300 000 għax-xiri ta’ sostenn ta’ manutenzjoni neċessarju sabiex is-sistema tiġi konformi ma’ l-iżviluppi legali u tekniċi. |
(d) |
EUR 200 000 għall-iżviluppi neċessarji ta’ l-ipproċessar tad-data; |
(e) |
EUR 250 000 għall-iżvilupp ta’ l-interface bejn id-databases nazzjonali ta’ identifikazzjoni tal-bovini |
Artikolu 2
ADNS (Animal disease notification system – Sistema ta’ notifika tal-mard ta’ l-annimali)
Qiegħed jingħata kontribut finanzjarju Komunitarju ta’ EUR 270 000 għall-aġġornament tas-sistema ta’ notifika tal-mard ta’ l-annimali bbażata fuq id-Deċiżjoni 2005/176/KE
Artikolu 3
Komunikazzjoni fl-oqsma tas-saħħa ta’ l-annimali u l-benessri ta’ l-annimali
Qiegħed jingħata kontribut finanzjarju għall-miżuri ta’ komunikazzjoni lil awtoritajiet kompetenti u ċittadini, bl-għan li jinxtered tagħrif dwar il-leġiżlazzjoni Komunitarja fl-oqsma tas-saħħa ta’ l-annimali u l-benessri ta’ l-annimali, għall-ammonti li ġejjin:
(a) |
EUR 2 500 000 fil-qasam tas-saħħa ta’ l-annimali; |
(b) |
EUR 150 000 fil-qasam tal-benessri ta’ l-annimali. |
Artikolu 4
Studji u valutazzjonijiet
Qiegħed jingħata kontribut finanzjarju Komunitarju ta’ ammont massimu ta’ EUR 300 000 għal-istudji u l-valutazzjonijiet li ġejjin:
(a) |
studju tal-benfiċċju għall-ispejjeż dwar l-identifikazzjoni elettronika tal-baqar; |
(b) |
valutazzjoni tal-laboratorji ta’ referenza Komunitarja fil-qasam tas-saħħa ta’ l-annimali u ż-żooteknika. |
Artikolu 5
Approprjazzjonijiet
1. Il-kontributi finanzjarji stipulati fl-Artikoli 1 sa 4 għandhom ikunu ffinanzjati permezz tal-linja tal-baġit 17 04 02 01 tal-baġit tal-Komunitajiet Ewropej għall-2008.
2. L-azzjonijiet imsemmija fl-Artikolu 4 se jitwettqu permezz ta’ żewġ kuntratti speċifiċi. Dawn iż-żewġ kuntratti speċifiċi se jiġu ffirmati matul l-2008.
Magħmula fi Brussell, 6 ta’ Mejju 2008.
Għall-Kummissjoni
Androulla VASSILIOU
Membru tal-Kummissjoni
(1) ĠU L 224, 18.8.1990, p. 19. Id-Deċiżjoni kif emendata l-aħħar mir-Regolament (KE) Nru 1791/2006 (ĠU L 363, 20.12.2006, p. 1).
(3) ĠU L 59, 5.3.2005, p. 40. Id-Deċiżjoni kif emendata mid-Deċiżjoni 2006/924/KE (ĠU L 354, 14.12.2006, p. 48).
(4) COM(2007) 539 finali.
(5) ĠU L 209, 11.8.2005, p. 1. Ir-Regolament kif emendat l-aħħar mir-Regolament (KE) Nru 1437/2007 (ĠU L 322, 7.12.2007, p. 1).