(1)

L-Artikolu 8(2) tad-Direttiva 91/414/KEE jistipola li Stat Membru jista', matul perjodu ta’ tnax-il sena min-notifika ta’ dik id-Direttiva, jawtorizza t-tqegħid fis-suq ta’ prodotti għall-ħarsien tal-pjanti li fihom sustanzi attivi mhux elenkati fl-Anness I ta’ dik id-Direttiva li diġà jinsabu fis-suq sentejn wara d-data tan-notifika, filwaqt li dawk is-sustanzi jkunu qegħdin jiġu eżaminati bil-mod fil-qafas ta’ programm ta’ ħidma.

(2)

Ir-Regolamenti tal-Kummissjoni (KE) Nru 451/2000 (2) u (KE) Nru 703/2001 (3) jistipulaw ir-regoli dettaljati għall-implimentazzjoni tat-tieni stadju tal-programm ta’ ħidma msemmi fl-Artikolu 8(2) tad-Direttiva 91/414/KEE u jistabbilixxu lista ta’ sustanzi attivi li għandhom jiġu vvalutati, bil-għan ta’ l-inklużjoni possibbli tagħhom fl-Anness I tad-Direttiva 91/414/KEE. Dik il-lista tinkludi t-trifluralin.

(3)

Għat-trifluralin l-effetti fuq is-saħħa tal-bniedem u fuq l-ambjent ġew ivvalutati skond id-dispożizzjonijiet stipolati mir-Regolamenti (KE) Nru 451/2000 u (KE) Nru 703/2001 għal medda ta’ użi proposti min-notifikanti. Barra minn hekk, dawn ir-Regolamenti jaħtru l-Istati Membri relaturi li għandhom jippreżentaw ir-rapporti relevanti ta’ valutazzjoni u r-rakkomandazzjonijiet lill-Awtorità Ewropea għas-Sikurezza ta’ l-Ikel (EFSA) skond l-Artikolu 8(1) tar-Regolament (KE) Nru 451/2000. Għat-trifluralin l-Istat Membru relatur kien il-Greċja u t-tagħrif kollu relevanti kien ippreżentat fil-11 ta’ Lulju 2003.

(4)

Ir-rapport ta’ valutazzjoni saritlu reviżjoni inter pares mill-Istati Membri u l-EFSA fil-Valutazzjoni tal-Grupp ta’ Ħidma tiegħu u kien ippreżentat lill-Kummissjoni fl-14 ta’ Marzu 2005 fil-format tal-konklużjoni ta’ l-EFSA fir-rigward tar-reviżjoni inter pares tal-valutazzjoni tar-riskju tal-pestiċidi tas-sustanza attiva trifluralin (4). Dan ir-rapport ġie rivedut mill-Istati Membri u mill-Kummissjoni fi ħdan il-Kumitat Permanenti dwar il-Katina ta’ l-Ikel u s-Saħħa ta’ l-Annimali u ġie ffinalizzat fit-16 ta’ Marzu 2007 fil-format tar-rapport ta’ reviżjoni tal-Kummissjoni għat-trifluralin.

(5)

Matul il-valutazzjoni ta’ din is-sustanza attiva, qam xi tħassib. It-Trifluralin għandu tossiċità għolja għal organiżmi akwatiċi, b'mod partikolari l-ħut. Hija wkoll persistenti ħafna fil-ħamrija u mhijiex faċilment bijodegradabbli. Barra minn dan, turi potenzjal għal akkumulazzjoni. B'mod partikolari, taqbeż b'mod sinifikanti l-fattur massimu ta’ bijokonċentrazzjoni (BCF) stipulat fid-Direttiva 91/414/KEE għal organiżmi akwatiċi, li turi potenzjal għal bijoakkumulazzjoni f'organiżmi tali. Minħabba l-volatilità għolja tagħha, il-moviment tagħha minn ġo l-arja ma jistax jiġi eskluż u, minkejja degradazzjoni fotokimika rapida, programmi ta’ monitoraġġ urew migrazzjoni lejn postijiet 'il bogħod mill-applikazzjoni. Dan it-tħassib wera li t-trifluralin ma jilħaqx il-kriterji għall-inklużjoni fl-Anness I tad-Direttiva 91/414/KEE.

(6)

Il-Kummissjoni stiednet lin-notifikant sabiex iressaq il-kummenti tiegħu dwar ir-riżultati tar-reviżjoni inter pares u dwar jekk hux bi ħsiebu jkompli jappoġġja s-sustanza. In-notifikant ippreżenta l-kummenti tiegħu li ġew eżaminati bir-reqqa. Madankollu, minkejja l-argumenti mressqa, it-tħassib imsemmi hawn fuq baqa' ma ssolviex, u l-valutazzjonijiet li saru abbażi tat-tagħrif ippreżentat u vvalutat matul il-laqgħat esperti ta’ l-EFSA ma wrewx li wieħed jista' jistenna li, fil-kundizzjonijiet proposti ta’ użu, prodotti għall-ħarsien tal-pjanti li fihom it-trifluralin jissodisfaw b'mod ġenerali r-rekwiżiti stipulati fl-Artikolu 5(1)(a) u (b) tad-Direttiva 91/414/KEE.

(7)

Għalhekk, it-trifluralin ma għandux jiġi inkluż fl-Anness I tad-Direttiva 91/414/KEE.

(8)

Għandhom jittieħdu miżuri biex jiżguraw li l-awtorizzazzjonijiet mogħtija għall-prodotti għall-ħarsien tal-pjanti li jkun fihom it-trifluralin jiġu rtirati fi żmien perjodu preskritt u ma jiġġeddux u li ma jingħatawx awtorizzazzjonijiet ġodda għal prodotti bħal dawn.

(9)

Kwalunkwe perjodu ta’ konċessjoni mogħti minn Stat Membru għar-rimi, il-ħażna, it-tqegħid fis-suq u l-użu tal-ħażniet eżistenti tal-prodotti għall-ħarsien tal-pjanti li fihom it-trifluralin, għandu jkun limitat għal perjodu ta’ tnax-il xahar sabiex il-ħażniet eżistenti jkunu jistgħu jintużaw fi staġun wieħed ieħor ta’ tkabbir li jiżgura li prodotti tal-ħarsien tal-pjanti li fihom it-trifluralin jibqgħu disponibbli għall-bdiewa għal 18-il xahar mill-adozzjoni ta’ din id-Deċiżjoni.

(10)

Din id-deċiżjoni hija bla ħsara għall-preżentazzjoni ta’ applikazzjoni għat-trifluralin skond id-dispożizzjonijiet ta’ l-Artikolu 6 (2) tad-Direttiva 91/414/KEE fid-dawl ta’ inklużjoni possibbli fl-Anness I tagħha.

(11)

Il-miżuri previsti f'din id-Deċiżjoni huma skond l-opinjoni tal-Kumitat Permanenti dwar il-Katina ta’ l-Ikel u s-Saħħa ta’ l-Annimali,

(a)

l-awtorizzazzjonijiet għal prodotti għall-ħarsien tal-pjanti li fihom it-trifluralin jiġu rtirati sa l-20 ta’ Marzu 2008;

(b)

l-ebda awtorizzazzjoni għal prodotti għall-ħarsien tal-pjanti li fihom it-trifluralin mhi se tingħata jew tiġġedded mid-data tal-pubblikazzjoni ta’ din id-Deċiżjoni.