1.12.2007   

MT

Il-Ġurnal Uffiċjali ta’ l-Unjoni Ewropea

558

(1)

Ir-Regolament tal-Kummissjoni (KE) Nru 466/2001 tat-8 ta’ Marzu 2001 li jiffissa l-livelli massimi ta’ ċerti kontaminanti fl-oġġetti ta’ l-ikel (2) ġie emendat sostanzjalment ħafna drabi. Huwa neċessarju li jerġgħu jiġu emendati l-livelli massimi ta’ ċerti kontaminanti biex tiġi kkunsidrata l-informazzjoni ġdida u l-iżviluppi fil-Codex Alimentarius. Fl-istess ħin, it-test għandu, fejn jixraq, jiġi ċċarat. Ir-Regolament (KE) Nru 466/2001 għandu għalhekk jiġi sostitwit.

(2)

Huwa essenzjali, sabiex issir protezzjoni tas-saħħa pubblika, li l-kontaminanti jinżammu f’livelli li huma aċċettabbli tossikoloġikament.

(3)

Minħabba d-disparitajiet bejn il-liġijiet ta’ l-Istati Membri u r-riskju konsegwenti ta’ tagħwiġ fil-kompetizzjoni, għal uħud mill-kontaminanti huma meħtieġa miżuri Komunitarji sabiex tiġi żgurata l-unità tas-suq filwaqt li jinżamm il-prinċipju tal-proporzjonalità.

(4)

Il-livelli massimi għandhom jiġu ffissati fuq livell strett li jkun jista’ jintlaħaq b’mod raġonevoli permezz ta’ prattiki agrikoli, ta’ sajd u ta’ manufattura tajbin u bil-konsiderazzjoni tar-riskju li huwa relatat mal-konsum ta’ l-ikel. Fil-każ tal-kontaminanti li huma kkunsidrati karċinoġeni ġenotossiċi jew fil-każ fejn l-esponiment kurrenti tal-popolazzjoni jew ta’ gruppi vulnerabbli fil-popolazzjoni huwa qrib jew ogħla mill-konsum tollerabbli, il-livelli massimi għandhom jiġu ffissati fuq livell li jkunu baxxi kemm jista’ jintlaħaq (ALARA). Tali avviċinamenti jaċċertaw li l-operaturi fil-kummerċ ta’ l-ikel japplikaw miżuri għall-prevenzjoni u t-tnaqqis tal-kontaminazzjoni sakemm huwa possibbli sabiex jipproteġu s-saħħa pubblika. Aktar minn hekk huwa xieraq għall-protezzjoni tas-saħħa tat-trabi u t-tfal żgħar, li jiffurmaw grupp vulnerabbli, li jiġi stabbilit l-iktar livell baxx, li jista’ jinkiseb permezz tal-għażla stretta tal-materja prima użata fil-manifattura ta’ ikel tat-trabi u l-ikel tat-tfal żgħar. Il-għażla bir-reqqa tal-materja prima hija xierqa wkoll għall-produzzjoni ta’ ċerti oġġetti ta’ l-ikel speċifiċi bħalma huma l-granza għall-konsum mill-bniedem.

(5)

Sabiex il-livelli massimi jkunu jistgħu jiġu applikati għall-oġġetti ta’ l-ikel imnixxfin, ipproċessati u komposti, fejn ma ġew stabbiliti ebda livelli massimi Komunitarji, l-operaturi fil-kummerċ ta’ l-ikel għandhom jipprovdu konċentrazzjoni speċifika u fatturi ta’ dilwizzjoni akkumpanjati minn data sperimentali li tiġġustifika l-fattur propost.

(6)

Sabiex tkun aċċertata l-protezzjoni effiċjenti tas-saħħa pubblika, l-prodotti li fihom il-kontaminanti li huma ogħla mil-livelli massimi m’għandhomx jitqiegħdu fis-suq bħala tali, wara t-taħlit ma’ oġġetti ta’ l-ikel oħrajn jew użati bħala ingredjent f’ikel ieħor.

(7)

Huwa magħruf li lis-issortjar jew trattamenti fiżiċi oħrajn jagħti l-possibbiltà ta’ tnaqqis tal-kontenut ta’ l-alfatossini ta’ konsenji ta’ ġwież ta’ l-art, ġwież, frott imnixxef u qamħirrum. Sabiex jitnaqqsu l-effetti fuq il-kummerċ, jixraq li jiġi permess kontenut ta’ alfatossini ogħla għal dawk il-prodotti li mhumiex maħsuba għall-konsum dirett mill-bniedem jew bħala ingredjent fl-oġġetti ta’ l-ikel. F’dawn il-każi, il-livelli massimi ta’ l-alfatossini għandhom jiġu ffissati bil-konsiderazzjoni ta’ l-effettività tat-trattamenti msemmija hawn fuq għat-tnaqqis tal-kontenut ta’ l-alfatossini fil-ġwież ta’ l-art, fil-ġwież, fil-frott imnixxef u fil-qamħirrum sa livelli li huma taħt il-limiti ta’ kontenut massimu stipulati għal dawk il-prodotti li huma maħsuba għall-konsum dirett mill-bniedem jew għall-użu bħala ingredjent fl-oġġetti ta’ l-ikel.

(8)

Sabiex jinġieb fis-seħħ l-infurzar effettiv tal-livelli massimi ta’ ċerti kontaminanti f’ċerti oġġetti ta’ l-ikel, jixraq li jiġu pprovduti dispożizzjonijiet xierqa ta’ tikkettjar għal dawn il-każi.

(9)

Minħabba l-kondizzjonijiet klimatiċi ta’ ċerti Stati Membri, huwa diffiċli li jiġi aċċertat li l-livelli massimi ma jiġux maqbuża għall-ħass frisk u għall-ispinaċi friski. Dawn l-Istati Membri għandhom jingħataw permess għal perijodu temporanju sabiex ikomplu jawtorizzaw il-bejgħ fis-suq tal-ħass frisk u ta’ l-ispinaċi frisk ikkoltivat u maħsub għall-konsum fit-territorju tagħhom b’kontenut ta’ nitrat li huwa ogħla mil-livelli massimi. Il-produtturi tal-ħass u ta’ l-ispinaċi stabbiliti fl-Istati Membri li ngħataw dawn l-awtorizzazzjonijiet imsemmija għandhom progressivament jimmodifikaw il-metodi agrikoli tagħhom billi japplikaw il-prattiki ta’ agrikoltura tajba rrakkomandati fuq livell nazzjonali.

(10)

Ċerti speċi ta’ ħut li joriġinaw mir-reġjun Baltiku jistgħu jinkludu livelli għoljin ta’ dijossini u ta’ PCBs li jixbħu lid-dijossini. Proporzjonijiet sinifikanti ta’ dawn l-ispeċi ta’ ħut mir-reġjun Baltiku mhux ser jikkonformaw mal-livelli massimi u għalhekk ser jiġu esklużi mid-dieta. Hemm indikazzjonijiet li l-esklużjoni tal-ħut mid-dieta jista’ jkollha impatt sanitarju negattiv fuq ir-reġjun Baltiku.

(11)

L-Iżvezja u l-Baltiku għandhom sistema fis-seħħ li għandha l-kapaċità li taċċerta li l-konsumaturi huma infurmati sew dwar ir-rakkomandazzjonijet ta’ dieta li jikkonċernaw ir-restrizzjonijiet fuq il-konsum ta’ ħut mir-reġjun Baltiku permezz ta’ gruppi identifikabbli tal-popolazzjoni sabiex jevitaw ir-riskji sanitarji potenzjali. Għalhekk, jixraq li tingħata deroga lill-Finlandja u l-Iżvezja sabiex jitqiegħdu fis-suq għall-perijodu temporanju ċerti speċi ta’ ħut li joriġinaw mir-reġjun Baltiku u li huma maħsuba għall-konsum fit-territorju tagħhom b’livelli ta’ dijossini u ta’ PCBs li jixbħu d-dijossini li huwa ogħla minn dawk stipulati f’dan ir-Regolament. Il-miżuri neċessarji għandhom jiġu implimentati sabiex ikun aċċertat li l-ħut u l-prodotti tal-ħut ma jikkonformawx mal-livelli massimi ma jitqiegħdux fis-suq fi Stati Membri oħrajn. Il-Finlandja u l-Iżvezja jirrappurtaw kull sena lill-Kummissjoni r-riżultati tal-monitoraġġ tagħhom tal-livelli tad-dijossini u tal-PCBs li jixbħu lid-dijossini mir-reġjun Baltiku u l-miżuri għat-trażżin ta’ l-esponiment tal-bniedem għad-dijossini u għall-PCBs li jixbħu d-dijossini mir-reġjun Baltiku.

(12)

Sabiex ikun aċċertat il-livelli massimi jiġu infurzati b’mod uniformi, l-istess kriterji ta’ kampjunar u l-istess kriterji ta’ rendiment fl-analiżi għandhom jiġu applikati mill-awtoritajiet kompetenti fil-Komunità. Huwa għaldaqstant importanti li r-riżultati analitiċi jiġu rrappurtati u interpretati b’mod uniformi. Il-miżuri fir-rigward tal-kampjunar u ta’ l-analiżi speċifikati f’dan ir-Regolament jipprovdu għal regoli uniformi dwar rappurtar u interpretazzjoni.

(13)

Għal ċerti kontaminanti, l-Istati Membri u l-partijiet interessati għandhom jimmonitorjaw u jirrappurtaw il-livelli, kif ukoll il-progress fir-rigward ta’ l-applikazzjoni u l-miżuri preventivi, sabiex jippermettu lill-Kummissjoni li tivvaluta l-ħtieġa ta’ modifika tal-miżuri eżistenti jew tadotta miżuri addizzjonali.

(14)

Kull livell massimu adottat fuq livell Komunitarju jista’ jkun soġġett għal reviżjoni sabiex jittieħdu in konsiderazzjoni l-avvanzi fix-xjenza u l-konoxxenza teknika u t-titjib fil-prattiki tajbin ta’ agrikoltura, sajd u manifattura.

(15)

Il-granza u ż-żrieragħ jistgħu jitqiegħdu fis-suq għall-konsum dirett mill-bniedem u huwa għalhekk xieraq li jiġi stabbilit livell massimu għad-deoxynivalenol u ż-zearalenone għal dawn il-komoditajiet.

(16)

Il-Codex Alimentarius iffissa reċentement il-livell massimu għaċ-ċomb fil-ħut li huwa aċċettat mill-Komunità. Huwa għalhekk xieraq li tiġi mmodifikata d-dispożizzjoni kurrenti għaċ-ċomb fil-ħut kif jixraq.

(17)

Ir-Regolament Nru 853/2004 tal-Parlament Ewropew u tal-Kunsill tad-29 ta’ April 2004 li jistipula regoli speċifiċi ta’ l-iġjene għall-ikel li joriġina mill-annimali (3) jiddefinixxi l-oġġetti ta’ l-ikel li joriġinaw mill-annimali, u b’konsegwenza ta’ dan l-inklużjonijiet fir-rigward ta’ l-oġġetti ta’ l-ikel li joriġinaw mill-annimali għandhom jiġu emendati f’ċerti każi skond it-terminoloġija użata f’dak ir-Regolament.

(18)

Huwa meħtieġ li jiġi pprovdut li l-livelli massimi tal-kontaminanti ma japplikawx għall-oġġetti ta’ l-ikel li tqiegħdu legalment fuq is-suq Komunitarju qabel id-data ta’ l-applikazzjoni ta’ dawn il-livelli massimi.

(19)

Fir-rigward tan-nitrati, il-ħxejjex huma sors ewlieni għall-konsum uman tan-nitrati. Il-Kumitat Xjentifiku ta’ l-Ikel (SCF) stipula fl-opinjoni tiegħu tat-22 ta’ Settembru 1995 (4) li l-konsum totali tan-nitrati huwa normalment inqas sew mill-konsum aċċettabbli ta’ kuljum (ADI) ta’ 3,65 mg/kg ta’ piż tal-ġisem (bw). Hu rrrakkomanda, madanakollu, t-tkomplija ta’ l-isforzi biex jitnaqqas l-esponiment tan-nitrat minħabba l-ikel u l-ilma.

(20)

Minħabba li l-kondizzjonijiet klimatiċi għandhom influwenza ewlenija fuq il-livelli tan-nitrati f’ċerti ħxejjex bħalma huma l-ħass u l-ispinaċi, livelli massimi differenti għandhom b’hekk jiġu ffissati skond l-istaġjun.

(21)

Fir-rigward ta’ l-alfatossini, l-SCF ta l-opinjoni tiegħu fit-23 ta’ Settembru 1994 li l-alfatossini huma karċinoġeni ġenotossiċi (5). Skond dik l-opinjoni, jixraq li jiġi limitat il-kontenut totali ta’ l-alfatossini ta’ l-ikel (somma ta’ l-alfatosini B1, B2, G1 u G2) kif ukoll il-kontenut ta’ l-alfatossina B1 biss li huwa l-kompost tossiku l-iktar perikoluż. Għall-alfatossina M1 fl-ikel tat-trabi u l-ikel tat-tfal żgħar, tnaqqis possibbli tal-livell kurrenti massimu għandu jiġi kkunsidrat fid-dawl ta’ l-iżviluppi fil-proċeduri analitiċi.

(22)

Fir-rigward ta’ l-Ochratoxin A (OTA), l-SCF adotta opinjoni xjentifika fis-17 ta’ Settembru 1998 (6). Valutazzjoni tal-konsum fid-dieta ta’ l-OTA mill-popolazzjoni tal-Komunità saret (7) fil-qafas tad-Direttiva tal-Kunsill 93/5/KEE tal-25 ta’ Frar 1993 dwar l-assistenza għall-Kummissjoni u l-koperazzjoni mill-Istati Membri fl-eżaminazzjoni xjentifika tal-mistoqsijiet li jirrigwardaw l-ikel (8) (SCOOP). L-Awtorità Ewropea ta’ l-Ikel (EFSA) adottat fuq rikjesta tal-Kummissjoni opinjoni xjentifika aġġornata fir-rigward ta’ l-ochratoxin A fl-ikel fl-4 ta’ April 2006 (9) u ħadet in konsiderazzjoni l-informazzjoni xjentifika u l-kosum ta’ kull ġimgħa tollerabbli (TWI) ta’ 120 ng/kg b.w.

(23)

Skond dawn l-opinjonijiet, jixraq li jiġu stipulati livelli massimi għaċ-ċereali, prodotti taċ-ċereali, frott tad-dielja mnixxef, kafe mixwi, inbid, meraq ta’ l-għeneb u ikel tat-trabi u tat-tfal żgħar, li kollha kemm huma jikkontribwixxu b’mod sinifikanti għall-esponiment ġenerali tal-bniedem għall-OTA jew għall-esponiment ta’ gruppi vulnerabbli ta’ konsumaturi bħalma huma t-tfal.

(24)

L-approprjatezza ta’ l-istipular tal-livelli massimi għall-OTA fl-oġġetti ta’ l-ikel bħalma huma l-frott imnixxef li mhux frott imnixxef tad-dielja, il-kakaw u prodotti tal-kakaw, ħwawar, birra u likorizja, kif ukoll reviżjoni tal-livelli massimi eżistenti, partikolarment għall-OTA fil-frott imnixxef tad-dielja, għandha tiġi kkunsidrata fid-dawl ta’ l-opinjoni reċenti ta’ l-EFSA.

(25)

Fir-rigward tal-patulin, l-SCF ikkonfermaw fil-laqgħa tagħhom tat-8 ta’ Marzu 2000 il-konsum massimu tollerabbli ta’ kuljum proviżorju (PMTDI) ta’ 0,4 µg/kg bw għall-patulin  (10).

(26)

Fl-2001, saret ħidma SCOOP “Valutazzjoni tal-konsum fid-dieta għall-patulin mill-popolazzjoni ta’ l-Istati Membri ta’ l-UE” fil-qafas tad-Direttiva 1993/5/KEE (11).

(27)

Skond dik il-valutazzjoni u bil-konsiderazzjoni tal-PMTDI, il-livelli massimi għandhom jiġu stipulati għall-patulin f’ċerti oġġetti ta’ l-ikel għall-protezzjoni tal-konsumaturi minn kontaminazzjoni inaċċettabbli. Dawn il-livelli massimi għandhom jiġu riveduti u, jekk hu neċessarju, jitnaqqsu bil-konsiderazzjoni tal-progress xjentifiku u l-konoxxenza teknoloġika u l-implimentazzjoni tar-Rakkomandazzjoni tal-Kummissjoni 2003/598/KE tal-11 ta’ Awissu 2003 dwar il-prevenzjoni u tnaqqis tal-kontaminazzjoni mill-patulin fil-meraq tat-tuffieħ u l-ingredjenti tal-meraq tat-tuffieħ f’xorb ieħor (12).

(28)

Fir-rigward tat-tossini tal-Fusarium l-SCF adotta ħafna opinjonijiet li jivvalutaw id- deoxynivalenol f’Diċembru ta’ l-1999 (13) u stabbilixxa konsum ta’ kuljum tollerabbli (TDI) ta’1 µg/kg b.w., zearalenone f’Ġunju ta’ l-2000 (14) u stabbilixxa TDI temporanju ta’ 0,2 µg/kg b.w., fumonisins f’Ottubru 2000 (15) (aġġornat f’April 2003) (16) stabbilixxa TDI ta’ 2 µg/kg b.w., nivalenol f’Ottubru 2000 (17) stabbilixxa TDI tempornaju ta’ 0,7 µg/kg b.w., tossini T-2 u HT-2 f’Mejju 2001 (18) stabbilixxa TDI ikkombinat temporanju ta’ 0,06 µg/kg b.w. u t-trichothecenes bħala grupp fi Frar 2002 (19).

(29)

Fil-qafas tad-Direttiva 93/5/KEE il-ħidma SCOOP “Ġbir ta’ data dwar okkorrenza tat-tossini tal-Fusarium fl-ikel u valutazzjoni tal-konsum fid-dieta mill-popolazzjoni ta’ l-Istati Membri ta’ l-UE” inġiebet fis-seħħ u ġiet iffinalizzata f’Settembru 2003 (20).

(30)

Skond l-opinjionijiet xjentifiċi u l-valutazzjoni tal-konsum fid-dieta, jixraq li jiġu stipulati livelli massimi għad-deoxynivalenol, zearalenone u l-fumonisins. Fir-rigward tal-fumonisins, il-monitoraġġ mir-riżultati ta’ kontroll tal-ħsad reċenti jindika li l-qamħirrum u l-prodotti tal-qamħirrum jista’ jkun ikkontaminat sew bil-fumonisins u jixraq li l-miżuri jittieħdu biex jiġu evitati tali qamħirrum u prodotti tal-qamħirrum li huma kkontaminati sew milli jidħlu fil-katina alimentari.

(31)

Stimi ta’ konsum jindikaw li l-preżenza tat-tossini T-2 u HT-2 tista’ tkunu ta’ rilevanza għas-saħħa pubblika. Għalhekk, l-iżvilupp ta’ metodu rakkomandabbli u sensittiv, il-ġbir ta’ iktar data ta’ okkorrenza u iktar investigazzjonijiet/riċerka fil-fatturi involuti fil-preżenza tat-tossina T-2 u HT-2 fiċ-ċereali u l-prodotti taċ-ċereali, partikolarment fil-ħafur u prodotti tal-ħafur, huma meħtieġa u huma ta’ prijorità għolja.

(32)

Mhux neċessarju minnħabba il-ko-okkorrenza li jiġu kkunsidrati miżuri speċifiċi għat-3-acetyl deoxynivalenol, 15-acetyl deoxynivalenol u fumonisin B3, minħabba li l-miżuri meħtieġa fir-rigward ta’ partikolarment id-deoxynivalenol u fumonisin B1 u B2 għandhom jipproteġu wkoll il-popolazzjoni umana mill-esponiment inaċċettabbli mit-3-acetyl deoxynivalenol, 15-acetyl deoxynivalenol u l-fumonisin B3 L-istess japplika għan-nivalenol li għalihom sa ċertu punt il-grad tal-ko-okkorrenza mad-deoxynivalenol jista’ jiġi osservat. Aktar minn hekk, l-esponiment tal-bniedem għan-nivalenol huwa stmat li huwa b’mod sinifikanti taħt it-t-TDI. Fir-rigward tat-trichothecenes li huma kkunsidrati fil-ħidma SCOOP li tissemma’ hawn fuq, bħalma huwa t-3-acetyldeoxynivalenol, 15-acetyldeoxynivalenol, fusarenon-X, T2-triol, diacetoxyscirpenol, neosolaniol, monoacetoxyscirpenol u verrucol, l-informazzjoni limitata disponibbli tindika li ma’ dawn ma jinstabux f’ambitu wiesa’ u l-livelli misjuba huma ġeneralment baxxi.

(33)

Il-kondizzjonijiet klimatiċi matul it-tkabbir, partikolarment fil-formazzjoni tal-fjuri għandhom influwenza fuq il-kontenut tal-Fusarium. Madanakollu, l-prattika agrikola tajba, fejn il-fatturi ta’ riskju huma mnaqqsa sa minimu, jistgħu jipprevjenu sa ċertu punt il-kontaminazzjoni mill-fungi tal-Fusarium. Ir-Rakkomandazzjoni tal-Kummissjoni 2006/583/KE tas-17 ta’ Awwissu 2006 dwar il-prevenzjoni u r-riduzzjoni tat-tossini tal-Fusarium fiċ-ċereali u fil-prodotti taċ-ċereali (21) tinkludi prinċipji ġenerali għall-prevenzjoni u r-riduzzjoni tal-kontaminazzjoni mit-tossina tal-Fusarium (zearalenone, fumonisins u trichothecenes) fiċ-ċereali li għandhom jiġu implimentati mill-iżvilupp tal-kodiċi nazzjonali ta’ prattika bbażati fuq dawn il-prinċipji.

(34)

Il-livelli massimi tat-tossini tal-Fusarium għandhom jiġu stipulati għaċ-ċereali mhux ipproċessati li tqiegħdu fis-suq għall-ipproċessar fl-ewwel stadju. Il-proċeduri ta’ tindif, l-issortjar u tindif mhumiex ikkunsidrati bħala pproċessar ta’ l-ewwel stadju sakemm ebda azzjoni fiżika ma tiġix eżerċitata fuq il-qalba tal-qamħ innifisha. It-tagħrik għandu jiġi kkunsidrat bħala l-ewwel stadju ta’ proċessar.

(35)

Minħabba l-grad ta’ tneħħija tat-tossina tal-Fusarium fiċ-ċereali mhux ipproċessati permezz tad-tindif u l-ipproċessar jista’ jvarja, jixraq li jiġu stipulati livelli massimi għall-prodott finali ta’ ċereali għall-konsumatur kif ukoll għall-ingredjenti ewlenija ta’ l-ikel li huma dderivati miċ-ċereali li jkollhom leġiżlazzjoni infurzabbli fl-interess ta’ l-aċċertament tal-protezzjoni tas-saħħa pubblika.

(36)

Għall-qamħirrum, mhux il-fatturi kollha involuti fil-formazzjoni tat-tossini tal-Fusarium, b’mod partikolari iz-zearalenone u l-fumosins B1 u B2 huma magħrufin preċiżament. Għalhekk, perijodu ta’ żmien għandu jingħata sabiex l-operaturi fil-kummerċ ta’ l-ikel fil-katina taċ-ċereali ikunu jistgħu jwettqu investigazzjonijiet fuq is-sorsi tal-formazzjoni tal-mikotossini u fuq l-identifikazzjoni tal-miżuri ta’ l-immaniġġjar li għandhom jittieħdu għall-prevenzjoni tal-preżenza tagħhom sakemm huwa possibbli raġonevolment. Il-livelli massimi bbażati fuq id-data ta’ l-okkorrenz li hija disponibbli bħalissa huma proposti biex japplikaw mill-2007 fil-każ ta’ livelli massimi speċifiċi fuq informazzjoni ġdida dwar l-okkorrenza u l-formazzjoni ma jiġux stipulati sa dak iż-żmien.

(37)

Bil-konsiderazzjoni tal-livelli baxxi ta’ kontaminazzjoni tat-tossini tal-Fusarium li jinstabu fir-ross, ebda livell massimu ma huwa propost għar-ross u l-prodotti tar-ross.

(38)

Reviżjoni tal-livelli massimi tad-deoxynivalenol, zearalenone, fumonisin B1 u B2 kif ukoll il-konvenjenza fl-istipular ta’ livell massimu għat-tossina tat-T-2 u u ta’ l-HT-2 fiċ-ċereali u fil-prodotti taċ-ċereali għandha tiġi kkunsidrata sa l-1 ta’ Lulju 2008, bil-konsiderazzjoni tal-progress fil-konoxxenza xjentifika u teknoloġika dwar dawn it-tossini fl-ikel.

(39)

Fir-rigward taċ-ċomb, l-SCF adotta opinjoni fid-19 ta’ Ġunju 1992 (22) li approvat il-konsum proviżorju tollerabbli f’kull ġimgħa (PTWI) ta’ 25 µg/kg bw propost mid-WHO fl-1986. L-SCF ikkonkludiet fl-opinjoni tagħha li l-livell medju fl-oġġetti ta’ l-ikel ma jidhirx li jikkawża biża’ immedjata.

(40)

Fil-qafas tad-Direttiva 93/5/KEE 2004 il-ħidma SCOOP-ħidma 3.2.11 “Valutazzjoni ta’ l-esponiment fid-dieta għall-arseniku, l-kadmju, iċ-ċomb u l-merkurju tal-popolazzjoni ta’ l-Istati Membri ta’ l-UE” inġiebet fis-seħħ fl-2004 (23). Fid-dawl ta’ din il-valutazzjoni u l-opinjoni mogħtija mill-SCF, jixraq li jittieħdu miżuri għat-tnaqqis tal-preżenza taċ-ċomb fl-ikel kemm huwa possibbli.

(41)

Fi-rigward tal-kadmju, l-SCF approvat l-opinjoni tagħha tat-2 ta’ Ġunju 1995 (24) il-PTWI ta’ 7 µg/kg bw u rrakkomanda sforzi iktar effettivi għat-tnaqqis ta’ l-esponiment fid-dieta tal-kadmju minħabba li l-oġġetti ta’ l-ikel huma s-sors ewlieni tal-konsum tal-kadmju mill-bniedem. Inġiebet fis-seħħ valutazzjoni dwar l-esponiment fid-dieta fil-ħidma SCOOP 3.2.11. Fid-dawl ta’ din il-valutazzjoni u l-opinjoni mogħtija mill-SCF, jixraq li jittieħdu miżuri għat-tnaqqis tal-preżenza tal-kadmju fl-ikel kemm huwa possibbli.

(42)

Fir-rigward tal-merkurju, l-EFSA adottat fl-24 ta’ Frar 2004 opinjoni relatata mal-merkurju u mal-methylmercury fl-ikel (25) u approvat il-konsum ta’ kull ġimgħa tollerabbli proviżorju ta’ 1,6 µg/kg bw. Il-methylmercury huwa l-forma kimika b’iktar konċern u jista’ jiffroma sa 90 % tat-total tal-merkurju fil-ħut u l-ikel tal-baħar. Bil-konsiderazzjoni ta’ l-eżitu tal-ħidma SCOOP 3.2.11, l-EFSA kkonkludew li l-livelli tal-merkurju li jinsabu fl-ikel, li mhumiex ħut u ikel tal-baħar, kienu ta’ konċern iktar baxx. Il-forom tal-merkurju preżenti f’dan l-ikel huma primarjament mhux methylmercury u huma għalhekk ikkunsidrati bħala ta’ riskju iktar baxx.

(43)

Aktar minn hekk l-iffissar tal-livelli massimi, il-pariri mmirati lejn il-konsumatur huwa avviċinament xieraq fil-każ tal-methylmercury għall-protezzjoni tal-gruppi vulnerabbli tal-popolazzjoni. Nota ta’ informazzjoni dwar il-methylmercury fil-ħut u fil-prodotti tas-sajd li jirrispondu għal din il-ħtieġa saret b’hekk disponibbli fuq il-portal tad-Direttorat Ġenerali dwar il-Protezzjoni tas-Saħħa u tal-Konumatur tal-Kummissjoni Ewropea (26). Ħafna Stati Membri ħarġu wkoll parir dwar din il-kwestjoni li huwa wkoll rilevanti għall-popolazzjoni tagħhom.

(44)

Fir-rigward tal-landa mhux organika, l-SCF ikkonkludew fl-opinjoni tagħhom tat-12 ta’ Diċembru 2001 (27) li l-livelli tal-landa inorganika ta’ 150 mg/kg f’xorb ġewwa bottijiet u 250 mg/kg f’ikel ieħor tal-bottijiet jistgħu jikkawżaw irritazzjoni gastrika f’xi uħud.

(45)

Għall-protezzjoni tas-saħħa pubblika minn dan ir-riskju tas-saħħa huwa meħtieġ li jiġu ffissati livelli masismi għal-landa inorganika fl-ikel tal-bottijiet u fix-xarbiet tal-bottijiet. Sakemm mad-data dwar is-sensitività tat-trabi u tat-tfal żgħar għal-landa inorganika fl-ikel ssir disponibbli, huwa meħtieġ li fuq bażi prekawzjonali li tiġi protetta saħħet dan il-grupp vulnerabbli tal-popolazzjoni u li jiġu stabbiliti livelli massimi iktar baxxi.

(46)

Fir-rigward tat-3-monochloropropane-1,2-diol (3-MCPD) SCF adottat fit-30 ta’ Mejju 2001 opinjoni xjentifika fir-rigward tat-3-MCPD fl-ikel (28), u aġġornat l-opinjoni tagħha tas-16 ta’ Diċembru 1994 (29) fuq bażi ta’ l-informazzjoni xjentifika ġdida u stabbiliet konsum tollerabbli ta’ kuljum (TDI) ta’ 2 µg/kg b.w għat-3-MCPD.

(47)

Fil-qafas tad-Direttiva 93/5/KEE saret u ġiet iffinalizzata l-ħidma SCOOP “Ġbir u kollazzjoni tad-data dwar il-livelli tat-3-MCPD u sustanza relatati fl-oġġetti ta’ l-ikel” f’Ġunju 2004 (30). Il-kontributuri ewlenin tat-3-MCPD lejn il-konsum fid-dieta kienu z-zalza tas-sojja u prodotti bbażati fuq iz-zalza tas-sojja. Ikel ieħor mikul fi kwantitajiet kbar, bħalma huma l-ħobż u n-noodles, taw ukoll kontribuzzjoni sinifikanti lejn il-konsum f’xi pajjiżi minħabba l-konsum għoli iktar milli livelli għoljin tat-3-MCPD preżenti f’dan l-ikel.

(48)

Għalhekk il-livelli massimi għandhom jiġu stabbiliti għat-3-MCPD fil-proteina veġetali idrolizzata (HVP) u fiz-zalza tas-sojja bil-konsiderazzjoni tar-risku relatat mal-konsum ta’ dan l-ikel. L-Istati Membri huma mitluba li jeżaminaw l-oġġetti ta’ l-ikel l-oħrajn għall-okkorrenza tat-3-MCPD sabiex jikkunsidraw il-ħtieġa ta’ stipular tal-livelli massimi għall-oġġetti ta’ l-ikel addizzjonali.

(49)

Fir-rigward tal-PCBs u d-dijossini, l-SCF adotta fit-30 ta’ Mejju 2001 opinjoni dwar id-dijossini u l-PCBs li jixbħu lid-dijossini fl-ikel (31), u aġġornaw l-opinjoni tagħhom tat-22 ta’ Novembru 2000 (32) billi ffissaw konsum tollerabbli ta’ kull ġimgħa ta’ 14 pg ta’ ekwivalent ta’ tossiċità ta’ l-Organizzazzjoni Dinjija tas-Saħħa (WHO-TEQ)/kg bw għad-dijossini u l-PCBs li jixbħu lid-dijossini.

(50)

Id-dijossini li jissemmew f’dan ir-Regolament ikopru grupp ta’ 75 konġeneri ta’ polychlorinated dibenzo-p-dioxin (PCDD) u 135 konġeneri ta’ dibenzofuran (PCDF), li huma polychlorinated li minnhom 17 huma ta’ inkwiet tossikoloġiku. Polychlorinated biphenyls (PCBs) huma grupp ta’ 209 konġeneru differenti li jistgħu jinqasmu f’żewġ gruppi skond il-proprjetajiet tossikoloġiċi tagħhom: 12-il konġeneru għandhom proprjetajiet tossikoloġiċi simili għad-dijossini u għalhekk ħafna drabi jissejjħu PCBs li jixbħu lid-dijossini. Il-PCBs l-oħrajn ma jurux tossiċità bħal tad-dijossini iżda għandhom profil tossikoloġiku differenti.

(51)

Kull konġeneru ta’ dijossini jew PCBs li jixbħu d-dijossini jippreżenta livell differenti ta’ tossiċità. Sabiex tista’ tiġi kkalkulata t-tossiċità ta’ dawn id-diversi konġeneri, il-kunċett tal-fatturi ta’ l-ekwivalenza tossika (TEFs) ġie introdott biex jiġu ffaċilitati l-istima tar-riskju u l-kontroll regolatorju. Dan ifisser li r-riżultati analitiċi li jirrigwardaw il-konġeneri individwali kollha tad-dijossini u tal-PCBs li jixbu lid-dijossini jiġu espressi fit-termini ta’ unità kwantifikabbli li huma l-iktar l-ekwivalenza tossika TCDD (TEQ).

(52)

L-istima ta’ l-esponiment li jikkunsidraw il-ħidma SCOOP “Valutazzjoni tal-konsum fid-dieta tad-dijossini u PCBs relatati mill-popolazzjoni ta’ l-Istati Membri ta’ l-UE” iffinalizzata f’Ġunju 2000 (33) tindika li proporzjoni konsiderevoli tal-popolazzjoni Komunitarja għandha konsum fid-dieta ogħla minn tat-TWI.

(53)

Minn aspett tossikoloġiku, kull livell iffissat għandu japplika għad-dijossini u għall-PCBs li jixbħu lid-dijossini, iżda fl-2001 il-livelli massimi ġew stipulati fuq livell Komunitarju għad-dijossini u mhux għall-PCBs li jixbħu lid-dijossini, fid-dawl tad-data disponibbli f’dak il-waqt dwar il-prevalenza tal-PCBs. Madanakollu, mill-2001, iktar data dwar il-preżenza tal-PCBs li jixbħu lid-dijossini saret disponibbli, għalhekk, il-livelli massimi tas-somma tad-dijossini u tal-PCBs li jixbħu lid-dijossini ġew iffissati fl-2006 minħabba li dan huwa l-avviċinament l-iktar xieraq minn aspett tossikoloġiku. Sabiex tiġi aċċertata tranżizzjoni mingħajr tfixkil, il-livelli tad-dijossini għandhom ikomplu japplikaw għal perijodu tranżitorji flimkien mal-livelli tas-somma tad-dijossini u tal-PCBs li jixbħu lid-dijossini. L-oġġetti ta’ l-ikel għandhom jikkonformaw matul il-perijodu tranżizzjonali mal-livelli massimi għad-dijossini u mal-livelli massimi tas-somma tad-dijossini u tal-PCBs li jixbħu lid-dijossini. Għandha tingħata konsiderazzjoni sal-31 ta’ Diċembru 2008 sabiex ma jintużawx il-livelli massimi separati tad-dijossini.

(54)

Sabiex jiġi inkuraġġut avviċinamet proattiv fit-tnaqqis tad-dijossini u tal-PCBs li jixbħu d-dijossini preżenti fl-ikel u fl-għalf, ġew iffissati livelli ta’ azzjoni mir-Rakkomandazzjoni tal-Kummissjoni 2006/88/KE tas-6 ta’ Frar 2006 dwar it-tnaqqis għall-preżenza tad-dijossini tal-furani u l-PCBs fl-oġġetti ta’ l-għalf u fl-oġġetti ta’ l-ikel (34). Il-livelli ta’ azzjoni huma għodda għall-awtoritajiet u l-operaturi kompetenti biex jenfasizzaw dawk il-każijiet fejn jixraq li jidentifikaw is-sors tal-kontaminazzjoni u jieħdu miżuri biex inaqqsu jew jeliminawh. Minħabba li s-sorsi tad-dijossini u l-PCBs li jixbħu lid-dijossini huma differenti, livelli ta’ azzjoni separati huma stipulati għad-dijossini u minn naħa l-oħra għall-PCBs li jixbħu lid-dijossini. L-avviċinament proattiv sabiex jitnaqqsu b’mod attiv id-dijossini u l-PCBs li jixbħu lid-dijossini fl-għalf u fl-ikel u konsegwentament, il-livelli massimi applikabbli għandhom jiġu rriveduti fi ħdan perijodu definit għall-iffissar ta’ livelli iktar baxxi. Għalhekk għandha tingħata konsiderazzjoni sal-31 ta’ Diċembru 2008 għat-tnaqqis b’mod sinifikanti tal-livelli massimi għas-somma tad-dijossini u tal-PCBs li jixbħu lid-dijossini.

(55)

L-operaturi jeħtieġu jagħmlu sforzi biex isaħħu l-kapaċità tagħhom fit-tneħħija tad-dijossini, tal-furani u tal-PCBs li jixbħu lid-dijossini miż-żejt tal-ħut. Il-livell li huwa konsiderevolment iktar baxx, li għandu jingħata konsiderazzjoni sal-31 ta’ Diċembru 2008, għandu jiġi bbażat fuq il-possibiltajiet tekniċi tal-proċedura l-aktar effettiva ta’ dekontaminazzjoni.

(56)

Fir-rigward ta’ l-istabbiliment tal-livelli massimi minn oġġetti ta’ l-ikel oħrajn sal-31 ta’ Diċembru 2008 għandha tingħata attenzjoni partikolari għall-ħtieġa tal-livelli massimi speċifiċi iktar baxxi għad-dijossini u l-PCBs li jixbħu lid-dijossini fl-ikel tat-trabi u tat-tfal żgħar fid-dawl tad-data ta’ monitoraġġ miksuba matul il-programmi ta’ l-2005, 2006 u 2007 għall-monitoraġġ tad-dijossini u l-PCBs li jixbħu lid-dijossini fl-ikel tat-trabi u tat-tfal żgħar.

(57)

Fir-rigward ta’ l-idrokarburi aromatiċi poliċikliċi, l-SCf ikkonkludew fl-opinjoni tagħhom ta’ l-4 ta’ Diċembru 2002 (35) li numru ta’ idrokarburi aromatiċi poliċikliċi (PAH) huma karċinoġeni ġenotossiċi. Il-Kumitat Konġunt ta’ l-Esperti FAO/WHO dwar l-Adittivi fl-Ikel (JECFA) ġabu fis-seħħ fl-2005 valutazzjoni tar-riskji fuq il-PAHs u stmaw il-Marġini ta’ l-Esponiment (MOE) għal-PAH bħala bażi tal-parir fuq komposti li huma ġenotossiċi u karċinoġeniċi (36).

(58)

Skond l-SCF, il-benzo(a)pyrene jista’ jintuża bħala markatura għall-okkorrenza u l-effett tal-PAH karċinoġeniku fl-ikel, inkluż ukoll il-benz(a)anthracene, benzo(b)fluoranthene, benzo(j)fluoranthene, benzo(k)fluoranthene, benzo(g,h,i)perylene, chrysene, cyclopenta(c,d)pyrene, dibenz(a,h)anthracene, dibenzo(a,e)pyrene, dibenzo(a,h)pyrene, dibenzo(a,i)pyrene, dibenzo(a,l)pyrene, indeno(1,2,3-cd)pyrene u 5-methylchrysene. Analiżi iktar fil-fond, tal-proporzjonijiet relattivi ta’ dawn il-PAH fl-ikel huma meħtieġa biex jipprovdu tagħrif għal xi reviżjoni fil-ġejjieni dwar jekk huwiex tajjeb li jinżamm il-benzo(a)pyrene bħala indikatur. Aktar minn hekk il-benzo(c) fluorene għandu jiġi analizzat, wara rakkomandazzjoni tal-JECFA.

(59)

Il-PAH jista’ jikkontamina l-ikel matul il-perijodu tal-fumigazzjoni u l-proċessi ta’ tisħin u tnixxif li jippermettu l-prodotti ta’ kombustjoni li jiġi f’kuntatt dirett ma’ l-ikel. Aktar minn hekk, it-tniġġis ambjentali jista jikkawża kontminazzjoni bil-PAH, partikolarment fil-ħut u fil-prodotti tas-sajd.

(60)

Fil-qafas tad-Direttiva 93/5/KEE, ħidma SCOOP speċifika “ġbir tad-data ta’ okkorrenza dwar PAH fl-ikel” saret fl-2004 (37). Instabu livelli għoljin fil-frott imnixxef, fiż-żejt ta’ l-ilbieba taż-żebbuġ, fil-ħut iffumigat, fiż-żejt taż-żrieragħ ta’ l-għeneb, prodotti ta’ laħam iffumigat, molluski friski, ħwawar/zlazi u kondimenti.

(61)

Sabiex ikun hemm protezzjoni tas-saħħa pubblika, livelli massimi huma meħtieġa għall-benzo(a)pyrene f’ċertu ikel li fihom ix-xaħmijiet u żjut u fl-ikel fejn il-proċessi tal-fumigazzjoni u t-tnixxif jistgħu jikkawżaw livelli għoljin ta’ kontaminazzjoni. Livelli massimi huma meħtieġa wkoll fl-ikel fejn it-tniġġis ambjentali jista’ jikkawża livelli għoljin ta’ kontaminazzjoni, partikolarment fil-ħut u l-prodotti tal-ħut, per eżempju li jirriżultaw mill-ħruġ ta’ żejt ikkawżat mill-bastimenti.

(62)

F’ċertu ikel, bħalma huwa l-frott imnixxef u supplmenti ta’ l-ikel, il-benzo(a)pyrene instab, iżda d-data disponibbli hija inkonklużiva dwar il-livelli li jistgħu jinkisbu b’mod raġonevoli. Aktar investigazzjonijiet huma meħtieġa biex jiċċaraw il-livelli li huma miksuba b’mod raġonevoli f’dan l-ikel. Fl-istess ħin, il-livelli massimi għall-benzo(a)pyrene fl-ingredjenti rilevanti għandhom japplikaw, bħalma huwa l-każ fiż-żjut u x-xaħmijiet użati fis-supplimenti ta’ l-ikel.

(63)

Il-livelli massimi għall-PAH u l-konvenjenza ta’ l-istupular ta’ livell massimu għall-PAH fil-butir tal-kakaw għandhom jiġu riveduti sa l-1 ta’ April 2007, bil-konsiderazzjoni tal-progress fil-konoxxenza xjentifika u teknoloġika dwar l-okkorrenza tal-benzo(a)pyrene u PAH karċinoġeniku ieħor fl-ikel.

(64)

Il-miżuri stipulati f’dan ir-Regolament huma konformi ma’ l-opinjoni tal-Kumitat Permanenti dwar il-Katina Alimentari u s-Saħħa ta’ l-Annimali,

(a)

bidliet fil-konċentrazzjoni tal-kontaminant ikkawżat minn proċessi ta’ tnixxif jew dilwizzjoni,

(b)

bidliet tal-konċentrazzjoni tal-kontaminant ikkawżat mill-ipproċessar,

(c)

il-proporzjonijiet relativi ta’ l-ingredjenti fil-prodott,

(d)

il-limitu analitiku tal-kwantifikazzjoni.

(a)

ma jkunux maħsuba għall-konsum dirett mill-bniedem jew bħala ingredjenti f’oġġetti ta’ l-ikel,

(b)

jikkonformaw mal-livelli massimi xierqa stipulati fil-punti 2.1.1, 2.1.2, 2.1.4 u 2.1.7 ta’ l-Anness,

(c)

ikunu soġġetti għal trattament li jinvolvi ssortjar jew xi trattament fiżiku ieħor u li wara dan it-trattament il-livelli massimi stipulati fil-punti 2.1.3, 2.1.5 u 2.1.6 ta’ l-Anness ma jinqabżux, u li dan it-trattament ma jirriżultax f’residwi oħrajn li jagħmlu ħsara,

(d)

ikunu tikkettjati b’mod ċar, li juri l-indikazzjoni, “il-prodott irid ikun soġġett għall- issortjar jew xi trattament fiżiku ieħor biex titnaqqaslu l-kontaminazzjoni bl-aflatossin qabel il-konsum mill-bniedem jew l-użu bħala ingredjent f’oġġetti ta’ l-ikel”. Din l-indikazzjoni għandha tinkludi fuq it-tikkett ta’ kull pakkett, kaxxa eċċ. individwali jew fuq id-dokument akkumpanjanti oriġinali. Il-kodiċi ta’ identifikazzjoni tal-konsenja/lott għandu jkun immarkat b’mod indellibbli fuq kull pakkett/kaxxa individwali tal-konsenja u fuq id-dokument oriġinali akkumpanjanti.

(a)

L-ewwel ta’ 1 ta’ Lulju 2006 fir-rigward tal-livelli massimi għad deoxynivalenol u ż-zearalenone stipulati fil-punti 2.4.1, 2.4.2., 2.4.4, 2.4.5, 2.4.6, 2.4.7, 2.5.1, 2.5.3, 2.5.5 u 2.5.7 ta’ l-Anness,

(b)

L-ewwel ta’ 1 ta’ Lulju 2007 fir-rigward tal-livelli massimi għad deoxynivalenol u ż-zearalenone stipulati fil-punti 2.4.3, 2.5.2., 2.5.4, 2.5.6 u 2.5.8 ta’ l-Anness,

(c)

L-ewwel ta’ 1 ta’ Ottubru 2007 fir-rigward tal-livelli massimi għall-fumonisins B1 u B2 stipulati fil-punt 2.6 ta’ l-Anness,

(d)

4 ta’ Novembru 2006 fir-rigward tal-livelli massimi għas-somma tad-dijossini u l-PCB s li jixbħu lid-dijossini stipulati fis-sezzjoni 5 ta’ l-Anness.