25.9.2006

MT

Il-Ġurnal Uffiċjali ta’ l-Unjoni Ewropea

20

---

DIRETTIVA 2006/44/KE TAL-PARLAMENT EWROPEW U TAL-KUNSILL

tas-6 ta' Settembru 2006

dwar il-kwalità ta' l-ilma ħelu li għandu bżonn protezzjoni jew titjib sabiex tkun sostnuta l-ħajja tal-ħut

(verżjoni kodifikata)

(Test b'rilevanza għaż-ŻEE)

IL-PARLAMENT EWROPEW U L-KUNSILL TA' L-UNJONI EWROPEA,

Wara li kkunsidraw it-Trattat li jistabbilixxi l-Komunità Ewropea, u b'mod partikolari l-Artikolu 175(1) tiegħu,

Wara li kkunsidraw il-proposta mill-Kummissjoni,

Wara li kkunsidraw l-Opinjoni tal-Kumitat Ekonomiku u Soċjali Ewropew (1),

Wara li kkonsultaw lill-Kumitat tar-Reġjuni,

Filwaqt li jaġixxu skond il-proċedura stabbilita fl-Artikolu 251 tat-Trattat (2),

Billi:

(1)

Id-Direttiva tal-Kunsill 78/659/KEE tat-18 ta' Lulju 1978 dwar il-kwalità ta' l-ilma ħelu li għandu bżonn protezzjoni jew titjib sabiex tkun sostnuta l-ħajja tal-ħut (3) ġiet emendata b'mod sinifikanti f'diversi okkażjonijiet (4). Fl-interess taċ-ċarezza u r-razzjonalità dik id-Direttiva għandha tkun kodifikata.

(2)	Il-protezzjoni u t-titjib ta' l-ambjent jeħtieġu miżuri konkreti għall-protezzjoni ta' l-ilmijiet kontra t-tniġġis, inkluż l-ilma ħelu li kapaċi jsostni l-ħajja tal-ħut.

(3)

Mill-perspettiva ekoloġika u ekonomika huwa meħtieġ li jiġu salvagwardati l-popolazzjonijiet tal-ħut minn konsegwenzi dannużi varji li jirriżultaw mit-tnixxija ta' sustanzi li jniġġsu fl-ilmijiet, bħal, b'mod partikolari, it-tnaqqis fin-numru ta' ħut ta' ċerti speċi kif ukoll f'xi każijiet l-għajbien ta' numru ta' dawn l-ispeċi.

(4)

Id-Deċiżjoni Nru 1600/2002/KE tal-Parlament Ewropew u tal-Kunsill tat-22 ta' Lulju 2002 li tistabbilixxi s-Sitt Programm Komunitarju ta' Azzjoni Ambjentali (5) hija mfassla sabiex jintlaħqu livelli fil-kwalità ta' l-ilma tal-wiċċ li ma jagħtux lok għal impatti sinifikanti fuq, u riskji għal, l-ambjent.

(5)	Id-diskrepanzi bejn id-dispożizzjonijiet applikabbli fl-Istati Membri differenti fir-rigward tal-kwalità ta' l-ilma ħelu li kapaċi jsostni l-ħajja tal-ħut jistgħu jagħtu lok għal kondizzjonijiet mhux indaqs tal-kompetizzjoni u għalhekk ikollhom impatt dirett fuq il-funzjonament tas-suq intern.

(6)

Sabiex jiksbu l-objettivi ta' din id-Direttiva, l-Istati Membri għandhom jinnominaw l-ilmijiet li għalihom għandha tapplika u jridu jistabbilixxu l-valuri ta' limitu li jikkorrispondu għal ċerti parametri. L-ilmijiet nominati hekk għandhom jinġiebu f'konformità ma' dawn il-valuri fi żmien ħames snin minn meta jiġu nominati.

(7)	Għandu jsir provvediment li l-ilma ħelu li kapaċi jsostni l-ħajja tal-ħut jitqies, taħt ċerti kondizzjonijiet, konformi mal-valuri parametriċi rilevanti anki jekk ċertu perċentwali ta' kampjuni meħuda ma jkunux konformi mal-limiti speċifikati.

(8)

Biex jiġi żgurat li l-kwalità ta' l-ilma ħelu li kapaċi jsostni l-ħajja tal-ħut hija kontrollata, għandhom jittieħdu numru minimu ta' kampjuni u għandu jitwettaq il-kejl relatat ma' parametri speċifiċi, kif anness hawnhekk. Tali teħid ta' kampjuni jista' jitnaqqas jew ma jitkompliex fid-dawl tal-kwalità ta' l-ilma.

(9)	L-Istati Membri mhumiex kapaċi jikkontrollaw ċerti ċirkostanzi naturali u għalhekk huwa meħtieġ li jsir provvediment għall-possibbiltà ta' deroga minn din id-Direttiva f'ċerti każijiet.

(10)

Il-progress tekniku u xjentifiku jista' jsejjaħ għall-addattament rapidu ta' ċerti rekwiżiti stabbiliti fl-Anness I. Sabiex tiġi faċilitata l-introduzzjoni tal-miżuri meħtieġa għal dan il-għan, għandha tiġi stipulata proċedura li biha tiġi stabbilita kooperazzjoni mill-qrib bejn l-Istati Membri u l-Kummissjoni skond id-Deċiżjoni tal-Kunsill 1999/468/KE tat-28 ta' Ġunju 1999 li tistabbilixxi l-proċeduri għall-eżerċizzju tas-setgħat ta' implimentazzjoni konferiti fuq il-Kummissjoni (6).

(11)	Din id-Direttiva għandha tkun bla ħsara għall-obbligi ta’ l-Istati Membri relatati mal-limiti ta' żmien għat-traspożizzjoni fil-liġi nazzjonali tad-Direttivi mniżżla fil-Parti B ta' l-Anness III,

ADOTTAW DIN ID-DIRETTIVA:

Artikolu 1

1.   Din id-Direttiva tikkonċerna l-kwalità ta' l-ilma ħelu u għandha tapplika għal dawk l-ilmijiet nominati mill-Istati Membri li jeħtieġu protezzjoni jew titjib sabiex isostnu l-ħajja tal-ħut.

2.   Din id-Direttiva m'għandhiex tapplika għal ilmijiet f'vaski tal-ħut naturali jew artifiċjali li jintużaw għat-trobbija intensiva tal-ħut.

3.   L-għan ta' din id-Direttiva huwa li tipproteġi jew ittejjeb il-kwalità ta' dak l-ilma ħelu ġieri jew li qiegħed jsostni, jew li, jekk it-tniġġis jitnaqqas jew jiġi eliminat, isir kapaċi jsostni, ħut li jagħmel parti minn:

(a)	speċi indiġeni li joffru diversità naturali;

(b)	speċi li l-preżenza tagħhom hija ġġudikata mixtieqa għall-finijiet ta' ġestjoni ta' l-ilma mill-awtoritajiet kompetenti ta' l-Istati Membri.

4.   Għall-finijiet ta' din id-Direttiva:

(a)	ilmijiet salmonidi għandha tfisser ilmijiet li jsostnu jew li jsiru kapaċi jsostnu ħut li jagħmel parti minn speċi bħal salamun (Salmo salar), trota (Salmo trutta), grayling (Thymallus thymallus) u whitefish (Coregonus);

(b)	ilmijiet ċiprinidi għandha tfisser ilmijiet li jsostnu jew isiru kapaċi jsostnu ħut li jagħmel parti miċ-ċiprinidi (Cyprinidae), jew speċi oħrajn bħal lizz (Esox lucius), perċa (Perca fluviatilis) u sallur (Anguilla anguilla).

Artikolu 2

Il-parametri fiżiċi u kimiċi applikabbli għall-ilmijiet nominati mill-Istati Membri huma elenkati fl-Anness I.

Għall-finijiet ta' l-applikazzjoni ta' dawn il-parametri, l-ilmijiet huma maqsumin f'ilmijiet salmonidi u ilmijiet ċiprinidi.

Artikolu 3

1.   L-Istati Membri għandhom, għall-ilmijiet nominati, jistabbilixxu valuri għall-parametri elenkati fl-Anness I, fir-rigward ta' valuri elenkati fil-kolonna G jew kolonna I. Huma għandhom jikkonformaw mal-kummenti li jinsabu f'kull waħda minn dawn iż-żewġ kolonni.

2.   L-Istati Membri m'għandhomx jistabbilixxu valuri inqas stretti minn dawk elenkati fil-kolonna I ta' l-Anness I u għandhom jippruvaw jirrispettaw il-valuri f'kolonna G b'kont meħud tal-prinċipju mniżżel fl-Artikolu 8.

Artikolu 4

1.   L-Istati Membri għandhom jinnominaw ilmijiet salmonidi u ilmijiet ċiprinidi u jistgħu sussegwentement jagħmlu nomini addizzjonali.

2.   L-Istati Membri jistgħu jirrivedu n-nomina ta' ċerti ilmijiet minħabba fatturi mhux prevedibbli fil-mument tan-nomina, b'kont meħud tal-prinċipju mniżżel fl-Artikolu 8.

Artikolu 5

L-Istati Membri għandhom jistabbilixxu programmi sabiex inaqqsu t-tniġġis u jiżguraw li l-ilmijiet nominati jikkonformu, fi żmien ħames snin min-nomina skond l-Artikolu 4, kemm mal-valuri stabbiliti mill-Istati Membri skond l-Artikolu 3 kif ukoll mal-kummenti li jinsabu fil-kolonni G u I ta' l-Anness I.

Artikolu 6

1.   Għall-finijiet ta' l-implimentazzjoni ta' l-Artikolu 5, l-ilmijiet nominati għandhom jitqiesu li jikkonformaw ma' din id-Direttiva jekk il-kampjuni ta' tali ilmijiet, meħudin fil-frekwenza minima speċifikata fl-Anness I fl-istess punt ta' teħid ta' kampjuni u fuq perijodu ta' 12-il xahar, juru li huma jikkonformaw kemm mal-valuri stabbiliti mill-Istati Membri skond l-Artikolu 3 kif ukoll mal-kummenti li jinsabu fil-kolonni G u I fl-Anness I, fil-każ ta':

(a)

95 % tal-kampjuni għall-parametri: pH, BOD5, nitriti, ammonja mhux jonizzata, ammonju totali, klorin residwu totali, żingu totali u ram maħlul. Meta l-frekwenza tat-teħid ta' kampjuni hija aktar baxxa minn kampjun wieħed kull xahar, kemm il-valuri msemmija hawn fuq kif ukoll il-kummenti għandhom ikunu rispettati fil-kampjuni kollha;

(b)	il-perċentwali elenkati fl-Anness I għall-parametri: it-temperatura u l-ossiġnu f'soluzzjoni;

(ċ)	il-konċentrazzjoni medja stabbilita għall-parametri: solidi f'sospensjoni.

2.   Każijiet li fihom il-valuri stabbiliti mill-Istati Membri skond l-Artikolu 3 jew il-kummenti li jinsabu fil-kolonni G u I ta' l-Anness I mhumiex rispettati m'għandhomx ikunu kkunsidrati fil-kalkolu tal-perċentwali previsti fil-paragrafu 1 meta huma r-riżultat ta' għarar jew diżastri naturali oħrajn.

Artikolu 7

1.   L-awtoritajiet kompetenti fl-Istati Membri għandhom iwettqu operazzjonijiet ta' teħid ta' kampjuni, li l-frekwenza minima tagħhom hija stabbilita fl-Anness I.

2.   Fejn l-awtorità kompetenti tirreġistra li l-kwalità ta' l-ilmijiet nominati hija sostanzjalment ogħla minn dik li kieku tirriżulta mill-applikazzjoni tal-valuri stabbiliti skond l-Artikolu 3 u l-kummenti li jinsabu fil-kolonni G u I ta' l-Anness I, il-frekwenza tat-teħid ta' kampjuni tista' titnaqqas. Fejn m'hemmx tniġġis jew m'hemmx riskju ta' deterjorament fil-kwalità ta' l-ilmijiet, l-awtorità kompetenti konċernata tista' tiddeċiedi li m'hemmx ħtieġa ta' teħid ta' kampjuni.

3.   Jekk it-teħid ta' kampjuni juri li valur stabbilit minn Stat Membru skond l-Artikolu 3 jew kumment li jinsab fil-kolonni G jew I ta' l-Anness I mhuwiex irrispettat, l-Istat Membru għandu jistabbilixxi jekk dan huwiex ir-riżultat ta' kumbinazzjoni, fenomenu naturali jew tniġġis u għandu jadotta miżuri adatti.

4.   Il-punt eżatt ta' teħid ta' kampjuni, id-distanza minn dan il-punt sal-punt l-aktar qrib fejn sustanzi li jniġġsu jnixxu u l-fond li fih għandhom jittieħdu l-kampjuni għandhom jiġu stabbiliti mill-awtorità kompetenti ta' kull Stat Membru abbażi tal-kondizzjonijiet ambjentali lokali b'mod partikolari.

5.   Ċerti metodi ta' referenza ta' analiżi għall-parametri konċernati huma mniżżlin fl-Anness I. Il-laboratorji li jużaw metodi oħrajn għandhom jiżguraw li r-riżultati miksubin huma ekwivalenti jew komparabbli ma' dawk speċifikati fl-Anness I.

Artikolu 8

L-implimentazzjoni tal-miżuri meħuda skond din id-Direttiva ma jistgħu bl-ebda mod iwasslu għal żieda fit-tniġġis ta' ilma ħelu, sew direttament jew indirettament.

Artikolu 9

L-Istati Membri jistgħu fi kwalunkwe ħin jistabbilixxu valuri aktar stretti għall-ilmijiet nominati minn dawk stabbiliti f'din id-Direttiva. Huma jistgħu wkoll jistabbilixxu dispożizzjonijiet relatati għal parametri barra minn dawk previsti f'din id-Direttiva.

Artikolu 10

Meta l-ilma ħelu jaqsam jew jifforma fruntieri nazzjonali bejn l-Istati Membri u meta wieħed minn dawn l-Istati jikkunsidra jinnomina dawn l-ilmijiet, dawn l-Istati għandhom jikkonsultaw lil xulxin sabiex jiddeterminaw il-firxa ta' tali ilmijiet li għalihom tista' tapplika din id-Direttiva u l-konsegwenzi li għandhom jinħarġu mill-objettivi komuni ta' kwalità; dawn il-konsegwenzi għandhom ikunu determinati, wara konsultazzjonijiet formali, minn kull Stat konċernat. Il-Kummissjoni tista' tipparteċipa f'dawn id-deliberazzjonijiet.

Artikolu 11

L-Istati Membri jistgħu jidderogaw minn din id-Direttiva:

(a)	fil-każ ta' ċerti parametri mmarkati (0) fl-Anness I, minħabba temp eċċezzjonali jew kondizzjonijiet ġeografiċi speċjali;

(b)	meta l-ilmijiet nominati jgħaddu minn arrikkiment naturali f'ċerti sustanzi, bil-konsegwenza li l-valuri stabbiliti fl-Anness I mhumiex irrispettati. Arrikkiment naturali jfisser il-proċess li bih ilma partikolari jirċievi mill-ħamrija ċerti sustanzi li qegħdin fiha, mingħajr intervent uman.

Artikolu 12

Tali emendi kif huma meħtieġa għall-addattament għall-progress tekniku u xjentifiku tal-valuri G għall-parametri u l-metodi ta' analiżi li jinsabu fl-Anness I għandhom jiġu adottati skond il-proċedura msemmija fl-Artikolu 13(2).

Artikolu 13

1.   Il-Kummissjoni għandha tkun assistita minn Kumitat dwar l-Addattament għall-Progress Tekniku u Xjentifiku, minn hawn 'il quddiem imsejjaħ “il-Kumitat”.

2.   Fejn issir referenza għal dan il-paragrafu, għandhom japplikaw l-Artikoli 5 u 7 tad-Deċiżjoni 1999/468/KE, waqt li jiġu kkunsidrati d-dispożizzjonijiet ta' l-Artikolu 8 tagħha.

Il-perijodu stabbilit fl-Artikolu 5(6) tad-Deċiżjoni 1999/468/KE għandu jiġi stabbilit għal tliet xhur.

3.   Il-Kumitat għandu jadotta r-regoli ta' proċedura tiegħu.

Artikolu 14

Għall-finijiet ta' l-applikazzjoni ta' din id-Direttiva, l-Istati Membri għandhom jipprovdu lill-Kummissjoni bl-informazzjoni dwar:

(a)	l-ilmijiet nominati skond l-Artikolu 4(1), f'forma imqassra;

(b)	ir-reviżjoni tan-nomina ta' ċerti ilmijiet skond l-Artikolu 4(2);

(ċ)	id-dispożizzjonijiet stipulati sabiex jiġu stabbiliti parametri ġodda skond l-Artikolu 9;

(d)	l-applikazzjoni tad-derogi mill-valuri elenkati fil-kolonna I fl-Anness I.

B'mod aktar ġenerali, l-Istati Membri għandhom jipprovdu lill-Kummissjoni, fuq talba raġunata minn din ta' l-aħħar, bi kwalunkwe informazzjoni meħtieġa għall-applikazzjoni ta' din id-Direttiva.

Artikolu 15

F'intervalli ta' tliet snin, u għall-ewwel darba għall-perijodu 1993 sa 1995 inklużi, l-Istati Membri għandhom jibgħatu informazzjoni lill-Kummissjoni dwar l-implimentazzjoni ta' din id-Direttiva, fil-forma ta' rapport settorjali li għandu wkoll ikopri Direttivi Komunitarji pertinenti oħrajn. Ir-rapport għandu jitfassal abbażi ta' kwestjonarju jew punti prinċipali mħejjija mill-Kummissjoni skond il-proċedura msemmija fl-Artikolu 6 tad-Direttiva tal-Kunsill 91/692/KEE tat-23 ta' Diċembru 1991 li tistandardizza u tirrazzjonalizza rapporti dwar l-implimentazzjoni ta' ċerti Direttivi fuq l-ambjent (7). Il-kwestjonarju jew il-punti prinċipali għandhom jintbagħtu lill-Istati Membri sitt xhur qabel il-bidu tal-perijodu kopert mir-rapport. Ir-rapport għandu jintbagħat lill-Kummissjoni fi żmien disa' xhur mill-għeluq tal-perijodu ta' tliet snin li jkoprih.

Il-Kummissjoni għandha tippubblika rapport Komunitarju dwar l-implimentazzjoni ta' din id-Direttiva fi żmien disa' xhur minn meta tirċievi r-rapporti mill-Istati Membri.

Artikolu 16

L-Istati Membri għandhom jikkomunikaw lill-Kummissjoni t-testi tad-dispożizzjonijiet prinċipali tal-liġi nazzjonali li huma jadottaw fil-qasam irregolat minn din id-Direttiva.

Artikolu 17

Id-Direttiva 78/659/KEE hija b'dan imħassra, mingħajr preġudizzju għall-obbligi ta’ l-Istati Membri relatati mal-limiti ta' żmien għat-traspożizzjoni fil-liġi nazzjonali tad-Direttivi mniżżlin fil-Parti B ta' l-Anness III.

Referenzi għad-Direttiva mħassra għandhom jiġu mifhuma bħala referenzi għal din id-Direttiva u għandhom jinqraw skond it-tabella ta’ korrelazzjoni fl-Anness IV.

Artikolu 18

Din id-Direttiva għandha tidħol fis-seħħ fl-għoxrin jum wara l-pubblikazzjoni tagħha fil-Ġurnal Uffiċjali ta’ l-Unjoni Ewropea.

Artikolu 19

Din id-Direttiva hi indirizzata lill-Istati Membri.

---

(1)  ĠU C 117, 30.4.2004, p. 11.

(2)  Opinjoni tal-Parlament Ewropew tal-21 ta' April 2004 (ĠU C 104 E, 30.4.2004, p. 545) u d-Deċiżjoni tal-Kunsill tal-25 ta' April 2006.

(3)  ġu L 222, 14.8.1978, p. 1. Direttiva kif emendata l-aħħar bir-Regolament (KE) Nru 807/2003 (ġu L 122, 16.5.2003, p. 36).

(4)  Ara l-Parti A ta' l-Anness III.

(5)  ĠU L 242, 10.9.2002, p. 1.

(6)  ĠU L 184, 17.7.1999, p. 23.

(7)  ĠU L 377, 31.12.1991, p. 48. Direttiva kif emendata bir-Regolament (KE) Nru 1882/2003 tal-Parlament Ewropew u tal-Kunsill (ĠU L 284, 31.10.2003, p. 1).

---

---

---

---

---