16.3.2007   

MT

Il-Ġurnal Uffiċjali ta’ l-Unjoni Ewropea

230

(1)

Wara l-evalwazzjoni ta' l-implimentazzjoni tad-Deċiżjoni tal-Kunsill 2003/170/ĠAI tas-27 ta' Frar 2003 dwar l-użu komuni ta' l-uffiċjali tal-kuntatt ippustjati barra l-pajjiż mill-aġenziji ta' l-infurzar tal-liġi ta' l-Istati Membri (3), ċerti dispożizzjonijiet ta' dik id-Deċiżjoni għandhom jiġu emendati biex jittieħed kont tal-prattika attwali relatata ma' l-użu mill-Istati Membri ta' l-uffiċjali tal-kuntatt ta' l-Europol mibgħuta barra l-pajjiż sabiex jgħaddu informazzjoni skond il-Konvenzjoni ta' l-Europol (4).

(2)

Din id-Deċiżjoni li temenda tipprovdi opportunità utli biex tiġi emendata d-dispożizzjoni dwar laqgħat ta' uffiċjali tal-kuntatt, filwaqt li tinġieb konformi mal-prattika attwali fejn xi Stat Membru, ta' spiss magħruf bħala “nazzjon mexxej”, jiġi mogħti r-responsabbiltà għall-koordinazzjoni tal-koperazzjoni ta' l-UE f'pajjiż jew reġjun partikolari, li tinkludi l-inizjattiva li jsejjaħ laqgħat ta' uffiċjali tal-kuntatt.

1.

Is-subparagrafu li ġej għandu jiżdied ma' l-Artikolu 1(1):

“F'din id-Deċiżjoni, ‘uffiċjal tal-kuntatt ta' l-Europol’ tfisser impjegat ta' l-Europol, mibgħut barra l-pajjiż lejn pajjiż terz wieħed jew aktar jew lejn organizzazzjonijiet internazzjonali biex isaħħaħ il-koperazzjoni bejn l-awtoritajiet f'dawk il-pajjiżi jew l-organizzazzjonijiet u l-Europol sabiex l-Istati Membri, b'mod partikolari l-uffiċjali tal-kuntatt nazzjonali mibgħuta barra l-pajjiż mill-aġenziji ta' l-infurzar tal-liġi ta' l-Istati Membri, jiġu appoġġati fil-ġlieda kontra forom gravi ta' kriminalità internazzjonali, b'mod partikolari permezz ta' l-iskambju ta' informazzjoni.”;

2.

Is-subparagrafu li ġej għandu jiżdied ma' l-Artikolu 1(2):

“Din id-Deċiżjoni għandha tkun mingħajr preġudizzju għall-kompiti ta' l-Europol u ta' l-uffiċjali tal-kuntatt ta' l-Europol fi ħdan il-qafas tal-Konvenzjoni ta' l-Europol, l-arranġamenti li saru għall-implimentazzjoni tagħha, u l-ftehim ta' koperazzjoni konklużi bejn l-Europol u l-pajjiż terz jew l-organizzazzjoni internazzjonali kkonċernati.”;

3.

L-Artikolu 3 (2) għandu jinbidel b' dan li ġej:

“2.   Is-Segretarjat Ġenerali għandu jfassal taqsira annwali li għandha tintbagħat lill-Istati Membri, lill-Kummissjoni u lill-Europol dwar l-assenjazzjonijiet ta' uffiċjali tal-kuntatt mill-Istati Membri, inkluż id-dmirijiet tagħhom u kwalunkwe ftehim ta' koperazzjoni bejn l-Istati Membri dwar l-assenjazzjoni ta' uffiċjali tal-kuntatt. Din it-taqsira għandha telenka l-Istati Membri li, bil-qbil ta' Stati Membri oħra permezz ta' koordinazzjoni fl-istrutturi tal-Kunsill, ingħataw ir-responsabbiltà għall-koordinazzjoni tal-koperazzjoni ta' l-UE f'pajjiż jew reġjun partikolari, kif imsemmi fl-Artikolu 4(1). Dettalji dwar uffiċjali tal-kuntatt ta' l-Europol mibgħuta barra mill-pajjiż f'pajjiżi terzi jew organizzazzjonijiet internazzjonali għandhom jiġu inklużi wkoll.”;

4.

Is-sentenza li ġejja għandha tiżdied ma' l-Artikolu 4(1):

“Laqgħat bħal dawn jistgħu jinżammu wkoll, wara konsultazzjoni ma' l-Istat Membru li għandu l-Presidenza, fuq l-inizjattiva ta' kwalunkwe Stat Membru ieħor u b'mod partikolari ta' dawk l-Istati Membri li ngħataw ir-responsabbiltà għall-koordinazzjoni tal-koperazzjoni ta' l-UE f'pajjiż jew reġjun partikolari.”

5.

Is-sentenza li ġejja għandha tiżdied ma' l-Artikolu 8(2):

“L-Istati Membri għandhom jiżguraw ukoll li l-informazzjoni mogħtija skond l-Artikolu 2(2) għandha tiġi skambjata ma' l-Europol skond il-Konvenzjoni ta' l-Europol.”

6.

Il-paragrafi li ġejjin għandhom jiżdiedu ma' l-Artikolu 8:

“3.   Skond il-liġi nazzjonali u l-Konvenzjoni ta' l-Europol, l-Istati Membri jistgħu jagħmlu talba lill-Europol biex jużaw l-uffiċjali tal-kuntatt ta' l-Europol sekondati lil pajjiżi terzi jew organizzazzjonijiet internazzjonali, bil-ħsieb ta' l-iskambju ta' informazzjoni rilevanti b'konformità mal-ftehim ta' koperazzjoni konklużi bejn l-Europol u l-pajjiż terz jew l-organizzazzjoni kkonċernata. It-talbiet għandhom jiġu indirizzati lill-Europol permezz ta' l-unitajiet nazzjonali ta' l-Istati Membri skond il-Konvenzjoni ta' l-Europol.

4.   L-Europol għandha tiżgura li l-uffiċjali tal-kuntatt tagħha sekondati lil pajjiżi terzi u organizzazzjonijiet internazzjonali jipprovduha b'informazzjoni relatata ma' theddid serju lil Stati Membri minn dawk reati kriminali li għalihom l-Europol hija kompetenti skond il-Konvenzjoni ta' l-Europol. Tali informazzjoni għandha tiġi kkomunikata lill-awtoritajiet kompetenti ta' l-Istati Membri kkonċeranti permezz ta' l-unitajiet nazzjonali skond il-Konvenzjoni ta' l-Europol.”