(1)

Skont l-Artikolu 24(2), l-Artikolu 26 u l-Artikolu 27(2) tar-Regolament tal-Kummissjoni (KE) Nru 883/2001 tal-24 ta’ April 2001 li jippreskrivi regoli dettaljati biex ikun implimentat ir-Regolament tal-Kunsill (KE) Nru 1493/1999 dwar il-kummerċ ma’ terzi pajjiżi ta’ prodotti fis-settur tal-inbid (3), il-proċedura simplifikata li tirrigwarda r-rekwiżiti għat-tfassil u l-użu taċ-ċertifikat u r-rapport ta’ analiżi għall-importazzjoni tal-inbejjed tapplika għall-inbejjed impurtati mill-Istati Uniti tal-Amerika sal-31 ta’ Diċembru 2005.

(2)

Ir-Regolament tal-Kummissjoni (KE) Nru 2303/2003 tad-29 ta’ Diċembru 2003 fuq regoli speċifiċi tat-tikkettjar ta’ nbejjed importati mill-Istati Uniti tal-Amerika (4) jipprovdi għal ċerti derogi temporanji fir-rigward tat-tikkettjar tal-inbejjed, li jiskadu wkoll fil-31 ta’ Diċembru 2005.

(3)

Minkejja l-Artikolu 45(1) tar-Regolament (KE) Nru 1493/1999, ir-Regolament tal-Kunsill (KE) Nru 1037/2001 tat-22 ta’ Mejju 2001, li jawtorizza l-offerta u l-fornitura għall-konsum uman dirett ta’ ċerti nbejjed importati li jistgħu jkunu għaddew minn proċessi enoloġiċi mhux provduti fir-Regolament (KE) Nru 1493/1999 (5), jawtorizza l-importazzjoni lejn il-Komunità ta’ nbejjed li joriġinaw fl-Istati Uniti tal-Amerika li jkunu għaddew minn ċerti proċessi mhux previsti fir-regoli Komunitarji. Dik l-awtorizzazzjoni tiskadi wkoll fil-31 ta’ Diċembru 2005 f'dak li għandu x’jaqsam mal-proċessi enoloġiċi msemmija fil-punt 1(b) tal-Anness għar-Regolament (KE) Nru 1037/2001.

(4)

Wara negozjati, Ftehim bejn il-Komunità Ewropea u l-Istati Uniti tal-Amerika dwar il-kummerċ tal-inbid ġie inizjalat miż-żewġ Partijiet fl-14 ta’ Settembru 2005. L-Artikoli 4 u 9 tal-Ftehim se jkomplu jittrattaw l-inbejjed li joriġinaw fl-Istati Uniti bl-istess mod kif huma ttrattati fir-Regolamenti (KE) Nri 883/2001, 1037/2001 u 2303/2003. Madankollu, skont l-Artikolu 17(2) ta’ dan il-Ftehim, l-Artikoli 4 u 9 se japplikaw biss mill-ewwel jum tat-tieni xahar wara l-wasla tal-avviż bil-miktub imsemmi fl-Artikolu 6(3) tal-Ftehim. Kien għalhekk meħtieġ li jiġi nnegozjat Ftehim separat fil-forma ta’ skambju ta’ ittri bejn il-Komunità Ewropea u l-Istati Uniti tal-Amerika dwar kwistjonijiet marbuta mal-kummerċ tal-inbid (6) li jkopru l-perjodu mill-31 ta’ Diċembru 2005 sad-data tal-applikazzjoni tal-Artikoli 4 u 9 tal-Ftehim dwar il-kummerċ tal-inbid.

(5)

Sabiex jiġi evitat kwalunkwe tfixkil fil-kummerċ, għandhom jiġu adottati dispożizzjonijiet għall-implimemntazzjoni tal-Ftehim fil-forma ta’ skambju ta’ ittri, u b’mod partikolari, it-tliet derogi previsti fir-Regolament (KE) Nri 883/2001, 1037/2001 u 2303/2003 għandhom jibqgħu fis-seħħ sad-data tal-applikazzjoni tal-Artikoli 4 u 9 tal-Ftehim dwar il-kummerċ tal-inbid imma mhux għal aktar minn tliet snin wara d-data tad-dħul fis-seħħ tal-Ftehim fil-forma ta’ skambju ta’ ittri.

(6)

Ir-Regolamenti (KE) Nri 883/2001, 1037/2001 u 2303/2003 għandhom jiġu emendati skont dan.

(7)

Il-miżuri previsti f’dan ir-Regolament huma konformi mal-opinjoni tal-Kumitat ta’ Ġestjoni għall-Inbid,

1.

It-tieni subparagrafu tal-Artikolu 1(1) jinbidel b’dan li ġej:

“Madankollu, din l-awtorizzazzjoni għandha tibqa’ valida biss, fdak li għandu x’jaqsam mal-użu tal-proċessi enoloġiċi elenkati f’1(b) tal-Anness, sad-data tal-applikazzjoni tal-Artikoli 4 u 9 tal-Ftehim bejn il-Komunità Ewropea u l-Istati Uniti tal-Amerika dwar il-kummerċ tal-inbid imma għal mhux aktar minn tliet snin mid-data tad-dħul fis-seħħ tal-Ftehim fil-forma ta’ skambju ta’ ittri bejn il-Komunità Ewropea u l-Istati Uniti tal-Amerika dwar kwistjonijiet marbuta mal-kummerċ tal-inbid (*2).

(*2)   ĠU L 301, 18.11.2005, p. 16.” "

2.

Fil-punt 1(b) tal-Anness, il-kliem ta’ introduzzjoni “sa mhux aktar tard mill-31 ta’ Diċembru 2003” għandu jinbidel b’dan li ġej:

“sa mhux aktar tard mid-data msemmija fit-tieni subparagrafu tal-Artikolu 1(1)”.