REGOLAMENT TAL-KUNSILL (KE) Nru 1899/2005

tas-27 ta' Ġunju 2005

dwar l-amministrazzjoni ta' certi restrizzjonijiet ta' certi prodotti ta' l-azzar mill-Federazzjoni Russa

IL-KUNSILL TA’ L-UNJONI EWROPEA,

Wara li kkunsidra t-Trattat li jistabbilixxi l-Komunità Ewropea, u b’mod partikolari l-Artikolu 133 tiegħu,

Wara li kkunsidra l-proposta mill-Kummissjoni,

Billi:

ADOTTA DAN IR-REGOLAMENT:

KAPITOLU I

DISPOŻIZZJONIJIET ĠENERALI

Artikolu 1

1.   Dan ir-Regolament japplika għal importazzjonijiet ta’ prodotti ta’ l-azzar elenkati fl-Anness I, li joriġinaw mill-Federazzjoni Russa.

2.   Il-prodotti ta’ l-azzar għandhom ikunu klassifikati fi gruppi ta’ prodotti kif esposti fl-Anness I.

3.   L-oriġini tal-prodotti imsemmija fil-paragrafu 1 għandha tiġi stabbilita skond ir-regoli li jkun hemm fis-seħħ fil-Komunità.

4.   Il-proċeduri għall-verifika ta’ l-oriġini tal-prodotti msemmija fil-paragrafu 1 huma stabbiliti fil-Kapitoli II u III.

Artikolu 2

1.   L-importazzjoni fil-Komunità tal-prodotti ta’ l-azzar elenkati fl-Anness I li joriġinaw mill-Federazzjoni Russa għandha tkun suġġetta għal-limiti kwantitattivi annwali stabbiliti fl-Anness V. Ir-rilaxx għaċ-ċirkolazzjoni libera fil-Komunità tal-prodotti elenkati fl-Anness I li joriġinaw mill-Federazzjoni Russa għandha tkun suġġetta għall-preżentazzjoni ta’ ċertifikat ta’ l-oriġini, espost fl-Anness II, u ta' awtorizzazzjoni ta' l-importazzjoni maħruġa mill-awtoritajiet ta’ l-Istati Membri skond l-Artikolu 4.

L-importazzjonijiet awtorizzati għandhom jiġu attribwiti għal-limiti kwantitattivi stabbiliti għas-sena li fiha l-prodotti jiġu mbarkati fil-pajjiż ta’ l-esportazzjoni.

2.   Sabiex jiġi żgurat li l-kwantitajiet li għalihom jinħarġu l-awtorizzazzjonijiet ta’ l-importazzjoni fl-ebda mument ma jaqbżu l-limiti kwantitattivi għal kull grupp ta’ prodotti, l-awtoritajiet kompetenti ta’ l-Istati Membri għandhom joħorġu awtorizzazzjonijiet ta’ importazzjoni biss malli jkollhom konferma mill-Kummissjoni li jkun għad baqa’ kwantitajiet disponibbli fil-limiti kwantitattivi għall-grupp rilevanti ta' prodotti ta’ l-azzar fir-rigward tal-pajjiż fornitur, li għalihom ġew preżentati applikazzjonijiet minn importatur jew importaturi lil dawk l-awtoritajiet. L-awtoritajiet kompetenti ta’ l-Istati Membri għall-finijiet ta’ dan ir-Regolament huma elenkati fl-Anness IV.

3.   L-importazzjonijiet ta’ prodotti mill-1 ta’ Jannar 2005, li għalihom kienet meħtieġa liċenzja skond ir-Regolament tal-Kunsill (KE) 2267/2004/KE għandhom jiġu attribwiti għal-limiti pertinenti għall-2005 stabbiliti fl-Anness V ta' dan ir-Regolament.

4.   Għall-finijiet ta’ dan ir-Regolament, u mid-data ta’ l-applikazzjoni tiegħu, l-imbarkazzjoni tal-prodotti għandha tiġi kunsidrata bħala li seħħet fid-data li fiha dawn tgħabbew fuq il-mezz ta’ trasport ta’ l-esportazzjoni.

Artikolu 3

1.   Il-limiti kwantitattivi esposti fl-Anness V ma għandhomx japplikaw għal prodotti mqiegħda f’żona franka jew f’depożitu liberu jew importati taħt l-arranġamenti li jiggvernaw id-depożiti doganali, l-importazzjoni temporanja jew il-perfezzjonament attiv (sistema ta’ sospensjoni).

2.   Fejn il-prodotti msemmija fil-paragrafu 1 ikunu sussegwentement rilaxxati għaċ-ċirkolazzjoni libera, fi stat mhux alterat jew wara li jkunu suġġetti għal xi xogħol jew proċess, għandu japplika l-Artikolu 2 (2) u l-prodotti hekk rilaxxati għandhom jiġu attribwiti għal-limitu kwantitattiv pertinenti espost fl-Anness V.

Artikolu 4

1.   Għall-fini ta' l-applikazzjoni ta' l-Artikolu 2 (2), qabel joħorġu awtorizzazzjonijiet ta’ importazzjoni, l-awtoritajiet kompetenti ta’ l-Istati Membri għandhom jinnotifikaw lill-Kummissjoni bl-ammonti ta’ talbiet għal awtorizzazzjonijiet ta’ importazzjoni, appoġġati mil-liċenzji ta’ esportazzjoni oriġinali, li huma jkunu rċevew. Min-naħa tagħha, il-Kummissjoni għandha tinnotifika l-konferma tagħha li l-ammont jew ammonti mitluba ta’ kwantitajiet huma disponibbli għall-importazzjoni fl-ordni kronoloġika li fiha ġew riċevuti n-notifiki ta’ l-Istati Membri.

2.   It-talbiet inklużi fin-notifiki lill-Kummissjoni għandhom ikunu validi jekk jistabbilixxu b’mod ċar f’kull każ il-pajjiż ta’ l-esportazzjoni, il-grupp tal-prodott konċernat, l-ammonti għall-importazzjoni, in-numru tal-liċenzja ta’ l-esportazzjoni, is-sena tal-kwota u l-Istat Membru li fih huwa maħsub li l-prodotti jiġu rilaxxati għaċ-ċirkolazzjoni libera.

3.   Safejn ikun possibbli, il-Kummissjoni għandha tikkonferma lill-awtoritajiet l-ammont sħiħ indikat fit-talbiet notifikati għal kull grupp ta' prodotti. Barra minn hekk, il-Kummissjoni għandha minnufih tikkuntattja l-awtoritajiet kompetenti tal-Federazzjoni Russa f’każijiet fejn it-talbiet notifikati jaqbżu l-limiti sabiex tfittex kjarifika u soluzzjoni rapida.

4.   L-awtoritajiet kompetenti ta' l-Istati Membri għandhom minnufih javżaw lill-Kummissjoni wara li jkunu infurmati b’xi kwantità li ma tkunx użata tul il-perjodu ta’ validità ta’ l-awtorizzazzjoni ta’ importazzjoni. Dawn il-kwantitajiet mhux użati għandhom awtomatikament jiġu trasferiti fil-kwantitajiet li jifdal tat-total tal-limitu kwantitattiv tal-Komunità għal kull grupp ta’ prodotti.

5.   In-notifiki msemmija fil-paragrafi 1, 2, 3 u 4 għandhom jiġu komunikati elettronikament fi ħdan in-network integrat stabbilit għal dan il-għan, sakemm ma jkunx neċessarju minħabba xi raġunijiet tekniċi li temporanjament jintużaw mezzi oħra ta’ komunikazzjoni.

6.   L-awtorizzazzjonijiet ta’ importazzjoni jew dokumenti ekwivalenti għandhom jinħarġu skond il-Kapitolu II.

7.   L-awtoritajiet kompetenti ta’ l-Istati Membri għandhom jinnotifikaw lill-Kummissjoni bi kwalunkwe kanċellazzjoni ta’ awtorizzazzjonijiet ta’ importazzjoni jew ta’ dokumenti ekwivalenti li jkunu diġà nħarġu f’każijiet fejn il-liċenzji ta’ l-esportazzjoni korrispondenti jkunu ġew irtirati jew kanċellati mill-awtoritajiet kompetenti tal-Federazzjoni Russa. Madankollu, jekk il-Kummissjoni jew l-awtoritajiet kompetenti ta’ xi Stat Membru jkunu ġew infurmati mill-awtoritajiet kompetenti tal-Federazzjoni Russa bl-irtirar jew kanċellazzjoni ta’ liċenzja ta’ l-esportazzjoni wara li l-prodotti relatati jkun ġew importati fil-Komunità, il-kwantitajiet in kwistjoni għandhom jiġu attribwiti għal-limitu kwantitattiv għas-sena li fiha tkun saret l-imbarkazzjoni tal-prodotti.

Artikolu 5

Għall-finijiet ta' l-applikazzjoni ta' l-Artikolu 3(3) u (4) tal-Ftehim, il-Kummissjoni hija b'dan awtorizzata tagħmel l-aġġustamenti meħtieġa.

Artikolu 6

1.   Fejn, wara l-investigazzjonijiet imwettqa skond il-proċeduri stabbiliti fil-Kapitolu III, il-Kummissjoni tinnota li l-informazzjoni fil-pussess tagħha tikkostitwixxi prova li l-prodotti elenkati fl-Anness I li joriġinaw mill-Federazzjoni Russa ġew trasbordati, devjati jew b'xi mod ieħor importati fil-Komunità permezz ta’ l-elużjoni tal-limiti kwantitattivi msemmija fl-Artikolu 2 u li hemm ħtieġa li jsiru l-aġġustamenti neċessarji, hija għandha titlob li jinfetħu l-konsultazzjonijiet sabiex jintlaħaq ftehim dwar aġġustament ekwivalenti għal-limiti kwantitattivi korrispondenti.

2.   Sa meta joħroġ ir-riżultat tal-konsultazzjonijiet imsemmija fil-paragrafu 1, il-Kummissjoni tista’ titlob lill-Federazzjoni Russa sabiex tieħu l-passi prekawzjonali meħtieġa sabiex tiżgura li l-aġġustamenti għal-limiti kwantitattivi miftiehma wara dawn il-konsultazzjonijiet ikunu jistgħu jitwettqu għas-sena li fiha tkun saret it-talba għall-konsultazzjonijiet jew għas-sena ta’ wara, jekk il-limiti kwantitattivi għas-sena kurrenti jkunu eżawriti, fejn ikun hemm prova ċara ta’ elużjoni.

3.   Jekk il-Komunità u l-Federazzjoni Russa ma jsibux soluzzjoni sodisfaċenti u jekk il-Kummissjoni tinnota li hemm prova ċara ta’ elużjoni, il-Kummissjoni għandha tnaqqas mil-limiti kwantitattivi volum ekwivalenti ta’ prodotti li joriġinaw mill-Federazzjoni Russa.

Artikolu 7

Dan ir-Regolament ma għandu bl-ebda jikkostitwixxi deroga mid-dispożizzjonijiet tal-Ftehim li, f'kull każ ta’ konflitt, għandhom jipprevalixxu.

KAPITOLU II

MODALITAJIET APPLIKABBLI GĦALL-AMMINISTRAZZJONI TAL-LIMITI KWANTITATTIVI

TAQSIMA 1

Klassifikazzjoni

Artikolu 8

Il-klassifikazzjoni tal-prodotti ta’ l-azzar koperti b’dan ir-Regolament għandha tkun ibbażata fuq in-nomenklatura magħquda (NM) stabbilita permezz tar-Regolament Nru. 2658/87/KEE.

Artikolu 9

Fuq l-inizjattiva tal-Kummissjoni jew ta’ xi Stat Membru, it-Taqsima tan-Nomenklatura tat-Tariffi u ta' l-Istatistika tal-Kumitat tal-Kodiċi Doganali, li kienet ġiet stabbilita bir-Regolament tal-Kunsill (KEE) Nru 2658/87 għandha teżamina b’mod urġenti, skond id-dispożizzjonijiet ta' dak ir-Regolament, il-kwistjonijiet li jikkonċernaw il-klassifikazzjoni ta' prodotti koperti b’dan ir-Regolament fi ħdan in-nomenklatura magħquda sabiex tikklassifikhom fil-gruppi tal-prodotti korretti.

Artikolu 10

Il-Kummissjoni għandha tinforma lill-Federazzjoni Russa bi kwalunkwe bidla fin-nomenklatura magħquda (NM) u fil-kodiċi TARIC li jolqtu l-prodotti koperti b’dan ir-Regolament mill-inqas xahar qabel id-data tad-dħul fis-seħħ tagħhom fil-Komunità.

Artikolu 11

Il-Kummissjoni għandha tinforma lill-awtoritajiet kompetenti tal-Federazzjoni Russa bi kwalunkwe deċiżjoni adottata skond il-proċeduri fis-seħħ fil-Komunità konnessi mal-klassifikazzjoni tal-prodotti koperti b’dan ir-Regolament, mhux aktar tard minn xahar mill-adozzjoni tagħhom. Tali komunikazzjoni għandha tinkludi:

Artikolu 12

1.   Fejn deċiżjoni ta’ klassifikazzjoni adottata skond il-proċeduri fis-seħħ tal-Komunità tirriżulta f’tibdil tal-prassi tal-klassifikazzjoni jew f’tibdil fil-grupp tal-prodott ta’ xi prodott kopert b’dan ir-Regolament, l-awtoritajiet kompetenti ta’ l-Istati Membri għandhom jagħtu pre-avviż ta’ 30 ġurnata, mid-data tan-notifika tal-Kummissjoni, qabel id-deċiżjoni tiddaħħal fis-seħħ.

2.   Prodotti mbarkati qabel id-data ta’ l-applikazzjoni tad-deċiżjoni għandhom jibqgħu suġġetti għall-prassi ta’ klassifikazzjoni preċedenti, bil-kondizzjoni li l-oġġetti in kwistjoni jiġu preżentati għall-importazzjoni fi żmien 60 jum minn dik id-data.

Artikolu 13

Fejn deċiżjoni ta’ klassifikazzjoni adottata skond il-proċeduri Komunitarji fis-seħħ imsemmija fl-Artikolu 12 tinvolvi grupp ta’ prodotti li jkun suġġett għal limitu kwantitattiv, il-Kummissjoni għandha, fejn meħtieġ, tibda mingħajr telf ta’ żmien konsultazzjonijiet skond l-Artikolu 9, sabiex tilħaq ftehim dwar kwalunkwe aġġustament neċessarju għal-limiti kwantitattivi korrispondenti esposti fl-Anness V.

Artikolu 14

1.   Mingħajr preġudizzju għal kwalunkwe dispożizzjoni oħra dwar dan is-suġġett, fejn il-klassifikazzjoni indikata fid-dokumentazzjoni neċessarja għall-importazzjoni ta’ prodotti koperti b’dan ir-Regolament tkun differenti mill-klassifikazzjoni determinata mill-awtoritajiet kompetenti ta’ l-Istat Membru li fih sejrin jiġu importati, il-merkanzija in kwistjoni għandha tkun provviżorjament suġġetta għall-arranġamenti ta’ importazzjoni li, skond id-dispożizzjonijiet ta’ dan ir-Regolament, huma applikabbli għaliha abbażi tal-klassifikazzjoni determinata mill-awtoritajiet imsemmija hawn fuq.

2.   L-awtoritajiet kompetenti ta’ l-Istati Membri għandhom jinfurmaw lill-Kummissjoni bil-każijiet msemmija fil-paragrafu 1, waqt li b’mod partikolari jindikaw:

3.   L-awtoritajiet kompetenti ta’ l-Istati Membri ma għandhomx joħorġu awtorizzazzjoni ġdida ta’ importazzjoni għal prodotti ta’ l-azzar li jkunu suġġetti għal limitu kwantitattiv Komunitarju espost fl-Anness V wara r-riklassifikazzjoni qabel ma jkunu kisbu konferma mill-Kummissjoni skond il-proċedura stabbilita fl-Artikolu 4 li l-ammonti għall-importazzjoni huma disponibbli.

4.   Il-Kummissjoni għandha tinnotifika lill-pajjiżi ta’ l-esportazzjoni konċernati bil-każijiet imsemmija f’dan l-Artikolu.

Artikolu 15

Fil-każijiet msemmija fl-Artikolu 14, kif ukoll f’dawk il-każijiet ta’ natura simili mqajma mill-awtoritajiet kompetenti tal-Federazzjoni Russa, il-Kummissjoni, jekk meħtieġ, għandha tidħol f’konsultazzjonijiet mal-Federazzoni Russa sabiex tilħaq ftehim dwar il-klassifikazzjoni applikabbli definittivament għall-prodotti involuti fid-diverġenza.

Artikolu 16

Il-Kummissjoni, bi qbil ma’ l-awtoritajiet kompetenti ta’ l-Istat jew Stati Membri ta' l-importazzjoni u tal-Federazzjoni Russa, tista’, fil-każijiet imsemmija fl-Artikolu 15, tiddetermina l-klassifikazzjoni applikabbli definittivament għall-prodotti involuti fid-diverġenza.

Artikolu 17

Meta każ ta’ diverġenza msemmi fl-Artikolu 14 ma jkunx jista’ jiġi solvut skond l-Artikolu 15, il-Kummissjoni għandha tadotta, skond l-Artikolu 10 tar-Regolament (KEE) Nru 2658/87, miżura li tistabbilixxi l-klassifikazzjoni tal-prodotti fin-Nomenklatura Magħquda.

TAQSIMA 2

Sistema ta’ verifika doppja għall-amministrazzjoni tal-limiti kwantitattivi

Artikolu 18

1.   L-awtoritajiet kompetenti tal-Federazzjoni Russa għandhom joħorġu liċenzja ta’ l-esportazzjoni fir-rigward tal-kunsinni kollha tal-prodotti ta’ l-azzar suġġetti għal-limiti kwantitattivi esposti fl-Anness V sal-livell ta' dawk il-limiti.

2.   L-importatur għandu jippreżenta l-oriġinali tal-liċenzja ta’ l-esportazzjoni għall-finijiet tal-ħruġ ta’ l-awtorizzazzjoni ta’ importazzjoni msemmija fl-Artikolu 21.

Artikolu 19

1.   Il-liċenzja ta’ l-esportazzjoni għal-limiti kwantitattivi għandha tkun konformi mal-mudell espost fl-Anness II u għandha tiċċertifika, inter alia, li l-kwantità ta’ l-oġġetti in kwistjoni tkun ġiet attribwita għal-limitu kwantitattiv stabbilit għall-grupp ta’ prodotti konċernat.

2.   Kull liċenzja ta’ l-esportazzjoni għandha tkopri wieħed biss mill-gruppi ta’ prodotti elenkati fl-Anness I.

Artikolu 20

L-esportazzjonijiet għandhom jiġu attribwiti għal-limiti kwantitattivi stabbiliti għas-sena li fiha l-prodotti koperti mil-liċenzja ta’ l-esportazzjoni jkunu imbarkati fis-sens ta’ l-Artikolu 2(4).

Artikolu 21

1.   Sa fejn il-Kummissjoni, skond l-Artikolu 4, tkun ikkonfermat li l-ammont mitlub huwa disponibbli fil-limitu kwantitattiv in kwistjoni, l-awtoritajiet kompetenti ta’ l-Istati Membri għandhom joħorġu awtorizzazzjoni ta’ l-importazzjoni fi żmien massimu ta’ għaxart ijiem tax-xogħol mill-preżentazzjoni mill-importatur ta' l-oriġinali tal-liċenzja ta’ l-esportazzjoni korrispondenti. Din il-preżentazzjoni għandha ssir mhux iktar tard mill-31 ta’ Marzu tas-sena ta’ wara dik li fiha l-merkanzija koperta mil-liċenzja ta’ l-esportazzjoni tkun ġiet imbarkata. L-awtorizzazzjonijiet ta’ l-importazzjoni għandhom jinħarġu mill-awtoritajiet kompetenti ta’ kwalunkwe Stat Membru irrespettivament mill-Istat Membru indikat fuq il-liċenzja ta’ l-esportazzjoni, sa fejn il-Kummissjoni tkun ikkonfermat, skond il-proċedura stabbilita fl-Artikolu 4, li l-ammont mitlub huwa disponibbli fil-limitu kwantitattiv in kwistjoni.

2.   L-awtorizzazzjonijiet ta’ l-importazzjoni għandhom ikunu validi għal erba’ xhur mid-data tal-ħruġ tagħhom. Fuq talba debitament motivata mill-importatur, l-awtoritajiet kompetenti ta’ Stat Membru jistgħu jestendu l-perjodu ta’ validità għal perjodu ulterjuri li ma jaqbiżx l-erba’ xhur.

3.   L-awtorizzazzjonijiet ta’ l-importazzjoni għandhom ikunu mfassla skond il-mudell espost fl-Anness III u għandhom ikunu validi fit-territorju doganali kollu tal-Komunità.

4.   Id-dikjarazzjoni jew talba magħmula mill-importatur sabiex jikseb l-awtorizzazzjoni ta’ l-importazzjoni għandha jkollha fiha:

5.   L-importaturi ma għandhomx ikunu obbligati li jimportaw il-kwantità totali koperta minn awtorizzazzjoni ta’ l-importazzjoni f’kunsinna waħda.

6.   L-awtorizzazzjonji ta’ l-importazzjoni tista’ tinħareġ permezz ta’ mezzi elettroniċi sakemm l-uffiċċji doganali involuti jkollhom aċċess għad-dokument permezz ta’ network informatiku.

Artikolu 22

Il-validità ta’ l-awtorizzazzjonijiet ta’ importazzjoni maħruġa mill-awtoritajiet ta’ l-Istati Membri għandha tkun suġġetta għall-validità tal-liċenzji ta’ l-esportazzjoni u għall-kwantitajiet indikati fil-liċenzji ta’ l-esportazzjoni maħruġa mill-awtoritajiet kompetenti tal-Federazzjoni Russa li fuq il-bażi tagħhom ġew maħruġa l-awtorizzazzjonijiet ta’ l-importazzjoni.

Artikolu 23

L-awtorizzazzjonijiet ta’ l-importazzjoni jew dokumenti ekwivalenti għandhom jinħarġu mill-awtoritajiet kompetenti ta’ l-Istati Membri skond l-Artikolu 2(2) u mingħajr diskriminazzjoni vis-à-vis kwalunkwe importatur fil-Komunità, ikun fejn ikun il-post ta’ l-istabbilimenti tiegħu fil-Komunità, mingħajr preġudizzju għall-kondizzjonijiet oħrajn imposti mir-regoli attwali.

Artikolu 24

1.   Jekk il-Kummissjoni ssib li l-kwantitajiet totali koperti bil-liċenzji ta’ l-esportazzjoni maħruġa mill-Federazzjoni Russa għal grupp partikolari ta’ prodotti fi kwalunkwe sena jaqbżu l-limitu kwantitattiv stabbilit għal dak il-grupp ta’ prodotti, l-awtoritajiet kompetenti tal-liċenzji fl-Istati Membri għandhom ikunu infurmati minnufih sabiex jissospendu l-ħruġ ulterjuri ta’ awtorizzazzjonijiet ta’ l-importazzjoni. F’dan il-każ, il-Kummissjoni għandha tibda l-konsultazzjonijiet minnufih.

2.   L-awtoritajiet kompetenti ta’ Stat Membru għandhom jirrifjutaw li joħorġu awtorizzazzjonijiet ta’ l-importazzjoni għal prodotti li joriġinaw mill-Federazzjoni Russa li ma jkunux koperti minn liċenzji ta’ l-esportazzjoni maħruġa skond id-dispożizzjonijiet ta’ dan il-Kapitolu.

TAQSIMA 3

Dispożizzjonijiet komuni

Artikolu 25

1.   Il-liċenzja ta’ l-esportazzjoni msemmija fl-Artikolu 18 u ċ-ċertifikat ta’ l-oriġini msemmi fl-Anness II jistgħu jinkludu kopji addizzjonali debitament indikati bħala tali. L-oriġinali u l-kopji ta' dawn id-dokumenti għandhom isiru bl-Ingliż.

2.   Jekk id-dokumenti msemmija fil-paragrafu 1 jitlestew bl-idejn, l-entrati għandhom isiru bil-linka u b'ittri kbar.

3.   Il-liċenzji ta’ l-esportazzjoni jew dokumenti ekwivalenti u ċ-ċertifikati ta’ l-oriġini għandhom ikollhom daqs ta’ 210 × 297 mm. Il-karta għandha tkun karta bajda tal-kitba, ta' daqs uniformi, li ma tkunx magħmula minn polpa mekkanika u li tkun tiżen mhux inqas minn 25 g/m2. Kull parti għandha ikollha sfond b’disinn guilloche stampat li jirrendi kwalunkwe falsifikazzjoni b’mezzi mekkaniċi jew kimiċi viżibbli għall-għajn.

4.   Għandu jiġi aċċettat bħala validu l-oriġinali biss mill-awtoritajiet kompetenti ta’ l-Istati Membri għall-finijiet ta’ l-importazzjoni konformement mad-dispożizzjonijiet ta’ dan ir-Regolament.

5.   Kull liċenzja ta’ l-esportazzjoni jew dokument ekwivalenti u ċ-ċertifikat ta’ l-oriġini għandhom ikollhom numru tas-serje standardizzat, kemm jekk stampat jew le, li bih dan ikun jista’ jiġi identifikat.

6.   Dan in-numru għandu jkun kompost mill-elementi li ġejjin:

Artikolu 26

Il-liċenzja ta’ l-esportazzjoni u ċ-ċertifikat ta’ l-oriġini jistgħu jinħarġu wara l-imbarkazzjoni tal-prodotti li għalihom dawn ikunu jirriferu. F’dawn il-każijiet, dawn għandhom jindikaw fuqhom stess l-espressjoni “issued retrospectively”.

Artikolu 27

Fil-każ li liċenzja ta’ l-esportazzjoni jew ċertifikat ta’ l-oriġini jinsterqu, jintilfu jew jinqerdu, l-esportatur jista’ japplika għand l-awtoritajiet kompetenti li jkunu ħarġu d-dokument għal dokument duplikat li għandu jsir abbażi tad-dokumenti ta’ l-esportazzjoni fil-pussess tiegħu. Il-liċenzja jew iċ-ċertifikat duplikati maħruġa b’dan il-mod għandhom jindikaw fuqhom stess l-espressjoni “duplicate”. Id-dokument duplikat għandu jkollu fuqu stess id-data tal-liċenzja jew ċertifikat oriġinali.

TAQSIMA 4

Liċenzja ta’ l-importazzjoni tal-komunità – formola komuni

Artikolu 28

1.   Il-formoli li għandhom jintużaw mill-awtoritajiet kompetenti ta’ l-Istati Membri għall-ħruġ ta’ l-awtorizzazzjonijiet ta’ l-importazzjoni imsemmija fl-Artikolu 21 għandhom ikunu konformi mal-mudell tal-liċenzja ta’ l-importazzjoni espost fl-Anness III.

2.   Il-formoli tal-liċenzji ta’ importazzjoni u l-estratti tagħhom għandhom jitfasslu duplikatament, b'kopja waħda, markata “Kopja tad-detentur” u li jkollha n-numru 1 sabiex tinħareġ lill-applikant, u bl-oħra, markata “Kopja għall-awtorità tal-ħruġ” li jkollha n-numru 2, sabiex tinżamm mill-awtorità li toħroġ il-liċenzja. Għal finijiet amministrattivi l-awtoritajiet kompetenti jistgħu jżidu kopji addizzjonali mal-formola 2.

3.   Il-formoli għandhom jiġu stampati fuq karta bajda mingħajr polpa mekkanika, magħmula għall-kitba u ta' piż bejn 55 u 65 g/m2. Id-daqs tagħhom għandu jkun ta’ 210 × 297 mm; l-ispazju bejn il-linji għandu jkun ta' 4,24 mm (wieħed minn sitta ta’ pulzier); il-format tal-formoli għandu jkun segwit b’mod preċiż. Iż-żewġ naħat tal-kopja Nru 1, li tikkostitwixxi l-liċenzja stess, għandhom barra minn hekk ikollhom sfond b’disinn guilloche stampat bl-aħmar sabiex jikxef kwalunkwe falsifikazzjoni b'mezzi mekkaniċi jew kimiċi.

4.   L-Istati Membri għandhom ikunu responsabbli mill-istampar tal-formoli. Il-formoli jistgħu wkoll ikunu stampati minn stampaturi nominati mill-Istat Membru li fih jkunu stabbiliti. F’dan l-aħħar każ, għandu jidher fuq kull formola riferiment għan-nomina mill-Istat Membru. Kull formola għandha tindika fuqha stess l-isem u l-indirizz ta’ l-istampatur jew marka li tippermetti l-identifikazzjoni ta' l-istampatur.

5.   Mal-ħruġ tagħhom il-liċenzji ta’ l-importazzjoni jew l-estratti tagħhom għandhom jingħataw numru tal-ħruġ assenjat mill-awtoritajiet kompetenti ta’ l-Istat Membru. In-numru tal-liċenzja ta’ l-importazzjoni għandha tiġi notifikata lill-Kummissjoni elettronikament fi ħdan in-network integrat stabbilit taħt l-Artikolu 4.

6.   Il-liċenzji u l-estratti tagħhom għandhom jitfasslu fil-lingwa uffiċjali, jew f’waħda mil-lingwi uffiċjali, ta’ l-Istat Membru tal-ħruġ.

7.   Fil-kaxxa 10 l-awtoritajiet kompetenti għandhom jindikaw il-grupp korrett tal-prodotti ta’ l-azzar.

8.   Il-marki ta’ l-aġenziji tal-ħruġ u ta’ l-awtoritajiet li jagħmlu l-attribuzzjonijiet għandhom jiġu applikati permezz ta’ timbru. Madankollu, it-timbru ta’ l-awtorità tal-ħruġ jista' jiġi sostitwit minn stampar b’tipi mqabbżin kombinati ma’ ittri jew figuri magħmula permezz ta’ perforazzjoni, jew minn stampar fuq il-liċenzja. L-awtoritajiet tal-ħruġ għandhom jużaw kwalunkwe metodu mhux falsifikabbli sabiex jirreġistraw il-kwantità allokata b’tali mod li jagħmilha impossibbli li jiġu inseriti figuri jew riferimenti.

9.   In-naħa ta' wara tal-kopja Nru 1 u tal-kopja Nru 2 għandhom jillustraw kaxxa li fiha jkunu jistgħu jiġu inseriti l-kwantitajiet, mill-awtoritajiet tad-dwana meta jitlestew il-formalitajiet ta’ l-importazzjoni, jew mill-awtoritajiet amministrattivi kompetenti meta jinħareġ estratt. Jekk fuq liċenzja jew l-estratt tagħha ma jkunx suffiċjenti l-ispazju riservat għall-attribuzzjonijiet, l-awtoritajiet kompetenti jistgħu jehmżu paġna ta' estensjoni jew aktar li jillustraw kaxxi korrispondenti għal dawk illustrati fuq in-naħiet ta' wara tal-kopja Nru 1 u tal-kopja Nru 2 tal-liċenzja jew l-estratt. L-awtoritajiet li jagħmlu l-attribuzzjonijiet għandhom iqiegħdu t-timbru tagħhom b’tali mod li nofsu jiġi stampat fuq il-liċenzja jew l-estratt tagħha u n-nofs l-ieħor jiġi stampat fuq il-paġna estensiva. Jekk ikun hemm iktar minn paġna waħda estensiva, għandu jitqiegħed timbru ieħor bl-istess mod fuq kull paġna u l-paġna preċedenti.

10.   Il-liċenzji ta’ l-importazzjoni u l-estratti maħruġa flimkien ma' l-entrati magħmula u l-awtorizzazzjonijiet imniżżla mill-awtoritajiet ta’ Stat Membru partikolari għandhom ikollhom l-istess effett legali f’kull wieħed mill-Istati Membri l-oħra bħal dokumenti maħruġa u entrati magħmula u awtorizzazzjonijiet imniżżla mill-awtoritajiet ta’ dawn l-istess Stati Membri.

11.   L-awtoritajiet kompetenti ta’ l-Istati Membri konċernati jistgħu, fejn dan ikun indispensabbli, jitolbu li l-kontenuti tal-liċenzji jew l-estratti jiġu tradotti fil-lingwa uffiċjali jew f’waħda mil-lingwi uffiċjali ta’ dak l-Istat Membru.

KAPITOLU III

KOPERAZZJONI AMMINISTRATTIVA

Artikolu 29

Il-Kummissjoni għandha tforni lill-awtoritajiet ta’ l-Istati Membri l-ismijiet u l-indirizzi ta’ l-awtoritajiet fil-Federazzjoni Russa kompetenti sabiex joħorġu ċ-ċertifikati ta’ l-oriġini u l-liċenzji ta’ l-esportazzjoni flimkien ma’ kampjuni tat-timbri użati minn dawn l-awtoritajiet.

Artikolu 30

1.   Għandha issir, sussegwentement fuq bażi każwali, il-verifika taċ-ċertifikati ta’ l-oriġini jew tal-liċenzji ta’ l-esportazzjoni, jew kull meta l-awtoritajiet kompetenti ta’ l-Istati Membri jkollhom xi dubbju raġonevoli dwar l-awtentiċità taċ-ċertifikat jew tal-liċenzja jew dwar l-eżattezza ta' l-informazzjoni dwar l-oriġini vera tal-prodotti in kwistjoni.

F’dawn il-każijiet l-awtoritajiet kompetenti Komunitarji għandhom jibagħtu lura ċ-ċertifikat ta’ l-oriġini jew il-liċenzja ta’ l-esportazzjoni jew kopji tagħhom lill-awtoritajiet kompetenti tal-Federazzjoni Russa waqt li jagħtuhom, fejn ikun il-każ, ir-raġunijiet, rigward forma jew kontenut, li jiġġustifikaw li ssir inkjesta. Jekk tkun ġiet preżentata fattura, tali fattura jew kopja tagħha għandha tiġi mehmuża maċ-ċertifikat ta' l-oriġini jew mal-liċenzja ta' l-esportazzjoni jew mal-kopji tagħhom. L-awtoritajiet għandhom jgħaddu wkoll kull informazzjoni mogħtija li tissuġġerixxi li d-dettalji mogħtija fiċ-ċertifikat jew fil-liċenzja ma jkunux korretti.

2.   Il-paragrafu 1 għandu japplika wkoll għall-verifiki sussegwenti tad-dikjarazzjonijiet ta' l-oriġini.

3.   Ir-riżultati tal-verifiki sussegwenti li jkunu saru skond il-paragrafu 1 għandhom jiġu komunikati lill-awtoritajiet kompetenti Komunitarji fi żmien mhux aktar tard minn tliet xhur. L-informazzjoni komunikata għandha tindika jekk iċ-ċertifikat, jew il-liċenzja jew id-dikjarazzjoni kontestati japplikawx għall-merkanzija li fil-fatt ġiet esportata u jekk il-merkanzija tistax tiġi esportata lejn il-Komunità taħt dan l-Kapitolu. L-awtoritajiet kompetenti Komunitarji jistgħu jitolbu kopji tad-dokumentazzjoni kollha neċessarja sabiex jiddeterminaw il-fatti b’mod sħiħ, inkluża, b’mod partikolari, l-oriġini tal-merkanzija.

4.   Jekk dawn il-verifiki jiżvelaw xi abbuż jew xi irregolaritajiet gravi fl-użu tad-dikjarazzjonijiet ta’ l-oriġini, l-Istat Membru konċernat għandu jinforma lill-Kummissjoni b’dan il-fatt. Il-Kummissjoni għandha tgħaddi l-informazzjoni lill-Istati Membri l-oħra.

5.   Ir-rikors fuq bażi każwali għall-proċedura ta’ verifika speċifikata f’dan l-Artikolu ma għandux jikkostitwixxi ostakolu għar-rilaxx tal-prodotti in kwistjoni għaċ-ċirkolazzjoni libera.

Artikolu 31

1.   Fejn il-proċedura ta’ verifika msemmija fl-Artikolu 30 jew fejn l-informazzjoni fil-pussess tal-awtoritajiet kompetenti Komunitarji tindika li d-dispożizzjonijiet ta’ dan il-Kapitolu ikunu qegħdin jiġu miksura, l-awtoritajiet imsemmija għandhom jitolbu lill-Federazzjoni Russa sabiex twettaq l-inkjesti xierqa jew tirranġa sabiex isiru tali inkjesti fir-rigward ta' l-operazzjonijiet li jiksru jew jidhru li jiksru d-dispożizzjonijiet ta’ dan il-Kapitolu. Ir-riżultati ta’ dawn l-inkjesti għandhom jiġu komunikati lill-awtoritajiet kompetenti Komunitarji flimkien ma’ kwalunkwe informazzjoni pertinenti oħra li tgħin sabiex tiġi determinata l-oriġini vera tal-merkanzija.

2.   Fl-ambitu tal-miżuri meħuda konformement ma' dan il-Kapitolu, l-awtoritajiet kompetenti Komunitarji jistgħu jiskambjaw kwalunkwe informazzjoni, ma’ l-awtoritajiet kompetenti governattivi tar-Repubblika tal-Federazzjoni Russa, li tkun meqjusa utli sabiex jiġi prevenut il-ksur tad-dispożizzjonijiet ta' dan il-Kapitolu.

3.   Fejn jiġi stabbilit li d-dispożizzjonijiet ta’ dan il-Kapitolu ġew miksura, il-Kummissjoni tista’ tieħu l-miżuri neċessarji sabiex timpedixxi r-rikorrenza ta' tali ksur.

Artikolu 32

Il-Kummissjoni għandha tikkoordina l-miżuri meħuda mill-awtoritajiet kompetenti ta’ l-Istati Membri skond id-dispożizzjonijiet ta’ dan il-Kapitolu. L-awtoritajiet kompetenti ta’ l-Istati Membri għandhom jinformaw lill-Kummissjoni u lill-Istati Membri l-oħra bil-miżuri li huma jieħdu u bir-riżultati miksuba.

KAPITOLU IV

DISPOŻIZZJONIJIET FINALI

Artikolu 33

Id-Deċiżjoni tal-Kunsill (KE) 2267/2004 hija b'dan imħassra.

Artikolu 34

Dan ir-Regolament għandu jidħol fis-seħħ fil-jum tal-pubblikazzjoni tiegħu fil-Ġurnal Uffiċjali ta’ l-Unjoni Ewropea.

(1)  ĠU L 327, tat-28.11.1997, p. 3.

(2)  Ara paġna 39 ta’ dan il-Ġurnal Uffiċjali.

(3)  ĠU L 256, 7.9.1987, p. 1. Regolament kif emendat l-aħħar bir- Regolament (KE) Nru 493/2005 (ĠU L 82, 31.3.2005, p. 1).

(4)  ĠU L 395, 31.12.2004, p. 38.