6.10.2006   

MT

Il-Ġurnal Uffiċjali ta’ l-Unjoni Ewropea

92

(1)

Artikolu 2 (7) tad-Deciżjoni tal-Kunsill Nru 2000/597/KE, Euratom tad-29 ta’ Settembru 2000 dwar is-sistema tar-riżorsi proprji (2) tal-Komunitajiet jistipula li l-prodott gross nazzjonali skond il-prezzijiet tas-suq (GNP) għandu jitqies bħala daqs id-dħul gross nazzjonali skond il-prezzijiet tas-suq (GNI) kif previst mill-Kummissjoni fl-applikazzjoni tas-Sistema Ewropea tal-Kontijiet (ESA). L-ESA tal-1995 (ESA95), li ħadet post iż-żewġ sistemi ta’ qabel ta’ l-1970 u l-1979 rispettivament, ġiet imwaqqfa bir-Regolament Nru 2223/96 tal-Kunsill (KE) tal-25 ta' Ġunju 1996 dwar is-sistema Ewropea tal-kontijiet nazzjonali u reġjonali fil-Komunità (3) u ġiet imniżżla fl-Anness tiegħu. Il-GNI, kif użat fl-ESA95, ħa post il-GNP bħala kriterju għall-għanijiet ta’ riżorsi proprji b’effett mis-sena tal-baġit 2002.

(2)

Ir-Regolament Nru 1287/2003 tal-Kunsill (KE, Euratom) jistipula l-proċeduri ta’ kif għandha tintbagħat id-data tal-GNI mill-Istati Membri, kif ukoll il-proċeduri u l-kontrolli fuq il-kalkolu tal-GNI, u jwaqqaf il-Kumitat tal-GNI.

(3)

L-ESA95 ma jispeċifikax b’mod espliċitu t-trattament tal-ħlas lura tal-VAT lil persuni mhux taxxabbli u lil persuni taxxabbli għall-attivitajiet li huma eżentati.

(4)

Għall-għan tad-definizzjoni ta’ dħul gross nazzjonali skond il-prezzijiet tas-suq (GNI) skond l-Artikolu 1 tar-Regolament (KE, Euratom) Nru 1287/2003 huwa meħtieġ li jiġi ċċarat it-trattament tal-ħlas lura tal-VAT lil persuni mhux taxxabbli u lil persuni taxxabbli għall-attivitajiet li huma eżentati.

(5)

Is-Sitt Direttiva 77/388/EEC tal-Kunsill tas-17 ta’ Mejju 1977 dwar l-armonizzazzjoni tal-leġislazzjoni ta’ l-Istati Membri f’dak li għandu x’jaqsam ma’ taxxi fuq il-bejgħ gross – Sistema Komuni tat-taxxa fuq il-valur miżjud: bażi ta’ stima uniformi (4), tiddefinixxi l-kunċetti ta’ persuna taxxabbli, ta’ persuna mhux taxxabbli u ta’ attivitajiet li huma eżentati.

(6)

Għall-għan ta’ l-implimentazzjoni tad-Direttiva tal-Kunsill Nru 89/130 (KEE, Euratom) tat-13 ta’ Frar 1989 dwar l-armonizzazzjoni tal-kumpilazzjoni tal-prodott gross nazzjonali skond il-prezzijiet tas-suq (5), id-Deċiżjoni tal-Kummissjoni Nru 1999/622 (KEE, Euratom) tat-8 ta' Settembru 1999 (6) tiċċara t-trattament tal-ħlas lura tal-VAT lil unitajiet mhux taxxabbli u lil unitajiet taxxabbli għall-attivitajiet eżentati. Il-kjarifika ekwivalenti għandha issa tingħata fir-rigward tal-GNI.

(7)

Il-miżuri previsti f’dan ir-Regolament huma fi qbil ma’ l-opinjoni tal-Kumitat GNI.