"ANNESS VII

APPROVAZZJONI TAT-TIP TA’ KONVERTITUR KATALITIKU SOSTITUT BĦALA UNITÀ TEKNIKA SEPARATA GĦAL VETTURI BIL-MUTUR TA’ ŻEWĠJEW TLIET ROTI

Dan l-Anness japplika għall-approvazzjoni tat-tip, bħala unità teknika separata fi ħdan it-tifsira ta’ l-Artikolu 2 (5) tad-Direttiva 2002/24/KE, ta’ konvertituri katalitiċi li jitpoġġew, f’tip wieħed jew aktar ta’ vetturi bil-mutur ta' żewġ jew tliet roti, bħala partijiet ta’ sostituzzjoni.

1.   TIFSIRIET

Għall-għanijiet ta’ dan l-Anness, it-tifsiriet li ġejjin għandhom jgħoddu:

1.1.   “konvertitur katalitiku b’tagħmir oriġinali” jfisser konvertitur katalitiku jew ġabra ta’ konvertituri katalitiċi koperti bl-approvazzjoni tat-tip magħmula għall-vettura;

1.2.   “konvertitur katalitiku sostitut” ifisser konvertitur katalitiku jew ġabra ta’ konvertituri katalitiċi maħsuba biex jieħdu post konvertitur katalitiku b’tagħmir oriġinali fuq vettura b’approvazzjoni tat-tip skond dan il-Kapitolu 5, li jista’ jkun approvat bħala unità teknika separata kif definit f’Artikolu 2 (5) tad-Direttiva 2002/24/KE;

1.3.   “konvertitur katalitiku sostitut oriġinali” jfisser konvertitur katalitiku jew ġabra ta’ konvertituri katalitiċi li t-tipi tagħhom huma indikati fit-taqsima 5 ta’ Anness VI ta’ din id-Direttiva imma li huma offerti fis-suq bħala unità teknika separata mill-pussessur ta’ l-approvazzjoni tat-tip tal-vettura;

1.4.   “tip ta’ konvertitur katalitiku” jfisser konvertituri katalitiċi li m’humiex differenti f’ċerti aspetti essenzjali, bħal dawn li ġejin:

1.4.1.

numru ta’ sostrati miksija, struttura u materjal;

1.4.2.

tip ta’ attività katalittika (ossidazzjoni, three-way, eċċ.);

1.4.3.

volum, proporzjon ta’ l-erja frontali u tul tas-sostrat;

1.4.4.

kontenut ta’ materjal katalizzatur;

1.4.5.

proporzjoni ta’ materjal katalizzatur;

1.4.6.

densità taċ-ċellula;

1.4.7.

qies u forma;

1.4.8.

protezzjoni termali;

1.5.   “tip ta’ vettura fir-rigward ta’ l-emissjoni ta’ sustanzi li jniġġsu tal-gass mill-magna” tfisser vetturi bil-mutur ta’ żewġ jew tliet roti li m’humiex differenti f’aspetti essenziali, bħal dawn li ġejjin:

1.5.1.

L-inerzja ekwivalenti determinata f’relazzjoni mal-mass ta’ referenza, kif stabbilit fit-taqsima 5.2 ta’ l-Appendiċi 1 ta’ l-Anness I jew l-Anness II (jiddependi mit-tip ta’ vettura);

1.5.2.

Il-karatteristiċi tal-magna u tal-vettura bil-mutur ta’ żewġ jew tliet roti kif imfisser f’Anness V;

1.6.   “sustanzi li jniġġsu tal-gass” ifissru monossidu tal-karbonju, idrokarbonji u ossidi tan-nitroġenu espressi f’termini ta’ diossidu tan-nitroġenu (NO2).

2.   APPLIKAZZJONI GĦALL-APPROVAZZJONI TAT-TIP

2.1.   Applikazzjoni għal approvazzjoni tat-tip għal xi tip ta’ konvertitur katalitiku sostitut bħala unità teknika separata għandha tkun imressqa mill-manifattur tas-sistema jew mir-rappreżentant awtorizzat tiegħu.

2.2.   Mudell tad-dokument ta’ l-informazzjoni huwa mniżżel fl-Appendiċi.

2.3.   Għal kull tip ta’ konvertitur katalitiku li għalih tintalab approvazzjoni, l-applikazzjoni għall-approvazzjoni tat-tip għandha tkun akkumpanjata bid-dokumenti li ġejjin għal tliet darbiet, u mid-dettalji segwenti:

2.3.1.

deskrizzjoni tat-tip(i) ta’ vettura li għaliha huwa maħsub it-tagħmir, fir-rigward tal-karatteristiċi msemmija f’taqsima 1.1 ta’ l-Anness I jew l-Anness II (jiddependi mit-tip ta’ vettura);

2.3.2.

għandhom ikunu provduti n-numri u/jew is-simboli li jkunu speċifiċi għat-tip ta’ magna u vettura;

2.3.3.

deskrizzjoni tal-konvertitur katalitiku sostitut li tiddikjara l-pożizzjoni relattiva ta’ kull komponent tiegħu, flimkien ma’ l-istruzzjonijiet għat-tpoġġija tiegħu fil-post;

2.3.4.

stampi ta’ kull komponent sabiex tkun faċilitata l-pożizzjoni u l-identifikazzjoni, u dikjarazzjoni tal-materjali użati. Dawn l-istampi għandhom ukoll jindikaw il-pożizzjoni maħsuba tan-numru mandatorju ta’ l-approvazzjoni tat-tip.

2.4.   Dan li ġej għandu jkun imressaq lis-servizz tekniku responsabbli mit-test ta’ l-approvazzjoni tat-tip:

2.4.1.

Vettura(i) ta’ tip approvat skond dan il-Kapitolu 5 mgħammra b’apparat oriġinali ġdid ta’ konvertitur katalitiku. Din (dawn) il-vettura(i) għandha tingħażel mill-applikant bil-qbil tas-servizz tekniku. Għandha (għandhom) tkun konformi mar-rekwiżiti tat-Taqsima 3 ta’ l-Appendiċi 1 ta’ l-Anness I, II jew III (jiddependi mit-tip ta’ vettura). Il-vettura(i) ittestjata(i) m’għandu jkollha l-ebda difett fis-sistema tal-kontroll ta’ l-emissjoni; kwalunkwe parti oriġinali relatata ma’ l-emissjoni li tkun intużat ħafna jew li ma tkunx qed taħdem sew għandha tkun irranġata jew mibdula. Il-vettura(i) ittestjata(i) għandha tkun issettjata tajjeb skond l-ispeċifikazzjonijiet tal-manifattur qabel isir it-test ta’ l-emissjoni.

2.4.2.

Kampjun wieħed tat-tip ta’ konvertitur katalitiku sostitut. Dan il-kampjun għandu jkun immarkat b’mod ċar u indelibbli bl-isem jew il-marka tan-negozju ta’ l-applikant u bin-nomina kummerċjali tiegħu.

3.   L-GĦOTI TA’ L-APPROVAZZJONI TAT-TIP

3.1.

Malli jitlestew it-testijiet elenkati f’dan l-Anness, l-awtorità kompetenti għandha toħroġ ċertifikat ibbażat fuq il-mudell stabbilit f’Appendiċi 2.

3.2.

Għandu jkun mogħti numru ta’ approvazzjoni skond l-Anness V tad-Direttiva 2002/24/KE għal kull tip ta’ konvertitur katalitiku sostitut li jkun approvat. L-istess Stat Membru m’għandux jagħti l-istess numru li xi tip ieħor ta’ konvertitur katalitiku sostitut. L-istess numru ta’ l-approvazzjoni tat-tip jista’ jkopri l-użu ta’ dak it-tip ta’ konvertitur katalitiku sostitut fuq numru ta’ tipi differenti ta’ vetturi.

4.   REKWIŻITI GĦALL-IMMARKAR

4.1.   Kull konvertitur katalitiku sostitut li jkun konformi ma’ l-approvazzjoni tat-tip ta’ din id-Direttiva bħala unità teknika separata iżda mhux il-partijiet u l-pajpijiet ta’ l-immontar, għandu jkollu marka ta’ l-approvazzjoni tat-tip magħmula skond ir-rekwiżiti ta’ l-Artikolu 8 tad-Direttiva 2002/24/KE, bis-suppliment ta’ informazzjoni ulterjuri kif msemmija fit-taqsima 4.2 ta’ dan l-Anness. Il-marka ta’ l-approvazzjoni tat-tip għandha tkun mwaħħla b’tali mod li tkun tista’ tinqara, indelibbli u wkoll viżibbli (fejn possibbli) fil-pożizzjoni li fiha titpoġġa.

Il-qisien ta’ l-“a” għandhom ikunu ≥ 3 mm.

4.2.   Informazzjoni ulterjuri kontenuta fil-marka ta’ l-approvazzjoni tat-tip

4.2.1.   Kull konvertitur katalitiku sostitut, imma mhux il-partijiet u pajpijiet immuntati, għandu jkollu, fil-marka ta’ l-approvazzjoni tat-tip, in-numru tal-Kapitolu(i) li fuqu ġie mogħti l-approvazzjoni tat-tip.

4.2.1.1.   Konvertitur katalitiku sostitut li jkun jikkonsisti minn parti waħda biss li tintegra l-konvertitur katalitiku u s-sistema ta’ l-egżost (silencer)

Il-marka ta’ l-approvazzjoni tat-tip imsemmija fit-taqsima 4.1 għandha tkun segwita b’żewġt iċrieki madwar numru 5 u numru 9 rispettivament.

4.2.1.2.   Konvertitur katalitiku sostitut li jkun separat mis-sistema ta’ l-egżost (silencer)

Il-marka ta’ l-approvazzjoni tat-tip imsemmija fit-taqsima 4.1 imwaħħla mal-konvertitur katalitiku sostitut għandu tkun segwita b’ċirku madwar numru 5.

Eżempji ta’ marki ta’ l-approvazzjoni tat-tip huma mogħtija fl-Appendiċi 3.

5.   REKWIŻITI

5.1.   Rekwiżiti ġenerali

Id-disinn, kostruzzjoni u mmontar tal-konvertitur katalitiku sostitut għandu jkun tali li:

5.1.1.

il-vettura tkun konformi mar-rekwiżiti ta’ l-Anness f’kondizzjonijiet normali ta’ l-użu, u b’mod partikolari għal kwalunkwe vibrazzjoni li tista’ tkun suġġetta għaliha;

5.1.2.

il-konvertitur katalitiku sostitut juri reżistenza raġonevoli għall-fenomenu tas-sadid li jkun espost għalih, b’konsiderazzjoni tal-kondizzjonijiet normali ta’ l-użu tal-vettura;

5.1.3.

l-ispazju ħieles disponibbli taħt il-konvertitur katalitiku oriġinali, u l-anglu li fih tista’ ddur il-vettura, ma jkunux imnaqqsa;

5.1.4.

is-superfiċje ma tilħaqx temperaturi għoljin ħafna;

5.1.5.

il-linja ta’ barra ma jkollhiex ħruġ jew truf b’ponot fini;

5.1.6.

ix-shock absorbers u s-sospensjonijiet ikollhom spazju adegwat;

5.1.7.

spazju adegwat ta’ sigurtà jkun provdut għall-pajpijiet;

5.1.8.

jkun reżistenti għall-impatt b’tali mod li jkun kompatibbli mar-rekwiżiti definiti b’mod ċar ta’ manutenzjoni u installazzjoni;

5.1.9.

jekk it-tagħmir oriġinali tal-konvertitur katalitiku jinkludi l-protezzjoni termali, il-konvertitur katalitiku sostitut għandu jinkludi protezzjoni ekwivalenti;

5.1.10.

jekk sonda(i) ta’ l-ossiġnu u sensuri oħra jkunu oriġinarjament installati fil-linja ta’ l-egżost, l-installazzjoni tal-konvertitur katalitiku sostitut għandha tkun fil-pożizzjoni eżatta tat-tagħmir oriġinali tal-konvertitur katalitiku, u l-pożizzjoni tas-sonda(i) ta l-ossiġnu u ta’ sensuri oħra fil-linja ta’ l-egżost, m’għandhiex tkun modifikata.

5.2.   Rekwiżiti fir-rigward ta’ l-emissjonijiet

5.2.1.   Il-vettura msemmija fit-taqsima 2.4.1, mgħammra b’konvertitur katalitiku sostitut tat-tip li għalih tintalab approvazzjoni tat-tip, għandha tkun suġġetta għat-testijiet imniżżla f’Appendiċi 1 u 2 ta’ l-Annessi I, II jew III (skond it-tip ta’ approvazzjoni tal-vettura) (*).

5.2.1.1.   Evalwazzjoni ta’ l-emissjoni ta’ sustanzi li jniġġsu ta’ vetturi mgħammra b’konvertitur katalitiku sostitut

Rekwiżiti li jirrigwardaw l-emissjonijiet huma meqjusa bħala milħuqa jekk il-vettura ttestjata mgħammra b’konvertitur katalitiku sostitut tkun konformi mal-valuri ta’ limitu skond l-Anness I, II jew III (skond it-tip ta’approvazzjoni tal-vettura) (*).

Fejn l-approvazzjoni tat-tip tkun applikata għal tipi differenti ta’ vetturi mill-istess manifattur, u bil-kondizzjoni li dawn it-tipi differenti ta’ vetturi jkollhom l-istess tip ta’ tagħmir oriġinali ta’ konvertitur katalitiku, it-test ta’ tip I jista’ jkun limitat għal mill-inqas żewġ vetturi magħżula wara qbil mas-servizz tekniku responsabbli mill-approvazzjoni.

5.2.2.   Rekwiżiti relatati mal-livell ta’ ħoss permess

Il-vettura msemmija fit-taqsima 2.4.1, mgħammra b’konvertitur katalitiku sostitut tat-tip li jeħtieġlu approvazzjonu tat-tip, għandu jissodisfa r-rekwiżiti tekniċi ta’ Taqsima 3 ta’ l-Anness II, III jew III tal-Kapitolu 9 (skond it-tip – approvazzjoni tal-vettura). Ir-riżultat ta’ l-eżami tal-vettura wieqfa u miexja jrid jissemma’ fir-rapport tat-test.

5.3.   Ittestjar ta’ l-eżekuzzjoni tal-vettura

5.3.1.

Il-konvertitur katalitiku sostitut għandu jkun tali sabiex jassigura li l-eżekuzzjoni tal-vettura tkun komparabbli ma’ dik miksuba mit-tagħmir oriġinali tal-konvertitur katalitiku.

5.3.2.

Il-konvertitur katalitiku sostitut għandu jkun mqabbel ma’ tagħmir oriġinali ta’ konvertitur katalitiku, li jkun hu ukoll f’kondizzjoni ġdida, impoġġi fil-vettura msemmija f’2.4.1.

5.3.3.

Dan it-test isir billi titkejjel il-kurva tal-forza tal-magna. Il-forza netta massima u l-ogħla veloċità mkejla bil-konvertitur katalitiku sostitut m’għandhiex tkun differenti b’iktar minn ± 5 % tal-forza netta massima u ta’ l-ogħla veloċità mkejla fl-istess kondizzjonijiet bit-tagħmir oriġinali tal-konvertitur katalitiku.

6.   KONFORMITÀ TAL-PRODUZZJONI

Id-dispożizzjonijiet ta’ l-Anness VI tad-Direttiva 2002/24/KE japplikaw għall-iċċekkjar tal-konformità tal-produzzjoni.

Sabiex tkun ittestjata l-konformità kif mitluba hawn fuq, għandu jittieħed kampjun ta’ konvertitur katalitiku sostitut mil-linja ta’ produzzjoni tat-tip approvat, skond dan l-Anness.

Il-produzzjoni titqies bħala konformi mad-dispożizzjonijiet ta’ dan l-Anness jekk ir-rekwiżiti tat-taqsima 5.2 (Rekwiżiti fir-rigward ta’ l-emissjonijiet) u tat-taqsima 5.3 (Ittestjar ta’ l-eżekuzzjoni tal-vettura) jkunu sodisfatti.

7.   DOKUMENTAZZJONI

7.1.   Kull konvertitur katalitiku sostitut ġdid għandu jkun akkumpanjat bl-informazzjoni li ġejja:

7.1.1.

l-isem jew il-marka tan-negozju tal-manifattur katalizzatur;

7.1.2.

il-vetturi (inkluż is-sena tal-manifattura) li għalihom il-konvertitur katalitiku sostitut huwa approvat, inkluż, fejn meħtieġ;

7.1.3.

istruzzjonijiet ta’ l-installazzjoni, fejn neċessarju.

7.2.   Din l-informazzjoni għandha tkun provduta jew ġewwa fuljett li jakkumpanja l-konvertitur katalitiku sostitut, jew, fuq il-pakkett li fih jinbiegħ il-konvertitur katalitiku sostitut; jew b’xi mezz ieħor applikabbli