32005D0663

Deċiżjoni tal-Kunsill

tat- 18 ta' Jannar 2005

dwar il-konklużjoni, f'isem il-Komunità Ewropea u l-Istati Membri tagħha, ta' Protokoll għall-Ftehim dwar il-Kooperazzjoni u l-Unjoni Doganali bejn il-Komunità Ekonomika Ewropea u r-Repubblika ta’ San Marino, rigward il-parteċipazzjoni, bħala Partijiet Kontraenti, tar-Repubblika Ċeka, ir-Repubblika ta' l-Estonja, ir-Repubblika ta' Ċipru, ir-Repubblika tal-Latvja, ir-Repubblika tal-Litwanja, ir-Repubblika ta' l-Ungerija, ir-Repubblika ta’ Malta, ir-Repubblika tal-Polonja, ir-Repubblika tas-Slovenja u r-Repubblika Slovakka, in segwitu għall-adeżjoni tagħhom ma' l-Unjoni Ewropea

(2005/663/KE)

IL-KUNSILL TA' L-UNJONI EWROPEA,

Wara li kkunsidra t-Trattat li jistabbilixxi l-Komunità Ewropea, u b'mod partikolari l-Artikoli 133 u 308, flimkien mat-tieni sentenza ta' l-ewwel subparagrafu ta’ l-Artikolu 300(2) u l-ewwel sub-paragrafu ta’ l-Artikolu 300(3) tiegħu,

Wara li kkunsidra t-Trattat ta' Adeżjoni tas- 16 ta’ April 2003, u b'mod partikolari l-Artikolu 2(3) tiegħu,

Wara li kkunsidra l-Att ta' Adeżjoni anness mat-Trattat ta’ Adeżjoni u b'mod partikolari l-Artikolu 6(2) tiegħu,

Wara li kkunsidra l-proposta mill-Kummissjoni,

Wara li kkunsidra l-opinjoni tal-Parlament Ewropew [1],

Billi:

(1) Wara l-awtorizzazzjoni mogħtija lill-Kummissjoni fit- 23 ta' Frar 2004, ġew konklużi negozjati mar-Repubblika ta' San Marino għal Protokoll għall-Ftehim dwar il-Kooperazzjoni u l-Unjoni Doganali bejn il-Komunità Ekonomika Ewropea u r-Repubblika ta’ San Marino, rigward il-parteċipazzjoni, bħala partijiet kontraenti, tar-Repubblika Ċeka, ir-Repubblika ta’ l-Estonja, ir-Repubblika ta’ Ċipru, ir-Repubblika tal-Latvja, ir-Repubblika tal-Litwanja, ir-Repubblika ta’ l-Ungerija, ir-Repubblika ta’ Malta, ir-Repubblika tal-Polonja, ir-Repubblika tas-Slovenja, u r-Repubblika Slovakka, in segwitu għall-adeżjoni tagħhom ma' l-Unjoni Ewropea.

(2) Skond l-Artikolu 6(2) ta' l-Att ta’ Adeżjoni ta' l-2003, abbozz tal-Protokoll ġie sottomess lill-Kunsill mill-Kummissjoni.

(3) Il-Protokoll għandu jiġi konkluż,

IDDEĊIEDA KIF ĠEJ:

Artikolu 1

Il-Protokoll għall-Ftehim dwar il-Kooperazzjoni u l-Unjoni Doganali bejn il-Komunità Ekonomika Ewropea u r-Repubblika ta' San Marino, rigward il-parteċipazzjoni, bħala partijiet kontraenti, tar-Repubblika Ċeka, ir-Repubblika ta’ l-Estonja, ir-Repubblika ta’ Ċipru, ir-Repubblika tal-Latvja, ir-Repubblika tal-Litwanja, ir-Repubblika ta’ l-Ungerija, ir-Repubblika ta' Malta, ir-Repubblika tal-Polonja, ir-Repubblika tas-Slovenja, u r- Repubblika Slovakka, in segwitu għall-adeżjoni tagħhom ma’ l-Unjoni Ewropea, huwa għalhekk approvat f’isem il-Komunità Ewropea u l-Istati Membri tagħha.

It-test tal-Protokoll huwa anness ma’ din id-Deċiżjoni.

Artikolu 2

Il-President tal-Kunsill huwa għalhekk awtorizzat li jinnomina l-persuna li jkollha s-setgħa li tiffirma l-Protokoll f’isem il-Komunità u l-Istati Membri tagħha.

Artikolu 3

F’isem il-Komunità u l-Istati Membri tagħha, l-President tal-Kunsill għandu jittrasmetti l-istrument ta' approvazzjoni kif meħtieġ mill-Artikolu 3 tal-Protokoll.

Magħmul fi Brussel, nhar il- 18 ta’ Jannar 2005.

Għall-Kunsill

Il-President

J.-C. Juncker

[1] Opinjoni ta' l- 14 ta’ Diċembru 2004 (għad mhux ippubblikat fil-Ġurnal Uffiċjali)

--------------------------------------------------