(1)

Bir-Regolament (KE) Nru 1676/2001 (2)(“ir-Regolament oriġinali”), il-Kunsill kien impona dazji kontra d-dumping fuq l-importazzjonijiet ta' film tal-polyethylene terephthalate (PET) (“film tal-PET”) li joriġinaw, inter alia, mill-Indja. Ir-rati ta' dawn id-dazji jvarjaw minn 0 % sa 62,6 %. Bid-Deċiżjoni 2001/645/KE (3), il-Kummissjoni aċċettat li tagħmel negozju ma' ħames produtturi esportaturi Indjani.

(2)

L-importazzjonijiet ta' film tal-PET li ġejjin mill-Indja huma wkoll suġġetti għal taxxi kompensatorji, li jvarjaw minn 3,8 % sa 19,1 %, liema dazji kienu ġew imposti bir-Regolament tal-Kunsill (KE) Nru 2597/1999 (4).

(3)

Fit-28 ta' Ġunju 2002, il-Kummissjoni ħabbret b'avviż ta' bidu li kien ġie ppubblikat fil-Ġurnal Uffiċjali tal-Komunitajiet Ewropej (5), li kien ingħata bidu għal reviżjoni interim parzjali skond l-Artikolu 19 tar-Regolament tal-Kunsill 2026/97 (6). It-talba hija limitata fl-għan tagħha għall-għamla tal-miżura u, l-aktar, għall-istħarriġ ta' l-aċċettibbiltà ta' negozju li kien offrut mill-applikant. Din ir-reviżjoni għadha qed issir.

(4)

Fit-22 ta' Novembru 2003, il-Kummissjoni ħabbret b'avviż ta' bidu li kien ġie ppubblikat fil-Ġurnal Uffiċjali ta' l-Unjoni Ewropea (7), li kien ingħata bidu għal reviżjoni interim parzjali skond l-Artikolu 11(3) tar-Regolament bażiku. Din hija limitata fl-għan tagħha għall-miżuri ta' kontra d-dumping. Din ir-reviżjoni għadha qed issir.

(5)

Fid-19 ta' Frar 2004, il-Kummissjoni ħabbret b'avviż ta' bidu li kien ġie ppubblikat fil-Ġurnal Uffiċjali ta' l-Unjoni Ewropea (8), li kien ingħata bidu għal reviżjoni interim skond l-Artikolu 11(3) tar-Regolament bażiku. Din hija limitata għad-dumping li qed iwettaq il-produttur esportatur Indjan Jindal Polyester Limited. Din ir-reviżjoni għadha qed issir.

(6)

Fis-6 ta' Jannar 2004, il-Kummissjoni rċeviet talba skond l-Artikolu 13(3) tar-Regolament bażiku (“it-talba”) mill-produtturi tal-Komunità DuPont Teijin Films, Mitsubishi Polyester Film GmbH u Nuroll SpA (“l-applikanti”) biex din tistħarreġ l-allegat qerq fil-miżuri kontra d-dumping li kienu ġew imposti fuq l-importazzjonijiet tal-film tal-PET li kienu ġejjin mill-Indja. L-applikanti ppreżentaw proporzjon kbira tal-produzzjoni tal-Komunità tal-film tal-PET.

(7)

L-applikanti allegaw u ppreżentaw xhieda biżżejjed li turi li wara l-impożizzjoni tal-miżuri fuq l-importazzjonijiet tal-film tal-PET li ġej, inter alia, mill-Indja, kien hemm bidliet sostanzjali fl-għamliet tal-kummerċ li kienu jinvolvu l-esportazzjoni tal-film tal-PET mill-Indja, il-Brażil u l-Iżrael lejn il-Komunità. Kien allegat ukoll li dawn il-bidliet fl-għamliet tal-kummerċ kienu qed jibdew mill-ġarr ta' film tal-PET li ġej mill-Indja permezz tal-Brażil u l-Iżrael. Kien allegat ukoll li ma kienx hemm raġuni biżżejjed jew ġustifikazzjoni ekonomika għal dawn il-bidliet għajr l-impożizzjoni tad-dazju fuq l-importazzjonijiet tal-film tal-PET mill-Indja.

(8)

Fl-aħħarnett, l-applikanti allegaw u ppreżentaw xhieda prima facie li l-effetti tar-rimedju ta' dan id-dazju kienu qed jiddgħajfu kemm f'termini ta' kwantitajiet u kemm ta' prezzijiet. Kien iddikjarat ukoll li volumi sostanzjali ta' importazzjonijiet ta' film tal-PET li kienu ġejjin mill-Brażil u l-Iżrael x'aktarx ħadu post dawk l-importazzjonijiet ta' film tal-PET li kienu ġejjin mill-Indja. Barra minn hekk, l-applikanti ppreżentaw xhieda prima facie li l-prezzijiet tal-film tal-PET impurtat mill-Brażil u mill-Iżrael kienu l-oġġett ta' dumping meta mqabbla mal-valuri normali li kienu ġew stabbiliti qabel għall-film tal-PET li ġej mill-Indja.

(9)

Bir-Regolament (KE) Nru 284/2004 (9)(“ir-Regolament tal-Bidu ta' l-Istħarriġ”), il-Kummissjoni bdiet stħarriġ dwar il-ksur possibbli fil-miżuri ta' kontra d-dumping fuq l-importazzjonijiet ta' film tal-PET li ġej mill-Indja, b'importazzjonijiet ta' film tal-PET li kienu qed jiġu kkunsinnati mill-Brażil u mill-Iżrael, kemm jekk dawn kienu ddikjarati li ġejjin mill-Brażil jew mill-Iżrael jew le. Skond l-Artikoli 13(3) u 14(5) tar-Regolament bażiku, din ordnat lill-awtoritajiet tad-dwana biex mill-20 ta' Frar 2004 dawn jibdew jirreġistraw l-importazzjonijiet ta' film tal-PET li kienu qed jiġu kkunsinnati mill-Brażil u mill-Iżrael, kemm jekk dawn ikunu ġejjin mill-Brażil jew mill-Iżrael jew le. Il-Kummissjoni avżat lill-awtoritajiet ta' l-Indja, il-Brażil u l-Iżrael dwar il-bidu ta' l-istħarriġ. Fl-istess ħin, bir-Regolament (KE) Nru 283/2004 (10) il-Kummissjoni bdiet ukoll stħarriġ dwar il-ksur possibbli tal-miżuri kompensatorji fuq l-importazzjonijiet ta' film tal-PET li kienu ġejjin mill-Indja, permezz ta' importazzjonijiet ta' film tal-PET li kienu qed jiġu kkunsinnati mill-Brażil u mill-Iżrael, kemm jekk dawn kienu ddikjarati li ġejjin mill-Brażil jew mill-Iżrael jew le. Ir-riżultati ta' dak l-istħarriġ kienu ppreżentati fir-Regolament tal-Kunsill (KE) Nru/2004 (11).

(10)

L-awtoritajiet ta' l-Indja wrew li huma kienu qed iqisu l-istħarriġ għal kontra dan l-allegat ksur bħala wieħed li ma setax isir skond il-Ftehim fuq l-Implimentazzjoni ta' l-Artikolu VI tal-Ftehim Ġenerali fuq it-Tariffi u l-Kummerċ ta' l-1994 jew il-Ftehim fuq is-Sussidji u l-Miżuri Kompensatorji. Din it-talba nċaħdet fuq il-bażi li d-dispożizzjonijiet ta' kontra l-qerq bil-liġi li hemm fir-Regolament bażiku mhumiex kumpatibbli mal-Ftehim fuq l-Implimentazzjoni ta' l-Artikolu VI tal-Ftehim Ġenerali fuq it-Tariffi u l-Kummerċ ta' l-1994 u l-Ftehim fuq is-Sussidji u l-Miżuri Kompensatorji. Fil-fatt, l-Att Finali li Jiġbor fih ir-Riżultati tal-Laqgħa li saret fl-Urugwaj dwar in-Negozjati Multilaterali fuq il-Kummerċ fih Deċiżjoni kontra t-Tidwir (12) li tirreferi din il-materja lill-Kumitat fuq il-Prattiċi ta' Kontra d-Dumping, fin-nuqqas ta' ftehim fuq test speċifiku. Minħabba li din id-Deċiżjoni kienet saret, waqt li kien magħruf li diversi Membri tad-WTO kellhom diġà l-leġislazzjoni tagħhom kontra l-qerq bil-liġi, il-Komunità Ewropea tinterpreta dan bħala mod kif Stati Membri individwali jkunu jistgħu jadottaw jew iżommu dispożizzjonijiet f'dan id-dawl, waqt li jiddependu mill-adozzjoni ta' regoli li dwarhom ikun hemm ftehim multilaterali. L-istess prinċipji, loġikament, għandhom japplikaw għall-investigazzjonijiet kontra s-sussidji.

(11)

Kienu ntbagħtu kwestjonarji lil dawk l-esportaturi/produtturi fl-Indja, il-Brażil u l-Iżrael li kienu kkooperaw fl-istħarriġ tal-bidu u li kienu ssemmew fit-talba jew li saru magħrufa wara lill-Kummissjoni. Kienu ntbagħtu wkoll kwestjonarji lill-importaturi fil-Komunità li ssemmew fit-talba jew li kkooperaw fl-istħarriġ tal-bidu li wassal għall-miżuri li hemm bħalissa. Il-partijiet kollha kienu mgħarrfa li n-nuqqas ta' kooperazzjoni seta' jwassal għall-applikazzjoni ta' l-Artikolu 18 tar-Regolament bażiku u għal riżultati li, waqt li kienu qed jiġu bbażati fuq il-fatti magħrufa, setgħu jkunu inqas vantaġġjużi milli kieku dik il-parti kellha tikkoopera.

(12)

It-tweġibiet għall-kwestjonarju waslu minn ħames esportaturi/produtturi mill-Indja, minn esportatur/produttur wieħed fil-Brażil u minn kumpanija waħda ta' pproċessar mill-Iżrael li kienet involuta fil-qtugħ, fil-produzzjoni ta' folji u fil-konverżjoni tal-film tal-PET u li kienet tesporta l-film tal-PET lejn il-Komunità. Kumpanija oħra fl-Iżrael spjegat li din kienet tipproċessa l-film tal-PET iżda l-prodotti li kienu jirriżultaw ma kinux ġew esportati taħt il-kodiċi tan-NM li taħthom il-film tal-PET kien ikklassifikat. Minħabba f'hekk, din il-kumpanija ma weġbitx il-kwestjonarju.

(13)

Wara li rċevew il-kwestjonarji, ħames importaturi fil-Komunità taw ukoll it-tweġiba tagħhom. Tlieta minn dawn irrappurtaw li huma qatt ma kienu impurtaw film tal-PET jew mill-Brażil jew mill-Iżrael. Iż-żewġ impurtaturi l-oħrajn qalu li huma ma impurtawx film tal-PET Indjan mill-Brażil jew mill-Iżrael matul il-perjodu ta' l-istħarriġ. Għalhekk, ħadd minn dawn il-kumpanniji ma wieġeb għall-kwestjonarji.

(14)

Il-Kummissjoni għamlet żjajjar ta' verifika fil-bini tal-kumpanniji li ġejjin:

(15)

Il-perjodu ta' l-istħarriġ kopra l-perjodu bejn l-1 ta' Jannar 2003 sal-31 ta' Diċembru 2003 (“il-PS”). It-tagħrif inġabar mis-sena 2000 sat-tmiem tal-PS biex ikun mistħarreġ l-allegat bdil fl-għamla tal-kummerċ.

(16)

Kif intqal fil-punt 12 fuq, ħames esportaturi/produtturi tal-film tal-PET fl-Indja kkooperaw fl-istħarriġ billi wieġbu għall-kwestjonarju. It-tagħrif inkiseb ukoll minn produttur esportatur wieħed tal-film tal-PET fil-Brażil u minn kumpanija waħda ta' l-ipproċessar fl-Iżrael li tqatta', tipproduċi f'folji u tikkonverti l-film tal-PET. Dawn il-kumpanniji Brażiljani u Iżraeljani kienu jammontaw għal parti żgħira (inqas minn 1 % u madwar 5 %, rispettivament), kemm fil-volum u fil-valur, ta' l-importazzjonijiet kollha tal-film tal-PET minn dawk il-pajjiżi lejn il-Komunità matul il-PS, kif kien irrappurtat mill-Eurostat.

(17)

L-awtoritajiet Indjani għamlu sottomissjoni bil-miktub, f'żieda mal-bidu ta' l-istħarriġ, u taw tagħrif statistiku dwar l-esportazzjonijiet ta' film tal-PET mill-Indja lejn, inter alia, il-Komunità. It-tagħrif statistiku dwar l-esportazzjonijiet ta' film tal-PET mill-Brażil lejn il-Komunità inkiseb ukoll mill-bażi tat-tagħrif nazzjonali tal-Brażil.

(18)

Il-prodott ikkonċernat huwa, kif iddefinit fl-istħarriġ tal-bidu, il-film tal-polyethylene terephthalate (PET) li ġej mill-Indja, normalment iddikjarat taħt il-kodiċi tan-NM ex 3920 62 19 u ex 3920 62 90 (“il-prodott ikkonċernat”).

(19)

Qed jitqies li l-film tal-PET esportat lejn il-Komunità mill-Indja u l-film tal-PET ikkunsinnat mill-Brażil u mill-Iżrael lejn il-Komunità għandhom l-istess karatteristiċi bażiċi u l-istess użi. Għalhekk, dawn qed jitqiesu bħala prodotti li jixxiebhu fit-tifsira ta' l-Artikolu 1(4) tar-Regolament bażiku.

(20)

Fil-perjodu 1999-2003, l-importazzjoni tal-prodott ikkonċernat irrappreżentat 96,5 % ta' l-importazzjonijiet totali mill-Indja taħt il-kodiċi NM rilevanti. Sar għalhekk stġarriġ tas-suq li uża data ta' l-Eurostat fuq il-livell tal-kodiċi NM. Għandu jitqies li fl-1999 kienu ġew imposti taxxi kompensatorji fuq l-importazzjonijiet fil-Komunità ta' film tal-PET li jkunu ġejjin mill-Indja, liema dazji kienu wasslu diġà għal tnaqqis fil-volumi ta' dawn l-importazzjonijiet. Dan kien segwit fl-2001 mill-impożizzjoni ta' miżuri kontra d-dumping li wasslu għal aktar tnaqqis. Il-miżuri kontra l-bejgħ bi prezz baxx ħafna li jikkonċernaw l-Indja jikkonsistu minn ftehim ta' negozju ibbażat fuq il-prezz ma' ħames produtturi esportaturi individwali u ma' kumpanija waħda b'rata ta' dazju kontra d-dumping ta' 0 %. Bħala riżultat ta' dan, id-dazji kontra d-dumping essenzjalment ma jitħallsux fuq l-importazzjonijiet mill-akbar parti tal-produtturi Indjani. Id-dazju kontra d-dumping tar-residwu ta' 53,3 % japplika għall-importazzjonijiet li jsiru mill-produtturi esportaturi l-oħrajn kollha. Fis-sena 2000 l-importazzjonijiet lejn il-Komunità ta' film tal-PET li kien ġej mill-Indja kienu jlaħħqu il-11 600 tunnellata. Fil-bidu, dawk l-importazzjonijiet naqsu għal 6 100 tunnellata fl-2001, iżda mbagħad żdiedu għal 7 700 tunnellata fl-2002, u reġgħu żdiedu matul il-PS għal 11 500 tunnellata. It-tagħrif li ntbagħat mill-produtturi esportatutri Indjani li kkooperaw urew xejriet simili – żieda ta' madwar 1 300 tunnellata mill-2001 sa l-2002 u żieda oħra ta' madwar 3 400 tunnellata mill-2002 sa l-2003. Wieħed għandu jqis, madankollu, li mhux il-produtturi Indjani kollha kkooperaw fl-istħarriġ. Aktar minn hekk, il-bidliet fil-volumi li seħħew mis-sena 2000 sas-sena 2003 għandhom jitqiesu fil-kuntest ta' żieda kbira ta' importazzjonijiet minn dawk l-esportaturi li huma suġġetti għal-livelli l-aktar baxxi ta' miżuri.

(21)

Dwar l-għamla li ssemmiet fuq, wieħed għandu jinnota li kumpanija waħda biss kellha b'mod sostanzjali rata aktar baxxa ta' dazju kumulattiv (13) mill-produtturi l-oħrajn. L-għamla tal-kummerċ ta' din il-kumpanija segwiet xejra differenti ħafna minn dik tal-produtturi l-oħrajn, waqt li bejn is-sena 2000 u s-sena 2003 (il-PS) din żiedet sew is-sehem tagħha fil-bejgħ kollu tal-prodott ikkonċernat lejn il-Komunità. Għalhekk, is-sehem tal-prodott ikkonċernat li kien esportat lejn il-Komunità mill-produtturi Indjani li kien għad baqa', naqas sew. Jekk wieħed iwarrab din ix-xejra irregolari, il-volum totali tal-prodott ikkonċernat li kien impurtat fil-Komunità baqa' sew taħt dak ta' qabel l-impożizzjoni tal-miżuri kontra d-dumping.

(22)

L-awtoritajiet Indjani bagħtu tagħrif statistiku fuq l-esportazzjonijiet lejn, inter alia, il-Komunità. Dawn urew li kienu qed iqisu l-istatistiċi uffiċjali ta' l-Indja bħala li ma kienu qed juru l-ebda ksur fil-miżuri eżistenti kontra d-dumping mill-produtturi Indjani tal-film tal-PET. Madankollu, it-tagħrif li ssemma mhuwiex wieħed konsistenti mat-tagħrif ta' l-esportazzjoni mogħti mill-esportaturi Indjani li kkooperaw, mill-inqas safejn għandhom x'jaqsmu l-esportazzjonijiet lejn l-Iżrael; dan it-tagħrif juri żieda ċara fl-esportazzjonijiet lejn l-Iżrael wara li kienu daħlu fis-seħħ il-miżuri (minn madwar 40 tunnellata fis-sena 2000 għal madwar 800 tunnellata fil-PS). Safejn għandu x'jaqsam il-Brażil, it-tagħrif uffiċjali ta' l-Indja dwar l-esportazzjonijiet diretti lejn il-Brażil juri li kien hemm żieda marġinali matul l-istess perjodu, iżda din ma tinkludix il-bejgħ indirett permezz ta' pajjiżi intermedjarji oħrajn. Fil-fatt, l-uniku produttur magħruf fil-Brażil tal-film tal-PET kien ikkoopera fl-istħarriġ, u l-esportazzjonijiet tiegħu lejn il-Komunità turi biss parti żgħira ħafna (0,5 %) mill-bejgħ kollu li sar mill-Brażil lejn il-Komunità.

(23)

L-importazzjonijiet fil-Komunità tal-film tal-PET mill-Brażil, kif kien irrappurtat mill-Eurostat fuq livell ta' NM, meta wieħed inaqqas l-importazzjonijiet ta' merkanzija li kienet maħduma mill-kumpanija li kkooperat, żdiedu minn madwar 650 tunnellata fl-2000 (0,6 % ta' l-importazzjonijiet kollha), għal 1 200 tunnellata (1,4 %) fl-2001, u ftit aktar minn 2 500 tunnellata ((3,2 %) fis-sena 2002 (fis-sena ta' wara d-dħul fis-seħħ tal-miżuri kontra d-dumping), waqt li dawn baqgħu ftit aktar minn 2 000 tunnellata matul il-PS (2,4 % ta' l-importazzjonijiet kollha ta' film tal-PET).

(24)

L-unika kumpanija fil-Brażil li kkooperat, it-Terphane, hija, kif intqal fuq (fil-punt 22), l-unika produttur magħruf tal-film tal-PET fil-Brażil. Matul il-PS din il-kumpanija esportat biss kunsinna waħda ta' 10,6 tunnellata ta' film tal-PET lejn il-Komunità. Barra minn kampjun li kien inbiegħ fl-2002, din kienet l-ewwel esportazzjoni tal-kumpanija ta' film tal-PET lejn il-Komunità. Għalhekk, il-kumpanija ma jidhirx li kienet responsabbli għall-volumi ta' film tal-PET li daħlu fil-Komunità mill-Brażil fil-perjodu ta' bejn is-sena 2000 u l-2003 (il-punt 23). Il-film li kien fornut lill-Komunità huwa maħdum mill-kumpanija, f'faċilitajiet li kienu stabbiliti qabel id-dħul fis-seħħ tal-miżuri fuq il-film tal-PET Indjan. Għalhekk, ma nstabet l-ebda bidla fl-għamla tal-kummerċ ta' din il-kumpanija.

(25)

L-importazzjonijiet fil-Komunità ta' film tal-PET mill-Iżrael, kif kienu rrappurtati mill-Eurostat fuq livell ta' NM, meta wieħed inaqqas l-importazzjonijiet ta' oġġetti li kienu prodotti mill-kumpanija li kkooperat, żdiedu minn 3 000 tunnellata fis-sena 2000 (3,7 % ta' l-importazzjonijiet totali tal-film tal-PET) għal 3 400 tunnellata fis-sena 2001 (4,1 %). Il-volumi komplew jiżdiedu sa ftit aktar minn 4 200 tunnellata fis-sena 2002 (5,1 % ta' l-importazzjonijiet) u għal aktar minn 4 400 tunnellata fis-sena 2003 (5,3 % ta' l-importazzjonijiet). Għalkemm fl-Iżrael kien hemm numru żgħir ta' converters tal-film tal-PET, it-tagħrif li wasal fil-limiti ta' żmien stipulati wera li, anke b'mod kumulattiv, x'aktarx dawn ma kellhomx ħila biżżejjed biex ikunu responsabbli mill-volumi ta' film li kienu deħlin fil-Komunità mill-Iżrael fil-perjodu ta' bejn l-2000 u l-2003.

(26)

It-tagħrif uffiċjali Indjan fuq l-esportazzjoni juri li kien hemm żidiet qawwija fl-esportazzjonijiet lejn l-Iżrael mill-Indja. 81 tunnellata kienu ġew esportati fis-sena 2000, 395 tunnellata fis-sena 2001, 1 032 tunnellata fis-sena 2002 u 2 453 tunnellata fil-PS.

(27)

L-unika kumpanija fl-Iżrael li kkooperat kienet il-Jolybar. Din tqatta', tipproduċi f'folji u tikkonverti l-film tal-PET mixtri u tbigħu bħala prodotti li jaqgħu taħt l-istess kodiċi tan-NM bħall-prodott ikkonċernat. Iżda ġeneralment dan ma jkunx ġej mill-Indja, u għalhekk ma jistax jitqies il-prodott ikkonċernat. Il-kumpanija ilha tipprovdi l-film tal-PET lill-Komunità sa mis-snin disgħin. Il-kwantitajiet ta' film tal-PET li ġew esportati mill-Jolybar lejn il-Komunità rduppjaw bejn is-snin 1999 u l-2003 (il-PS). Il-film fornut lill-Komunità jinħadem f'faċilitajiet li kienu ġew stabbiliti qabel id-dħul fis-seħħ tal-miżuri fuq il-film tal-PET Indjan. Irrispettivament minn jekk dan l-iżvilupp ta' l-esportazzjonijiet jurix bidla fl-għamla tal-kummerċ ta' din il-kumpanija, dan il-punt ma kienx tqies aktar minħabba li, f'kull eventwalità, kien hemm ġustifikazzjoni ekonomika ċara għal din l-imġieba, kif stabbilit hawn taħt fil-punt (31).

(28)

Minħabba dan t'hawn fuq, u l-aktar minħabba l-koinċidenza bejn iż-żieda fl-importazzjonijiet mill-Brażil u l-Iżrael u d-dħul fis-seħħ fl-2001 tal-miżuri ta' kontra l-bejgħ bi prezz baxx ħafna fuq il-film tal-PET li ġej mill-Indja, ġiet stabbilita bidla fl-għamla tal-kummerċ b'rabta ma' l-esportazzjonijiet tal-film tal-PET mill-Indja, l-Iżrael u l-Brażil.

(29)

Fin-nuqqas ta' kull kooperazzjoni oħra u meta wieħed iqis il-bidla li ssemmiet fl-għamla tal-kummerċ tal-Brażil, li seħħet minnufih wara li daħlu fis-seħħ id-dazji kontra l-bejgħ bi prezz baxx ħafna, wieħed jista' jagħlaq billi jgħid li fuq il-bażi tat-tagħrif disponibbli u fin-nuqqas ta' kull spjegazzjoni oħra, il-bidla li kien hemm fl-għamla tal-kummerċ kienet bdiet mid-dħul fis-seħħ tad-dazju aktar milli minħabba xi raġuni jew ġustifikazzjoni ekonomika suffiċjenti oħra fit-tifsira ta' l-Artikolu 13 (1) tar-Regolament bażiku.

(30)

Fin-nuqqas ta' kooperazzjoni u minħabba l-bidla msemmija fuq fl-għamla tal-kummerċ li seħħet minnufih wara d-dħul fis-seħħ tad-dazji ta' kontra d-dumping wieħed jista' jagħlaq billi jgħid li, fuq il-bażi tat-tagħrif disponibbli u fin-nuqqas ta' kull spjegazzjoni oħra, il-bidla li kien hemm fl-għamla tal-kummerċ kienet bdiet mid-dħul fis-seħħ tad-dazju aktar milli minħabba xi raġuni jew ġustifikazzjoni ekonomika suffiċjenti oħra fit-tifsira ta' l-Artikolu 13 (1) tar-Regolament bażiku.

(31)

L-istħarriġ wera li l-kummerċ ta' l-esportazzjoni tal-Jolybar lejn il-Komunità kien ilu stabbilit għal żmien twil u li l-film fornut lill-Komunità kien qed jinħadem mill-kumpanija f'faċilitajiet stabbiliti qabel id-dħul fis-seħħ tal-miżuri fuq il-film tal-PET Indjan. Il-kumpanija spjegat li bħala regola ġenerali din ma tfornix film Indjan lill-konsumaturi tal-Komunità. Dan għaliex dawn jippreferu l-kwalitajiet tal-film Ewropew bħala materjal bażi għat-trattament li jsir mill-Jolybar. B'mod mhux tas-soltu, matul il-PS, kwantità ta' madwar tunnellata ta' film Indjan kienet intbagħtet lil konsumatur wieħed fil-Komunità bħala parti minn kunsinna akbar li l-konsumatur kien jeħtieġ b'mod urġenti. Għalhekk, wieħed jikkonkludi li hemm ġustifikazzjoni ekonomika biżżejjed għall-iżvilupp ta' l-esportazzjonijiet tal-Jolybar, li huwa skond il-ħidmiet tagħha fis-suq tal-Komunità b'rabta mal-film tal-PET maħdum minnha.

(32)

Il-figuri li dehru fil-punti (20) sa (28) fuq juru li mad-dħul fis-seħħ tal-miżuri fl-2001 kien hemm bidla kwantitattiva ċara fl-għamla ta' l-importazzjonijiet tal-Komunità tal-prodott ikkonċernat. Kien hemm tnaqqis sostanzjali ta' 5 500 tunnellata fl-importazzjonijiet mill-Indja lejn il-Komunità meta daħlu fis-seħħ dawn il-miżuri, b'żidiet li jikkorrispondu fl-esportazzjonijiet tal-prodott ikkonċernat mill-Brażil u l-Iżrael lejn il-Komunità. It-tagħrif ta' l-Eurostat juri li mis-sena 2000 sat-tmiem tal-PS, iż-żidiet fl-importazzjonijiet lejn il-Komunità kienu jlaħħqu għal 1 376 tunnellata mill-Brażil u 1 392 tunnellata mill-Iżrael. Il-waqgħa parallela fl-esportazzjonijiet mill-Indja, jekk wieħed ma jqisx dawk l-importazzjonijiet li kienu suġġetti għal-livelli l-aktar baxxi ta' miżuri, hija ta' 5 653 tunnellata. Għalhekk, qed jitiqes li parti mill-andament tal-kummerċ ta' l-esportazzjoni mill-Indja kienet inbidlet minn andamenti ta' esportazzjoni oħrajn permezz tal-Brażil u l-Iżrael; dan dgħajjef l-effetti tar-rimedju tal-miżuri f'termini ta' kwantitajiet impurtati lejn is-suq tal-Komunità.

(33)

Dwar il-prezzijiet tal-prodotti kkonċernati li ġew ikkunsinnati mill-Brażil u l-Iżrael, minħabba n-nuqqas ta' kooperazzjoni li kien hemm, kien jeħtieġ li ssir referenza għat-tagħrif tal-Eurostat, li huwa l-aħjar xhieda disponibbli.

(34)

Il-prezz medju ta' l-importazzjonijiet tal-film tal-PET mill-Brażil matul il-PS, aġġustat għall-ispejjeż ta' wara l-importazzjoni, kien madwar 50 % tal-livell tat-tneħħija tal-ħsara, u kien stabbilit fl-istħarriġ li wassal għall-impożizzjoni tal-miżuri eżistenti kontra d-dumping. Fuq din il-bażi, jidher li f'termini ta' prezzijiet il-films tal-PET ikkunsinnati mill-Brażil ukoll dgħajfu l-effetti tar-rimedju tad-dazju li kien ġie impost.

(35)

Il-prezz medju ta' l-importazzjonijiet tal-film tal-PET mill-Iżrael matul il-PS, aġġustat għall-ispejjez ta' wara l-importazzjoni, kien madwar 55 % tal-livell tat-tneħħija tal-ħsara, stabbilit fl-istħarriġ tal-bidu ta' kontra d-dumping. Fuq din il-bażi, jidher li f'termini ta' prezzijiet l-importazzjonijiet mill-Iżrael ukoll dgħajfu l-effetti tar-rimedju tad-dazju li kien ġie impost.

(36)

Għalhekk, wieħed jista' jagħlaq billi jgħid li l-importazzjonijiet ta' film tal-PET mill-Brażil u mill-Iżrael dgħajfu l-effetti tar-rimedju tal-miżuri kontra d-dumping, kemm f'termini ta' kwantitajiet kif ukoll ta' prezzijiet.

(37)

Skond l-Artikolu 13(1) tar-Regolament bażiku, kien mistħarreġ jekk kienx hemm xhieda ta' dumping fir-rigward tal-valuri normali li kienu ġew stabbiliti qabel għall-prodotti li jixxiebhu. Kif spjegat fuq (l-punt (16)), meta wieħed iqis il-kooperazzjoni limitata, biex ikun stabbilit jekk tistax tinstab xhieda ta' dumping fir-rigward ta' l-esportazzjonijiet tal-prodott ikkonċernat lejn il-Komunità mill-Brażil u mill-Iżrael matul il-PS, it-tagħrif ta' l-Eurostat intuża skond l-Artikolu 18 tar-Regolament bażiku bħala l-bażi li fuqha ġew stabbiliti l-prezzijiet ta' l-esportazzjoni lejn il-Komunità. Bl-istess mod, biex ikun jista' jitqabbel il-prezz ta' l-esportazzjoni mal-valur normali, tqies bħala xieraq li wieħed jassumi li t-taħlita tal-prodott tal-merkanzija kkunsinnata mill-Brażil u l-Iżrael matul il-PS kienet l-istess bħal dik ta' l-merkanzija li kienet ġiet ikkunsinnata mill-Indja matul l-istħarriġ tal-bidu.

(38)

Biex ikun hemm paragun ġust bejn il-valur normali u l-prezz ta' l-esportazzjoni, saru provvedimenti fl-għamla ta' aġġustamenti għad-differenzi fil-fatturi li kienu qed jaffettwaw il-prezz u l-kumparabbiltà tal-prezz. Dawn l-aġġustamenti saru skond l-Artikolu 2(10) tar-Regolament bażiku.

(39)

Skond l-Artikolu 2(11) u 2(12) tar-Regolament bażiku, il-medja mwieżna tal-valur normali, kif stabbilita matul l-istħarriġ tal-bidu, kienet imqabbla mal-prezzijiet medji ta' l-esportazzjoni għall-PS, li kienu ġew stabbiliti kif muri fil-punti (34) u (35) fuq. Dawn il-paraguni wrew marġini approssimattivi ta' dumping, imfissra bħala persentaġġ tal-prezz CIF fit-territorju tal-Komunità, b'dazju mhux imħallas, ta' 17,5 % għall-Brażil u ta' 14,5 % għall-Iżrael.

(40)

Il-Kummissjoni rċeviet talba mit-Terphane u mill-Jolybar biex dawn jiġu eżentati mir-reġistrazzjoni u l-miżuri. Kif intqal fil-punti (24) u (27), dawn il-kumpanniji kkooperaw fl-istħarriġ, billi wieġbu għall-kwestjonarju u aċċettaw li ssirilhom żjara ta' verifika. Bir-Regolament tal-Kummissjoni (KE) Nru 1830/2004 ta' l-21 ta' Ottubru 2004 (14), il-Kummissjoni emendat ir-Regolament tal-bidu biex titwaqqaf ir-reġistrazzjoni fuq l-importazzjonijiet ta' film tal-PET maħdum mit-Terphane u l-Jolybar, li dawn it-tnejn instabu li ma kienux qed iduru mad-dazji kontra d-dumping.

(41)

Skond ir-riżultati t'hawn fuq, billi t-Terphane u l-Jolybar nstabu li m'għamlu l-ebda qerq f'dawn il-miżuri li hemm fis-seħħ, dawn il-kumpanniji għandhom jiġu wkoll eżentati mill-estensjoni tal-miżuri previsti.

(42)

Minħabba r-riżultati t'hawn fuq, instab li sar qerq fit-tifsira ta' l-Artikolu 13(1) tar-Regolament bażiku. Skond l-Artikolu 13(1) l-ewwel sentenza tar-Regolament bażiku, il-miżuri eżistenti kontra d-dumping fuq l-importazzjonijiet tal-prodott ikkonċernat (i.e. il-film tal-PET li ġej mill-Indja), għandhom jiġu estiżi għall-importazzjonijiet tal-film tal-PET li jiġu kkunsinnati mill-Brażil u l-Iżrael, kemm jekk dawn ikunu ddikjarati li ġejjin mill-Brażil jew mill-Iżrael jew le, ħlief għal dak maħdum mit-Terphane u l-Jolybar.

(43)

Skond l-Artikolu 14(5) tar-Regolament bażiku, li jisħaq li l-miżuri għandhom japplikaw għal dawk l-importazzjonijiet li ġew irreġistrati mid-data tar-reġistrazzjoni, id-dazju kontra d-dumping għandu jinġabar fuq l-importazzjonijiet tal-film tal-PET ikkunsinnati mill-Brażil jew mill-Iżrael u li jkunu daħlu fil-Komunità taħt reġistrazzjoni imposta bir-Regolament tal-bidu ta' l-istħarriġ, ħlief għall-importazzjonijiet ta' film tal-PET ikkunsinnati mill-Brażil u maħduma mit-Terphane u dawk ikkunsinnati mill-Iżrael u maħduma mill-Jolybar.

(44)

L-eżenzjonijiet mill-miżuri estiżi mogħtija għall-film tal-PET maħdum mill-Jolybar u mit-Terphane għandhom, skond l-Artikolu 13(4) tar-Regolament bażiku, jibqgħu validi taħt il-kriterju li ma jiġix stabbilit li l-eżenzjoni tingħata fuq il-bażi ta' tagħrif falz jew li jiżgwida, liema tagħrif ikun ingħata mill-kumpanniji kkonċernati. Jekk ix-xhieda prima facie tkun turi mod ieħor, il-Kummissjoni għandha tagħmel stħarriġ biex ikun stabbilit jekk it-tneħħija ta' l-eżenzjoni għandhiex tkun waħda ġġustifikata.

(45)

Li d-dazji ma jkunux estiżi għall-importazzjonijiet ta' film tal-PET maħdum mit-Terphane u l-Jolybar kien ġie stabbilit fuq il-bażi tar-riżultati ta' l-istħarriġ preżenti. Għalhekk, dan jgħodd b'mod esklussiv għall-importazzjonijiet ta' film tal-PET ikkunsinnati mill-Brażil jew l-Iżrael, rispettivament, u maħduma minn dawn l-entitajiet legali speċifiċi. Il-film tal-PET impurtat li jkun inħadem jew ikkunsinnat minn xi kumpanija oħra li ma tidhirx speċfikament b'isimha u l-indirizz tagħha fil-parti operattiva ta' dan ir-Regolament, inklużi dawk l-entitajiet marbuta ma' dawk imsemmija speċifikament, ma jistax igawdi mill-eżenzjoni, u għalhekk għandu jkun suġġett għar-rata tad-dazju tar-residwu imposta bir-Regolament tal-Kunsill (KE) Nru 1676/2001.

(46)

Il-partijiet interessati ġew infurmati bil-fatti essenzjali u bil-kunsiderazzjonijiet dwar il-bażi li fuqha l-Kunsill kien biħsiebu jestendi id-dazju definittiv kontra d-dumping fis-seħħ, u ngaħtaw l-opportunità li jagħtu l-kummenti tagħhom u jinstemgħu. L-awtoritajiet Iżraeljani tennew il-kummenti tal-Gvern Indjan fil-punt (10). Ressqu wkoll lista ta' converters Iżraeljani tal-film tal-PET li kienu ġew esportati lill-Komunità Ewropea waqt l-2003 u l-2004. Madankollu, billi dawn il-kumpaniji ma kkoperawx fil-limiti ta' żmien stipulati, ma setax jiġi stabbilit jekk kinux daru ma' dawn il-miżuri. Għalhekk, ma setgħux jiġu eżentati mill-estensjoni tal-miżuri għall-Iżrael.