EUR-Lex Access to European Union law
This document is an excerpt from the EUR-Lex website
Document 32004R1138
Commission Regulation (EC) No 1138/2004 of 21 June 2004 establishing a common definition of critical parts of security restricted areas at airports
Regolament tal-Kummissjoni (KE) Nru 1138/2004 tal- 21 ta' Ġunju 2004 li jistabilixxi tifsira komuni għal partijiet kritiċi taż-żoni ristretti ta’ sigurtà fl-ajruporti Test b’rilevanza għaż-ŻEE.
Regolament tal-Kummissjoni (KE) Nru 1138/2004 tal- 21 ta' Ġunju 2004 li jistabilixxi tifsira komuni għal partijiet kritiċi taż-żoni ristretti ta’ sigurtà fl-ajruporti Test b’rilevanza għaż-ŻEE.
ĠU L 221, 22.6.2004, p. 6–7
(ES, CS, DA, DE, ET, EL, EN, FR, IT, LV, LT, HU, NL, PL, PT, SK, SL, FI, SV) Dan id-dokument ġie ppubblikat f’edizzjoni(jiet) speċjali
(BG, RO)
ĠU L 183M, 5.7.2006, p. 33–34
(MT)
No longer in force, Date of end of validity: 29/04/2010; Imħassar b' 32010R0185
5.7.2006 |
MT |
Il-Ġurnal Uffiċjali ta' l-Unjoni Ewropea |
33 |
REGOLAMENT TAL-KUMMISSJONI (KE) Nru 1138/2004
tal-21 ta' Ġunju 2004
li jistabilixxi tifsira komuni għal partijiet kritiċi taż-żoni ristretti ta’ sigurtà fl-ajruporti
(Test b’rilevanza għaż-ŻEE)
Il-KUMMISSJONI TAL-KOMUNITAJIET EWROPEJ,
Wara li kkunsidrat it-Trattat li jistabbilixxi l-Komunità Ewropea,
Wara li kkunsidrat r-Regolament (KE) Nru 2320/2002 tal-Parlament Ewropew u tal-Kunsill tas-16 ta’ Diċembru 2002 li jistabbilixxi regoli komuni fil-qasam tas-sigurtà fl-avjazzjoni ċivili (1), u b’mod partikolari Artikolu 4(2) tiegħu u punt 2.3(a) ta’ l-Anness tiegħu,
Billi:
(1) |
Skond ir-Regolament (KE) Nru 2320/2002 il-Kummissjoni għandha tistabbilixxi tifsira komuni għal partijiet kritiċi taż-żoni ristretti ta’ sigurtà. It-tali tifsira għandha għall-inqas tkopri l-partijiet ta’ ajruport minn fejn għandhom aċċess passiġġieri li se jitilqu fuq titjira u li ġew skrinjati u partijiet ta’ ajruport minn fejn bagalji li se jitilqu fuq titjira u li ġew skrinjati jistgħu jgħaddu jew ikunu miżmuma. |
(2) |
Il-persunal kollu nkluż il-membri ta’ l-ekwipaġġi tat-titjiriet, u l-affarijiet li jkollhom magħhom, għandhom jiġu skrinjati qabel ma jkollhom aċċess għall-partijiet kritiċi. |
(3) |
Għandha titħalla eżenzjoni għall-partijiet ta’ ajruport minn fejn bagalji għall-istiva li se jitilqu fuq titjira u li ġew skrinjati jistgħu jgħaddu jew ikunu miżmuma, jekk il-bagalji ladarba ssiġillati jistgħu jinġarru minn persunal li ma jkunx ġie skrinjat mingħajr ma' tiġi kompromessa s-sigurtà. Miżuri għandhom jittieħdu biex jassiguraw li t-tali bagalji ssiġillati ma jiġux imbagħbsa qabel ma jitgħabbew fuq inġenju ta’ l-ajru. |
(4) |
F’ ajruporti fejn numru żgħir ferm ta’ persunal għandhom aċċess għaż-żoni ristretti, bilanċ għandu jintlaħaq bejn il-bżonn li tiġi żgurata s-sigurtà u l-bżonn li tiġi żgurata l-effikaċja operazzjonali. |
(5) |
Membri tal-persunal li ma ġewx skrinjati għandhom jingħataw aċċess għal partijiet kritiċi taż-żoni ristretti ta’ sigurtà ta’ ajruport biss jekk ikunu skurtati l-ħin kollu minn membri awtorizzati tal-persunal li jkunu ġew skrinjati. |
(6) |
Fejn persuni oħra li ma ġewx skrinjati seta’ kellhom aċċess għal partijiet kritiċi taż-żoni ristretti ta’ sigurtà, tiftixa sħiħa ta’ sigurtà għandha ssir biex tassigura li ma jkunx hemm affarijiet ipprojbiti f’partijiet kritiċi taż-żoni ristretti ta’ sigurtà. Fejn partijiet kritiċi mhumiex dejjem miżmuma bħala tali, għandha ssir tiftixa sħiħa ta’ sigurtà qabel ma dawn il-partijiet jerġgħu jiġu stabbiliti bħala partijiet kritiċi. |
(7) |
Il-miżuri pprovduti f’dan ir-Regolament huma konformi ma’ l-opinjoni tal- Kumitat istitwit bl-Artikolu 9(1) tar-Regolament (KE) Nru 2320/2002, |
ADOTTAT DAN IR-REGOLAMENT:
Artikolu 1
1. F’ ajruporti fejn iżjed minn 40 membru tal-persunal għandhom karti ta’ identifikazzjoni ta’ l-ajruport li jagħtuhom aċċess għal żoni ristretti ta’ sigurtà, il-partijiet kritiċi taż-żoni ristretti ta’ sigurtà huma għall-inqas, dan li ġej:
(a) |
kwalunkwe parti minn ajruport fejn għandhom aċċess passiġġieri li se jitilqu fuq titjira, inklużi l-bagalji tagħhom tal-kabina, wara li ġew skrinjati; |
(b) |
kwalunkwe parti minn ajruport fejn, wara li jkunu ġew skrinjati, jistgħu jgħaddu jew ikunu miżmuma bagalji għall-istiva li se jitilqu fuq titjira, jekk il-bagalji ma jkunux ġew issiġillati. |
2. Għal skopijiet ta’ paragrafu 1 kwalunkwe parti ta’ ajruport għandha titqies bħala parti kritika taż-żoni ristretti ta’ sigurtà sakemm:
(a) |
ikun hemm preżenti passiġġieri li se jitilqu fuq titjira, inklużi l-bagalji tagħhom tal-kabina, wara li jkunu ġew skrinjati; |
(b) |
ikun hemm bagalji għall-istiva li se jitilqu fuq titjira, li jkunu għaddejjin minn jew ikunu qed jiġu miżmuma f’dik il-parti, jekk ma jkunux ġew issiġillati. |
3. Għall-iskop ta’paragrafi 1 u 2, inġenju ta’ l-ajru, xarabank, vann tal-bagalji jew mezzi oħra ta’ trasport, jew passaġġ li jimxi, jew jetway, għandhom jitqiesu parti minn ajruport.
Artikolu 2
Għall-iskop ta’ dan ir-Regolament “bagalji ssiġillati” għandhom ifissru bagalji għall-istiva li se jitilqu fuq titjira wara li ġew skrinjati u li ġew protetti fiżikament sabiex tiġi evitata kwalunkwe introduzzjoni ta’ oġġetti.
Artikolu 3
F’ ajruporti fejn mhux iżjed minn 40 membru tal-persunal ikollhom karta ta’ identifikazzjoni ta’ l-ajruport li tagħtihom aċċess għal żoni ristretti ta’ sigurtà, l-Istati Membri jistgħu ikomplu jidentifikaw il-partijiet kritiċi taż-żoni ristretti ta’ sigurtà skond it-tieni subparagrafu ta’ punt 2.3(a) ta’ l-Anness għar-Regolament (KE) Nru 2320/2002.
Artikolu 4
1. Il-persunal kollu, inklużi l-membri ta’ l-ekwipaġġi tat-titjiriet, u l-affarijiet li jkollhom magħhom, għandhom jiġu skrinjati qabel ma jingħataw aċċess għall-partijiet imsemmija f’punt (a) ta’ l-Artikolu 1(1) ikunu fejn ikunu dawn il-partijiet.
2. Mhux iktar tard mill-1 ta’ Jannar 2006, l-Istati Membri iridu jkunu daħħlu miżuri sabiex il-persunal kollu, inkluż il-membri ta’ l-ekwipaġġi tat-titjiriet, flimkien ma’ l-affarijiet li jkollhom magħhom, ikunu ġew skrinjati qabel ma jingħataw aċċess għall-partijiet imsemmija f’punt (a) ta’ l-Artikolu 1(1).
3. Mhux iktar tard mill-1 ta’ Lulju 2009, l-Istati Membri iridu jkunu daħħlu miżuri sabiex il-persunal kollu, inkluż il-membri ta’ l-ekwipaġġi tat-titjiriet, flimkien ma’ l-affarijiet li jkollhom magħhom, ikunu ġew skrinjati qabel ma jingħataw aċċess għall-partijiet imsemmija f’punt (b) ta’ l-Artikolu 1(1).
Artikolu 5
Mhux iktar tard mill-1 ta’ Lulju 2009, fejn bagalji ssiġillati jiġu f’idejn membri tal-persunal li ma ġewx skrinjati, għandhom jittieħdu miżuri biex jiżguraw li dawk il-bagalji ma ġewx imbagħbsa qabel ma jitgħabbew fuq inġenju ta’ l-ajru.
Artikolu 6
1. B’ deroga minn Artikolu 4, il-membri tal-persunal m’għandhomx għalfejn jiġu skrinjati qabel ma jingħataw aċċess għal partijiet kritiċi taż-żoni ristretti ta’ sigurtà sakemm jiġu skurtati minn membru awtorizzat tal-persunal li jkun ġie skrinjat.
L-iskorta għandha tkun responsabbli għal kwalunkwe ksur ta’ sigurtà li jsir mill-membru tal-persunal li jkun qed jiġi skurtat.
2. B’ deroga minn Artikolu 4, membri skrinjati tal-persunal li temporanjament joħorġu minn partijiet kritiċi taż-żoni ristretti ta’ sigurtà, m’għandhomx għalfejn jiġu skrinjati meta jidħlu lura jekk ikunu taħt osservazzjoni kostanti sabiex jiġi żgurat li huma ma jintroduċux affarijiet ipprojbiti f’ dawk il-partijiet kritiċi taż-żoni ristretti ta’ sigurtà.
Artikolu 7
Bla ħsara għall-Artikolu 6, fejn persuni li ma ġewx skrinjati seta’ kellhom aċċess għal partijiet kritiċi taż-żoni ristretti ta’ sigurtà, għandha titwettaq tiftixa sħiħa ta’ sigurtà.
Artikolu 8
Dan ir-Regolament għandu jidħol fis-seħħ fl-1 ta’ Lulju 2004.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussel, nhar il-21 ta' Ġunju 2004.
Għall-Kummissjoni
Loyola DE PALACIO
Vici-President
(1) ĠU L 355, 30.12.2002, p. 1.