12.10.2005   

MT

Il-Ġurnal Uffiċjali ta’ l-Unjoni Ewropea

203

(1)

Xi Stati Membri ppreżentaw xi programmi lill-Kummissjoni għall-eradikazzjoni u l-monitoraġġ ta' xi enċefalopatiji sponġiformi li jittieħdu (TSEs) li għalihom jixtiequ jirċievu kontribut finanzjarju mill-Komunità.

(2)

Skond ir-Regolament tal-Kunsill (KE) Nru 1258/1999 tas-17 ta' Mejju 1999 dwar l-iffinanzjar tal-politika agrikola komuni (2), il-programmi għall-eradikazzjoni u l-monitoraġġ tal-mard ta' l-annimali għandhom ikunu ffinanzjati skond it-Taqsima Garanziji tal-Fond Agrikolu Ewropew ta' Gwida u Garanzija. Għal għanijiet ta' kontroll finanzjarju, l-Artikoli 8 u 9 ta' dan ir-Regolament għandhom jiġu applikati.

(3)

Ir-Regolament (KE) Nru 999/2001 tal-Parlament Ewropew u tal-Kunsill tat-22 ta' Mejju li jippreskrivi regoli għall-prevenżjoni, kontroll u eradikazzjoni ta' xi enċefalopatiji sponġiformi li jittieħdu (3), jippreskrivi regoli għall-monitoraġġ u l-eradikazzjoni tat-TSEs fl-annimali bovini, ovini u kaprini.

(4)

Fit-tħejjija tal-listi ta' programmi għall-eradikazzjoni u l-monitoraġġ tat-TSEs li jikkwalifikaw għall-kontribut finanzjarju mill-Komunità għall-2005 u tar-rata proposta u l-ammont massimu ta' kontribut għal kull programm, iridu jiġu kkunsidrati kemm l-interess ta' kull programm għall-Komunità kif ukoll il-volum ta' approprjazzjonijiet disponibbli.

(5)

L-Istati Membri pprovdew lill-Kummissjoni bl-informazzjoni li permezz tagħha tista' tevalwa l-interess għall-Komunità li tipprovdi kontribut finanzjarju għall-programmi għall-2005.

(6)

Il-Kummissjoni qieset kull wieħed mill-programmi sew min-naħa veterinarja kif ukoll min-naħa finanzjarja u hija sodisfatta li dawn il-programmi għandhom jiġu nklużi fil-listi ta' programmi li jikkwalifikaw għall-kontribut finanzjarju mill-Komunità fl-2005. Il-kontribut għall-monitoraġġ tat-TSEs jirrigwarda l-implimentazzjoni ta' testijiet rapidi u, għall-eradikazzjoni tat-TSEs, id-distruzzjoni ta' annimali li jinstabu pożittivi u l-genotyping ta' l-annimali.

(7)

Minħabba l-importanza ta' dawn il-miżuri għall-ħarsien tas-saħħa pubblika u dik ta' l-annimali, kif ukoll l-introduzzjoni relattivament reċenti ta' dawn il-programmi ta' monitoraġġ imqabbla mal-programmi tradizzjonali ta' eradikazzjoni tal-mard u l-applikazzjoni obbligatorja ta' dawn il-programmi fl-Istati Membri kollha, jeħtieġ li jkun żgurat livell għoli ta' għajnuna finanzjarja mill-Komunità.

(8)

Huwa għalhekk xieraq li tiġi adottata l-lista ta' programmi li jikkwalifikaw għall-kontribut finanzjarju mill-Komunità fl-2005 u ssettjata r-rata u l-ammont massimu ta' dawn il-kontributi.

(9)

Il-miżuri li għalihom hemm dispożizzjonijiet f'din id-deċiżjoni huma konformi ma'l-opinjoni tal-Kumitat Permanenti tal-Katina Alimentari u s-Saħħa ta' l-Annimali,