32004D0466

Id-Deċiżjoni tal-Kunsill

tad-29 ta' April 2004

li temenda l-Manwal Komuni sabiex jinkludi d-dispożizzjoni tal-kontrolli tal-fruntieri mirati lejn minuri akkumpanjati

(2004/366/KE)

IL-KUNSILL TA' L-UNJONI EWROPEA,

Wara li kunsidra r-Regolament tal-Kunsill (KE) Nru 790/2001/KE tal-24 ta' April 2001 li jirriserva lill-Kummisjoni l-poteri ta' l-implimentazzjoni rigward ċerti dispożizzjonijiet iddettaljati u proċeduri prattiċi sabiex jitwettqu l-kontrolli u s-sorveljanza fuq il-fruntieri [1],

Wara li kkunsidra l-inizjattiva tar-Repubblika Taljana,

Billi:

(1) Huwa meħtieġ li jiġu adottati proċeduri speċjali għall-kontrolli tad-dħul u tal-ħruġ fuq il-persuni li jaqsmu l-fruntieri esterni, inklużi fuq il-minuri akkumpanjati, mogħti b'mod speċjali li l-persuni li jakkumpanjaw jew suppost li jakkumpanjaw lill-minuri jkunu spiss fil-fatt traffikanti fil-bnedmin, u għandha ssir dispożizzjoni għall-awtoritajiet tal-kontroll tal-fruntieri biex jagħtu attenzjoni speċjali lill-minuri kollha li jkunu qeghdin jivvjaġġaw.

(2) Il-Punt 5 tad-Dikjarazzjoni tal-Kumitat Eżekuttiv tad-9 ta' Frar 1998 dwar il-ħtif tal-minuri tiddikjara illi huwa egwalment imperattiv li l-awtoritajiet responsabbli mill-kontroll fuq il-fruntieri jiċċekkjaw sistematikament il-karti ta' l-identità u d-dokumenti tal-vjaġġ tal-minuri. Dan huwa partikolarment importanti jekk il-minuri jkunu qegħdin jivvjaġġaw fil-kumpannija ta' persuna adulta waħda biss.

(3) Skond Artikoli 1 u 2 tal-Protokoll dwar il-pożizzjoni tad-Danimarka anness mat-Trattat dwar l-Unjoni Ewropea u t-Trattat li jistabbilixxi l-Komunità Ewropea, d-Danimaka mhix tieħu sehem fl-adozzjoni ta' din id-Deċiżjoni, u mhix marbuta biha jew bla ħsara għall-applikazzjoni tagħha. Mogħti li din id-Deċiżjoni tibni fuq l-acquis tax-Schengen skond id-dispożizzjonijiet tat-Titolu IV tal-Parti III tat-Trattat li jistabbilixi l-Komunità Ewropea, d-Danimarka għandha, skond Artikolu 5 tal-Protokoll imsemmi, tiddeċiedi f'perjodu taż-żmien ta' sitt xhur wara li l-Kunsill ikun adotta din id-Deċiżjoni jekk timplimentahiex fil-liġijiet nazzjonali tagħha.

(4) Rigward l-Islanda u n-Norveġja, din id-Deċiżjoni tikkostitwixxi żvilupp tad-dispożizzjonijiet ta' l-acquis tax-Schengen fit-tifsira tal-Ftehim konkluż mill-Kunsill ta' l-Unjoni Ewropea u r-Repubblika ta' l-Islanda u r-Renju tan-Norveġja li jirrigwarda l-assoċjazzjoni ta' dawn iż-żewġ Stati fl-implimentazzjoni, l-applikazzjoni u l-iżvilupp ta' l-acquis tax-Schengen, li jidħlu fiż-żona riferita fil-punt A ta' Artikolu 1 tad-Deċiżjoni tal-Kunsill 1999/437/KE [2] dwar ċerti arranġamenti sabiex jiġi applikat dan il-Ftehim.

(5) Din id-Deċiżjoni tikkostitwixxi żvilupp tad-dispożizzjonijiet ta' l-acquis tax-Schengen li fih ir-Renju Unit ma jieħux sehem, skond id-Deċiżjoni tal-Kunsill 2000/365/KE tad-19 ta' Mejju 2000 li tirrigwarda t-talba tar-Renju Unit tal-Gran Britanna u l-Irlanda ta' Fuq biex jieħu sehem f'uħud mid-dispożizzjonijiet ta' l-acquis tax-Schengen [3]; ir-Renju Unit għalhekk mhux qiegħed jieħu sehem fl-adozzjoni tagħha u mhux marbut biha jew bla ħsara għall-applikazzjoni tagħha.

(6) Din id-Deċiżjoni tikkostitwixxi żvilupp tad-dispożizzjonijiet ta' l-acquis tax-Schengen li fih l-Irlanda ma tieħux sehem, skond id-Deċiżjoni tal-Kunsill 2002/192/KE tat-28 ta' Frar 2000 li tirrigwarda t-talba ta' l-Irlanda biex tieħu sehem f'uħud mid-dispożizzjonijiet ta' l-acquis tax-Schengen [4]; l-Irlanda għalhekk mhix qiegħda tieħu sehem fl-adozzjoni taghha u mhix marbuta biha jew bla ħsara għall-applikazzjoni tagħha.

(7) Din id-Deċiżjoni tikkostitwixxi att li jibni fuq l-acquis tax-Schengen jew inkella għandu x'jaqsam magħha fit-tifsira ta' Artikolu 3(1) ta' l-Att ta' l-Adeżjoni,

ADOTTA DIN ID-DEĊIŻJONI:

Artikolu 1

Fit-tieni paragrafu tal-punt 6.8.1 tal-parti II tal-Manwal Komuni, s-sentenza li tinqara: "Il-personal li jwettaq il-kontrolli għandu jagħti attenzjoni speċjali lill-minuri li jkunu qegħdin jivvjaġġaw mhux akkumpanjati" għandha tiġi emendata kif ġej: "Il-personal li jwettaq il-kontrolli jrid jagħti attenzjoni speċjali lill-minuri sewwa jekk jkunu qegħdin jivvjaġġaw akkumpanjati u sewwa jekk mhux akkumpanjati".

Artikolu 2

Din id-Deċiżjoni għandha tidħol fis-seħħ fid-data ta' wara l-pubblikazzjoni tagħha fil-Ġurnal Uffiċjali ta' l-Unjoni Ewropea.

Artikolu 3

Din id-Deċiżjoni hija indirizzata lill-Istati Membri skond it-Trattat li jistabbilixxi l-Komunità Ewropea.

Magħmula fil-Lussemburgu, fid-29 ta' April 2004.

Għall-Kunsill

Il-President

M. McDowell

[1] ĠU L 116, tas-26.4.2001, p. 5.

[2] ĠU L 176, tal-10.7.1999, p. 31.

[3] ĠU L 131, ta' l-1.6.2000, p. 43.

[4] ĠU L 64, tas-7.3.2002, p. 20.

--------------------------------------------------