EUR-Lex Access to European Union law
This document is an excerpt from the EUR-Lex website
Document 32002L0085
Directive 2002/85/EC of the European Parliament and of the Council of 5 November 2002 amending Council Directive 92/6/EEC on the installation and use of speed limitation devices for certain categories of motor vehicles in the Community
Id-Direttiva 2002/85/KE tal-Parlament Ewropew u tal-Kunsill tal-5 ta' Novembru 2002 li temenda d-Direttiva tal-Kunsill 92/6/KEE dwar l-istallazzjoni u l-użu ta' apparat li jillimita l-veloċità għal ċerti kategoriji ta' vetturi tal-mutur fil-Komunità
Id-Direttiva 2002/85/KE tal-Parlament Ewropew u tal-Kunsill tal-5 ta' Novembru 2002 li temenda d-Direttiva tal-Kunsill 92/6/KEE dwar l-istallazzjoni u l-użu ta' apparat li jillimita l-veloċità għal ċerti kategoriji ta' vetturi tal-mutur fil-Komunità
ĠU L 327, 4.12.2002, p. 8–9
(ES, DA, DE, EL, EN, FR, IT, NL, PT, FI, SV) Dan id-dokument ġie ppubblikat f’edizzjoni(jiet) speċjali
(CS, ET, LV, LT, HU, MT, PL, SK, SL, BG, RO, HR)
In force
Official Journal L 327 , 04/12/2002 P. 0008 - 0009
Id-Direttiva 2002/85/KE tal-Parlament Ewropew u tal-Kunsill tal-5 ta' Novembru 2002 li temenda d-Direttiva tal-Kunsill 92/6/KEE dwar l-istallazzjoni u l-użu ta' apparat li jillimita l-veloċità għal ċerti kategoriji ta' vetturi tal-mutur fil-Komunità IL-PARLAMENT EWROPEW U L-KUNSILL TA' L-UNJONI EWROPEA, Wara li kkunsidraw it-Trattat li jistabbilixxi l-Komunità Ewropea, u partikolarment l-Artikolu 71 tiegħu, Wara li kkunsidraw il-proposta mill-Kummissjoni [1], Wara li kkunsidraw l-opinjoni tal-Kumitat Ekonomiku u Soċjali [2], Wara li kkonsultaw mal-Kumitat tar-Reġjuni, Waqt li jaġixxu skond il-proċedura stabbilita fl-Artikolu 251 tat-Trattat [3], Billi: (1) Is-sigurtà fit-trasport u t-temi ambjentali konnessi mat-trasport huma vitali biex jassiguraw mobilità sostenibbli. (2) L-użu ta' apparati li jillimitaw il-veloċità għal kategoriji ta' vetturi bil-magni l-iktar tqal kellu effett pożittiv fuq it-titjib tas-sigurtà fit-toroq. Ikkontribwixxa wkoll għall-protezzjoni ambjentali. (3) Id-Direttiva tal-Kunsill 92/6/KEE [4] tipprovdi li, jiddependi fuq possibiltajiet u esperjenzi tekniċi fl-Istati Membri, ir-rekwiżiti dwar l-installazzjoni u l-użu ta' apparat li jillimita il-veloċità jistgħu sussegwentement jiġu estiżi għal vetturi li jġorru merkanzija ħafifa. (4) L-estensjoni tal-kamp ta' applikazzjoni tad-Direttiva 92/6/KEE għal vetturi ta' iktar minn 3,5 tunnellati maħsuba biex jittrasportaw merkanzija jew passiġġieri kienet waħda mill-miżuri proposti mill-Kunsill fir-riżoluzzjoni tiegħu tas-26 ta' Ġunju 2000 dwar it-titjib tas-sigurtà fit-triq [5], skond il-komunikazzjoni tal-Kummissjoni ta' l-20 ta' Marzu 2000 dwar prijoritajiet fis-sigurtà fit-triq fl-UE. (5) Il-qasam ta' applikazzjoni tad-Direttiva 92/6/KEE għandu jiġi estiż għal vetturi tal-kategorija M2, għal vetturi tal-kategorija M3 li jkollhom massa massima ta' iktar minn 5 tunnellati imma li ma jaqbżux l-10 tunnellati u għall-vetturi tal-kategorija N2. (6) Ladarba l-objettivi ta' l-azzjoni proposta, partikolarment l-introduzzjoni ta' modifiki għall-arranġamenti tul il-Komunità għall-installazzjoni u l-użu ta' apparat li jillimita l-veloċità fuq ċerti kategoriji ta' vetturi tqal, ma jistgħux jintlaħħqu suffiċjentement mill-Istati Membri u jistgħu għalhekk, għar-raġuni ta' l-iskala jew l-effetti ta' l-azzjoni, jintlaħqu aħjar fil-livell Komunitarju, il-Komunità tista' tadotta miżuri, skond il-prinċipju ta' sussidjarjetà kif stabbilit fl-Artikolu 5 tat-Trattat. Skond il-prinċipju ta' proporzjonalità, kif stabbilit f'dak l-Artikolu, din id-Direttiva ma tmurx lil hinn minn dak li huwa neċessarju sabiex jintlaħħqu dawk l-objettivi. (7) Id-Direttiva 92/6/KEE għandha għalhekk tiġi emendata kif adattat, ADOTTAW DIN ID-DIRETTIVA: Artikolu 1 Id-Direttiva 92/6/KEE hija hawnhekk emendata kif ġej: 1. L-Artikoli 1 sa 5 għandhom jiġu sostitwiti b'dan li ġej: "Artikolu 1 Għall-iskopijiet ta' din id-Direttiva, "vettura bil-mutur" tfisser kull vettura li bl-enerġija li taqa' taħt il-kategorija M2, M3, N2 jew N3, maħsuba għall-użu fit-triq u li jkollha mill-inqas erba' roti u veloċità massima li taqbeż il-25km/h. Kategoriji M2, M3, N2 u N3 għandhom jinftiehmu bħala dawk definiti fl-Anness II tad-Direttiva 70/156/KEE [6]. Artikolu 2 L-Istati Membri għandhom jieħdu l-miżuri neċessarji sabiex jassiguraw li l-vetturi bil-mutur tal-kategoriji M2 u M3 msemmija fl-Artikolu 1 jistgħu jintużaw fit-triq biss jekk mgħammra b'apparat li jillimita l-veloċità magħmul b'tali mod li l-veloċità tagħhom ma tkunx tista' taqbeż il-100 kilometru fis-siegħa. Vetturi tal-kategorija M3 irreġistrati qabel l-1 ta' Jannar 2005 b'massa massima li teċċedi l-10 tunnellati jistgħu jibqgħu jiġu mgħammra b'apparat li fuqhom il-veloċità massima hija stabbilita f'100 kilometru fis-siegħa. Artikolu 3 1. L-Istati Membri għandhom jieħdu l-miżuri neċessarji biex jassiguraw li l-vetturi bil-mutur tal-kategoriji N2 u N3 jistgħu jintużaw fit-triq biss jekk mgħammra b'apparat li jillimita l-veloċità magħmul b'tali mod li l-veloċità tagħhom ma tkunx tista' taqbeż id-90 kilometru fis-siegħa. 2. L-Istati Membri għandhom ikunu awtorizzati jeħtieġu li l-apparat li jillimita l-veloċità f'vetturi rreġistrati fit-territorju tagħhom u użati esklussivament għat-trasport ta' merkanzija perikoluża jkun magħmul b'tali mod li dawk il-vetturi ma jkunux jistgħu jaqbżu veloċità massima ta' inqas minn 90 kilometru fis-siegħa. Artikolu 4 1. Għal vetturi bil-mutur tal-kategorija M3 li għandhom massa massima ta' iktar minn 10 tunnellati u vetturi bil-mutur tal-kategorija N3, l-Artikoli 2 u 3 għandhom jiġu applikati: (a) għal vetturi rreġistrati mill-1 ta' Jannar 1994, mill-1 ta' Jannar 1994; (b) għal vetturi rreġistrati bejn l-1 ta' Jannar 1988 u l-1 ta' Jannar 1994: (i) mill-1 ta' Jannar 1995, fil-każ ta' vetturi użati kemm għat-trasport nazzjonali u internazzjonali; (ii) mill-1 ta' Jannar 1996, fil-każ ta' vetturi użati esklussivament għat-trasport nazzjonali. 2. Għal vetturi bil-mutur tal-kategorija M2, vetturi tal-kategorija M2 li għandhom massa massima ta' iktar minn 5 tunnellati imma mhux iktar minn 10 tunnellati u vetturi tal- kategorija N2, l-Artikoli 2 u 3 għandhom japplikaw fl-iktar tard: (a) għal vetturi rreġistrati mill-1 ta' Jannar 2005; (b) għall-vetturi li jikkonformaw mal-valuri limitu stabbiliti fid-Direttiva 88/77/KEE [7] rreġistrati bejn l-1 ta' Ottubru u l-1 ta' Jannar 2005: (i) mill-1 ta' Jannar 2006 fil-każ ta' vetturi użati kemm għall-operazzjonijiet ta' trasport nazzjonali u internazzjonali: (ii) mill-1 ta' Jannar 2007 fil-każ ta' vetturi użati biss għal operazzjonijiet ta' trasport nazzjonali. 3. Għal perjodu ta' mhux aktar minn tliet snin mill-1 ta' Jannar 2005, kull Stat Membru jista' jeżenta mid-dispożizzjonijiet ta' l-Artikoli 2 u 3 vetturi tal-kategorija M2 u vetturi tal-kategorija N2 b'massa massima ta' iktar minn 3,5 tunnellati imma li ma taqbiżx is-7,5 tunnellati, rreġistrati fir-reġistru nazzjonali u li ma jivvjaġġawx fit-territorju ta' Stat Membru ieħor. Artikolu 5 1. L-apparati li jillimita l-veloċità msemmi fl-Artikoli 2 u 3 għandu jissodisfa ir-rekwiżiti tekniċi stabbiliti fl-Anness tad-Direttiva 92/24/KEE [8]. Madankollu, l-vetturi kollha koperti minn din id-Direttiva u rreġistrati qabel l-1 ta' Jannar 2005 jistgħu jibqgħu jiġ mgħammra b'apparat li jillimita l-veloċità li jissodisfa ir-rekwiżiti tekniċi stabbiliti mill-awtoritajiet nazzjonali kompetenti. 2. Apparat li jillimita l-veloċità għandu jiġi installat minn workshops jew korpi approvati mill-Istati Membri." 2. Artikolu li ġej għandu jiġi inserit: "Artikolu 6a Bħala parti mill-programm ta' azzjoni tas-sigurtà fit-toroq għall-perijodu 2002 sa 2010, il-Kummissjoni għandha tevalwa is-sigurtà fit-toroq u l-implikazzjonijiet tat-traffiku fit-toroq għall-aġġustament ta' apparat li jillimita l-veloċità użat minn vetturi tal-kategorija M2 u minn vetturi tal-kategorija N2 b'massa massima ta' 7,5 tunnellati jew inqas għall-veloċitajiet stabbiliti b'din id-Direttiva. Jekk neċessarju, il-Kummissjoni għandha tissottometti proposti approprjati." Artikolu 2 L-Istati Membri għandhom iġibu fis-seħħ il-liġijiet, ir-regolamenti u d-dispożizzjonijiet amministrattivi neċessarji biex jikkonformaw ma' din id-Direttiva sa l-1 ta' Jannar 2005 fl-iktar tard. Għandhom jimbagħad informaw bihom lill-Kummissjoni. Meta l-Istati Membri jadottaw dawn il-miżuri, għandu jkollhom referenza għal din id-Direttiva jew għandhom jiġu akkumpanjati b'din ir-referenza fl-okkażjoni tal-pubblikazzjoni uffiċjali tagħhom. Il-metodi li bihom issir din ir-referenza għandhom jiġu stabbiliti mill-Istati Membri. Artikolu 3 Din id-Direttiva għandha tidħol fis-seħħ fil-jum tal-pubblikazzjoni tagħha fil-Ġurnal Uffiċjali tal-Komunitajiet Ewropej. Artikolu 4 Din id-Direttiva hija indirizzata lill-Istati Membri. Magħmula fi Brussel, fil-5 ta' Novembru 2002. Għall- Parlament Ewropew Il-President P. Cox Għall-Kunsill Il-President T. Pedersen [1] ĠU C 270 E, tal-25.9.2001, p. 77. [2] ĠU C 48, tal-21.2.2002, p. 47. [3] L-Opinjoni tal-Parlament Ewropew tas-7 ta' Frar 2002 (għadha mhux ippubblikata fil-Ġurnal Uffiċjali), Pożizzjoni Komuni tal-Kunsill tal-25 ta' Ġunju 2002 (ĠU C 228 E, tal-25.9.2002, p. 14) u d-Deċiżjoni tal-Parlament Ewropew ta' l-24 ta' Settembru 2002 (għadha mhux ippubblikata fil-Ġurnal Uffiċjali). [4] ĠU L 57, tat-2.3.1992, p. 27. [5] ĠU C 218, tal-31.7.2000, p. 1. [6] Id-Direttiva tal-Kunsill 70/156/KEE tas-6 ta' Frar 1970 dwar l-approssimazzjoni tal-liġijiet ta' l-Istati Membri li jirrelataw għall-approvazzjoni tat-tip ta' vetturi bil-mutur u l-karrijiet tagħhom (ĠU L 42, tat-23.2.1970, p. 1). Id-Direttiva kif l-aħħar emendata bid-Direttiva tal-Kummissjoni 2001/116/KE (ĠU L 18, tal-21.1.2002, p. 1). [7] Id-Direttiva tal-Kunsill 88/77/KEE tat-3 ta' Diċembru 1987 dwar l-approssimazzjoni tal-liġijiet ta' l-Istati Membri li jirrelataw għall-miżuri li għandhom jittieħdu kontra l-emissjoni ta' pollutanti gassużi minn magni diesel għall-użu f'vetturi (ĠU L 36, tad-9.2.1988, p. 33). Id-Direttiva kif emendata l-aħħar bid-Direttiva tal-Kummissjoni 2001/27/KE (ĠU L 107, tat-18.4.2001, p. 10). [8] Id-Direttiva tal-Kunsill 92/24/KEE tal-31 ta' Marzu 1992 relatata ma' tagħmir li jillimata il-veloċità jew sistemi bħal dawn abbord li jillimitaw il-veloċità ta' ċertu kategoriji ta' vetturi bil-mutur (ĠU L 129, ta' l-14.5.1992, p. 154). --------------------------------------------------