32001R0068

Ir-Regolament tal-Kummissjoni (KE) Nru 68/2001

tat-12 ta’ Jannar 2001

dwar it-tħaddim ta’ l-Artikoli 87 u 88 tat-Trattat ta’ l-UE dwar l-għajnuna għat-taħriġ

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 994/98 tas-7 ta’ Mejju 1998 dwar it-tħaddim ta’ l-Artikoli 92 u 93 tat-Trattat li jistabbilixxi l-Komunità Ewropea dwar ċerti kategorji ta’ għajnuna Statali orizzontali [1], u b’mod partikolari punti (a)(iv) ta’ l-Artikolu 1(1) tiegħu,

Wara li ppubblikat abbozz ta’ dan ir-Regolament [2],

Wara li kkonsultat il-Kumitat Konsultattiv dwar l-Għajnuna Statali,

Billi:

(1) Regolament (KE) Nru 994/98 jagħti l-poter lill-Kummissjoni li tiddikjara, skond l-Artikolu 87 tat-Trattat, li taħt ċerti kondizzjonijiet l-għajnuna għat-taħriġ tkun kompatibbli mas-suq komuni u mhux suġġetta għar-rekwiżiti tan-notifika ta’ l-Artikolu 88(3) tat-Trattat.

(2) Il-Kummissjoni applikat l-Artikoli 87 u 88 tat-Trattat għall-għajnuna għal taħriġ f’diversi deċiżjonijiet u ddikjarat ukoll il-politika tagħha, l-aktar reċenti fil-qafas tal-Komunità dwar l-għajnuna għat-taħriġ [3]. Fid-dawl ta’ l-esperjenza konsiderevoli tal-Kummissjoni li tħaddem dawk l-Artikoli għall-għajnuna għal taħriġ, ikun xieraq, bil-għan li tkun assigurata superviżjoni effiċjenti u tkun issimplifikata l-amministrazzjoni mingħajr ma jiddgħajjef is-sorveljar mill-Kummissjoni, li l-Kummissjoni għandha tagħmel użu mill-poteri mogħtija bis-saħħa tar-Regolament (KE) Nru 994/98.

(3) Sabiex tkun stabbilita politika trasparenti u koerenti għas-setturi kollha, hu xieraq li l-iskop ta’ dan ir-Regolament ikun wiesa’ kemm jista’ jkun u jinkludi s-settur agrarju, is-sajd u l-akwakultura.

(4) Dan ir-Regolament hu mingħajr preġudizzju għall-possibbiltà li Stati Membri jinnotifikaw l-għajnuna għal taħriġ. Dawn in-notifiki ser ikunu evalwati mill-Kummissjoni b’mod partikolari fid-dawl tal-kriterji stabbiliti f’dan ir-Regolament, jew skond il-linji gwida tal-Komunità applikabbli u l-qafas, jekk jeżistu dawn il-linji gwida u l-oqfsa. Preżentement dan hu l-każ għall-attivitajiet li jirreferu għall-produzzjoni, l-ipproċessar u l-promozzjoni tal-prodotti elenkati fl-Anness I tat-Trattat u għas-settur tat-trasport marittimu. Il-qafas għall-għajnuna għal taħriġ għandu jkun abolit mid-data tal-bidu fis-seħħ ta’ dan ir-Regolament, peress li l-kontenuti tiegħu huma ssostitwiti b’dan ir-Regolament.

(5) Għal raġunijiet ta’ trasparenza, għandu jkun imfakkar li skond it-tieni subparagrafu ta’ l-Artikolu 51(1) tar-Regolament tal-Kunsill (KE) Nru 1257/1999 tas-17 ta’ Mejju 1999 dwar l-appoġġ għall-iżvilupp rurali mill-Fond Ewropew dwar il-Gwida u Garanzija Agrarja (FEGGA) u li jemenda u jħassar ċerti Regolamenti [4], l-Artikoli 87 sa 89 tat-Trattat ma jgħoddux għall-kontribuzzjonijiet finanzjarji mogħtija mill-Istati Membri għall-miżuri suġġetti għall-appoġġ mill-Komunità għal taħriġ skond l-Artikolu 9 ta’ l-imsemmi Regolament.

(6) Għal raġunijiet ta’ trasparenza għandu jkun enfasizzat li dan ir-Regolament għandu jgħodd biss għall-miżuri ta’ taħriġ li jikkostitwixxu għajnuna Statali skond it-tifsira ta’ l-Artikolu 87(1) tat-Trattat. Ħafna miżuri ta’ taħriġ mhumiex koperti b’dak l-Artikolu, iżda jikkostitwixxu miżuri ġenerali peress li dawn huma miftuħa għall-intrapriżi kollha fis-setturi kollha mingħajr diskriminazzjoni u mingħajr il-poter diskrezzjonali ta’ l-awtoritajiet li jħaddmu l-miżura, eż. skemi ta’ inċentivi għat-taxxa ġenerali, bħal krediti ta’ taxxa awtomatiċi, miftuħa għall-intrapriżi kollha li jinvestu fit-taħriġ tal-ħaddiema. Miżuri oħra ta’ taħriġ ma jaqgħux fl-iskop ta’ l-Artikolu 87(1) tat-Trattat peress li dawn jibbenefikaw direttament lill-poplu kullimkien u ma jagħtux xi vantaġġ lil ċerti intrapriżi jew setturi. Xi eżempji huma: l-edukazzjoni u t-taħriġ tal-bidu (bħalma huma skemi ta’ apprentistat u day-release); it-taħriġ jew it-taħriġ mill-ġdid ta’ persuni qiegħda, inklużi traineeships f’intrapriżi; il-miżuri direttament immirati lejn ħaddiema jew ukoll lejn ċerti kategoriji ta’ ħaddiema, li jagħtuhom l-opportunità li jirċievu t-taħriġ mhux marbut ma’ l-impriża jew l-industrija li fiha jaħdmu (per eżempju l-"learning account"). Mill-banda l-oħra, għandu jitfakkar li l-kontribuzzjonijiet minn fondi settorjali, jekk dawn isiru tassattivi mill-Istat, mhumiex ikkunsidrati bħala riżorsi privati, iżda għandhom jitqiesu riżorsi Statali skond it-tifsira ta’ l-Artikolu 87(1) tat-Trattat.

(7) Dan ir-Regolament għandu jeżenta kull għajnuna li taderixxi mar-rekwiżiti rilevanti ta’ dan ir-Regolament, u kull skema ta’ għajnuna, sakemm kull għajnuna li tista’ tingħata taħt dik l-iskema tilħaq ir-rekwiżiti rilevanti ta’ dan ir-Regolament. Bil-għan li tkun assigurata sorveljanza effiċjenti u tkun issimplifikata l-amministrazzjoni mingħajr ma jiddgħajjef is-sorveljar mill-Kummissjoni, l-iskemi ta’ l-għajnuna u għotjiet individwali, barra minn xi skema ta’ għajnuna, għandu jkollhom riferenza espliċita għal dan ir-Regolament.

(8) Sabiex ikunu eliminati d-differenzi li jistgħu jikkaġunaw tgħawwiġ fil-kompetizzjoni, sabiex tkun iffaċilitata l-kordinazzjoni bejn l-inizjattivi differenti tal-Komunità u nazzjonali dwar intrapriżi żgħar u ta’ daqs medju, u għal raġunijiet ta’ ċarezza amministrattiva u ċertezza legali, it-tifsira ta’ "intrapriżi żgħar u ta’ daqs medju" użata f’dan ir-Regolament għandha tkun dik stabbilita fir-Rakkomandazzjoni tal-Kummissjoni 96/280/KE tat-3 ta’ April 1996 dwar it-tifsira ta’ intrapriżi żgħar u ta’ daqs medju [5].

(9) Sabiex ikun stabbilit jekk l-għajnuna tkunx kompatibbli jew le mas-suq komuni bis-saħħa ta’ dan ir-Regolament, hu meħtieġ li tkun ikkunsidrata l-intensità ta’ l-għajnuna u għalhekk l-ammont ta’ l-għajnuna espress bħala għotja ekwivalenti. Il-kalkolu ta’ l-għotja ekwivalenti ta’ l-għajnuna li għandha titħalla f’diversi pagamenti, u l-kalkolu ta’ l-għajnuna f’forma ta’ soft loan, jeħtieġu l-użu tar-rati ta’ interess tas-suq li jkunu jipprevalu fiż-żmien ta’ l-għotja. Bil-għan li jkun hemm tħaddim uniformi, trasparenti u sempliċi tar-regoli dwar l-għajnuna Statali, ir-rati tas-suq għall-għanijiet ta’ dan ir-Regolament għandhom jitqiesu li jkunu r-rati ta’ riferenza, sakemm, fil-każ ta’ soft loan, is-self ikun kopert bl-assigurazzjoni normali u ma jinvolvix riskju mhux normali. Ir-rati ta’ riferenza għandhom ikunu dawk li jkunu minn żmien għal żmien stabbiliti mill-Kummissjoni abbażi ta’ kriterji oġġettivi u ppubblikati fil-Ġurnal Uffiċjali tal-Komunitajiet Ewropej u fuq l-Internet.

(10) It-taħriġ normalment ikollu effetti esterni pożittivi għas-soċjetà in ġenerali peress li dan ikabbar in-numru ta’ ħaddiema mħarrġa li minnhom jistgħu jagħżlu intrapriżi oħra, itejjeb il-kompetittività ta’ l-industrija tal-Komunità u jilgħab parti importanti fl-istrateġija biex jitkattar l-impjieg. In vista tal-fatt li l-intrapriżi fil-Komunità normalment ma jinvestux biżżejjed fit-taħriġ tal-ħaddiema tagħhom, l-għajnuna Statali tista’ tgħin biex tkun korretta din l-imperfezzjoni fis-suq u għalhekk tista’ tkun ikkunsidrata taħt ċerti kondizzjonijiet li tkun kompatibbli mas-suq komuni u għalhekk eżentata minn notifika minn qabel.

(11) Sabiex ikun assigurat li l-għajnuna Statali tkun illimitata għal dak li hu meħtieġ minimament biex jintlaħaq l-oġġettiv tal-Komunità li l-forzi tas-suq biss ma jagħmlux possibbli, l-intensitajiet permissibbli ta’ l-għajnuna eżentata għandhom ikunu aġġustati skond it-tip tat-taħriġ ipprovdut, id-daqs ta’ l-impriża u l-posizzjoni ġeografika tagħha.

(12) It-taħriġ b’mod ġenerali jipprovdi l-kwalifiki trasferibbli u jtejjeb b’mod sostanzjali l-opportunità ta-xogħol tal-ħaddiem imħarreġ. L-għajnuna għal dan il-għan għandha inqas effetti ta’ tgħawwiġ tal-kompetizzjoni, sabiex intensitajiet akbar ta’ għajnuna jistgħu jkunu kkunsidrati kompatibbli mas-suq komuni u eżentati minn notifika minn qabel. It-taħriġ speċifiku, mill-banda l-oħra, li primarjament ikun ta’ benefiċċju għall-impriża, jinvolvi riskju akbar ta’ tgħawwiġ għall-kompetizzjoni sabiex l-intensità ta’ l-għajnuna li tista’ tkun ikkunsidrata kompatibbli u eżentata minn notifika minn qabel għandha tkun ħafna inqas.

(13) In vista ta’ l-iżvantaġġi li magħhom l-IŻM huma kkonfrontati u l-ispejjeż relattivament akbar li dawn għandhom meta jinvestu fit-taħriġ tal-ħaddiema tagħhom, l-intensitajiet ta’ l-għajnuna eżentata b’dan ir-Regolament għandhom ikunu miżjuda għall-IŻM.

(14) F’żoni mgħejjuna skond l-Artikolu 87(3)(a) u (ċ) tat-Trattat, it-taħriġ għandu impatt estern relattivament ikbar, peress li hemm nuqqas ta’ investiment sostanzjali fit-taħriġ f’dawk ir-reġjuni u rata akbar ta’ qagħad. Konsegwentement, l-intensitajiet ta’ l-għajnuna eżentata b’dan ir-Regolament għandhom ikunu miżjuda għal dawk iż-żoni.

(15) Il-karatteristiċi tat-taħriġ fis-settur tat-trasport marittimu jiġġustifikaw metodu speċifiku kif għandu jkun indirizzat dak is-settur.

(16) Hu xieraq li ammonti kbar ta’ għajnuna jibqgħu suġġetti għal stima individwali mill-Kummissjoni qabel dawn jitpoġġew fis-seħħ. Għaldaqstant, l-ammonti ta’ għajnuna li jeċċedu ammont fiss, li għandhom ikunu stabbiliti għal EUR 1000000, huma esklużi mill-eżenzjoni kif ipprovdut f’dan ir-Regolament u jibqgħu suġġetti għar-rekwiżiti ta’ l-Artikolu 88(3) tat-Trattat.

(17) Dan ir-Regolament m’għandux jeżenta għajnuna kumulata ma’ għajnuna Statali oħra, inkluża għajnuna mogħtija minn awtoritajiet nazzjonali, reġjonali u lokali, jew b’assistenza tal-Komunità, għar-rigward ta’ l-istess spejjeż eliġibbli meta dak il-kumulu jeċċedi l-ammonti stabbiliti bħala limitu b’dan ir-Regolament.

(18) Sabiex ikunu assigurati t-trasparenza u s-sorveljar effettiv skond l-Artikolu 3 tar-Regolament (KE) Nru 994/98, hu xieraq li jkun stabbilit format standard li fih Stati Membri għandhom jipprovdu lill-Kummisjoni b’sommarju ta’ l-informazzjoni kull meta, fit-tħaddim ta’ dan ir-Regolament, xi skema ta’ għajnuna tkun implimentata jew tingħata xi għajnuna individwali barra dawk l-iskemi, bil-għan li tkun ippubblikata fil-Ġurnal Uffiċjalli tal-Komunitajiet Ewropej. Għall-istess raġunijiet, hu xieraq li jkunu stabbiliti regoli dwar ir-reġistri li Stati Membri għandhom iżommu dwar l-għajnuna eżentata bis-saħħa ta’ dan ir-Regolament. Għall-għanijiet tar-rapporti annwali li għandhom jintbagħtu lill-Kummissjoni minn Stati Membri, hu xieraq li l-Kummissjoni tistabbilixxi r-rekwiżiti speċifiċi tagħha, inkluża, in vista tad-disponibbiltà wiesa’ tat-teknoloġija meħtieġa, l-informazzjoni f’forma kompjuterizzata.

(19) Meta wieħed jikkunsidra l-esperjenza tal-Kummissjoni u b’mod partikolari l-frekwenza li biha jkun ġeneralment meħtieġ li tkun riveduta l-politika dwar għajnuna Statali, hu xieraq li l-perjodu tat-tħaddim ta’ dan ir-Regolament ikun illimitat. Jekk dan ir-Regolament jiskadi mingħajr ma jkun imġedded, l-iskemi ta’ l-għajnuna diġa eżentati permezz ta’ dan ir-Regolament għandhom ikompli li jkunu eżentati għal sitt xhur,

ADOTTAT DAN IR-REGOLAMENT:

Artikolu 1

Skop

Dan ir-Regolament jgħodd għall-għajnuna fis-setturi kollha, inklużi l-attivitajiet relatati mal-produzzjoni, l-ipproċessar u l-promozzjoni tal-prodotti elenkati f’L-Anness I tat-Trattat.

Artikolu 2

Tifsir

Għall-għan ta’ dan ir-Regolament:

(a) "għajnuna" tfisser kull miżura li taderixxi mal-kriterji stabbiliti fl-Artikolu 87(1) tat-Trattat;

(b) "intrapriżi żgħar u ta’ daqs medju" tfisser intrapriżi kif imfissra fl-Anness I;

(ċ) "intrapriżi kbar" tfisser intrapriżi li ma jaqgħux taħt it-tifsira ta’ IŻM fl-Anness I;

(d) "taħriġ speċifiku" jfisser taħriġ li jinvolvi tagħlim direttament u prinċipalment applikabbli għall-posizzjoni preżenti jew futura tal-ħaddiem fl-intrapriża mgħejjuna u li jipprovdi l-kwalifiki li mhumiex jew huma biss sa ċertu punt trasferibbli lil intrapriżi jew oqsma ta’ xogħol oħra;

(e) "taħriġ ġenerali" jfisser it-taħriġ li jinvolvi tagħlim li ma japplikax biss jew prinċipalment għall-posizzjoni preżenti jew futura tal-ħaddiem fl-intrapriża mgħejjuna, iżda li jipprovdi l-kwalifiki li huma trasferibbli b’mod liberu lil intrapriżi jew oqsma tax-xogħol oħra u għalhekk itejjeb b’mod sostanzjali l-opportunità tax-xogħol għall-ħaddiem. It-taħriġ għandu jkun ikkunsidrat "ġenerali" jekk, per eżempju,

- ikun organizzat b’mod konġunt minn intrapriżi indipendenti differenti, jew jekk l-impjegati ta’ intrapriżi differenti jagħmlu użu mit-taħriġ,

- dan ikun rikonoxxut, attestat jew validat minn awtoritajiet jew korpi pubbliċi jew minn korpi oħra jew istituzzjonijiet li lilhom Stat Membru jew il-Komunità tkun tathom il-poteri meħtieġa.

(f) "intensità ta’ l-għajnuna" tfisser l-ammont globali ta’ l-għajnuna espress bħala perċentwali ta’ l-ispejjeż eliġibbli tal-proġett. Iċ-ċifri kollha wżati għandhom jittieħdu qabel it-tnaqqis tat-tassazzjoni diretta. Meta l-għajnuna tingħata f’forma li ma tkunx għotja, l-ammont ta’ l-għajnuna għandu jkun l-ekwivalenti ta’ l-għajnuna kieku kienet għotja. L-għajnuna pagabbli f’diversi pagamenti għandha tkun skontata għall-valur tagħha fil-ħin li tingħata. Ir-rata ta’ interess li għandha tintuża għall-għanijiet ta’ skont u biex ikun ikkalkulat l-ammont ta’ l-għajnuna bħala soft loan għandha tkun ir-rata ta’ riferenza applikabbli fiż-żmien ta’ l-għotja;

(g) "ħaddiem żvantaġġjat" ifisser:

- kull persuna żagħżugħa taħt il-25 sena li qabel ma kinitx kisbet l-ewwel impjieg regolari bi ħlas,

- kull persuna li jkollha diżabilitajiet serji li jirriżultaw minn diżabilitajiet fiżiċi, mentali jew psikoloġiċi u iżda li tkun kapaċi li tidħol fis-suq tax-xogħol,

- kull ħaddiem immigrant li jiċċaqlaq fil-Komunità jew li jsir residenti fil-Komunità sabiex jaħdem u li jeħtieġ it-taħriġ professjonali u/jew fil-lingwa,

- kull persuna li tixtieq li terġa’ tidħol fil-ħajja tax-xogħol wara waqfa ta’ mill-inqas tliet snin, u b’mod partikolari kull persuna li waqfet taħdem minħabba d-diffikultà li tirrikonċilja l-ħajja tax-xogħol tagħha ma’ dik tal-familja, għall-ewwel sitt xhur wara li tkun reklutata,

- kull persuna li jkollha aktar minn 45 sena li ma jkollhiex kwalifiki ta’ edukazzjoni sekondarja għolja jew l-ekwivalenti tagħha,

- kull persuna qiegħda fit-tul, i.e. kull persuna li ma kinitx qiegħda taħdem għal 12-il xahar konsekuttivi, għall-ewwel sitt xhur wara li tkun reklutata.

Artikolu 3

Kondizzjonijiet għall-eżenzjoni

1. L-għajnuna individwali barra minn xi skema, li taderixxi mal-kondizzjonijiet kollha ta’ dan ir-Regolament, għandha tkun kompatibbli mas-suq komuni skond it-tifsira mogħtija fl-Artikolu 87(3) tat-Trattat u għandha tkun eżentata mir-rekwiżit ta’ notifika kif provdut fl-Artikolu 88(3) tat-Trattat sakemm din ikun fiha referenza espliċita għal dan ir-Regolament, billi jkun ċitat it-titolu tiegħu u r-referenza tal-pubblikazzjoni fil-Ġurnal Uffiċjali tal-Komunitajiet Ewropej.

2. L-iskemi ta’ għajnuna li jaderixxu mal-kondizzjonijiet kollha ta’ dan ir-Regolament għandhom ikunu kompatibbli mas-suq komuni skond it-tifsir mogħti fl-Artikolu 87(3) tat-Trattat u għandhom ikunu eżentati mir-rekwiżit tan-notifika kif provdut fl-Artikolu 88(3) tat-Trattat sakemm:

(a) kull għajnuna li tista’ tingħata taħt dik l-iskema taderixxi mal-kondizzjonijiet kollha ta’ dan ir-Regolament;

(b) l-iskema jkollha referenza espliċita għal dan ir-Regolament, billi jkun ċitat it-titolu tiegħu u r-riferenza tal-pubblikazzjoni fil-Ġurnal Uffiċjal tal-Komunitajiet Ewropej.

3. Għajnuna mogħtija taħt l-iskemi msemmija fil-paragrafu 2 għandha tkun kompatibbli mas-suq komuni skond it-tifsira mogħtija fl-Artikolu 87(3) tat-Trattat u għandha tkun eżentata mir-rekwiżiti tan-notifika li jinsabu fl-Artikolu 88(3) tat-Trattat sakemm l-għajnuna mogħtija taderixxi mal-kondizzjonijiet kollha ta’ dan ir-Regolament.

Artikolu 4

Għajnuna għal taħriġ eżentata

1. Skemi ta’ għajnuna u għajnuna individwali għat-taħriġ għandhom jaderixxu mal-kondizzjonijiet stabbiliti f’paragrafi 2 sa 7.

2. Meta l-għajnuna tingħata għal taħriġ speċifiku, l-intensità tagħha ma għandhiex taqbeż il-25 % għal intrapriżi kbar u l-35 % għal intrapriżi żgħar u ta’ daqs medju.

Dawn l-intensitajiet għandhom jiżdiedu b’ħames punti perċentwali għall-intrapriżi fiż-żoni li jikkwalifikaw għal għajnuna reġjonali bis-saħħa ta’ l-Artikolu 87(3)(ċ) tat-Trattat u b’10 punti perċentwali għall-intrapriżi f’żoni li jikkwalifikaw għal għajnuna bis-saħħa ta’ l-Artikolu 87(3)(a) tat-Trattat. 3. Meta l-għajnuna tingħata għat-taħriġ ġenerali, l-intensità tagħha m’għandhiex teċċedi l-50 % għall-intrapriżi kbar u 70 % għall-intrapriżi żgħar u ta’ daqs medju.

3. Meta tinghata l-ghajnuna ghal tahriġ ġenerali, l-intensita taghha, ma ghandiex tag bez il-50% f’ Każ ta Kumpanniji Kbar u 70% f’każ ta’ Kumpanniji żghar jew medji.

Dawn l-intensitajiet għandhom jiżdiedu b’ħames punti perċentwali għall-intrapriżi f’żoni li jikkwalifikaw għall-għajnuna reġjonali bis-saħħa ta’ l-Artikolu 87(3)(ċ) tat-Trattat u b’10 punti perċentwali għall-intrapriżi f’żoni li jikkwalifikaw għall-għajnuna bis-saħħa ta’ l-Artikolu 87(3)(a) tat-Trattat.

4. L-intensitajiet massimi msemmija f’paragrafi 2 u 3 għandhom jiżdiedu b’10 punti perċentwali jekk it-taħriġ jingħata lill-ħaddiema żvantaġġjati.

5. Fil-każijiet fejn il-proġett ta’ l-għajnuna jinvolvi kemm komponenti ta’ taħriġ speċifiku u ġenerali li ma jistgħux ikunu sseparati mill-kalkolu ta’ l-intensità ta’ l-għajnuna, u fil-każijiet fejn il-karattru speċifiku u ġenerali tal-proġett ta’ l-għajnuna għat-taħriġ, l-intensitajiet applikabbli għat-taħriġ speċifiku bis-saħħa tal-paragrafu 2 għandhom jgħoddu.

6. Meta l-għajnuna tingħata fis-settur tat-trasport marittimu, din tista’ tilħaq intensità ta’ 100 %, kemm jekk il-proġett tat-taħriġ jirreferi għal taħriġ speċifiku jew ġenerali, sakemm il-kondizzjonijiet li ġejjin ikunu aderiti:

(a) il-persuna li tkun qed titħarreġ m’għandhiex tkun membru attiv taċ-ċorma iżda għandha tkun supernumerarju abbord, u

(b) it-taħriġ għandu jsir abbord vapuri li jkunu jidhru fuq ir-reġistri tal-Komunità.

7. L-ispejjeż eliġibbli tal-proġett ta’ għajnuna għal taħriġ għandhom ikunu:

(a) l-ispejjeż tal-persunal ta’ min iħarreġ,

(b) spejjeż ta’ min iħarreġ u ta’ l-ivvjaġġar tagħhom,

(ċ) spejjeż kurrenti oħra bħal materjal u fornituri,

(d) deprezzar ta’ l-għodda u l-apparat, sal-limitu li dawn ikunu użati esklussivament għall-proġett tat-taħriġ,

(e) l-ispiża tas-servizzi ta’ gwida u pariri għar-rigward tal-proġett tat-taħriġ,

(f) l-ispejjeż tal-persunal ta’ min qed jiġi mħarrreġ sa l-ammont tat-total ta’ l-ispejjeż l-oħra eliġibbli msemmija f’(a) sa (e). Jistgħu jkunu kkunsidrati s-siegħat biss li matulhom min qed jiġi mħarreġ attwalment jipparteċipa fit-taħriġ, wara li jitnaqqsu xi siegħat produttivi jew l-ekwivalenti tagħhom.

L-ispejjeż eliġibbli għandhom ikunu appoġġjati b’evidenza dokumentata, li għandhom ikunu trasparenti u elenkati.

Artikolu 5

Għotijiet kbar ta’ għajnuna individwali

L-eżenzjoni ma tgħoddx jekk l-ammont ta’ għajnuna mogħtija lil intrapriża għal proġett wieħed tat-taħriġ jeċċedi EUR 1000000.

Artikolu 6

Kumulu

1. Il-limitu ta’ għajnuna ffissat fl-Artikoli 4 u 5 għandu jgħodd kemm jekk l-appoġġ għall-proġett ikun iffinanzjat kollu kemm hu jew le mir-riżorsi Statali jew finanzjat parzjalment mill-Komunità.

2. L-għajunua eżentata permezz ta’ dan ir-Regolament m’għandhiex tkun kumulata ma’ xi għajnuna Statali oħra skond it-tifsira ta’ l-Artikolu 87 (1) tat-Trattat, jew b’xi finanzjament ieħor tal-Komunità, għar-rigward ta’ l-istess spejjeż eliġibbli, jekk dak il-kumulu jista’ jirriżulta f’intensità ta’ għajnuna li teċċedi dik iffissata b’dan ir-Regolament.

Artikolu 7

Transparenza u sorveljar

1. Mat-tħaddim ta’ xi skema ta’ għajnuna, jew għotja ta’ għajnuna individwali barra minn xi skema, eżentata permezz ta’ dan ir-Regolament, Stati Membri għandhom, fi żmien 20 ġurnata tax-xogħol, jissottomettu lill-Kummissjoni, bil-għan li jkun pubblikat fil-Ġurnal Uffiċjal tal-Komunitajiet Ewropej, sommarju ta’ l-informazzjoni dwar dik l-iskema ta’ għajnuna jew għajnuna individwali skond il-mudell stabbilit f’L-Anness II.

2. Stati Membri għandhom iżommu reġistri dettaljati dwar l-iskemi ta’ għajnuna eżentati permezz ta’ dan ir-Regolament, l-għajnuna individwali mogħtija taħt dawk l-iskemi, u l-għajnuna individwali eżentata permezz ta’ dan ir-Regolament li tkun mogħtija barra minn xi skema eżistenti ta’ għajnuna. Dawn ir-reġistri għandu jkollhom l-informazzjoni kollha meħtieġa biex ikun stabbilit li l-kondizzjonijiet għall-eżenzjoni, kif stabbiliti f’dan ir-Regolament, ikunu aderiti. Stati Membri għandhom iżommu reġistru dwar xi għajnuna individwali għal 10 snin mid-data li fiha din tingħata, u dwar xi skema ta’ għajnuna, għal 10 snin mid-data li fiha l-aħħar għajnuna individwali ngħatat taħt dik l-iskema. Fuq talba bil-miktub, l-Istat Membru kkonċernat għandu jipprovdi lill-Kummissjoni, fi żmien 20 ġurnata tax-xogħol jew perjodu akbar kif jista’ jkun stabbilit fit-talba, l-informazzjoni kollha li l-Kummissjoni tikkunsidra meħtieġa biex tevalwa jekk il-kondizzjonijiet ta’ dan ir-Regolament kienux imħarsa.

3. Stati Membri għandhom jiġbru rapport dwar it-tħaddim ta’ dan ir-Regolament dwar xi sena kalendarja sħiħa jew parzjali li matulha dan ir-Regolament jgħodd, f’forma stabbilita f’L-Anness III, ukoll f’forma kompjuterizzata. Stati Membri għandhom jipprovvdu lill-Kummissjoni b’dak ir-rapport mhux aktar tard minn tliet xhur wara li jiskadi l-perjodu li għalih jirreferi r-rapport.

Artikolu 8

Id-dħul fis-seħħ u l-perjodu ta’ validità

1. Dan ir-Regolament għandu jidħol fis-seħħ wara l-20 jum mill-pubblikazzjoni tiegħu fil-Ġurnal Uffiċjali tal-Komunitajiet Ewropej.

Dan għandu jibqa’ fis-seħħ sal-31 ta’ Diċembru 2006.

2. Mat-tmiem tal-perjodu ta’ validità ta’ dan ir-Regolament, l-iskemi ta’ għajnuna eżentati taħt dan ir-Regolament għandhom jibqgħu eżentati matul xi perjodu aġġustat ta’ sitt xhur.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussel, fit-12 ta’ Jannar 2001.

Għall-Kummissjoni

Mario Monti

Membru tal-Kummissjoni

[1] ĠU L 142, ta’ l-14.5.1998, pġ. 1.

[2] ĠU C 89, tat-28.3.2000, pġ. 8.

[3] ĠU C 343, tal-11.11.1998, pġ. 10.

[4] ĠU L 160, tas-26.6.1999, pġ. 80.

[5] ĠU L 107, tat-30.4.1996, pġ. 4.

--------------------------------------------------

ANNESS I

Tifsira ta’ intrapriżi żgħar u ta’ daqs medju

(estratt mir-Rakkomandazzjoni tal-Kummissjoni 96/280/KE tat-3 ta’ April 1996 dwar it-tifsira ta’ intrapriżi żgħar u ta’ daqs medju (ĠU L 107, tat-30.4.1996, p. 4))

"Artikolu 1

1. Intrapriżi żgħar u ta’ daqs medju, hawnhekk iżjed ’il quddiem magħrufa bħala "IŻM", huma mfissra bħala intrapriżi li:

- għandhom inqas minn 250 impjegat, u

- jkollhom jew,

- valur tal-bejgħ annwali li ma jeċċedix EUR 40 miljuni, jew

- Total tal-balance sheet annwali li ma jeċċedix EUR 27 miljuni,

- jikkonformaw mal-kriterja ta’ indipendeza kif imfisser fil-paragrafu 3.

2. Meta jkun meħtieġ li jkun hemm distinzjoni bejn intrapriżi żgħar u ta’ daqs medju, l-"intrapriża żgħira" hi mfissra bħal intrapriża li:

- jkollha inqas minn 50 impjegat u

- jkollha jew,

- valur tal-bejgħ annwali li ma jeċċedix EUR 7 miljuni, jew

- total tal-karta tal-bilanċ annwali li ma jeċċedix EUR 5 miljuni,

- li tikkonforma mal-kriterja ta’ indipendenza kif imfisser fil-paragrafu 3.

3. Intrapriżi indipendenti huma dawk li ma jkollhomx 25 % jew aktar tal-kapital jew tal-jeddijiet tal-vot bħala proprjetà ta’ intrapriża waħda, jew b’mod konġunt minn diversi intrapriżi, li ma jaqgħux fit-tifsir ta’ IŻM jew intrapriża żgħira, skond liema minnhom tgħodd. Dan il-limitu ma jistax jinqabeż fiż-żewġ każijiet li ġejjin:

- jekk l-intrapriża tkun miżmuma minn korporazzjonijiet pubbliċi ta’ investiment, kumpanniji ta’ kapital spekulattiv jew investituri istituzzjonali, sakemm ma jkun hemm l-ebda kontroll kemm individwalment jew b’mod konġunt,

- jekk il-kapital ikun mifrux b’tali mod li ma jkunx possibbli li jkun stabbilit minn min ikun miżmum u jekk l-intrapriża tiddikjara li din tista’ leġittimament tippreżumi li din ma tkunx proprjetà sa 25 % jew aktar minn xi intrapriża, jew b’mod konġunt minn diversi intrapriżi, barra mit-tifsir ta’ IŻM jew ta’ intrapriża żgħira, skond liema minnhom tgħodd.

4. Meta jkun ikkalkulat il-limitu msemmi f’paragrafi 1 u 2, hu għalhekk meħtieġ li jkunu kumulati ċ-ċifri rilevanti għall-intrapriża benefiċjarja u għall-intrapriżi kollha li din tikkontrolla b’mod dirett jew indirett permezz ta’ pussess ta’ 25 % jew aktar tal-kapital jew tal-jeddijiet tal-vot.

5. Meta jeħtieġ li jkun hemm distinzjoni bejn mikro-intrapriżi u IŻM oħrajn, dawn huma mfissra bħala intrapriżi li jkollhom inqas minn 10 impjegati.

6. Meta, mad-data finali tal-karta tal-bilanċ, xi intrapriża teċċedi jew taqa’ taħt il-limitu ta’ impjegati jew limiti finanzjarji, dan għandu jirriżulta f’li din takkwista jew titlef l-istatus ta’ "IŻM", "intrapriża ta’ daqs medju", "intrapriża żgħira" jew "mikro-intrapriża" biss jekk il-fenomenu jkun ripetut fuq sentejn finanzjarji konsekuttivi.

7. In-numru ta’ persuni impjegati jaqbel man-numru ta’ l-unitajiet annwali tax-xogħol (UAX), jiġifieri, in-numru ta’ ħaddiema full-time impjegati matul sena fejn ħaddiema part-time u staġjonali jkunu frazzjonijiet tal-UAX. Is-sena ta’ riferenza li għandha tkun ikkunsidrata hi dik ta’ l-aħħar perjodu tal-kontijiet.

8. It-total tal-limitu tal-valur tal-bejgħ u l-karta tal-bilanċ huma dawk tal-perjodu ta’ kontijiet tal-perjodu ta’ 12-il xahar li kien approvat l-aħħar. Fil-każ ta’ intrapriżi stabbiliti ġodda li l-kontijiet tagħhom għad ma kinux approvati, il-limiti li għandhom jgħoddu għandhom ikunu meħuda minn stima affidabbli magħmula fil-kors tas-sena finanzjarja."

--------------------------------------------------

ANNESS II

+++++ TIFF +++++

+++++ TIFF +++++

--------------------------------------------------

ANNESS III

Forma tar-rapport perjodiku li għandu jingħata lill-Kummissjoni

Format tar-rapport annwali dwar l-iskemi ta’ għajnuna eżentata taħt xi regolament ta’ eżenzjoni għall-grupp adottat bis-saħħa ta’ l-Artikolu 1 tar-Regolament tal-Kunsill (KE) Nru 994/98

Stati Membri huma meħtieġa li jużaw il-format ta’ hawn taħt għall-obbligazzjonijiet tagħhom ta’ rappurtar lill-Kummissjoni taħt regolamenti ta’ eżenzjoni għall-grupp adottati abbażi tar-Regolament tal-Kunsill (KE) Nru 994/98.

Ir-rapporti għandhom jingħataw ukoll f’forma kompjuterizzata.

L-informazzjoni meħtieġa għall-iskemi kollha ta’ għajnuna eżentati taħt ir-regolamenti ta’ eżenzjoni għall-grupp bis-saħħa ta’ l-Artikolu 1 tar-Regolament tal-Kunsill (KE) Nru 994/98

1. Titolu ta’ Skema ta’ għajnuna

2. Regolament ta’ l-eżenzjoni tal-Kummissjoni applikabbli

3. Spiża

Ċifri separati għandhom jingħataw għal kull strument ta’ għajnuna skond xi skema jew għajnuna individwali (eż. għotja, soft loans, eċċ). Iċ-ċifri għandhom jingħataw f’ewro jew, jekk applikabbli, f’munita nazzjonali. Fil-każ ta’ spiża tat-taxxa, it-telf annwali tat-taxxa għandu jkun rapportat. Jekk ċifri preċiżi ma jkunux disponibbli, dawk it-telfiet jistgħu jkunu stmati.

Dawn iċ-ċifri ta’ l-ispiża għandhom jingħataw abbażi ta’ dan li ġej:

għas-sena taħt reviżjoni indika b’mod separat għal kull għajnuna l-istrument fl-iskema (eż. għotja, soft loan, garanzija, eċċ.):

3.1. ammonti kommessi, (stima) tat-telf tat-taxxa jew dħul ieħor li mhux ser jidħol, informazzjoni dwar garanziji, eċċ. għal proġetti ġodda assistiti. Fil-każ ta’ skemi ta’ garanzija, l-ammont totali tal-garanziji ġodda mogħtija għandhom jingħataw;

3.2. pagamenti attwali, (stima) tat-telf tat-taxxa jew dħul ieħor li ma jkunx ser jidħol, informazzjoni dwar garanziji, eċċ. għall-proġetti ġodda u preżenti. Fil-każ ta’ skemi ta’ garanzija, għandu jingħata dan li ġej: l-ammont totali tal-garanziji li jkun għad jifdal, premium income, irkupri, assigurazzjonijiet imħallsa, ir-riżultat tal-operat ta’ l-iskema fis-sena li tkun qed tiġi riveduta;

3.3. numru ta’ proġetti ġodda assistiti;

3.4. numru globali stmat tax-xogħlijiet maħluqa jew miżmuma bil-proġetti l-ġodda (jekk ikun xieraq);

3.5. ammont globali stmat ta’ l-investiment megħjun bil-proġetti l-ġodda;

3.6. elenku reġjonali ta’ l-ammonti taħt punt 3.1 jew permezz tar-reġjuni mfissra fin-NUTS [1] livell 2 jew taħt jew permezz ta’ l-Artikolu 87(3)(a) reġjuni, l-Artikolu 87(3)(ċ) reġjuni u reġjuni mhux assistiti;

3.7. elenku settorjali ta’ l-ammonti taħt punt 3.1. permezz tas-setturi ta’ l-attività tal-benefiċjarji (jekk aktar minn settur wieħed ikun kopert, indika s-sehem ta’ kull wieħed):

- agrikultura

- agrikultura

- coalmining

- manifattura

li tagħhom:

l-azzar

il-bini tal-vapuri

fibri sintetiċi

vetturi bil-mutur

manifattura oħra (jekk jogħġbok speċifika)

- servizzi

li tagħhom:

servizzi ta’ trasport marittimu

servizzi oħra ta’ trapsort

servizzi finanzjarji

servizzi oħra (jekk jogħġbok speċifika)

- setturi oħra (jekk jogħġbok speċifika)

4. Informazzjoni u rimarki oħra

[1] NUTS hija n-nomenkaltura ta’ l-unitajiet territorjali għal finijiet ta’ statistika fil-KE.

--------------------------------------------------