31991L0188

Id-Direttiva Tal-Kummissjoni

tad-19 ta’ Marzu 1991

li temenda għall-ħames darba l-Anness għad-Direttiva tal-Kunsill 79/117/KEE li tipprojbixxi t-tqegħid fuq is-suq u l-użu ta’ prodotti għall-protezzjoni tal-pjanti li jkun fihom ċerti sustanzi attivi

(91/188/KEE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ekonomika Ewropea,

Wara li kkunsidrat id-Direttiva tal-Kunsill 79/117/KEE tal-21 ta’ Diċembru 1978 li tipprojbixxi t-tqegħid fuq is-suq u l-użu ta’ prodotti għall-protezzjoni tal-pjanti li jkun fihom ċerti sustanzi attivi [1], kif l-aħħar emendata mid-Direttiva 90/533/KEE [2], u partikularment l-Artikolu 6 tagħha,

Billi l-iżvilupp ta’-għarfien xjentifiku u tekniku joħloq il-bżonn li jsiru ċerti emendi għall-Anness għad-Direttiva 79/117/KEE;

Billi jidher mixtieq li jitħassru d-derogi temporanji li baqgħu mill-projbizzjonijiet stabbiliti fid-Direttiva billi issa huma disponibbli trattamenti anqas perikolużi;

Billi l-Istati Membri kollha infurmaw lill-Kummissjoni li mgħandhomx ħsieb jew li mgħadx għandhom ħsieb li jinqdew minn dawn id-derogi;

Billi l-miżuri pprovduti f’din id-Direttiva huma skond l-opinjoni tal-Kumitat Permanenti fuq is-Saħħa tal-Pjanti,

ADOTTAT DIN ID-DIRETTIVA:

L-Artikolu 1

Fil-Parti A ta’ l-Anness għad-Direttiva 79/117/KEE, "Il-komposti tal-Merkurju", it-test fil-kolonna 2 huwa b’dan imħassar.

L-Artikolu 2

L-Istati Membri għandhom, mhux aktar tard mill-31 ta’ Marzu 1992, iġibu fis-seħħ il-liġijiet, regolamenti u dispożizzjonijiet amministrattivi neċessarji sabiex iħarsu din id-Direttiva. Huma għandhom jinfurmaw lill-Kummissjoni b’ dan immedjatament.

Meta l-Istati Membri jadottaw dawn il-miżuri, dawn għandu jkun fihom referenza għal din id-Direttiva jew ikunu akkompanjati minn din ir-referenza fil-mument tal-pubblikazzjoni uffiċjali tagħhom. Il-proċedura għal din ir-referenza għandha tiġi stabbilita mill-Istati Membri.

L-Artikolu 3

Din id-Direttiva hija indirizzata lill-Istati Membri.

Magħmula fi Brussel, fid-19 ta’ Marzu 1991.

Għall-Kummissjoni

Ray Mac Sharry

Membru tal-Kummissjoni

[1] ĠU L 33, tat-8.2.1979, p. 36.

[2] ĠU L 296, tas-27.10.1990, p. 63.

--------------------------------------------------