31987L0357

Id-Direttiva tal-Kunsill

tal-25 ta' Ġunju 1987

dwar l-approssimazzjoni tal-liġijiet ta' l-Istati Membri dwar prodotti li, minħabba li jidhru li jkunu xi ħaġa oħra milli fil-fatt ikunu, jipperikolaw is-saħħa jew s-sigurtà tal-konsumaturi

(87/357/KEE)

IL-KUNSILL TAL-KOMUNITAJIET EWROPEJ,

Wara li kkunsidra t-Trattat li jistabbilixxi l-Komunità Ekonomika Ewropea, u b'mod partikolari l-Artikolu 100 ta' dan,

Wara li kkunsidra l-proposta mill-Kummissjoni,

Wara li kkunsidra l-opinjoni tal-Parlament Ewropew [1];

Wara li kkunsidra l-opinjoni tal-Kumitat Ekonomiku u Soċjali [2],

Billi f'diversi Stati Membri hemm fis-seħħ dispożizzjonijiet legali jew regolamenti dwar ċerti prodotti li, minħabba li jidhru li huma xi ħaġa oħra minn dak li fil-fatt huma, jipperikolaw is-sigurtà jew is-saħħa tal-konsumaturi; iżda, billi, dawn id-dispożizzjonijiet ma jaqblux fil-kontenut, skop u fil-qasam ta' l-applikazzjoni; billi, b'mod partikolari, dawn id-dispożizzjonijiet f'ċerti Stati Membri jikkonċernaw il-prodotti kollha li jixbhu oġġetti ta' l-ikel waqt li ma jkunux hekk waqt li fi Stati Membri oħra huma jikkonċernaw prodotti li x'aktarx jistgħu jitfixklu ma' oġġetti ta' l-ikel, l-aktar ħelu;

Billi din il-qagħda toħloq fil-Komunità xkiel sinifikanti għall-moviment liberu tal-merkanzija u kondizzjonijiet kompetittivi li mhumiex ugwali mingħajr ma tkun żgurata protezzjoni effettiva għal konsumaturi, b'mod speċjali tfal;

Billi, dawn l-ostakoli għall-istabbiliment u t-tħaddim tas-suq komuni għandhom jitneħħew u għandha tkun żgurata protezzjoni xierqa għal konsumaturi bi qbil mar-riżoluzzjonijiet tal-Kunsill ta' l-14 ta' April 1975 u d-19 ta' Mejju 1981 rispettivament fuq l-ewwel [3] u t-tieni programmi [4] tal-Komunità Ekonomika Ewropea għal protezzjoni tal-konsumatur u politika ta' informazzjoni u r-riżoluzzjoni tal-Kunsill tat-23 ta' Ġunju 1986 dwar spinta ġdida għal politika ta' protezzjoni tal-konsumatur [5];

Billi s-saħħa u s-sigurtà tal-konsumaturi għandu jkollhom livell ekwivalenti ta' protezzjoni fl-Stati Membri differenti;

Billi għal dak il-għan jeħtieġ li jkun projbit il-bejgħ, l-importazzjoni u kemm il-produzzjoni kif ukoll l-esportazzjoni ta' prodotti li, minħabba li jistgħu jitfixklu ma' oġġetti ta' l-ikel, jipperikolaw is-saħħa jew is-sigurtà ta' konsumaturi;

Billi għandha ssir dispożizzjoni għal kontrolli li għandhom isiru mill-awtoritajiet kompetenti ta' l-Istati Membri;

Billi, bi qbil mal-prinċipji inkorporati fir-riżoluzzjonijiet tal-Kunsil dwar protezzjoni tal-konsumatur, il-prodotti perikolużi għandhom ikunu rtirati mis-suq;

Billi għandha ssir dispożizzjoni biex ikun possibbli li jiġu diskussi u eżaminati l-miżuri mittieħda mill-Istati Membri biex jipprojbixxu prodotti bħal dawn jew jiġu rtirati mis-suq, biex tkun żgurata applikazzjoni uniformi mal-Komunità kollha tal-prinċipji inkorporati f'din id-Direttiva; billi eżami u diskussjoni bħal dawn jistgħu jsiru fil-Kumitat Konsultattiv stabbilit skond id-Deċizjoni 84/133/KEE [6];

Billi, minħabba l-ħtieġa li jista' jkun hemm li jitwessa' l-iskop biex jinkludi imitazzjonijiet perikolużi ta' oġġetti ta' l-ikel u biex tevalwa u tirrivedi l-proċeduri stabbiliti f'din id-Direttiva, għandha ssir dispożizzjoni biex il-Kunsill, sentejn wara li l-implimentazzjoni tad-Direttiva u waqt li jkun qiegħed jaġixxi fuq rapport tal-Kummissjoni dwar l-esperjenza miksuba, jiddeċiedi dwar l-aġġustament li jkun jista' jsir għad-dispożizzjonijiet tad-Direttiva,

ADOTTA DIN ID-DIRETTIVA:

Artikolu 1

1. Din id-Direttiva għandha tapplika għall-prodotti, definiti fil-paragrafu 2 hawn taħt, li, waqt li jidhru li huma xi ħaġa oħra milli fil-fatt huma, jipperikolaw is-saħħa u s-sigurtà tal-konsumaturi.

2. Il-prodotti li għalihom jirreferi l-paragrafu 1 hawn fuq huma dawk li, għalkemm ma jkunux oġġetti ta' l-ikel, ikollhom forma, riħa, kulur, dehra, imballaġġ, tikketta, volum jew daqs, li x'aktarx li l-konsumaturi, speċjalment tfal, ifixkluhom ma' oġġetti ta' l-ikel u bħala konsegwenza jqegħduhom f'ħalqhom, jew isoffuhom jew jibilgħuhom, li jistgħu jkunu perikolużi u jikkawżaw, per eżempju, fgar, avvelenament, jew il-perforazzjoni jew xkiel fis-sistema diġestiva.

Artikolu 2

L-Istati Membri għandhom jieħdu l-miżuri kollha meħtieġa biex jipprojbixxu l-bejgħ, l-importazzjoni u jew il-manifattura jew l-esportazzjoni tal-prodotti li għalihom tirreferi din id-Direttiva.

Artikolu 3

L-Istati Membri għandhom b'mod partikolari jiżguraw li jsir l-iċċekkjar fuq prodotti li jkun hemm fis-suq biex jassiguraw li ebda prodott li jaqa' fil-qasam ta' din id-Direttiva ma jkun qed jinbiegħ u jieħdu l-miżuri kollha meħtieġa biex jiżguraw li l-awtoritajiet kompetenti tagħhom jirtiraw jew iġiegħlu li jkun irtirat kull prodott li jaqa' taħt din id-Direttiva.

Artikolu 4

1. Jekk Stat Membru jieħu miżura speċifika skond Artikoli 2 u 3, huwa għandu jinforma lill-Kummissjoni b'dan. Huwa għandu jagħti deskrizzjoni tal-prodott u tar-raġunijiet għad-deċiżjoni tiegħu.

Meta dettalji tal-prodott ikunu diġà mitluba skond id-Deċiżjoni 84/133/KEE, ma tkun tenħtieġ ebda notifika oħra skond din id-Direttiva.

Il-Kummissjoni għandha tibgħat id-dettalji lill-Istati Membri l-oħra ma' l-ewwel opportunità.

2. Il-Kumitat stabbilit bid-Deċiżjoni 84/133/KEE jista' jintalab mill-Kummissjoni jew minn xi Stat Membru li jibda skambju ta' opinjonijiet dwar kwistjonijiet marbuta ma' l-applikazzjoni ta' din id-Direttiva.

Artikolu 5

Sentejn wara d-data li għaliha jirreferi Artikolu 6, fuq il-bażi ta' rapport tal-Kummissjoni dwar l-esperjenza miksuba, li jkollu miegħu proposti xierqa, il-Kunsill għandu jieħu deċiżjoni dwar aġġustament li jista' jsir għal din id-Direttiva, b'mod partikolari bil-ħsieb li jestendi l-iskop tagħha biex jinkludi imitazzjonijiet perikolużi għajr imitazzjonijiet ta' oġġetti ta' l-ikel u kull reviżjoni tal-proċeduri stabbiliti f'Artikolu 4.

Artikolu 6

1. L-Istati Membri għandhom jieħdu l-miżuri meħtieġa mhux aktar tard mis-26 ta' Ġunju 1989 biex iħarsu din id-Direttiva. Huma għandhom jinfurmaw b'dan lill-Kummissjoni fil-pront.

2. L-Istati Membri għandhom jgħaddu lill-Kummissjoni t-test tad-dispożizzjonijiet tal-liġi nazzjonali li jadottaw fil-qasam irregolat minn din id-Direttiva.

Artikolu 7

Din id-Direttiva hija indirizzata lill-Istati Membri.

Magħmula fil-Lussemburgu, fil-25 ta' Ġunju 1987.

Għall-Kunsill

Il-President

H. DE Croo

[1] ĠU C 156, tal-15.6.1987.

[2] ĠU C 150, tad-9.6.1987, p. 1.

[3] ĠU C 92, tal-25.4.1975, p. 1.

[4] ĠU C 133, tat-3.6.1981, p. 1.

[5] ĠU C 167, tat-5.7.1986, p. 1.

[6] ĠU L 70, tat-13.3.1984, p. 16.

--------------------------------------------------