31976L0759

Id-Direttiva tal-Kunsill

tas-27 ta’ Lulju 1976

dwar l-approssimazzjoni tal-liġijiet ta’ l-Istati Membri li għandhom x’jaqsmu mal-fanali indikaturi tad- direzzjoni għall-vetturi bil-mutur u l-karrijiet tagħhom

(76/759/KEE)

IL-KUNSILL TAL-KOMUNITAJIET EWROPEJ,

Wara li kkunsidra t-Trattat li jistabilixxi l-Komunità Ekonomika Ewropea, u b’mod partikolari l-Artikolu 100 tiegħu,

Wara li kkunsidra l-proposta mill-Kumissjoni,

Wara li kkunsidra l-opinjoni tal-Parlament Ewropew [1],

Wara li kkunsidra l-opinjoni tal-Kumitat Ekonomiku u Soċjali [2],

Billi l-ħtiġiet tekniċi li l-vetturi bil-mutur għandhom jissodisfaw skond il-liġijiet nazzjonali għandhom x’jaqsmu inter alia mal-fanali indikaturi tad-direzzjoni tagħhom;

Billi dawk il-ħtiġiet huma differenti minn Stat Membru wieħed għall-ieħor; billi hu għalhekk neċessarju li l-Istati Membri kollha jadottaw l-istess ħtiġiet jew f’addizzjoni ma’ jew minflok ir-regoli eżistenti tagħhom, sabiex, b’mod partikolari, jippermettu li l-proċedura ta’ l-approvazzjoni tat-tip tal-KEE li kienet is-suġġett tad-Direttiva tal-Kunsill 70/156/KEE tas-6 ta’ Frar 1970 dwar l-approssimazzjoni tal-liġijiet ta’ l-Istati Membri li għandhom x’jaqsmu ma’ l-approvazzjoni tat-tip ta’ vetturi bil-mutur u l-karrijiet tagħhom [3], tiġi introdotta fir-rigward ta’ kull tip ta’ vettura;

Billi fid-Direttiva 76/756/KEE [4], il-Kunsill stipula l-ħtiġiet komuni għall-istallazzjoni ta’ ta’ mezzi ta’ dawl u ta’ sinjalazzjoni bid-dawl fuq il-vetturi bil-mutur u l-karrijiet tagħhom;

Billi proċedura ta’ l-approvazzjoni tat-tip armonizzata għall-fanali indikaturi tad-direzzjoni tagħmilha possibbli għal kull Stat Membru li jeżamina l-konformità tiegħu mal-ħtiġiet ta’ kostruzzjoni u ttestjar komuni u li jinforma ’l Istati Membri l-oħrajn bis-sejbiet tiegħu billi jibgħat kopja taċ-ċertifikat ta’ l-approvazzjoni tat-tip ta’ komponent komplet għal kull tip ta’ fanal indikatur tad-direzzjoni; billi t-tqegħid ta’ marka ta’ l-approvazzjoni tat-tip tal-KEE ta’ komponent fuq il-fanali indikaturi tad- direzzjoni kollha fabbrikati skond l-approvazzjoni tat-tip ineħħi l-bżonn għal verifiki tekniċi fuq dawn il-fanali indikaturi tad-direzzjoni fi Stati Membri oħrajn;

Billi hu mixtieq li jittieħed kont tal-ħtiġiet tekniċi adottati mill-Kummissjoni Ekonomika għall-Ewropa tan-NU fir-Regolament tagħha Nru 6 (“Dispożizzjonijiet uniformi għall-approvazzjoni ta’ l-indikaturi tad-direzzjoni għal vetturi bil-mutur (ħlief għall-muturi) u l--karrijiet tagħhom”) [5], li hu fl-anness mal-Ftehim ta’ l-20 ta’ Marzu 1958 li jirrigwarda l-adozzjoni ta’ kondizzjonijiet uniformi għall-approvazzjoni u r-rikonoxximent reċiproku ta’ approvazzjoni għat-tagħmir u l-partijiet tal-vetturi bil-mutur;

Billi l-approssimazzjoni tal-liġijiet nazzjonali li għandhom x’jaqsmu mal-vetturi bil-mutur tinvolvi r-rikonoxximent reċiproku mill-Istati Membri tal-verifiki mwettqa minn kull wieħed minnhom fuq il-bażi tal-ħtiġiet komuni,

ADOTTA DIN ID-DIRETTIVA:

Artikolu 1

1. Kull Stat Membru għandu jagħti l-approvazzjoni tat-tip tal-KEE ta’ komponent għal kwalunkwe tip ta’ fanal indikatur tad-direzzjoni li jissodisfa l-ħtiġijet tal-kostruzzjoni u ttestjar stipulati fl-Anessi 0, I, III, IV u V.

2. L-Istat Membru li jkun ta l-approvazzjoni tat-tip tal-KEE ta’ komponent għandu jieħu l-miżuri meħtieġa sabiex jivverifika li l-mudelli ta’ produzzjoni jikkonformaw mat-tip approvat, sa fejn dan hu neċessarju u jekk meħtieġ f’kooperazzjoni ma’ l-awtoritajiet kompetenti fl-Istati Membri l-oħrajn. Din il-verifika għandha tkun limitata għal tfittxijiet saltwarji.

Artikolu 2

L-Istati Membri għandhom, għal kul tip ta’ fanal indikatur tad-direzzjoni li japprovaw skond l-Artikolu 1, joħorġu lill-manifattur, jew lir-rappreżentant awtorizzat tiegħu, marka ta’ l-approvazzjoni tat-tip tal-KEE ta’ komponent li tikkonforma mal-mudell muri fl-Anness III.

L-Istati Membri għandhom jieħdu l-miżuri xierqa kollha biex jipprevjenu l-użu ta’ marki li x’aktarx jikkrejaw konfużjoni bejn il-fanali indikatur tad-direzzjoni li ġew mogħtija l-approvazzjoni tat-tip skond l-Artikolu 1, u mezzi oħrajn.

Artikolu 3

1. Ebda Stat Membru ma jista’ jipprojbixxi t-tqegħid fis-suq ta’ fanali indikatur tad-direzzjoni għal-raġunijiet li għandhom x’jaqsmu mal-kostruzzjoni jew il-metodu ta’ funzjonament tagħhom jekk ikollhom il-marka ta’ l-approvazzjoni tat-tip tal-KEE ta’ komponent.

2. Madanakollu, Stat Membru jista’ jipprojbixxi t-tqegħid fis-suq ta’ fanali indikatur tad-direzzjoni li jkollhom il-marka ta’ l-approvazzjoni tat-tip tal-KEE ta’ komponent li konsistentement jonqsu li jikkonformaw mat-tip approvat.

Dak l-Istat għandu minnufih jinforma lill-Istati Membri l-oħrajn u lill-Kummissjoni bil-miżuri meħuda, u jispeċifika r-raġunijiet għad-deċiżjoni tiegħu.

Artikolu 4

L-awtoritajiet kompetenti ta’ kull Stat Membru għandhom fi żmien xahar jibagħtu lil-awtoritajiet kompetenti ta’ l-Istati Membri l-oħrajn kopja taċ-ċertifikati ta’ l-approvazzjoni tat-tip ta’ komponent, li eżempju tiegħu hu mogħti fl-Anness II, kompletat għal kull tip ta’ fanal indikatur tad-direzzjoni li huma japprovaw jew jirrifjutaw li japprovaw.

Artikolu 5

1. Jekk l-Istat Membru li ta l-approvazzjoni tat-tip tal-KEE ta’ komponent li numru ta’ fanali indikaturi tad-direzzjoni li jkollhom l-istess marka ta’ l-approvazzjoni tat-tip tal-KEE ta’ komponent ma jikkonformawx mat-tip li hu approva, għandu jieħu l-miżuri neċessarja biex jassigura li l-mudelli tal-produzzjoni jikkonformaw mat-tip approvat. L-awtoritajiet kompetenti ta’ dak l-Istat għandhom javżaw lil dawk ta’ Stati Membri oħrajn bil-miżuri meħuda, li jistgħu, fejn hemm nuqqas konsistenti li jikkonformaw, jestendu sa l-irtirar ta’ l-approvazzjoni tat-tip tal-KEE ta’ komponent. L-awtoritajiet imsemmija għandhom jieħdu l-istess miżuri jekk ikunu informati mill-awtoritajiet kompetenti ta’ Stat Membru ieħor b’dan in-nuqqas li jikkonformaw.

2. L-awtoritajiet kompetenti ta’ l-Istati Membri għandhom fi żmien xahar jinformaw lil xulxin b’xi irtirar tal-marka ta’ l-approvazzjoni tat-tip tal-KEE ta’ komponent, u bir-raġunijiet għal din il-miżura.

Artikolu 6

Kwalunkwe deċiżjoni meħuda skond id-dispożizzjonijiet adottati fl-implimentazzjoni ta’ din id-Direttiva biex tiġi rrifjutata jew irtirata l-approvazzjoni tat-tip ta’ komponent għal fanal indikatur tad-direzzjoni jew biex jiġi pprojibit it-tqegħid tiegħu fis-suq jew l-użu tiegħu għandha tqiegħed fid-dettall ir-raġunijiet li fuqhom hi bbażata. Dawn id-deċiżjonijiet għandhom jiġu nnotifikati lill-parti konċernata, li fl-istess ħin għandu jkun informat bir-rimedji disponibbli lilu skond il-liġijiet fis-seħħ fl-Istati Membri u bil-limiti ta’ żmien permessi għall-eżerċizzju ta’ dawn ir-rimedji.

Artikolu 7

Ebda Stat Membru ma jista’ jirrifjuta li jagħti l-approvazzjoni tat-tip tal-KEE jew l-approvazzjoni tat-tip nazzjonali ta’ vettura għal raġunijiet li għandhom x’jaqsmu mal-fanali indikatur tad-direzzjoni tagħha jekk dawn ikollhom il-marka ta’ l-approvazzjoni tat-tip tal-KEE ta’ komponent u huma mwaħħla skond il-ħtiġiet stabbiliti fid-Direttiva 76/756/KEE.

Artikolu 8

Ebda Stat Membru ma jista’ jirrifjuta jew jipprojibixxi l-bejgħ, ir-reġistrazzjoni, id-dħul fis-servizz jew l-użu ta’ xi vettura għal raġunijiet li għandhom x’jaqsmu mal-fanali indikaturi tad-direzzjoni tagħha jekk dawn ikollhom il-marka ta’ l-approvazzjoni tat-tip tal-KEE ta’ komponent u huma mwaħħla skond il-ħtiġiet stabbiliti fid-Direttiva 76/756/KEE.

Artikolu 9

Għall-iskopijiet ta’ din id-Direttiva, “vettura” tfisser kwalunkwe vettura bil-mutur maħsuba għall-użu fuq it-triq, bil-karozzerija jew mingħajrha, li jkollha mill-inqas erba’ roti u veloċità massima ddisinjata li taqbeż il-25km/siegħa, u l-karrijiet tagħha, ħlief għal vetturi li jimxu fuq il-linji, it-tratturi u makkinarju għall-agrikoltura u vetturi tax-xogħlijiet pubbliċi.

Artikolu 10

Kwalunkwe emendi neċessarji biex jaġġustaw il-ħtiġiet ta’ l-Annessi sabiex jieħdu kont tal-progress tekniku għandhom jiġu adottati skond il-proċedura stabbilita fl-Artikolu 13 tad-Direttiva 70/156/KEE.

Artikolu 11

1. L-Istati Membri għandhom jadottaw u jippubblikaw id-dispożizzjonijiet neċessarji sabiex jikkonformaw ma’ din di-Direttiva qabel l-1 ta’ Lulju 1977 u għandhom minnufih jinformaw lill-Kummissjoni b’dan. Għandhom japplikaw dawn id-dispożizzjonijiet mill-1 ta’ Ottubru 1977 fl-iktar tard.

2. Ladarba din id-Direttiva tkun ġiet notifikata, l-Istati Membri għandhom ukoll jassiguraw li l-Kummissjoni hi informata, fi żmien suffiċjenti għaliha biex tissottometti l-kummenti tagħha, b’ abbozzi ta’ liġijiet, regolamenti jew dispożizzjonijiet amminsitrattivi li huma jipproponu li jadottaw fis-settur kopert minn din id-Direttiva.

Artikolu 12

Din id-Direttiva hi indirizzata lill-Istati Membri.

Magħmula fi Brussel, fis-27 ta’ Lulju 1976.

F’isem il-Kunsill

Il-President

M. Van Der Stoel

[1] ĠU C 28, tas-17.2.1967, p. 458/67.<0Ħ

[2] ĠU C 224, tal-5.12.1966, p. 3802/66.<0Ħ

[3] ĠU L 42, tat-23.2.1970, p.1.

[4] ĠU L 262, tas- 27.9.76, p. 1

[5] Il-Kummissjoni Ekonomika għall-Ewropa, Dokument E/ECE/324, Addendum 5 tat-22 ta’ Mejju 1967

--------------------------------------------------

Lista ta’ l-Annessi

L-Anness 0 | - Definizzjoni, speċifikazzjonijiet ġenerali, l-intensità tad-dawl mitfugħ, il -proċedura tat-test, l-kulur tad-dawl mitfugħ, il-konformità tal-produzzjoni |

L-Anness I | - Kategoriji ta’ fanali indikaturi tad-direzzjoni: angoli minimi meħtieġa għad-distribuzzjoni tad-dawl fl-ispazju |

L-Anness II | - Mudell taċ-ċertifikat ta’ approvazzjoni tat-tip tal-KEE ta’ komponent |

L-Anness III | - Ħtieġiet ta’ l-approvazzjoni tat-tip ta’ komponent KEE u l-immarkar Appendiċi: Eżempju ta’ marka ta’ l-approvazzjoni ta’ tip tal-KEE ta’ komponent |

L-Anness IV | - Kejl fotometriku |

L-Anness V | - Il-Kulur tad-dawl mitfugħ, il-koordinati trikromatiċi |

--------------------------------------------------