Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32021O2322

    Linja Gwida (UE) 2021/2322 tal-Bank Ċentrali Ewropew tas-17 ta’ Diċembru 2021 li temenda l-Linja Gwida (UE) 2015/280 dwar l-istabbiliment ta' Sistema ta' Produzzjoni u Akkwisti tal-Eurosistema (BĊE/2021/56)

    ECB/2021/56

    ĠU L 467, 29.12.2021, p. 3–5 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

    Legal status of the document In force

    ELI: http://data.europa.eu/eli/guideline/2021/2322/oj

    29.12.2021   

    MT

    Il-Ġurnal Uffiċjali tal-Unjoni Ewropea

    L 467/3

    LINJA GWIDA (UE) 2021/2322 TAL-BANK ĊENTRALI EWROPEW

    tas-17 ta’ Diċembru 2021

    li temenda l-Linja Gwida (UE) 2015/280 dwar l-istabbiliment ta' Sistema ta' Produzzjoni u Akkwisti tal-Eurosistema (BĊE/2021/56)

    IL-KUNSILL GOVERNATTIV TAL-BANK ĊENTRALI EWROPEW,

    Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-Artikolu 128(1) tiegħu,

    Wara li kkunsidra l-Istatut tas-Sistema Ewropea tal-Banek Ċentrali u tal-Bank Ċentrali Ewropew, u partikolarment l-Artikoli 12.1 u 14.3 u l-Artikolu 16 tiegħu,

    Billi:

    (1)

    Il-Linja Gwida (UE) 2015/280 tal-Bank Ċentrali Ewropew (BĊE/2014/44) (1) tipprevedi għal prinċipju ta’ distakk li jirrikjedi arranġamenti interni effettivi li jiżguraw separazzjoni sħiħa bejn stamperija pubblika u l-kontijiet ta’ awtorità pubblika tagħha u r-rimborż minn stamperija pubblika tal-ispejjeż tal-appoġġ amministrattiv u organizzattiv kollu li tirċievi mill-awtorità pubblika tagħha. Huwa meħtieġ li jiġu speċifikati aktar ir-rekwiżiti rigward il-prinċipju ta’ distakk biex jiġi żgurat li stamperija pubblika trid turi li implimentat il-prinċipju qabel ma ħadet sehem fi proċedura ta’ sejħa għall-offerti ta’ grupp ta’ banek ċentrali nazzjonali (BĊN) li joħroġ sejħiet għal offerti.

    (2)

    L-Artikolu 8(1)(b) tal-Linja Gwida (UE) 2015/280 (BĊE/2014/44) jippermetti lill-BĊNi tal-grupp bi stamperiji interni jistabbilixxu kooperazzjoni orizzontali mhux istituzzjonalizzata biex b’mod konġunt iwettqu kompiti pubbliċi. BĊN li jagħlaq l-istamperiji tiegħu jista’ jibqa’ fil-grupp intern billi jipparteċipa f’kooperazzjoni orizzontali bħal din, sakemm jissodisfa r-rekwiżiti rilevanti. Bħala tali, BĊN li jagħlaq l-istamperija tiegħu jista' jagħżel bejn li jsir parti mill-grupp li joħroġ is-sejħa għall-offerti fi ħdan it-tifsira tal-Artikolu 3 tal-Linja Gwida (UE) 2015/280 (BĊE/2014/44) jew li jipparteċipa f'kooperazzjoni orizzontali. Sabiex tiġi ffaċilitata t-tranżizzjoni għall-BĊNi li jagħlqu l-istamperiji tagħhom, dawn il-BĊNi għandhom jitħallew jiċċaqilqu bejn iż-żewġ opzjonijiet disponibbli (“mudell b’żewġ pilastri”) għal perjodu tranżitorju ta’ ħames snin qabel ma tittieħed deċiżjoni finali. Sabiex jiġi żgurat it-trattament ugwali tal-BĊNi, BĊN tal-grupp bi stamperiji interni li għalaq l-istamperiji tiegħu għandu wkoll jitħalla jiċċaqlaq bejn iż-żewġ opzjonijiet disponibbli matul perjodu tranżitorju ta’ ħames snin, sakemm il-BĊN kien innotifikat bir-revoka tal-akkreditazzjoni tal-istamperija interna tiegħu wara l-1 ta’ Novembru 2019. Il-perjodu tranżitorju għandu jibda b’mod retroattiv mid-data ta’ din in-notifika.

    (3)

    Sabiex tiġi ffaċilitata l-parteċipazzjoni fil-kooperazzjoni bejn il-BĊNi tal-grupp bi stamperiji interni, il-BĊNi mill-Istati Membri li se jissieħbu fiż-żona tal-euro fil-futur għandhom jitħallew jagħżlu bejn li jsiru parti mill-grupp li joħroġ is-sejħa għall-offerti skont it-tifsira tal-Artikolu 3 tal-Linja Gwida (UE) 2015/280 (BĊE/2014/44) jew li jipparteċipaw f’kooperazzjoni orizzontali.

    (4)

    F’sitwazzjonijiet ta’ emerġenza, li għandhom jiġu definiti mill-Kunsill Governattiv, tista’ tingħata aktar flessibbiltà fl-implimentazzjoni tal-mudell b’żewġ pilastri.

    (5)

    Għaldaqstant, il-Linja Gwida (UE) 2015/280 (BĊE/2014/44) għandha tiġi emendata kif xieraq,

    ADOTTA DIN IL-LINJA GWIDA:

    Artikolu 1

    Emendi

    Il-Linja Gwida (UE) 2015/280 (BĊE/2014/44) hija emendata kif ġej:

    1.

    fl-Artikolu 1, il-punt (1) huwa ssostitwit b’dan li ġej:

    “(1)

    “prinċipju ta’ distakk” ifisser arranġamenti interni effettivi li jiżguraw separazzjoni sħiħa bejn stamperija pubblika u l-kontijiet ta’ awtorità pubblika tagħha u r-rimborż minn stamperija pubblika tal-ispejjeż tal-appoġġ amministrattiv u organizzattiv kollha li tirċievi mill-awtorità pubblika tagħha;”;

    2.

    fl-Artikolu 4, il-paragrafu 3 huwa ssostitwit b’dan li ġej:

    “3.   Il-grupp ta’ BĊNi li joħorġu sejħiet għall-offerti għandhom jiddikjaraw fid-dokumentazzjoni tas-sejħa għall-offerti li sabiex ikunu eliġibbli għal kwalunkwe sejħa għall-offerti, l-istamperiji pubbliċi jridu jkunu implimentaw il-prinċipju ta’ distakk qabel ma jitfgħu offerta. Sabiex tiġi żgurata kompetizzjoni ġusta meta l-istamperiji pubbliċi jkunu qed jirrispondu għal sejħa għall-offerti, dan il-kriterju ta’ eliġibbiltà għandu jirrikjedi li:

    (a)

    l-attivitajiet ta’ stampar tal-karti tal-flus tal-euro huma kompletament separati finanzjarjament mill-attivitajiet l-oħra tal-istamperija pubblika;

    (b)

    ma tingħata l-ebda għajnuna mill-istat diretta jew indiretta lill-istamperija pubblika li b’xi mod tkun inkompatibbli mat-Trattat;

    (c)

    l-istamperiji pubbliċi huma responsabbli għall-implimentazzjoni ta’ struttura organizzattiva xierqa u sistema ta’ kontabilità tal-ispejjeż li tiżgura allokazzjoni ċara tal-ispejjeż u separazzjoni finanzjarja sħiħa bejn l-attivitajiet tal-istampar tal-karti tal-flus tal-euro u attivitajiet oħra;

    (d)

    l-ispejjeż kollha għall-produzzjoni tal-karti tal-flus tal-euro, inklużi l-ispejjeż imġarrba għall-appoġġ amministrattiv u organizzattiv għall-produzzjoni tal-karti tal-flus tal-euro huma allokati lill-istamperiji pubbliċi;

    (e)

    l-allokazzjoni tal-ispejjeż imġarrba trid tkun traċċabbli u applikata b’mod konsistenti u akkumpanjata minn dokumentazzjoni ta’ sostenn tal-allokazzjoni tal-ispejjeż; u

    (f)

    is-separazzjoni finanzjarja tiġi vverifikata u ċċertifikata kull sena minn awditur estern indipendenti u tiġi rrapportata lill-BĊN li joħroġ sejħiet għall-offerti, li għandu jipprovdi kopja tad-dikjarazzjoni tal-awditur għal kull sena kalendarja lill-BĊE.”;

    3.

    l-Artikolu 6 huwa emendat kif ġej:

    (a)

    il-paragrafu 3 huwa mibdul b'dan li ġej:

    “3.   Mingħajr preġudizzju għal-leġiżlazzjoni applikabbli tal-Unjoni u nazzjonali dwar l-akkwist pubbliku, BĊN li jagħlaq l-istamperiji interni tiegħu jista’ jiddeċiedi li jsir parti mill-grupp li joħroġ sejħiet għall-offerti skont it-tifsira tal-Artikolu 3 jew jipparteċipa f’kooperazzjoni orizzontali abbażi ta’ ftehim ta’ kooperazzjoni skont it-tifsira tal-Artikolu 8.

    Għal perjodu tranżitorju ta’ ħames snin li jibda mid-data li fiha l-BĊN tal-grupp bi stamperiji interni jiġi nnotifikat bir-revoka tal-akkreditazzjoni tal-istamperiji interni tiegħu, il-BĊN li jagħlaq l-istamperiji tiegħu jista’ jaqleb bejn il-parteċipazzjoni fil-grupp bi stamperiji interni jew fil-grupp li joħroġ sejħiet għall-offerti qabel ma jieħu deċiżjoni finali, sakemm ir-rekwiżiti legali rispettivi jiġu ssodisfatti.

    It-tieni subparagrafu għandu japplika wkoll fil-każ ta’ BĊN li jkun diġà għalaq l-istamperiji tiegħu, iżda li l-BĊN ġie innotifikat dwar ir-revoka tal-akkreditazzjoni tal-istamperija interna tiegħu wara l-1 ta’ Novembru 2019. Il-perjodu tranżitorju għandu jibda b’mod retroattiv mid-data ta’ din in-notifika.”;

    (b)

    il-paragrafi 4 u 5 li ġejjin huma miżjuda:

    “4.   Mingħajr preġudizzju għal-leġiżlazzjoni applikabbli tal-Unjoni u nazzjonali dwar l-akkwist pubbliku, BĊN minn Stat Membru li fil-futur se jissieħeb fiż-żona tal-euro jista’ jagħżel bejn li jsir parti mill-grupp li joħroġ is-sejħiet għall-offerti skont it-tifsira tal-Artikolu 3 jew li jipparteċipa f’kooperazzjoni orizzontali fuq il-bażi ta’ ftehim ta’ kooperazzjoni skont it-tifsira tal-Artikolu 8, sakemm ftehim ta’ kooperazzjoni skont it-tifsira tal-Artikolu 8(2)(b) ikun fis-seħħ mill-ewwel allokazzjoni tal-karti tal-flus tal-euro.

    5.   Mingħajr preġudizzju għal-leġiżlazzjoni applikabbli tal-Unjoni u dik nazzjonali dwar l-akkwist pubbliku, il-Kunsill Governattiv jista’, f’sitwazzjonijiet ta’ emerġenza u fuq bażi ta’ każ b’każ, jiddeċiedi dwar devjazzjonijiet mill-mudell b’żewġ pilastri stabbilit fl-Artikolu 6.”.

    Artikolu 2

    Dħul fis-seħħ

    Din il-Linja Gwida għandha tidħol fis-seħħ fil-jum tan-notifika tagħha lill-banek ċentrali nazzjonali tal-Istati Membri li l-munita tagħhom hija l-euro.

    Artikolu 3

    Destinatarji

    Din il-Linja Gwida hija indirizzata lill-banek ċentrali kollha tal-Eurosistema.

    Magħmul fi Frankfurt am Main, is-17 ta’ Diċembru 2021.

    Għall-Kunsill Governattiv tal-BĊE

    Il-President tal-BĊE

    Christine LAGARDE

    (1)  Linja Gwida (UE) 2015/280 tal-Bank Ċentrali Ewropew tat-13 ta' Novembru 2014 dwar l-istabbiliment tas-Sistema ta' Produzzjoni u Akkwisti tal-Eurosistema (BĊE/2014/44) (ĠU L 47, 20.2.2015, p. 29).

    Top