Kawża T‑712/14

Confédération européenne des associations d’horlogers-réparateurs (CEAHR)

vs

Il-Kummissjoni Ewropea

“Kompetizzjoni – Akkordji – Abbuż ta’ pożizzjoni dominanti – Sistema ta’ tiswija selettiva – Rifjut ta’ manifatturi tal-arloġġi Svizzeri sabiex jipprovdu partijiet ta’ bdil lill-arluġġara indipendenti – Suq primarju u suq ta’ wara l-bejgħ – Eliminazzjoni ta’ kull kompetizzjoni effettiva – Deċiżjoni ta’ ċaħda ta’ lment”

Sommarju – Sentenza tal-Qorti Ġenerali (It-Tieni Awla) tat-23 ta’ Ottubru 2017

1. Kompetizzjoni – Proċedura amministrattiva – Eżami tal-ilmenti – Iffissar tal-prijoritajiet mill-Kummissjoni – Obbligu tal-Kummissjoni li tiddeċiedi permezz ta’ deċiżjoni dwar l-eżistenza ta’ ksur – Assenza – Teħid inkunsiderazzjoni tal-interess tal-Unjoni marbut mal-istruzzjoni ta’ kawża – Setgħa diskrezzjonali tal-Kummissjoni – Limiti – Stħarriġ ġudizzjarju – Portata

   (Artikoli 101 TFUE, 102 TFUE u 105(1) TFUE; Regolament tal-Kummissjoni Nru 773/2004, Artikoli 7(2))

2. Akkordji – Effett ħażin fuq il-kompetizzjoni – Sistema ta’ tiswija selettiva – Ammissibbiltà – Kundizzjonijiet – Applikazzjoni b’analoġija tal-kundizzjonijiet applikabbli għas-sistemi ta’ distribuzzjoni selettiva

   (Artikolu 101(1) TFUE)

3. Akkordji – Effett ħażin fuq il-kompetizzjoni – Sistema ta’ tiswija selettiva – Ammissibbiltà – Kundizzjonijiet – Ġustifikazzjoni oġġettiva – Preżervazzjoni tal-kwalità tal-prodotti kkonċernati u tal-użu tajjeb tagħhom

   (Artikolu 101(1) TFUE)

4. Akkordji – Effett ħażin fuq il-kompetizzjoni – Sistema ta’ tiswija selettiva – Ammissibbiltà – Kundizzjonijiet – Natura proporzjonali tal-imsemmija sistema

   (Artikolu 101(1) TFUE)

5. Pożizzjoni dominanti – Abbuż – Rifjut ta’ impriża f’pożizzjoni dominanti li tħalli li impriża oħra taċċedi għal prodott jew għal servizz neċessarju għall-atività tagħha – Sistema ta’ tiswija selettiva tal-arloġġi – Assenza ta’ riskju ta’ tneħħija ta’ kwalunkwe kompetizzjoni effettiva – Assenza ta’ abbuż

   (Artikolu 102 TFUE)

6. Kompetizzjoni – Proċedura amministrattiva – Eżami tal-ilmenti – Ilment li jakkuża l-eżistenza ta’ ftehim jew prattika miftiehma u li jallega abbuż ta' pożizzjoni dominanti – Setgħa diskrezzjonali tal-Kummissjoni – Eżami tal-eżistenza ta’ abbuż ta’ pożizzjoni dominanti – Teħid inkunsiderazzjoni tal-legalità tal-aġir ikkritikat skont l-Artikolu 101 TFUE Ammissibbiltà

   (Artikoli 101 TFUE u 102 TFUE)

7. Pożizzjoni dominanti – Abbuż – Kunċett – Grad ta’ saħħa fis-suq ta’ impriża li għandha pożizzjoni dominanti – Assenza ta’ rilevanza

   (Artikolu 102 TFUE)

8. Akkordji – Prattika miftiehma – Kunċett – Sistema ta’ tiswija selettiva – Rifjut ta’ provvista ta’ prodotti meħtieġa għall-attività ta’ impriża oħra – Adozzjoni progressiva ta’ deċiżjonijiet ta’ rifjut ta’ provvista – Assenza ta’ akkordju

   (Artikolu 101(1) TFUE)

9. Kompetizzjoni – Proċedura amministrattiva – Eżami tal-ilmenti – Obbligu ta’ motivazzjoni tad-deċiżjoni li ma tittiħidx azzjoni – Portata

   (Artikoli 101 TFUE u 102 TFUE)

10. Proċedura ġudizzjarja – Rikors promotur – Rekwiżiti formali – Espożizzjoni sommarja tal-motivi invokati

    (Regoli tal-Proċedura tal-Qorti Ġenerali, Artikolu 44(1)(c))

1.  Ara t-test tad-deċiżjoni.

   (ara l-punti 33-41)

2.  Il-kundizzjonijiet li jippermettu li tiġi ddeterminata l-konformità ta’ sistema ta’ distribuzzjoni selettiva mal-Artikolu 101 TFUE jistgħu wkoll jintużaw sabiex jiġi evalwat jekk sistema ta’ tiswija selettiva, li taqa’ taħt is-servizz ta’ wara l-bejgħ, tipproduċix effetti ta’ ħsara għall-kompetizzjoni. Is-sistemi ta’ tiswija selettiva huma għaldaqstant konformi mal-Artikolu 101(1) TFUE sakemm dawn ikunu oġġettivament iġġustifikati, proporzjonati u mhux diskriminatorji.

   L-organizzazzjoni ta’ netwerk ta’ distribuzzjoni ma taqax, konsegwentement, fil-projbizzjoni tal-Artikolu 101(1) TFUE, sakemm l-għażla tal-bejjiegħa sseħħ abbażi tal-kriterji oġġettivi ta’ natura kwalitattiva, stabbiliti b’mod uniformi fir-rigward tal-bejjiegħa kollha potenzjali u applikati b’mod mhux diskriminatorju, li l-karatteristiċi tal-prodott inkwistjoni jeħtieġu, sabiex tiġi ppreżervata l-kwalità u jiġi żgurat l-użu tajjeb, tali netwerk u fl-aħħar nett, li l-kriterji ddefiniti ma jmorrux lil hinn minn dak li huwa neċessarju.

   Għall-kuntrarju ma jirriżultax li huwa neċessarju li jiġi vverifikat li dawn in-netwerks ma għandhomx bħala effett li jeliminaw kull kompetizzjoni. Fil-fatt, jekk il-kundizzjonijiet imfakkra iktar ’il fuq huma ssodisfatti, dan ikun suffiċjenti sabiex jiġi kkunsidrat li sistema selettiva hija element ta’ kompetizzjoni konformi mal-Artikolu 101(1) TFUE.

   (ara l-punti 50, 53-55)

3.  Għalkemm il-preżervazzjoni tal-immaġini ta’ marka ma tiġġustifikax restrizzjoni tal-kompetizzjoni mill-implementazzjoni ta’ sistema ta’ tiswija selettiva, l-għan ta’ preżervazzjoni tal-kwalità tal-prodotti u tal-użu tajjeb tagħhom jista’, huwa biss, jiġġustifika tali restrizzjoni.

   (ara l-punt 66)

4.  Ara t-test tad-deċiżjoni.

   (ara l-punti 75-80)

5.  Ara t-test tad-deċiżjoni.

   (ara l-punti 87-91, 106-112)

6.  L-applikabbiltà għal ftehim tal-Artikolu 101 TFUE ma tippreġudikax l-applikabbiltà tal-Artikolu 102 TFUE għall-aġir tal-partijiet ta’ dan l-istess ftehim, sakemm il-kundizzjonijiet ta’ applikazzjoni ta’ kull dispożizzjoni huma ssodisfatti. Il-fatt li l-operaturi suġġetti għal kompetizzjoni effettiva għandhom prattika awtorizzata abbażi tal-Artikolu 101 TFUE ma jimplikax, konsegwentement, li l-adozzjoni ta’ din l-istess prattika minn impriża f’pożizzjoni dominanti ma tista’ qatt tikkostitwixxi abbuż ta’ din il-pożizzjoni. Għaldaqstant, il-konstatazzjoni tal-legalità ta’ aġir abbażi tal-Artikolu 101 TFUE ma timplikax, bħala prinċipju, li għandu jiġi kkonstatat li dan l-aġir huwa legali abbażi tal-Artikolu 102 TFUE, iżda, minħabba din ir-raġuni, għandu jiġi vverifikat jekk il-kundizzjonijiet ta’ applikazzjoni ta’ din id-dispożizzjoni tal-aħħar humiex issodisfatti.

   Madankollu, peress li ma huwiex ikkunsidrat bħala element ta’ kompetizzjoni minħabba l-osservanza ta’ ċerti kundizzjonijiet, sistema ta’ tiswija selettiva tal-arloġġi ma taqax fl-Artikolu 101(1) TFUE, il-Kummissjoni, fil-kuntest tal-eżerċizzju tas-setgħa diskrezzjonali wiesgħa li hija għandha fil-kuntest ta’ ilment li jikkritika l-eżistenza ta’ ftehim jew ta’ prattika miftehma u li jikkonferma abbuż ta’ pożizzjoni dominati li jirriżulta mill-imsemmija sistema ta’ tiswija selettiva, tista’ tikkunsidra li l-konformità ta’ tali sistema mal-Artikolu 101(1) TFUE tikkostitwixxi indizju li jista’ jistabbilixxi, flimkien ma’ elementi oħra, li ma tantx kien probabbli li kellu bħala effett li jelimina kull kompetizzjoni fis-sens tal-ġurisprudenza dwar l-Artikolu 102 TFUE.

   (ara l-punti 94, 96)

7.  Ara t-test tad-deċiżjoni.

   (ara l-punti 121-123)

8.  L-adozzjoni progressiva ta’ deċiżjonijiet ta’ rifjut ta’ provvista, meta jinfirxu fuq perijodu ta’ żmien twil bħal fil-kawża preżenti, tippermetti li jiġi kkunsidrat li dawn id-deċiżjonijiet ma humiex ir-riżultat ta’ akkordju, iżda ta’ deċiżjonijiet kummerċjali indipendenti.

   (ara l-punt 127)

9.  Ara t-test tad-deċiżjoni.

   (ara l-punti 135-137)

10.  Ara t-test tad-deċiżjoni.

    (ara l-punti 139, 140)