Il-proteini tal-ħalib sikuri għall-konsum mill-bniedem

PUNTI EWLENIN

Il-kaseina, flimkien max-xorrox, hija waħda mill-proteini ewlenin fil-ħalib. Hija tintuża fil-produzzjoni tal-ġobon, bħala aġent li jirfina sabiex jiċċara l-inbid u bħala suppliment tad-dieta. Il-kaseini koperti fid-direttiva huma:

• kaseina aċiduża li tittiekel: din tinkiseb bil-ħasil u t-tnixxif ta’ solidi magħmula minn ħalib xkumat wara proċess ta’ separazzjoni bl-aċidu;
• kaseina ta’ tames li tittiekel: din tinkiseb bil-ħasil u t-tnixxif ta’ solidi magħmula minn ħalib xkumat wara proċess ta’ separazzjoni li juża t-tames, sustanza naturali li jipproduċiha l-istonku tal-ifrat;
• kaseinata li tittiekel: din tinkiseb wara li jiżdied aġent li jinnewtralizza fil-kaseina (li jbiddel il-livell ta’ aċidità), segwit minn tnixxif. L-idrossidu tal-potassju huwa aġent bħal dan u jintuża sabiex jagħmel il-proteina aktar solubbli sabiex tiċċara l-inbid.

Tikkettar

L-isem tal-prodott tal-ħalib (kaseina jew kaseinata) għandu jiġi mmarkat fuq l-imballaġġ kollu. Fil-każ ta’ taħlitiet, għandu jintuża l-kliem li ġej: “taħlita ta’ …”, segwit minn lista ta’ prodotti f’ordni li tonqos skont il-piż.

Għal kaseinati li jittieklu, għandu jingħata l-isem tal-aġent li jinnewtralizza jew ta’ aġent ieħor li jintuża.

It-tikketta għandha tiddikjara wkoll:

• il-kontenut ta’ proteini tat-taħlitiet li jkun fihom kaseinati li jittieklu;
• il-piż nett;
• l-isem u l-indirizz tan-negozju fil-qasam tal-ikel jew tal-importatur, jekk il-prodott ikun ġej minn barra l-UE;
• il-pajjiż tal-oriġini jekk barra mill-UE;
• l-identifikazzjoni tal-lott tal-prodotti jew id-data tal-produzzjoni.

B’mod alternattiv, din l-informazzjoni tista’ tiġi elenkata f’dokument li jakkumpanja.

Pajjiż tal-UE għandu jipprojbixxi l-bejgħ ta’ dawn il-prodotti magħmula mill-ħalib jekk ma jkunux immarkati fuq tikketti b’lingwa li tinftiehem faċilment mix-xerrejja f’dak il-pajjiż.

Standards

L-annessi għad-direttiva jistabbilixxu standards għall-kaseini u l-kaseinati, bħall-perċentwal minimu ta’ proteini. Jekk il-kontenut minimu ta’ proteini fil-ħalib jinqabeż, dan jista’ jiġi mmarkat fuq l-imballaġġ. L-annessi jelenkaw ukoll is-sustanzi u l-addittivi permessi fl-ipproċessar tal-kaseini, inklużi aġenti li jintużaw fil-produzzjoni tal-kaseinati.

Revoka

Id-direttiva tħassar id-Direttiva 83/417/KEE b’effett mit-22 ta’ Diċembru 2016.