Il-kontroll ta’ konċentrazzjonijiet bejn kumpaniji

PUNTI EWLENIN

Dan ir-regolament japplika għall-konċentrazzjonijiet kollha b’dimensjoni tal-UE². Bħala regola ġenerali, il-parti jew partijiet li jiksbu kontroll wara l-konċentrazzjoni għandhom jinnotifikaw lill-Kummissjoni Ewropea qabel l-implimentazzjoni tagħha.

Proċeduri ta’ referenza ta’ notifika minn qabel

• Ir-regolament jispeċifika li l-impriżi jew persuni kkonċernati jistgħu jinfurmaw lill-Kummissjoni, permezz ta’ sottomissjoni raġunata mibgħuta qabel in-notifika, li t-tranżazzjoni proposta, waqt li tirriżulta f’konċentrazzjoni b’dimensjoni tal-UE, taffettwa l-kompetizzjoni fis-suq ta’ xi Stat Membru tal-UE li tippreżenta l-karatteristċi kollha ta’ suq distint u li titlob li din it-tranżazzjoni tkun referuta lill-Istat Membru kkonċernat.
• Jekk l-Istat Membru tal-UE in kwistjoni ma jaqbilx mal-applikazzjoni biex jirreferi l-każ fi żmien 15-il jum ta’ xogħol minn meta jirċievi s-sottomissjoni, il-Kummissjoni għandha 25 jum ta’ xogħol minn meta tirċievi s-sottomissjoni biex tirreferi l-każ kollu jew parti minnu lill-awtoritajiet kompetenti ta’ dak l-Istat Membru tal-UE sabiex dak l-Istat Membru ikun jista’ japplika l-liġi nazzjonali tiegħu dwar il-kompetizzjoni.
• L-istess proċedura tapplika għal tranżazzjonijiet li ma jkollhomx dimensjoni tal-UE imma li jkunu kapaċi li jkunu rieżaminati taħt il-liġijiet nazzjonali dwar il-kompetizzjoni ta’ tliet Stati Membri jew iktar. Il-partijiet għat-tali tranżazzjonijiet jistgħu jitolbu li l-konċentrazzjoni minflok tkun eżaminata mill-Kummissjoni.

Proċedimenti tal-kontroll tal-fużjonijiet: il-Kummissjoni

Ladarba tirċievi notifika, il-Kummissjoni teżamina n-notifika (Fażi I) u tiddetermina b’deċiżjoni jekk il-konċentrazzjoni:

• taqax fi ħdan l-iskop tar-regolament;
• hix kompatibbli mas-suq komuni; jew
• tqajjimx dubji serji dwar il-kompatibbiltà tagħha u tirrikjedix rieżami profond tal-konċentrazzjoni (Fażi II).

Ħlief f’ċirkostanzi veri speċifiċi jew jekk espressament mifthiem mal-Kummissjoni bbażati fuq il-kundizzjonijiet stabbiliti fir-regolament dwar il-fużjoni, konċentrazzjoni ma’ dimensjoni tal-UE ma tistax tkun implimentata qabel notifika jew sakemm tkun iddikarata kompatibbli mas-suq komuni. Jekk konċentrazzjoni tkun diġà implimentata u tkun sussegwentement iddikjarata mhux kompatibbli mas-suq komuni, il-Kummissjoni tista’ tordna lil-kumpaniji in kwistjoni biex ixolju l-konċentrazzjoni jew biex jreġġgħu lura s-sitwazzjoni għal kif kienet qabel l-implimentazzjoni tal-konċentrazzjoni.

Il-Kummissjoni tista’ wkoll tikkonnettja ma’ deċiżjoni ta’ kompatibbiltà (maħruġa fit-tmiem ta’ investigazzjoni ta’ Fażi I jew ta’ Fażi II) kundizzjonijiet u obbligi maħsuba biex jassikuraw li l-impriżi kkonċernati jikkonformaw mal-impenji li jkunu daħlu għalihom fir-rigward tal-Kummissjoni, bil-ħsieb li jagħmlu l-konċentrazzjoni kompatibbli mas-suq komuni.

Biex tinforza l-konformità ma’ dan ir-Regolament, il-Kummissjoni tista’ timponi:

• multi li ma jeċċedux il-1% tal-fatturat aggregat tal-impriża jekk tipprovdi informazzjoni mhux korretta, mhux kompluta jew qarrieqa jew jekk ma tipprovdix informazzjoni fi żmien l-iskadenza meħtieġa;
• multi ta’ sa 10% tal-fatturat aggregat tal-impriża kkonċernata jekk, sew intenzjonalment jew b’neggliġenza, tonqos milli tinforma lill-Kummissjoni dwar konċentrazzjoni qabel l-implimentazzjoni tagħha, timplimenta konċentrazzjoni bi ksur tar-regolament jew tonqos li tikkonforma ma’ deċiżjoni tal-Kummissjoni; jew
• ħlas perjodiku bħala penali li ma jeċċedix 5% tal-fatturat aggregat medju tal-kumpanija għal kull jum ta’ ħidma ta’ dewmien, ikkalkulat mid-data ssettjata mill-Kummissjoni f’kull deċiżjoni li tirrekjedi informazzjoni, tordna spezzjonijiet, eċċ.

Il-Kummissjoni trid tikkonsulta kummissjoni konsultattiva magħmula minn rappreżentanti tal-awtoritajiet tal-Istati Membri qabel ma tieħu kull deċiżjoni f’Fażi II relatata mal-kumpatibbiltà jew nuqqas ta’ kumpatibbiltà jew kull deċiżjoni dwar l-impożizzjoni ta’ multi jew ħlas perjodiku bħala penali. Il-Qorti tal-Ġustizzja tal-Unjoni Ewropea tista’ tabolixxi, tnaqqas jew iżżid kwalunkwe multa jew ħlas ta’ penali perjodiku imposti.

Proċeduri ta’ referenza ta’ notifika ta’ wara

• Stat Membru jista’, fi 15-il jum ta’ ħidma mid-data li jirċievi kopja tan-notifika, fuq inizjattiva tiegħu stess jew fuq talba mill-Kummissjoni, jiddikjara li konċentrazzjoni taffettwa b’mod sinifikanti l-kompetizzjoni fis-suq domestiku tiegħu. F’każ li l-Kummissjoni tqis li tali prodott jew servizz jippreżenta l-karatteristċi kollha ta’ suq distint, hi tista’ tiddeċiedi li tirreferi l-każ kollu jew parti minnu lill-awtoritajiet kompetenti tal-Istat Membru. F’każ li l-Kummissjoni tqis li tali suq distint jikkostitwixxi parti sostanzjali mis-suq komuni, hi ser tirreferi l-każ kollu jew parti minnu relatat mas-suq distint.
• Il-Kummissjoni għandha jew 25 jum ta’ ħidma (f’investigazzjoni ta’ Fażi I) jew 65 jum ta’ ħidma (f’investigazzjoni ta’ Fażi II) wara n-notifika tal-konċentrazzjoni biex tiddeċiedi jekk tindirizzax il-każ hi stess taħt dan ir-regolament jew li tirreferi l-każ kollu jew parti minnu lill-awtoritajiet kompetenti tal-Istat Membru. Jekk il-Kummissjoni tonqos li tadotta deċiżjoni, il-każ ikun meqjus li jkun irreferut lill-Istat Membru kkonċernat.
• Stati Membri jistgħu wkoll jitolbu li l-Kummissjoni tinvestiga konċentrazzjoni mingħajr id-dimensjoni tal-UE meta din taffettwa l-kummerċ bejn Stati Membri u thedded b’mod sinifikanti l-kompetizzjoni fi ħdan it-territorju tal-Istat jew Stati Membri li jkunu għamlu din it-talba. Il-Kummissjoni imbagħad trid tinforma lill-awtoritajiet kompetenti tal-Istati Membru u l-impriżi kkonċernati, u tissettja limitu ta’ żmien ta’ 15-il jum ta’ ħidma biex fihom kull Stat Membru jkun jista’ jissieħeb mat-talba inizjali. Jekk, fi żmien 10 ijiem ta’ ħidma wara l-iskadenz tal-limitu ta’ żmien biex tissieħeb mat-talba inizjali, il-Kummissjoni tkun għadha m’adottatx deċiżjoni biex tirreferi jew ma tirreferix, ikun meqjus li tkun adottat deċiżjoni konformi mat-talba.

Pakkett ta’ simplifikazzjoni tal-fużjoni

Peress li l-esperjenza wriet li ċerti kategoriji ta’ konċentrazzjonijiet ġeneralment ma jqajmux tħassib dwar kompetizzjoni, il-Kummissjoni, matul is-snin, fittxet li tiffoka l-attenzjoni tagħha fuq każijiet iktar kumplessi, u li tnaqqas il-piż amminstrattiv assoċjat ma’ dawk li ma jqajmux tħassib.

L-aħħar inizjattiva tal-Kummissjoni biex tissimplifika l-proċess kien fl-2023 meta adottat pakkett li fih ir-Regolament (UE) 2023/914 (att ta’ implimentazzjoni), avviż dwar il-proċedura ssimplifikata għal ċerti konċentrazzjonijiet taħt ir-Regolament (KE) Nru. 139/2004 u komunikazzjoni dwar is-sottomissjoni ta’ dokumenti. L-avviż tal-Kummissjoni jistabbilixxi l-kundizzjonijiet li taħthom hi ser tagħmel rieżami ta’ ċerti konċentrazzjonijiet u tipprovdi gwida dwar il-proċedura simplifikata mniżżla f’Anness II tar-Regolament (UE) 2023/914.

Il-bidliet, li daħlu fis-seħħ fl-1 ta’ Settembru 2023 għandhom l-għan li jnaqqsu l-burokrazija żejda involuta biex tipprovdi notifika dwar fużjonijiet sew għall-partijiet notifikanti kif ukoll għall-Kummissjoni. Huma jiċċaraw liema każijiet jistgħu jkunu indirizzati taħt il-proċedura simplifikata, jnaqqsu l-ammont ta’ informazzjoni meħtieġa għan-notifiki dwar tranżazzjonijiet fil-każijiet kollha u jintroduċu notifiki elettroniċi awtomatikament.