Sistema TRACES

 

SOMMARJU TA’:

Deċiżjoni 2003/623/KE dwar l-iżvilupp ta’ sistema kompjuterizzata integrata magħrufa bħala Traces

X’INHU L-GĦAN TAD-DEĊIŻJONI?

Din toħloq il-bażi tad-data ċentrali unika Traces għall-monitorjar tal-movimenti ta’ annimali u prodotti ta oriġini mill-annimali, kif ukoll prodotti organiċi, tas-sajd, tal-pjanti u għall-protezzjoni tal-pjanti, u injam ġewwa l-UE u li jkunu ġejjin minn barra l-UE.

PUNTI EWLENIN

Il-karatteristiċi ewlenin ta’ Traces huma:

• it-trażmissjoni elettronika tal-informazzjoni;
• il-ġestjoni ċentralizzata tad-data ta’ referenza statutorja;
• l-interoperabbiltà ma’ sistemi oħra tal-informazzjoni;
• il-multilingwiżmu.

Objettivi

Is-sistema Traces għandha l-għan li:

• ittejjeb il-kwantità u l-kwalità tal-informazzjoni dwar il-movimenti tal-annimali;
• ittejjeb l-iskambju ta’ informazzjoni bejn l-awtoritajiet nazzjonali u tal-UE;
• tipprovdi sistema ta’ ċertifikati veterinarji elettroniċi li tippermetti lin-negozji jiksbu informazzjoni online;
• tipproduċi listi ta’ stabbilimenti minn pajjiżi barra mill-UE li huma awtorizzati jesportaw prodotti ta’ orġini mill-annimali lejn l-UE;
• timmaniġġja l-kunsinni li jiġu rrifjutati fil-fruntieri tal-UE;
• timmira l-kontrolli fuq is-saħħa pubblika u tal-annimali u l-benesseri tal-annimali (b’mod partikolari waqt it-trasport tagħhom, eċċ.);
• tiċċentralizza l-evalwazzjoni tar-riskji potenzjali ta’ epidemija;
• tegħleb diffikultajiet relatati mal-lingwa billi tagħmel l-informazzjoni minn pajjiżi oħra aktar aċċessibbli;
• tintegra l-operaturi kollha kkonċernati billi tqiegħed fis-seħħ sistema biex jiġu skambjati d-dokumenti bejn in-negozji u l-awtoritajiet kompetenti.

Operazzjoni

Il-produtturi u n-negozji jistgħu jiġu integrati fi Traces jekk dawn ikunu rreġistrati mill-awtorità kompetenti rilevanti. Meta dawn ikunu jixtiequ jittrasportaw annimali jew prodotti tal-annimali, dawn iridu jimlew formola elettronika standardizzata li tinkludi l-informazzjoni xierqa kollha li tirrigwarda l-annimal jew il-prodott ta’ oriġini mill-annimali, id-destinazzjoni u kwalunkwe stadju tal-vjaġġ.

Fil-każ ta’ kummerċ ġewwa l-UE fl-annimali jew fil-prodotti ta’ oriġini mill-annimali, l-informazzjoni tintbagħat lill-awtorità kompetenti tal-pajjiż ta’ oriġini tal-UE. Wara li tivverifika l-formola, l-awtorità tista’ tirrifjuta jew tapprova t-trasport. Fejn ikun xieraq, din se toħroġ iċ-ċertifikat tas-saħħa u l-pjan tar-rotta relatat mal-benesseri tal-annimali fil-lingwi uffiċjali tal-pajjiż ta’ oriġini u ta’ destinazzjoni tal-UE. L-operatur privat jista’ jwettaq it-trasport biss jekk jekk ikun irċieva l-awtorizzazzjoni.

Fil-każ ta’ importazzjoni jew tranżitu ta’ annimali jew prodotti ta’ oriġini mill-annimali minn barra l-UE, l-uffiċjal fil-post ta’ spezzjoni fil-fruntiera li jivverifika l-annimali jew il-prodotti u d-dokumenti tal-importazzjoni veterinarja huwa responsabbli biex idaħħal l-informazzjoni rilevanti fil-bażi tad-data ta’ Traces, inkluża d-deċiżjoni dwar jekk jiġix permess jew irrifjutat l-aċċess għat-territorju tal-UE, u biex joħroġ Dokument Veterinarju Komuni għad-Dħul.

Din l-informazzjoni kollha tintbagħat lill-awtorità veterinarja tal-pajjiż ta’ destinazzjoni tal-UE, lill-awtorità veterinarja ċentrali tal-pajjiż jew tal-pajjiżi ta’ tranżitu jew lill-punti ta’ kontroll xierqa kollha. Din imbagħad tista’ tiġi kkonsultata matul il-verifiki li jitwettqu fuq ir-rotta u/jew fid-destinazzjoni. Din l-informazzjoni tista’ tiġi kkonsultata wkoll min-negozji rreġistrati bil-bażi tad-data. Is-sistema hija disponibbli għall-utenti mingħajr ħlas.

Skont ir-Regolament (UE) 2017/625 dwar it-twettiq ta’ kontrolli uffiċjali tul il-katina agroalimentari, is-sistema Traces għandha tiġi integrata fis-sistema ta’ ġestjoni tal-informazzjoni għall-kontrolli uffiċjali tal-UE (magħrufa bħala IMSOC). Il-bażi ġuridika għas-sistema Traces se tkun ir-Regolament (UE) 2017/625 mill-14 ta’ Diċembru 2019 ’il quddiem.

MINN META TAPPLIKA D-DEĊIŻJONI?

Din ilha tapplika mid-19 ta’ Awwissu 2003.

SFOND

Is-sistema Traces issostitwixxiet diversi sistemi separati preċedenti b’sistema unika waħda biex tiġi evitata d-duplikazzjoni, biex jiġi simplifikat il-monitoraġġ tal-movimenti tal-annimali u biex dan isir aktar effiċjenti. Il-Kummissjoni Ewropea hija responsabbli biex tikkontrolla, tiżviluppa u żżomm is-sistema Traces.

Għal aktar informazzjoni, ara:

• Traces (Kummissjoni Ewropea).

DOKUMENT EWLIENI

Id-Deċiżjoni tal-Kummissjoni 2003/623/KE tad-19 ta’ Awwissu 2003 dwar l-iżvilupp ta’ sistema kompjuterizzata integrata magħrufa bħala Traces (ĠU L 216, 28.8.2003, pp. 58-59)

DOKUMENTI RELATATI

Ir-Regolament (UE) 2017/625 tal-Parlament Ewropew u tal-Kunsill tal-15 ta’ Marzu 2017 dwar il-kontrolli uffiċjali u attivitajiet uffiċjali oħra mwettqa biex jiżguraw l-applikazzjoni tal-liġi tal-ikel u tal-għalf, ta’ regoli dwar is-saħħa u t-trattament xieraq tal-annimali, dwar is-saħħa tal-pjanti u dwar prodotti għall-protezzjoni tal-pjanti, li jemenda r-Regolamenti (KE) Nru 999/2001, (KE) Nru 396/2005, (KE) Nru 1069/2009, (KE) Nru 1107/2009, (UE) Nru 1151/2012, (UE) Nru 652/2014, (UE) 2016/429 u (UE) 2016/2031 tal-Parlament Ewropew u tal-Kunsill, ir-Regolamenti tal-Kunsill (KE) Nru 1/2005 u (KE) Nru 1099/2009 u d-Direttivi tal-Kunsill 98/58/KE, 1999/74/KE, 2007/43/KE, 2008/119/KE u 2008/120/KE, u li jħassar ir-Regolamenti (KE) Nru 854/2004 u (KE) Nru 882/2004 tal-Parlament Ewropew u tal-Kunsill, id-Direttivi tal-Kunsill 89/608/KEE, 89/662/KEE, 90/425/KEE, 91/496/KEE, 96/23/KE, 96/93/KE u 97/78/KE u d-Deċiżjoni tal-Kunsill 92/438/KEE (Regolament dwar il-Kontrolli Uffiċjali) (ĠU L 95, 7.4.2017, pp. 1–142)

Emendi suċċessivi għar-Regolament (UE) 2017/625 ġew inkorporati fid-dokument oriġinali. Din il-verżjoni konsolidata għandha valur dokumentarju biss.

Ir-Regolament (UE) 2016/429 tal-Parlament Ewropew u tal-Kunsill tad-9 ta’ Marzu 2016 dwar il-mard trasmissibbli tal-annimali u li jemenda u jħassar ċerti atti fil-qasam tas-saħħa tal-annimali (“Liġi dwar is-Saħħa tal-Annimali”) (ĠU L 84, 31.3.2016, pp. 1-208)

Ara l-verżjoni konsolidata

Ir-Regolament tal-Kummissjoni (KE) Nru 1235/2008 tat-8 ta’ Diċembru 2008 li jistabbilixxi r-regoli dettaljati għall-implimentazzjoni tar-Regolament tal-Kunsill (KE) Nru 834/2007 dwar l-arranġamenti għall-importazzjonijiet ta’ prodotti organiċi minn pajjiżi terzi (ĠU L 334, 12.12.2008, pp. 25-52)

Ara l-verżjoni konsolidata

Ir-Regolament tal-Kummissjoni (KE) Nru 889/2008 tal-5 ta’ Settembru 2008 li jistabbilixxi regoli dettaljati għall-implimentazzjoni tar-Regolament tal-Kunsill (KE) Nru 834/2007 dwar il-produzzjoni organika u t-tikkettar ta’ prodotti organiċi fir-rigward tal-produzzjoni, it-tikkettar u l-kontroll organiku (ĠU L 250, 18.9.2008, pp. 1-84)

Ara l-verżjoni konsolidata

Ir-Regolament tal-Kunsill (KE) Nru 2173/2005 tal-20 ta’ Diċembru 2005 dwar l-istabbiliment ta’ skema ta’ liċenzjar FLEGT għall-importazzjoni ta’ injam fil-Komunità Ewropea (ĠU L 347, 30.12.2005, pp. 1-6)

Ara l-verżjoni konsolidata

l-aħħar aġġornament 27.04.2018